فيه قصة لطيفة من فولكلور الإفريقي بتحكي عن ملك كان عنده خاتم مؤمن أنه سر مُلكه و قوته وأن محدش يقدر يمسه بأذي طول ما هو لابس الخاتم ده... الملك مكنش بيقلع الخاتم خالص، كان بينام و بيصحي و يأكل و يستحمي و هو لابسه. الوقت الوحيد اللي كان بيقلع الخاتم فيه لما كان بينزل في النهر المقدس ( لأنه كان لازم ينزل فيه سلبوتة بدون اي ملابس أو حلى أو متعلقات شخصية) و في مرة من المرات لما جيه وقت استحمام الملك في النهر المقدس، اللي كان بيتعبر نوع من أنواع العبادة، الملك طلب من حراسه الابتعاد و خلع كل ملابسه و قلع الخاتم و خباه تحت طوبة و نزل النهر. الملك لما طلع وجري علي الطوبة عشان يلبس الخاتم، لقى ايه؟؟ ملقاش حاجة طبعاً و الخاتم كان اختفي!! الملك اتجنن و طلب من حراسه يدوروا علي السارق و يعدموه فوراً بس للاسف محدش كان عارف مين اللي سرق الخاتم اصلا. الملك لما فاض بيه الأمر و ضاقت بيه السبل أمر بإحضار كبير السحرة و طلب منه معرفة هوية السارق . كبير السحرة قال للملك "دي حاجة بسيطة خالص،انا تقريبا عرفت مين اللي سرق الخاتم. كل اللي عايز سموك تعمله دلوقتي انك تطلب من حطابين القصر يصنعوا عصيان متساوية الطول بعدد افراد المملكة" .. الملك استغرب و قال له "ايه الهبل ده؟ ليه؟؟" كبير السحرة قال " اسمع مني بس. بعد ما العصيان تخلص هتجمع كل افراد المملكة في ساحة القصر و سيب الباقي عليا و علي سحري." الملك وافق علي مضض وهو مش فاهم حاجة. بالفعل، اليوم اللي بعده حراس الملك جمعوا في الساحة كل أفراد المملكة بما فيهم زوجة الملك و أولاده، و كبير السحرة قعد يقول تعاويذ و يتشقلب و يتنطط و في الاخر ادي لكل واحد عصاية مسحورة لازم يحتفظوا بيها لليوم التالي والا اللعنة هتصيب بيوتهم. الناس روحت بالعصيان و هي بتضرب كف علي كف! بناءا علي تعليمات كبير السحرة، الملك قال لزوجته: "اقول لك علي سر بس توعديني ماتقوليش لحد؟" الزوجة وعدته طبعا. الملك قال لها أن العصيان دي كبير السحرة سحرها فعلا بحيث إن اللي سرق الخاتم عصايته هتطول بمقدار 3 اصابع علي بكرا الصبح. وبما أن زوجة الملك ست لتاتة -وهو عارف- راحت لصاحبتها المخلصة و قالت لها ماتقولش لحد. صاحبتها راحت قالت لمامتها و مامتها لاختها و اختها لزوجها و زوجها لخادمه.. وفي غضون ساعات "السر" اتعرف بين أهل المملكة كلهم. اليوم التالي اجتمع الناس في ساحة القصر للمرة الثانية والملك طلب من كل واحد يخرج عصايته من كل واحد يخرج عصايته علشان تتقاس. و فعلا واحد من حراس الملك قعد يقيس كل العصيان لحد ما لقي واحد عصايته اقصر بمقدار 3 اصابع بالظبط. كبير السحرة أشار إليه و صرخ : "هو ده سارق خاتم الملك!" الرجل اعترف من اول قلم علي قفاه و طلع الخاتم فعلا و اترمي في السجن. الملك بعد ما استعاد الخاتم بتاعه جاب كبير السحرة يشكره علي قواه السحرية و قدراته الخارقة، بس الساحر قال للملك: "السحر اللي مارسته علي السارق وخلاه يشيل من عصايته مقدار 3 اصابع و يفضح نفسه بنفسه هو سحر الخوف اللي القيته في نفس السارق و اللي كان اقوي من إيمانه بقدرة الخاتم علي حمايته... الخوف هو أقوي سحر ممكن تمارسه علي إنسان." ده الكتاب اللي قرأت فيه القصة، الكتاب جميل جدآ و فيه 32 قصة فولكلورية من مناطق مختلفة في أفريقيا جمعهم نيسلون مانديلا بنفسه.
Oops! This image does not follow our content guidelines. To continue publishing, please remove it or upload a different image.
