حواديت قبل النوم

كرونوس ونموذج الأب

الأسطورة بتاعتنا النهاردة بتبدأ بأورانوس Uranus وجايا Gaia.. وفقًا للأساطير الإغريقية، أورانوس هو الآله الأول وكان بيتجسد في صورة السماء وجايا زوجته هي الأرض (يُقال إنها كانت الحاجة والدته برضه في نفس الوقت). العداوة بين أورانوس وجايا ظهرت لما أورانوس أبتدى يحس بتهديد من ناحية أولاده اللي كان منهم العملاقة titans والسايكلوبس (المخلوقات اللي بعين واحدة) cyclops وقرر أنه يحبسهم.. فين بقى؟ حبسهم في باطن الأرض، وده معناه إنه رجعهم رحم جايا تاني وده اللي أتسببلها في ألم جسدي ونفسي كبير.

فجايا أتفقت مع أولادها المحبوسين على أورانوس جوزها وفعلا أتلموا عليه كلهم ، وجيه أصغرهم كرونوس Cronus (وفي الأساطير الرومانية كان اسمه Saturn أو زحل) و.. إحم.. أخصاه، وده طبعًا رمز لسلب السلطة منه للأبد. كرونوس هو اللي بقى الكبير بتاعهم من بعده وأتجوز أخته ريا Rhea .. المهم إن والده ووالدته، أورانوس وجايا، قالوله إنه هيلاقي نفس المصير على يد أولاده. فبسبب خوفه من القدر ده وخوفه من تكرار نفس السيناريو اللي حصل مع أورانوس معاه، كرونوس قرر إنه ياكل أولاده!

أيون زي ما قريتوا كده، كان كل ما ريا تجيبله حتة عيل يروح واكله لحد ما ريا فاض بيها وجات عند أخر طفل خلفته (دي عيال تعبت فيها برضه مش ساندوتشات شاورما من أبو حيدر) وبدلته بحجر وهربت الطفل لجزيرة كريت ولفت الحجر في ملاية زي الأطفال وأدته لكرونس اللي أكل الحجر على إنه ابنه بلا أي تمييز ما شاء الله.

الطفل اللي ريا هربته ده هو زيوس Zeus بذات نفسه اللي كبر وقرر ينتقم من أبوه بمساعدة أمه. وفعلاً قدر إنه يهزم كرونوس ويجبره إنه يرجّع أخواته اللي أكلهم (يع!) وحبسه في باطن الأرض هو وبقية العمالقة وطلع هو وأخواته "المتفوفين" لجبل الأوليمب علشان يحكموا.

واضح إنها عيلة زبالة في بعض بس اللي يهمنا فيها هي علاقة الآباء بأولادهم.

وفقًا لعلم النفس، في اللاوعي الجمعي للإنسان فيه حاجة اسمها the father archetype أو النموذج الأصلي للأب واللي بيرمز للقوة الذكورية، الجانب الإيجابي للصورة دي هو القانون والانضباط والحكمة، والسلبي السيطرة والتملك. نموذج الأب ده ممكن يتمثل في صورة إله أو أب أو سلطة سياسية، كل واحد وحسب تجربته ومعتقداته. اللي بيميز نموذج الأب أن على الرغم من كونه مصدر الحياة والسلطة إلا إنه بيبقى خايف من فقدانه للمكانة دي على يد أولاده اللي هم جزء منه وامتداد له.

يعني الشخص أو الشيء اللي بيمثل نموذج الأب بيبقى مشدود بين رغبتين لاواعيتين: الرغبة الأولى هي الامتداد والحفاظ على الامتداد ده لإنه جزء منه وبيدل على استمراريته والرغبة الثانية هي تملك الامتداد والتأكد من عدم خروجه عن نطاق الذات. وبالتالي الابن بيبقى برضه مشدود بين رغبته في الانفصال عن أو تدمير سيطرة الأب وبين الانصياع لسلطته والحفاظ على صورته.