حواديت قبل النوم

The Minotaur ~

كان الماينتور كائن مشهور جدا ف الأساطير الإغريقية و اتجسد ف كذا فيلم عن الإغريق ف قررت اني اشرحلكم الكائن الغريب دا اللي نصه بني ادم و نصه ثور اللي محبوس ف متاهة في ال كريت اتخلق ازاي ؟ **** ملحوظه صغيرة قبل ما ابدأ: فيه شويه كلام هنا فيه ناس هتعتبره اباحي و مينفعش يتقال لكن انا هحاول ع اقل ما اقدر اوصل اللي حصل بدون ما اقول كلام وحش اوي يعني .بس اللي متابع الأساطير الإغريقية عارف ان حياتهم كلها قليلة الادب أصلاً كان فيه واحد اسمه مايِنس Minos دخل مسابقة ضد أخواته علي مين هايحكم الجزيرة ، ف كان بيخسر فا من رغبته في أنه يبقي الملك مايِنس صلي (استغفر الله العظيم ) ل بوسايدن - إله البحر - أنه يبعتله ثور ابيض كا علامة تشجيع و أمره أنه المفروض يقتل الثور دا و يقدمه قربان للمعبود ك علامة شكر لبوسايدن علي هديته. ف احنا عارفين أن مينفعش أمر الإله مايتنفذش، لكن للأسف مايِنس ارتبط ب الثور و مرضاش يقتله من كُتر جماله لكن ضحي ب ثور تاني علي أمل أن بوسايدن ميعرفش الفرق ، لكن طبعا بوسايدن عرف و غِضب غَضب كبير ف قرر يعاقبه بأنه يلعن مرات مايِنس " باسيڤي " بأنها تحب الثور الأبيض و مع كل يوم كانت بتقع ف غرامه اكتر ف طلبت من دايدلوس - الراجل العبقري اللي كان بيخترع حاجات ف وقتهم - أنه يبني ليها ثور فاضي من جوا مصنوع من الخشب بس ساب فتحة من ورا ، فا باسيڨي دخلت جوا الثور دا عشان تعاشر الثور الأبيض و حملت من الثور دا و ولدت " ماينتور " نص بني ادم و نص ثور . باسيڤي حاولت بجهد فظيع انها ترعي الوحش الي خلفته دا لكن كل ما كان بيكبر كان بيبقي شرس و محدش عارف يتحكم فيه ، مكنش ليه اي مصدر للتغذية غير أنه ياكل البشر . فا لما الملك مايِنس عرف أنه مش هيعرف يسيطر علي الوحش و خوفه من أنه يخسر العرش قرر أنه يسافر ل دالفي عشان يقابل العرافة اللي مشهورة هناك عشان ياخد بنصيحتها ، قالتله أنه لازم يبني متاهة تحت قصره عشان يتحبسوا فيها الماينتور . فا الملك رجع و طلب من دايدلوس و ابنه ايكرس انهم يبنوا المتاهة ديه . ابن مايِنس الوحيد سافر ل أثينا عشان يشارك في الألعاب الاثينية ، فيه ناس اعتقدوا أنه اتقتل ف الألعاب ديه بسبب أن الاثينين كانوا متغاظين من مهاراته و فيه ناس تانية اعتقدوا انه دخل المتاهة عشان يقتل الوحش و مات هناك . لكن لما الملك مايِنس سمع خبر ان ابنه الوحيد ولي العهد مات كان غضبان و أمر بشن حرب علي أثينا و لما اتناقش مع العرابة ، الملك اجياوس - ملك أثينا - استسلم لطلبات مايِنس ، كل سنة أثينا تقدم قربان للملك ماينس عبارة عن 7 ولاد و 7 بنات و يتبعته جوا المتاهة عشان ياكلهم الميناتور ك عقاب علي أنهم قتلوا ابن مايِنس .ف خلال السنة التالتة من القربان ، ابن الملك اجياوس " ثايسيوس " تطوع أنه يروح كريت و يقتل الماينتور بنفسه عشان يوقف القرابين ديه .ثايسيوس وعد ابوه أنه هايأمر البحارين يرفعوا شعار ابيض لو نجح ف قتل الماينتور و شعار اسود لو مات .لما ثايسيوس وصل كريت بنات مايِنس الاتنين " اريادني و فايدرا " وقعوا في حب ثايسيوس و مقدروش يستحملوا فكرة أن ثايسيوس ممكن اخوها من امها الماينتور يقتله ، اريادني راحت ل دايدلوس و توسلت ليه أنه يقولها ازاي يهرب من المتاهة قبل ما ثايسيوس يدخل المتاهة ، اريادني اديته بَكرة خيط عشان يعرف طريق عودته بعد ما يقتل الوحش .ثايسيوس بعد ما دخل لف المتاهة كلها بيدور علي الوحش و أخيراً لاقاه ، بعد معركة فظيعة ما بينهم ثايسيوس قدر يحط سيفه ف زور الماينتور و يموته.بعد أن أتأكد أنه مات ، ثايسيوس استخدم بَكرة الخيط عشان يعرف طريق خروجه من المتاهة و رجع ل اريادني و فايدرا و ركبوا مركب عشان يرجعوا ل أثينا و ف طريق رجوعهم ، ثايسيوس اتخلي عن اريادني و رماها ف جزيرة ناكسيوس عشان كان ف مخططاته من الاول انه يتجوز فايدرا ( رجال عرر و ربنا حتي ف الأساطير، يعني الولية ساعدتك و دا شكرك ليها ) لكن اريادني قابلت دايانيسوس - إله الخمر - و اتجوزها .**سيبكم منهم دول بقي و نركز ف الواطي ثايسيوس.لما ثايسيوس قرب من أثينا و مراته فايدرا كان فرحان جدا أنه راجع مع مراته نسي يقول للبحارين انهم يرفعوا الشعار الابيض ف لما الملك اجياوس شاف الشعار و لما شاف الشعار الاسود مرفوع فكر ان ابنه مات من كتر حزنه وقف ع حافة الجبل و رمي نفسه .بعدها ثايسيوس بقي الملك الجديد ل أثينا.و ديه قصة ولادة الماينتور و موته.