حواديت قبل النوم

ميديا بين الثورة و العقاب

النهاردة هنتكلم عن شخصية مثيرة للجدل - وفى الاغلب مغضوب عليها - من عالم الاساطير الاغريقية و هي ميديا Medea

و هنبتدى القصة من عند البطل الاغريقى جاسون Jason اللي باباه كان مُقدًر له إنه يحكم المملكة اللى عايشين فيها من أخوه - عم جاسون - شقلطه و بقى هو الملك و حبس أخوه. جاسون بقى لما كبر و طالب بحقه و حق والده فى العرش عمه أوكل له مهمة شبه مستحيلة و أشترط عليه أنه لو عايز يبقى الملك فعلاً لازم يروح مملكة كولخيس Colchis و يجيب الصوف الذهبى الشهير من هناك.

و الصوف الذهبى The Golden Fleece ده ليه قصة طويلة عريضة مش وقتها دلوقتى بس باختصار هو الصوف الخاص بكبش من كباش زيوس. الكبش ده من كان مقدس و له جناحات و لما تم التضحية بيه الصوف بتاعه بقى مِلك لمملكة كولخيس وفى حراسة تنين مايبنامش.

طبعاً بما أن جاسون كان عامل فيها بطل الأبطال قال أروح أجيب الصوف الذهبى وماله! و بنى سفينة جمع فيها أشهر أبطال الاغريق وقتها منهم هرقل Heracles و اسمى السفينة أرجو Argo وبسبب اسم السفينة أطلق عليه هو و الابطال اللي معاه اسم The Argonauts أو الرحلة الأسطورية. جاسون و أصحابه قابلهم تشكيلة مميزة من الوحوش و المصائب و الغرائب لحد ما وصولةا لكولخيس.

مين بقى اللي أول ما شافت جاسون وقعت فى حبه و قررت إنها تساعده يحصل على الصوف الذهبى ؟ بالظبط .... ميديا. ميديا كانت ابنة ملك كولخيس و كان معرةف عنها إنها كانت واسعة الحيلة و بتمارس السحر كمان. بجانب إنها كانت بتحذره من المصاعب اللي هتقابله عشان يعمل حسابه. ميديا كانت بتدى جاسون وصفات سحربة و تعاويذ و حاجات من دى علشان يعرف يوصل للصوف الذهبى زى مثلاً اما أدته سائل ما يرشه على التنين اللي مابينامس فاتقلب زى سبت البصل وراح فى سابع نومة. وفى النهاية جاسون فعلاً حصل على الصوف الذهبى وميديا هربت معاه و رجعت مع الرحلة الأرجونية إلى مملكة جاسون.

وبما إن عم جاسون كان راجل دنىء ومعفن رفض بردوا يسلم الحكم لجاسون على الرغم من تنفيذه للشرط. ف جاسون استعان للمرة الحفنتلاف بميديا الداهية اللى قدرت تتخلص من عم جاسون عن طريق إقناع بناته - باستخدام السحر والشعوذة - إنهم يقتلوه. ولما الناس عرفت بالهباب اللى هببته ميديا تم نفيها هى و جاسون من المملكة وراحوا اتجوزوا و عاشوا فى كورينثيا Corinthia لفترة طويلة.

الأسطورة ليها أكتر من نهاية بس النهاية الأشهر هى اللي جاءت فى رواية الشاعر الإغريقى يوربيديس Euripides واللى بيقول لنا فيها ان جاسون حب يتقرب من ملك كورينثيا عن طريق الزواج من إبنته و ساعتها قرر إنه يهجر ميديا وأولاده منها فى سبيل الحصول على شابة أجمل وأصغر (عايز حش رقبته بردوا). فرحات ميديا عملت إيه بقى ؟ جابت خنجر ودبحت ولادها!!!