حواديت قبل النوم

بين سيلا وكاريبدس

التعبير الشهير في اللغة الإنجليزية Between Scylla and Charybdis واللي بيدي نفس معنى التعبير العربي "بين المطرقة والسندان" مستوحى من الأساطير الإغريقية وبيشير لواحدة من المصاعب اللي البطل أوديسيوس Odysseus واجهها أثناء رحلته للرجوع لبيته بعد حرب طروادة..

سيلا Scylla كانت وحش نصفه اللي فوق أنثى ونصفه اللي تحت ديل تنين وكلاب سعرانة وحاجة يا ساتر يا رب خالص.. سيلا كانت بتستخبى ورا منحدر صخري وبتهاجم السفن اللي بتعدي من المضيق اللي جنب المنحدر. سيلا كانت بتتسم بالغضب الشديد الدائم وكانت بتأكل البحارة اللي على السفن، أما كاريبدس Charybdis بقى كانت وحش آخر بس على شكل دوامة مائية وكانت بتبلع السفن اللي بتعدي جنبها.

تعبير "ما بين سيلا وكاريبدس" بقى يطلق على أي موقف الواحد بيلاقى نفسه فيه مزنوق بين خيارين الاتنين أنيل من بعض زي بالظبط ما حصل مع أوديسيوس لما أتزنق هو والبحارة بتوعه – علشان يعرفوا يعدوا من المضيق – بين إنهم يتاكلوا من سيلا أو يغرقوا على أيد كاريبدس.

الفكرة بقى إني اليومين دول حاسة بنفس المزنق اللي وقع فيه أوديسيوس. المشاكل اللي أنا فيها ضاغطة عليا لدرجة إني بقيت بترنح بين اختيارين زفت: يا استسلم للغضب (سيلا) وأعض في اللي حواليا وده طبعًا شيء مرفوض بالنسبة لي شكلاً وموضوعًا.. يا استسلم لدوامة الانغلاق والاكتئاب (كاريبدس). هو غالبًا أنا معظم الوقت واخدة السفينة وقازحة بكل أريحية ناحية كاريبدس مع إدراكي التام إن أكيد فيه طريقة تالتة. أوديسيوس بقى شاف إن كاريبدس أكثر خطورة من سيلا لأنها هتبلعه هو والبحارة والسفينة في حين إن سيلا هتأكل كام واحد من جنوده وخلاص، وده اللي هو عمله فعلاً.

قد يكون هو ده الحل.. إن الواحد يضحي بجزء من الأجزاء المكونة لنفسه ويخف الحمل شوية علشان يعرف يعدي، بس في المقابل هيخسر ناس كانوا جزء منه ومن حياته (جنود أوديسيوس). بس الفكرة المتعبة بقى.. طيب هو مال الجنود اللي ماتت؟ ليه يقعوا ضحية لسيلا علشان أوديسيوس يعيش؟ ليه أخسر ناس – آه بقوا حمل تقيل عليا دلوقتي – بس مش في نيتهم يسببوا لي أي أذى وكانوا في يوم من الأيام جزء مني؟ ليه أحسسهم إنهم ملهمش لازمة أو عبء أو مستحقين لغضب سيلا؟ فاهمة إن الاستسلام لكاريبدس حل منيل لجميع الأطراف بس على الأقل مفيهوش الذنب اللي هيترتب على التضحية بالجنود لسيلا.

في مخيلتي كنت أتمنى أوديسيوس يلاقي حل أو طريق تالت.. فيا نعيش عيشة فُل يا نموت إحنا الكل في كاريبدس بقى.