شايف من يجن كلهن
ولازم كون تحملهن
لا بيك التأجلهن..
ولا بيك التخلصهن ...
ذنب حسابه بالدنيا يجي سريع. وذنب يمد الله بطغيان البشر وينطي بالزايد
مساء الورد 🌹
____بنات نادر والقدر بقلمي زهره الرمان 💓💓
اباوع منو هذا ومن تقربت
ابن عمي. اي هيثم ابن عمي
تقربت ورجليه ودتني قريب عليه
لكن الامريكان والشرطه العراقيه محاوطه المكان ومكدرت اتقرب
شفت منهم غدر وقطيعه وشفت منهم أذى لكن عمري ماحقدت عليهم. وبقيت اباوع عليه اريد اعرف وين ماخذينه
لكن الامريكان دخولهم بالعراق بالبدايه كانوا عدهم رد فعل من الجيش العراقي لان يعرفون قوتهم
لذلك كانو حذرين ودقيقين بالتعامل
وصلت للمطحنه وأني بين نارين ابن عمي اهله الهم علم وشمسوي وبين قطيعتي وياهم ع دگتهم الناقصه الي عرفت همه كلهم يعرفون بيها
ومع الأسف اخوي وياهم
همام انتبه ع شرود عقلي. وكعدني
_هاك ابو حوراء
_ناولني جكاره مورثه
_ما اشرب همام
_شبيه اليوم وجهك مكلوب
_سولفتله ع الصار والشفته
_وهسه انته مقهور ع ابن عمك ما ألومك لان انته ما تشبه گلوبهم
لكن صدكني ذوله خاف هم يذبونها براسك انته مبلغ عنه وتريد تاخذ حقك وهسه تتشمت
هيج تفكر هيج نماذج مع احترامي الك
_والعمل همام اعرف كلامك كله صح لكن گلبي بيه نار عليه
اجه ابوي كدام عيني
اكول عفيه كلوب عليهم شلون انطو بيه ما اجه ببالهم القرب
_انه من معاشرتي بيك اعرف رح تأخذه وتجيبها وتاكل بنفسك احلها الك بعد اخوك رايح اتصل ع اهله ومن مجهول اكللهم اخاف ما يعرفون يا جهه شالته
وهمه يدورن عليه وانته حتى ترتاح
_اي والله همام ولو اورطك
_عليمن بعد اخوك الورطة
روح لشغلك وانه اتصل وارجعلك
__حبيبتي بنيتي انتي حبابه حوراء
اريد تعلمين اخواتج بلا سوالف شيطنه
_ميمه انتي اعرف بيهن ما ياخذن الكلام
_بس الاعرفه يسمعلج بنيتي
تره احس انتن ماتحبن رحاب لكن صدكي هيه تحبجن
اول ايام هدوء ورحاب فرحانه ببابا
تجهز الحمام والاكل وتفتر اذا يجي البيت يدخل إنذار عدها
وكأن رئيس الوزراء فات
واحنا بقينا بموقع المتفرج
وميمه بطه فرحانه وتشجع. بيها
اما اسراء وعذراء واني نبقى نراقب ونتصيد كل حركه منها وتصرف وكلمه
نتمنى نلاكي شي حت تطلع من بيتنا
لكن وين... متمسكه بيها ميمه ومرور الايام صار بابا ما يتخلى عنها
كل زغيره وجبيره
رحاب لازم تشرف عليها. وميمه مأيده وتساعد ع كل التكوله رحاب
