انطرح بس ما نام مثل الينامون
مو ملح صم حسبات صاير بالعيون
مساء الورد والياسمين.. كيكاتي 🌹🌹
________________*
بنات نادر والقدر بقلمي زهره الرمان 🌹🌹
__شوفي المهم انتي تصرين ع موقفج ومعليج بالباقي عليه اني اعرف شلون اقنع ابوج
_وخاله
_خالتج شنو مصيطره ع ابوج
_لا بس هيه متقبل وصعب بعد الصار اخالفها
_واذا خالفتيها طز شنو رايده تهجم بيتج... ثم يصير بكل بيت مشاحنات واني احبج وميزتج عن كل بنات الدنيا
لذلك لازم هم توكفين وياي حتى ننجمع مره ثانيه..
_المريض نعالجه دوا ونتامله يطيب مسكن ويهدا.. أما نادر صاير شخص ثاني.. شك ع تصرفات مخيفه دوم يفسر الأمور ع ما يفكر هو ماعدا التحقيق الي يبدأ بيه ع اي شي نكوله
اسايره افوت اسكت حتى ما اخليه يعصب
ووي هاي الكم الثقيل من الهم واني حايره قرب دوام البنات والسنه اسراء المفروض كليه ومصاريف وحتى حوراء ملابسهن ودوامهن زاد مصروفهم
واني الصفنات تاخذني وتجيبني
من اول الصبح
_نادر اليوم اريد اروح لاهلي
_وشعندج لاهلج
_اخوي مريض
_منو يروح وياج
_اروح وحدي واني البس بوشي وصدك ما اتأخر
_سويلي جاي ولا تبقين تفرفرين بالدرابين ادري تعلمتي ع الخواره
_مي خالف ما اخور
طلعت وتحملت كل كلامه بس ردت اطلع بهدوء سويتله جاي ورغم اخاف يصتدم وي البنات لان صاير كولساع يسمعهن كلمه او يغلط
وصيتهن يبقون بالغرفه ع گد ما يريد شي واكعدن فركن رجليه وسولفن وياه من تشوفن تجيه ساعه العصبيه روحن عنه
تعلمت عليه
تجيه ساعه يفقد يبقى يغلط يريد احد يفرغ غضبه بيه
وراها يهدأ ويبقى بس يصفن ويسكت. تعلمت اني وعلمت البنات حتى ما يتاذن
صعدت سياره نفرات تمشي السياره واني ادعي باقين ب نفس مكانهم
_منووو ولج لجين منو
_بيبي مره تريدج
_خليها تفوت
_شلونج خاله
_منوو انتي
_اني رحاب بنت صفيه
_تعالي يمعزايه شجااابج
بين دموعها من عيون ضريره
فتحت ذراعها اليه
ولج يا ريحه صفيه
شيفيد اذا اعتب او اغلط عليج وع امج
_شلونج خاله
_عايشه ما متت موتت ولدي ودفنتهم وعيني بس طفا النور البيها لكن الروح عنيده ما تقبل تروح لخالقها
شلونج وشلون اخوانج الانذال
_عايشين خاله
_شذكرج بيه رحاب
_ ردت روح من امي ارمي حمولي عليها خاله تعبانه خاله
تحسست وجهي وسحبت راسي لحضنها
واني اشم ريحه امي بيها
_شبيج رحبه شبيج يا الحنينه مكسور جناحج من. صوتتج اعرفج
