لا تركض تلم فلوس شگد رايد تعيش..
الچفن ما بيه جيب مثل الدشدايش
مساء الورد والياسمين كيكاتي...
بنات نادر والقدر. بقلمي زهره الرمان
صرخه تملي الاذان بفرح رجعه
وصرخه تملي الارجاء بحزن الرحيل
ودمعه فرح ودمعه حزن لون الدنيا يوميا بحال يتغير....
خالتي الي انحكم عليها ان أهلها واحد ورا الثاني يروح وتزيد المسؤليه عليها
. راح صلاح ترك عسل وازل ونوار
وما يفاركونها مثل ضلها
وهسه صار حملها اكبر اولاد اخوها فلاح.. ثلاث ولد ماعدا الابن المسافر من قبل أحداث امه مستقر بكندا وتجنس
والبنات الي اطلكن وعدهن أطفال وهم معاناتهن وي اباء اولادهن
رجعت للبيت.. واعرف راحت خاله للدفن
اتصلت ع حوراء. وعذراء.
واكيد عذراء مكدرت تجي ابنها صغير بعده لكن.. ورا رجعتي بنص ساعه اتصلت عمه نهله وطلبت منها تجي تمر علينا حتى نروح الها..
اجت عمه نهله العصر وعمتها ورحنا وصلنا لبيت اهل خاله رحاب
شفت سياره نزلت منها ام جواد
وبدخلتنا هم فاتت خالتي ام مروان
دخلنا للفاتحه بنات فلاح رايحات للدفن وي خاله رحاب
. اني وأم جواد و وخالتي ام مروان
وكفنا للناس التعزي
عدهم كرايب لكن قليلين
لليل واجو الدفانه
دخلت خاله بأخس حال
تلكيناهن
خاله اكثر لطمها وبچيها
تعيط يا دار شالو اهلك ظلبت وحيده يا بويه يا يمه
خفنا عليها وأم جواد تهدأ بيها
تخاف عليها اني وكفت وي كم وحده كرايب بالمطبخ
مع ان فلاح الله يرحمه ممخلي احد ما معاديه
لكن بعد ساعات وسمعنا دخله حوراء هي والحجيه وأم مقدام وميقات دخلتهن
حسستني كرايبنا الاجو
ويچذب اليكول ما نحتاج المظاهر او المجاملات
لان لأجل خاله كل واحد الها فضل عليه ف نوكف بهيج ضرف
. دخلتهن
ومعازاتهن. خلت النسوان كلها تسأل منو
وخاصه من سالن جاوبت خاله
عيال بنتي الجبيره
وحوراء ملاك بيدها تخبلت ع خاله رحاب
تريدها
وخاله حتى صوت ماعندها وتحجي ع حوراء ليش ما خليتيها ببيتنا
خاله اجينا كبل لهنا
وملاك حاضنه خاله بحيث لهتها
وبعدني أضيف و ووياي عسل وازل هم وحتى بنت عمه نهله ويانا
بيتهم جبير تعشت الناس وخلصوا اني ع ايد اليصبون
اخذ مواعين من برا الاكل من الرياجيل وأولاد شباب
اجه نوار كال خاله تريدج
_ها خاله
__اخذي خواتج وروحي للبيت ارتاحن
_خاله قاسم راح يجيب سنا ودعاء ونبات هنا ما نروح نبقى وياج
_تعبتن بنتي روحن
_لا خاله هسه راح يجن البنات لاتهتمين
_عمتج نهله هم ما تريد تروح..
