ما اقيس رجال بكشخه وفلوس....
مجرود البهلول. بس چلمته دروس...
_حسين.... انه ابن دهله وطين ابن النهر والفاله... ما وكف ع راسي أبو الاب أخذه التعصب العشائري بعركه من عركات العشاير الي أكثرها تافه و
وكان ضحيتها ابوي بوسط الناس الي ادك لا بيها ولا عليها غير جبير إخوته ومنگول وي الناس انظرب ومات.... من عمري 10سنين هاي الحادثه وره ما مات ابوي وانه وحيد لأمي.. خالي اخذ امي بقت ببيته لكن امي نفسها عزيزه
ما قبلت تاكل من ايد خالي لا ورث ابوي كاع دونم بقت بيها بس ما بعدتني عن عمامي بقت تتواصل وياهم لكن بحمئ خالي ... خالي انسان اكثر عقلانيه وتعقل من التعصب وخلا امي براحتها وخيرها تتزوج او تبقى لكن امي جانت تكله..
ابقى ا بگاع ابني اخضرها لحد ما يكبر بس ما يلزم مسحاه لا الا اخليه يصير دكتور أريده يصير مثقف ويحمي روحه من سوالف العشاير الراح بيها ابوه...
تشتغل ليل نهار وتربى غنم وبقر وتكثر وتبيع خالي يتكفل ببيعهن
وحافضت ع نفسها لحد ما نجحت للأول متوسط.. من السادس كالتلي انته منا وجاي زلمتي وابني وسندي وهاي كاعك امانتي لحد ما تجيب شهاده الدكتور منو يسالها ع حسين تكللهم ان شاء الله جريب اصير ام الدكتور واني بعدني بالمتوسطه بقت هاي الكلمه هيه
بصمه بذاكرتي تحفر مخيلتي وترسم طريقي إلي انبنئ ان اصير دكتور اعتبرها الانسانه مو امي لا الرحم الشالني طول هاي السنين
اتسمع من نسوان عمامي نوبات او احد يغار من امي لان هيه عمرها 21سنه وهي ملثمه و وما يبين منها شي وتشتغل والسوته مكدر رياجيل يسووه وخالي رغم يريد جان يساعدها ماتقبل هواي خطبوها وهواي رادوها لكن دوم تكول اني عندي رجال واحد فوك الكاع وواحد جوا الكاع كل النسوان عدها زلمه واني عندي ثنين...
بالاعداديه صار عقلي اكثر نضج ورسمت الا اطلع معدل ولو ما قصرت وياي امي وكالت حالك من حال ابن خالك بعمري خلوله مدرسين وخالي لح لكن اني مقبلت بس بدرس واحد دخلت بالكيمياء.. وجنت مخطط اصير مهندس زراعي من طلع معدلي عالي من نجحت امي خلت صينيه ع راسها بيها انواع الحلويات اشترت وبقت تفتر نذرها تفتر
وهي توزع بيدها
من فرحتها اتمنى كنت أحقق كل امنيتها واخليها ترتاح واني اتفلح الكاع
وكلت لخالي وامي اقدم ع هندسه زراعي حتى اصير اكاديمي خالي كال حرامات معدلك عالي
وامي نطت يعني تصير دكتور مو
من كلت لا مقبلت تخبلت
خالي نصح بكليه الطب البيطري وكملت وطلعت من الاوائل وكملت وصرت معيد والا اصير دكتور واخلي امي تفتخر وبالفعل من عدم قبولي ع وضع التعصب الي ببيئتنا ردت اخذ امي وبعدها لكن هيه متعلقه بالأرض جنت ارجع من الكليه ع الكاع اتفلحها ومخليت امي تلزم شي بعد اعتمدت ع نفسي بيها
لكن من كعدت امي من الكاع تمرضت ومن نحجي وياها تكول تكرمت من الكعده...
