The Flawless Bachelors [FB4]

Fb4 - 20

(Unicode)

၁ပတ်ကျော် ရိုက်ကူးရေးပြီးသွားသည့်နောက် နောက်နေ့မနက်ဆိုလျှင် ရန်ကုန်ကို ပြန်ကြတော့မှာ ဖြစ်သည်။ ထို့ကြောင့် ရုပ်ရှင်အဖွဲ့သားများအားလုံးဟာ သဲသောင်ပြင်၌ စုပြီး ပါတီလေးတစ်ခုပြုလုပ်ကြသည်။ မိုးခမ်းဝါသည် အရင်ကတည်းက သိပ်မသောက်နိုင်သူမို့ ထိုပါတီကို မသွားချင်။ သို့ပေမဲ့ အခရာဖြစ်နေတာကြောင့် မသွားလို့ကမရ။ ထို့ကြောင့် ပါတီသို့ ရောက်သောအခါ သူ့ခမျာ အသောက်အစားရှိသူများကြား ရုပ်တည်ကြီးနှင့် ကွဲထွက်နေတော့သည်။

ကမ်းခြေ၌ အပျော်သဘောပြုလုပ်တာဖြစ်၍ရော ကိုယ့်လူတွေချည်းဖြစ်တာကြောင့်ပါ အားလုံးဟာ ပေါ့ပေါ့ပါးပါးပဲ ဝတ်ဆင်လာကြသည်။ မိန်းကလေးတွေကတော့ လက်ထဲက ကော့တေးလေးတစ်ခွက်ကိုင်လျက် ကမ်းစပ်တစ်လျှောက် လေညင်းခံရင်း လမ်းလျှောက်နေကြသည်။ ယောကျ်ားလေးတွေကတော့ ဂီတာသုံးလေးလတ်ငှားပြီး မီးပုံဘေး၌ အသည်းကွဲသီချင်းများ အော်ဆိုနေကြ၏။ ထိုသီချင်းဆိုပြီး ဟဲကြသောအဖွဲ့ထဲ၌ ထိပ်ဆုံးကပါသူဟာ ဝေနှောင်းပဲ ဖြစ်၏။ အဖွဲ့ထဲ၌ သူ့အသံက ထိုးထွက်နေသည်။ အဖွဲ့သားတွေက မင်း အဆိုတော်လုပ်ပါလားဟု ပင့်မြှောက်သောအခါ ရှက်ဝဲဝဲလေး ရယ်သေးသည်။

အများနှင့်တစ်ယောက် ဖြစ်နေသောမိုးခမ်းဝါမှာ သူတို့ မြူးထူးပျော်ရွှင်နေသည်ကို ကြာတော့ မရှုဆိတ်။ အမှန်ဆိုလျှင် သူသည်ကား ဝေနှောင်း၏အလုပ်ရှင်။ ဝေနှောင်းကလည်း သူ့ PA ။ ဝေနှောင်းက သူ့စိတ်အလိုတိုင်းလိုက်နေရမှာဖြစ်ပြီး သူ့ကို ဂရုမစိုက်တော့ဘဲ တစ်ပါးလူတွေနှင့် ယခုလို ပျော်နေစရာလိုသလား။ ကြာလာတော့ သူ့မျက်နှာ သိသိသာသာပျက်လာသည်။

" ဟေ့ မင်းသား၊ နားချင်ရင် ပြန်နားပါခင်ဗျာ၊ ကျွန်တော်တို့က ညလုံးပေါက်နေမလို့ရယ်"

အလိုက်သိသော ဒါရိုက်တာက လှမ်းပြောလာတော့ သီချင်းဆိုနေသူအားလုံး၏အာရုံဟာ သူ့ဆီ ရောက်လာသည်။ ဝေနှောင်းကလည်း သူ့မျက်နှာရိပ်ခြည်ကို လှမ်းအကဲခတ်လာ၏။ သူ ဝေနှောင်းကို တစ်ချက်ကြည့်လိုက်သည်။ ပြီးနောက်

" ကျွန်တော် သွားနားနှင့်ပြီ"

" ဟုတ်ကဲ့၊ နားပါဗျာ့"