The Flawless Bachelors [FB4]

Fb4 - 25

(Unicode)

နောက်နေ့မန​က်ရောက်တော့ သူတို့အားလုံး mv ရိုက်ဖို့ စောစောထကြပြီး မနက်စာစားနေကြသည်။ မနေ့ညက Official page ၌ vd အတိုများနှင့် ဓာတ်ပုံတွေ တင်ထားပြီးပြီဖြစ်၍ မှတ်ချက်တွေကိုလည်း ထိုင်ကြည့်နေကြ၏။ အဖွဲ့၏ Official page မှ vd အတိုများနှင့် teaser အတွက် ဓာတ်ပုံများတက်လာသောအခါ fandom တစ်ခုလုံး အုန်းအုန်းကျွက်ကျွက် အားပေးကြ၏။ သိန်းနှင့်ချီသည့် share များလည်း ရှိပြီး non-fan များကပါ သဘောကျကြောင်း တွေ့ရသည်။ အထူးသဖြင့် trend ဖြစ်လာစေမည့် vd အတိုလေးတွေကြောင့်ပင်။ ထိုညသည် ဆမ်ခမ်း shipper များအတွက် အပျော်ဆုံးည ဖြစ်ခဲ့၏။

ဉာဏ်တို့သည် အဖွဲ့လိုက် လိုင်းပေါ်မှ မှတ်ချက်များကို စိတ်ပါဝင်စား​စွာ ကြည့်နေကြသည်။ သည်လတွေအတွင်း ကြိုးစားထားသမျှ အရာထင်လာပြီး ယခုလို တုန့်ပြန်မှုကောင်းများ ရရှိ၍လည်း အများကြီး ကျေနပ်မိသည်။ ထိုစဉ် ကိုမိုးထက်တို့ညီအစ်ကိုနှစ်ယောက်က သူတို့ကို ရိုက်ကွင်းသွားဖို့ လာခေါ်၏။

" ကဲ ငါ့ညီတို့ အဆင်သင့်ဖြစ်ပြီလား"

" ဖြစ်ပြီလေ ကိုမိုး"

ကိုဟိန်းထက်ကတော့ ဉာဏ့်မျက်နှာရိပ်မျက်နှာကဲကို လှမ်းကြည့်နေသည်။ ထို့ကြောင့် သူလည်း ခပ်တည်တည်​ပဲ နေနေလိုက်သည်။ ကိုဟိန်းထက်က သူတို့နှင့် ယခု comeback အတွက် ပြင်ဆင်ပြီးတာနှင့် အလုပ်ထွက်တော့မှာ ဖြစ်သည်။

" ဪ ဒါနဲ့ ဟိုကောင်လေးရော မရောက်သေးဘူးလား"

ကိုမိုးထက် ပြောသောကောင်လေးဆိုတာ ခမ်း၏ PA ဝေနှောင်းကို ဆိုလိုခြင်း ဖြစ်သည်။ ဉာဏ်က နာရီတစ်ချက် ကြည့်လိုက်ပြီး

" ဟုတ်သားပဲ၊ ဘာလို့ နောက်ကျနေလဲ မသိဘူး"

" ခဏ ကိုဉာဏ် ကျွန်တော် ဖုန်းဆက်ကြည့်လိုက်မယ်"

ဆမ်က ဝင်ပြောရင်း ဖုန်းထုတ်၍ ဆက်ရန် ပြင်တုန်း ရှိသေး ဝေနှောင်းဟာ ကမူးရှူးထိုးဖြင့် dorm ထဲသို့ ပြေးဝင်လာ၏။

" ဟူး...အားလုံးကို တောင်းပန်ပါတယ်ဗျာ၊ ဟူး...ကျွန်တော် အရေးကြီးတဲ့နေ့မှ နောက်ကျသွားလို့"