The Flawless Bachelors [FB4]

FB4 - 9

(Unicode)

အဖွဲ့ဝင်အားလုံးပြန်ဆုံကြသော နား ရက်၁ပတ်ပြည့်သည့်အခါ ဝေနှောင်းလည်း အိမ်ပြန်ခွင့်ရသည်။ သူ့အတွက် အလုပ်ချိန်ကား မနက် ၇နာရီမှ ညနေ ၅နာရီအထိ ဖြစ်သည်။ ထိုအချိန်အတိအကျ မိုးခမ်းဝါအနားမှာ ရှိနေပေးလျှင် ရပြီ။ ကျန်သည့်အချိန်တွေက မန်နေဂျာနှစ်ယောက်၏တာဝန်သာ ဖြစ်သည်။ နေခမင်းမြတ်၏အကူခေါ်ထားပေးရသည့်ရည်ရွယ်ချက်ဟာ မိုးခမ်းဝါကို သရုပ်ဆောင်လိုင်းအထိ တိုးထွက်စေချင်တာကြောင့်လည်း ပါသည်။ ထို့ကြောင့်လည်း မိုးခမ်းဝါအတွက် PA က မရှိမဖြစ်လိုအပ်သည်။

" ခမ်း series က guest role ပဲမလား၊ ဘာလို့ မင်းအပိုင်းတွေ ရိုက်ကူးတာ မပြီးသေးရတာလဲ"

" ကိုနေခက ကျွန်တော့်ကို သက်သက်လုပ်ချသွားတာ ကိုစွန်းရဲ့၊ အခုက ဖြတ်လျှောက်သဘောတောင်မဟုတ်ဘူး၊ second lead နီးနီးဖြစ်နေပြီ"

စွန်းရိပ်ထင်လည်း တွေးစစနှင့် ခေါင်းညိတ်လိုက်သည်။ ကိုနေခက သူတို့လေးယောက်ထဲမှာ မိုးခမ်းဝါကိုဆိုလျှင် ထိုသို့ဖိအားပေးနေကျမို့ မထူးဆန်းပေ။ တင့်စောဉာဏ်လည်း မိုးခမ်းဝါကို ကြည့်လိုက်တော့ ချက်ချင်းမျက်နှာလွှဲသွားတာ တွေ့ရသည်။ စတွေ့ကတည်းက သူနှင့် မျက်လုံးချင်းမဆုံအောင် နေနေသည့်ခမ်းကြောင့် သူ နေရထိုင်ရခက်၏။

" မနက်ဖြန် နှစ်သစ်ကူးညမလား၊ Roman gp က စီစဉ်တဲ့ ပွဲကို မင်းတို့တက်ရမှာ၊ dance နဲ့က တစ်ပုဒ်၊ rock သီချင်းတစ်ပုဒ် cover ပေးရမယ်"

ကိုမိုးထက်အာကာ၏ညွှန်ကြားချက်ကြောင့် သူတို့မှာ ခေါင်းတညိတ်ညိတ်။

သို့ဖြစ်၍ မနက်ဖြန်ပွဲအတွက် သူတို့ စတင်ပြင်ဆင်ရသည်။ ပထမဦးဆုံး stage ၌  rehearsal သွားလုပ်ရပြီး studio မှာလည်း cover song အတွက် လေ့ကျင့်ရသည်။ ဆမ်၏ position က main dancer ပေမို့ သီချင်းနှင့် မလိုက်ဖက်သလို ခမ်းကလည်း main rapper ဖြစ်၍ ရွေးထားသည့် key က သူတို့နှစ်ယောက်လုံးနှင့် မလိုက်ဖက်။ သို့ဖြစ်၍ ဆမ့်ကို ဒရမ်တီးခိုင်းပြီး ခမ်းကိုကျ ဂီတာကိုင်ခိုင်းသည်။ သီချင်းဆိုရမည့်လူက main vocalist ဖြစ်သော လူကောင်သေးသလောက် high notes တွေ ပိုင်သည့် စွန်းရိပ်ထင်နှင့် အသံသြရှရှနှင့် ငြိမ်သောတင့်စောဉာဏ်တို့ပင်။ ထိုသို့ တစ်နေကုန်ဟိုပြေးဒီပြေးဖြင့် လေ့ကျင့်ပြီးနောက် dorm ကို ည ၉နာရီမှ ပြန်ရောက်ကြသည်။ နောက်နေ့ပွဲက ညပိုင်းမို့ သိပ်ပြီးတော့ ပြဿနာမရှိ။ မနက်ခင်းတစ်ပိုင်းလုံး သူတို့ dorm မှာ နားလို့ ရသည်။ နေ့လည်လောက်သာ stage ၌ rehearsal နောက်ဆုံးအကြိမ် သွားလုပ်ပြီး မိတ်ကပ်လိမ်းရုံပင်။