The Flawless Bachelors [FB4]

Fb4 - 27

(Unicode)

ဝေနှောင်းသည် ဧည့်ခန်းဘက်မှ ဆူဆူညံညံအသံကြောင့် အိပ်ရာမှ နိုးလာသည်။ သူလည်း မျက်ချေးများဖြင့် ပိတ်နေသော မျက်ဝန်းအား လက်ဖြင့် ပွတ်လိုက်ရင်း အိပ်ခန်းတံခါးအား ​ဖြည်းညင်းစွာ ဖွင့်လိုက်သည်။

ထို့နောက် ဧည့်ခန်းထဲက အခြေအနေကို တစ်ချက်လှမ်းချောင်းကြည့်လိုက်သည်။ ကိုခမ်းနှင့် ကိုနေခဟာ မျက်နှာချင်းဆိုင် ရပ်နေကြပြီး ကိုခမ်း၏မျက်နှာဟာ ဆိုးဆိုးရွားရွား ပျက်ယွင်းနေ၏။ ထိုစဉ် ကိုခမ်းက ကိုနေခ၏ရှေ့၌ ဒူးထောက်ချလိုက်၏။ ဝေနှောင်းတစ်ယောက် အလွန်ပင် အံ့အားသင့်သွားမိသည်။ တစ်ချိန်တည်းမှာပင် ကိုနေခဟာ ကိုခမ်း၏ပခုံးပေါ်သို့ ဓာတ်ပုံ၁၀ပုံလောက်ရှိမည့်အထပ်လိုက်ကို ပစ်ပေါက်လိုက်သည်။ သူလည်း စိုးရိမ်တကြီး ဧည့်ခန်းဘက်သို့ ပြေးထွက်လာခဲ့ရာ ကိုခမ်းအနား၌ ပျံ့ကျဲနေသောဓာတ်ပုံများကြောင့် သူ့ခြေလှမ်းများ တုံ့ဆိုင်းသွားတော့သည်။

ဓာတ်ပုံများမှာ ကိုခမ်းနှင့်သူ၏ studio ရှေ့မှာ ရိုက်ထားသည့်ပုံများ ဖြစ်၏။ ပုံထဲ၌ ကိုခမ်းက သူ၏လက်ကောက်ဝတ်ကို ဆွဲလျက် အပြင်သို့ ထွက်လာသည့်ပုံနှင့် ကိုခမ်း၏လက်ကောက်ဝတ်ကို သူ ငေးကြည့်နေပုံများ ပါ၏။ ထို့အပြင် ကိုခမ်း၏လက်ပေါ်၌ သူ ချည်ကြိုးလေး ဆွဲပေးခဲ့တုန်းက ပုံများပင် ပါသေးသည်။ ဧည့်ခန်းထဲရှိ လူ၂​ဦးဟာလည်း တုန်လှုပ်သွားသော သူ့ပုံစံအား စိုက်ကြည့်နေကြသည်။ ကိုနေခဟာ ခါးထောက်လျက် မတ်တတ်ရပ်နေရာမှ သူ့ရှေ့သို့ လျှောက်လာပြီး

" မင်း နောက်နေ့ကစပြီး အလုပ်လာဆင်းစရာ မလိုတော့ဘူး၊ အထူးသဖြင့် မိုးခမ်းဝါရှေ့ကို ဘယ်တော့မှ ပေါ်မလာနဲ့တော့"

" ဗျာ..."

" ကိုနေ ကျွန်တော့်အပြစ်ပါ၊ ကျွန်တော့်ကြောင့် ဖြစ်ရတာပါ"

ကိုနေခ၏စကားကြောင့် ပျာပျာသလဲ တောင်းပန်​လာသော ကိုခမ်း...

" ဟုတ်တယ်၊ မင်းကြောင့် သူက ဘာမှမရှိတဲ့ကောင်၊ သူ့မှာ ဆုံးရှုံးစရာ ဘာမှမရှိဘူး၊ မင်းက အောင်မြင်နေတဲ့လူ၊ အခုကြည့်စမ်း၊ မင်း ဘယ်လောက်နစ်နာသွားလဲ"