أريد حريتي

البارت الثاني
لقاء حبيبي.....

صادف يوم خميس وكل خميس احنه نطلع نتعشى برا ونفتر وناكل موطا او عصاير ونرجع ب١٢ للبيت.... هذا الخميس غير جنه كاعدين بالمطعم وانتاني الاكل يوصل واجه ولد... مو شاب ههههه طركاعة العيون كبار كبار وسود والرموش يجنن البشرة حنطية مادري خمرية ممزوجة بحمار والشوارب ثخان يجنن والشعر اسود ضعيف شوية وطويل.... الريحة سلمت كبله بحيث غمضت عيوني وبقيت اشتم بالعطر.... يمة... يمة.... دخت واختي كرصت زري من جوا الطاولة وانا فتحت عيوني وبقيت مبتسمة للهوا مثل الهبلة ...
●استاذ حبيبي عشاكم على حسابنه واهلا وسهلا بيكم... نورتونه.....
●لا.... عادل... لا... ما اقبل... مشكور
●وسفة استاذ.... لا ترد دعوتي الكم...
●هههه مشكور يابة.... سوينه زحمه
●اهلا وسهلا نورتنا
اسمه عادل جان يحجي ويا زوج اختي وانا منتشية اشتم ريحة عطره واسمع صوته رجولي وخشن ويستقر بالكلب...
وانا جلبت ما اطلع ولا اكل الا بهذا المطعم وكل مرة نروح نشوف عادل كشخة والشعر مسرح ليورا والريحة تجنن.... هو يجي يشرف على طاولتنه والمطعم كله ينخبص بينه وكله تصيحله تمام استاذ فسألت ابراهيم زوج اختي عن مهنته وكال هذا المطعم الهم
اختي دخلت وياي علخط.. ههههه
●زين هو طالب عندك
●لا
● زين منين تعرفه
●ابن عمه ذو الفقار جان طالب عندي ومن الاوائل وايضا صديقي
●ها... جكد حلو... كمل
●شكمل شبيكم.. هههههه
●يعني شلون عرفته
●ها.... ذو الفقار عزمنه بتخرجه هنا بهذا المطعم ومنه تعرفت على عادل... هم اثنينهم من البصرة ذو الفقار اكبر من عادل وهو المساهم الرئيسي لهذا المطعم... وعادل يشتغل وياه
●يعني عادل ما مكمل كلية
●لا العام تخرج من كلية الاداب بس ماكو وظائف...
●الحمد لله من عندهم مطعم....
●اي هم اثنينهم خوش ولد وشاغوليين... كلش احترمهم واقدر جهودهم
هم يتناقشون وانا عيوني من اختي لزوجها وبالعكس اسمع بلهفة كل تفصيل عن عادل... جكد حلو وساهمت بالحوار وياهم
●شعجب ما جنت تجيبنه هنا قبل
●مو جانوا يوسعون المطعم.... شنو اليوم تحقيق ما ناكل
●هههخخخخخ.....
واجه عادل وهالمرة عيونه عليه وصارت بيناتنا نظرات وابتسامة .. ومن كمت اغسل بالحمام صادفته بطريقي ابتسمت اله وهو ماقصر واطاني الرقم وانا بدون تردد اخذته وطرت من الفرحة ومن رجعنه للبيت ركض للغرفة ودكيت على رقمه
●الو
●مساء الخير
●هلا وغلا شلونج
●ههه الحمد لله
●شنو اسمج
●نوراي
●الله شنو هالاسم الغريب شنو معناه
●ضوء القمر
●وشلون قمر هو... انت ليش هيج حلوة
●يا.... شنو هاي
●شبيج طبعا كاعد تكولين هاي من اولها وهذا مبين متمكن جذاب... صح
●لا... بس... اي
●ههههه.... انا اسمي عادل عمري ٢٣ سنه خريج ادارة واقتصاد ... واملك هذا المطعم
●بس.... ردت اكله ان انه اعرف المطعم لابن عمه بس سكتت
●بس شنو
●ماكو كمل
●معجب بيج... وبجمالج.. وباخلاقج... وانا مو مستهتر ولا احب اسوي علاقات... وزوج اختج يعرفني انسان جدي وعملي وبصراحة وباختصار شديد اريد تعرفيني واعرفج بالطريقة الي انت تختارينها وراها نقرر الخطوة الجاية
●هاي شنو علكيفيك شنو هاي اخذتني حاصل فاصل.... منو كالك انه اصلا اريد اتعرف
●تمام هذا هو....
●هههه.... زعلت... لا اشاقى وياك .
●اي....
●شنو اي
●يعني موافقة نتعرف علبعض
●نعم موافقة بس بالتلفون...
●تمام ماعندي اي مانع.... شنو تردين تعرفين عني
●كلشي ابدي من يوم ولدت.... ههههه
وبقينه نسولف للاذان الفجر... سوالف هواي شخصية جميلة وجدية وصارمة... كلش حبيته وتعلقت بيه...
الايام مشت بسرعة بيناتنا... بس علاقتنه بقت ضمن التلفون مو اكثر ومن نروح لللمطعم يجلب يسولف ويا زوج اختي وانه اكضيها اوزع ابتسامات...
مرة جنه انا واختي طالعين نسوك وتعبنه فاختي كالت خلي ناكل لفات كص وعصير ونرجع بس انا اصريت الا نروح لمطعمه....
طلبنه الغدا.... ورا ما خلصنه اجه الي يقدم الاكل وبيده طبق حلو يجنن جانت برمة سورية
●احنه ماطلبنه حلو
●لا هذا تقدمة من استاذ عادل
●ها.... شكرا
ورا ما مشى بدينه ناكل بالحلو الي جان فد شي الطعم فوك الخيال وانا وايدين قضينه عليه
●كلش طيب
●اي والله اطيب من الغده نفسه... هههههه
●يالله نروح.... تاخرنه ومصطفى تعب من العربانه
●ها.... اي بس اغسل واجي
تمشيت للحمام وشفته كبالي العطر يجنن والشعر والاناقة حديث اخر... ابتسم الي
●اليوم القمر نازل يمنه....
●ههههه شلونك
●مشتاقلج...
●وانا بعد....
●روحي لا تتاخرين علي ام مصطفى زحمه بعدين اخابرج
●اوك...
●نوراي
●نعم...
●احبج.......
ومشى وانا رجليه بعد ما احس بيهن ذبت واحس بروحي اموع بالقدرة رجعت لاختي وانا صايرة طماطة من الخجل ووجهي يطي الوان ومثولة هي هم ماقصرت باوعتلي وضحكت....
●هو هذا الليل كله تبسبسين وياه
●يا ايدين..... شتكولين
●شبيج.... انا ادري بيج بس ردتج انت تسولفين
●ايدين
●يالله من نوصل للبيت اريد كل التفاصيل
طبعا بيومها ما عافتني الا عرفت كل التفاصيل ونبهتني وحذرتني بس ما منعتني لانهم يعرفون اخلاق عادل. وهذا الشي خلاني احس بامان اكثر وياه..... عادل ما يوم قل ادبه وياي او طلب شي او حجه اي شي به قلة ادب.... وحتى ما يوم طلب مني اشوفه ابد.... فقط الايام الي اروح ويا بيت اختي وزوجها لو ويا اختي.... ومن بعيد لا يقترب ولا يطلب يحجي وياي على انفراد كل هاي الاشياء بالاضافة لطموحه وسوالفه الحلوة...خلاني كلش احبه
رغم كل سوالفنه بس ما يوم تطرقنه لموضوع الزواج او الخطوبة ماعرف ليش وانه مافكرت بهذا الموضوع اصلا متناسيته....

ومشت الايام وحبيبي صطوفي يكبر ويحلو وانه اتعلق بيه اكثر واكثر وبيوم كاعده العب وياه وهو خربان ضحك دخل ابراهيم وايدين عليه وطلبوا يحجون وياي.... تعجبت و... خفت... جنت شايله صطوفي اريد اخليه بكرسيه وافكر بداخلي معقولة ايدين كايله لابراهيم على عادل وهم معصبين.... بس شكلهم جديين مو معصبين... خلصت من صطوفي واجيت كعدت
●نوراي حبيبتي احنه نريد نحجي وياج بموضوع مهم.... يخص حياتنا كلنه
●خير.... شكو....
●بالاول اريدج تعرفين شنو تقررين احنه قابلين... ابراهيم
●احجوا مو قلقتوني....
●انا جايتلي بعثة خارج العراق وشغل أيضا وانتي تشوفين وضع البلد من سيء لاسوء.... وانا وايدين تناقشنه بالموضوع وقررنه نسافر الفرصة الي جايتلي ما تتعوض....
●اي....
●.... امممم.... شوفي نوراي انا راح احصل اقامة بحكم شغلي وايدين وصطوفي وياي اقصد......
●فهمت يعني بس عائلتك.... حجيت باستهزاء
●وانت ايضا اختي وبنتي لا تكولين هيج انا ما قصدت هيج.... بس هاي القوانين.... لذلك
●سافروا لا تتقيدون بيه
●نوراي هدئ وفهمي لا اطفرين..... ايدين
●شنو قصدج يعني.....
●نوراي حبيبتي.... اريدج تاخذين شهادة السادس حتى اكدر اقدملج هناك علدراسة وتاخذين بيها اقامة...
●يعني شلون وهسة ماكو امتحانات...
●يعني احنه نسافر... وانت تبقين يم خالة انعام مرة جبيرة وحبابة واداريج... ومصاريفج توصل اول باول.... لحد ما تبدي السنه وتدرسين خارجي....
●ها.....
●فكري وشوفي وضعج.... ماكو الغي الرحلة كلها....
●اي.....
كمت لغرفتي دخلت وقفلت الباب وراي وطكيت بجي مشتاقة لماما وبابا.... ليش عافوني..... شنو ذنبهم يتقيدون بيه.... هم من حقهم يعيشون حياتهم ويسافرون وانا عقبة بطريقهم.... شنو الحل... اكدر اعيش هنا لوحدي.... وصطوفي....
يتبع.....