أريد حريتي

أريد حريتي

البارت السابع

ضلمة وريكي ناشف ...عطشانة...اريد ماي ... بصوت ما ينسمع بالكوة نطقت اريد ماي .... فتحت عيوني ببطء ضوا قوي كلش رجعت غمضت وفتحتهن ....انه وين ....شنو صار .....
ردت اذكر ماكو .... سمعت صوت بصفي ....غريب ما اعرفه
....ها يمة وعيتي .....
التفتت واشوف مرة جبيرة بالعمر لابسة عصابة وشيلة ووجهها مو غريب بس ما اذكره ....
نوراي....ماي ...اريد مي
.... اي يمة بس شوية هيج مجعة زغيرة ...مو زين عليج وانتي توج طارحه....
نوراي.... اي ....
سكتت ما سمعت بوضوح الي كالته او مافهمته .... سندتني شربت شوية ورجعت نمت ... غفيت بثواني وراها فزيت بشهكة ....الشريط كله رجع بدماغي شلون دخلوا الشقة شلون ضربوا عادل.... شلون سحلونه.....
صوت ذو الفقار....
انه خسرت طفلي.... كعدت ابجي واصرخ .... والممرضة ومرة وياها بالثلاثينات هم شكلها مألوف بالنسبة اليه ...
الممرضة ضربتني ابرة والبنية لابسة اسود وتبجي مسحت علراسي وكعدت يمي شوية اباوع لها بعين ناعسة والاسئلة نهشت دماغي انه وين ووين عادل وشنو صار ومنو هاي وذيج المرة ووو.....
غفيت ورجعلي نفس الحلم وكعدت مرعوبة واصرخ والبنية خطية تسكت بيه وتهدأني وتبجي ....
جابتلي ماي شربت واخذتني للحمام غسلت وغيرت ورجعتني بالكوة اوكف على رجلي ما احس بيهن ....
كعدت علفراش ....
..نوراي
نوراي ... انتي منو ....
البنية ....ماذكرتيني ...انه اخت ذو الفقار .... بنت عم عادل..الي اجيت بمهرج ....
نوراي.... اااخ.... مشكورة تعبتج وياي
البنية ....لا شسالفة ....احنه اهل ...انه اسمي كوثر ويصيحولي ام علي ....
نوراي.... عادل ما اجه ....
ام علي.... هسة انتي كومي بالسلامة ....
بقيت يومين بالمستشفى لان دارولي دم.... وكل ما اسالها عن عادل تتشرد من الاجابة ... ذو الفقار ويانه بالمستشفى ....
ويوم الي كتبلي الدكتور خروج .... فرحت اريد اروح اشوف شنو صار ويا عادل....
بالمستشفى.... تأذى ....بالسجن....شنو صار ....القلق اكلني ....والخوف موتني....

وصلت للشقة بالكوة صعدت....
فتحوا الباب وانصدمت .... الاشياء معفوسة والاثاث مكلوب كلاب .... اذكر انه فتشوا الشقة . ... بس مو هيج .... دخلت لغرفتي مرتبيها شوية بس هم معفوسة فوك حدر...
ام علي.... حبيبة سامحينه ما لحكنه نرتب ...تدرين انه وياج بالمستشفى وامي مرة جبيرة رجعت...للفا..... للبصرة ........
نوراي... بس هذول الله لا يطيهم شمسوين بالشقة....
ام علي....اي الله لا يوفقهم ....تعاي خية ارتاحي .... خل اكف البيت وانظفه...
دك جرس الباب وسمعت حمحمة ...الظاهر ذو الفقار جايب مسواك ...
غفيت علهوسة ...من مفعول الادوية .... ساعة ....ساعتين ...مادري جكد ...وكل شوية افز من حلم مرعب.......
احس معدتي تمغصني من الجوع ... كمت بطريقي للمطبخ واشوف الهول يلمع من النظافة ...ام علي منظفة البيت كله
ام علي... نوم العوافي....ها جوعانة ...هسة اصب الغدا...
نوراي...ليش تعبتي روحج ...انه انظف...
ام علي....شسالفة...وانه هم ماعرف اكعد ...

دقايق ...وجابت صينية بيها كباب وشوربة. وخبز ....وتمر ...خطية تلف وتطيني ....
نوراي.... ام علي ماقصرتي...مشكورة
ام علي... والله يا نور بس الله يعرف جكد دخلتي كلبي... انتي بحسبه اختي.... الرابعة ...هههه عندي تلاث خوات اثنين من ابوي ووحده خليصتي ...
نوراي ... شلوون يعني...
ام علي... ابوي الله يرحمه ويرحم موتاج.... مزوج اثنين امي الحجية مرته الاولى وخلف منها اخوي باقر الجبير ... وانه واختي جنان واخوي عدنان ... وام ذو الفقار مرته الثانية ...خلف منها ذو الفقار وطالب وكريم وحسنه و عطور....
نوراي..... ما شاء الله...
ام علي....هههه اي ابوي الحجي... زلمة معدل... الله يرحمه .... ربانه كلنه علفد عز والعباس ...ومافرق بيناتنا ابد ....حتى عادل..الل...... جرت حسرة والدمعة فلتت من عينها.... هنا اشتغل يمي الارم عادل ميت....اي ....
اريد اسال اريد احجي....اريد انطق ما اكدر اختنكت بلكمتي وشركت ....انفجرت اصرخ وابجي.... وهي تهدأني وماكدر ....تهسترت ....
دخل ذو الفقار مفزوع ...
ذو الفقار ....شصار.... ليش كلتيلها .....مو منبه عليج
ام علي.... خوية والعباس ماحجيت .....هي بحدها افتهمت....ليمتى نضم ....
انه اصرخ وابجي لحد ما خوا حيلي وطحت مغمي عليه ....
مادري ليل مادري صبح فتحت عيوني اريد اطلع واسمع ام علي وذو الفقار يحجون
ذو الفقار.... حضري كلشي مابقى جم ساعة وننزل للبصرة
ام علي.... كلشي جاهز ...فرفحت روحي خوية عادل....الله يرحمك ....شجابك علهطريق...
ذو الفقار مو وكته هالحجي... بالج على مرته .... ومن نوصل للبصرة خل تلبس حجاب وتابعيها نسوانه ما ترحم بالحجي ...... ولا تخليها هواي يم النسوان.... وانه من اوصل اوصي امي الحجية وامي....
طلعت عليهم كطعوا الحجي وهو حتى ما باوعلي حمحم وطلع برا ...
نوراي....ليش نروح للبصرة ....هنا بيتي ....
ام علي....خية منو الج هنا ....واهلنه كلهم بالبصرة....
نوراي .. اظل وحدي....واخابر اختي وزوجها يجولي ....
ام علي.... لا حبوبة ما يصير ناخذج يمنه لحد ما تخلص عدتج وبعدين خير يصير....
نوراي.... فوني وين....اريد فوني...
ام علي.... والله خية مادري خل اشوف ابو ابراهيم ....
طلعت يم الباب وحجت ويا ذو الفقار .... ورجعت تهز براسها....
نوراي...ها....
ام علي ....خية تلفونج رايح ويا غراض المطعم....ما لاكينه....
نوراي....صخام ...ارقام اختي وزوجها كلهن بيه....وينك عادل....هسة يجي ....هسة يجي ....
انه احجي وهيه تبجي بخنيك .... وتسكت بيه....وما تخليني اصرخ لو ابجي بصوت عالي .....
وضع ما اتمنى اي شخص يمر بيه...حسيت روحي صدك يتيمة ....لا اهل ...لا زوج ...لا طفل.... شنو مصيري ....
بقيت ابجي للفجر سمعت الاذان.... وكمت ....انه عمري ما مصلية ولا اعرف شلون .... ولا اعرف الوضوء....
سمعت صوت بالمطبخ....لكيت ام علي تحضر شاي بالترمز.... وماي .... شافتني... وعيوني حمر شبكتني...
ام علي....خية تعوذي من ابليس ... وذكري الله الدنيه فجر وكاعد يأذن .... اروح اصلي حتى نطلع للبصرة ....
نوراي....ام علي.... استحيت اسالها تعلمني الصلاة ....
سكتت ورحت للحمام غسلت وشفت بعدني مو نظيفة ... اجت بوكتها ....
طلعت ولكيتها تصلي وتبجي وتندعي .... ..دقايق وذو الفقار دك الباب وطلعنه... للمجهول امشي ... شنو ضاملي الوكت بعد....

٥ ساعات الطريق وساعة اضافية لان هم ساكنين ارياف.... استرحنه بالطريق مرتين.... ام علي وردة مالت الله طيبة واخلاق وجمال روح ما ينوصف.... دوم تستغفر وتسبح....

من وصلنه لحدود البصرة لبستي حجاب الاميرة اسود وانه لابسة كب وجواها بنطلون وقميص اسود ماعندي غيرهن ....

الحزن مرعب.... احساس مؤلم....والي يوجع اكثر من الحزن هو استمراريته....مو شعور مؤقت ويمشي....احس كلبي ممرود ....احس اضلاعي متكسرة....

وصلنه للبيت او بالاحرى مزرعة باب خارجي انفتح ومشينه تقريب ١٠ دقايق يالله شفت البيت الطريق كله يجنن شجر ونخل ....وريحة الزرع تخبل.....
وصلت وردت انزل ....
من نزلت شفت النسوان كلهن واكفات شافني وظلن يصرخن ويلطمن وانه ردت حجة.... لطمت وصرخت وخرمشت وجهي لحد ما اغمي عليه ....

فزيت انا بغرفة ونايمة علكاع.... الغرفة زغيرة بيها كنتور قديم بابه مشدود بعلك اخضر وبوفية مسفط عليها الفراش والغطا ....وثلاجة زغيرة... الغرفة قديمة بس مريحة يكول بيها ريحة مسك.... نظيفة وريحة عنبر مسك....ماعرف بس مريحة للروح....
بقيت كاعدة علفراش واباوع منا ومنا .... انفتح الباب ودخل ولد زغير يطلع بعمر صطوفي لابس بجاما اكبر منه وسح وراه وهدومه مبهذلة وخشمه متروس ويمخط ...كل هذا وما غطى جماله وطفوليته.... العيون تجنن كبار وسود والرموش ثخان ...الحواجب تجنن ... وكف يم الباب يباوعلي مستحي ....
صحتله ...مرة ...مرتين ...ثالث مرة اجه .... اخذت كلنكس ونظفت خشمه.... عدلت شعره.... وكعدته بحظني...
نوراي.... شسمك.....
...... الوش
نوراي.....شنو .... اوووي فديت الحلو ....

انفتح الباب ودخلت ام علي شايلة صينية.... حطته وشالت الطفل
ام علي .....علوش ...حبيبي ...عوف عمه بيها اوى مريضة....
نوراي....لا خليه ..يمي
ام علي ....يضوجج بس يبجي ... اكلي شوية
نوراي....ام علي اذا ما بيها زحمة اريد اغسل واذب ال....
ام علي..... يووو خية سامحيني فهيت والله ....تعاي...تعاي....

طلعت وطلعت وراها ...انه بعد ما منتبه وذبيت الكاب بقيت بس بالبنطلون والقميص والحجاب هيج مشمور .... وطلعت اشوف الهول متروس نسوان وكلها تسولف وتاكل ومن شافوني صارت صنته....

والحجية تأشر لام علي الي مسندتني وهاي عافتني وراحت يمها وانه بقيت واكفة يكول صورة بمعرض كلها تباوعلي وتبسبس واسمع .... كلمات ....يااااا.... خطية.... صخام...... اجت بنية شابة يطلع عمرها ١٧ سنه سندتني ورحت للحمام ... غسلت وبدلت الملابس الداخلية ... وهي دكت الباب ناوشتني دشداشة سودة ... انه اعرف تقاليدهم وعاداتهم ومو مستهزأ او متعمدة البس بنطلون بس ماجان عندي وقت اشتري اي شي بسيط .....
لبسته وغسلت وجهي اكثر من مرة احس بيه نار ومن اغسل الماي يتبخر .....
طلعت ورجعت للغرفة .... كعدت شربت ماي ولبن بس ...ماكدرت اكل ... علوش كاعد بالزاوية صحتله ياكل وياي .... اوكله وهو كل شوية يمسح خشمه بكم فانيلته....
شوية ودخلت بنية عمرها ب١٤ او اكثر صبية ...خمطت الولد من حظني وصلخته براجدي خلته يفرفر....
وانه بدون وعي صرخت بيها
....ليش حرام عليج شمسوي
....انتي معليج .... بومة..... .. طلعت.....
هاي شنو من اخلاق سز .... ضجت كمت وراها وياريت ما طلعت ....
نسوان اثنين كاعدات علحايط ....
وياخية يكلج شاكيها شك ....كلهم ....استغفر الله ....استغفر الله ....ما مخلين بيها لحم .. ومسكطين طفلها.... وهاي جابوها شفتيها جنازة..... يمة ياعويدل منين عرفتها منين .... هسة هاي بناتنا وحدتهن كمر...
..........