أريد حريتي

هذا البارت هدية لاكثر معجبات ومعلقات على
قصتي على صفحتي بالفيس بوك
اميرة أبهدوء وBahar Gull

اريد حريتي

البارت واحد وثلاثون

كان ثمن الحريه كلش صعب كعدت الصبح محتاره شلون حتى صارح الجهال باوعت العلوش ابراهيم عادل وسن شلون ابلغهم ان انه راح افاركهم
مثل كل يوم حضرت الريوك ودعتهم للمدارس طلعوا خابرت ام علي ..... واخيرا صدرت موافقه حريتي وقبل ذو الفقار على سفري تعجبت قالت شلون شنو اللي صار....
مادري....شنو الي صار...بس هذا الي سمعته منه....
ام علي ...سدي ساعة وانه يمج....
وسن واكفة يم الباب ما دريت بيها الا وتبجي بصوت عالي...
رحت الها وشبكتها....لا تبجين...اول وتالي تعرفين انه رايحة منانه....
وسن... بسببي... كله مني...
نوراي... اي بسببج ...شكرا .... وسن حياتي اول وتالي انه وابوج هذا اتفاقنه...
وسن...بس انتم تحبون بعض... ليش تنكرون....
نوراي... هذا الصحيح ...انه ما انتمي لهنانه...وابوج اول وتالي لازم يشوف حياته....
وسن...انتي ما شفتيه من درا بيج ضايعة شسوا ...نور...ابوي دمعت عينه ..وكال هاي امانتي... نور...انه اعتذرت منه وحجى وياي وكالي لخاطر نور احجي وياج
..نور...حبوبة لا ترحين وتعوفينه...منو لعلوش...ها...لعادل...لابراهيم...الي ...الي انه.... لو ما انتي انه هسة ضايعة.... لا ترحين ابقي...الله يخليج...
نوراي ...لا تبجيني....وبعدين انتي امهم ...
اجت ام علي وشافت المناحة وانضمت النه تبجي... ضجت وصرخت لا تصيرون انانيين انه هم اريد اعيش...
هدأن وحجينه بعقل ... وتفهموا موقفي... لازم اجرب... لازم اروح بعيد واجرب...
الجو حلو ...البارح ماطرة واليوم شمس وهوا يجنن تمشيت للسدرة... ياما سمعت مني...ياما شكيت يمها...
وكفت... حجيت وياها....
راح اروح ...واخيرا راح يطلق سراحي.... لا تتعجبين... اي احبه...بس صعب اعيش وياه... ماكدر ...ما مستعدة... اريد اجرب...وهو اذاني وما يثق بيه... يتهمني اخونه...شلون وهو الدم الي بوريدي....
شلون وهو روحي اكو واحد يخون روحه... بس الحب مو كفاية...لازم ثقة...احترام... تبادل اراء... شتكولين...تفكيري صحيح... وخياري اصح...
اتفقت ويا نفسي ورجعت... لليل اجه ذو الفقار ...
جهزي روحج ...سفرج بعد اسبوع...
فزيت...اسبوع...بس... انه....
ذو الفقار... شنو غيرتي راايج...
نوراي...لا بس... الاولاد ...
ذو الفقار...يتعلمون...مثل ما تعلموا على فراك امهم...
هزيت راسي ودخلت لغرفتي...
جان اسرع اسبوع بحياتي... مادري شلون خلص... ودعت الكل والكل بجه لفراكي... علوش ابوه قنعه..الاولاد اتفهموا الوضع... حسنه... ام علي عطور الحجية... باوعت الهم ....انتم عائلتي....
وصلت للمطار وهو وياي... صعدنه للطيارة... ونفس الشي لزم ايدي قوي...قوي.... قوي... ومن استقرت ما هدها ولا انه طالبت بيها...
هبطت الطيارة وخلصنه ...وصلنه لشقة باسطنبول بسيطة ... حلوة ومرتبة وبيها عجوز كبيرة بالعمر سلم عليها وعرفها عليه...تحجي تركي وعربي مكسر...
اسمها نانا ... وراح اسكن وياها لحد ما يجي ابراهيم وايدين ... الي راح يبقون وياي ١٠ ايام لحد ما تخلص اوراقي....
بقى وياي يومين لحد ما اجوا ايدين وابراهيم .... يمه يا ريحة هلي... بجينه بواجي... انه وايدين...وصطوفي حبيبي صاير رجال... وشوشو...يمة فديت الخدود... ابراهيم....
ورا ما خلصنه سلام وبواجي... شفته واكف على صفحة... تمشيت اله .... شكرا من كل كلبي...
هز راسه بنعم... وكالي طيارتي بعد ساعة...
سلم على ابراهيم وايدين واجه وكف يمي... باوعتله عيوني يمطرن...وهو عيونه مدمعة.... اي شي تحتاجين...باي وقت...لا تكولين انه بعيد...خابري... تمام...
ضحكت...تمام .... ذو الفقار... انحشرت الكلمات ببلعومي... ومسحت عيوني... ابتسمت وكلتله توصل بالسلامة دير بالك على الاولاد....
هز راسه ومشى... بقيت واكفة اباوع لحد ما صعد التكسي وانه انهاريت...ابجي...ايدين تصبرني... وانه عيوني يمطرن...معقولة هاي اخر مرة اشوفه بيها...
هذا قراري وقراره وهو الصواب ...احنه مو لبعض....
عشت ١٠ ايام سعيدة وياهم طرت من الفرح
طبعا عرفت ذو الفقار هو مسوي كل هذا... الشقة ومصاريف رحلتهم ... وعرفت اوراقي ما كاملة واصلا يمكن ما تكمل... لذلك راح ابقى اعيش ويا نانا... والكى شغل.... ما اريد ارجع رغم شوقي للكل خلا حياتي فارغة
.......... واجه يوم الفراق ... ورجعوا ايدين وابراهيم... وبقيت لوحدي... اباوع الفراك صعب... مؤلم....
.............
تسريع احداث.....
........
كل الي فات من ايام عشته مالها طعم ولا ذكر ...بالاخير نانا ساعدتني الكي... شغل بمطعم بيه سوريين وعراقيين ولبنانيين... اشتغلت اغسل مواعين... والاتعس ابو المطعم صديق لذو الفقار ولهذا قبل وكملي معاملة شغل تخليني ابقى سنة كاملة ...
جنت البس بدلة العمل من النايلون عريضة واوكف اغسل مئات الصحون .... بحوض كبير وبيه مثل الدوش اليدوي يدفع الماي بقوة وسرعة .... اشطف واحط بغسالة صحون عملاقة... وللاطباق المستعجلة ...اشطف واجلف وارجع اشطف بمي كولش حار...
شغل متعب بس يلهي... الوكفة تكسر الظهر وانه الي جنت اتبطر على المواعين ببيت الحجية بالعزومات...
الستاف الي اشتغل وياهم كلهم لطفاء ... اغلبهم رجال ... طهاة وعمال ...مطعم كلش صيته طيب...
صادقت بنية ويتر لبنانية ...اسمها ميار...
نخلص شغل ونطلع انه وياها نمشي لمكان الباص... الجو بارد يكص كص... نسولف وتحجيلي عن حياتها وشلون شردت من الموت والعصابات...
من يسمع بلوى الناس تهون بلوته.... مرت ايام وايام وانه من البيت للشغل ومن الشغل للبيت ... نانا ...كل ما تشوففني...تكلي انت حزين ... عيونك حزين... قلبك حزين... ويمكن هذا الصدك...
مخابرتي ويا وسن ...وام علي ما بطلت... جنت بكل مكالمة اتمنى اسمع اخباره بس محد يجيب طاريه...
.... علاقتي قوت ويا ميار ... علمتني اركب دراجة هوائية ودلتني اسواق اشتري منها ... نانا كانت يا تحوك يا تسقي زرع البلكونه...يا نايمة اكلها اغلبه شوربة...
مرات بالليل اكعد كبال المدفاة واغطي روحي ببطانية كد ما الجو بارد واشرب شاي يانسون ...شاي اخضر... بابونك
ومرات اطبخ بالليل تخيلوا...اسوي كبة... لان كولش اجوع... ونانا تاكل وياي وثاني يوم تصبح مريضة....معدتها حساسة ما تتحمل اكل ثكيل
.......
بديت احس بان قراري غلط.... اشتاقيت لهوسة الاولاد وزعبال علوش... والمواعين العصر التعتومة الي ياكلوها.... شوي السمج... الافلام ...ضحكنه... الخضار... والخضروات .بالحديقة ...الدجاج وعلوش يركض ورا الكتاكيت...سدرتي صديقتي الهادئة ...ام علي ..وسوالفها ....الحجية ودعواتها...وتصيحلي نويرة... حسنة وخبالاتها...
و..... ذو الفقار... نظرته...ابتسامته...عصبيته...غموضه...جمال طلته... صياحه...استفزازه.... وااااه ....ريحته.... انفاسه....
......