أريد حريتي

أريد حريتي ب١٨

البارت الثامن عشر

سافرنه لبغداد بالطيارة... انه مو اول مرة صاعدة طيارة بس من قبل اول طلعة الطيارة اختنك ...كنت الزم ايد بابا الله يرحمه...وراها بقيت الزم ايد ايدين... وهسة ارتبكت وغمضت عيوني قوي قوي... وزميت شفتي ...حسيت ايد لزمت ايدي قوي...ارتاحيت... ابتسمت وبقيت مغمضة عيوني.... لحد ما استقرت الطيارة....
فتحت عيوني...هو يباوعلي
ذو الفقار...اول مرة تصعدين طيارة
نوراي...لا ...كضيت طفولتي كلها اسافر ويا اهلي .... بابا ومامي كل عطلة كانوا يسافرون لاذربيجان....
ذو الفقار...اذرييجان!!
نوراي... اي لان مامي كانت من اذربيجان... اصلها اذربيجاني....
ذو الفقار... انتي تشبهيها .... جمالج... احم احم... اكدر اسال شلون ماتوا....
نوراي.. ههه انه خليط بينها وبين بابا ..اختي ايدين تشبه ماما اكثر مني....بقيت اسولفله على حياتي وهو مركز وياي طريقة نظرته تربك بس حلوة...عذبة... تأسرني... اسولف واسولف وهو تقريبا بنفس الملامح عدا ابتسامات خفيفة ترسم علملامحه الحادة... هدوء ...اصغائه...خلاني احس اعرفه من زمان مسترسلة احجي ...لحد ما هبطت الطيارة ضحكت لان حياتي كلها ما استغرقت وقت اكثر من نص ساعة تنسرد....
خلصنه من اجراءات المطار... وكبل لسيارة الاجرة
وصلنه لبيت ام اصالة... وهو راح.... سلمت عليها وحضنتها ...دخلت البيت هدوء الظاهر رهف ماكو....
ام اصالة ....والله اتوحشتك هواية....
نوراي.... وانه اكثر... شخبارج...
ام صالة...احمده واشكر فضله بنعمه وعافية...
نوراي... شلون الشغل... الكبة الرهيبة....
ام اصاله....ههههه الله يطيب خاطرك .... ماشية امورها...
نوراي... شعجب البيت هدوء ...رهف شلونها....
ام اصالة ...اه....اه ...قلبي يوجعني
نوراي...شبيج....
ام اصالة...بنتي اصالة متزوجة ومرتاحة...ابني.. عون ... متزوج والحمد لله مرتاح...بس رهف...شعلت قلبي...مرمرتني... احتاريت شلون اخليها ترضى بقسمة الله ...طول عمرها ما قانعة... ابد دوم تريد بعد....
نوراي.... شنو صاير خوفتيني....
ام اصالة... ما اضوجك ببقهري .... خليني اضيفك اول اشنو تشربين...
نوراي.... لا الله عليج شبيج ...حتى وجهج متغير وضعفانه .... مصفرة....
ام اصالة... شحجي.... شكول....اه...اه ...قلبي موجوع منها.... عافتني ومشت .... ويوم حجيت وياها ..تكلي اريد اطلع من الفكر....
نوراي... شنو يعني....
ام اصالة... يوم شافت سهى هنانه تجي اخذت رقمها والظاهر صاير بيناتهن حجي وسهى لاعبه براسها وهي ما تحتاج اصلا كارهه حياتنه وتريد تطلع من الفكر حسب حجيها....
سكتت شوية وكملت ودمعة تفر من عينها ... تركتني وراحت تعيش ويا سهى ....
نوراي...عزة ...واخوها واختها دروا...
ام اصالة... لا كلت الهم تزوجت وسافرت... زواجها صار بسرعة...بسرعة...ورجلها واصل ما يريد احد يعرفه...
استغربت... شلون تعوف امها بهيج موقف.... ولو هية البنية كلش طافشة....
نوراي... بلكي والله تلكى الي يدللها ويسعدها....
ام اصالة... ما ظني.... ربي رحيم ويجبر بخاطري بيها... انه شريد اتمنى الها الخير... انتي سولفيلي اشلونك... اخبارك... ذو الفقار رجل زين ومعدل....
نوراي... ام اصالة... انة مو زوجة ذو الفقار ...هو زواج شكلي حتى يحميني منا لحد ما تخلص اوراقي واروح لاختي....
ام اصالة... وليش يا ماما...ليش...
نوراي...مادري... ماكدر...بعدني... وهو ما تقدم باي خطوة همين ...كولش جان يحبها لمرته... يموت بيها..
ام اصالة... ربي يهدي سركم... تعالي ما اشتاقيتي لاكلي... اسويلج هسة عصير وللغدا ننتظر ذو الفقار...
نوراي... ما يجي ...يخلص شغل و نرجع للبصرة
ام اصالة... كان ودي اكلج ابقي يمي ..بس اتمنى اموركم تنحل
نوراي....هههه ما اعتقد...
ام اصالة...متكو شي بخالدنيا ماله حل....
نوراي....الكلب عوف ما اجه هنا بعد...
ام اصالة...لا ... ما اجه .... ربي ينتقم منه...
نوراي... صدكين من دخلت للعمارة احس انقبض صدري... وخفت....
ام اصالة....لا تخافي ...الله موجود وانتي على ذمة رجال...مو اي رجال ...هذا ذو الفقار ...ربي يحميه ويحفظه...ويهديكم لبعض...
دخلنه للمطبخ وهي محضرة كولشي بس تركب وخلص
قضيت وقت حلو وياها سولفنه واكلنه بس عيني علفون انتظره يخابر ماكو... طبعا عرفت من ام اصالة الشقة مسويها ومعدليها وحاليا مأجريها عائلة...
لليل يالله اجه ....
سلم وكعد ... راد مي جبتله...
ذو الفقار... يالله جاهزة...
نوراي... اي .... سلمت على ام اصالة وباوستها... وطلعت وياه... باوعت للدرج ولباب الشقة بيه اضاءة... ودنكت ومشيت.... طلعنه...
نوراي... نرجع سيارة لو طيارة...
ذو الفقار ...سيارة... بس اخابر على السايق... خل نتمشى ....
تمشينه ... وصلنه محل موطا...رغم ماكله هواي بس هاي موطا.... وكفت ... باوعتله وابتسمت... ورمشت بعيوني...مثل الاطفال...ضحك واشرلي براسه خل ندخل...
طلبنه نوعين مختلفات وكعدنا ناكل انه اكل منا ومنا وهو يضحك...
نوراي...ما تاكل...
ذو الفقار... مو هالكد احبها... افضل الاشياء الدافية اكثر...
نوراي... بس ذوكها .... هاي تجنن اخذت شوية بالخاشوكة واشرله افتح حلكك ... هو كلش مستحي ويلتفت منا ومنا بالاخير اخذها من ايدي واكلها ...
نوراي... مو جنه تأخر السايق...
ذو الفقار... اي... شال الفون وخابر ووكف علحيله يصيح يمتى شلون... انه هم بطلت اكل... وخفت انرعبت شنو صاير...
ذو الفقار... السايق مسوي حادث ومتاذية السيارة... نبات اليوم وباجر نرجع... خلي اشوف فندق...
فتحت عيوني لوسعهن... فندق يعني غرفة لوحدنه...لو شلون....
ما حجيت بقيت اكل موطتي بهدوء ... لحد ما خابر ...
ذو الفقار... يالله....
طلعنه اجر تكسي... السيارة تمشي وتمشي... ماكدر احجي انه كاعدة بالظهر وهو يم السايق....
والله طلعنه شوية من المدينة... باوعت للطريق ماكو فنادق ... انه اثق بيه ...ابد ما خفت وين اروح وياه... بس الفضول كتلني... وصلنه لبيت... نزلنه من التكسي طلعوا اهل البيت استقبلونه بذاك الترحيب وسلموا عليه....
انه بس اباوع دخلت جوا يم النسوان...بس مرة جبيرة...وزوجة صاحب البيت... فهمت هذا صديقه...
حضرونه غرفة .... استحيت احجي ...شكول....
دخلت للغرفة ..مرتبة ونظيفة ...هو البيت كله حلو ومرتب...
الحمام بالغرفة... الغرفة بيها سريرين... الحمد لله....وقنفات وتي في ... وثلاجة....
انه دوم من اطلع اخذ وياي احتياط ملابس وطبعا فرشة اسناني... ومعجون اسنان... وخاوليتي وصابونة وجهي ... وباقي الاشياء الاعتيادية
دخلت للحمام غسلت وبدلت وطلعت لكيته كاعد علقنفة... يفتح بردانات القميص...
ذو الفقار... هذول بيت اصدقائي... احسن من الفندق... ماجايب العقد والجناسي ما غيرناهن... ما ردتهم يعرفون بطبيعة العلاقة بيناتنه... فتصرفت عادي...
نوراي.... اوك....... كمل يحجي... هاي جانت غرفة اولادهم هسة همه بالسويد ....
سكت.... وانا بعد ما حجيت شي بعد للفراش تغطيت ودرت ظهري عليه... كلبي نبضاته تقرا الالف...واحس راح ينفجر صدري...
هو دخل للحمام... غسل واجه كبل للفراش
ذو الفقار...تصبحين على خير....
نوراي...وانته من اهله.... بس هاي... اوووف جريت نفس... حاولت انام ماكدرت... درت باوعتله...هو نايم... الافكار هجمت على راسي ... اكثر شي اذكرت النار والحريق.... يوم خطف عادل ...كل ذكرياتي التعيسة انفجرت براسي.... خفت وانقبض كلبي... شربت ماي ..ورجعت حاولت انام... قريت سور ... سبحت.... بالتسبيحات الي علمتني عليهم الحجية... غمضت عيوني ورجعت فتحتهن بسرعة احس حرارة باوعت الغرفة تشتعل وبس انه بيها... والنار تحرك كلشي الفراش البردات ..... واصيح محد يسمعني ماعندي صوت... اصيح باعلى صوتي وما يطلعلي صوت .. فجأة انفتح الباب .... دخل واحد يمشي اريد اشوفه الدخان والنار عالية ...اقترب...اكثر وانا اخترعت هذا .... هذا عوف ...اي هو بوجه الكريه وضحكته...واكف يباوعلي بنفس نظرته الكريهة ... اجه عليه ...دنك عليه انه محصورة بالزاوية.... باوعلي... وظل ...يضحك...يضحك بصوت عالي.... بقيت اصيح...لا ...لا....وخر عني...
مد ايده عليه يهزني من ذرعاني وانه شرمخته... اضربه بس ماعندي قوة ولا اصلا طاقة ...واحاول اصرخ.... ماكو صوت .... بس هو لازمني يهزني و يصيح كعدي ...كعدي.... صرخت....لا.... وفتحت عيوني.... باوعت مرعوبة.... انه وين.... ذو الفقار كاعد كبالي....يهزني.... حضنته...حضنته قوي... وبقيت ابجي... ماريد يتركني خفت.... هو حاضني قوي... ويمسح علراسي ويكلي انه يمج لا تخافين ما اعوفج...ما اعوفج ابد....ابد....
بقيت بحضنه لحد ما استقر نفسي... بعدني عنه ويباوع بعيوني....
ذو الفقار ...انتي زينة....
ما حجيت هزيت راسي بس...
ذو الفقار...جان كابوس...لا تخافين انه يمج....
جان يباوع بعيوني.. وعيونه كله حنيه وخوف عليه... رجع حضني قوي... ويكلي ما اعوفج ابد.... انتي زينة..
نوراي... حلمت بنار ...نار ...تحركني... ومحد يسمعني ما عندي صوت... وعوف ...عوف..يريد ياخذني...
ذو الفقار... كابوس ...بس كابوس...لا تخافين انه يمج... حضني مرة ثانية... حسيت بحضنه بامان ...امان عجيب ...بادلته الحضن... لفيت ايدي علظهره... وححطيت راسي بصدره ذاني علصدره اسمع دكات كلبه يدك سريع سريع ...بس مو بسرعة كلبي...
رفعت راسي باوعتله.... انا خايفة...
ذو الفقار... ابد ...ابد لا تحجين هاي الحجاية وانه يمج... ابد ... رجعني لحضنه هدأت ورجعت انفاسي بعدني شوية و باوع لعيوني... تلمس شعري وشفتي.. جان يمسح عليها بابهامه... .
للحظة استسلمت... غمضت عيوني.... حسيت بشفته علشفتي حرارة شفته وبزه شاربه .. ذبت ...وبدون وعي كلت عادل وتنهدت...
وهو طفر وكف لحيله ويروح ويرجع يمسح براسه كعد كبالي جوا وانه كاعدة علجرباية...نظرته... تنفسه...
ذو الفقار... انه... انه... اسف...اجاوزت حدودي... انه... فقدت توازني للحظة...سامحيني....
تنهدت... هزيت راسي وغطيت عيوني وبجيت.... ردت احجي... اشرلي...لا... واعتذر راد يكوم.... بس لزمت ايده....
نوراي... انه اسفة ...انه زوجتك... وانه.... مقصرة وياك....بس.....
ذو الفقار سد حلكي... واشرلي بيده اششش....ما قصرتي انتي امانة عادل عندي... ووعد احافظ عليج لحد ما ترجعين سالمة لاختج....
نوراي...ظليت ابجي... شنو اسوي انه بحرب بين مشاعر قديمة ومشاعر جديدة ذكريات حزينة... والالام....
ذو الفقار ...نامي...ارتاحي...انه يمج... ووما يصيرلج شي وعد...
انقهرت عليه... شنو الي صار... معقولة انه ما اكن اله مشاعر.... مجرد رغبة.... شجاب عادل...وانه صارلي اشهر ما اذكر شي وياه... اصلا الاحاسيس الي عندي اتجاه ذو الفقار تختلف عن عادل...
شسويت.... بقيت اتكلب وكل ما اغفه افز مرعوبة....
ما نمت ...انقطعت الكهرباء وانه صرخت يمة...
ذو الفقار... انه يمج لا تخافين...
نوراي...تعال يمي عفية....
شغل لايت الفون واجه يمي.... باوعتله وسويتله مكان بالفراش... كعد يمي...
حضنته..... وهمستله.... بحضنك احس بالامان....
ساكت ما يحجي... ماردته يحجي... ردته يحضني... بس ما سواها... حضنته قوي وغفيت مثل الطفلة.. دكات كلبه جانن تهويدة تنويم... نفسه.. عطره....كله غير ...شلون جبت طاري عادل....
اسمعه يكلي كعدي ... اذن الفجر...نصلي ونطلع....
شبسرعة.... خلصن الساعات... فزيت باقي علنفس كعدته وانا حاضنته ونايمة....
غسلنه وبدلنه صلينه وطلعنه .... لكينه ام البيت ام كمال... محضرة ريوك..وجاي... ومسوية لفات للدرب...
ما اكلت بس الشاي وطلعنه السيارة بالباب ... صعدنه.... والطريق كله هدوء..... مرات اشيل عيني اشوفه يباوع نظرات خطف الي....
الغت احتماليه اكون بيوم زوجة اله..... صار..لازم اشغل وقتي بغير الاحلام.... ماعتقد جنت اكن اله مشاعر...بس غريزة... رغبة...مادري....
رجعنه هدوء قاتل .... انه لغرفتي ...وهو طلع.... الاولاد التموا يمي بس وسن ما تجي...
ام علي وحسنة اجوي بالليل ... حسنة صايرة ضعف مو طبيعي وبطنها كبرانه....
لا تحجي ولا تسولف.... بس كاعدة وصافنة ... من طلعت ام علي اشو هاي مثل المخبلة ركض للدرج تصعد وتطفر ... وراحت للمطبخ شالت القنينة ... واجت صعدتها فوك ونزلت.... سوت كل انواع الرياضات العنيفة انه اباوعلها وفاكه حلكي....
نوراي.... ما يطيح....
حسنة.... شسويت بروحي.... شسويت.... كعدت على الدرج وتبجي.... كعدت يمها حظنتها....
نوراي...شبيج... عمري انتي ...شصاير وياج....
حسنه... شحجي ....شكول.... ولج الي بيه ما ينحجي... ولا ينكال.... اصخام ولطام... خية شلون بيه ...
نوراي...اهدي... خل اجيبلج ماي....
حسنة....كلشي ماريد.... نور....شسوي....شسوي....
نوراي...لا اله الا الله غير افهم بالاول شنو بيج حتى اكدر اساعدج..... اهدي وتعاي لغرفتي خل نسولف....
حسنة... ماريد هذا الطفل.... لان اذا جبته...معناها ارتبط بيه عمري كله...وانه بعد ما اتحمل اكتل روحي... والله...نور... الي شفته...ماحد يتحمله....محد....
نوراي.... يا ساتر .... سولفي اسمع....
حسنة.... ولج شحجي.... شكول.... كتلت روحي عليه هالمصخم... خية نكس...نكس...تعرفين شنو نكس... وماكدر لا احجي ولا اكول لاحد...تصير دماي...
نوراي...عزا...جلدي كزبر... وتالي شنو هالتشويق سولفي تفاصيل ....
حسنة...نوراي....محمود....
قطع حجيها عادل دخل بسرعة
....عمة عمو محمود يتانيج بالديوانية يكول يالله....
حسنة جرت عادل قوي من ايده ....خو ما سوالك شي...
عادل... لا ما سوالي شي اصلا عمو محمود حباب حيل وبس يبوسني .... واطاني فلوس شوفي...
اشو هاي اسودنت علولد وخنزرت بوجهه وصيحت...
حسنة....اياني واياك مرة ثانية تروح يمه....ابد ...ابد حتى لو اطاك فلوس لو صاحك... لا تروح ...اموتك اذا رحت ...
عادل...اخ عمه شبيج...شسويت انه .... هديني عورتي ايدي....
نوراي ...حسنة اذيتي الولد شالقصة...عوفيه...
هدته بس حالتها مو طبيعية .... طلعت بدون ما سلم بقيت اهدى بعادل خطية ...
ايامي عادية... ذو الفقار تقريبا ما نشوفه....اشتغل وامشي واحجي واكل واشرب...يعني عايشة...لي شاحس بروحي ميته وهو مو يمي.... صوته... وكفته... نظرته.... شكله ...عطره ما يفاركني.... رغم هذه انا عابشة....و ملتهية بالبيت وبوسن الي ما تبطل مشاكل واذية ...
.......
يتبع....