أريد حريتي

أريد حريتي ب١٥

البارت الخامس عشر

الايام تمشي والامس مثل اليوم ...واليوم مثل باجر... متشابهات....

ايدين صار عندها بنوتة تجنن...تمنيت اكون وياها... كلش تعبانه.... بس الحمد لله عندهم تأمين باقية بالمستشفى اسبوع كامل الطفل هم يغسلوه ويبدلوه بس يجيبوه هيه ترضعه....
حسنة تغيرت هواي ...هواي.... ضعفت ووجها صار يخبل وجسمها بينت ملامحه يعني تغيير جذري...
وسن ملتهية بتلفوني... وانة ساكته عنها ...اصلا ما استخدمه هواي....
.... وصارت دوران سنة عادل... اجددت الاحزان كلها.... سووا قراية وجابوا ملايات ووحدة تنعي اكثر من الثانية بحيث مرتين طحت واغمي عليه.... وطبخوا ووزعوا ثواب ....
وودني للمقبرة وراها.... بحيث فقدت ...تخبلت...انه ما شايفة المقبرة... ولا داخلة الها.... من شفتهن وشفت قبر عادل واسمه عليه...اسودنت لطمت لطم ومشعت شعري شلعته بيدي .... فاقدة ما احس بس ايدين قوي شبكتني...ماكدر اتحرك... مغمي عليه بالمقبرة... ورا ساعة اكثر فتحت عيوني انه بالسيارة والسيارة تمشي تهسترت ورجعت اصرخ وابجي... ذو الفقار وكف السيارة ونزلني صب جلكان مي كامل عليه نكعت من راسي لرجليه... وصرخ بيه....
ذو الفقار....كافي دخيل الكعبة...بس... شسويتي بروحج...صدك جذب...
انخلست وبقيت كاعدة بمكاني...اروح وارجع... مثل المخدرة.... صاح لام علي نزلت وياي للمطعم للحمام وانه جثة غسلتلي وغيرت هدومي.... ورجعنه للسيارة هدوء.... بعد ما حجيت ولا اي احد ....
وصلنه كبل للفراش اسبوع انه مصخنة وارجف... بالليل احس كمادات باردة علراسي .... اعرف هاي الريحة عطر بارد يجنن ممزوج ويا ريحة ااجكاير... جنت اشمئز من اشم ريحة جكاير بس هسة تعودت صارت ويا عطره نفس اليه .....
ثاني يوم بديت اصحصح...وترجع صحتي... ...
اسبوع رجع وضعي طبيعي... ام علي...اخذتنه للصالون بعد ماعرفنه استاذ محمود المبجل بعد اشهر طوال قرر يرجع للوطن.... فاخذنه حسنة ووسن وام علي..وصلنه طالب.... بيومها من ردت انزل للصالون استاذن يحجي وياي ...
طالب ...خوية خو ما زعلانة عليه جه ردت اخطبج...
نوراي...لا عادي... عدت ... ابتسمت...
طالب...اي وعلي هسة انتي بمعزة خواتي والله شاهد....
نوراي... رحم الله والديك خوية وانت اخ عزيز
دخلت للصالون ...ام الصالون باوعتلي واطك بعلجها شكلها يجنن شوية قصيرة والجسم ساعة رملية والشعر اشكر طبيعي والمكياج لابسة بنطلون ابيض وتشرت مزند والريحة تجنن
...منو هاي البزونة....
ام علي...هاي زوجة ذو الفقار...
ام الصالون...الله عليج... يمة شلون يختار... هنيالج بيه...
غندبت وضجت ومنين تعرف ذو الفقار سابي قلوب العذارى.....
ام علي... هو اليوم جبناها تطلعيها عروس ام هيثم حبيبة ما وصيج انتي تشتغلين بيها فدوة....
حفت وجهي وكصت شوية من شعري لان كلش هملته واصلا ماي البصرة كلش مالح فصاير خفيف ومقصف... ومكوش... سالتني اصبغه ورفضت لون شعري اشكر ...
سوتلي تنظيف بشرة وكريمات صدوك رجع وجهي يضوي... ورجع الدم بيه...
حسنة طلعت حسناء كصت شعرها وصبغته اسود بيه حمار يجنن عليها طلع.... ووسن كصوا شعرها وسرحوا وام علي بس حفت.... وسوت تنظيف بشرة... رحنا من العشرة الصبح رجعنه ب٢ الظهر بالطريق وكف طالب اشترالنه لفات وبيبسي...
اول ما دخلنه الحجية كاعدة بالهول مادري شعجب... شافتنه وظلت تصلي علنبي...
الحجية...اي هيج شوية طلعن نسوان جنتن جنجن جندي مسلح....
خربنه من الضحك.... خرب ضحكنه ...جنان ...
جنان... اوي هاي شمسوية بروحج حسنه... ياععع جنتي سمينة وتارسة شحلاتج .... صايرة عودة... لو من عاشر السحالي...هههههه
حسنة.... جنين ...كولي زين لو ولي ....
جنان...ياع عود جاية افرحج...جا غير محمود بالديوانية يم الولد... كاظم خابره وجابه....
حسنة...نعمالله....
حسنة طيلة هذيج الفترة ما عندها اتصال بمحمود كونه غالق فونه.... بس من سمعت هو هنانه خدودها وردن...
اخذتني لغرفتها....
حسنة... شتكولين اجه يرجعني...
نوراي... اكيد ... خل اميكجلج.....
حسنة....نور... انه احب محمود ...بس اخاف ارجعله واتندم....
نوراي... مادري شكلج.... انة بهيج مواقف ماعرف افكر....
مكيجتها شي بسيط ...طلعت تجنن من ضعفت بينت عيونها وحواجبها...حتى شفايفها... جان الخدود مغطيات كلشي .... لبست كلبية كحلية وبيها نقش ذهبي مكسمة وطويلة ....
واصلا شعرها مسرح مفتوح بس ذبت الشال عليه...
ام علي دخلت ودخل وراها ذو الفقار... سلم... وابتسم بوجه حسنه... ما صدكت ابتسم بوجهها ركضت شبكته... بس هو بارد بس طبطب علجتافها....
ذو الفقار... حسنة... مح... هيج التفت وهو يحجي وسكت باوعلي ابتسم وغمض نص عين ورجع يحجي....
محمود اجه واعتذر جان يشتغل باربيل.... وتوسل يرجعج... انه كلتلج من قبل القرار الج انه مالي شغل... بس انتي تتحملين نتائجه....
حسنة.... خوية انه شفتهم.... بكيفك....
ذو الفقار... حسنة... اي لو لا...
حسنة تباوعله وتباوعلي... وتباوع لام علي... ومحتارة....
حسنة... اي.....
ذو الفقار...خير ان شاء الله.... بس للمرة المليون اكول واعيد انتي تتحملين قرارج .... لو بيدي تعرفين رايي
سكتت وهو هم بس كال توكلنه على الله وطلع
...... وراحت حسنة ويا زوجهه الي صافن عليها من داخلة للاستقبال حسب الجواسيس الي ينقلون الاخبار ... الاطفال طبعا....
فرحتله بس الشك موجود ابو طبع ما يغير طبعه.... بيومها انه حجاية ام الصالون تاكل وتشرب وياي وما اشتهي اباوع بوجه....
كاعدة ابدل لعلوش ... ودخل علينه...اول مرة يدخل غرفتي هيج....
وعصبي والحواجب معقودة والعيون مخنزرة....
ذو الفقار...مو اخابرج ....ويامن تحجين.....
نوراي...شنو...اصلا الفون....
ذو الفقار ...وين تلفونج....
صفنت انه ما شايفة تلفوني من الصبح....
ذو الفقار... نوراي... وين تلفونج....
نوراي.... مادري...وين خليته....
دورت كلبت البيت ...دورت ببيت الحجية....
صفنت...حاولت اذكر... اذكرت وسن اخذته بالصالون تلعب بيه.....
رجعت للبيت...اريد احجي وياها واسمعها تبسبس... هسة كلشي تمام...الي ردته سويته....
نوراي... اخذت الفون منها خطف... وسديته...وصرخت بيها ويامن تحجين من فوني.... مو امنت بيج...
وسن.... اخذي وولي من غرفتي... ردت اطلع وذو الفقار بوجهي صار....
ذو الفقار.... وين تلفونج....
نوراي... بعدني ادور....
ذو الفقار...ها....
الفون ورا ظهري دحسته بالردان .. ومشيت لغرفتي... فتحته... شفت الرقم شسوي...هسة.... كتبت الرقم بورقة.... قفلته وخليته بالجنطة...
وسويت روحي لكيته...
طلبه مني... اخذه وفتحه...كلب بيه... واطاني اياه....
وسن واكفة يم غرفتها مجتفه وتبتسم....طلعةابوها وانا ركضت الها....
ردت اعتها من ايدها واكسر راسها بس اذكرت هيه يتيمة وفاقد امها وبعمر خطر...
نوراي... وسن... ويامن جنتي تحجي... شوفي لا حسبالج ما احس بيج واعرف وضعج... انه هم فاقدة ام واب... والله اعرف شتعانين.... لا تخسرين نفسج علمود كم كلمة حلوة....
وسن... معليج بيه....
نوراي...اذا عرف ابوج شيصير....
وسن... اتحداج تبلغينه.... التلفون تلفونج... وبكيفج...
نوراي... وسن انه صديقتج... واخاف عليج...
ضحكت... ودخلت سدت الباب بوجهي...
حلفت بعد ما طيها تلفوني لو تبوس رجليه وايديه....
.....
تلاث ايام انه ووسن معارك ...انظف توسخ وراي. لو انظف المطبخ وبحجة جوعانة تكلبه كلاب.... شسويلها مادري....
....
اجاني عادل يركض...
عادل...خالة بيبي الحجية دزت عليج ...تكول جايين خطار من الناصرية...وتريدج ويا البنات بالبيت ...
بدلت لعلوش واخذتله ملابس لان دوم يرطب ملابسه يا مي ياعصير.... واخذتلي دشداشة احتياطية ...
دخلنه والحجية
...تعاي يمة نور...سلمي على خالتج وجمانة... اقاربنه من الناصرية....
باوعت...جمانة اسم على مسمى خمرية بحمار والجسم طركاعة سودة كل ملامح الانوثة طاغية... وكفت باوستني وباوست امها... وانة بحركة لا تلقائية اباوع لروحي ممسوحة مسطرة وتمشي مادري جه الملابس عريضات.....
رحت للمطبخ ويا مرت كريم لوحدها وعندها طفل يرضع....
نوراي... بشنو اساعدج...
زينب... حبوبة ..حضرت صينية التقديم ...بس الغدا جابوا سمج يرادله تنظيف وملح والولد يشونه وتمن ابيض كالت الحجية.... وعجنت انوم قسوم واخبز....
نوراي... تمام....هسة ابلش....
ادور كففوف ماكو شلون انظف السمك مادري.... بالاخير استسلمت ... نظفته...ملحته... نظفت الخضرة ونكعت تمن ... كصيت الطرشي وبصل وليمون .... وملتهية اركض منا ومنا...
دخلت يمي جمانه ... الشال ذابته ذب ولابسة كلابية مقسمة تقسيم علجسم ماروني... والصدر دلعة بحيث من ادنك...يالهوووويييي.....
جمانه...ها حبيبة تردين اساعدج عفناج وحدج بالمطبخ...
نوراي...لا شكرا...كلشي جاهز.... بس اتاني الولد يجون يشوون السمك...
جمانه...انت مرة عادل مو جنتي...
نوراي........الله يرحمه....
جمانه...الله يرحمه... عادل درة مالت الله الف رحمه علروحه....
اباوعلها .... مادري ليش ما حبيتها ...وحظي جاب ذو الفقار.... مادري شصار بيه... مااريده يشوفها... ركضت للباب ...
نوراي...محتاج شي.....
ذو الفقار... هاي منو ....
اشو هذا ولا جنه يشوفني... تعداني وراح لجمانة وسلام وضحك... وما عوازه بس يبوسها ...وانه.... شطت.... دخنت...
هم يسولفون وانه ادخن واتأفف...
ذو الفقار ...نور ...محتاجين شي....الغدا ناقص شي يحجي وياي ومخنزر عليه.... ويم ست الحسن فاك البراغي...
نوراي... اي منو راح يشوي السمك....
ذو الفقار... جهزي بالمشوايات ...انه اشوي...
فكيت حلكي.... عود صدك...شدعوة.... ولو شكول حقه ... الاخت سايحة وتحجي تذوب الصخر... وكل شوية لو ادنك ويطلع صدرها.... لو ادنك...ويبين التخصر...وال.......
انا اتحركص...وهو ملتهي فاك حلكه ... بالاحرى بس يبتسم ...ما بيوم شفته يضحك... اجت امها ونفس الشي سلام وسوالف.... ...
زينب... اجت ورا ما نومت قاسم... وشنكت وراح تخبز ... رحت وياها لان محد يساعدها....
بس عيني وبالي كله يمهم.... معقولة يعجبه هيج نوع....
زينب....يا نوراي.... شبيج خية ...فتحي القبق....
نوراي....ها... اسفة....
.......
نوراي....زينب....
زينب...ها....
نوراي...هي مرت ذو الفقار ...جانت حلوة....
زينب... جا انتي ما شايفة صورها...لا ...يعني...حليوة...اكصر مني...ومليانه... مو كلش بيضة...ملامحها كلها ناعمة.... عادل يشبهها شوية....
نوراي... زين جمانة دوم تجي هنانه....
زينب... والله خية ...هاي قصتها طويلة...يكولون عود كبل ذو الفقار رايد يزوجها....بس ازوج ام ابراهيم الله يرحمها... وجمانه هم زوجت....
نوراي.... ها يعني مزوجة....
زينب.... لا خية وين ...هسة مطلكة... صارلها سنة ونص...لا اكثر سنتين يمكن... وهاي كل ما تجي...تكابل ذو الفقار...وتكعد....
سمعت هيج وانه ايدي لا اراديا لزكت علتنور وانه صرخت....
هو وجمانة جايين يتمشون يردون يشوون السمك... شافني اصرخ ... عاف السمك واجاني يركض....
لزم ايدي..
ذو الفقار.... شبيج.....
انه ما احجي بس اصرخ واون....
زينب... خوية حركت ايدها...يرادلها دهن معجون...لا اطكك....
لازم ايدي ويسحل بيه.... ركض للمطبخ فتحي الحنفية وخلا الماي يصب عليدي...وراح شوية واجه جايب عصارة.... دهنها كلها ....
انه ذابت روحي ...مو من الم الحرك...من لمساته الي...هو يدهن بيدي.... وانه مركزة بتفاصيله.... خلص ...شال راسه ... باوعلي....
ذو الفقار...هسة تصير زينه مو كلش قويي الحرك... لا تتعبين...واذا تردين ترحين للبيت ترتاحين روحي...
.....
اي بكلبي احجي...تريد تفتك مني...حتى يخلالك الجو ويا حبيبة الكلب... هيج خباثة كاعدة علكلبك....
....
عافني وطلع.... شوية وراحت وراه....يشوي...السمك... وجمانة مطلعه زنودها كلهن وتخبز...شنو من خبز كل وحدة شكدها.... ويسولفون....
بالي يمها شلون تصرف....ركزت هو وين يباوع... ما يباوع لاي جزء من جسمها...بس لوجهها... معقولة هالدرجة يحبها....
رجعت للمطبخ مقهورة ... طفيت النار جوا التمن .... وحضرت الصحون وكلشي بصواني حتى يقدمون...بس دمعتي بطرف عيني.... هسة انه شعليه.... شبيه.... لا بالي يمه... ولا اريد احبه.... انه هنانه وضعي مؤقت....
قويت روحي.... وكملت....
المعتاد نصب الغدا اذا تكون خطار...الزلم بالديوانية...والنسوان بالهول...
اليوم صبوا بس بالهول.... عود ...صدك....شدعوة....هالميانه....
كعدنه كلنه سوا.... انا علوش يمي... شوية وكعد ذو الفقار يمنه بحيث يصير مقابيل جمانة....
اوكل علوش واشوف سمج يتبلح وينحط بالصحن كبالي ... باوعت ذو الفقار يبلح السمك ويحط كبالنه....
جمانة... يا شتبلح... شبيها مكصوصة ايدها....والله عليك سواليف....
ذو الفقار... هاي نستلة مال خبز وتنور.... شوفي شلون اذت ايدها....
نوراي... انه ابلح.... شدعوة ....سووني كلش....
ذو الفقار... ادنه علاذني يشاورني....كاعد ابلح لعلوش لان هريتي تمن بس.....
ويباوع بعيني.... انه من يباوعلي هيج اسخن...اثول....
ظليت ماعرف شسوي...وعليش ما يرضى يشبع ابو بطن.... بالاخير...اتحججت بالشاي وكمت....
اروح وارجع بالمطبخ.... واقلد عليها شلون تعوج حلكها من تحجي....
واسمعه وراي.... يمتى يجي مادري....يكول هوا....
ذو الفقار... شبيج.... متأذية منها... ولزم ايدي يباوع لها ....
بعدني ما حاجيه وست جمانة دخلت....
جمانة.... ياع بعدج تونين من هاللسعة.... شسالفة ياما احتركنه....تذكر فقوري....من احتركت بساقي... وين ...
ورفعت دشداشتها.... وتراوي.....
هنانه....تذكر بعده الاثر ولا راح....
ذو الفقار....احم...احم.....
بكلبي حقك تغص....انه غصيت... جبتله ماي واحجي وانه ساده سنوني....اسم الله... شمرت عليه الماي وعفتهم وطلعت من المطبخ.... وجع.... شلون سز.....
خلصوا نكل المواعين ودخلنه للمطبخ نشتغل....
كفينه المطبخ... غيرت دشداشتي واجيت للهول حسباله بعده ...لكيته ماكو....اوف واخيرا....
اخذت علوش بحجة انومه واستأذنت... رحت للبيت ادردم....
نومت علوش... ودخلت لغرفتي...فتحت شعري...وكفت كبال المراية... لميت الدشداشة علجسمي... جكد فرق بيناتنه ...انه شبه ممسوحة.... باوعت لروحي...حلوووة...بس يرادلي لحم.... اذكرت حسنه....
ضحكت...ورجعت احجي ويا روحي ...عليمن...هاي انه الي يريد يحبني يحبني مثل ما انه كلشي ما اغير بروحي.... هه.....
طلعت للمطبخ...اريد اصبلي شاي... واشوفه كاعد يشرب شاي بالمطبخ... اكول بكلبي شعجب... عفت ست جمانة....
ذو الفقار...شلون صارت ايدج....
نوراي كاعد اصب شاي.... جاوبت من ورا خشمي... زينة....
ذو الفقار...صبيلي بعد كوب...راسي راح يطك...
صبيتله وردت اطلع....
ذو الفقار...نوراي....
وكفت بمكاني بس ما باوعتله...نعم....
ذو الفقار... شنو... بعده ما مكمل واسمع صوت جمانة بالبيت واجت كبل للمطبخ....
جمانة... مساء الخير... شفتكم ماكو كلت اجي اشوف ...شلون صارت ايدج ...نور....
نوراي...زينة...واسمي نوراي....
عفتهم ورحت للغرفة....
بعدني ما دخلت واحس ايدي انجرت وافتريت مثل الدوامة صرت مقابيله ... بالاحرى لازكة بيه..... ويباوعلي من فوك لجوه بس مو خزر...لا نظرة... ربكتني... وترتني....
ذو الفقار....ليش هيج تصرفين....
سحبت روحي... ورجعت ليورى وانه لاوية بوزي... وعاقد حواجبي....
نوراي... اعرف...زواجنه شكلي...وما بيناتنه شي... بس على الاقل احترم وجودي... لو تريد ماعندي مانع ننفصل واخذ راحتك.... اذا تحب....مال ههي وههاي وماعوازها الا تنزع هدومها...ما يصرفلي...كرامتي ما تسمحلي....
ذو الفقار... ننفصل...خير ان شاء الله ...عافني وراح.....
وانه اخ لو اكضها اكطعها بسنوني... دخلت قفلت الباب وظليت ابجي.... فكرت شنو ذنبه اذا جان يحبها انه حجر عثرة بطريقهم... بس ما يخالف... لازم يحترموني... على الاقل ببيتي.... بيتي...هو وينه بيتي...انه كاعد واتحلم....
ما رحت بالليل لبيت الحجية رغم دزوا عليه اكثر من مرة...البنات كلهن جايات علمود جمانة وامها ...كلها تحبها لان متربية وياهم....
اجت ام علي من سامعه...انه محتركة ايدي...
ام علي تكلب بيدي... لا خية سهلة...ما يبقى اثر علكيمر...
نوراي....اي كيمر ناشف ما بيه دهن....
ام علي...هههههه تحششين صايرة...
نوراي... ام علي... اريد اسافر...
ام علي....وين ترحين....
نوراي....لاهلي...لاختي ...
ام علي... ليش ...واحنه.... قصرنه بشي...
نوراي....لا ابد...بس كافي ثقلت عليكم هالكد.... واشوف روحي...حجر عثرة بطريق ابو ابراهيم... سمعت جان يحب جمانة....
ام علي....ها...كولي هيج.... اي ....شسمعتي بالله
نوراي...خطية شنو ذنبه مرتبط بيه وهو يحبها....
ام علي...شوفي نور.... جمانة تحب ذو الفقار...اي ما انكر من سنين ...من المراهقة...تحبه وتسودن عليه... بس ذو الفقار يحبها....امممم شاكة... هو ما اخذها من جان شاب وما مزوج...هسة يفكر بيها....
نوراي... ما شفتي ضحكهم وسوالفهم والنظرات....
ام علي.... هههه ها غرزت....
نوراي...شنو هية....
ام علي.... نوراي... ذو الفقار ما حب جمانة... ولا حب اقبال الله يرحمها قبل الزواج...ورا الزواج يمكن....
نوراي... سولفيلي عليها....
ام علي...غير مرة...هسة لازم اروح.... ناظم كلساع يرمش....
نوراي...تحبيه.....
ام علي.... يووووو جكد.... اعشكه.... رغم تزوجته مو عن حب.... يالله حبوبة مودعة...
نوراي...لازم تحجيلي كل القصص.
ام علي تريد تطلع .... ان شاء الله .... تصبحين عالخير....
راحت ورجعت للهلاوس مالتي...وينه هسة كاعد يمها...يسولف وياها.... كاعد تضحك ضحكتها البربوكية....
صعدت عندي واختنكت....طلعت تمشيت للسدرة... الجو حار حيل ...شرجي تخنك..
وصلت هدوء بس صوت الليل صراصير... صوت
الماي....
اتنهدت...
....عود ليش ما عندي حظ....

.ذو الفقار.... ليش ماعندج حظ.....
يارب اله يوم جالطني دوم يطلع كبالي فجاة....