أريد حريتي

أريد حريتي ب١٢

البارت الثاني عشر

راسي وجسمي كله مكسر .... اسمع صوت صياح بين ام اصالة وبنتها
رهف... احسن يهجم البيت علينه ويحركه....
ام اصالة .... بس ولج امانة هاي امانة .....
.... وكفت كوة احس الغرفة تفتر بيه.... ردت اوكع اسندت علحايط وفتحت الباب وهن يتصايحن ....
رهف...هاي شوفيها ام سبع ارواح هجمت الدنيا ومابيها شي....
ام اصالة ...سلامتك حبيبتي ...تعالي اسندك...لا توقعي....
نوراي... ام اصالة شنو صار....
رهف .... تفضل....تسوي بلاوي وتصيح شنو صار....
ام اصالة ....رهف روحي لغرفتك واياني واياكي تطلعين ...
رهف.... ااااااااف....
ام اصالة.... تعالي بنتي اكعدي هنانه.....
نوراي.... شلون ...شنو صار ...انه شلون هنانه...
ام اصالة... ذو الفقار طلعك ...من الحريق...
نوراي...شلون .... انا ما اذكر شي....
ام اصالة... انه اجيت من البرا لكيت الشقة تحترق وذو الفقار يدور عليكي بنص الدخان .... طلع سألني اذا انتي طالعة واكدتله ب..لا....رجع وورا دقايق طلع شايلك .... انتي باقية تصيحين وطلعك....
نوراي.... انه صيحيت ....ما اذكر.... انه ختلت يم قنينة الغاز.... من اجوا ....
ام اصالة....يابنتي ...الله يحميكي .... لان عوف رجع مرة ثانية ما اعرف شلون عرف انتي هنانه وتعارك ويا ذو الفقار وصار صياح ورمي طلق ....
نوراي.... شيريد مني....شيريد....
ام اصالة.... استغفر الله.... هذا شيطان ... شيطان.... بس الله يكدر عليه....
نوراي بقيت ابجي وهيه تصبرني....... اندك الباب فتحته ... ذو الفقار سلم وبقى واكف بالباب....
ام اصالة.... تفضل امي انته مو غريب...
ذو الفقار... تسلمين ما قصرتي.... نوراي...شلونها....
نوراي... انه بخير....مشكور....
ذو الفقار...حضري روحج راجعين للبصرة.....
نوراي.... بس....
ذو الفقار بحدة... كلت حضري روحج
ام اصالة ... تعالي حبيبتي ... تعالي ....مابقى شي كلهن راحوا بالحريق....
نوراي.... شلون بيه اظل عالة علمجتمع انه ليش عايشة.... تهسترت وبديت اضرب بروحي واصرخ وام اصالة خطية تحاول تسكتني بس انه فاقدة وما احس الا ايدي انشلن اريد اشيلهن مااكدر .... فتحت عيوني الي معميات من الدموع.... واشوف ذو الفقار عاقد حواجبه .... وخازرني..... وبعيونه نظرة شر ونار .....
ذو الفقار.... بس.... ما اكدر اعوفج هنا.... ما أامن بعد....كلشي يصير عليج ....وانتي امانة بركبتي.... اهدي.... وفكري زين... بس احنه لازم نطلع هسة ... لازم ....
لا اراديا هزيت براسي اي .... وسكتت .... لبست كاب من ام اصالة وشال وطلعنه ...
الطريق كله انه ساكته.... ماكو دمع وابجي.... ولا اذكر شي من الي صار.... عقلي مشوش....
وكف جاب اكل ما كدرت اكل.... نزلت للحمام غسلت وابااوع ملابسي كلها متلفة دم .... هم زين سود....
شسوي... لا عندي فلوس واشتري ولا اكدر اكله يشتريلي .... شفت باكيت كلنكس اخذته كله وصفته وحطيته....
طلعت واشوفه واكف قريب من الحمامات ضجت شنو راح اشرد اجه عليه يمشي سريع... وبيده علاكة ... اطاني اياها.... واشرلي بمعنى رجعي للحمام.... فهمت....بس هو شلون عرف....
رجعت للحمام فتحت العلاكة واشوف جايب من كل نوع باكيت..... استخدمتهن ونظفت نفسي وطلعت ....
للسيارة كبل واشوف...الكشن مغسول.... استحييت ونزلت من هدومي....
كعدت ... بدون حجي فتح بطل مي واطاني... كد خوفي ورعب... اخذته ....كاعد اشرب... اطاني لفة.... بعدني ما فاكه حلكي... خنزر عليه...اخذته ... من اول عضة واكلتها كلها جكد جنت جوعانة .... ما احس بروحي......
باقي الطريق.... هدوء. ..
ذو الفقار.... ليش ما بلغتيني من اجاج عوف ....
......
ذو الفقار ....ليش ما لجأتي الي....ليش لازم بالحلقة الاخيرة انقذكم ...لو الحك ... لو ما الحك....
ضرب الستيرن كمزت واحس الهوا انكطع عرفت يحجي عن عادل....
نوراي...ماردت اتعبك واحملك اذية كافي
باوعلي بنظرة عتب.... ذو الفقار يشبه عادل الله يرحمه بس ملامحه احد عيونه كلش كبار وسود وحواجبه حيل ثخان وطوال معقودات.... اطول من عادل وايضا رشيق وجسمه متناسق.... بس وجه ما بيه مشاعر يعني الاحساس الاول الي يتملكني من اشوفه هو الخوف.
ذو الفقار.... تدرين لو انتي ميته جان ما سامحت نفسي لان انه الي سمحت تعيشين لوحدج وسط ذيابة....
نوراي.... انتي ما قصرت ....وكلمة شكرا ما توفي.... بس ماعندي غيرها ...شكراا.
ذو الفقار.... نوراي.... انتي راجعة للبصرة وياي بنفس البيت والمكان ...حجي عن الي صار ما اريد.... لحد ما اعالج الموضوع....سبب الزيارة ...الشقة انباعت لان عندي دين اسدده....
نوراي.... يا ...اسفة ...والله ...لو كايل ولا اروح لبغداد ...لازم اخابر ابراهيم واسافر شلون ما جان....
اباوع واشوفه صافن عليه وبوجه نظرة تعجب على استغراب على عصبية ماعرفت تفسيرها....
ذو الفقار.... عادل شلون جان متحمل هالكم من الغباوة....
نوراي....نعم....
ذو الفقار....خوية كاعد افهمج الحجي الي تحجي بس ....
لويت بوزي وضجت....درت وجهي علجامة بعد ماباوعتله نهائيا....
وكف اكثر من مرة بكل مكان به حمام يوكف ... اخر مرة جان اكو محلات مال ملابس .... طلعت من الحمام شفته هم لازم علاكة .... اخذتها ... بيها كاب جديد وعباية راس.... مشتريهن من المحل .... اجن بوكتهن.... لبستهن وطلعت....
ذو الفقار.... لازم نوكف للسوك من نوصل اشتري جنطة وهدوم.....
وصلنه الدنيا صبح الساعة ١٠ تقريب وداني سوك كبير وبيه اشكال... واسعار رخيصة .... امشي واباوع وهو يمشي وراي .... استحي اختار وهو وياي ...اصلا بالي مو يم ملابس....
ذو الفقار.... اي شي غير مرة نزلي ويا ام علي واشتري بس هسة ضروري تشترين هاج .... اطاني فلوس بيدي.... نص ساعة وارجعلج لا تطلعين من هذا الشارع ...وهذا التلفون خليه بيدج....
اخذته وهزيت راسي.... تلفوني محترك بالشقة او ماخذيه مادري....
تمشيت واشتري بلا نفس اجيب واحط ٣ دشداشات سود وملابس داخليه وخاولية ....
وكم شغلة ثانية.... التلفون بيدي ... واكفة اباوع واسمع صوته وراي.... خلصتي.... صوته حاد وقوي... من اسمعه اكمز واقشعر.... التفت شفته.... لازم جنطة ملابس كبيرة ... هزيت براسي اي ومشينا للسيارة ... فتح الجنطة وخليت اغراضي ...
ذو الفقار... بعد يرادلج كماليات شامبو ومعجون اسنان .... وداني لمحلات ثانية كلش حلوة اشتريت اشياء بسيطة وخلص.... رحنا للبيت والكل تلكاني..... بترحيب حار اولهم ام علي....
ورا السلام والترحيب صبوا غدا .... اكلت شوية و تكترت ....
الحجية.... يمة شبيج ما تاكلين.... تستحين لو شني .... تعاي اكلي صايرة مصفرجة يكول نومية ميبسة ....
ضحكتني الكلمات.....بس سكتت.
ام علي.... خليها يمة .... تعبانة من الطريق...كومي خية غيري هدومج.... سبحي....
ابتسمت وكمت.... سبحت وغيرت هدومي وكعدت يمهم ....
نوراي... علوش ماكو....
الحجية.... يووو عليش ما يجي من يوم رحتي.... يكول ما حبكم....
ام علي.... بعدين اخلي الجهال يجيبوه يمج....
ترخصت ورحت للغرفة مغيرين الكنتور جديد فتحته فارغ.... خليت اغراضي البسيطة.... وتمددت علفراش احاول اذكر شنو صار بالشقة اذكر انا ختلت بالكاونتر يم قنينة الغاز والحجي بس وراها شنو صار.... شلون لكاني ذو الفقار....
احاول اذكر ماكو .... غفيت....
ياريتني ما غفيت كل حلم ابشع من الثاني .....كعدت الهث .... احس نار انه محتركة.... طلعت اركض من الغرفة اريد هوا.... وين اروح .... المطبخ بيه باب يطلع علحديقة... بيها نخل وسدرة فتحته وطلعت مشيت من اجيت اول مرة ما جنت امشي حدي للحديقة مرة او مرتين شفتها بس.... هسة مادري بروحي.... مشيت بممر طويل وعلى طوله زرع ونخل.... بقيت امشي واتنفس .... لحد ما وصلت لنهر زغير او ساقية يعني فرع من النهر....
وكفت وانه نزلت علرجليه ابجي واشهك ..... ما احس الا صوته .... فزيت مخروعة اباوعه ضوا لجمرة جكارته كاعد يم السدرة ....
ذو الفقار.... الي مريتي بيه مو شوية.... بس حسج... الوادم نايمة ...شتكول....
نوراي.... ماهمني الناس.... اريد اهلي....
ذو الفقار .... لاحول ولا قوة الا بالله.... صبري صبري....
طفأ الجكارة وبقى بمكانه كاعد....
نوراي.... شلون طلعتني من النار.... وانتي شلون اجيت....
ذو الفقار.... روحي هسة الدنيا ليل والي يشوفج يفهم غلط....
نوراي.... ماروح....ارجوك....لازم اعرف....
ذو الفقار...هه.... انه راجع من تركيا ونازل بالفندق وعلي الولد الي يجيبلج مسواك خابرني .... انتي ما ماخذه المسواك... واجيت اشوف.... واتفأجات بالنار ...دخلت دوررت مالكيتج.... بس سمعت صوت تصيحين ....عادل...عادل.... ركضت للمطبخ.... وما شفتج.... ردت اطلع واسمعج تدكين علكاونتر وتصيحين عادل ...اختنكت.... وطلعتج.... روحي.... هسة....
نوراي.... شكرا..... اختنكت بعبرتي.... ومشيت راجعة للبيت.... عادل.... وينه عادل....عافني وراح ....
مانمت لاذان الفجر اتكلب... الصبح فزيت على راجدي وجع خدي وعيني .... فتحت عيوني واشوف علوش ...
نوراي....اخ ليش تضربني...
علوش.... انه ما حبش
نوراي.... ليش ...شسويتلك...
علوش.... وين هديتي.... وانتي ون لحتي... ليس عفتي...
نوراي.... يووو حبيب ما لحكت اجيبلك هدية....
علوش ....لعد هدول لمن....
ويأشر باوعت شفت علاليك متروسة ملاعيب وملابس ... رحت فتحتهن... اكيد ذو الفقار مفكر وجايبهن... شلتله سيارة واطيته... وتراك....
غسلت وجهي ووزعت باقي الاشياء والكل يتشكر مني....
..... وعدا يوم من حياتي .....
ورا اسبوع ... واسمع الصياح بين ذو الفقار واخوه طالب الزغير والحجية وام علي.... مشيت علكيف... واسمع....
الحجية.... يمة فقار شورطك ...هذول الموت.... يمة وليدي....
طالب... انه اخذها .... انه ما مزوج...والبنية مابيها كاصر....
الحجية.... خوش.... وهذا الي يهددد علمودها اخاف يكتلك يمه....
ذو الفقار.... شنو انته تاخذها... بعده دم عادل مابرد ... وانتي تفكر بمرته مرة الك..... ولك ما تستحي....
طالب.... جا انته لا ترحم ولا تخلي رحمة ربك تنزل....
ذو الفقار...طويلب كوم منا.... مالي خلكك ... البنية امانة يمنه ...لحد ما يتحسن الظرف وتروح لأهلها..ونخلص....
الحجية.... يمة اسمعي حجي واحد منكم ياخذها....
وخصموا الحجي... البنية حلوة وفقيرة.... ويتيمة مالها احد.... يمة فقار خلي طالب ياخذها....