أريد حريتي

السلام عليكم
ملاحظة :- البارت الرابع والخامس بالاخير تم اعادة نشرهم بعد اختراق الحساب وحذف بعض الاجزاء

لقرائتهم التوجه لنهاية القصة قراءة ممتعة
أريد حريتي

البارت الثالث

مر يوم ويومين واسبوع وانا ماقررت واشرد من الموضوع وهم صابرين عليه والاجواء هدوء ما فكرت اخابر عادل وابلغه ماعرف ليش واصلا ظليت ما اجاوبه وهو يلح بالاتصال ....يمكن استحي يفكر انا كاعد اتحجج او ادور اعذار حتى يعجل خطوبة او زواج ....واحنه ولا مرة مسولفين بهيج شي ابد .....
عادل جان دوم يخابرني ما يرسل رسائل بس بذاك اليوم دز رسالة ورسالتين وتلاثة.....
وانا ما اريد افتح واقرئ جنت كلش ضايجة ومحتارة وماعرف شكول اله واخاف يفتهمني غلط شيكول ما صارلنه فترة وبجت علزواج وانا اصلا ما مفكرة ازوج هسة ما فتحت الرسائل اصلا غلقت الفون والتهيت ويا صطوفي لليل اجه ابراهيم وطلب يحجي وياي
غسلت ايدي جنت اوكل مصطفى ورحت للاستقبال شافني ابتسم وعدل كعدته ابراهيم زوج اختي مو كلش طويل ابيض واحمر ووجه بشوش عنده غمازات بخدوده وشعره اغلبه شيب انسان طيب وحبوب وكريم الخلق ووجه وشكله يبث راحة بالنفس واطمئنان كعدت كباله وهو مستمر بالابتسامة باوعلي وكال
ابراهيم - نوراي تدرين اكو شخص متقدم لخطبتج
نوراي _ ها....
ابراهيم- هههه.... كبرت البنت وظلوا يتسابقون الخطاب
خجلت وصرت انطي الوان ووين اضم روحي وبين متفأجاة وضايجة ومتخوفة منو متقدم الي وعادل شلون شسوي ..... دخلت اختي علخط ويانه
ايدين - منو متقدم الها ابراهيم؟؟ والبنية بعدها زغيرة
ابراهيم _ ههههه ..... ادري وانا تقريبا رافض الفكرة بس من واجبي اسال بناتي يحجي ويباوعلي بنظرة حنان وابتسامة ....وانا ابلع ريك وصرت حرباية من كد ما اطيت الوان ......
ايدين _ منو ابراهيم احد نعرفه؟
ابراهيم - نعم عز المعرفة وشخص مرتب وحباب اخلاق وشغل
ايدين- منو ....احجي حياتي مو كتلني الفضول
ابراهيم - ياول ولج الها الخطابة شبيج انتي
ايدين--- اوي حبيبي احجي مو بطيت كلبي
ابراهيم _ عادل ابو المطعم
انا وايدين سوا------ منو ......عادل......عادل ..... ووحدة تباوع لثانية وهو يباوع النه بنظرة شك واستغراب
ابراهيم - شنو صاير وانا ما ادري بيه
ايدين مرتبكة- لا ...ما صاير ....انته ما رفضته صح....
ابراهيم - طبعا لا...القرار مو يمي يم الكمر ... ويباوعلي
وانا عاملة زيه الهبلة ....الاسئلة هجمت علراسي ليش هسة خطبني...... وشنو صاير ..... وايدين تباوعلي بنظرة عتب .... وانا اباوعلها باستنكار ....صطوفي بجه وانا وايدين كمزنه وعفنه ابراهيم لوحده بالصالة وركض لمصطفى وهي لزمت ايدي وحظنتني قوي
ايدين- حياتي نوراي عمري انتي .....ليش هيج تخابريه وطلبين مساعدته.....انه ما اسافر واعوفج ابد ...لا تخافين ولا تستعجلين علزواج عمري انتي .... انتي بنتي وحبيبتي وامانة امي وابوي ....
نوراي - ايدين والله ما كلتله ابد اصلا ما مخابرته صارلي اسبوع والله
ايدين- هاي شنو لعد شلون ؟؟؟؟؟
نوراي - ما ادري .... بس اترخص منج اخابره وافتهم
ايدين - تمام .... روحي ...وارجع واكرر...لا تفكرين باي شي انه هنا وياج ...ابراهيم يسافر وانه ابقى وياج لا تفكرين امي انتي ....
بستها بالهوا وركض للغرفة سديت الباب وفتحت الفون الي شهرني من اشعارات الرسائل والاتصالات فتحت الرسائل وقريت عادل يسأل على السفر وليش ما مبلغته .....زين هو من وين درى .... خابرته.....
نوراي - الو
عادل- هلا بغلاي وروحي
نوراي- ههه هلو عادل ...
عادل- وين هالغيبة....ما كلتي هذا خطية كلبه يعوره يجوز يموت؟
نوراي - اسم الله عليك ....عادل ....منين تدري علموضوع السفر ؟
عادل- بالصدفة ....وطبعا لازم اعاتبج ...ليش هيج انا اخر من يعلم....
نوراي- ما حبيت اشغلك لو تفتهم غلط ....
عادل- نوراي .....انا جاد بعلاقتي بيج واليوم لو باجر لو بعد شهر مصيرنه الزواج اذا مقسوم
سكتت...ما خجلت بس الفكرة بحد ذاته مرعبة ....وانه مادري شنو جنت افكر من دخلت بالعلاقة ....شنو صار ويمتى صار.....
عادل- نوراي وياي
نوراي - اها....
عادل- ابراهيم جان يحجي ويا ابن عمي ذو الفقار على سفره وانه ياخذ كل عائلته وياه وانه اسودنت ومابقى عقل براسي شلون ما تكوليلي انتي ....راسلتج ...خابرت ...ماكو ...وبصراحة ما تحملت فكرة اخسرج ...لذلك بدون تفكير او تخطيط من شفت ابراهيم خطبتج منه....وثقي انه كلش فرحان لان صارت هيج حتى نستعجل بزواجنه ....
نوراي-.......
عادل - اشو ساكتة.....
نوراي - اتانيك تكمل ...
عادل- نوراي ......انه .....انه ...احبج
احس هاي الكلمة صار بيه صدى على اذاني وبقت تردد....احبج ...احبج ....احبج .....
صخنت وظليت اعرك وانثولت ومادريت شنو سويت بس التلفون مشمور وهو يصيح ....الو....الو....نوراي
رجعت اخذت الفون وانا احس اريد هوا
نوراي- الو ...
عادل- وين صرتي....
نوراي- عادي شوية واخابر ....اختي تصيحلي.....
طن سديته قبل ما يكمل حجيه وبقيت امشي بالغرفة روحه ورجعة واتنفس والكلمة ترن بدماغي احبج ....احبج .... ركضت للحمام غسلت وباوعت بالمراية ....انه ما مستعدة لهيج.....ركضت لغرفة ايدين وردت ادخل بس سمعت ايدين وابراهيم يحجون
ابراهيم- والله ياروحي مادري انه هم صرت بحيرة بس هو خوش انسان واتمنى نوراي ترتبط بهيج انسان وخاصة ابن عمه قمه بالذوق والاخلاق وصديقي وبين خايف عليه لان هيه بعدها زغيرة وما عاشت دنيتها ....وعادل ابن بصرة واولاد عمه كلهم نسوانهم ما يشتغلن او حتى يكملن دراسة ....
ايدين- اي بس هو عايش هنا ببغداد
ابراهيم- اي نعم وهو يتيم كذلك بيت عمه ربوه وابن عمه ذو الفقار هو الي تكفله وفتحله المطعم ....ياريته يطلع مثل اخلاقه ....ذو الفقار بطل وقمه بالرجولة .
ايدين- الامر راجع الها وانه عن نفسي اذا هيه قررت ما تزوج ما اسافر وياك ....
ابراهيم - ولا انه اعوفكم ....تولي الوظيفة والدراسة ...انتم اهم عندي