أريد حريتي

أريد حريتي ب٣٢

البارت الثاني والثلاثون

ميار... انتي من كل عقلج بعد كول الي سولفتي والي صار وكم المشاعر بيناتكم رفضتيه ... وانه مشحتفة عليه..... عادي اغازله صح...ما تضوجين

ضحكت... بعد ما عرض ذو الفقار عليه الزواج رفضت..... رفضت فكرة الزواج ...والالتزام ...اكو شي بداخلي كان ناقص.... غير الخوف الي مافاركني...
كلها حجت ولامتني شلون تضيعين رجال مثل ذو الفقار... هاجسي الاكبر كان ماكدر اكمل وياه....و الخوف بعدم وجود ثقة بيناتنا الاحساس الارجح والاحتمال الاكبر نص العلاقة واطلب الانفصال... او اعيش طول عمري متذمرة وحانقة وما راضية...وبالتالي ما اكون سعيدة ولا اسعد الي حواليه . الزواج مو مجرد مشاعر وغرائز ...
الاهم من هذا كله الاستعداد.. لتحمل مسئولية بيت وزوج واطفال.... صياح وعياط وهذا سوى هيج وذاك يريد لعبتي ...زوج متذمر من ريحة البصل ... الي بهدومج ... الاستعداد ...التضحية ... لازم بيت نظيف على حساب نظافتج وتكسر اظافرج... طبخ لذيذ بس ريحة ملابس بصل وثوم وطبخ... مطبخ يلمع... سوفان بيديج ...
يمكن الاكثر يكول ...مو كلها ولازم يكون عندج وقت لنفسج..ووووو العتب الي ما يخلص...
انه جبانه.... فضلت اشرد من هاية المسئولية واختار حريتي... بالنوم ...بالاكل...باللبس...بالطلعة... مو انانية لكن حقي بالحياة اختار طريقها بنفسي..... لاني جربت الزواج مرتين ...مرة انتهي بمأساة والثانية سبب لي مأساة
من طلب ذو الفقار اكون زوجة اله...اجت كل هاي الافكار براسي... ولذلك رفضت رغم حبي اله... بس ما بيوم ظنيت الحب لوحده يكفي.... هو .
. ما اطاني شي يبين بانه يثق بيه لو صرت بين الف رجال

لذلك حاولت اعيش حياتي ...رجعت لشغلي القديم اغسل المواعين... وطبعا ابو المطعم والموظفين كلهم صاروا وياي وماقبلوا على الي سواه المصري....
ذو الفقار رجع للعراق وبعد ما سمعت اخباره نهائيا....
استمرت حياتي حلوة اطلع ...اسافر بالعطل لغير اماكن... راتبي على كدي لا زايد ولا ناقص ...
استمرت مكالماتي ويا ام علي ووسن وايدين.... علوش كل ما يتعلم شي جديد تخابرني وسن ويسمعه الي...
اسبوع جنت مسافرة استمتعت وشفت مناظر تجنن... من اسافر او اشتغل ما عندي نت بس بالشقة ...
ورا الاسبوع دك تلفوني بالليل استغربت مو من عوايد ام علي تخابر بهيج وقت... كلبي كرصني ...وخفت...جاوبت بسرعة...
ام علي...نور شلونج
نوراي...هلا ام علاوي شخباركم ...شلونكم....
ام علي...نور...ذو الفقار مسجون....
نوراي....شنو....ليش ...يمتى ...شصار...
ام علي...خية ماردت اكلج بس وسن كَلت كلبي...تكلي منو النه .... خية هذا الكلب محمود رجع من اربيل ومتعارك ويا حسنه وكاسر ايدها اجت تلطم وتبجي...
ذو الفقار واخوي عدنان ...رايحين متحاجين وياه وذو الفقار مهدده ... المهم ...ما اطول...طالع ...وهسة مختفي... وامه وعمي الله لا يوفقهم تاهمين ذو الفقار وسجنوه....
نوراي... عزة...صخام...وهسة شصار...
ام علي ...ما صار ..الدنية مكلوبة... وولد عمي وعمامي صايرن طلايب ...وعمي ما يرضى يتنازل وعمت عيني ابو ابراهيم بالسجن صارله اسبوع....
نوراي... استغفر الله ومحمود ما رجع...
ام علي ....لا خية ...مختفي... ووسن والاولاد كالبين الدنية مناحة ...يخافون يصير شي بابوهم ومحد الهم ...الحجية راحت يمهم ..بس ما يرضون... وسن كلش كالبه الدنية...
ردت اخابرج وابلغج...اذا تكدرين تعاي يم الاولاد خية لحد ما تخلص السالفة ....
نوراي...ام علاوي حبيبتي ...انه بتركيا...يعني طيارة وسفر... خو مو بصف البيت ...
ام علي...ها ...هيج... براحتج... ما توقعت تكولين هيج... صدمتيني.... يالله ...الله موجود ...خية اخذي راحتج ...اخاف عطلتج....
سدته... وانه ما كلت شي غلط...صدك ...يعني اذا اريد ارجع يرادله فترة... واذا رجعت شنو راح اسوي مثلا...
.....
صفنت لروحي...منين جبت هاي القساوة... شنو كاعد يصير وياي .... معقولة هالدرجة اني انانية ...
خابرت ايدين وابراهيم وسولفت الهم... لاموني...
ثاني يوم سولفت لميار تعجبت... وكالتلي انه انسانه مجردة من المشاعر وميكانو... لان حتى جاد يشتغل ويانه بالمطعم كلش معجب بيه...واكثر من مرة محاول يحجي وياي ... بس انه ما احس...
يمتى وشلون....
انه ما مأذية احد... ولا اريد احد ياذيني... يعني انه غلط لو همه....
ماخفت على ذو الفقار...لان اعرفه ... سبع وزلمة... اكيد يطلع منها...
اي اعرفه... اعرف يمتى يفرح ويحزن...اعرف شنو يحب ياكل...اعرف شنو يغثه...وشنو يرضيه... اعرف تنسيق ملابسه... كلشي يخصه اعرفه... وحافظته....
..... بس هو يعرفني ...
واعرف راح يعصب اذا رجعت وحدي... يعني كل هذا وبعدني اخاف من رأيه...
خابرت احمد وبلغته يحجزلي تكت ...لان ماعرف ...حجزلي طيارتي لبغداد ...ومن بغداد اروح سيارة للبصرة هو بلغني يجي عليه للمطار...
حضرت جنطة زغيرة واخذت اجازة... وسافرت ... اول مرة لوحدي بالطيارة اذكرت لزمت ايده القوية ...الامان الي احس بيه وياه....
تبسمت...
وصلت لبغداد وطلعت من المطار شفت احمد وام علي وزوجها... سلمت وباوست ام علي ومباشرتا للبصرة ...
وصلت للمزرعة... الاولاد استقبلوني من الباب الرئيسي... علاوي شابكني وابراهيم وعادل شالوا جنطتي...
وصلت للبيت الكبير الحجية استقبلتني... باوستني والبنات كلهم...بالاخير ...وسن الي حضنتني قوي قوي ...
نوراي...وسن راح اختنك...
وسن...احسن شلون اطاج كلبج تعوفينه...
نوراي... هههه هاي انه رجعت...
.... باوعت ....هاي جمانة شسوي هنانه.... سلمت وسلمت عليه مرة ضخمة ...سمينه كولش..
كعدت شوية يم الحجية والبيت على اهبة الاستعداد الزلم بالديوانية والبنات متحزمات...ماي وجاي...
ام علي... كومي خية روحي بيتج...ارتاحي ...
جمانة لاوية بوزها... المهم ما شفت جنان بالطريق ..امشي وعلوش شايلته ووسن مجلبه بيه... وعادل وابراهيم يمشون بصفي...
نوراي...عمتج جنان ماكو...
وسن...ما تجي...ولا راح تجي...غير زوجها مزوج عليها..طلع صارله سنه...
نوراي...عزة....
دخلت للبيت ضحكت جنت مشتاقة لكل جزء بيه... .
سبحت وغيرت ملابسي ... وتمشيت لغرفته...فتحتها... كفختني ريحة عطره.... يارب يرجع بالسلامة....
راح يتقبل وجودي...
.......
التهيت بالبيت والاولاد وخطار طاب وخطار طالع...وجاي وكهوة وماي...
حسنة تكسر الخاطر بس تون وتبجي ...تكول يطبني طوب اخوي انكسر ظهره بسبتي...
صفنت هو محمود ما ميت لو ميت يلكون جثة...
صحت لاحمد استفسر شنو راح يصير... كلي المحامي راح يطلعه بكفالة...
يارب سترك... محمود وين راح.... وحسن وين.... اذكرت التلفون بيه الارقام الي جان يراسلني منهن ... ركضت على التلفون...دروت ممسموحات ....
رجعت لاحمد وسالته يكدر يرجعهن ... اخذه وراح ...
ساعتين واجه مرجع كلشي ممسوح...
راويته الارقام... وكال خل يطلع عمي وهو يتصرف ما يقبل احد يسوي شي بدون شورته...
نوراي .. هو درا انه هنا....
احمد ...يفرك بشعره...عدل نظاراته...مبينه كالب الكون... والله مادري شكلج... بس سال ويامن اجت للبصرة كلتله انه وعمه سهاد ورجلها... باوعلي وكال خل اطلع.... وسهلة ....
نوراي...فوكاهها... وام علي تكلي شدعوة.... يلوموني وانه اعرف طبعه... ما يرضى احد يساعده يريد هو يسوي كلشي...
..... كاعدة بالمطبخ بالبيت الجبير ومحتارة بلفة الحجاب وكل شوية طالع شعري والولد يدخلون ياخذون ماي وشاي... انه ما اهتم بس اسمع حجي اضوج... جمانه... دخلت سلمت وكعدت توكل ابنها ....
مدبدب وابيض واحمر يجنن ... باوعتله وشاقيته... وهو يضحك...يطلع عمره ٥ سنوات
مرة جبيرة الي اول ما اجيت شفتها ....فلك حتى الفرخ حبج ... شني عندج خرزه...
باوعت الها سمينة وتاكل نص الخبزة تسويها لكمة...
وتحجي الاكل بحلكها ويطفر... بس ما كرهتها او حبيتها ماعندي مشاعر الها...
غلست وكملت ردت اطلع جمانة لحكتني.....
جمانة...نور....
نوراي...نعم....
جمانة...اسفة لان ما صدكت بيج ....ومشيت ورا جنين
نوراي ...على... شنو
جمانة... ما صدكت انتي ماعندج شي ويا فقار جان هسة انتي مساعدتني يرجع الي... بس بعد مابفيد الندم... رجعت لرجلي...
صفنت بوجهها عود صدك تحجي... اي هم صح حجيها ابتسمت بوجهها ... الله يسعدج.... من رخصتج....
مشيت....للحجية الي ضغطها ما ينزل... رجعت سويت الها دولكة مي وليمون ونعناع... وحطيته يمها...باوعتلي...
الحجية...انتي بت اجاويد ومعدن ذهب..بس شوية مغبر يرداله تلميع وتنظيف... حكه ابني لو حبج... يمة نور...رديتي...لا تعوفينه بعد... بروح عزاز كلبج...
ضحكت بوجهها ومشيت لاكتني حسنه... تندب وتبجي
شلت بنتها الدبدوبة تجنن مال كرط ...وكلتلها تعاي وياي للبيت ...
وصلنه...كعدت تبجي وتنعي وتندب... كله مني...
نوراي...سولفيلي شنو صار ...
حسنة ...صخام الوجه خية... هالكلب جان باربيل شارد ويا اخوه النذل ابو الدكايك... وانه وامه مكافش...حقيرة وراعية سحورة وبلاوي .... بيوم انه واياها تصايحنه... ودخل ابوه سووه روحه مات وهي شالت النعال وضربتني...ما سكتت رجعت فردة النعال الها وتجي بعينها... ويبوووي شردت لغرفتي...ما اشوف الا للفجر باب غرفتي تفلش... ودخل محمود وماشفت دربي من الضرب ... بالاخير هددته اذا ما جاز مني افضحه...
سكتت.....
نوراي...بشنو تفضحينه....
حسنه...ما تكلين لاحد...
نوراي...ليش مو يمكن بيها براءة ذو الفقار....
حسنة...اي صح...بس تصير دماية وعلي... حتى ولدنه ما يسلمون..منها...
نوراي...حسنة خوفتيني ...شصاير....
حسنة...خية رجلي الكلب واخوه يخطفون ولد زغار... واستخفر الله....استخفر الله ...
نوراي....شنو....
حسنة...خية ياخذوهم يسوون وياهم الموزين ويصورهم .... ويهددون الجهال ...
نوراي....عزة...صخام...واج انتي شلون ساكتة...
حسنة...شسوي...هددني اذا حجيت حتى اخواني يرحون بيها... وخفت ...كشي ولا سمعه الولد خية ينجنون.....
نوراي...ولج انتي شنو ...شنو...شلون اطاج كلبج تضمين هيج شي وهذول الاطفال... شنو ذنبهم....
حسنة.... مو هو كالي بطلوا.... سوووها بس جم مرة جيه معتازين فلوس.... يبيعون فيديوات مالتهم
نوراي...الله و اكبر عليهم وعليج ...والج انتي شنو... كومي ...كومي ولي.... ما اطيق اشوفج....
حسنة...ها هاي الي خفت منه...شفتي...
نوراي.....كووووومي....
حسنة...امداني عود ردت اضم يمج الرامات...
نوراي...رامات مال شنو....
حسنة...مو انه بكت الرامات من خزنته ...وضميتها عندي كلت اخاف بيوم يفكر ياخذ بنتي الي جان يهددني بيها ...افضحها وعليه وعليهم....
نوراي...اطيني اياهن... وامشي من وجهي خل نشوف تاليتها...
حسنة....شسوين ....
نوراي. شسوي حالي حالج...احس بروحي معقوة ذهنيا... خل يطلع ذو الفقار ونشوف...
حسنة...ولو انه ما فهمت بس نعمالله عليج....
طلعتهن من حمالة صدرها لافتهم بجيس اطتني اياهم اخذت بنتها وراحت...
كعدت منقرفة...متقزززة... شنو من دنية احنه عايشيين بيها....
دخلت لغرفته...فتحت الكنتور... وشميت ملابسه... وتاليها وياك ياكلبي...حضرت ملابس بالحمام بلكي يطلع اليوم وتاكدت اكو مي حار بالسخان...