أريد حريتي

أريد حريتي ب٢٠

البارت العشرون

هسة انه شورطني وحجيت الا أسال ... لازمني من زندي ومخنزر ... وانه انهبطت واتبلعم.... ووسن دخلت ... مباشرتا" ...هدني... والتفت عليها بخزرة
شعندج هنانه....
وسن ...اشرب ماي....
ذو الفقار ...شربي وروحي ...يالله....
وسن باوعتلي وباوعتله... شربت ماي وطلعت .... يمه كلبي ...
نوراي... الاولاد كالوا
ذو الفقار...شكالوا... ويعني همه يدرون ....
نوراي... ذو الفقار... ممكن تهدئ وتكعد وانه اسولفلك بالتفصيل الممل والله ...والله هذا الي صار بدون قصد لتقليل من شأنك او اي شي.... ارجوك.... اكوعد...
ذو الفقار.... استغفر الله..... كعدنه....احجي....
كعد ويهز برجله كعدت كباله وبديت اسولفله الي صار بالتفصيل الممل... وهو مصغي...
ذو الفقار... يعني حاجي وياج وواكف وياج ...المهندس... ومباوعلج....
نوراي... ترا شي طبيعي....
ذو الفقار... انتي شتحجين ...شنو انه مكرن...اكلج خطبج مني.... شكله زوجتي هاي... وهو يكلي بنتك....
نوراي... اي كله مرتي....
باوعلي... وضحك... باستهزاء... تدرين جكد فرق بالعمر بيناتنه....
بدون قصد مني...لزمت لحيته....
نوراي... انته لو تزين هاي اللحية او تخفها وهاي الشوارب واكربس بحلكي ... مرات الشخص يتصرف بفطرة اكثر من اللازم وهذا الشخص انه ...🤦‍♀️
ومنطلقة احجي.... وتغير طريقة لبس الشياب مالتك... تشرت وبنطلون...جان شفت .... صفنت شوية انتبهت انه شكاعد اخربط.... عضيت شفتي... وغمضت عيوني...
نوراي...اسفة...والله اسفة....انه ثولة مرات اجفص بالحجي...
ما جاوبني مبتسم بوجهي بطريقة ذوبتني... لزم حنكي ورفع راسي ...وتقرب مني كلش...انه فاكه عيوني...
ذو الفقار... ابد ...ابد....ابد لا تعضين شفتج ...
تنفست الصعداء وابتعدت عنه شوية... وهو همين حس علنفس وبقى يكحكح...وابتعد....
ردت اعالج الموقف السخيف...كملت اكله....
نوراي...خليني اعتني بيكم مثل ما انتم اهتميتوا بيه... اول وتالي انه رايحة... خليني اترك اثر طيب...
تغيرت ملامح وجهه وباوعلي هز راسه وطلع....
لحكته ....
نوراي...باجر اسوي حفلة اريد....
قاطعني بنبرة صوته الخشنه....
....تمام كتبي شنو تردين يجيلج.... وكمل طريقه لغرفته... طلعت اريد اطفي التلفزيون ناسيته واسمع صوت تكسير بغرفته.... ردت اروح...بس استحيت.... شيكول... طفيت التي في ورحت لغرفتي....كتبت كلشي اريد بورقة وللفجر كعدت حضرتله شاي وحطيت الورقة اريد اطلع ودخل ...صبح وكعد يشرب شايه شاف الورقة بقى يقرا بهدوء ... انه شفت وكفتي مالها لزمة طلعت لغرفتي ....
الصبح الساعة ب١٠ اجوا الاولاد محملين بالعلاليك ...اخذتهم بسرعة وضميت اشياء الميلاد العصر محد بالبيت وارتبهن براحتي... ام علي اتكفلت بالكيكة ... صحت لوسن الي وضعها بدا يتغير وياي ... احسها تريد تتغير بس اكو شي مانعها....
زينه البيت ورتبنه الطاولة ترسناها اشياء تجنن جايبهن ذو الفقار... وحتى هدايا جايب ... واجت ام علي ساعدتني... طبعا علوش وعادل وابراهيم... شحتتهم من ورا الغدا... صار كلشي تمام....
التموا الكل بالبيت حتى الحجيات اجوي.... وسن اخذت ملابس كشخة للولد حتى يبدلون ويجون كالت الهم راح نطلع...
واخيرا اجه ذو الفقار... جنت بالمطبخ... لابسة بنطلون ثلجي... وعليه قميص طويل اسود... ولافه حجابي عدل... لان الولد كلهم هنانه....
كاعد ارتب قواطي البيبسي والعصاير بصينية حتى اخليهم علطاولة ... عجيب والله ولا ينسمعله صوت
...فزيت...وشهكت...زين ما وكعت الصينية...
ذو الفقار... شنو شايفة جني....
ركزت بوجه اكو شي متغير....لا اكو اشياء... ابتسمت... مخفف شعره ولحيته...وشواربه جانوا كولش ثخان...راجع بالعمر ١٠ سنوات ...وطبعا صاير احلى واكشخ...
ذو الفقار...نور كاعد احجي وياج....
نوراي....ها.... وطبعا الابتسامة البليدة علوجهي...🤪
ذو الفقار... اكلج خير خو ماكو شي... اسالج راح اطلعين هيج يم اخوني....
باوعت لروحي كلشي ما مبين مني...
نوراي...نعم...
ذو الفقار.... اطيني الصينية...وروحي غيري هدومج... البنطرون حيل لازك....
نوراي... هو هسة من سمني ...شطالع مني... بعدين قميصي كولش راهي.... وما طالعة لغرب حتى تضوج...
....
اخذ الصينية من ايدي وبخزرة روحي غيري.... وطلع...
ضجت وماردت اطلع...بس ام علي دخلت عليه وقنعتني لخاطر ابراهيم... لبست كب وطلعت....انه اصلا ما نزعت الاسود....بس شوية حبيت استرجع شي من نفسي القديمة... بس منو يخليج...المتسلط واكف بالمرصاد....
الحفلة روعة صارت وابراهيم من فرحته اجه حضني وباسني...وكولش تشكر مني....
عدت الحفلة سلامات عدا كم ازعاج من جنان ...لازم تذب حجاية لو تشمر حجي ماصخ....
خلصنه ونضفنه وكلمن راح بيتهم... فرغ البيت باقي الزينة على البنكة... صعدت نسيت هذا الكرسي شوية يتحرك مو متوازن... الكرسي حطيته فوك الطاولة رفعت روحي شوية اشلع الاصق...واختل توازني....وانكلبت بصرخة واشوف روحي بحظن ذو الفقار.... ما همني طيحتي لو اي شي همني شلون ما اسمعه من يدخل... 🙃🙃🙃
بحظنه خذيتله لحظات صافنه بوجهه..وهو كذلك... بيناتنه كهرباء عجيبه.... ومغناطيس... بس من نقترب اكثر نتنافر... شايلني بيديه يكول ريشة.... عيونه سودة..كبيرة مكحلة والرموش..سيوف... من خف لحيته بينته غمازة بحنكه.... تنفسي يصعد وينزل... وتقربنه لدرجة رادت تتلامس شفايفنه ودخل علوش يصرخ ويبجي طفرت من حظنه ونزلت...
نوراي....شبيك حبيبي تبجي....
علوش ...نفاحتي بطة بطتها....( بطة بنت جنان)
نوراي... وكفت كلبي... شلته وبسته تعال اطيك اكبر نفاخة....
ذو الفقار واكف مخنزر عليه....باوعلي... ابتسم هز راسه وطلع.....
الايام تمشي بسرعة ...حياتي بين كر وفر... مرات ننجمع ببيت الحجية وطبعا لازم شوية ينسم بدني بكم حجاية من الاقارب اللطفاء ... ام علي دوم تكلي قوي كلبج لا تخليهن ياثرن عليج وتسولفلي على زوجة ذو الفقار المرحومة شلون جانت تلاسنهن وافنها الي تفك حلكها لو تحجي حجاية زايدة ... يعني جانت قوية وجسرة ...يمكن مستمدة قوتها من حب ذو الفقار الها ...
ووسن اغلب وقتها ببيت الحجية وخاصتا من تجي جنان...
وطبعا وراها تسودن وسن وتبلش مشاكل وهوسة ....وووز....
حسنة ما تجي نهائيا ... واذا اجت ساعة ساعتين وتروح حتى مالحك اشوفها ... اخر مرة شفتها بالمطبخ كاعدة لوحدها....
نوراي...حسونتي اجيبلج كنافة تجننن...
حسنة...ماريد
نوراي....حسنة شبيج.... ترا والله كلبي يعورني عليج ما احب اشوفج هيج....
حسنة.... نور.... بعدها ما مكملة ودخلت وسن...
وسن...عمة حسن يكول يالله راح ترحون ...
كامت بدون حجي سلمت وراحت... انه لزمت وسن من ايدها...
نوراي... وسن ما جوزين والتالي عوفي صخام.... ولج عوفيه....
ما اسمع الا جنان تصيح ....
الله اكبر كسرتي ايدها هليتيمة شبيج وياها ....
نفخت وما سكتت هالمرة....
وانتي شعليج...انه واختي وصديقتي وحبيبتي نسولف....
جنان....اووووي صديقتي... لوما ٢٤ ساعة تشكي منج... حتى وجهها متغير يمكن كد ما مجوعتها....
نوراي... استغفر الله.... خليج بعيدة عنها ...خلي البنية تركد....
جنان...اشو انتي تخربطين ...لج انه عمتها....سمعتي عمتها....
نوراي...اي عمه بلا.... وعلا صوتنه وام علي ادخلت بالموضوع.... وفضت النزاع .... وطبعا ما سكتت جنان ياهو تشوفه تسولفله ... ناس صدكتها وتفر ببوزها وناس سكتت وناس سكتوها....
الي يهمني وسن الي راح تخسر طيبه كلبها بسبب انانية عمتها ....
رجعت مضايقة وكارهه حتى روحي... مقهورة على وسن وماعرف شلون اساعدها كل ما اتقرب منها ونوصل لمرحلة ترجع تنتكس....
خابرت ايدين وسولفت وياها ....قبل ما ننهي المكالمة كالت شي صفني...
ايدين ...لا تنسين تتشكرين من ذو الفقار...هالرجال ماكو منه اثنين... شلون اجازيه مادري....
نوراي...علشنو....
ايدين ...ما كالج....مو ردنه نخسر الشقة بسبب القرض وهو حول لابراهيم المبلغ كوله ... ونقذنه جان هسة احنه بالشارع....
نوراي ...اشو انه ما ادري....
ايدين....شعجب ما كال الج....
نوراي...اصلا ما اشوفه هواي... بس انتي ليش ما كلتي....
ايدين...حسبالي تدرين.... وترا هذا الشي ما يأثر لا تفكرين احنه راح نعوفج...نوراي....
نوراي...نعم....
ايدين....ما صار بينكم شي ....
نوراي...مادري... مرات احس اريد اصير زوجته... ومرات لا...ماكدر.... اكو شي مانعني...
ايدين... ما عندج مشاعر اله ....
نوراي... مادري...مادري.... عوفج من هالموضوع...عفية...
ايدين... شوشو تبجي... اروح ارضعها واغيرلها... بوساتي ....
نوراي....بوسيهم الي ...الله وياج....
عادل دك الباب واطاني علبة فتحتها... بيها بقلاوة سورية وبرمة...
نوراي...شنو هاي...
عادل ...ابوي دزها الج...
اذكرت من جنت واكفة بالمطبخ...اسولف ويا ام علي ونحظر اطباق التقديم سولفتلها علبرمة الشامية الي احبها ... وهو بوقتها دخل يشرب ماي يمكن سامعني ...
ضحكت وفرحت بيها هواي لان كولش احبها...