#البطل_المغمور2 "زهور القمر"
#جمان_فريد
#الجزء_الخامس "صغيرة_يا_بابا"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
وهي ماده يدها وبإبتسامة متكبرة قالت:نائبة رئيس حزب الوطن..استاذة في العلوم السياسيه..وقريبا عضوة في البرلمان...
ثريا قعدت تشبح لهيثم بتوتر وقالت:والدة فاتح...
وهو شبح ليدها بعدين رفع حواجبه وشبحلها وقال.:اها والدة فاتح بهادي بس نعرفك...
حط ايديه ورا ظهره وضيق عيونه وقال:تبي تشوفيه..
هي حاول تكتم غضبها بقوة وتبان هاديه نزلت يدها وحطتها عاليد التانيه وشد عليها بقوة وقالت برفعة حاجب:ايه..بس قبلها نبي نتكلم معاك شويه..
هو هز راسه وقال:تفضلي..
فك ايديه ومشي قدامهم وهي معاه بعيونها..
جتها ثريا وقالت:شن قتلك اني..
نوال مشت وهي تقول:عديم ذوق..شوفي كيف قال تفضلوا ومشي قدامنا..
ثريا وهي ماشيه معاها شبحتلها ع جنب وابتسمت بعدين حركت راسها يمين ويسار..
وهو يمشي وهما وراه..
وكانوا يقابلوا في الموظفين..
منهم عمال نظافه..
وهو يقوللهم بإبتسامه...
"عطيكم الصحه..ربي يعاون"
وهما يردوا عليه بألطف العبارات واحلا الدعوات..
وهي مركزة معاه...
لين قربوا يوصلوا للمكتب..
هو وقف والتفت وقال:دكتورة ثريا انتي اليوم عند جلسة ولا..
ثريا:ايه دكتور..
هيثم:خليها برا اليوم الجو حلو..
ثريا بإبتسامه:حتى اني فكرت فيها..خل نمشي نجهزلها..
هيثم هز راسه وقال:موقفه..
ثريا ابتسمت وقالت:اجمعين ان شاء الله..
هو لف ومشي لباب المكتب..
وثريا جت لنوال وقالت؛بلاش استفزاز..
ابتسمت نوال نص ابتسامه...
ثريا مشت..ونوال لحقاته..
شافاته يفتح في الباب بالمفتاح بعدين خش وهو يقول:تفضلي..
هي شبحتله من فوق لتحت بعدين خشت بعده...
هيثم وهو بيقعمز ورا مكتبه:تفضلي..واشرلها ع الكرسي..
هي مشت وقعمزت وحطت شنطتها ع الطاوله اللي قدامها وحطت رجل ع رجل وايديها ع بعض وقالت؛تراجعت عن الدعوة اللي كنت نبي نرفعها بطلب من ولدي لولا هكي كان لقائنا الأول في المحكمه..
هو حط ايديه ع بعض فوق المكتب وقال؛شن تشربي..
رفعت حاجبها وقال:شكرا مانبي شي..
هيثم هز راسه وقال؛قلتي تبي تشوفي فاتح...غريب..
نوال؛ام بتشوف ولدها وين الغريب!؟
هيثم:ع حسب مانعرف انتم متبرين منه..
نوال قعدت تشبحله بحده وهي رافعه حاجبها وبدت تهز في رجلها..
هيثم:ليه هني شهور مافي حد سأل عنه ودوره واول زيارة جاته كانت من صديق ليه ومن امه...غمض عيونه وفتحهم وقال بإبتسامه..المربيه متاعه..اسف..
نوال ضيقت عيونها وقالت:انت هني اداري بس ولا؟
هيثم:مافهمتش سؤالك وضحي..
تنهدت وقالت؛يعني اللي مايحقلكش تتكلم في امور شخصيه تخص حياة النزلاء هني..انت مدير بس هني..
هيثم؛ايه صح مدير..بس مفهومي عن الإداره مختلف عن اللي انتي تعرفيه..المدير مسؤول عن الصغيره قبل الكبيرة مسؤول عن نفسيات الموظفين والنزلاء مش بس شغلهم واحتياجتهم الماديه..المدير..تقدري الناس هني عيله واني بوها..
ضحكت نص ضحكه ساخره ولفت وجهها عنه بعدين رجعت شافلها وهي رافعه حواجبها وتهز في راسها بإيجاب وتقول:اممم..كويس..المهم اني نبي نشوف ولدي ناديه..
هيثم عقد حواجبه بإبتسامه وقال:الحكايه مش ساهله هكي انتي مش خاشة مدرسه يااستاذه..
نوال:المعنى!؟
هيثم:لازم نشوفه هو قبل كان يبي يشوفك ولا لا..
نوال:نعم!
هيثم :اللي سمعتيه..
نوال قعدت تشبحلها وهي تاكل في شواربها من العصبيه بعدين قالت..تمام..شوفه..
هو هز راسه..وناض..وقال..في حالة رفض مانبيش شوشرة ودوشه احترمي رغبته...
نوال وهي تهز في راسه وتحاول تتحكم في اعصابه:ناديه يادكتور ناديه..
هو كان يوسع في باله زياده عن اللزوم تجنبا للمشاكل...
تنهد ومشي طلع من المكتب..
وهي شبحت للباب وقالت بغضب:متخلف...
🍁وصل هيثم ووين ماموجود فاتح..
كان في المطبخ يفرغ في طاقته فيه.
دق هيثم الباب..
شبحوله العاملين وهو من بينهم..
هيثم:عطيكم الصحه
هما بأصوات متقطعه؛تسلم..بارك الله فيك دكتور..
هيثم اشر لفاتح وقال:تعالى..ومشي طلع..
فاتح استغرب..حط اللي فيده..
ومشي غسل ايديه ومسحهم وطلع ومريول المطبخ مازال عليه..
فاتح؛خير دكتور؟
هيثم؛عندك زيارة..
فاتح ؛اها زهير..
هيثم؛لا..حد من عيلتك..
هو استغرب اكثر وقال؛عيلة مني؟!
هيثم؛احم..امك..
فاتح بقلق:قصدك امي نوارة شن جابها توا؟!
هيثم غمض عيونه وقال:لامش هي..فتح عيونه وقال..امك امك...نوال...
بانت ع وجه فاتح ملامح كره ممزوجه بالحزن والدموع غرقوا عيونه..
هيثم:كان ماتبيش تشوفها مش حتشوفها..
رفع حاجبه وقال؛وينها...
هيثم:في مكتبي..
فاتح مشي طول وهيثم لحقه...
قعدوا يمشوا وهما ساكتين..
لين قربوا يوصلوا في المكتب..
شد هيثم فاتح من يده وقال:لو عارف روحك بتتعب مش لازم تخش..
حرك راسه بالنفي..جبد يده من يد هيثم ومش خش للمكتب وخبط الباب وراه بقوة..
هيثم تنهد وقال:لاحول ولاقوة الابالله...
🍁هي
داخل انتفضت من خبطة الباب..طول جت واقفه وهي تشبحله وعيونها تعبوا دموع..
هو مشي طول قعمز مقابلها وقال:قعمزي..
قعمزت وهي تشوفله كانت تبي ضمه وتشم ريحته مستاحشاته هلبه..
فاتح؛شن تبي جايه!؟
هي رفعت حاجبها وقالت:شن حالك..
فاتح؛كنت كويس..
نوال:يعلموا فيك قلة الأدب هني..
فاتح ضحك بسخريه بعدين قال؛قصدك اني قبل كنت مؤدب !؟
نوال تنهدت وقالت:ماعلينا..المهم..اني وبوك انفصلنا..
فاتح بضحكه ساخره؛علاش انتم كنتوا متزوجين..
نوال؛احترم نفسك والزم حدك..
فاتح؛قصدك جايه بش تقوليلي المعلومه السخيفه..ماتهمنيش..
نوال؛كتبلكم كل شي وخلاني اني وصية ع حصتك انت ونوفل ونرجس..واسيد خدي حصته..
ضحك وقال؛ماصدق اسيد..باهي هو علاش دار هكي يودع!؟
نوال شبحتله شويه بعدين قالت؛يبي يعيش سنينه الاخيره ع قولته في جو هادي..
فاتح قعد يضحك ساخرا..
نوال؛بنطلعك من هني..
وقف ضحك وقعد يشبحلها..
نوال؛لازم تتعالج في مكان الناس اللي فيه تخدم صح وملتزمه والمكان هدا مش في البلاد هادي...
فاتح بإنفعال؛شن تقولي انتي شن تقولي..من انتي بش تفصلي وتخططي في حياتي ع كيفك من انتي..
نوال:امك..
فاتح؛لا مش امي..تبريتي مني..
نوال خبطت بيدها ع الطاوله اللي قدامها وقالت:امك يعني امك تبي ولاماتبيش واللي نبيه ديره غصب عنك..
فاتح هز راسه وقال؛عارفك شن تبي..هدا كله ع خاطر الفلوس..خوديهم مانبي شي مانبي منكم شي..
نوال قعدت تشبحله ودموعها في عيونها..
فاتح بعصبيه وعيونه معبيات دموع؛اطلعوا من حياتي الزفت خلوني في حالي معاش نبي منكم حد...اني توا عايش حياتي مرتاح وعمري ماكنت مرتاح زي توا..عمري ماكنت هكي زي ماتشوفي فيا..شهادة من دينك كنت قبل هكي اني تكلمي..
بدت تبان عليها ملامح الحزن وماردتش عليه..
فاتح مسح دموعه قبل ينزلوا وقال:ماتقدريش تردي ولا ماتقدري تقولي شي..
نوال:ماتتكلمش هكي واطلعني في صورة ام اللامباليه عديمة المشاعر..انت اللي شهاده من دينك قولي كم مرة وقفت معاك وساعدتك كم مرة داريت عليك وحميتك كم مرة..
فاتح ابتسم متهكما بألم وقال بتوسل:اسكتي بالله عليك اسكتي..كله درتيه ع خاطرك وع خاطر مكانتك..وبعدين تعالي هني لما خشيتي هني شن قلتليهم اني ام فاتح! قلتيها عادي!! انتي كنتي حارمتينا نادوك امي كنتي تقولي ننحط في موقف محرج لما الناس تعرف ان عندي صغار في سنكم..ولانرجس مسكينه كانت تقولي خاطري ناديها ماما وهي تقولي ناديتي نونو...خلتينا نقولوا لمراة غريبه ياأمي قدامك وماتحرك فيك شي...امومة شني اللي تتكلمي عنها يانوال فتحي امومة شني بالله عليك قوليلي...
نوال تسمع فيه وتشبحله بألم ودموعها سيل..
هو مسح دموعه وانفه وقال:في واحد معاي هني ولى مدمن مخدرات بعد فقد امه..تعرفي شن قال عليها...قال امي كانت زي الشمس وحني ندوروا عليها عايشين بيها قاب لما ماتت حياتي ظلمت بعدها..واني نسمع فيه قلت في خاطري اني حياتي كلها ظلام وامي موجوده ماخلاها حد ظلام كان امي..
وحط ايديه ع وجهه وقعد يبكي..
وهي قعدت تبكي بصمت وعيونها نزلهم لوطا...
هو هدى ومسح دموعه وقال؛معاش تجيني ومعاش نبي نشوفك ارجوك..ماصدقت اللي بديت نحب روحي والحياة ماتخلنيش نكرهها مرة تانيه..معاش نبي نموت واني حي...
وناض ومشي فتح الباب بعصبيه وطلع وهو يمسح في دموعه..
هيثم قعد معاه بعيونه ماباش يكلمه خلاه براحته يعيش مشاعره كلها..
التفت للمكتب ومشاله وقف في الباب..
شاف نوال تمسح في دموعها بالكلينكس وتشوف لوجهها في مرايه صغيره شادتها في يدها..
وخر وولى وين ماكان وهو يحرك في راسه يمين ويسار بأسف...
كان عنده يبي شن صار بيناتهم..
▪▪▪▪▪▪
◇ايه كان عندي فضول نعرف طبيعة العلاقه بيناتهم واضح انها هشة بس نقصد الأسباب..هو اني وقتها استنتجت شي لما شفت نوال لأول مرة..ماتبانش امه لولا الشبه الواضح كنت ماصدقتش لا وهدا اصغرهم..هني سألت نفسي سؤال كم كان عمرها لما تزوجت!؟...
▪▪▪▪▪▪
طلعت من المكتب وهي لابسه قناع القوة وتمشي بتكبر وتعالي جت وقفت قدامه و رفعت سبابتها في وجههه وقالت:يصير في ولدي شي المكان هدا نسكره...ومشت طول..
هو قعد يشبح القدام بعدم استيعاب بعدين شبحلها ابتسم بإستغراب وقال؛الله المستعان وخلاص..وحرك راسه يمين ويسار وخش لمكتبه وسكر الباب...
🍁🍁🍁🍁🍁
في نفس الوقت..
في فيلا اهل فاتح...
نرجس:تسلميلي ماما ربي مايحرمني منك..
نوارة؛ولامنك ياحبيبتي..ماتشليش هم البنات خلاص في عينيا...
نرجس جتها باستها من خدها وقالت؛دعواتك..
نوارة:ربنا يهدي سرك ياحبيبتي ويسعدك ويهنيكي..
نرجس بإبتسامه:آمين...
ومشت طول طلعت من الفيلا...
ركبت سيارتها..شغلتها وتحركت متوجهه لحوشها..
كانت ناويه تعيش يوم خاص مع زوجها..
يكونوا مع بعض برواحهم يتكلموا براحتهم ويتفاهموا...
وصلت لحوشها..
وبدت تجهز في مفاجئتها لراجلها...
كملت التجهيز خلال ساعتين..وبعدين قعمزت تراجي فيه...
تأخر هلبه على ماروح...
هي لما سمعت صوت سيارته خشت للجنان فرحت...
وناضت وقعدت تستنى فيه وعينها ع باب الدار..
خش عادي وكأنه ماشاف شي وقاللها :مش بتباتي في حوش بوك..
هي قعدت تشبحله بخيبه وقالت؛لا..البنات باتو غادي..
حط تليفونه ومفاتيحه ع الطاوله..ومشي طول للحمام...
هي نزلوا دموعها طول مسحتهم...
سمعت صوت مية الدوش انفتح...مشت طول وقفت الزيانه بتمسح مكياجها...فجأة سمعت صوت نغمة رساله وصلاته..
شبحت للتليفون هلبه..بعدين شبحت للحمام...
رجعت شافت للتليفون ومشتله وخداته...
قعدت تجرب في الرمز لانها مرة شايفاته لما كان يفتح فيه وحفظاته بس ماحصلتش فرصه تفتشه...
انفتحت الشاشه..
نزلت الستارة وهي تقول بهمس:تو نشوفوا من هما الحقيرات اللي لافات عليه...
خشت ع الماسنجر...
وياريتها ماخشت ولاشافت..
قعدت تحرك بصبعها اللي يرعش في الشاشة تشوف باقي المحادثات...
قريب جتها الجلطه من اللي شافاته...قعمزت بهدة ع الكرسي وهي تشوف وتقرا..ودموع ينزلوا من عيونها اللي كانت نظراتهم كلها صدمه...
حطت يدها ع قلبها حساته بيوقف.....
لحظات وحست روحها بترجع..قعدت تتغصص وبس...
ع طلعته هو من الحمام...
لما شافه شاده تليفونه انصدم وقال:شن ديري!؟..
هي شبحتله وقالت بصدمه:شن هدا...هدا شني!!؟
هو جاها بسرعه جبد منها التليفون بيشوف شن كانت تشبح..
هي وقفت وقالت:واني اللي نحسابك تخون في نساوين...ياريت طلعت هكي ياريت..
التفتلها وقال:تطلع منك حاجه نعدمك..تبي تطلقي نطلقك لكن فمك تسكريه ولا والله نقتلك..
نرجس:معاش تحلف بالله اسم الله معاش تذكره ع لسانك يا####...
هو جاها شدها من رقبتها وقال:طلعي حاجه تموتي يانرجس انتي وبناويتك..
هي ضرباته بقوة وخلاته يطلقها من كثر ماتألم..
نرجس:والله لما نفضحك الله..
هو شبحلها بنظرة تخوف بعدين شبح لدرج الزيانه متاعه.
عرفاته في شن يفكر..طول لقت وطلعت تجري..
وهو مشي يجري للقجر فتحه وطلع منه مسدس..وطلع في جرتها..
هي كانت تجري بأقصى سرعة وهي تبكي وبتموت من الخوف...
خشت للكوجينه وطلعت تجري من بابها الخارجي..
سمعت صوت ضرب رصاص..زادت في سرعتها لين طاحت..
هو طلع وراها ونادى:نرجس..
ناضت بسرعه وهي مش حاسه بشي..فتحت باب الحوش الخارجي..
وطلعت تجري حفيانه...بقميص النوم...
تجري وتتلفت والرعب راكبها..والدنيا ليل ظلام دامس...
فجأة طلعت قدامها السيارة وقفت قدامها..
اللي فيها يقوللها:اركبي..
هي بدون وعي فتحت الباب وركبت...
والسيارة طلعت تجري...
••في السيارة..
نرجس ضمت نفسها وقعدت ترعش مع بعضها مررت نظرها ع السيارة..لين جو عيونها ع المرايه حطت يدها ع الباب وقالت بعياط:نزلني نزل...نزل..
جت بتفتح الباب والسيارة تمشي بس كانت مسكرة..
وبدت تعيط وتقول؛نزلني بالله عليك نزلني الله يستر ع ولاياك الله يستر ولاياك نزلني..
:اهدي بالله عليك انتي اهدي واسكتي..اني زهير صاحب فاتح..
هو كان يتكلم ومايبيش يشبحلها..
نرجس:فاتح!
زهير:ايه..بنوصلك لحوش بوك ماتخافيش..
هي لفت طرف الروب عليها وضمت نفسها وقعدت تشبحله من المرايه بخوف..وهو ماباش يشوفلها نهائيا..
زهير مش ملتزم ولاهو قريب من ربي..بس كان صديق حقيقي وولد بيتية ماباش يرفع عيونه في اخت صاحبه...
بعد طول مسافه..
وصل بيها للفيلا...
الحرس جو شافوا السيارة لمحوا نرجس خلوا السيارة تخش...
وواحد منهم عطي علم لنوال عن طريق جهاز الإتصال..
هي طلعت تجري...
لفت عليها الوشاح وقعدت تشبح للسيارة بخوف..
ومعاها الحرس..
وصلت في السيارة نزل منها زهير..
وقفت وقالت:انت مني؟ونرجس وين..
زهير تنهد وقال:اني صاحب فاتح..بإختصار سمع بالمشاكل اللي صايرة لاخته وطلب مني نراقب راجلها بش يتأكد من شكه فيه..واليوم لحقته لين روح وقعدت نراجي فيه لين يطلع تاني زي العاده شفت نرجس طالعه تجري من الحوش وخايفه...
نوال بفجعه:باهي وينها..
زهير:في الخلف..
نوال طول مشت للباب اللي اشرلها عليه فتحاته ولما شافت وضع بنتها انصدمت..
نرجس كانت في اقصى مراحل الضعف والانكسار و...الإحتياج..قعدت تشبحلها ودموعها معبيات عيونها وقالت بنبرة مخنوقه..
"ماما"...
نوال قلبها انقسم لأجزاء قالت؛نادوا نوارة تحركوا..وصرخت بصوت عالي...نواااارة..
ونرجس بدت تبكي بالعبره...
شويه وجت نوارة تجري وهي مفجوعه..
نوارة؛ياساتر يارب في ايه!
وجت عند نرجس لما شافتها انصدمت وقالت:نرجس مالك يابنتي..وخشتلها ضمتها ونرجس شدت نوارة وقعد تبكي بالصوت..
نوال وهي تشوف فيهم شبحت لزهير شويه..بعدين مشت بسرعه لداخل الفيلا..
وزهير يشبحلها وهو مضايق ومتحشم في نفس الوقت..
والحراسات كل واحد فيهم ولى لمكانه..
لحظات وطلعت نوال تجري بعبايه في يدها..
وصلت فيهم وقال:ترا شويه نوارة..
وخرت نوارة عن نرجس وهي تبكي..
ونوال قعدت تلبس في نرجس العبايه وهي ترعش بين ايدين امها..
نوال قلبها متقطع ع بنتها ودموعها مابطلوش نزول..
بعد مالبستها قالت:تعالي..
شدت نرجس في امها ودرقت وجهها في حضنها..
ونوال وهي ضامتها خشت بيها داخل..
ونوارة وراهم وهي تدعي وتقول:منو لله..منو لله...
وزهير معاهم بعيونه...ولى ركب سيارته وهو يقول:لاحول ولاقوة الابالله...
🍁في نفس الوقت..
في المركز..
كان فاتح راقد وحواليه زياد وخميس سهرانين حداه من خوفهم عليه..
بعد ماطلع من عند امه فرغ غضبة منها في نفسه..
خش للمطبخ وبدي يقص في اللحم لين قص صبعه بالغلط..
اسعفوه بسرعه...
وحتى بعد مااسعفوه ماهداش فرغ غضبه في كل شي حواليه..ومارقدش الا بالمنوم..
هيثم بعد ماشاف اللي صار فيه خدي قرار انه معاش يخليه يشوف اي حد من عيلته...
🍁🍁🍁🍁
"باهي ان شاء الله ان شاء الله...تصبحي ع خير بالسلامه"
سكرت عفاف وهي تقول:زعمه فايق جهاد توا؟
تهاني:ام البنت كلماتك..
عفاف وهي مبتسمه بتعجب؛ايه بعد ردونا ولوا وقالوا باهي..
تهاني بإبتسامه؛من لما عرفت ان عمي هيثم مشي معاه قلت الموضوع بيصير منه..
ابتسمت عفاف وهي تشوف لتليفونها وتمسح ع الشاشه بإبهامها..شويه تنهدت وقالت:خل نتصل بجهاد نقوله..
تهاني بإبتسامه حماس:ايه قوليله قولي...
ضحكت عفاف واتصلت بجهاد..
🍁🍁🍁🍁
وصلت لدار بنتها
وقفت قدامها وهي متردده..بعدين قررت تولي لدارها..
وفي نص الطريق تراجعت لما تفكرت كلام ولدها..
《 ولانرجس مسكينه كانت تقولي خاطري ناديها ماما وهي تقولي ناديتي نونو...خلتينا نقولوا لمراة غريبه ياأمي قدامك وماتحرك فيك شي...امومة شني اللي تتكلمي عنها يانوال فتحي امومة شني بالله عليك قوليلي...》
نزلت منها دمعه مسحت طول..
بعدين غمضت عيونها شويه وفتحتهم ولفت وولت لدار بنتها..
وصلت في الباب وطول فتحاته...
لقت نواره راقده حداها وضامتها...
خشتلهم وهي تقول:بري نوارة ارتاحي وخليني معاها..
نرجس قعدت تشبح لأمها وهي ساكته..
اما نوارة فرحت وقالت:حاضر ياهانم..
وقفت وقالت؛تصبحي ع خير ياحبيبتي..
نرجس بصوت مبحوح:ردي بالك ع بنات ماما..
نوارة؛في عنيا ياحبيبتي في عنيا ماتخافيش..
مشت نوارة وهي تقول:تصبحي ع خير ياهانم..
هزت نوال راسها وقالت:تصبحي ع خير..
مشت نوارة طلعت وسكرت الباب...
نوال تنهدت ومشت لبنتها وقعمزت حداها..
نرجس:ماتسأليني عن شي..
شدت يدها وقالت:تمام زي ماتبي..
نرجس قعدت تشبح ليدها بعدين شبحت لأمها وقالت؛حقه انتي واطلقتوا..
نوال هزت راسها بإيجاب.
نرجس سكتت ودمعتها في عينها..
نوال:القرار هدا خديناه مع بعض كان الأصلح ليا وليه..
نرجس:وحني؟
نوال تنهدت وقالت؛حتى ليكم انتم..
ابتسمت بتهكم وقعدت ساكته..
نوال شبحت ليد بنتها ومسحت عليها وقالت:نحكيلك كيف اني وبوك تزوجنا؟
نرجس قعدت تشبحلها وهي ساكته..
نوال مصمصت شواربها وارتسمت ع وجهها ابتسامة حزن وقالت؛كنت نوتي في روحي للمدرسه...بنخش الثانويه..متحمسه هلبه لمرحلة جديده في القرايه...كانوا عندي صاحبات...اتفقنا كلنا وقتها نخلوهم يحطونا في فصل واحد..كنا صاحبات من الأبتدائي..وقرينا مع بعض الاعدادي..
وقلنا في الثانوي حنقعدوا مع بعض ونكملوا للجامعه..
قداش كنت بانيه احلام ومتأمله في هلبه حاجات..قداش كنت متشوقه للأحداث اللي حنعيشوها مع بعض..كنت متسهفه للثانويه لان كل اللي حواليا كانوا يقولوا هي احلا مرحلة في القراية..
في يوم طلعت اني وصاحباتي للسوق بش ناخدوا البدلة الثانويه..العسكريه وقتها..درنا جو مش عادي لتوا نذكر فيه هداكا اليوم..ماكنتش عارفه ان هداكا اليوم الحلو حيختم بكابوس...
شبحت لبنتها وقالت...روحت للحوش واني فرحانه...
قابلتني امي وقالتلي روحتي قلتلها ايه..
'''''''''''''
🌻نوال:تعالي معاي شوفي البدله اللي خديتها..
امها:باهي تونشوفها..بري فيسع بدلي حوايجك واطلعي لبوك في الجنان يبيك..
نوال بإستغراب:حاضر..
''''''''''
نوال:وجه امي ماطمنيش حسيت ان في شي صاير اصلا هديكا الفترة كان الوضع في حوشنا ملخبط بس مافي حد يحكي قدامي في شي...كنت صغيره...ونضايق لأنهم كانوا ينظرولي بهالنظرة...نبي نقوللهم اني كبرت ووعيت ياخلاص..
نزلوا دموعها ورشفت بعدين قال...ماكنتش نحسابهم مايراجوش فيا لين نقولها..
احمم..طلعت لبابا في الجنان لتوا مذكرة كيف كان مقعمز يشرب في القهوة ويدخن...قعمزت حداه وقتله..ماما قالت تبيني...
'''''''''''
🌻شبحلها وابتسم وقال؛مسرع الايام ماتجري تقول امس بس امك جاباتك..
ابتسمت نوال...
:كبرت يابابا ووليتي واعيه وشديتي خوتك والحوش مع امك..
نوال:ايه لكن تول القرايه بتبدا ردلها الخدامه يابابا اني معاش نقدر معاها شي زي زمان..
شبحلها بوها شويه وقال؛نوال بابا...القرايه حاجه كويسه صح..لكن في النهايه المراة ماليها الا حوشها وراجلها..
نوال:لااني بابا نبي ناخد الدكتوارة وبعدين نفكر في الزواج..
بوها:لالابنتي...انسب سن لزواج البنت سنك انتي..
هي ابتسمت وحواجبها معقودات وقالت؛كيف!؟
:ايه بنتي...شوفي بابا...انتي جاك موضوع..
نوال؛موضوع!؟
:ايه بابا موضوع زواج..واني قررت نعطيك..
نوال بضحكه:تبصر صاح...تتسهوك عليا ولا..انت اصلا قبل قتلي مش عاطيك لين تتخرجي من الجامعه وبعدين نفكر..
بوها قعد يشبحلها بألم وهو ساكت...
نوال؛بابا!
:بنتي نصيبك وجاك مش راده راجل كويس وعيله كويسه ماينردش..
نوال بصدمه؛بابا شن تقول انت..مازال يابابا مازال مازال نبي نقرا نبي نعيش حياتي عندي هلبه حاجات نبي نديرها يابابا..
مازال صغيرة..#صغيرة_يا_بابا
'''''''''''
نوال ببكي؛نقوله صغيره يابابا مازال بكري عليا...وهو بدي يكشخ عليا ويهزب ويقولي كلمة وعطيتها مش مولي فيها...
جدك في هداكا اليوم حكم عليا بالإعدام...خلا حياتي توقف عند مرحلة معينه..خلاني نتخطا مرحله طويله في حياتي وحطتني في اللي بعدها..
تزوجت وحملت طول...ماقدرتش نمشي للمدرسه واني حامل قريت منازل...وقعدت نمشي في الامتحانات بس..واني عمري 16 سنه جبت خوك نوفل..كانوا يهزوا عليا هلبه ويسمعوا في كلام يقهر..ويقولوا بيبي جابت بيبي..عندهم حق..ماكنتش عارفه نديرله شي ماقدرتش..في الاول ماما ساعدتني بعدين بوك جاب نوارة وولت هي المسؤولة عنه واني نشوفه لما نبي نرضعه بس..وقعدت لاهيه بقرايتي..
بعدها بعام حملت تاني...جت بنطيحه لكن ماقدرتش كنت حنريح فيها بس ربي كتبلنا الحياة حني الزوز ورضيت بالأمر الواقع..تعبت هلبه هلبه...خديت الشهاده الثانويه بتقدير مايدخلنيش لكليه اللي كنت نحلم نخشلها...الطب...
جيت اسيد...وكنت نافره منه هلبه وحتى رضاعه مابيتش نرضعه..وقعد لنوارة حتى هو...كنت ناويه بعده معاش نجيب بس بوك ماخلانيش قال اني علاش واخدك ع خاطر الصغار اني الولد الوحيد نبي ندير عزوة...وحملت تاني بيك انتي وكانوا اسوء تسعه شهور يمروا عليا في حياتي تعبت هلبه ونحساب روحي بنموت...بس مازال ربي كاتبلي نعيش ونتعذب في حياتي اكثر...وبوك مش راحمني نهائي..كان يبيني ندير كل شي..نجيب صغار ونقرا..ونكون مرته اللي يتباهى بيها وين مايمشي في البلاد وبرا منها...
بعدك انتي حملت بفاتح طول...وفي حملي بفاتح جدك بوي توفى...امي قالت..مات وهو يقولي قولي لنوال تسامحني واني قلتلها مش مسامحاته بكل..وقتها امي انجبرت تحكيلي علاش بوي زوجني غصب عني..
''''''''''
🌻امها وهي تبكي:بوك كان خاسر ومديون حتى الحوش اللي حني فيه رهنه كان مصيرنا للشارع لولا الحاج عز الدين دفع علينا ديونا كلهم مقابل نعطوك لولده بشر
'''''''
نوال:لما خديت بوك كان مطلق..تزوجت وحده ماجابتش صغار طلقها وهي من قهرتها طلعت عليه اشاعه ان هو مايجيبش في الصغار..وين مايمشي يخطب يردوه وهالشي خلا عنده عقده...هدا علاش كان يبي نحمل كل عام...بس بعد فاتح خلاص...اني كرهته ومعاش تقبلته بكل وهو مافرضش عليا نفسه...والفجوة كبرت بينا اكثر ماهي كبيره وقعد كل حد فينا في دار...بوك كان بعيد عليا في كل شي...كان يكبر فيسع...واني نصغر كل مانتقدم في العمر...الفرق بيني وبينه كان واضح هلبه...تصدقي في من لما شافني معاه اول مرة يحسابه بوي...ضحكت وهي ترشف بعدين قالت..موقف حقير..حقير هلبه...
نرجس ودموعها ينزلوا:هدا علاش انتي كارهتينا..
نوال:ماتقوليش هكي..اني عمري ماكرهتكم انتو صغاري...لكن كنت كارهه نفسي لأني ماقدرتش تتجاوز الحالة النفسيه اللي تسببلي فيها بوي الله يسامحه...هو اللي خلاني هكي هو...
بدت تبكي وقالت...قتله...صغيره يابابا...مازال صغيره...
نرجس وجعتها امها قربت منها وضمتها...
ونوال ماصدقت...دفنت وجهها في رقبة بنتها وانهارت بالبكي..
ونرجس اللي كانت تذرف في الدموع قعدت تمسح بإيديها ع شعر امها وظهرها...واحتوتها برغم جرحها وكسرها الكبير...
🍁🍁🍁🍁🍁🍁
تاني يوم...
ع طاولة الكوجينه مجتمعين ع الفطور..
البنت وبوها ومرت بوها...
عادل؛رتاج دير امتحانها في ساعه ونص ونروح ييها..
همانه:عادي بابا نقعد بروحي مايصيرلي شي..لبين ماضميت الحوش وقعمزت قريت انتم تجوا..
عادل؛والله مافي منك الله..
همانه ضحكت..
عادل؛رتيها يارتاج تبي تريحك تروحي وتلقي الحوش اموره تمام..
رتاج بإبتسامه مجامله؛تسلمي حبيبتي..
همانه بإبتسامه ود كاذبه؛نجك نجك..
عادل:شن قصتك مع الشراقه..
همانه؛نقرا في روايه شرقاويه علق في لساني كلامهم..
عادل:روايه شرقاويه!..
ضحكت رتاج وقالت:روايات ع الفيس قصص يعني وهكي..
عادل رفع حواجبه وقال:اللي هو..هي نوضي وقت عليك..
ناضت رتاج وخدت شنطتها وقالت:طلعي المفروم بش يدوب باهي..
همانه:حاضر..
عادل ابتسم ومشي طلع..
ورتاج مشت تغسل في ايديها..
همانه:مش ع خاطر راهو ع خاطر بابا بس..
التفتت رتاج وابتسمت بإستفزاز وقالت:عارفه حبي..
ومشت طلعت..
وهمانه بعيونها معاها وهي تقول في نفسها..
"تو تشوفي حبك شن دير فيك"..
وناضت همانه غسلت الماعين وضمت الحوش..
بعدين مشت خشت لدار النوم..
وبدت تفتش في حاجات رتاج واللي تلقاه جديد تاخده شناطي اكسسورات حوايج حتى الأحذيه مستغله تقارب اجسامهم من بعض في الطول والوزن..
بعد ماخدت اللي تبيه..
قعمزت وخدت تليفونها واتصلت بأحدهم..
همانه بصوت مايع:آلو..
"ياآلوات ياسمح شن جو يارتوجه مشتاقلك واجد"
همانه:واني اكثر قلبي...
🍁🍁🍁🍁🍁
"اليوم بنمشوا نتموا فيها ونحددوا حتى العرس جهاد مستعجل قال نبيه مع عرس خوي"
صالحه؛بعد شهر قريب..
عفاف:ايه بنوتولهم الزوز جميع..
صالحه:وشقته..
عفاف:من غدوة بيبدا..قال نبي نأثثه ع ذوقها..
صالحه بضحكه:ماشاء الله ماشاء الله ربي يكمل ع خير..
ع خشة تهاني مروحه من المدرسه...
تهاني؛السلام عليكم .
هما ردوا عليها؛وعليكم السلام....
تهاني:ماما عمي هيثم شاف تحاليلك ..
عفاف بخوف:ايه...
تهاني:قال عندك نقص في فيتامين د وب12..
كتبلي الادويه اللي تاخديهم..وقالي لازم تدعمهم بالماكله وشويه حاجات..
كتري من الدحي والحليب ومشتقاته والخضرة الورقيه هادي السلاطه والسبانخ وهكي..وديري فازوا كرموس يابس منقع في زيت زيتون وتاخد منه ع الخوا..وايه وتعرضي رقبتك من ورا للشمس وايديك لعند فوق ورجليك كل يوم نص ساعه..وقالي قوليلها تشرب ميه هلبه وتتمشى ان شاء في الجنان يوميا ربع ساعه ولانص ساعه..
عفاف بضحكه:وي وي وي هدا كله..
تهاني؛وحطني مسؤوله عليك قالي نحاسبك انتي كان صارت في امك حاجه تانيه..
خدود عفاف احمروا وضحكت بخجل وقالت:بارك الله فيه.
هاتي الورقه ترا..
مدتها تهاني..وخدتها عفاف..
صالحه:ردي بالك ع روحك واسمعي كلامه..
عفاف:ان شاء الله..وحتى انتي اسمعي الكلام وتعالي انتي وعرفه هني..
صالحه؛شن تقولي ياعفاف عيلتك توا بتكبر تبينا حني نزاحمو..
عفاف:عليك انتي وعرفه الهويدي اللي ماينسملعه حس! اسمعي يامراة ماتنشفيش ريقي اني وياك غدوة ان شاء الله نجيبوا حاجاتك كلهم..مانتهناش وانتي قاعده بروحك مع عيل صغير ياحاجه بالله عليك هنيني..
تنهدت صالحه وقال؛خلاص زي ماتبي..
تهاني بضحكه:ماهو من الاول ياخالتي والله مافي احلى من قعدتك معانا حوشنا يبي من يباركه ياخالتي..
صالحه:سلمها ياربي..ربي يقوي سعدك وينجحك ويفرح ميمتك بيك..
ابتسمت تهاني بخجل..وعفاف وهي تشوفلها قالت بإبتسامه:آمين...
🍁🍁🍁🍁🍁🍁
الساعه الثانيه ظهرا..
مقعمزة تتغدا هي وياه وفتحتله موضوع ع الغدي..
مقبوله؛زي ماتعرف خوتي يخدموا عالطانطات..وخوي هدا فالح في خدمته وعنده ومرتاح ناقص نزوجوه بس..
مجيد:وزوجوه شن تراجو..
مقبوله بصحكه:وهدا اللي بنديروه..والعروس عندك..
مجيد؛عندي!؟
مقبوله؛ايه دانيه بنتك..
مجيد؛عطيتكم خلاص..
مقبوله بضحكه:بسرعه هكي!؟..
مجيد؛نلقى خير منكم خلاص الموضوع تم..
مقبوله؛نبوا كل شي توا بعد العطله..
مجيد:ماعندكمش مشكله..
مقبوله ابتسمت وقالت؛اختك في حد داعيلها بالخير اللي بتاخد خوي..
مجيد هز راسه وقال؛زي مااني مداير خير ولقيته فيك..الابيض طالع عليك حاجه تانيه..غريبة حلقوم...
ضحكت مقبوله وقالت؛اضحك الله سنك..المهم ماتفتحش الموضوع معاها لين نقولك..
مجيد هز راسه وقال:حاضر..حاضر..
🍀🍀🍀🍀
ومرت الأيام..
ودار وفضوا عيلة خالد في مريم وانخطبت لجهاد رسمي وتحدد موعد عرسهم مع عرس خليل ونسيبه..
مريم من داخل كانت مرتاحه لكن اكيد مش فرحانه بشني بتفرح..!
بالذات واهلها مش راضيين وبوها وخوتها مقاطعينها..
بس ترجع تحمد ربي...شي اهون من شي...
اما اللي عايشه حالة القلق كانت دانيه اللي من نهار كلمها راجح معاش بان وندمت لأنها وثقت فيه وصدقاته...
زي ماصدقت نرجس الراجل اللي حباته وبعدين بان ع حقيقته المرة وبان وجهه النجس...
كذبت ع امها وقالت انه يخون فيها مع وحده تانيه وانها خلاص تبي تطلق منه وهو لما عرف انها ماقالت شي من الحقيقه طلقها طول بدون تردد..
الطلاق اللي قاعده تخطط همانه بش يصير بين بوها ومرته..
الأيام اللي فاتت هلكت رتاج بالطلبات وكانت تطلب بطريقة خبيثه تخليها ديرلها اللي تبيه غصب عنها..
ورتاج صابرة ومتحمله...
في يوم...
••رتاج؛هادي مش اول مرة نلقى حاجه رايحه مني..
همانه؛ريحي عظامك اني اللي ناخد منك..وبعدين هدا من رزق بابا رزق بابا اللي قبل ماتاخديه ماكنتيش تحلمي يكون عندك ربع اللي واخدتيه..
رتاج؛همانه تكلمي بإحترام احسنلك..
همانه؛وجعاتك كلمة الحق بابيبي...بابا بروحه قالها مرة خديتها محرومه من كل شي وبوها قفاص مايهون عليه شي..
رتاح قعدت ساكته وهي في قمة الغضب وعيونها تعبوا دموع..
همانه بتهكم؛ياناري بتبكي..
نزلوا دموع رتاج غصب عنها..
وهمانه تشبحلها بتشفي واضح..
"همانه...رتاج"
همانه؛هني بابا هني..
ع خشة عادل عليهم قال:شن ديروا هني..
جاته همانه وهي توريله في يدها وتقول:شوف بابا ابله رتاج شن عطتني..
عادل شاف الخاتم في صبعها وقال؛ابله رتاج هادي تهبل..
رتاج مسحت دموعها وشبحتلهم بإبتسامه..
التفتت همانه وقالت:ايه تهبل...حقه بالله عطيني تليفونك شويه نكلم صاحبتي..
عادل؛خيره تليفونك؟
همانه؛شحنه تم...عطيني نكلمها بسرعه..
عادل:خودي تليفوني..
همانه:لا بابا مش حلوة بعدين ابله رتاج تغار..
ضحك عادل ونكش شعرها..
رتاج تنهدت وعطتها التليفون وقالت:خل نمشي نوتي الغدي..
ومشت طلعت وعادل طلع وراها...
وهمانه راجتهم لين طلعوا...سكرت باب الدار..
وكتبت رقم واتصلت...
همانه؛الو...
"آلوات من معاي"
همانه؛اني رتوجه..
"رتوجه ياقلبي وينك خيرك رقمك مسكر"
همانه؛شحني تم..المهم الرقم هدا احفظه لما تلقى تليفوني مسكر اتصل بيا منه باهي..
"باهي ياسمحه."
همانه؛بنسكر توا بايات...
سكرت عليه ومسحت المكالمه بعدين مشت طلعت من الدار..
🍁🍁🍁🍁
"مانبيش نتزوج قتلك"
عمران؛شن ع كيفك هو..بتتزوج غصب عنك ولا والله لاعاد تعرفنا ولانعرفوك..
مقبوله؛اسمع لو بتقعد مسكر راسك نقول لبوي وانت وقتها تعرف شن مصيرك..
سكت خوها وهو معصب ع الآخر..
مقبوله:البنت وموجوده ومن غدوة نفتحوه موضوعها..
عمران؛شن قلت؟
هز راسه وقال؛ديروا اللي تبوه...
مقبوله هزت راسها وقالت؛خلاص خلوا الموضوع عليا...
🍁🍁🍁🍁🍁
"يامفاجآت انت"
ضحك وقال:مفاجأة شني عارفني بنجي ع قراية الفاتحه..
:قلت بتوكل بوي وخلاص..
:لالا نبي نجي نشوف العروس ياحبيبي..
:بعد طاح الفاس بالراس..
امهم؛ماتعدلش عليه ضرار ولدي البنيه زي العسل غير تشوفها تهبل عليها..
ضرار؛ان شاء الله...
خوه ضحك وقال:عقبالنا..
امهم:تخرج قبل وبعدين ساهل..
:راد الله علينا نرجوا...
ضرار ضحك بعدين قال؛العرس نبيه بعد تتم اموري غادي..
امه؛ايه ع الخريف..انت لأمتى قاعد..
ضرار:بداية 7..
:معناها بيفوتك العرس..
ضرار:عرس مني؟
امه:عرس بنت عمك مريم..
فتح عيونه ع وسعهم بصدمه وقال:مريم!؟
؛ايه مريم خسراتها راحت للبراني..
ضرار قعد في حالة صدمه مش مستوعب اللي سمعه..
امه؛قسمها ونصيبها..
رفع ضرار حاجبه وقال؛ماتعرفوش لمن عطوها..
:اسم العيله نعرفه بس..*******..
هو هز راسه وقعد ساكت وهو يفكر...
🍁🍁🍁🍁
يدور في الحوش وهو يصور بكاميرا تليفونه...
خليل؛وهادي دار الصغار..
"ياقلبي ياقلبي ياقلبي اني...حيي هادي دار صغاري خليل قصدك اني بنجيب صغار ونولي ام!؟"
خليل بضحكه:ختشه..
ضحكت وقالت..
"الله محلاها تهبل تهبل"..
بان وجهه في الكاميرا قال..وحتى هدا يهبل ولا!؟
"برا عليا غادي"
خليل :خزي باردة ماتعرفيش تجاملي حتى مجامله..
"كان عجبك"
خليل:المصيبه انه عاجبني ونحبه ونموت عليه..
هي ضحكت وقالت..
"خلاص عاد"
خليل تنهد وقال:نحبك هلبه..هلبه نوسه..
هي دمعوا عيونها وقالت..
"حتى اني"
خليل:اني توا مانبي شي غير حبك بس...
نزلوا دموعها وقالت..
"والله نحبك"
تنهد وسكت...بعدين قال..الامتحانات قبل العرس بأسبوع تصدقي هما موتريني اكثر من العرس نفسه..
"وووه امتحانات الشهاده الثانويه عمري ماننسى اللي صارلي فيهم بس تو نقولي شن كانت امي ديريلي وقتها وانت ديره"
خليل:سمعينا ياستي ع ايديك نحجوا..
ضحكت وقالت
"باهي لكن قولي شن صار في المطبخ"
خليل؛مازال ماوصلش يبي اسبوعين تانيات..
"تمام...المهم توا اسمعني ياسيدي قلت لعمتي ديرلك"
وقعدت تهدرز عليه وهو كان يلقى ماتسكتش بكل..
احساس في داخله يقوله انه مش حيلحق يتهنى بيها ويفرح معاها كل مايقرب موعد فرحهم يحس ان موعد فراقهم يقرب معاه....
🍁🍁🍁🍁
وعدى باقي اليوم زي سائر الأيام بروتينه المعتاد....
لين جي اليوم اللي بعده...صار فيه حدث اربك مركز علاج الأدمان....
كان هيثم كيف واصل..
لقي الوضع ملخبط وباين ان في مصيبه صايره..
لما شافوه الموظفين زاد التوتر والقلق عندهم...
هيثم بإستغراب:صباح الخير..شن في دكتور عزيز؟
:كيف جيت بنبلغك دكتور...للأسف في واحد من النزلاء هرب من المركز..
هيثم بصدمة؛كيف!!!؟
:هدا اللي صار مع الأسف..
هيثم وهوعاقد حواجبه بغضب ؛من هو!؟..
:هني المشكله هي...اللي هرب شخص مش عادي...
"فاتح بشر"
#صلوا_على_الحبيب
#صغيرة_يابابا
#البطل_المغور2
يتبع…
