البطل المغمور (الجزء الثاني) زهور القمر

الثالث والثلاثين

البطل_المغمور2  "زهور القمر"
#جمان_فريد
#الجزء_الثالث_والثلاثين "الله يحبك"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
واقفه مع زميلاتها في ممر من مرات مستشفى الرازي كانوا واخدين استراحه..
مريم وفي يدها طاسة شاهي اخضر:لاالحمد لله جي ساهل والشرايح كلهم عرفتهم..
:سعدودك اي امتحان يديره الشايبي صعب بس انتي كله عندك ساهل..
مريم بضحكه؛لا والله ماهكي زيكم نخاف منه هلبه ومن الخوف شديت بزياده...
وحده منهم قالت:مريم في واحد من بكري واقف هني يشبحلك..
مريم بخوف؛شن شكله ترا..
🍁على بالها ضرار ولد عمها لأنه خلال هالسنتين ماخلاهاش في حالها وبدي يبان عليه قدام العيله كلها اهتمامه بمريم وصارت مشاكل ع هالموضوع وحساسيات بين مريم ودنيا مع مريم لهدا قطعت كل جمعات العيله 🍁
؛شخصية لكن اصلع..
ارتخت ملامح وجهها..وشبحت وين يشبحوا صاحباتها..
بعدين غيرت عيونها القدام وقالت؛هدا اللي حكيتلكم عنه داوود..
الزوز:داوود..اها..
هي ابتسمت بخجل..
:معناها هني ننسحبوا توا..
:هي تعالي.
مشوا الزوز مع بعض ومريم تشبحلهم وهي تضحك.
وداوود جي ناحيتها لين وصل فيها قال بإبتسامة وحاجبه مرفوع؛ديما تضحكي هكي..!؟
هي شبحتله وخفت ضحكتها خوفا..
داوود:قلت هكي لان ضحكتك حلوة واني مغيار..
هي نزلت عيونها وابتسمت خجلا وهي تقول؛شكرا..
هو تنهد بإبتسامه بعدين وزع نظره ع الممر وقال؛قالك معاذ بنجيك ونهدرز عليك ولا..
مريم شبحتله وقالت بإبتسامه جاده؛ايه..وحسيت ان في عندك اسئله هلبه..
ابتسم وقال؛في اسئله لكن مش هلبه..ونقولوا استفسارات مش أسئله..
مريم؛مافيش مشكله..اسأل اللي تبيه واني نجاوبك..
داوود؛اهم شي الصراحه يامريم..
مريم خطر عليها جهاد وكلامهم مع بعض او ليلة زواج..
حست بقبضه في قلبها...
داوود؛سمعتيني.؟!
مريم ابتسمت بجديه وقالت؛اكيد..
داوود تنحنح وقال؛علاش تزوجت بسرعه واطلقتي بسرعه؟
السؤال كان قاسي بكل حروفه..كان اشبه بالصخره اللي طاحت ع قلب مريم بكل قوة..
مريم؛تزوجت بسرعه! مش شايفه اني تزوجت بسرعه يعني في انخطبوا وتزوجوا خلال اقل من شهر..اما ليش اطلقت بسرعه طليقي هو اللي يبي بعد عرف بالمشكله اللي عنده اصر ع الطلاق واني بصراحه نبي نكون ام وهدا حقي..
داوود؛تعرفي علاش بديت بالسؤال هدا؟  كنت نبي نعرف لو كان فيهم بينكم مشاعر قويه قبل او لا..يعني نبي نتأكد انك نستيه وطلعتي فعلا ناسيه..
مريم:كيف عرفت؟
داوود؛من عيونك..ملامح وجهك وانتي تحكي عنه..
ابتسمت وقالت؛تمام..السؤال اللي بعده..
داوود؛مافيش غيره..
مريم؛معناها مفروض انت اللي تكون صريح مش اني.
ابتسم وقال؛فعلا...اني جاي نبي نحكي معاك..تعرفي ان هادي كانت امنيه عندي من لما كنتي تقري في المدرسه سنه اولى تانوي..كنتي متحجبه وشعرك لونه اصفر قصير توخري فيه للخلف بكارونه ورديه..كنت متمني لو عندي عليك حكومه خليتك تغطيه...كنتي وين تطلعي الصبح تمشي المدرسه ع وجهه ابتسامه تقول من ملامحه ماتتحولش بكل..وجهك بريء تبان فيك طيبه عجيبه..وين نشوفك نرتاح ندور السبله بش نهرب من عملي اول ماخدمت في الشرطه ونجي لخوك في الورشه ونراجي امتى تخطمي قدامها ونشوفك...بش نرتاح..ونزهى..ونفرح..اقسم بالله يامريم تخلي فيا انسان غير نشوفك بس..تنهد من قلبه وقال..وفي كلام مازال نبي نقوله بس مش وقته...
مريم وهي تسمع فيه كانت مندهشه لأبعد حد..
تعرف ان داوود يبيها بس ماتوقعتش انه يحبها لهالحد!!
فركت ايديها ببعض وهي تشوفله بإبتسامه صدمه...
بعدين قالت بنبرة مرتبكه؛لهالدرجه!؟
داوود بضحكه:واكثر ياستي..
ضحكت بخجل ونزلت عيونها...
داوود:شن مافيش تعليق..
هي قعدت ساكته شويه بعدين رفعت راسها وشبحتله وقالت؛عندي طلب..
داوود؛امر..
ابتسمت وقالت؛اني مازالي سنة الامتياز بس نبي نكملها في حوش اهلي..نعرف الوضع بعدين مايساعدش لو صار زواج قبل نكمل..والسنه الاخيره بالذات اهم سنه واغلب وقتي حيكون برا الحوش مش حنقدر نوفق صعب هلبه..وانت نفسك الوضع مش حيعجبك..خلي الخطوبه تستمر سنه وبعدين الزواج..
داوود؛يعني تبيني نزيد ع السنين اللي تعبت فيهم سنه تانيه..
ابتسمت بخجل ونزلت راسها وقالت..سنه تفوت بسرعه..
ابتسم ع جنب وهو رافع حاجبه اليسار قال:تفوت بسرعه صار!
هي قعدت منزله راسها ومبتسمه...
هز راسه وقال؛تمام نصبروا..بس بشرط..
قامت عيونها وشبحتله..
داوود؛نعقد عليك توا..
هي قعدت تشبحله وتفكر...
داوود؛نبي ناخد راحتي معاك نجيك نهدرز عليك نكلمك في التليفون عادي..كان شفت حاجه عجبتني ووديتك بيها نجيبهالك..نبي نعبر عن اللي داسه في قلبي سنين..لو مكتوب عليا مازال نستنى ع الاقل يكون في عندي مايصبرني..
هي قعدت مركزة عليه كيف يتكلم نظرات عيونه نبرة صوته طريقته في الكلام..كل شي يقول ان هالانسان من قلبه وبصدق...لان كل شي شافاته فيه ماشافاتاش في راجل عرفاته قبله...ولد عمها...او زوجها السابق..
ابتسمت وهزت راسها وهي تقول:موافقه..
ابتسم ع جنب وقال:خلاص اليوم نجيب خالي ونجوكم نفتحوا الموضوع مع بوك والشباب ومتأكد مش حيكون عندهم مانع..
مريم بإبتسامه:تمام..نستأذنك توا مشغوله..
داوود غمض عيونه بإبتسامه بعدين فتحهم وقال؛تفضلي..
ابتسمت بخجل ومشت وهي تقول:السلام عليكم..
وهو تبعها بعيونه اللي مركزة ع تفاصيل لبسها عبايه واسعه لونها اسود وشاربه كبيره لونها موف غامق وعليهم اليونيفورم..
تنهد وهو يقول؛وعليكم السلام...
ولف ومشي بيطلع من المستشفى...
🍁🍁🍁🍁
مقعمز في صاله الحوش..
وهو يشوف من الفيرندا متاعه للجنان برا وسرحان بنفكيره...
ع جيتها وفي يدها سفره فيها فنجان قهوة..
مدتاله وهي تقول؛تفضل وليدي..
شبحلها بإبتسامه وقال؛صحيتي ياأمي..
خدي الفنجان وهي حطت السفره وقعمزت مقابلاته وقالت:شن مداير في الجامعه ياعطيه..
الشايبي؛امم تمام ماشي الحال...
:ومع هديكا..
تغيرت ملامح وجهه للضيق..
؛مازال مانبنيش ولا...واكيد خيرتك بيني وبينها..
حط الفنجان وقال؛لا ياأمي والله لا..بس يعني..
قاطعاته وهي تقول؛لايعني ولاغيره كله واضح كله واضح..لكن اللوم مش عليها هي اللوم ع كبدي اللي بايعني..
هو بضيق قال؛شن تقولي بس ياامي ربي يسامحك وخلاص..
وهي قلبت وجهه عنه بزعل...
تنهد وحط رجل ع رجل وهو يشوفلها وقعد محتار كيف يدير بش يرضيها...!
🍁🍁🍁🍁
"تفضلي استاذه هادم مصاريف الشهر هدا.."
خدت رتاج الملف وقعدت تشوف فيه..
وهو يشوفلها...وقاعد يحاول يستجمع شجاعته بش يبوح باللي في نفسه...
وفي لحظه خلاص قرر الاعتراف...
اسماعيل؛رتاج..
قامت عيونها وشبحتله بإستغراب كيف ناداها من غير كلفه...
وهو خلاص معاش مهتم لأنه خدي قراره.؛رتاج....
فجاه انفتح الباب..
وخش رشيد وهو يقول؛معليشي عطلت..الطريق زحمه..
رتاج وهي تشوفله؛شن جو المدرسه اول يوم..
حط شنطته جنب الكرسي وقعمز وهو يقول؛زي قبل...تشوفي في مصاريف الشهر هدا..
رتاج بإبتسامه؛كيف عرفت..
رشيد؛هدرزت اني واسماعيل فيهم امس..
ابتسم اسماعيل..
رشيد؛نشوفهم..
عطاته رتاج الملف..وهو خداه بعدين ناض وقف جنب اسماعيل وقعد يسأل فيه ويتناقش هو وياه..
ورتاج تشوفله بإبتسامه ونظرات عيون متأمله...
وفي نفسها متأمله فيه هلبه حاجات...
لكن اسماعيل حس بالاحباط من جديد بعد ماحال رشيد بينه وبين اللحظه اللي يستنى فيها وكانت ع وشك ان تقع..
🍁🍁🍁🍁
في دار الحكمه للمسنين..
كانوا العاملين فيها يستقبلوا في هيثم والدكاترة اللي معاه..
جايين يديروا فحص شامل للنزلاء..ويشوفوا حالة مميزة بيناتهم..
مديرة الدار؛تفضل دكتور هيثم..تفضلوا..
هيثم؛هي تفضلوا دكاتره..
خشوا الدكاترة اللي جايين معاه قبله وهو خش بعدهم...
دارو بيهم جولة ع الدار...
بعدين رفعوهم وين مافي النزلاء..
هيثم وين خش عليهم وشافهم..
شيابين كبار...اللي مقعد واللي ضرير واللي حاله باهي لكن وبين البينين...
▪▪▪▪▪
◇حسيت بألم وانتي نفكر في الاسباب اللي خلتهم يكونوا هني..الوالدين حتى لو ماكانوش نعم الوالدين لصغارهم مايكونش هدا مصيرهم ومكانهم.....
تنهد وقال..قعدت نتخيل فيهم كيف ربوا وتعبوا وقداش جروا ع صغارهم في مرض في قرايه في مصاريف وغيره..وكانت هادي نهايتهم...شي مؤلم مؤلم جدا..
▪▪▪▪▪
بدي هيثم ومعاه باقي الدكاتره يفحصوا في النزلاء بالواحد.ويشوفوا في وضعهم الصحي..
وقعدوا يسجلوا في اسماء اللي يحتاج منهم علاج في المستشفى...
لعند ماوصل في راجل مسن اسمه الحاج المبروك..
؛لااني مانبي نعاين حالتي كويسه..
هيثم بإبتسامه؛الله يبارك دوم ان شاء الله..بس اني نبي نطمن..
؛نقولك اطمن حالي باهي باهي..
المديرة؛خليه يشوفك ياعمي المبروك..
؛عارفك انتي وهديكا الطويله اللي مدبرينها..
هيثم؛الطويله!
المديرة بضحكه؛يقصد استاذة نوال..
ابتسم هبثم وشافله وقال:باهي شن رايك اني مش طالع من هني قبل نعاينك..
المبروك؛اقعد مالا كيدك ع روحك..
هيثم تنهد وقال؛باهي علاش ماتبيش..وانت عارف انك تاعب واضح عليك..
المبروك؛ايه تاعب ومعاش قعدلي من العمر اكثر ماعدى..
هيثم؛علاش في حد فينا عارف قداش قعدله في الدنيا!؟
المبروك؛مانعرفوا لكن نحسوا..
هيثم؛لانعرفوا ولانحسوا ياعمي المبروك الامور هادي في يد الله وفي علمه بس..
المبروك؛ونعم بالله...لكن اني ماعندي لمن عايش فهالدنيا..
هيثم عقد حواجبه وقال:من حطك هني ياعمي مبروك؟
ابتسم بحسرة وقال:جيت بروحي..
هيثم قعد يشبحله بتساؤل وهو عاقد حواجبه ويراجي فيه يكمل..
المبروك؛اني يادكتور ربيت عشره سته لولاد واربعه بنيات ومعاي امهم...ويشهد الله ياولدي ع حالي متعسر ماخليتهم يحتاجوا لحاجه..كنت نجوع بش يشبعوا..ونعرى بش ينكسوا..ونسهر بش يرقدوا...ونمرض وين يمرضوا..ونفرح وين يفرحوا ونتكدر وين يزعلوا..كيف عاك مش صغاري واني بوهم..!؟..بعد كبروا والولاد كل واحد فيهم صار حاجه كبيره تزوجوا وشافوا حياتهم والبنات كلهم عطيناهم...وفضي علينا الحوش.. في الاول كانوا يجوا في الاسبوع مرة..بعدين في اسبوعين مرة بعدين في شهر مرة..وبعدين قعدوا يعدوا بالشهور ع مايتفكرونا ويجو يشفونا..يقولوا الاولاد جافيين والبنات حناين واني والحاجه الله يرحمه رينا الجفي منهم كلهم...
عانتني وعانيتها لين توفت..وبعد ماتوفت امهم...عرفت ان الحياة خلاص تمت ومانيش قاعد فيها غير بش نتم اجلي..
بعد موت الحاجه اربعه شهور لاجاني حد ولادورني حد...واني مابيتش نمشي...خفت خفت نشوف منهم حاجه تخليني نغضب عليهم وكان اني نغضب ربك يغضب وهادي اللي مانبيها...وبيش مانموتش في الحوش بروحي ومرات مايعلموا بيا كان بعد مانتعفن...لميت دبشي وجيت هناي..
هيثم وهو متأثر ومصدوم؛عرفوا انك هني!؟
ضحك بحسرة وقال؛والله مانعلم ليا هني تلاته شهور مادورني حد..
هيثم مش قادر يستوعب اللي سمعه..شبح للمديره..
وهي بملامح وجهها المتأسفه اكدتله ان  اللي يسمع فيه واقع وحقيقه مش احلام ولاإدعاءات..
رجع شافله وقال؛في النهايه ياعمي المبروك البنادم ماليه الا عمله الصاالح يوم غدوة انت بتفر منهم وهما بيفروا منك..وعملك بس اللي يقعد معاك..هدا علاش نقولك خليني نعاينك وكان تستاهل العلاج تتعالج وتقعد ماقعدك من عمر جنب الله سبحانه وتعالي لم من الحسنات والعمل الصالح اللي يخليك تقابل وجهه وانت مرتاح..
المبروك قعد يشبح لهيثم وهو يفكر في كلامه اللي اثر فيه..
هيثم؛هاه شن قلت...
المبروك؛قديش عندك صغار..
ابتسم وقال؛وليد وثلاته بنيات..
المبروك؛ربي يحفظهم...نصيحه خودها من عمك ربيهم وانت مش متأمل منهم شي دير واجبك لانه واجبك وخلاص ماتقولش نديره بش يردوه بعدين..بش ماتكون اخرتك زي اخرتي..
ابتسم هيثم وهز راسه مسايرة بعدين قال:هيا ياراجل ياباهي خليني نشوف شغلي..
تنهد وقاله؛شوف شغلك شوف...
وبدي هيثم يفحص بيه بالسماعه..بعدين..كتب اسمه من ضمن المسنين اللي حيزيدوا يفحصوهم في المستشفى اكثر بش يعرفوا شن فيهم بالزبط..
▪▪▪▪▪
◇طلعت من غادي مريض..مش عارف يعني لاني عشت في بيئه علمتني ان حق الوالدين عظيم لدرجة اني ننسى نفسي ع خاطرهم وشفت ناس حواليا قمة في البر اتجاه اهاليهم..
زي مجاهد الله يرحمه..زي اولاد خالد اللي برغم سوء ابائهم كانوا هما ليهم ونعم الابناء..يعني هدا الصح...هدا الطبيعي...لكن اللي ريته في دار المسنين وسمعته خلاني نعرف ان اللي تربيت عليه وعرفته هو الشاذ عن الطبيعي اللي صاير توا...
▪▪▪▪▪
🍁🍁🍁🍁
في حديقة الكليه..
اللي كانت معبيه كراسي مظلله...
كانت مقعمزة تحت مظله منهم وهي تقرا...
وفي واحد مقعمز من بعيد يشوفلها..
؛مهبلتني البنت هيا نبيها زايد ناقص..
؛فوتها خيرلك.
؛مانقدرش ياراجل خشت هني وعششت..واشر ع راسه..وبياكلها بنظرات عيونه الآثمه...
اما هي في عز انسجامها بقرايتها..
جتها وحده تستنى فيها وقالت؛توهه..
تهاني ابتسمت وقالت:مريم...وناضت صافحتها باليد...
ماتحبش تسلم بالخد في مكان عام الحركه بالنسبه ليها غير لائقه..ومريم تعرف الحاجه هادي كويس..
سلموا ع بعض وقعمزوا..
مريم؛هاه شن جو اول يوم..
تهاني؛الحمد لله...
مريم؛شن عندك اليوم ومن عطاكم؟
تهاني؛ الفارما دكتوره اسمها انتصار...وباثولوجي دكتوراسمه
عطيه الشايبي...
مريم؛انتصار ما نعرفهاش بس الشايبي يعطي فيا توا باطنه الله يبارك عليه دكتور ممتاز .
تهاني:يبان واعر..
مريم؛ايه ومايحبش الضحك والتسهويك ابدا من توا نحذرك راهو كان شاف حد في محاضرته يضحك انتهى امره والله لو يطلع في روحه معاد يسقط الماده ومعاش يرده بكل..
تهاني:ايه قالها اليوم قريت تلاته مرات اللي مش جاي يقرا يطلع من توا مانضمنش روحي شن ندير بعدين..
مريم؛راهو مش كلام بس..
تهاني بضحكه؛مالا وقت محاضرته هو بنتفكر قصة حياتي كلها..
مريم ابتسمت بعدم رضا وقالت؛معاش تقولي هكي..
تهاني حكت انفها بعدين قالت:خلاص خلينا في القرايه..
🍁وفي اخر الحديقه..
سارة ودانيه يقروا مع بعض..
سارة؛خلاص هدا كويس اقلبي ترا..
دانيه قلبت الصفحه وقالت؛غدوة بنعزم بنات الجامع ع الفطور في مكان نسائي مغلق تجي؟!
سارة:اكيد مادامه الصبح..
دانيه؛بإذن الله..نبي نرجعوا نحتفلوا بالختمه مع بعض..
ابتسمت سارة..
ودانيه ردتلها الابتسامه ورجعوا لهو بالشيت..
🍁🍁🍁🍁
في مكان استراتيجي في العاصمه..
كان موجود مطعم فاتح اللي حيفتتحه قريبا..
بس كان ناوي قبل الافتتاح يدير اعلان للمكان..
عبد الله المقريف اللي قال عنه المثنى والد صديقه..
تواصل معاه فاتح وعزمه..وطلب منه يجي للمطعم يتغدا عنده وبالمرة  يديرله دعايه بما إنه مشهور..
•••زهير؛بإذن الله يوم الافتتاح مش حتلقى وين تحط الناس.
فاتح؛ان شاء الله..
سكت زهير وقعد يرتب في المكان..
وفاتح واقف يستنى في الراجل وهو يردد في الاستغفار..
شويه وشاف سيارة درست قدام المطعم.
فاتح؛جي...ومشي طلع من المطعم..
وصل برا...وشاف الشيف وهو نازل من السيارة..
كان يمشي بتكبر وكأنه حيخرق الارض ويبلغ الجبال طولا..
فاتح مد يده بإبتسامه وقال؛اهلا وسهلا شيف عبدالله..
صافحه عبدالله وهو يقول؛اهلا اهلا. فاتح؛تفضل...
مرر نظره ع المكان بنظرات كلها كبر..
بعدين خش داخل..
وفاتح خش وراه وهو مستغرب في تصرفاته..
زهير بإبتسامه عريضه:شيف عبدالله اهلا وسهلا اهلا..وصافحه..
عبدالله؛اهلا..وطلق يده فيسع وقال..انت تهني بطيب الزمني ولاوجبات سريعه..
فاتح؛ان شاء الله كبدايه وجباتنا الشعبيه..
عبدالله؛ديكور المكان مايمشيش معاه نظام الاكل الشعبي.
زهير استغرب..رجع ييشوف للديكور اللي كانوا دايرينه خصيصا شعبي...
فاتح؛هادي اول ملاحظه حناخدوها بعين الاعتبار.
هز عبدالله راسه وهو ساكت..
فاتح؛تفضل قعمز شيف..
مشي عبدالله قعمز وين مااشرله فاتح وقال؛معليشي نبي تستعجل شويه وراي برنامج تلفزيوني بنسجله..
زهير شبح لفاتح..
وفاتح وهو يساير قاله؛حاضر..لحظه بس..
واشر لزهير يركب التليفون في مكانه الصحيح يش يصوروه وهو ياكل..
زهير هز راسه بإيجاب..ودار اللي قاله عليه صاحبه..
وعبدالله حط رجل ع رجل ولهي بتليفونه وزهير بدت طيرله منه..
ع جية فاتح بسفرة فيها صونيه فخار مغطيه وجنبها زوز صواني تانيات وكاشيك .
الماعين منظرهم حلو وتنسيقهم جميل.
عرا فاتح الصواني وهو يقول :تفضل
عبدالله لما شاف اللي قدامه وشم ريحه قريب وجهه تغير وقال:راهو بنقول رايي  بصراحه ومش حنجامل بكل
فاتح بإبتسامه ثقه استفزت عبدالله:ماعندكش مشكله..
عبدالله خدي الكاشيك وبدي ياكل ..
قدامه وجبة كسكسي بالبصله وعليها لحم وطني..وجنبها صونيه فيها مبطن ومعاها صونيه مخلل مسير وخيار وجزر ولفت...
فاتح وزهير يشوفوا لتعابير وجهه وهو ياكل..
ماطمنش..هزت ثقه فاتح بنفسه بعض الشيء..
حط عبدالله الكاشيك وخدي كلينكس ومسح فمه بعدين قال؛اممم...نوعا ما مقبول..
زهير شبح لفاتح..
اللي كان يسمع في عبدالله..
عبدالله؛الدهان هلبه..حببت الكسكسي بزياده...طبيخه البصله فيها شي مش راكب نقول انك ماحرقتش الطماطم كويس باينه فيها بنة حموضيه..الحاجه الوحيده اللي عجبتني اللحم طايب كويس..وممكن لانه لحم خروف صغير جي هكي...بشكل عام ننصحك تزيد تشتغل ع نفسك وتأجل الافتتاح لوقت ماتكون فعلا قادر تفتح مطعم زي هدا...اعذرني بس هادي الحقيقه اني مانعرفش نجامل..
زهير خدي التليفون بعصبيه وطفى الكاميرا..
فاتح رسم ع وجهه ابتسامه؛ان شاء الله حناخد ملاحظتك بعين الاعتبار استاذي..بارك الله فيك..
ناض عبدالله وقال؛فيك بارك الله..ونقولك زيد عيد النظر في المشروع هدا وديره وجبات سريعه سوقهم ماشي..
فاتح بإبتسامه؛نفكر في الموضوع ان شاء الله..
عبدالله؛تمام..هي السلام عليكم..
فاتح؛وعليكم السلام...
ومشي معاه سقده..قعد يشوفلهم لين عبدالله مشي..وهو طلع لفاتح؛كذاب ورب االعزة واحد كذاب ومحسدي..
فاتح وهو حاط ايديه في نصه ويفكر قال:كيف بيصير في موضوع الدعايه توا..
زهير؛تو نشوفلك ناس شهرتهم واسعه هدا مايجي قدامهم شي...
ع جية مراة معاها ثلاثه صغار توأم..
:السلام عليكم معليشي المطعم مفتوح..
زهير جي بيقول لا..بس فاتح اللي قعد يشوف للصغار اللي معاها بإبتسامه؛مفتوح تفضلي..
زهير استغرب فيه..
المراة:هيا خشوا بنتغدوا توا..
:واخيرا ياربي جيعانه موت..
وخشوا يجروا..
زهير:ربي يصون بارك الله فيك..
؛يصون عرضك..
وخشوا وراهم..
قعمزوهم ع طاوله وفاتح قال؛شن تبوا تتغدوا..
التوأم اللي كانوا بنتين وولد.
:كسكسي نشم في ريحته..
؛ومعاه مشروب ياسلام..
:وعصبان واه ياليل..
ضحكوا زهير وفاتح..
؛حاشاكم صغاري باردين ويديروا في جو بارد زيهم..
فاتح بضحكه؛باالعكس يهبلوا زي العسل..
:شكرا..
:صحيت
؛منور..
وزهير وفاتح يضحكوا ويقولوا:الله يبارك..
بعدين زهير قال؛لحظه وخيتي...فيها مشكله لو طلبنا منك نصوروا صغارك وهما ياكلوا نبوهم يديروا دعايه للمكان..
فاتح شحه من سوريته وقال:شن تقول ياراجل...مادوريشي اختي..
؛لا وخيي عادي مافيهاش مشكله..
زهير:مش خايفه عليهم من العين!
:لاالحمد لله ديما نرقي فيهم ومعلمتهم يقولوا الاذكار محصنين من ربي..
ابتسم فاتح وقال:كان ماعندكش مانع خلاص..
🌼وجابولهم الغدي وبدي زهير يصور فيهم..
والصغار كانوا عفويين جدا ورايهم يقولوا فيه بطريقه حلوة وبصراحة الأطفال المعهوده..
زهير دار للفيديو شويه حركات وبعته لصفحه مشهور الادمن فيها صديقه..
ونزله طول...
🍁🍁🍁🍁
وتفرج عليه زياد وهو في المستشفى وعجباته الفكرة وضحك ع الصغار وفي نفس الوقت سهفه الغدي..
امانوال وهي تتفرج ع الفيديوا كانت فرحانه لولدها بردود افعال الناس وسؤالهم عن المطعم..
وخدت الفيديو وخشت ع صفحات تعرف اصحابها ودفعتلهم بش ينزلوه..
الفيديو الليبين كلهم شافوه يومها..
••نادر؛خسارة مازال مافتحوشي..
مديحه؛هني روحك وقعمز اني هني نديرلك احسن كسكسي..
نادر؛كسكسي شني ياحاجه عارفتني ناكل فيه...بنشوف حاجات تانيه..زي البورديم مثلا..
مديحه؛المهم نهار تمشي ارفعني معاي..
ضمها لحضنه وقال؛حاضر بس قبلها بنحكي معاك..
بعدت امه وقالت؛عن هديكا اياها ولا..
نادر؛انت غير اسمع مني يلي مجنني خلي نحكيلك قبل..
ناضت وهي تقول؛انسى وحولها من راسك انساها والله مايصير منها وراسي يشم الهوا...ومشت وخلاته..
هو تأفف بإحباط بعدين قال:ياعلى مزاجها ياإما لا... وخدي مخده من جنبه وخبطها ع وجهه...
🍀🍀🍀🍀🍀
بعد يومين....
الساعه السابعه مساءا..
زياد؛غدوة الافتتاح ان شاء الله..
هيثم؛ايه...كلنا ماشين ان شاء الله..
سارة شرقت بالقهوة..وقعدت تكح لين قريب عيونها طلعوا.
زياد:خير بلاك..ومدلها طاسة ميه..
هي شبحت لبوها وقعدت تشرب..
هيثم ابتسم بإستفزاز وقال؛كلنا ماشيين...
هي قعمزت ع الكنبه بعصبيه وهي تشرب..
وزياد يشوفلها بإبتسامة شماته....
🍁🍁🍁🍁
مقعمزين في الصالون..
وحده قدامها لاب توب لاهيه بيه..
والتانيه واخده استراحه من القرايه وتقلب في الفيس ع تليفونها..
فجأة قابلها منشور منزلاته مدرستها عن نشاط داروه الاساتذة في المدرسه..
ضحكت وقالت؛ريتا...اهو الاستاذ اهو..
رتاج وهي لاهيه؛استاذ مني..
قعمزت جنبها وقالت؛اللي كان تذكري زمان كلمني عليك..وهونا بعدين طلع شايف صورتك عند بنيه كانت نقرا معاي..
رتاج بضحكه؛ايه تفكرته االلي لما قتليله ارمله قعد اسبوع هارب بوجهه عنك..
دانيه بضحكه؛ايه....شوفيه..
قربت رتاج وشافت الصورة..
خفت ضحكتها شويه شويه لين اختفت وحلت محلها ملامح الصدمه؛اسماعيل!
دانيه؛ايه استاذ اسماعيل..
رتاج وهي تأشر عليه بصدمه؛اسماعيل هدا اسماعيل اللي يخدم معاي.!؟
دانيه بصدمه؛لالا!!؟ قصدك اسماعيل هداكا هو نفسه هدا!!؟.
رتاج قعدت ساكته وهي مصدومه..
دانيه؛حييي ع الجو!! اني عمري ماشفته اللي يخدم معاك كلن هدا قداش ليك عارفتيه..
خطم قدام رتاج شريط مواقف وتصرفات اسماعيل معاها كان مهتم بيها هلبه بس فسرت اهتمامه ان مجرد محاوله لكسب رضا رب العمل ع طول..
اخر شي الموقف االلي صار لما ناداها بإسمها من دون كلفه..
دانيه؛رتاج وين رحتي..
كيف جت رتاج بتتكلم سمعوا صوت جرس الحوش رن..
دانيه؛زعمه مني!؟
مشت الخدامه فتحت الباب واحد من رجال الحراسه عطاها حاجه...
خدتها وخشت بيها داخل...
رتاج؛شن هدا نجميه!
:مش عارفه مدام الحارس جابوا..
وقفت دانيه وقالت؛بوكس هديه هدا..
خداته وحطاته ع الطاوله..
رتاج؛محلاه الورد اوركيد..
دانيه؛شكلها ليك الهديه واحد من رجال الاعمال المعجبين..
رتاج ضحكت تهكما وقالت؛ياحانطه..
ضحكت دانيه وقالت؛باهي خل نشوفوا شن في تحته..
حولاته وتفاجئت لما شافت انواع شكولاته سودا ...
رتاج؛لاياعمري مش ليا..
دانيه وهي متفاجئه قامت طرف وفتحاته وقعدت تاكل فيه..
فجأة شافت ورقه..قامتها وبدت تقرا...
ورتاج تقرا معاها..
(يازهرة الاوركيد
يامن سكنت القلب و الشريان منا والوريد
هيا انفثي عطرك فينا وابعثينا من جديد)
وكاتب في اخر الورقه تلاته حروف بالانجليزي...
R.R.y
رتاج:قلب وشريان ووريد مايطلع اللي واحد يقرا معاك في الجامعه..
ودانيه مازال تقرا في الكلام وتعاود وهي تاكل في الشكولاته..
🍁🍁🍁🍁🍁
خشت للكوجينه لقت خوها فيها يشرب في الميه..
شافت طنجرة العشي..
وهو التفت شافلها وقال:شن جو القرايه تهاني..
تهاني التفتت وقالت:الحمد لله كله ماشي تمام..
جهاد؛ماناقصك شي ماتبي شي..
تهاني:لالا تسلم..
جهاد هز راسه وقفاته لما قالت؛جهاد..
شبحلها..
تهاني؛مريم انخطبت..
ابتسم بإستغراب وقال:تشوفي فيها؟
تهاني؛ايه تجيني للكليه..
جهاد بإبتسامه؛باهي الحمد لله ربي يهنيها..
تهاني؛يعني عادي ماضايقتش..
جهاد بضحكه؛وعلاش بتضايق بالعكس هدا وين ارتحت..
ابتسمت..
وهو ردلها الابتسامه وقال؛ان شاء الله يطلع خير مني تستاهل كل خير..
تهاني؛امين ويعطيك حتى انت اللي خير منها..
ضحك وقال؛ان شاء الله..
ومشي طلع من حداها..
شويه وخشت نسيبه؛شكلك قتيله..
تهاني؛بنشوف ردة فعله حسيته ولاكأنه..
نسيبه؛واضح..باهي انتي معاش فكرتي في.موضوع خوها..
تهاني بضحكه؛مافكرتش بكل من الاساس..مش طموحي..مش هدا اللي نبيه..اني نبي من ربي يعطيني واحد هكي..رزين وشخصيته قويه......
🍁فهالوقت.
كان زياد نزل لريفودجي  الحوش..
مرر نظره ع لوحاته...ومشي لأكبر وحده فيهم..
عراها...
كانت الرسمه لوحه عاطيه بالظهر ولابسه عبايه سودا كأنها تطاير..
وكانها حاضنه خايفه الريح طيره من يدها..
وتمشي ع جسر بين مكانين..واحد وكانه صحراوي والتاني كله خضرا ...
ابتسم وهو يتأمل..وجت بين عيونه في المرة الوحيده اللي شافها فيها وهي طالعه بسيارتها..
🍁وتهاني متابعه توصف؛واحد مش شايف قبلي ولاحيشوف بعدي..نبيه يخاف ربي...ونبيه يكون دكتور بش يقدرني ويقدر مهنتي وربي يحبني ويغرقني بكرمه لو يخليني نخدم اني وياه في نفس المكان..
نسيبه بضحكه؛عليك فارس احلام..لكن ماتخافيش انتي ربي يحبك ان شاء الله وحيعطيك ماتتمني وزياده..
تهاني بإبتسامه؛إن شاء الله...
🍁🍁🍁🍁
فتح باب الشقه..
وخش كانت هاديه وشبه مظلمه...
زاد خش داخل وكيف جاي بيضبح سمع اصوات نقاشهم فجأة ولت عاليه..
مقبوله؛فلوسي نبيهم يامجيد.
مجيد؛تو نجيبهملك غير اسكتي..
مقبوله:من وين حتى سدينه مكرت فينا..اني الظالمه اللي سمعت كلامك وعطيتهمولك يش تخلي صاحبك النصاب ياكلهم ويهرب..ماليش دخل..فلوسي نبيهم..
مجيد؛ياودي قتلك باهي وصيت رشيد وقتله نبي فلوس للعلاج متاعي وهو قال تويتصرف..
مقبوله:كان ريت منه حاجه هدا وجهي..
مجيد:لالا رشيد مولي درويش شويه بكلمتين يجي للطريق واني وين نقوله حاجه مايردنيش..
مقبوله؛منين بيجيبه المبلغ..كانش بيخنب اخته..
مجيد؛خل يخنبها الكلبه هادي تستاهل المهم يجيبلك فلوسك هدا ماتبي انتي ولا..
سكتت مقبوله..
🍁ورشيد واقف برا وهو يسمع فيهم بصدمه...
وكلام امه في اخر نقاش صار بيناتهم قاعد يدور في عقله.
"انت درويش مش فاهم هادوا يستغلوا فيك يانيه"

#الله_يحبك
#البطل_المغمور2

اكثروا من الاستغفار....

....يتبع....