البطل_المغمور2 "زهور القمر"
#جمان_فريد
#الجزء_الثالث_والثلاثين "الله يحبك3"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
"خلاص يامديحه انسي لأمتى بتقعدي حابسه روحك مع زمان واللي صار زمان؟!"
مديحه ودموعها ينزلوا:زمان ماينتساش يامليحه وقاعد يتجدد معانا لليوم..
مليحه:نادر يبيها تجي تعيش هني بش يرتاح ويطمن عليها الوليد تقطع بينك وبينها..
مديحه؛منها هي المتجبره هادي عندها غيره 12حفيد 12 شاده فيه بلعاني بش تقهرني اني وتمشي مافي راسها..
مليحه؛هدا وولد ولدها البكر اول فرحه راك تنسي..
مديحه؛اول فرحه ليا اني وحرمتنا منها الطاغيه هادي..
سكت مليحه وهي مضايقه.
مديحه؛مافيش داعي نرجع نعاود ونحكي في القديم لأنك تعرفيه..تعرفي كيف كانت متحكمه في حياتي لأني مرت الكبير وكل شي نديره لازم تكون هي راضيه عليه يابلاش منه..لعند ماحملت وجبت ولدي..المقلب اللي دار فيا رافع عمري ماننساه...ضحك عليا وقالي سجلته نادر يامديحه وبعدين نعرف من هي انه مسجل عطيه ع اسم بوها..رعشتني واني نافس وجابتلي الكتيب في وجهي وقالتلي هاه شوفي ولدي مايطلع عن شوري..
مليحه؛امشي انتي سكري راسك واطلقي وشردي هالوليد المسكين بيناتكم..
مديحه وهي تبكي:ماشردتش ولدي اني جداه الظالمه هي اللي شرداته..وياريتها حتى بعد اطلقت خلتني في حالي نربي ولدي كيف مانبي..لاخلت ماليا يجبروني نخليه يمشي عليه ويجي ويقعد عندها مرات بالشهر خلاته يحبها اكثر مني يطبع بطباعها يولي زيها قاسي وواعر..حتى وين خش الجامعه هي اللي اختارت تخصصه وخلاته يولي دكتور..
مليحه؛تقعدي هكي تعاودي وتكرري في الماضي وتزيدي تتعبي..اهو ولدك حداك وعايش معاك انتي وهي يمشيلها زيارات..وبعدين نادر تغير هلبه يامديحه ليه سنين متغير..
مديحه ابتسمت ابتسامه تهكم ممزوحه بالألم؛بعد شني...بعد ماصار معاه هداكا المقلب االكبير الحقير اللي ركبه السكر...
مليحه بألم:يامديحه نادر نسي يامديحه وتعايش مع وضعه عادي..ضارب كل شي في الحيط يضحك ويبصر وعايش جوه ومش مدور شي..
مديحه ضمت يدها وحطتها ع صدرهاوهي تقول:اني اللي نعرف ولدي يامليحه مافي حد يعرف زيي نادر لليوم مقهور لليوم يتعذب لليوم قاعد يتفكر اللي صار وكأنه صار اليوم..
مليحه:فاتوا عشرة سنين يامديحه..
مديحه:انتي قدرتي تنسي سألك بالله نسيتي اسماعيل نسي عبد الرؤوف نسي مافي حد ينسى اللي صار يامليحه اللي صار ماينتساش..لو كانه بنت وصار معاها اللي صار كان اهون..هدا راجل يامليحه راجل معبي مكانه واللي اندار فيه مايتحملاش الراجل يامليحه...
مليحه قعدت تسمع فيها وهي تذكر في اللي صار قبل عشر سنوات وقلبها وجعها ع نادر..
مديحه؛وكله من مني يامليحه كله منها عزوز الستوت هادي..مانقول غير الله يسامح بوه ويرحمه وكان عنده شخصيه قدام امه راهو ماكانش هدا حالنا..
مليحه؛تتفكري شن قالتلك امي زمان يامديحه الراجل اللي ماليه مايبوكش بلاش منه يامديحه..
تنهدت مديحه بحسره..
مليحه؛في جرة هالحب سيبتي الجامعه من اول سنه وتزوجي وماكملتيش عام متزوجه اطلقتي..
مديحه بحسرة؛الله غالب مانقدروش نرجعوا الزمان لتالي...
🍁🍁🍁🍁
في محل تغليف الهدايا..
مقعمز وهو حاط رجل ع رجل وحاط فوق رجله كرت متوسط الحجم ويكتب عليه...
بعد ماكمل مده لصاحب المحل وقالت؛ع نفس العنوان..
:حاضر استاذي..
ناض وهو يقول؛ربي يعاون...السلام عليكم..
ومشي طلع من المحل وركب سيارته وتحرك طول...
🍁🍁🍁🍁
في حديقة الفيلا الكبيرة..
مقعمزة برا وهي لابسه بشت ع توته متاعها ولابسه شاربه..
ع كرسي قدامه طاوله متكيه بمرافقها عليها وايديها تحت خدها..
مهمومه وحزينه ودموعها في عيونها...
ع جية اختها...قعمزت جنبها وهي تقول:خلاص دنونه عاد انسي.. حسستيني انك اول مرة تقري في الجامعه عادي راهو..صدقيني تو تحضري المحاضرة التانيه وكأن مافي شي صاير...
دانيه حركت راسها بالنفي وهي تقول؛لالا يارتاج لا انتي ماتعرفيشي الدكتور هدا انتي كان تشوفي كيف لزني قريب متت يارتاج كلهم يقولوا فيها هدا مايتفاهمش كان لز حد من محاضرة خلاص...
رتاج؛لالا يحلم...اني غدوة تو نمشي معاك ونتفاهم معاه..
رشفت دانيه وقالت:لالا رتاج فكيني مانعرفش شن تكون ردة فعله ولاشن يقولك يارتاج فكيني..
رتاج؛باهي كيف بديري!؟
تنهدت دانيه بضيق وقعدت ساكته..
فجأة دق باب الفيلا الخارجي..
مشي واحد من الحراسات وفتح الباب وهما يشوفوله..
شويه وبان عليهم واخد حاجه بعدين سكر الباب وجي جيتهم..
رتاج؛طالبه حاجه انتي؟
دانيه؛تس...
وصل فيهم وهو يقول؛تفضلي مدام..
رتاج خدت السله اللي كان فيها ورد الاوركيد..
الحارس مشي...
ورتاج مدت السله لدانيه وقالت:تفضلي ياحنه..
خدت دانيه السله وهي مندهشه...
رتاج:الورد نفسه والشكلاطه لكن الكرت هالمرة اكبر شوي..
خدت دانيه الكرت وحطت السله ع الطاوله..
فتحت الظرف وطلعاته وبدت تقرا ورتاج معاها..
(في بحر عينيك سحرا...جعل قلبي غريقا..
واودى بعقلي في برمودا وجهك الضاحك..
ليتك تعلمين ياجميله المبسم...
اني غريق عينيك...غريق لايود الخروج
ولايريد النجده....
R.R.Y)
دانيه؛تي هدا منو ياربي!؟
رتاج؛كلامه حلو..
دانيه؛تمام حلو..لكن شن يبي من وراه ومن يكون ولوين يبي يوصل!
رتاج:باهي انتي مش ملاحظه ع حد شي في الكليه حد حاط العين عليك ديما يحوم حواليك مهتم بيك..
دانيه؛نهائيا...
رتاج؛انتي مش مركزة..
دانيه؛ لأنه مايهمنيش..اسمعي قوليلهم معاش يستلموا شي..
رتاج:كان هدا يريحك باهي..
تنهدت دانيه وناضت خلت كل شي وخشت داخل..
ورتاج تشبح للسله وتفكر...
🍁🍁🍁🍁
الساعه الخامسه والنصف مساءا..
في الطريق..
سارة راكبه مع بوها وخواتها متوجهين لمطعم فاتح..
اليوم الافتتاح...
وزياد كان سابقهم غادي..
هيثم وهو يسوق مرة مرة يشوف لملامح وجه سارة المتجهمه..
صابه شي من القلق وقعد يتوقع في اللي بديره سارة...
وصلوا للمطعم..
درس هيثم قدامه وقال؛الله يبارك..الربيع من فم الباب يبان..
كان ديكور المطعم من برا جذاب وملفت هلبه..
سارة يدوب شبحت للواجهه جو عيونها ع اسم المطعم المكتوب بالخط العريض...
"الفاتح"
قلبت عيونها وفتحت الباب ونزلت..
ومشت نزلت خواتها...ومشوا كلهم خشوا مع بوهم للمطعم..
••في المطعم..
كان فاتح بكامل اناقته فهاليوم ..
فضل يلبس الزي التقليدي بش يكون متناسب مع المطعم وجوه...
والاجمل من هكي هو بنات اخته اللي كانوا لابسات عربي حتى هما "الجلوة"
زهير:والله ماشاء الله الدنيا زحمت..
زياد؛الله يبارك..
وفاتح يوزع في نظره ع الموجودين..لعند ماجو ع الباب...
وشافها خاشه مع بوها وخواتها..
وكأن القلب يحس بوجودها..ويعطي في اشارة للعيون اللي يولوا يدوروا عليها دوارة..
سارة اختارت مرة تانيه تلبس اسود في اسود..
وكأنها اختارت تزيده حب ع حبه في كل مرة يشوفها فيها..
ابتسم وقال:الدكتور جي.
زياد وزهير شافوا وين يشبح ..
وفاتح مشي طول يسلم ع هيثم..
هو وصل في هيثم ...سارة خدت خواتها ومشت من حداهم..
فاتح وهو يسلم ع بوها بالخد قعد يشوفلها وهو يقول:الله يبارك فيك دكتور.
هيثم؛ربي يوسع رزقك ويفتح عليك..
شبحله فاتح وقال بإبتسامه؛آمين..
ع جية احسان؛اووو دوك..
وقعدوا يسلموا ع بعض ويهدرزوا...وفاتح بعيونه مع سارة مش قادر يغيرهم عنها..
••سارة بإبتسامه؛تمام الحمد لله كله تمام لتوا..
رنيم بإبتسامه؛موفقه ان شاء الله..
نرجس:هي تفضلوا نذوقوكم من الضيافه...قهوة عربيه ودبله..
رنيم؛الله قداش ليا عليها..
نرجس بضحكه؛هي تعالوا..
ومشوا معاها وفاتوا من جنب نوال اللي مابتش سارة تسلم عليها...
ونوال اساسا كانت لاهيه..
نوال:والله ياأستاذ عز الدين الموضوع يبي تفكير مانبيش ناخد قرار متسرع..
:فكري وخودي راحتك وحني نستنوا..
هي ابتسمت مجامله...
🍁وعيون هيثم معاهم..
كان يشبحلهم وفي عيونه نظره في لمعه من شي عرفه احسان لما شافها...
قعد هيثم بعيونه معاهم...لين هي مشت مع ثريا لجهة تانيه..
ثريا؛اسمعي هدا في فراسه موال ماتقوليش مانبهتش.
نوال؛واضح ماعرضش عليا حكايه الخدمه في القنصليه الا وفي فعقله شي...حلم ابليس بالجنه..
بعدين قعدت دور ع ولدها بعيونها لقاته واقف يهدرز ع واحد وعيونه مرة مرة يشبحوا لجهه معينه..
شافت وين يشبح..لقت سارة شاده فنجان قهوة وتشرب وتهدرز مع رنيم ونرجس..
رجعت شافتله وقالت؛غير شوفي شوفي ياثريا كيف يشبحلها ياروحي يحبها هلبه..
ثريا بإبتسامه؛لاحظت انها خدت قلبه من اول مرة شافها فيها قبل تلاته سنين في المصحه..
نوال؛ياقلبي ع وليدي ثلاته سنين...المشكله البنت مش شايفاته ولامعبراته والله لو نعرف ان في ناحيتها شي نخطبهاله طول..لكن هي نحسها مازال مش ناسيه راجلها...
ثريا قعدت تشبح لسارة وقالت؛معذورة اللي زي مجاهد ماينتساش ولايتبدل..
نوال بإستغراب؛من وين تعرفيه!؟
ثريا؛عن طريق حد من معارفه كان يجيب يتعالج عندي..
نوال:تبي تقولي ان ولدي ماعنداش فرصه معاها؟!
ثريا؛مانبيش نقول معدومه..بس صعب جدا..
نوال رجعت شافت لولدها بحزن وخافت عليه من كسر القلب...فاتح حساس جدا وان مابانش عليه لكونه راجل...
والخيبه في الحب تهد اقوى الرجال...
🌼🌼
نرجس:هونيهم التوام اللي دارو الدعايه..
شبحولهم لقوا ناس ملتمين عليهم ويصوروا..
رنيم بضحكه؛ولو مشاهير...
ابتسمت سارة وهي تشوفلهم..
ريحان؛توام زينا هادم...
جنان؛هما ثلاته...كيف كانوا عايشين في بطن امهم !؟
ريحان؛ايه صح حني كنا زي قلوب اللوز..هما كيف كانوا؟!
سمعوا حديثهم وضحكوا..
رنيم بضحكه؛ياوخيتي سلمهم قلوب اللوز..
سارة؛سلمك يارب..
ريحان؛سارة نمشولهم..
سارة شبحت للصغار ...
ونرجس قالت؛تو نرفعهم اني هي تعالوا...
ومشوا جنان وريحان مع نرجس..
وسارة تشوفلهم...
رنيم بضحكه؛حتى اني بنمشي نصورهم...ومشت وراهم..
وقعدت سارة مقعمزة تتفرج علي خواتها كيف يهدرزوا مع الصغار
وقعدت تتوقع في الاسئله اللي يسألوا فيها خواتها للصغار..
غيرت عيونها عنهم وشافت لبوها لقاته يشبح لشخص معين...
بدي صدرها يضيق....
وزاد ضاق اكثر...لما شافاته تحرك من مكانه ومشي ناحيتها..
هي كانت واقفه تهدرز مع وحده...
نوال:ان شاء الله انتي تعالي للمكتب وتو نزيدوا نتفاهموا..
:ان شاء الله..
"أستاذة نوال"
قلبها دق بقوة بلعت ريقها والتفتت؛اهلا دكتور...
هيثم بدون مايشوفلها؛مبارك ع فاتح وان شاء الله يكون باب رزق واسع..
نوال:ان شاءالله..
هيثم تنحنح وقال؛عرفتي شن صار للحاج مبروك..
نوال؛ايه سألت عنه وعرفت انه دار العمليه ونجحت الحمد لله..
هيثم؛تصدقي ان مافي حد من صغاره دوره الا اليوم قبل لنجي بش جو شافوه..وبعد ماهدرزنا شويه قرروا بعد يولي حاله باهي يقعد كل شهر عند حد.
نوال؛هو كويس ويفرح الكلام اللي قلته..بس اني نفضل انه يرجع للدار..
هيثم؛علاش..
نوال:يعني صغاره اللي كانوا ناسيينه المده هادي كلها بيصحى ضميرهم توا!؟
هيثم؛وعلاش لا بوهم كان ع حافة الموت الشي هدا يكفي بش يهزهم ويوقظهم..
نوال بتهكم:ماهزهم موت امهم...
هيثم ابتسم وقال؛احسان الظن اولى..
نوال؛انت ممكن بس اني مانقدرش ولهدا نتمنى يقعد في الدار..وتوا عن اذنك دكتور..
هو قعد ساكت شويه بعدين هز راسه وقال؛اذنك معاك..
مشت من حداه..
وهو حس بشعور غريب ضيق صدره هلبه...
تنحنح ومشي ولى لمكانه...خدي طاسة ميه وشربها كلها في مرة..
واحسان مركز معاه قاله؛شن جو..
هيثم شبحله بعدين هز راسه وقال؛تمام..تمام...
••ومن بعيد شويه سارة اللي كانت تشبحله حست ان نوال تتحاشى في بوها..وقالت في نفسها ان اللي داراته معاها في المزرعه ردعها..وهالإستنتاج فرح سارة وريحها...
"شن رايك في خدمتنا ان شاء الله راضيه بس"
هي فنصت عيونها والتفتت لقاته واقف ورا الطاوله ويشوفلها بإبتسامه...
فاتح ؛في حاجه ماعجباتكش عندك ملاحظه ع شي..
قعدت تشوفله بحده.
فاتح بإبتسامه؛بش ماتفهميش غلط نكلم فيك زي باقي الحضور كلهم لفيت عليهم وسألتهم..
رفعت سارة حاجبها وقالت؛ماخديت شي ومش حناخد..
فاتح:بس كأني شفتك شربتي قهوة!
سارة تهكما؛راك تقول انت دايرها القهوة !؟.
فاتح؛ولو كنت مش اني تحديدا من دارها لكن هي من ضمن االبرنامج متاع الافتتاح..
سارة؛ممكن هي الحاجه الوحيده المقبوله هني..
فاتح ابتسم وقال؛عجباتك يعني..
قعدت ساكته وهي مغيره عيونها عنه..
فاتح بإبتسامه؛لازم توازني بين الميه والبن لما ديري القهوة بش مايغلبش واحد فيهم ع التاني ويفسد طعمتها..رغم اني شربتها قهوتك كلها امس لكن ماعجبتنيش..تقبلي رايي..ومرحبتين بيك..ومشي من قدامها وخلاها مصدومه...
كيف قال اللي عنده براحه وماعطهاش فرصه للرد..
التفتت وقعدت تشبحله وهو واقف ع غيرها من الحضور ويكلم فيهم...
دمها انحرق...واعصابها ركبوا...
نزلت من الكرسي ومشت لبوها ونادت:بابا..
هو التفت شافلها وجاها ؛خيرك بابا؟
سارة؛خلاص بابا هداكا هو غدوة وراي كليه..
هيثم هز راسه وقال؛حتى اني نبي نروح..بري جيبي خواتك وتعالي..
سارة فرحت هلبه ومشت طول لخواتها خدتهم من وسط الزحمه وسلمت ع الكل ومشت لبوها...
هيثم؛هيا بابا...
سارة؛وزياد...
هيثم؛خليه يقعد مع صاحبه يروح بروحه بعدين...
سارة هزت راسها.....
بعدين مشوا مع بعض طلعوا بدون مايلاحظهم حد..
شويه وفاتح قعد يدور ع سارة بعيونه مالقهاش..
وين دور ع بوها وخواتها مالقاهمش..
مشي لزياد اللي كان واقف يهدرز مع زهير ومهاب..
فاتح؛الدكتور روح؟
زياد دور عليهم بعيونه مالقاهمش قال:اكيد روحوا من الاول قال مش مطول..
فاتح؛قبل نبيهم يتعشوا بعدين يروحوا..
زياد؛مافي حد في الحوش يتعشى غير التوامه فواكه وطاسة حليب اما حني الكبار طاسه زبادي ساده.
زهير؛رجيم!
زياد؛نظام صار وحكومة الحكومه...
زهير؛ربي يكون في عونكم..
ضحك زياد..
وفاتح اللي كان يسمع في كلامه بين عيونه ملامح وجهه سارة لما كلمها..كانت برغم حدتها بريئة وعيونها اللي كانت نظراتهم قاسيه غالبه عليهم مسحه..
ابتسم بتنهيده وقال؛جيتهم ساده..
🍁🍁🍁🍁
وعدت الساعات..والليل حضر وفي حضوره سيطر....
وين يليل يخطر ع البال اللي مايخطر...
وهديكا الليله...
كانت طويله....
من الفرح...ع تهاني اللي لما رجعتلها صاحبة عمرها عاشت سعاده ليها سنين ماعاشتهاش..
بس هالمرة اللي حانب تفكيرها في اللي صار بينها وبين سارة..
عقلها جابلها خوها زياد...واللي داره زياد..
لقت روحها تراجع في كلامه كله مع الولد اللي ضايقها..لكلامه معاها هيا..
زي ماهو قاعد متعجرف...لكنها لأول مرة تشوف هالعجرفه حلوة في عينها...
🌼وهو كذلك راسه ع الوساد..بس العقل في حوش الجيران..
والمشاعرالحلوة زادت كبرت وتقوت اكثر ..
🍁بس بحداه بمسافه في دار تانيه..
كان بوه عايشه في حالة غريبه ومش مفهومه..
مقعمزع السرير وشاد في يده صورة اسيمه وهو يتفرج عليها..
كان يشوفلها بنظرة فيها وجع...
واللي صارله بعد شاف الصورة خلا شعوره بالضيق يزيد...
دس الصورة في الدرج وخدي نظاراته ولبسهم وفتح تليفونه ع سورة طه...بصوت ناصر القطامى..
حط ع الكامدينو..وحط راسه المخده وقعد يرغم في نفسه ع الخشوع لين روضها ...
وقعد يسمع فيه لين خداه النوم ورقد..
🍁لكن سارة كانت سهرانه تحكي لصاحبتها ع الماسنجر اللي معاها اليوم كله..
دانيه
(مالهاش ذنب صح بس يقعد خوها اللي قتل خوي)
سارة.
(عندك حق ماتنلاميش..باهي توا قوليلي فكرتي في كلامي)
دانيه
(فكرت واقتنعت وامري لله خل نجرب حظي معاه ونشوف شن يصير معاي)
سارة
(كثري من الحوقله ماتسيبيهاش.)
دانيه..
(والله من بكري واني نقول فيها ربي يسخرهولي يارب)
سارة
(يارب)
🍁🍁🍁🍁
تاني يوم...
في الكليه..
في الممر اللي يرفع لمكتب الشايبي...
سارة وهي تجبد في دانيه؛ياسرك خوف ياجبانه مش واكلنا هو..
دانيه:توقعي يديرها يخوف هدا..
وصلوا قدام مكتبه لقوه مسكر..
ع خطمه واحد.من زملائه شافهم واقفين قدام الباب..
وقف وقال؛الدكتور الشايبي مابجيش اليوم..
سارة بإبتسامة مجامله:شكرا دكتور
وولوا طلعوا هما الزوز..
دانيه:احسن.
سارة؛ولأمتى يعني اولها ولااخرها مجبوره تكلميه..لامفر..
تنهدت دانيه بضيق وقعدت ساكته..
🍁🍁🍁🍁
"نص ساعه وابدي دخلي الحالات"
؛حاضر دكتور..
ومشت طلعت..
وهو فتح اللاب توب وقعد لاهي بيه..
رن تليفونه خداه من ع الطاوله ورد..
الشايبي؛ايوه السلام عليكم.
"وعليكم السلام..وين طلعت من صبح ربي"
ابتسم وهو يقول:فاتح الدكان بكري اليوم بلاش..
"اها معناها مش متغدي معاي"
الشايبي؛لايادوحه ابعتيلي الغدي مع عمي عمر "السواق"
"باهي باهي رد بالك ع روحك"
الشايبي:حتى انتي...في امان الله...
بعد سكرت امه..حط تليفونه ع المكتب ورجع لهي باللاب توب اللي قدامه...
🍁🍁🍁🍁
وفي مستشفى الرازي...
كانت مريم واقفه تكتب في رساله بش تبعتها لخوها توصي فيه ع حاجه يجيبهم ليوم الفاتحه اللي حتكون بعد يوم...
بعد ماكملت بعتتها ورفعت راسها..
انتفضت مفجوعه..
ضرار وهو رافع حاجبه؛صباح الورد ياعسل..
بدت تتسارع انفاس مريم من الخوف بس ملامح وجهها كانت تبين العكس...
مشت وخلاته..وهو لحقها..
ضرار:تعرفي يامريم كان ماوقفتيش شن ندير..
مابتش تعدل عليه قعدت ماشيه هاربه منه...
وهو سرع خطواتها وسبقها واعترض طريقها..
ع خطمة ناس من حداهم ماقدرتش تقول شي ولاتتحرك..
ضرار؛نبيك في كلمتين ضروري ومش متحرك من هني قبل تسمعيني..
مريم خطر عليها زمان لما وقفها في الجامعه وصوروها معاه وبعتوا الصورة لجهاد..
خافت يتكرر نفس الموقف...
مريم بنبرة حاده؛تعالى وراي...
مشت..
وهو ابتسم بمكر ومشي وراها...
وقعدوا يمشوا لين وصلت في الباب الخلفي للمستشفى..
وطلعت وهو وراها..
ومشت لتركينه مستخطيه...
وقفت وهو وقف قدامها...
مريم بحقد؛شن تبي يانجس..
ضرار:نبيك..
مريم بعدت وهي تقول:قسما بالمولى تقرب نقتلك والله نقتلك..
ضرار؛ماتاخديش داوود..
مريم تهكما؛بالله!
ضرار وهو يحاول يتحكم في اعصابه؛ماتاخديشي واني ناخدك..صدقيني يامريم مافي واحد يرضى بيك غيري وانتي تعرفي علاش..داوود هدا لو يعرف اللي فيها حتى من قدام حوشكم مايفوتش..
تعبوا عيون مريم دموع وهي تقول؛والله لو فيها موتي ياحقير مانرجع نسلمك نفسي مرة تانيه..اني توا نظفت مستحيل نرجع نتوسخ بيك يافاجر..
قرب خطوه وبدي يتوسل؛مريم اقسم بالله نحبك ونبيك والله مانكذب عليك نبيك ونحبك فهالعامين هادم يامريم تعذبت عذاب ربي بس يعرفه..اني نبيك انتي مانبي حد غيرك..
🍁كذاب اشر...لايحبها ولاشي...هو يبي يتملكها بس ومايبيهاش تكون لغيره بأي شكل وان كان عرضه للزواج منها حقيقي لكن ارضاء لرغبة التملك اللي في داخله🍁
مريم بقرف؛يلعنه الحب اللي تعرفه انت يافاسد..
انقلبت ملامح وجهه للغضب وهو يقول:تعرفي لو سكرتي راسك نطلع منك ونمشيله ونقوله كل شي...
••فهالوقت..
كان هيثم واقف في روشن مكتب اللي يطلع ع الجهه الخلفيه من المستشفى...
سرحان بتفكيره في امر قد أهمه...
استاقظ من سرحانه...وقعد يجول بعيونه في المكان من ورا الروشن...
عقد حواجبه وين جو عيونه ع مريم وضرار...
وشاف مريم وهي تبكي وكأنها تتوسل..
مريم ببكي:حرام عليك اللي دير فيه فيا والله حرام خليني نعيش حياتي زي ماانت عليش هاك تزوجت ودرت صغار ومافي شي لحقك من اللي لحقني بالله عليك خاف ربي ولو لمرة وحده..
هو عجباته حالة الضعف اللي هي فيها..
زاد تكبر وهو يقول؛ديري اللي قتلك عليه يامريم واني ناخدك صدقيني هكي خيرلك..
انقلبت ملامح وجهها للغضب وهي تقول:اللي تبيه برا ديره والله لو نموت ماتتسمى عليا..
ولفت بتمشي...شدها من ذراعها من قوة وهو يقول:تعالي هني..
"هيييه انت"
ضرار طول طلقها لما شاف هيثم جاي ومعاه زوز من عناصر الأمن...
هيثم ؛وين تحساب روحك وين ...
جوه عناصر الأمن وشدوه...
ضرار؛اني ولد عمها..
ومريم شاده ذراعها وهي تبكي..
هيثم تأكد انه هو نفسه بعد ماصرحله بصفته؛طلعوه...
ضرار؛نقولك ولد عمها ولد عمها من انت بش تمنعني نجي لبنت عمي مريم تكلمي..
ومريم تبكي بصمت..
والامن يجبدوا في ضرار اللي قعد يهدد:تو نوريك يامريم باهي تو تشوفي...
وبعدوه لين ادرق من قدام عيونهم
مريم وهي منزله راسها وتبكي؛سامحني دكتور
