البطل_المغمور2 "زهور القمر"
#جمان_فريد
#الجزء_الرابع_والثلاثين "مشاعر"
رمضانكم مبارك..
قال رسول الله صلى الله عليه وسلم(ايعجز احدكم ان يكسب في اليوم الف حسنة؟فسألة سائل من جلسائه:
كيف يكسب احدنا الف حسنه؟..قال:يسبح مئة تسبيحه فيكتب له الف حسنة او يحط عنه ألف خطيئة)
صحيح مسلم..
💐💐💐💐💐💐💐💐💐💐💐💐💐💐💐💐
بعد انتشار الفيديو لقى استحسان كبير من الناس وتضامن معاه...
وكل التعليقات وردود الأفعال ايجابيه..
ومش هكي وبس الفيديو وصل لمشاهير ع جميع الاصعده شاركوه وعلقوا عليه تعليقات حلوة..
وفي منهم نزل فيديوات عن تطييب القهوة...
ودارو تاق ضم تحته ع الفيديوهات..
#قهوة_فاتح
وهو في الحوش يدرب في صالة الرياضه..ومش عارف شن صاير برا..
تقصد انه مايعرفش ويكون بعيد ان مؤثر خارجي حاليا لين يصفى ذهنه بالمرة..
بعد ماكمل...طلع من الصاله بطريقه للحمام..
ع خشة امه للحوش...
لما شافاته قالت بفرحه:وليدي...
ومشتله تجري وضماته بقوة..
هو ضحك بإرتباك:شن جاك!؟
بعدت وقالت؛شن شن جاني قريب هبلت اليومين اللي فاتوا معقوله ماطمنيش عليك حتى برساله..
فاتح؛شن عيل صغير اني!؟ وبعدين اللي يسمعك مايقولش غبت يومين..ماهو زمان نغيب بالشهور ماتندريش عليا حي ولاميت..
تعبوا عيونها بالدموع وطلقاته...
هو قعد يشوفلها كيف بدمع قلبه وجعه..ضمها لحضنه وقال:تعالي جاي...
هي ضرباته ع صدره وقعدت تبكي...
وهو يقول:اششش خلاص اسف..وباس ع راسها...
🍁فهالوقت...
روح هيثم لحوشه...
كان يبان عليه جوه حلو عكس الايام اللي فاتوا...
وين وصل جهة الكوجينه..
شاف سارة مقعمزة ع الطاوله وفي جنبها عرم فناجين القهوة..
عقد حواجبه بإستغراب وقال:السلام عليكم..
سارة شبحتله وهي شاده في يدها فنجان تشرب فيه...
هيثم:شني هدا!؟
سارة شبحت للفناجين ارتبكت وقالت:شي...
هيثم:شربتي هادم كلهم!؟
سارة حركت راسها بالنفي وقالت:لالا..بس كنت نجرب في القهوة مش عارفه علاش ماعجبتنيش..
هيثم:غريبه.نفسها القهوة اللي نجيب فيها ديما ومن نفس المكان...
سارة؛مش عارفه ماعجبتنيش..
ابتسم بإستغراب بعدين قال؛وين غدانا!؟
سارة؛ماقدرتش نطيب طلبت من برا...
هيثم؛واني!؟
سارة؛حتى انت بابا المكان اللي طلبت منه يدير في ماكله صحيه..
هيثم ابتسم وقال؛نحسابك نستيني..
سارة:اني ننساك بابا!؟
هيثم؛الفترة الاخيره بعدتي هلبه!
هي ابتسمت بأسف وقالت؛مش اني اللي بعدت يابابا..
هو قعد يشبح لنظرات عيونها بان فيهم تعاتب فيه...
نظراتها وجعوه هلبه...
سارة؛ماشيه نكمل قرايه تبي حاجه اني في داري..
ومشت طلعت من قدامه....
هو غير عيونه عنها ومررهم ع فناجين القهوة...
حط شنطته ع رخامه البار...
وخش للكوجينه...
قام كمامه..ولم الفناجين وحطهم في الحوش وبدي يغسل فيهم وهو مضايق....
🍁🍁🍁🍁🍁
"وشن هي الجريمه اللي دارها ياكبدي"
نسيبه؛مش جريمه ياعمتي لكن...مش قادره نتقبل مانبيش صغار خوي يعيشوا مع مرت اب..هما مش حيتحملوا..ابديهم من زياد لجنان...
عفاف؛وباهي وبعدين وين الصغار يكبروا وكل حد يمشي يشوف حاله هو شن يصير فيه..
قعدت ساكته نسيبه وهي مضايقه..
عفاف:الراجل مش زي المراة يابنتي الراجل ديما يحتاج المراة يحتاج رفيقة يكمل معاها عمره...
نسيبه؛ياما منهم بعد ماتوا نساوينهم ماخدوش بكل..
عفاف:وياما منهم اللي اخرهم كان في دار الحكمه متاع العجزة...
رجعت نسيبه سكتت...
عفاف:فكري في وخيك مش غير في صغاره ماتحرموشي من حقه..
ونسيبه تنهدت وهزت راسها بإيجاب وهي تساير في عزوزتها مسايره....
🍁🍁🍁🍁
الساعه الثالثه ونصف بعد الظهر.
في جردينه كبيره...في جو معتدل دافي...
تحت شجرة كانوا مفرشين بخشة كبيره..
حاطين عليهم غداهم..
مع الماكله كانوا يتحاذبوا في اطراف الحديث..
مريم بضحكه؛خلاص خليك غادي..
داوود:تشوفي فيهم كيف يشبحولي..
مريم وهي تاكل قعدت تضحك وتحرك في حواجبها..
داوود؛عاجبك الجو انتي تتجكتري بيا ..
مريم بلعت وقالت؛يطلعي راجلي ضابط..
قعد يشبحلها بنظرات حلوة..خلت عيونها تنزل خجلا...
داوود؛كان نقولك مش قادر نصدق اللي اني فيه تضحكي عليا..
شبحتله وهي مبتسمه..
داوود؛فرخه مريومه ولت مرتي..
مريم بضحكه؛فرخه!؟
داوود؛مازلتي في عيوني هديكا البنيه..
مريم بإبتسامه؛داوود..
داوود؛معلاقه..
ضحكت وقالت؛بنسألك سؤال جدي شويه..
داوود؛اسألي...
مريم:مافي حد اعترض عليا من عيلتك بحكم اني كنت متزوجه قبل وانت عزري..
داوود؛تس..اصلا كل عيلتي خالي وخالتي وهادم زوز عارفين قصتي معاك وفرحوا نهار قلت بنخطبك..والباقي كله زايد اساسا مافي حد ليه علاقه بحياتي الخاصه..
مريم بإبتسامه:يهمني نعرف اجابة السؤال هدا بش يبدا كل شي واضح عندي من البدايه..
ابتسم وقال؛حقك..وقعد ياكل..
وهي خدت حكة عصير وفتحتها وحطتها قدامه..
داوود غمض عيونه وفتحهم وقال؛يسلموا..
هي ضحكت ضحكة خفيفه وولت تاكل....
🍁🍁🍁🍁
الساعه الخامسه عصرا...
مديحه بهمس؛حطيت عليها حرس ماتقدر دير في الحوش شي في غيابي..
مليحه:ان شاء الله يقدروا عليها..
مديحه؛لايقدروا يقدروا...
مرحبتين"
هما زوز ناضوا ومليحه قالت؛مرحب بيك كيف حالك ياسدينه..
سدينه:الحمد لله...كيف حالك مديحه..
مديحه بإبتسامه:الحمد لله...
سدينه؛تفضلوا تفضلوا..
قعمزوا الزوز قدامها ومليحه قال..
مليحه:كيف حالك رتاج..
سدينه:الحمد لله كويسه حتى الخدمه ولت تمشيلها..
مديحه؛اهم شي حالها باهي اخر مرة جينا فيها وجهها كان زي الليمه وباين فيها التعب..
سدينه؛لا ولت وحالها باهي..
ع جية دانيه كان متجهزة بش تطلع...
خشت عليهم وهي تقول:السلام عليكم..
ردوا عليها السلام ومديحه تتفحص فيها بعيونها..
دانيه بإبتسامه؛كيف حالكم..
مليحه ومديحه:الحمد لله..
مديحه:كيف حالك انتي
دانيه:الحمدلله..نستأذن ماشيه للكورس..
مديحه بإبتسامه:موفقه حبيبتي..
دانيه وهي مبتسمه؛تسلمي..شبحت لأمها وقالت؛ماتبي شي يام
سدينه؛ردي بالك ع روحك بس..
دانيه:ان شاء الله..هي بالسلامه..ولفت ومشت..
ومديحه قعدت معاها بعيونها لين درقت بعدين قالت:في اما سنه هي؟!
سدينه؛تالته..
مديحه هزت راسها بإيجاب..
مليحه؛يجوها خطابه..
سدينه؛اكيد وهي تسكر في المواضيع طول..زيها زي اختها كلموني عليها عيلة كعبار ولدهم عبدالحميد الكعبار يبيها..
مليحه بصدمه:عبد الحميد كعبار هدا ملياردير نص طرابلس ليه هو..
سدينه؛حتى عيلة ماشاء الله عليهم ع العز اللي هما فيه متواضعين ومش من جماعه الفشخره الكذابه وبنتي سكرت راسها ع الزواج..
مديحه؛خليها ع راحتها الزواج بالرغبه مش بالضغط..
سدينه؛حتى اني مخليتها ع راحتها...وإن شاء الله ربي يهديها..
••••••••
في الطريق
مليحه:من وين خطرتلك العزومه..
مديحه؛الحق الحق بنتها دانيه عاجبتني هلبه ونفكر فيها لنادر..
مليحه؛كبير عليها..
مديحه؛لاكبير لاسو مناسب ليها وبعدين وليدي الله يبارك عليه مازال صغير وماينعطاش سنه..
مليحه قعدت ساكته..
تنهدت مديحه وقالت؛ماترفضاش ع خاطر مرضه..
مليحه؛ومافكرتيش انه لو خدي وحده مريضة سكر شن بيصير في صغارهم..
مديحه؛عارفه بس يقعد احتمال يعني مش أكيد..المهم عندي ان ولدي يتزوج ويعيش حياته ويعوضه ربي وينسيه اللي صار فيه..
مليحه:انتي ادرى...غير ادعي وقولي ان شاء الله ماتوقفلكش فيها هديكا..
مديحه بعصبيه:غير والله تعبا ساد اللي صار قبل في جرايرها
والله مانخليها تخش فيه الموضوع هدا لو شن يصير...
🍁🍁🍁🍁
"والله خاطري نضربك ماتخليهاش في خاطري"
فاتح:تضرب عينك زيد عليا غادي...
زياد بضحكه؛ياتافه عيشتنا في حالة مايعلم بيها الا ربي..
زهير:حني هني راعشين وحارقين دمنا وحضرته منعزل في *******
فاتح؛اهو قست غلاي وعرفته..
زياد؛والله مامخليك لين تعوضني عن ساعات من عمري انشغلت فيهم عليك وراحو ع الفاضي..
ابتسم فاتح وقال:تعالى انت والعيله تعشوا هني بلاش شن رايك..
زياد وهو يوزع في نظره ع المطعم ويشوف فيه كيف معبي ابتسم ع جنب وقال...تمام..
تنهد فاتح بإبتسامه وعقله عند الحبايب...
🍁والحبايب عايشين في حالة تشتت...
بين بوها وحاله....بين القرايه...بين شي تبي تحوله من عقلها وهو مش راضي يطلع....
سارة بتذمر:اوووف استغفر الله..
غيرت عيونها للمصحف...شبحتله شويه..
بعدين خداته وفتحاته وبدت تقرا....
🍁🍁🍁🍁
مقعمزين قدام التلفزيون يتفرجوا ع برنامج..
اسمه "الملكه" برنامج اجتماعي تقدم فيه اخصائيه اجتماعيه..
مديحه ماتفوتش منه ولا حلقه وديما صارعه راس نادر بيه..
وهالمرة مش هو بس اللي يتفرج معاها..حتى الساكته...
ع يمينه امه وع يسارة حناه وهو مقعمز في نص...
قوات حفظ سلام...
في البرنامج..
"ماتقعديش درويشه يمشوك كيف مايبوا ماتخلي حد يدخل في حياتك لاعزوز ولاصبيه والراجل اللي يبي يفرض ع مرته هله تفرض عليه حتى هي هلها مال شنو خليه يحس شويه بالنار اللي انتي طايحه فيها..
انا بس عندي كلمتين للعزايز..المتسلطات والمتحكمات"
علت مديحه الصوت ع الاخر..
نادر غير عيونه من ع الريموت وشبح لحناه لقاها تشبح لأمه بنظرات تخوف من طرف عينها ..
"اتقن الله في رواحكن راهو ربي بيحسابكن ع بنات الناس اللي تاخدوا فيهن بيش تقهروهن..راكي واخده بنيه من حوش هلها بنادمه حره عندها كرامه وعزة نفس مش جاريه من سوق العبيد..والله انتن اكبر سبب لخراب البيوت ياقداش حواشين خربن في جرت هالنوع من العزايز الظالمات...
اهمدن..."
مديحه؛ايه اهمدن...
"وخافن ربي راهو خلاص معاد قعدلكن فيها شي وتوكلن ديرن ماتلقن بش تقابلن ربي بيه مش تعديله وانتي قاهره روح ومخربه حوش ومشرده عويله...خافن ربي واهمدن ياسركن"
الساكته؛شن هالبرنامج المعفن وشن هالشلافطيه اللي تسمعولها هادي..وانت من جدك مقعمز تبع في هالقطافه..
كيف جي بيرد امه سبقاته وقالت..
مديحه؛طبعا كلام الحق ينخص ويوجع..
الساكته ضيقت عيونها وقالت:شن الصوت هدا!!في حد غيرنا اني وياك مقعمز هني!؟
نادر:أ....
قاطعاته امه وقالت؛قاعده في حوش مانيش راده عليك..
الساكته؛قاعده في حوش ولد وليدي...
مديحه بضحكه ساخره:حوش منو ياحنه...لاياماما هدا حوشي بوي واخدهولي اني وولدي الله يرحمه ...سمعتي حوشي...
نادر:يام...
قاطعاته الساكته وقالت؛"ايه حوشك وبنقعد ع قلبك غصب عنك ووريني شن بديري..
هو فقد اعصابه وبصوت عالي قال:خلاص!
هما الزوز انفجعوا وشبحوله بخوف...
هو بغضب كمل يقول؛قسما بالمولى نهج ونسيبهولكم واقعدوا اقتلوا بعضكم بعدين..
مديحه بخوف:خلاص يما اهدا بالله عليك..
الساكته ؛هاني سكتت هاه...وحطت يدها ع فمها..
ومديحه ناضت تجيب في جهاز القياس وجاته تجري..
هو ناض وخداه منها قبل توصل فيه وقال:مايلحقني حد...
وطلع من حداهم...
والزوز يتبعوا فيه بعيونهم وهما في قمة القلق...
بعدين شبحوا لبعض..
مديحه بكره؛الله لايسامح من كان السبب..
قعدت تشبحلها الساكته بكبر..
ومديحه مشت وخلتها...
بعد مامشت تبدلت ملامح وجه الساكته للحزن وهي تتفكر في يوم ماراحش عن بالها ولا لحظه...
《مديحه ببكي؛انتي اللي خلتيه يعرفها انتي اللي فرضتيها عليه
الساكته ودموعها ينزلوا:اني مافرض عليه حد ولدك يبيها هو اللي جاني لعندي وقالي ياأمي نبي اميره اخطبيهالي
مديحه ببكي؛ووين راها اميره وين عرفها...
مليحه بدموع:صلي ع النبي يامديحه...
مديحه؛ولدي يامليحه ولدي اللي في المستشفى بين الحياة والموت ولدي وحيدي اللي ماعنديش غيرها..
الله لايربحها هالحقيره الله ينتقم منها هالوسخه...وانتي الله لايسامحك》
نزلوا الدموع الساكته وطول مسحتهم..
بعدين ناضت وهي متكيه ع عكوزها ومشت لدارها...
🍁🍁🍁🍁
"شن المناسبه"
سدينه؛قالت هما ديما يجونا ويعزموا فينا وحني مانمشوش شدت فيا وحلفت معاش فيها كيف..
رتاج؛مانحبهمش بالذات مليحه هادي متملقه هلبه..
سدينه؛ولااني نحبها لكن اختها مش زيها تخش الخاطر..
رتاج تنهدت وقالت؛خلاص نمشوا...دنو بتمشي معانا ولا؟
دانيه؛ايه خل ناخد راحه من القرايه ومن هالبحث الصامت..
سدينه؛ايه حق كلمتني لطيفه كعبار..
رتاج بإنزعاج؛مش سكرنا امه الموضوع هدا...
سدينه؛تكلمي كويس..
رتاج؛يام انتي طلعي فيا عن طوري اني قتلك مانبيش معاش نبي ندفن شباب وعمري في الحياة مع واحد نديد بوي..
سدينه؛مش كبير لهالدرجه راهو مازال اصغر من عادل الله يرحمه..
رتاج؛بكم باربعه خمسه سنين! يام اني نبي راجل قريب من عمري نبي نتزوج واني راضيه ومش مجبورة يام..
سدينه:ووينه من اللي عمرك قوليلي وينه...ماتحرجيش يابنتي لكن لازم تفيقي وتعرفي ان اللي في عمرك مش حياخد وحده ارمله وعندها ولد...
دانيه شبحت لأختها بضيق..
رتاج:لافي يام من يرضى في..
سدينه:ياخوفي يجيك واحد يضحك عليك وياخد اللي هناك ويلوحك..
دانيه انصدمت في كلام امها..
ورتاج ناضت وهي منفعله تقول؛كيف تقولي يام كيف...بعد هدا كله مازال تشوفي فيا غبيه وينضحك عليا ومانقدرش نحمي ولدي وماله مازال تشوفي ساذجه ومانعرفش نتصرف...
سدينه بثبات وهدوء؛قعمزي..
قعدت تشبحلها رتاج وانفاسها متسارعه من العصبيه..
سدينه؛قلت قعمزي...
تنهدت وقعمزت..
سدينه؛قصدي غير اللي انتي فهمتيه..اني مراة وانتي مراة ونعرفوا بعض كويس...لو مهما كنتي قويه..كليمه حلوة تطلع من لسان معسل تذهبلك شيرتك...وشباب هالوقت فالحين في تعسل الكلام والحركات اللي تذهب الشيرة...مرة يبعت هديه شويه يجيبلك ورد..شويه يبعتلك رساله...يخلي الحديد يلين...
ودانيه تسمع في امها وتتفكر في الشكولاته والورد والكلام اللي يجوها...
سدينه؛مايجيكش من الباب طول لين يطيحك في شباكه بش تبدي خاتم في صبعه بعدين ياخد منك اللي يبيه ويلوحك ع طول يده...اما الراجل الكبير العاقل الرازن اللي ناوي الحلال يجيك طول من الباب...زي مادار الكعبار وغيره قبله وردتيهم...
رتاج بعد عرفت من يكون اسماعيل..قعدت متأمله فيه يجيها في يوم ويطلبها للزواج...
بس كلام امها توا وعاها لو يبيها فعلا ماعنده ليش يتردد..
وهو قبل تراجع عن خطبتها لما عرف انها ارمله..
وتوا ليها معاه سنتين وفوق ماشافت منه اي شي يثبتلها ان عنده نيه للإرتباط بيها...
سدينه؛فهمتي قصدي توا..
هي غمضت وتنهدت وهزت راسها وقالت:سامحيني يام..
سدينه؛معليشي معليشي....
🍁🍁🍁🍁
"عبدالحميد كعبار!!؟"
مليحه وهي تشوف لردة فعل ولدها:ايه اليوم امها هكي قالت..
عبدالرؤوف؛ايه مزبوط كلامه عبدالحميد كعبار سألني عنها كذا مرة..
مليحه؛نجمتها ضاويه ياكبدي مايحدف فيها النصيب كان ع المعبي وخوه..
عبدالرؤوف؛كان خدت عبدالحميد كعبار تاكل طرابلس كلها..من غير شي مشاريعها معبيه البلاد..وكان تاخد مالك نص طرابلس شن دير..
🍁المقصود بملكية نص العاصمه هني اغلب المشاريع والشركات والاشتثمارات الموجوده في طرابلس يملكها رجل الأعمال هدا🍁..
مليحه؛زيد ثبت روحك معاها ياعبدالرؤوف هادي كان زادت تعلت تاخدك معاها...وحتى انت اسماعيل...
اسماعيل اللي كان في قمة الغضب ناض وطلع من حداهم...
مليحه استعباط:خيره هدا؟
عبدالرؤوف:بيني وبينك ملاحظ انه حاط عليها العين..
مليحه؛من هي؟!
عبدالرؤوف؛من هي رتاج....
مليحه؛هدا اللي مازال ولدي اللي ماعنديش غيره ولاد نخليه ياخد ارمله بعيلها...
عبدالرؤوف؛وين المشكله هدا فيه خير لينا كلنا يامليحه..
مليحه؛نستفيدوا منها باهي لكن من بعيد لبعيد ايوه..
عبدالرؤوف؛تصطفلي منك لولدك...
🍁🍁🍁🍁
تاني يوم...
الساعه التاسعه صباحا..
سارة؛ع اساس عازمنا بلاش ع مطعمه...
دانيه بضحكه:شن رايك نمشوله توا..
سارة رفعت حواجبخا وقالت؛تتسهوكي!؟
دانيه؛لا والله ندوي جد متسهفه هلبه نذوق منه حاجه...هما عندهم فطور صباحي ولا بالله عليك خلينا نمشوا نفطروا غادي ونشربوا قهوة متسهفه ع حاجاته..
سارة:شن تبيه يقول عليا انتي!؟
دانيه؛شن بيقول عليك حني بندفعوا فلوس سرورة...
سارة؛مستحيل..
دانيه؛سارة نترجى فيك راهو...
تنهدت سارة بضيق وقعدت ساكته..
دانيه؛انتي من شن خايفه بالزبط؟!
سارة صدمها السؤال ردت بإرتباك وهي تقول:خايفه!؟
دانيه؛هكي حسيتك مش عارفه علاش..
رفعت سارة حاجبها بتحدي وقالت؛ماعندي شي نخاف منه..تعالي..
دانيه؛وين؟
سارة؛مش تبي تفطري غادي..هي تعالي..
ومشت سارة وهي معصبه..
ودانيه ابتسمت ابتسامه الم خفيفه ومشت وراها...
🍁🍁🍁🍁🍁
"ايه توا فتحت تصدق لقيت الناس تراجي فيا"
فاتح وهو في متكي في سريره؛الله يبارك ..
"شكلك مش جاي توا"
فاتح؛روحت من الجامع متأخر وجعان نوم...
"تمام نشوفك الظهر"
فاتح؛ان شاء الله...هي طير..وسكر عليه وغمض عيونه وفيسع غط في نوم عميق...
اما زهير هو واللي يخدموا معاه...
بدوا يجهزوا في الفطور للزباين..
وكان كل شي موجود ع قائمه الفطور ماعدا #قهوة_فاتح
لغوها لانه مش موجود..
وصار شوشره بين الزباين لأنهم كانوا جايين ع خاطرها..
زهير في غرفة المطبخ؛تي ترد ياحصله رد...خلاص هدا مات معاش ينوض بكل...
؛كيف نديروا توا...
زهير؛بنمشيله للحوش وخلاص انتم حاولوا تصبروا الزباين..
؛حاضر..
وطلع زهير يجري من البوابه الخلفيه للمطعم...
ع خشة دانيه وسارة من البوابه الأماميه...
دانيه؛الله يبارك ديكوره فظيع..
سارة؛هي سقديني وبري قعمزي...
دانيه بضحكه؛هدي ياوحش..
مطت سارة شواربها بملل....
ومشوا هما الزوز قعمزوا ع وحده من الطاولات..
وسارة تمرر في نظرها ع المطعم اللي معبي زباين ع الصبح...
🍁🍁🍁🍁
"صباح الخير خالتي نوال"
نوال بإبتسامه؛صباح النور...فاتح في سابع نومه راهو..
زهير؛عارف بالله عليك خليني نخس نوضه الزباين قالبين المطعم ع القهوة متاعه...
نوال بضحكه؛خش...
خش زهير..
ونوال سكرت الباب وهي تقول؛كمل القدام...
مشي زهير وهي وراه....
نوال:هونا داره..
زهير:صحيتي خالتي..
نوال بإبتسامه؛سلمك...ولفت ومشت..
وزهير فتح الباب وخش لقي فاتح غارق في النوم..
جاه وقعد ينوض فيه وهو يهز فيه؛فاتح..
ناض مخلوع وهو يقول:شن في!؟
زهير؛نوض اخدم ع راسك..
فاتح رجع اتكا وقال بصوت ناعس:خيرك دعوتك ع صبح ربي مش قلنا مش جاي تو؟!
زهير؛تي نوض فز تحرك الزباين قالبين الدنيا ع قهوتك يبوها..
فاتح؛قوللهم يجوا العشيه..
زهير:نقوللهم عينك نوض تحرك وماتخسرش الناس تو يقولوا شاف روحه وانغر تحرك...
فاتح غمض عيونه وتأفف...
زهير؛نوض ياراجل بلا تنبله..
فاتح حول الغطا وقاله؛باهي اطلع برا..
زهير؛سقد روحك نراجي فيك برا..
مشي طلع من حداه وسكر الباب..
وفاتح بكسل ناض يبدل حوايجه..
🍁🍁🍁
"بتقعدي تراجي!؟"
دانيه؛ايه مازال الوقت ع اول محاضرة..
تأففت سارة...
دانيه؛لكن والله المطعم خيال وديكوره فضيع..وشوفي الزحمه انتي الفيديو اللي نزله امس اثر في الناس هلبه..
سارة تسمع وساكته ماتبيش تعلق..
من بعيد شويه من ورا الحيط...
زهير:شفت الزحمه..
الزوز قعدوا يمرروا في نظرهم ع الموجودين لين ثبتوا ع سارة ودانيه..
فاتح جمد في مكانه وقلبه قريب قعد يفر..
زهير شبحله بإبتسامه جانبيه وقال؛القهوة دارت مفعولها...
ارتسمت ع وجهه ابتسامه حلوة...وفيسع خش داخل..
ضحك زهير ولحقه...
لحظات...
وبدوا بالنادل"قرسون"
يطلعوا في القهوة مع الفطور للزباين...
وريحتها فاحت في المكان كله...
كانت هي اول حاجه بدوا بيها..
واللي هدا قعد يصور جنب فنجانه واللي يصور وهو يشرب..
واللي يصور في المطعم مع القهوة...
والاكثر اثارة..
هو دخول مشاهير في مواقع التواصل للمطعم بش يشربوا القهوة ويصوروا معاها..
••فاتح:هدا شنو؟
زهير بإبتسامه عريضه؛الله يبارك ويزيد..
فاتح؛الحمد لله..لكن هكي عفسوا فيا..
زهير:علاش شن كنت ناوي دير انت ..
شبح فاتح لسارة اللي كانت تراقب في الوضع..
بعدين تنهد من قلبه وقال؛والله مافي حاجه تمنعني ع اللي ناوي نديره...
ومشي خش داخل..
وزهير لحقه....
🍁دانيه؛من بكري جايين وماجانا شي هدا غير جايبه معاي واسطه..
سارة؛واسطه!
دانيه بضحكه؛ماهو اقارب..
سارة سكتت سارة وهي مستاءة...
ودانيه مركزة ع تعابير وجهها...
"نورتوا وآنستوا"..
وقعد يحط في الحاجات قدامهم..
هي قعدت تشوفله كيف لابس نفس الزي متاع العاملين لكن زاد عليهم نظارات....
شبحلها وابتسم ع جنب..
هي غيرت عيونها عنه وعقدت حواجبها بغضب...
هو ضحك وحط السفرة وجبد كرسي وقعمز بحيث عاطي للناس ظهره..
دانيه انفجعت...وسارة انصدمت..
هو حول نظاراته وقال بإبتسامه؛اسف جدا مجبور ندير هكي..
سارة؛انت ماتتحشمش بكل...
دانيه قعدت تشبحله وتشوف كيف يشبحلها..
ضحك وقال؛عندك حق غلط اللي درته بس الله قصدي من وراه كل خير...سارة....نبي نخطبك..
تعبوا عيون دانيه دموع وشبحت لصاحبتها..
لاحظت ان وجهها اكتسي باللون الاحمر..وبان عليها التوتر.
ومع توتر بان الغضب اللي خوف دانيه...
سارة وعيونها معبيات دموع؛انت صدقت نفسك هلبه وتحساب روحك وصلت لدرجه تتجرأ وتقولي كلام هدا ومتوقع اني حنعطيك الرد اللي تبيه!؟...فيق لروحك فيق لو شن تولي ولوين توصل اني ماتحلمش بيا...خدت حاجتها وناضت وهي تقول بنبرة متهكمه...بعد السيف نعلق منجل...
ومشت...
ودانيه وهي تشوف لردة فعله..
خدت حاجاتها وناضت بسرعه ولحقتها....
وهو قعد يشوف لمكان سارة..ودموعه لمعوا في عيونه وهو مبتسم بألم..
لأن كلامها وجعه..وجعه هلبه...
وصاحبه زهير يشبحله من بعيد وشبه فهم اللي صار...
🍁برا..
دانيه ركبت السيارة مع سارة وقالت؛كلامك جارح هلبه..
سارة ودموعها ينزلوا؛انتي تقولي هكي!؟
دانيه؛علاش شن كنتي متوقعتيني نقول!؟
سارة؛قصدك انتي متوقعه اني ممكن نبدل مجاهد بحد يابال هدا..
دانيه؛اول شي مجاهد الله يرحمه ياسارة حرام اكبر حرام انك توقفي حياتك عليه...تاني شي والصراحه فاجئتني نظرتك ليه بعد هدا كله مازال تشوفيله ع انه انسان ماينفعش ومايسواش..هدا غير حامله كتاب الله ياسارة..
سارة مسحت دموعها وقالت؛اني نكرههم الناس هادم نكرههم يادانيه وانتي تعرفي علاش..مش ساده امه دراه الكبد هادي يزيدها هو..شن هالعيله البارده..
دانيه مش عاجبها كلامها بس فضلت ماتركبش معاها في النقاش وقالت:تحركي تحركي محاضرة البارا بتبدا.
رشفت سارة وقالت؛هكي احسن معاش تكلميني عليهم..
وشغلت السيارة وتحركت...
🍁🍁🍁🍁
مقعمزة في مكتبها تخدم بهدوء..
دق الباب قالت؛تفضل..
انفتح الباب وخش وسكره وراه وهو يقول:استاذة..
رفعت عيونها وشافتله وهي تقول؛نعم..
اسماعيل؛نعطلك ع شي لو كلمتك في موضوع..
حركت راسها بالنفي...
هو قدم وقعمز مقابلها وقال؛مش عارف من وين بنبدا ولاشن بنقول..
ورتاج تشوف في حالة التوتر اللي هو فيها بصمت...
هو بلع ريقه وقال؛مزبوط اللي سمعته عن موضوع عبد الحميد كعبار...
رتاج؛موضوع شني..
اسماعيل؛موضوع الخطبه..
حكت حاجبها بعدين شبكت صوابعها في بعض وحطتهم ع الطاوله وقالت؛اعتقد هدا موضوع شخصي تجاوزت حدودك لما سألتني عنه...
هو شبحلها شويه واستجمع شجاعته في مرة وقال..
"نحبك"...
رفعت حواجبها وهي تشوفله وكلام امها قعد يتردد في عقلها...
《 مايجيكش من الباب طول لين يطيحك في شباكه بش تبدي خاتم في صبعه بعدين ياخد منك اللي يبيه ويلوحك ع طول يده...اما الراجل الكبير العاقل الرازن اللي ناوي الحلال يجيك طول من الباب...》
رتاج؛اطلع برا..
اسماعيل بصدمه؛استاذة فهمتيني غلط اني ناوي الحلال والله يشهد..
رتاج:لو كنت ناوي الحلال بعتت امك لامي ولابوك لبوي...هدا اللي نعرفه اني اما الكلام الفاضي هدا مايمشيش عندي...ولو سمحت اطلع توا..وياريت معاش يكون في بيني وبينك اي تعامل مباشر..
ناض وهو يشوفلها بغضب...
بعدين مشي طلع برا المكتب...
بعد ماسكر الباب رتاج خدت نفس عميق وزفرت بعدين قالت؛هكي احسن...
🍁🍁🍁🍁
في الكليه..
وقت محاضرة علم الامراض..
كانت دانيه مقعمزة في تركينه تخدم ع البحث..
ومنغمسه ع الآخر وماحستش بروحها ان قعدت ساعتين متواصلات عليه لين رن تليفونها ووقضها..
دانيه؛اوو فاتوا ساعتين!...
لمت حاجاتها وناضت ومشت جهة المدرجات..
وين وصلت في الفتحة اللي دخل لهديكا الجهه..
طلع في وجهها...
هي هربت بعيونها ومشت من جهة اليمين هو مشي يمين..
الشايبي؛تس..
هي مشت من اليسار وهو مشي يسار...
الشايبي:اففف..
هي قامت عيونها وشبحتله...
هو فات من قدامها وكأنه مايشوفش فيها..
غمضت عيونها بعدين فتحتهم ومشت وهي تقول بهمس:عليك موقف حقير...لكن باهي تونوريه ع اسكتراده ومعاملته هادي...
تلاقت وهي سارة..
سارة؛خيرك تمتمي..
دانيه؛شي..هي تعالي نمشوا للمكتبه بنكمل خدمتي ع البحث..
سارة؛ايه حتى اني بنقرا...
ومشوا مع بعض للمكتبه...
🍁🍁🍁🍁
"المعامله اساس خدمتنا واني نبهت ع الشي هدا اكثر من مرة يادكتورة لكن حضرتك ماتسمعي لغير مايقولك عقلك..."
:دكتور هيثم الموضوع مش زي ماانت فاهمه..
هيثم:دكتورة دكتورة..هادي مش اول مرة توصلني شكوة منك واني حذرتك قبل مرات ومرات وانتي تحسابي امهالي ليك غض طرف..ياريت معاش تناقشيني اكثر من هكي قراري وخديته وتوا تفضلي..
هي شدت ورقة فصلها بقوة ومشت طلعت من مكتبه.
هيثم وهو يحاول يهدي نفسه؛لااله الا الله...لااله الاالله..
بعدين شاف للساعه قال؛الاجتماع ...
وناض حول بالطوه وعلقه وخدي حاجاته وطلع من المكتب..
🍁الاجتماع كان في وزارة الصحه اللي شدها واحد من اصدقائه القدامى...
لما وصل غادي وتوجه لغرفة الاجتماعات..تلاقى مع سكرتيرة المكتب...
:دكتور تفضل معاي لمكتب معالي الوزير طالب يشوفك..
هيثم؛ان شاء الله خير..
ابتسمت وقعدت ساكته..
وقعدوا يمشوا مع بعض لين وصلوا لمكتب الوزير..
دقت الباب..جاها الاذن بالدخول..
فتحاته وخشوا...
الوزير؛اوووو هيثم الكاتب..
كانت عنده لجين لما شافت هيثم عيونها دمعوا وانحرجت ع الآخر...
لجين؛نستأذن دكتور..
؛تفضلي..
مشت طلعت وهي هاربه..وهيثم.ماباش يركز عليها بس مايحرجهاش..
جاه صاحبه وسلم عليه بحرارة..
؛من لما استلمت الوزارة واني نراجي فهاليوم..
هيثم بإبتسامه؛يعني اللقاء ودي مش لقاء عمل..
:ايه ودي ياصديقي..تفضل قعمز..
قعمز هيثم..وقعمز معاه صاحبه..
تبادلوا اطراف الحديث مع بعض..
بعدين صديقه قال..
:اني نبي تعطيني الخطط اللي كنت ناوي تخدم بيها في الوزارة لان اللي بديته انت وقف لما خليته ومع الاسف قطاع الصحه قاعده يتقدم ببطء شديد..اني عندي رغبه نكمل اللي انت بديته...وماعنديش اي مشكله في نسب كل شي ليك اني همي كله اننا نهضوا بقطاع الصحه ونخلوا الناس معاش تطلع تعالج برا...والطبيب الليبي ياخد.قيمته في بلاده...
▪▪▪▪▪
◇نعرفه كويس شخص وطني وضميره حي...بس طلبه ضايقني لوهله..كيف يبيني نسلم تخطيط سنين طويله كنت متأمل نحوله لحقيقه واقعه...بس لما فكرت اكثر قلت لنفسي يعني شن بنستفيد لو دسيتها اني اصلا علاش درت هالخطط هادي مش باش نرتقي بقطاع الصحه في البلاد..باهي يعني كان اني ماقدرتش ندير هالشي مايديراش غيري...
سألت نفسي وقلت..انت شن تبي بالزبط ياهيثم..تبي تخدم بلادك..ولما تبي الناس تمجدك وديرك بطل...!؟
ردبالك ياهيثم راك تخش تحت خانه المنافقين!...
تلقائيا بعد اللي وصلتله نتيجة هالتفكير رديت
▪▪▪▪▪▪
هيثم؛ماعنديش اي مشكله ومانبيش منك تنسبلي اي شي مش مهم من اللي خطط واللي دار..المهم الهدف من هدا كله..
ابتسم وقال؛زي ماتوقعت..
هيثم؛تفضل عندي في الحوش غادي نزيدوا نهدرزوا في الموضوع..
؛ليش لا...خلاص موعدنا اليوم بعد صلاة العصر...
هيثم؛إن شاء الله..
ناض وقال؛هي تفضل دكتور للأجتماع..
ناض هيثم وقال:تفضل...
ومشوا الزوز مع بعض طلعوا من المكتب وهما يهدرزوا في مواضيع اخرى مختلفه....
🍁🍁🍁🍁
الساعه السادسه والنصف مساءا...
هيثم كان مع ضيفه في المربوعه يتناقشوا في نفس الموضوع..
وفي الحوش...
كان زياد يلعب هو وولدعمته ومعاهم ريحان وجنان...
اما في دار سارة..
فكانت مع عمتها يتكلموا في موضوع مهم...
سارة؛يعني حتى انتي لاحظتي..
نسيبه برفعة حاجب؛لاحظت وماعجبنيش..
سارة بحزن؛غير مني اللي عاجبه ياعمتي بس..اني نبيه ينسى ويحول الفكرة هادي من راسه بس مش عارفه كيف مانقدرش ياعمتي هدا بوي..
نسيبه:ماتغششيش روحك حبيبتي اني تو نتفاهم معاه..
سارة؛انتي فاهمه علينا عمتي..
نسيبه؛-فهمت عليكم بعد ماولى عندي خالد بعيد مانرضى مراة غيري تربيه غير القراب عليه...حناه ولاعمته ولاانتي وخالتي ماجده...
سارة؛بعيد السو عليك ربي يطول في عمرك..
تنهدت.وقالت؛امين...خلاص بنتي الهي بقرايتك وحطي في بطنك بطيخه صيفي..بوك.حيمسح الموضوع هدا من راسه مسح....
🍁وراجت نسيبه لين روح الوزير من الحوش..
مشت طول خشت لخوها في المربوعه...
زياد اللي حس ان في شي غريب سأل وقال؛شن قاعد يصير بالزبط سارة؟
سارة بتوتر؛بعدين تعرف...
حط رجل ع رجل وقال؛بعدين نعرف مش غدوة ولابعده..
هزت سارة راسها وهي في قمة التوتر..
🍁🍁🍁🍁
في مطبخ مطعم ...الفاتح...
زهير؛اللي واقف بينك وبينها راجلها الاول قاعد في قلبها وعقلها..
هو حرقه كلام صاحبه بس حاول يحافظ ع هدوئه..
حط اللي فيده وشبحله وهو يقول:مش هدا بس اللي واقف بيني وبينها..
صاحبه خدي قطعه خس وكلي منها وهو يقول:شن تاني..
فنص فيه وقاله:جد ام الحركه هادي معاش تعاودها..
ضحك زهير وهو ياكل بعدين ربع ايديه وقال:باهي..قول شن في تاني..واقف بينك وبينها..
هو رجع خدي الموس وقعد يقطع في اللحم شرايح وهو يقول:هلبه حاجات..يعني مثلا مستواها التعليمي...مكانتها الاجتماعيه..هلبه حاجات..
صاحبه قال:قصدك ماترضاش تاخد طباخ!؟
تنهد ووقف اللي يدير وهو يقول ويحاول يشرح:مش هدا قصدي...قصدي..ان هي..تس..والله ماك فاهم حاجه لو نشرح من هني لغدوه..
ضحك صاحبه وقال:اللي فهمته ان الحكايه معقده وخاشة بعضها مافيش منها امل..
شبحله ورفع حاجبه وقال:تي في ونص ولو مافيش نجيبه بالسيف...رفع الموس وقال...بالقوة..
ضحك وقال:ايه زيد فكر هكي وكان خديتها تعالى دقهالي هني ..واشر ع ذقنه..
شبحله بإزدراء وبفقى يده اللي في الموس قاله؛نوض..نوض..فز..
صاحبه وهو يضحك خنب قطعة خس تانيه وطلع يجري..
جاي بيحذفه باللي فيده بس انتبه في اخر لحظه..غمض عيونه وفتحهم بعدين قال...استغفر الله العظيم..
ورجع يقطع في اللحم....
🍁🍁🍁🍁
"اسألي"
نسيبه:بس نبي منك اجابة صريحه هيثم...
هيثم عقد حواجبه وقال؛تمام اسألي..
خدت نفس وقالت؛هيثم..انت توا...حاط في بالك فكرة الزواج؟
فاجئه سؤال اخته هلبه وقاللها:شن اللي خلاك تسألي السؤال هدا في حد قايلك حاجه؟
نسيبه؛لا...
هيثم؛شفت حاجه خلاتك تسأليه؟
نسيبه؛بصراحه ايه شفت..وياريت تجاوبني بش نعرف روحي اللي شفته واللي حسيته صح ولااني نتوهم..
هيثم؛علاش تتكلمي معاي بالاسلوب هدا وكاني مداير عمله وتبيني نعترف بيها!؟
نسيبه بشي من الارتباك؛مش قصدي..بس..الموضوع هدا حساس ياهيثم هلبه..
هيثم هز راسه وقال؛حساس...عارفه حساس وخاص...مانبي حد يدوي معاي فيه لو اني مابديتش بالكلام عنه..
نسيبه:نفهم من كلامك ان في منه نفكر فيه...تبي تتزوج...
🍁الكلمه هادي جت في وذان جنان وريحان اللي كانوا يلعبوا تحت روشن المربوعه ويسمعوا في الحديث...
الزوز قلوبهم الصغيرة انوجعت وقعدوا يشبحوا لبعض بصدمه وعيونهم انملت دموع وفاضت..
هيثم؛سكري ع الموضوع هدا نسيبه واطلعي من قدامي..
نسيبه هزت راسها وقالت؛تمام بنسكره بس قبلها بنقول.كلمتين..ماتفكرش في نفسك بس فكر في صغاره اللي مش حيتحملوا يشوفوا مراة تانيه جنب بوهم غير امهم..
وناضت ومشت وطلعت من حداه...
وهو قعد معاها بعيونه وقلبه واجعه من كلامها.الاخير..
ناض ومش طلع من المربوعه خدي جاكيته ومفاتيحه ومشي طلع الحوش..
وهو ماشي لسيارته قابلوه جنان وريحان..
وقف لما شاف دموعهم...
لكن هما هربوا منه وخشوا داخل..
زاد ضايق ومشي طول ركب سيارته وطلع بيها من الحوش..
••داخل..
زياد بعصبيه؛اني مش زهريه ولارجل كرسي في الحوش هدا تكلموا قولوا شن في..
نسيبه ماقدرتش تتكلم..
لكن سارة قالت ودموعها في عيونها؛بابا يبي يتزوج..
هي قالت الكلمه هادي من هني..وجنان وريحان انهاروا بالبكي من هني...
🍁🍁🍁🍁🍁
"مرحبتين مرحبتين انستوا ونورتوا"
هادي مديحه وهي ترحب بضيوفها..
سدينه وبناتها..
ع جية نادر من ورا الحوش بعد.ماكان يفتح في المضخه متاع البير..
وقف في مكانه لما شافهم..
وخر كم خطوه بعدين لف وجري ادرق.ورا الحيط..
بين راسه شويه...
شاف دانيه وهي قايمه في غمرها ولد اختها وابتسامها ع وجهها..
ابتسم وهو يتأمل في اابتسامتها..
وقعد معاها بعيونه لين خشت داخل...
🍁مديحه؛تفضلوا تفضلوا..
سدينه؛يزيد فضلك...
ورفعتهم للصالون...
لقوا الساكته متربعه فيها...
لما شافوها استغربوا..
ومديحه معاش عرفت كيف تعرفهم عليها..
الساكته ابتسمت وقالت:اني الساكته كنت عزوزتها وتوا جايه قاعده مع حفيدي اللي هو ولدها..
هما ابتسمولها ومشوا سلموا عليها..
مديحه في نفسها"ياربي استرها معاي وماتخليهاش تخرب عليا نقتلها بعدين نقتلها..."
مديحه؛تفضلوا استريحوا..
هما قعمزوا..
ورتاج قالت؛تعالى كنعان...
الولد سيب خالته ومشي لحناه...
رتاج بضحكه:ريتوا ريتوا..
مديحه بضحكه؛واخد ع حناه..
خداته سدينه وحطاته في حضنها وهي تقول؛سلم عطيوه ياربي..
عقدت الساكته حواجبها بإستغراب وقالت؛شن سماه هو؟
رتاج بضحكه؛اسمه كنعان لكن امي ماعجبهاش مسمياته عطا الله ع اسم جدي بوها..
الساكته؛عندها الحق عليك اسم...
ضحكت سدينه وقالت؛هادوا بنات هالوقت حتى تسمايتهم لصغارهم عوجه..
الساكته؛مش غير بنات هالوقت..اني عندي حفيدي هدا حتى هو عنده اسمين..امه مسكره ع اسم نادر...واني...
"السلام عليكم"
مديحه"ربي جابك في وقتك كانهدا نضت خنقتها"
كلهم ردوا؛وعليكم السلام...
مشت مليحه لرتاج طول وسلمت عليها...وقعدت تتملق كعادتها ليها ولأمها واختها...
بعد قعمزت هدرزوا شويه..
واكثر الهدرزة كانت بين سدينه والساكته اللي انسجموا مع بعض...
شويه وخشت الضيافه...
لما جت الخدامه عند دانيه قالت مديحه؛فنجانك الذهبي..
خداته دانيه وهي مبتسمه...
والعزوز مركزة....
ع جية التانيه وفي يدها مترد حلويات..
دانيه رفعت يدها وهي مبتسمه تمنعا..
هني فضول الساكته خلاها تسأل:ماتحبيش الحلو شورك..
كلهم شبحوا لدانيه..
وهي بإبتسامه قالت؛اني عندب السكر..
ابتسمت الساكته وقالت؛السكر مايجي كان للناس القنينه واني اولهم..
ضحكوا..
ومديحه ومليحه يضحكوا بالسيف..
دانيه بضحكه؛ربي يحفظك حناي..
الساكته:ياوخيتي سلمها..
ومديحه شبحت لدانيه وقالت؛ماشاء الله عليها ذوق وزين واخلاق وحافظه القرآن..
الساكته بإعجاب؛الله يبارك الله يبارك...
ودانيه بذوب من الخجل..
وامها واختها يشبحولها بإبتسامه...
🍁🍁🍁🍁
"هدا اللي نحكيلك عليه ليا سنين قعدت تبدي فيهم ديما ع نفسك لين تعلقوا بيك وبدوا يشوفوا فيك ملك مقدس ليهم"
هيثم بضيق؛مرات نقول عندهم.حق..حتى اني امي ماتت قبل بوي وماتحملتش فكرة انه ياخد بعدها وفعلا ماخداش لأنه ماكانش اناني.فكر فينا حني بس..
احسان؛مازال قاعد يركب في روحه ذنب ويقول اناني!..وهما شنو مش انانيين..غدوة لما كل حد فيهم ياخد.وجهه ويشوف حياته وتقعد بروحك انت وحيوط هداكا الحوش اللي مايبوش تخشه مراة تانيه غير امهم تعرف وقتها مم الاناني حق...
مسح بيده ع وجهه بعدين قال؛والله محتار ومتشتت ولأول مرة في حياتي نعيش حالة زي هادي..
احسان،مانكش خالي ياصاحبي..
هيثم غمض عيونه وتنهد وهز راسه بإيجاب..
واحسان قعد يشوفله بإبتسامة أسف...
🍁🍁🍁🍁
"هنيه"
شويه وجت الخدامه وهي تقول؛نعم مدام..
مديحه؛وري دانيه الحمام..
:تفضلي..
خدت دانيه ولد اختها ومشت بيه للحمام...
غيرتله وبعدين طلعاته برا وقالت؛اقعد هني شويه وطالعه..
هو قال؛باهي..
خشت للحمام..ومجرد ماسكرت الباب...
عمنا كنعان خدي وجهه...
وهي لحظات..وطلعت من الحمام...
مالقتش الولد..
دانيه؛ياحليلي اني وخلاص وين مشي...
قعدت واقفه شويه...بعدين ساوت شاربتها كويس...
ومشت وقعدت دور عليه بحذر بدون ماتنادي بش ماديريش دوشه..
قعدت تمشي ودور...وتمشي ودور....
لين سمعت صوت واحد يغني في اغنيه الاطفال المشهورة...
"Baby shark"
قربت من الصوت اكثر..
لين وصلت فيها..
لقاته حاط كنعان ع كرسي وهو مقعمز قدامه بروس صوابعه ويغني..وكان عاطيها بالظهر..
كنعان كان منجسم معاه...بس لما شاف خالته ناداها بلغة طفوليه..
"دانيه"..
دانيه بإحراج؛تعالى..
هو ناض وقف ونزل كنعان.اللي مشي يجري لخالته..
دانيه وهي تقيم في ولد اختها ركزت ع طول وعرض الراجل اللي قدامه حساته مألوف..
وممكن لوشافت راسه اللي كانت مدرقاته الطاقيه راهي تأكدت انها تعرفه..
خدت ولد اختها ولفت ومشت..
وهو حس بيها مشت..
التفت نص التفاته وقعد يشوفلها بإبتسامه...
وهي مازال تفكر فيه...فلحظه جابلها الدكتور الشايبي...
وقفت في مكانها والتفتت..
مالقت حد...
دانيه؛لارسمي اني ختشت في جرته دكتور النحس..
وهي ماشيه...
قابلتها فازا فيها ورد.الأوركيد..
قعدت تشبحلها هلبه ع جية مديحه استغربت لما شافتها وين واقفه...
دانيه بإحراج،طلعت ولد اختي من الحمام وخشيت اني طلعت لقيته يدهور..
ضحكت مديحه وقال؛نجيبه ياربي..
دانيه بإبتسامه؛بنسألك ابله مديحه الورد هدا طبيعي؟
مديحه بإبتسامه؛وطازة..عندنا هني مشتل زارعين فيه الاوركيد اني نحبه..
دانيه؛اها..
مديحه؛هي تعالي للعشي..
دانيه هزت راسها ومشت ومديحه وراها....
وكملوا باقي سهريتهم وكانت لطيفه للغايه..
بعدين روحوا..
وهما طالعين كان نادر واقف في روشن داره وبعيونه مع دانيه لين ركبت السيارة وابتسامه حلوة مرسومه ع وجهه..
🍁🍁🍁🍁
اما في حوش هيثم..
روح في الليل متأخر وبرغم تأخره مافي حد سأل عنه..
وهو هني خدي منهم موقف قوي هلبه...
🍀🍀🍀🍀
واستمر موقف المقاطعه هدا بينهم وبين بوهم ايام..
زياد صدماته فكرة زواج بوه..ماقدرش يستوعبها ولاهو قادر يتخيل وجوده مراة تانيه مع بوهم غير امهم...
والتوأم كانوا الأكثر رفضا من خوتهم الكبار..
علاش لأنهم لأول مرة يديروها ويقاطعوا بوهم وهالموقف يعتبر قوي هلبه من اللي في سنهم وهدا اللي خلا هيثم يتأثر ع الآخر...
اما سارة موقفها معروف من زمان...
🍁🍁🍁
"كملته والحمد لله وغدوة تو تشوفي شن ندير فيه الشايبي هدا"
هادي دانيه تكلم في سارة اللي كانت في عالم تاني...
دانيه؛سارة..
ناضت سارة وهي تقول؛بنمشي مشوار ساعه من زمان ...
ومشت بسرعه..ودانيه معاها بعيونها وهي مستغربه قالت:ان شاء الله خير...
🍁🍁🍁🍁
في مكتبها في كلية العلوم السياسيه..
مقعمزة تراجع هي وطالبه عندها ورقة امتحان..
نوال؛شفتي انتي هني شن كاتبه مش هادي الاجابه اللي نبيها...
دق باب المكتب متاعها..
نوال؛تفضل..
انفتح الباب وخشت معيده وقالت؛في وحده جت تسأل عليك تبي تشوفك..
نوال بإستغراب؛ماقالتش من هي..
؛لاقالت....
"سارة الكاتب"
#مشاعر
#البطل_المغمور2
....يتبع....
