البطل_المغمور2 "زهور القمر"
#جمان_فريد
#الجزء_الثالث_والثلاثين "الله يحبك4"
رمضانكم مبارك..
جعلني الله وإياكم فيه من الفائزين...
وافضل مايستقبل به المؤمن هذا الشهر المبارك..
#الإستغفار..
نظفوا قلوبكم..وخشوا ع رمضان بقلوب سليمه....💖
💐💐💐💐 💐💐💐💐💐💐💐💐💐💐💐💐💐
"الملف نسيته في درج السيارة وحضرته رفعها للورشه ومعاش جابها"
اسماعيل:اهدي اهدي استاذة اكيد تو قريب يوصل بيها
رتاج وهي معصبه؛إن شاء الله..
شويه رن تليفونها..
ردت طول وهي تقول؛وينك..وين السيارة؟
"والله يااستاذه حطيتها في الورشه وقالي الراجل ولي بعد ساعتين وليت لقيتها مسكرة"
رتاج شبحت لأسماعيل وقالت:هي تفضل..كيف بنخش للإجتماع توا كيف !؟
اسماعيل:هاتي شويه..
هي مدتله التليفون وقعدت تمشي وتجي في مكانها بعصبيه..
واسماعيل يكلم في السواق..
اسماعيل؛باهي ماتعرفش ارقامهم؟
"لا والله يااستاذ"
رتاج وقفت واشرت ع التليفون وهي تقول؛قوله يدور خدمه تانيه من اللحظه هادي مفصول..
اسماعيل؛استاذة صلي ع النبي..
رتاج بعصبيه؛عليه الصلاه والسلام...هيا كلمه وقلتها واحد مستهتر زيه مانقدرش نأمنه ع نفسي وع عيلتي اسمع امشي للورشه هادي ودبر كيف تجيني السيارة فيها هلبه حاجات مهمه...دبر ياإسماعيل..
ومشت من قدامه بعصبيه..
هو تنهد بضيق...
"كيف يصير فيا ياأستاذ توا اني الخدمه هادي ماحصلتها الابطلوع الروح"
اسماعيل؛انت غير عطيني نعتة مكان الورشه بش نجيك غادي وبعدين يصير خير..
🍁🍁🍁🍁
"تغدا ولدي تغدا"
جهاد وهو مقعمز في الكوجينه يتغدا؛نتغدا يام نتغدا..ايه قولي لمرت خوي توتي خالد العشيه بنرفعه هو وبدر ومعاهم تهاني يغيروا جو..
عفاف بإبتسامه؛ايه والله يبوها تغيرت الجو..
جهاد؛عرفه قرايه كان هدا حتى هو رفعته معانا..
عفاف؛انت قوله وشوفه..
جهاد هز راسه وقعد ساكت
بعدين حط الكاشيك وناض وهويقول:عطيك الصحه يام..
عفاف:صحتين..
جهاد وهو يغسل في ايديه؛سلمك قلبي..بنخش نرقد شويه..
عفاف؛برا ارقد سلم وليدي وارتاح..
ومشي طلع جهاد من الكوجينه..
وعفاف ضم فيها....
ع خشة نسيبه؛خلي عنك عمتي..
وجتها خدت منها الماعين..
عفاف:قال جهاد وتي خالد بعدين بيطلعه هو وولده وتهاني..
نسيبه؛لالا! اني بعدين بنطلع مع زياد ولد خوي..
عفاف:خلاص مالا اطلعوا مع زياد وتو يطلع هو مع تهاني وبدر..
نسيبه ابتسمت وقالت؛تمام...
وبدت تغسل في الماعين..وعفاف مشت طلعت من حداها...
🍁🍁🍁🍁
"بتطلعي ورجليك فوق راسك"
سارة؛قتلك عندي قرايه..
زياد:بتطلعي..
سارة؛بكل انت زياد لحوح ولجوج..
زياد؛وتي روحك بعد العصر نروح من الجامع نرن عليك تطلعي طول
سارة؛انتوا خديتوا عليا ندير ماتبوا حتى لو كنت مش راضيه..
زياد؛معقوله ماتبيش تطلعي معاي!
سارة؛ياودي مش هكي...!باهي خلاص خلاص بعد العصر تلقاني فم الباب..
ابتسم وقرصها من انفها..بعدين مشي..
وهي قعدت تتحسس في انفها وتضحك..
🍁🍁🍁🍁
كيف بدي ياخده النوم...
رن تليفونه..تأفف..واستغفر بعدين خداه وفتح الخط..
جهاد بصوت ناعس؛ايوه................سيارة شني...ناض بنص جسمه وهويقول...ايه ايه تفكرتها جاي جاي...وسكر..
وخبط بيده ع راسه وقال؛راحت من دماغي بكل.
وناض بسرعه بدل حوايجه وطلع مستعجل من الدار....
🍁وبسرعه قطع مسافه ووصل للورشه..
نزل من سيارته ولقي الورشه مفتوحه خشلها..
جاه واحد من اللي يخدموا قال..
؛تغديت ووليت بسرعه لقيتهم يستنوا قدام الورشه..
شبح جهاد لإسماعيل والسواق بعدين مشالهم..
جهاد:السلام عليكم..سامحوني بالله صار معاي ظرف لهيت بيه..
اسماعيل؛مش مشكله..ياريت تخدم عليها بسرعه ورانا شغل مهم
جهاد؛ان شاء الله..
وحول جهاد جاكيته...ومشي للسيارة وبدي يخدم عليها..
واسماعيل والسواق يهدرزوا ع موضوع فصله ويبي من اسماعيل يديرله حل
كلامهم وصل لمسامعه..راجى لين كمل التصليح اللي خدي منه ساعه....
وبعدين جاهم وهو يمسح في ايديه بالفوطه ويقول:وتو تقدروا تاخدوا العروسه..
اسماعيل:المفتاح فيها..
جهاد:ايه...لكن معليشي من غير قصد سمعت في شن كنتوا تحكوا..ان شاء الله ماقطعتش برزقك ياخوي..
السواق:صاحبة العمل فصلتني من الخدمه..
اسماعيل؛تنحل ماتخممش..
السواق؛ماسمعتش بيها قبل لزت حد ورداته...
جهاد؛كان هدا نمشي معاكم توا ونشرحلها الوضع..
اسماعيل؛مافيش داعي..
السواق؛لاخليه يجي معانا استاذ نبيها تعرف ان الغلط مش غلطي..
جهاد؛تمام...خل نمشي نغسل ايديا ونجيكم..
ومشي جهاد..
واسماعيل قال للسواق؛ غير علاش تكبر فيها توا كنت بنتفاهم اني وياها وتنحل الامور..
؛لالا هكي خير ماتقتنعش الا هكي هي..
اسماعيل ؛باهي تفضل قدامي..
مشي السواق للسيارة ووراه اسماعيل..
ركبوا الزوز من القدام...
وشويه وجي جهاد وركب من الخلف...
السواق بعد ماشغل السياره:امورها تمام حتى الصوت معاش في..
جهاد ابتسم وهز راسه..
اسماعيل:هيا تحرك معاش في وقت..
السواق؛هيا هي..
وتحرك طول....
🍁طول الطريق والسواق يهدرز ويفتح في مواضيع..
وجهاد كان منسجم معاه..لكن اسماعيل كان قليل مايشارك..
لين وصلوا للمصنع...
