البطل المغمور (الجزء الثاني) زهور القمر

التاسع والثلاثين

#البطل_المغمور2  "زهور القمر"
#جمان_فريد
#الجزء_التاسع_والثلاثين "بيني وبينك"
رمضانكم مبارك
( الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ ) الرعد-28
💐💐💐💐💐💐💐💐💐💐💐💐💐💐💐💐
في المدرجات مع اختها يتفرجوا ع مباراة اختهم وهما متحمسات ومعجبات بلعبها.
وريحان كانت بلياقه تامه ومرونه تتحرك في الملعب وكإن كرة السله ع ثقلها في يدها ريشه...
والمعجب الخفي في اخر المدرج واقف يتفرج ع لعبها بإعجاب..
هو كان متخفي بش مايعرفه حد لأنه شخصية مشهورة في هالمجال..
وبرغم شهرته واحترافه للعب كان يشوف في ريحان لاعبة مبهرة بالنسبه ليه..
••سارة:تبي رقيه هادي غير نروحوا..
ابتسمت جنان وهي تشوف لأختها كيف تلعب...
شويه وجابلها شريط الذكريات احداث قديمه من الماضي
لما كانت ريحان ماتقدرش تبذل حتى مجهود طبيعي بش ماتتعبش وبقدرة الله وفضله هي توا رياضيه صاحبة بنية قويه وشخصيه اقوى..
🍁🍁🍁🍁🍁
انتهت الندوة وكل الحضور طلعوا..
ودانيه طلعت مع تهاني وهي تهدرز معاها عن سارة..
تهاني؛امس اتصلت بيا منهاره...الحق معاش عرفت من نصدق احساسي ولايبان منها..
دانيه؛لاصدقي احساسك...
تهاني؛باهي علاش دير هكي!؟
"تهاني"
التفتت تهاني لخليل اشرله بيده معنى هيا..
شبحت لدانيه وقالت؛سلامات نتلاقوا غدوة ان شاء الله..
دانيه؛سلام..
ومشت تهاني لخليل وروحوا مع بعض...
اما دانيه مشت لسيارتها...
وهي ماشيه شافت الشايبي واقف ع واحد يهدرز هو وياه..
هو يدوب شبحلها بعدين غير عيونه عنها وقعد لاهي بالهدرزة مع الراجل...
تنهدت وهي مكمله طريقها لسيارتها..
ركبتها وتحركت....وهو قعد بعيونه مع السيارة لين اختفت من قدام عيونه...
🍁🍁🍁🍁
جنان؛تهبلي تهبلي لعبك مش عادي.
ريحان وهي مبتسمه؛جديات جنو..
جنان؛وجد الجديات...ريحونه خاطري نصور اني وياك وبنات الفريق متاعك..
شدتها من يدها وقالت؛تعالي..
ومشت رفعتها للبنات سلموا عليها..
وبعدين بدوا يصوروا مع بعض وياخدوا في السلفيات رياكيشنات ريحان فيها مضحكه وخلت اختها في اغلب الصور تضحك..بعدين قعدت دير زيها..
وختمت التصوير بصورة جماعيه للفريق وهي معاهم..
وسارة هي اللي صورتهم...
🍁🍁🍁🍁
في الطريق..
سارة:بعد نروحوا ارتاحي شويه ماتخشيش دوشي طول بنقرا ع ميه نبيك دوشي بيها..
ريحان؛حاضر..
سارة:وبعد الدوش لقرايتك طول...
ريحان؛حاضر..
سارة:جنان..
شبحتلها..
سارة:خيرك ساكته..
جنان؛لاشي سرحت شويه..
سارة؛وفي شن سرحتي؟!
ريحان شبحت لسارة..
جنان بإرتباك؛عادي يعني سرحت في المدرسه..
سارة؛وشن فيها المدرسه..
ريحان؛شن فيها غير القرايه وهم الابلات..
سارة؛لما نسألك انتي ردي عليا...
سكتت ريحان وهي معصبه..
جنان؛عادي سارة قصدي نفكر في الحصص والابلات والبنات عادي..
سارة هزت راسها بعدين قالت؛مانبيش درقوا عليا شي شن مايصير معاكم تعالوا احكولي طول ماتخلونيش نسمع من برا..
التفتت جنان وشبحت لريحان وريحان تشبحلها...
سارة؛مفهوم!؟
الزوز شبحولها وقالوا؛مفهوم.
هي قعدت تسوق وهي ساكته...
وهما الزوز مضايقين منها..
°°°°°°°°°°
♤زمان كانت ترقالي من سارة ومن اسلوبها وتصرفاتها معانا..اني كنت نعترض مرة مرة بس جنان ديما حاضر وباهي وتسكت..هي كانت تتعامل معانا هكي خوف علينا بس كانت في نفس الوقت تبعد فينا عليها بدال مانحبوها ونحطوا فيها الثقه ونكونوا قراب منها..
خلتنا نحبوها ونخافوا منها ونحطوا مسافات بينا وبينها..
سبحان الله..سارة تشبه بابا..تشبه بابا اكثر مابابا يشبه نفسه...
°°°°°°°°
وصلوا للحوش..
وخشوا....
ومشت سارة طول حولت جلابيتها وشاربتها ومشت توضت وخشت للكوجينه
وقعدت تقرا ع شيشة سبعة لتر في القرآن..
بعد ماكملت صبت وشربت منها ..وصبت لجنان منها ريحان منها في شيش صغار ومشت بيهم لدارهم..
خشت عليهم وقالت..
سارة وهي تحط في الشيش الصغار ع الزيانه؛هادوا اشربوا منهم كملوهم اليوم..وحطت الكبيرة قدام ريحان وقالت؛هادي اغتسلي بيها..
الزوز قالوا؛حاضر...
ومشت طلعت من حداهم..
ريحان؛جيبي الشيشه..
جنان خدت شيشة حدفتها لأختها وهي خدت وحده والزوز بدو يشربوا مع بعضهم....
🍁🍁🍁🍁
الساعه الخامسه عصرا..
دانيه بعد ماصلت العصر كانت ناويه ترقد مرهقه جدا...
بس امها خشت عليها وخربت عليها نيتها في النوم.
سدينه؛البسي حاجه قنينه وانزلي في ضيفه جاياتك؟!
دانيه؛ضيفه!؟
سدينه؛ايه الحاجه الساكته اكيد متفكرتيها..
انصدمت دانيه...
سدينه؛هيا سقدي روحك المراة تراجي...
ومشت طلعت من حداها وسكرت الباب ..
ودانيه مازال واقفه في مكانها ومش مستوعبه اللي سمعاته...
🍁🍁🍁🍁
"زياد عيب عليك الكلام تقول فيه"
زياد؛علاش مافتحتش معاي الموضوع..
فاتح؛الاولى نفتحه مع بوك مش معاك انت..
زياد؛وشن تحساب ماليش راي في موضوع زي هدا ورايي مايكونش مؤثر!؟
فاتح رفع حواجبه وقال:اها يعني انت ليك راي تاني في الموضوع..
زياد تنهد وقال؛لاتاني ولاتالت اني عاتب عليك كيف ماتقوليش..
فاتح؛القصة ومافيها وانت تعرفها موضوع زي هدا بالنسبه لأختك حساس وماكنتش نبي حد يفتحه معاها غير بوك لأنه يعرف كيف يتعامل معاها لو قتلك عليه مرات تتصرف من راسك واني نعرفك...
زياد؛تمام ولو رفضت علاقتنا تتأثر؟!
فاتح شبحله شويه وقال:فتح معاها الموضوع ورفضت!
زياد غير عيونه عنه وهز راسه بإيجاب..
فاتح حس بشعور مؤلم تجمع في صدره ..بس دار روحه شبه متقبل لما قال؛نصيبات وعلاقتي بيك مش حتتأثر حني توا بينا صلة قرابه..
ابتسم زياد وقال؛ربي يعطيك خير منها تستاهل كل خير يافاتح..
ابتسم فاتح مجامله وقاله؛تمام...برا قعمز شويه ونجيبلك القهوة متاعك..
زياد؛تم...
ومشي طلع من حدا وهو عارف ان صاحبه مضايق يعرفه من عيونه حتى لو بين العكس بس مافي يده شي يديره..
🍁🍁🍁🍁
"طلعت امك بش نحكيلك سر مش هلبه الناس اللي يعرفوه"
دانيه بتساؤل؛سر!
الساكته بحسرة؛ايه يابنتي سر عن عطيه ولاقولي كسرة قويه..وليد ولدي كان يبي قريبتي يبيها هلبه وخطبها بعد قيس العام حددوا الفرح..ويوم الفرح هربت مع واحد تاني..
انصدمت دانيه بقوة وهي تسمع للساكته وتشوفلها وقلبها كان يدق بقوة...
الساكته بدموع؛السكر جاه بعد هالخارقه اللي صارت معاه...
فوق ماكان يبيها بنيه صافيه هربت مع واحد تاني وهي ع ذمته وفضحاته وفضحتنا ليلة فرحه...
الكسرة هادي خدت من عمره عشرة سنين ع مابدي ينساها ويفتح قلبه مرة تانيه...
حطت يدها ع يد دانيه وبرجاء قعدت تقول:بنتي...بالله عليك عطيه فرصه وخليك دواه وجبيرته راهو والله يبيك صادق..ولو ع فرق العمر والله ماحتحسي بيه انتي لو تشوفيه في الحوش كيف...اني وين جيت سكنت معاهم...ضحكت وقالت...ماكنت نحسابه هكي كنت نشوف فيه راجل رازن عاقل...لكن بعدين طلع واحد مهبول مايضحك فينا كان هو ...وكل شويه يقول نكته صامته وحني نضحكوا نضحكوا..
دانيه تفكرت النكت اللي قالهالها شدت ضحكتها ودموعها في عيونها..
الساكته:والله ماتحسي بيه...تنهدت وقالت...بنتي بالله عليك وافقي خليني نطلع من هني واني مجبورة خاطر وفرحانه ونمشيله طول نبشره..
دانيه ابتسمت وقالت:عندي شرط...
الساكته؛اشرطي باللي تبيه....
🍁🍁🍁🍁🍁
الساعه العاشرة ليلا..
طلعت من دارها...
خدت نفس عميق...بعدين مشت لدار بوها..
وقفت قدامها...شافت من تحت الضي طالع منها ..
دقت الباب...
"خش"..
تنهدت...وفتحت الباب وخشت وهي تقول:فاضي بابا..
قعدت لاهي بالآيباد وماباش يشبحلها ولايرد عليها..
تنهدت وقالت؛نبي نحكي معاك في موضوع مهم..
قام عيونه وشبحلها بحده بعدين قال:قعمزي..
ورجع يشوف للآيباد..
هي مشت قعمزت قريبه عليه وقالت بعد تنحنت؛اول شي اني اسفه ع اللي صار مني امس..
ماباش يرد عليها..
هي شبحتله شويه بعدين قالت:وبالنسبه للموضوع هداكا..فكرت فيه هلبه من امس لليوم ولقيت ان عندك حق..في النهايه اللي نعرفوه خير من اللي مانعرفوشي..
قام عيونه وشبحلها..
نزلت عيونها وقالت:وليت في كلامي...اني موافقه..
هو ضيق عيونه وهو يشبحلها...
وهي مابتش تقيم عيونها فيه...
رفع حاجبه وقال:تمام اطلعي..
رفعت عيونها وشبحتله لقاته يشوف للآيباد..
تنهدت بعدين ناضت قربتله وطبست باست ع راسه...
وبعدها مشت طلعت من الدار وسكرت الباب ..
هو شبح للباب وقال:عارف في شن تفكري..بنتي مابنغبى فيك..
🍁🍁🍁🍁🍁
تاني يوم...
الساعه العاشرة صباحا..
في مشفى الرازي..
ماشيات الثلاثه مع بعض في واحد من الممرات..
سارة بحسرة؛خسارة فاتني..
تهاني:تعوضيها ان شاء الله..
سارة تنهدت وقالت؛ان شاء الله..
دانيه بإبتسامه وهي حاطه ايديها في جيوب البالطو؛عندي ليكم خبر حلو..
وقفوا وهي وقفت معاهم وضحكت..
سارة؛هيا هاتيه بسرعه نبي نفرح..
دانيه بإبتسامه؛وتوا ارواحكم في عرس قريب..
وهما الزوز متفاجآت قالوا مع بعض؛وافقتي!؟
هي بضحكه قالت:ايه..
الزوز شدو ايديها وهما فرحانات وقالت سارة:هادي الاخبار الحلوة..
تهاني بإبتسامه؛ربي يكمل ع خير..بس احكيلي شن صار من امس لليوم..
تنهدت دانيه بإبتسامه وهي تمرر في نظرها عليهم...
🍁🍁🍁🍁
في مطبخ مطعم الفاتح...
كان فاتح واقف ورا طاوله وهو يزين في تورته ويحاول يركز فيها...بس عقله مش معاه...
يفكر فيها...في رفضها ليه ومش عارف كيف يتصرف...
الاستسلام مش وارد..
بس حس روحه عدم الوسيله...
وقف شغل وقعد يشبح لتورته بنظرات هم وقال من قلبه :يارب ...
فجأة رن تليفونه اللي كان حاطه ع الطاوله..
شاف من المتصل ضم شواربه لداخل بضيق...
بعدين حاول القوانتيات وخدي التليفون وفتح الخط ورد..
فاتح؛السلام عليكم دكتور.
"وعليكم السلام ولدي فاتح كيف حالك"
هز راسه وقاله؛الحمد لله..الحمد لله...شن حالك انت وشن حال العيله..
"الحمد لله الجميع بخير..امورك تمام انت شغلك ماشي كويس"
فاتح "يدير في مقدمات مايبيش يصدمني":ايه كل شي تمام التمام..
"كويس الحمد لله...ولدي فاتح بخصوص الموضوع اللي كلمتني عنه"
فاتح بإبتسامه احباط؛ايه
"حدد موعد تجيب فيه اهلك بنتي مواقفه"
تبدلت ملامح الاحباط للصدمه..وعدم الاستيعاب ..
"فاتح..معاي!؟"
وفاتح مازال يحاول يستوعب اللي سمعه..
"الو..فاتح" استاقظ فاتح وقال؛ايوه..دكتور..معليشي التغطيه هربت ترا عاود شن قلت...
"تمام...قتلك الموضوع صار منه..حدد موعد تجيب فيه العيله سمعتني"
فاتح بعد التليفون وهو يمرر في نظره القدام وع وجهه ابتسامة دهشه وقال؛وافقت...اختفت ابتسامته وقال..يارب كان حلم وقفه خلاص مانوصلش ليوم الفرح بعدين نوض ع نفس المكالمه يقولي فيها الراجل مافيش نصيب...
فنص وشبح للتليفون شاف الشاشه لقاه مازال ع الخط رجع كلمه وقال؛الو .
"تي وينك انت ياولدي وين...قاعد في صحراء !؟  وين المكان اللي مافيشي تغطيه توا!؟"
ضحك فاتح وقال بإرتباك؛الكوجينه متاع المطعم جايه في تركينه نازله شويه التغطيه فيها ضعيفه شويه.
"المهم توا سمعتني ولا نعاود مرة ثالته"
ضحك فاتح وقال؛لا سمعتك سمعتك تمام ع خير ان شاء الله..العشيه جايين بإذن الله..
"العشيه"
فاتح"شكلي عكيت":علاش مش فاضي عندك موضوع هكي!..
"لاماعندي شي...بس خل نشوفها هي ونرد عليك.."
فاتح؛ع راحتكم..امتى ماتبوا حاضر..
"خلاص مانعطلش عليك ربي يقدم اللي فيه الخير ان شاء الله "
فاتح؛إن شاء الله...
"السلام عليكم"
فاتح؛وعليكم السلام...
بعد ماسكر هيثم هو نزل التليفون ورجع يفكر في اللي صار كله بعدين قالت بضحكه؛وافقت والله وافقت...
بعدين تبدلت ضحكته بملامح الاستغراب وقال؛مالا شن يقول زياد امس!؟معقوله بتغير من امس لليوم ولازياد فهم غلط!؟..
سكت وهو يفكر بعدين قال؛لو غيرت رايها من امس لليوم...
وسكت شويه بعدين قال بإبتسامه...مش مهم المهم واقفت..وبعدين ساهل...
ضحك بعدين مشي خدي وقوانتيات تانيات ورجع يشتغل ع التورته وهو بتنهيده؛الحمد لله...
🍁🍁🍁🍁🍁
تهاني:مش ساهله اقنعاتك..
دانيه بضحكه؛شكله تحبه هلبه...
سارة؛عندك زوز عزايز ياويلك..
دانيه؛لا ياحنه تو بنولي دلوعتهم ..
تهاني بضحكه؛ماتتأمليش هلبه..
دانيه:لابنتأمل ياحناتي واثقه في عطايا ربي..
سارة بإبتسامه؛ونعم بالله..
دانيه؛الحمدلله...ايه وانتي شن صار فيك؟
سارة مررت نظرها عليهم وقالت؛غيرت رأيي ووافقت..
هما الزوز شبحولها وهما متفاجآت..
سارة؛شن صار بين يوم وليله.
رفعت حاجبها وقالت؛فكرت فيها كويس وشفت ان هكي خير..
شبحوا لبعض بإستغراب بعدين شبحولها ..
سارة:اسمعوا ماتسألوني عن شي ولاتدخلوا فيا كل وحده تلهى باللي عندها..
دانيه رفعت حواجبها ونزلتهم وقالت؛حياتك وانتي حرة فيها..
وتهاني مابتش تعلق...
سارة؛هي كملوا طريقكم قريب يبدوا...
مشت ومشوا معاها الزوز وهما يفكروا باللي في عقل سارة ياترى على شن ناويه...!؟
🍁🍁🍁🍁
وكملوا يومهم في المستشفى زي العاده..
بس دانيه ختماته ختام حلو....
وهي في مكتب الشايبي وهو يوقع...
كانت تشوفله ومش عارفه كيف بتبدا من الحماس .
هو وقف ع حيله وقال؛تمام..
دانيه؛دكتور..
شبحلها..
ابتسمت وقالت؛تتفكر في الموضوع اللي فتحته معاي قبل...
ملامح وجهه ولت كلها ترقب وقلبه بدي يدق بقوة....
ملامح وجهها وابتسامتها يخبروا فيه بروحهم..
بس هو يبي يسمعها....
دانيه:متفكر ولا..
الشايبي بنفاد صبر؛ياودي ايه متفكر قولي اللي عندك..
ضحكت بعدين قالت؛موافقه...
زي اللي واقف تحت شمس الصيف الساخنه وفجأه ظللاته غيمه ونزلت عليه امطار باردة...
بردت ع قلبه اللي كانت والعه فيه النار من سنين ومعلق لاطايل سمي والارض...
ضم شواربه لداخل وقعد يمصمص فيهم بعدين ابتسم وقالت؛اسمعي ماعنديش وقت..قبل رمضان نبيك عندي...
ضحكت بخجل ومشت طول طلعت من حداه...
وهو قعد مع روحه يفكر في تفاصيل العرس كلها..
بعدين قال بفرحه وهو شاد ع قبضه يده وبصوت عالي:خشي....
خشت هاله...وقالت؛دكتور..
تبدلت ملامح وجهه للغضب وقال؛كيف تخشي هكي !؟
هاله بخوف؛طقيت دكتور والله طقيت وانت قلت خشي..
الشايبي من داخله كان محرج ع الاخر لهدا قاللها بغضب؛اطلعي..
هي مسكينه طلعت بسرعه من الخوف..
هو قعد يفكر شن جابها..بعدين تفكر انه موصيها ع تحاليل تجيبهم..
طلع يجري شافها واقفه في الباب..
هي بإبتسامه عريضه مرتبكه؛توقعتك تذكر علاش جيت..
ومدتله وراق التحاليل..
هو بملامح جديه خدي منها الوراق وخش وسكر في وجهها الباب..
هي مطت شواربها للأسفل بإستياء بعدين قالت؛مابعدك يادانيه..
ومشت من قدام الحجرة....
🍁🍁🍁🍁
في الكوجينه...
واقفه تتفرج ع اختها كيف دير في نوع حلو وهي تقول:واك كيف تعرفي بس..
جنان؛اللي يبي يتعلم يعرف..
ريحان قلبت عيونها وقالت؛ايااه بتبدي بجو سارة..
ضحكت جنان بعدين قالت؛تتوقعي سارة يصير منها مع فاتح؟
ريحان؛تبي الحق مش مطمنه للقلبه متاعها هادي حاسه في وراها ان وربي يستر..
جنان بقلق؛كيف يعني!؟
ريحان؛مش عارفه المهم في شي مش مزبوط..
جنان:والله لودير حاجه غلط بابا ياخد منها موقف هلبه...
ريحان تنهدت وقعدت ساكته...
سمعوا صوت بابا دارها انفتح..
الزوز قالوا لبعض؛اص اص..جت جت..
ع خشتها للكوجينه..
هما الزوز لما شافوا بانت ع وجوهم ملامح الإنبهار...
سارة؛ترا وريني شن درتي
قعدوا يتبعوا فيها بعيونهم وهما يشوفوا في الفستان الانيق اللي لابساته وتسريحه الشعر البسيطه والناعمه كانت جذابه هلبه..
ليهم سنين ماشافوهاش بهالأناقه والجمال....
سارة؛حلو...بعدين شبحت لجنان وقالت؛القهوة اني تو نديرها..
جنان؛حاضر..بس بنقولك طالعه تهبلي الله يبارك..
سارة بإبتسامه؛عيونك اللي يهبلوا جنوني..
ريحان؛طرف لاقوة الا بالله..
سارة؛الفاظك الفاظك شن هدا حتى زياد مايدويش هكي..
ريحان؛ماجيتش كيوت الله غالب شن بديري هي..
جتها وشدت وذنها وقالت؛نقص لسانك احسن ولا..
ريحان بخوف؛اسفه..
وجنان شاده ضحكتها..
فجأة رن جرس الحوش..
سارة؛حطي وشاح ع راسك واطلعي افتحي الباب..
طلقتها وريحان طلعت تجري...
🍁وكانت نسيبه جايه ومعاها ماجده...
••ماجده؛باهي لحقت ع الايام هادي قريب فاتوني حتى هما..خطوبه سارة وخطبة زياد والله ع العراس والزغاريط..
ضحكوا...
سارة بإبتسامه؛شن حاله عمي الأشهب..
ماجده:الحمد لله في خيار الخير راهو اغلب قعادنا غادي دهوير قالي خل نجددوا شهر العسل..
نسيبه؛ايوه حني مجدي ايامك ياعم..
قعدوا يضحكوا..
وماجده بضحكه قالت؛معفنه...
فجأة رن جرس الحوش...
نسيبه؛جو..
ناضت ريحان للروشن وهي تشوف:زياد فتح الباب...خشوا امه واخته ومعاهم خالتي نوارة...وهو خش اخر واحد..
نسيبه؛مراستلنا من غادي شكرا لك..
ضحكت ريحان..
نسيبه؛توا خودي اختك وتوكلوا للدار..
ريحان ؛امتى نكبروا بس..
سارة؛ريحان..
جبدت ريحان جنان ومشوا مع بعض للدار وجنان تضحك..
سارة؛يوم من الايام بنقص لسانها..
نسيبه؛تقصي وذنك تقربيها ولاتفوتي من ركنها تشوفي..
سارة؛زيدي عمتي فسديها عليا..
ع دقة باب الحوش..
ماجده ناضت وهي تقول؛نوضي خشي داخل انتي..نسيبه تعالي معاي...
ناضوا نسيبه وسارة..
وحده مشت للدار والتانيه مع ماجده...
🍁🍁🍁🍁
"والله فرحتلك من قلبي دنوني الحمد لله"
دانيه بإبتسامه؛تسلمي ريتا..تفرحي بكنعانو ان شاء الله..
"رشودي قبل عاد"
دانيه بضحكه:إن شاء الله..
"هاه وع شن اتفقتوا"
دانيه؛امي مسكره من امه بكري شويه العرس قبل رمضان..
"حيي معاش في وقت!"
دانيه؛كله نديروه ان شاء الله..
"باهي ربي يكمل ع خير"
دانيه بإبتسامه؛آمين..نبيك تروحيلي بكري رتاج..
"تو نشوف عبد الحميد"
دانيه؛مادخليش بيك رتاج دبري..
"باهي باهي بإذن الله نروح قريب"
دانيه؛ايوه نبيك تكوني معاي في كل شي حني هكي تعاهدنا رتاج ولانسيتي..
"ايه بتخليني نروحلك بمنطاد"
ضحكت دانيه وقالت؛ياريت..اسمعي رصيدي يصفر مع الليل نعاودلك ونزيدوا نهدرزوا..
••رتاج:تمام اني نو نتصل بيك سلام ..
"سلام.."
وسكرت...
قعمز قدامها عبدالحميد وقال؛شكله في اخبار حلوه..
رتاج بإبتسامه؛دنوني بتتزوج..
عبدالحميد بإبتسامه؛الله يبارك..مني؟
رتاج؛دكتور اسمه عطيه الشايبي جراح مخ واعصاب..
عبدالحميد؛مار عليا الاسم..
رتاج؛اكيد معروف هو..
عبدالحميد هز راسه وقال؛وامتى ناويين ان شاء الله..
رتاج؛قبل رمضان..
عبدالحميد؛معناها تبيلها مرواحه..
رتاج؛اكيد حميدو..
ضحك وقال؛ماتخمميش اهم شي مافيش خطر ع ولي العهد..
ابتسمت رتاج بخطر وهي تقول؛لا..
عبدالحميد شد يدها وقال؛تمام...باهي..مش ناويه ديري شي في موضوع بنتي وخوك..
رتاج؛مانقدر ندير شي اني جسيت نبض رشيد الولد مش في باله الزواج بكل في عقله قرايته وشغله بس وبعدين مازال صغير ع الموضوع هدا وبنتك صغيره كيف خشت جامعه..
عبدالحميد:ok...خطوبه توا والزواج بعدين..
رتاج؛مانقدر نوعدك بشي لكن نقولك نحاول..
عبدالحميد؛ماتلحيش عليه لو مايبيش خلاص...
رتاج؛كان رفض حتاخد مني موقف!
عبدالحميد بضحكه؛شن تقولي انتي رتاج لتوا ماتعرفيش مكانتك عندي..
رتاج؛عارفه بس مرات توجعك بنتك وتاخد موقف ع خاطر..
عبدالحميد؛لا لاتوجعني ولاهم يحزنون مازال العمر قدامها ان شاء الله وتلقى الراجل اللي يناسبها وتناسبه..حطي في راسك انتي برا كل الحسابات..
ابتسمت وقال؛ربي مايحرمني منك حميدو..
عبدالحميد بضحكه؛ولامنك حياتي...
🍁🍁🍁🍁
مقعمزين في الصاله كلهم مع بعض..
ماجده ونسيبه ونواره ونرجس ونوال اللي مرة مرة تشوف للوحة اسيمه اللي جايه مقابلتها..
ع خشة سارة وهي تقول؛السلام عليكم..
نوارة"اهي السفيره عزيزة"؛وعليكم السلام..
جت لنوال وسلمت عليها باليد؛كيف حالك..
نوال دارت روحها عاديه وابتسمت ببرود وصافحتها وهي تقول:الحمد لله...
ونرجس تشوف لسارة وهي شاده روحها بالسيف جتها ومدت يدها وقالت؛كيف حالك..
صافحتها نرجس وقالت:الحمد لله..
طلقتها ومشت لنوارة ومدت يدها:كيف حاله..
نوارة؛واخده دور برد ياحبيبتي واخده دور برد مش عايزة اسلم عليكي عشان ماعديكيش.
نوال ونرجس شدوا ضحكتهم بقوة..
سارة نزلت وقالت؛لاباس عليك..
ومشت قعمزت جنب ماجده وحطت رجل ع رجل..
ونوال تشوفلها...
وعمتها وخالتها مصدومات فيها وفي حركاتها..
نوال؛كيف حالك سارة وشن دايرة في قرايتك..
سارة؛الحمد لله..كل شي تمام والتخرج ع الابواب..
نوال؛بالتوفيق...
سارة؛شكرا..
تنحنحت نوال وقالت؛نخشوا في الموضوع طول...تعرفي سبب زيارتنا اليوم وطبعا بنزيد نفصل في الموضوع...فاتح عنده حوش بس مازال مش مجهزه زي مايبي يبيبله ع اقل 6شهور وخلال هالفترة هو يبي عقد قران..شن رايك؟
سارة:كله تمام بس في تعديل بسيط..
نوارة"جاتك نصيبه يابعيده كتمتي ع نفسي"
ونرجس قعدت رجلها تهز..
نوال؛شن هو؟
سارة؛نبي نقرا سنه اولى تخصص في حوش بوي..
ماجده؛علاش بنتي بتخلي الراجل يراجي عام..
سارة؛نبي اول سنه تخصص تكون هني بش نلتزم لان لو تزوجت من اول عام مش حنكمل...
نوال؛يساعدك فاتح..
سارة؛مااعتقدش...هلبه طبيبات تزوجوا ورجالتهم خلوهم يبطلوا..هلبه مايحبوش نساوينهم يكونوا طبيبات مش عارفه علاش!؟
نرجس؛فاتح مش هكي..
سارة رفعت حواجبها ونزلتهم...
نوارة"يارب امسكني عنها يارب"
نسيبه وهي تحاول ترقع؛حتى البنيه اللي بنخطبوها لزياد قالت اول عام في حوش بوي وبعدين الزواج..هما هكي يبوا يطمنوا ع مستقبلهم..
نوال؛حقها...ع العموم هي بعدين تطلع تقعمز معاه وتقوله شروطها..
وقلب سارة بدي يدق بقوة بس كالعاده تعرف تبين العكس هزت راسها وهي ساكته....
🍁🍁🍁🍁
في المربوعه...
كان زياد مع فاتح مقعمزين داخل...
زياد؛انت امتى تتفق معاه ع موعد قولي قبلها بوقت بش نفضي روحي..
فاتح؛تمام..
فجأة دق باب المربوعه..
فاتح تمالك نفسه بش مايبانش عليه
من برا يبان عادي...
ومن داخل ياما صاير فيه..
زياد؛خشي..
خشت سارة وهي تقول؛السلام عليكم.
فاتح بدون مايشوفلها رد؛وعليكم السلام...
مشت سارة قعمزت مقابلاته..
والزوز عيونهم لوطا...
زياد مرر نظره عليهم بعدين قال؛شويه وجاي...وناض ومشي طلع من المربوعه...
سارة قامت عيونها في فاتح في نفس الوقت اللي قام فيه عيونه فيها...
تنهد من قلبه..
وهي ببرود مصطنع؛امك قالتلي ع موضوع عقد القران والمده متاع سته شهور..ماعنديش مانع بس حنزيد ع المده سته شهور تانيات..
هو وخر بظهره ع ظهر الكنبه وحط يده ع يد الكنبه وقعد يشوفلها بإبتسامه وهو مضيق عيونه وهي مازال تتكلم..
سارة؛اني بنتخصص جراحه وهدا حلمي ومش حنتنازل عنه وحنفرضه عليك ولازم تقبله..
فاتح؛بدون فرض مقبول..
سارة؛الخطوبه حتقعد سنه..
فاتح،عقد القران حيقعد سنه حاضر..
سارة:ماتستغلش السلطه اللي حتكون ليك عليا..
ضحك وقال؛تعجبني مفرداتك..هز راسه وقال...حاضر...حنكون ديمقراطي..
سارة"ياربي لازم نوض"..
فاتح؛وغيره؟!
سارة؛وياريت معاش تضحك هلبه لأن ضحكتك مستفزة..
عقد حواجبه ورسم ع وجهه ملامح التجهم وقال:هكي كويس..
هي قلبت عيونها وناضت ومشت طلعت من حداه..
وهو يضحك عليها..
شويه وخش زياد مالقهاش قاله:هاه تفاهمتوا .
ابتسم فاتح وقال؛تفاهمنا...
🍁🍁🍁🍁🍁
في الطريق...
كانوا التلاته ساكتات..
وهو يشبحلهم..
امه اللي جنبه...
ونوارة ونرجس من الخلف..
فاتح:خيركم مسكتين !؟.
شبحوله وامه قالت:لاعادي ولدي..
فاتح؛باهي هدرزوا قولوا حاجه حسسوني انكم فرحانين...اني توقعت تنفخولي راسي بتفاصيل الخطوبه والبيان وشن بتشروا وشن بديروا وشن بتاخدوا...شن في حاجه مش عاجبتكم..
نوال:لاامي كله عاجبنا وكانك ع التفاصيل ندووا فيها بين بعضنا علاش نوجعولك راسك..
فاتح؛محلاه من وجع راس يام هدرزوا هدرزوا...
التفتت نوال لنرجس ونوارة اللي كانوا مضايقات بعدين قالت نوارة؛انا من رايي يعني لو تخلوا قراية الفاتحه بعد رمضان..
فاتح؛السبوع جاي وربي مازايد عليه ساعه...
نوارة"عيني عليك يابني"
نوال:حاضر حبيبي زي ماتبي..بس البيان نفضل يكون في رمضان...
فاتح:تمام...
🍀🍀🍀🍀
وعدا هاليوم
واليوم اللي بعده كان خطوبه زياد وتهاني..
والدكتور زياد ماباش يجي ويشوف تهاني ويحكي معاها قال كله زايد..
شايفها لين مال من وجهها..
والتفاصيل المهمه متفقين عليها شن بندير ماشي...
وتهاني برغم فرحتها طارتله منه....
🌼على عكس دانيه..
جاها الشايبي ومعاه امه وحناه يتكلموا فيها..
تعرف ع مجيد اللي بان قدامه ملك نازل من السمي..
واعجب جدا بشخصية رشيد ورجاحة عقله اللي فايته سنه..
وطبعا قعمز مع دانيه وهدرز هو وياها وكانت الطف مقابله شرعيه...
مشت كلها ودانيه تضحك...
☘وهدا وين ارتاح بال سدينه واطمن قلبها....
وقلب عفاف حتى هي ع بنتها اللي جاها نصيب يهنيها عليها..
بس قلب هيثم قعد مشغول ع بنته وخايف عليها..
بالذات بعد الحوار اللي صار قبل اسبوع عقد القران..
سارة؛لالا عقد قران في يوم واحد لازياد..
زياد؛علاش!؟
سارة: ع خاطري وخيي انت الاسبوع هدا واني اللي بعده مع بعض لا بالله عليك.
هيثم؛حاضر بابا حاضر انتي الاسبوع هدا وزياد اللي بعده..
زياد وهو يشوف لوجه اخته كيف ولى اصفر:حاضر...
هيثم؛تمام والبيان ان شاء الله في رمضان..
سارة:زياد في رمضان واني ياقبله يابعده لكن في رمضان لا..
هيثم؛حاضر بنتي تو نقول لفاتح ونتفاهموا..
ابتسمت وعيونها تعبوا دموع وقالت:تسلم بابا...
هو غمض عيونه وفتحهم بإبتسامه...
وزياد يشوف لأخته بضيق وقلبه واجعه ع حالها وعقله يفكر كيف بيصير فيها هي وفاتح...؟!
🍁🍁🍁🍁🍁
خشت هي وصاحبتها للفيلا..
سارة؛الله يبارك الحديقه حلوة هلبه..
دانيه يإبتسامه؛تسلمي سرو..
وصلوا الزوز للباب..
دانيه:زيدي فكري سارة..
سارة؛فكرت لين عييت هيا افتحي..
تنهدت دانيه وفتحت الباب..
وسدينه كانت ماشيه مع كنعان للصالون وين سمعت الباب انفتح شافتله...
وبدت ع وجهها ملامح الصدمه وين شافت اللي خشت مع بنتها في الحوش....

#بيني_وبينك
#البطل_المغمور2

.....يتبع....
قصير عارفه ونعتذر شديد الاعتذار ونعوضكم بإذن الله