البطل_المغمور2 "زهور القمر"
#جمان_فريد
#الجزء_الثالث_والثلاثين "الله يحبك2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
كمل القدام...
وصل في الدار اللي هما فيها وقال؛السلام عليكم..
الزوز وين شافوه انصدموا..
مجيد بصدمه؛امتى جيت..
رشيد وهو مبتسم بأسف؛من بكري وسمعته اللي لازم نسمعه..
مقبوله قلبت عيونها بملل وشبحت لمجيد..
ومجيد يشبح لرشيد ويترقب في ردة فعله..
رشيد خشله وقال:اني يابوي ولدك..وانت بوي اللي لما تحتاجيني تلقاني ولو طلبت مني مانردكش..وقتلك ندبرلك فيهم..لكن مانمد يدي ع رزق حد مجاهد رباني صح يابوي...
حط قديمه كيسه فيها فلوس وهو يقول...بعت سيارتي بش جبتهملك ومانيش نادم حتى بعد اللي سمعته...لانك بوي واني ولدك..مش لأني درويش..
مجيد يشبحله ومازال في حالة صدمه..
وهو وخر خطوتين للخلف وقال:سامحني هادي اخر مرة تشوفني فيها...
ولف ومشي بسرعه..
ومجيد ينادي؛رشيد..يارشيد.
ومقبوله خدت كيسة الفلوس وقعمزت وقعدت تعد فيهم...
مجيد بغضب؛لعنة الله ع هالحظ..
مقبوله وهي تعد في الفلوس؛معاش تلعن لايجوز ..المؤمن ليس بالطعان واللعان..
شبحلها لقاها تعد في الفلوس قال؛قداش بالزبط..
مقبوله؛قاعده نعد..
مجيد؛اللي يزيد عندك جيبيه..
مقبوله بتذمر؛الله المستعان لخبطتني..خل نعد بعدين نشوفوا..
هو هز راسه وقال:عدي عدي...
🍁🍁🍁🍁
"هاك اهم تحاليلك"
خدت مريم تحليل الزواج متاعها وهي مبتسمه..
قعمزت امها جنبها وقالت؛الحمد لله ياربي هدا وين تريحت عليك بياخدك الراجل الصح.
مريم بضحكه؛لهالدرجه عاجبك يام!؟
؛من زمان ولما خطبك اول مرة فرحت ع الاخر وانتي قهرتيني لما ردتيه..وسبحانه ربي كاتبلك فيه هو النصيب واهو رده..
مريم تنهدت بإبتسامه وقعدت ساكته..
؛نعزم مرت عمك خديجه...
مريم؛اعزم يام اعزمي خل تحولني من راسها هي وكنتها..
:هدا علاش نبي نعزمها نبيها تعرف ان اللي في عقلها وعقل كنتها وسواس وخترفه هدا اللي ناقص انتي ديري هالعمل وتحطي ع واحد متزوج لا مني ولد عمك المتربي معاك تقول خوك..
خفت ابتسامة مريم وقلبها رجع انقبض مرة تانيه..
مهما تتساوا معاها حياتها وامورها كلها تكون ماشيه..
هالماضي الاسود مصر يكون حاضر ومستقبل..مصر يخليها تعيش حالة خوف وتأنيب ضمير ع امتداد العمر...
🍁🍁🍁🍁
بعد صلاة العشاء.
في المسجد..
هيثم بعد الصلاة ناض بيروح....
لكن الشيخ وقفه لما ناداه..
والشيخ مشاله وهو يقول؛معاش حصلناك بكل..
هيثم بإبتسامه؛مشغوليات ياشيخ والمسؤوليه زادت..
الشيخ؛أعانك الله وقوى ظهرك..
هيثم؛ايه والله ياشيخ كثر من هالدعاء..
الشيخ بإبتسامه:من غير ماتوصي..بالله شن حال خليل
هيثم؛يجاهد في الحبس بين قرايه وبين شوق للحريه..
الشيخ؛ربي يفرج همه...ياريت لو نقدر نحصل فرصه ونزوره لكن هالحبس نظامه شديد..
هيثم؛ايه الحبس هدا ممنوع فيه الزيارة لغير الاقارب بس لو تبي نوصله رقمك وهو يكلمك من غادي..
الشيخ؛ايه وصله وصله..
هيثم؛إن شاء الله..
الشيخ؛مالا مانزيدش نعطلك اكثر من هكي..
هيثم:لاشن تعطلني هادي ع حسابك..
الشيخ بضحكه؛جزاك الله خير وحفظك واعانك وقواك..
هيثم بإبتسامه:اللهم آمين..ربي يحفظك ياشيخ..هي السلام عليكم..
الشيخ:وعليكم السلام ورحمة الله وبركاته..
ومشي طلع من الجامع...وتوجه لسيارته..
وين وصل فيها رن تليفونه..
طلعه وشاف الرقم كان من المستشفى..
رد ع طول؛السلام عليكم...
"دكتور ياريت تجي بسرعه الحاج مبروك تاعب هلبه"
هيثم بخوف واستعجال؛مسافة الطريق..مسافة الطريق..
وركب سيارته بسرعه..
وتحرك طول للمستشفى..
▪▪▪▪▪
◇كنت حريص نخلي الراجل هدا بالذات يزيد يعيش في الدنيا شويه بش يطلع منها بنفس مطمئنه مرتاحه مش مقهورة ومتحسرة...قصته اثرث فيا بقوة والله قعدت فتره وين نفكر فيها...خفت!؟
نكون صريح..ايه خفت هلبه يكون مصيري زي مصيره..مانبيش نقول اني عرفت نربي صغاري..لأن الموضوع مايعتمدش ع التربيه كليا...احيانا يكون مسألة حظ...
▪▪▪▪▪
وقفت ع الروشن بش ترخي الستار..
شافت برا...استغربت وانتابها القلق وين شافت ولدها مقعمز برا بروحه...
طول مشت طلعتله...
ساوت حجابها ومشتله ..
وصلت فيه وقالت؛رشيد..
رشيد اللي كان يشبح في الفراغ ودموعه ينزلوا؛عندك حق يام..
سدينه شبه فهمت عليه..قعمزت جنبه..وقالت؛شن صار؟
رشيد شبحلها وقال؛مش عارف كيف كان داير مجاهد..كيف تحمل..كيف عدى عليه هدا كله وقعد زي ماهو كيف
سدينه ابتسمت بألم ودموعها قعدوا ينزلوا..
رشيد؛مانقدرش والله مانقدر...ان شاء الله غير يسامحني مجاهد..
امه حطت يدها ع ظهره وقعدت تمسح عليك وهي تقول؛معليشي ولدي معليشي...ربك حي وشايف وعارف كل شي وانت اللي عليك درته ماتوجعش قلبك ع شي مايستاهلش..
صح هو بوك..وواجب عليك تبره لكن في حدود ماتقدر ياولدي.. وماتراجي منه شي بش مايصيرش فيك هكي مرة تانيه..
رشيد هز راسه وقعد ساكت وهو يرشف ويمسح في دموعه...
وامه تمسح ع شعره..
هو شبحلها وقال؛هي نوضي خشي داخل يام صقع..
سدينه؛تنوض معاي..
هز راسه وقال؛نايض نايض..
ابتسمت سدينه وناضت وناض معاها ومشوا مع بعض..
سدينه؛شن داير في قرايتك..
رشيد؛شاد بأيديا ورجليا..
سدينه؛نبيك تجب زي دانيه في الشهاده الثانويه ممتاز والاول..
رشيد ضحك وقال؛لكن مش خاش طب راك تنسي..
سدينه؛خش اللي تبيه المهم انجح زي اختك..
ضمها وهو يضحك وخشوا مع بعض للحوش..
🍁🍁🍁🍁
في حوش عم مريم..والد ضرار..
كان عندهم في الحوش هو ومرته وولده جايين يتعشوا..
ايه ماهو ضرار ليه عام محول لحوش بروحه...
وسط هالجمعه...
خديجه امه قالت؛اتصلت مرت خوك تعزم..
؛عزماتك صار..
خديجه؛ايه بعد تفكرت..
؛شن ناسيه اللي صار بيناتكم..
خديجه قعدت ساكته مابتش ترد..
ضرار؛على شن عزماتك يام..
دنيا شبحتله..
خديجه؛فاتحه مريم اخر الاسبوع..
ضرار انصدم...وبان هالشي ع ملامح وجهه اللي تغيرت..
ومرته مركزة عليه..
خديجه؛قالوا اللي خداها عزري..
:ضابط شرطه صاحب معاذ خوها..
خديجه؛باهي طيب فيها..
وضرار ياكل بعصبيه..ومرته تشبحله وخلاص..
فجأة سمعوا ولده يعيط بعصبيه قال؛بري شوفي ولدك تحركي.
بوه وامه انفجعوا من صوته..
ودنيا ناضت وهي تقول؛ماشيه...
مشت وهي تقول بهمس"حقير"
بوه؛خيرك شن جاك..
ضرار؛الولد يعيط وهي مقعمزة تسمسم..
خديجه؛امتى ناض هو مالحقتش تسمعه..
ضرار سيب العشي وناض من غير مايتكلم..
خديجه؛سمع ببنت خوك بتاخد كلب..
:اني نبي نفهم حاجه وحده كان يبيها من قبل علاش ماقالش..
خديجه؛شوره بيحساب وين يروح من السفر يلقاها مكلمه قرايتها بش يخطبها طول..
؛هو خطب قبلها..
خديجه؛ايه صح نسيت...فكرت وقالت...نحس فيه قايل للبنت ان يبيها وهي رداته هدا علاش قالي اخطبيلي وين سافر..
؛خلاص توا هو تزوج ودار عيل وهي بتشوف نصيبها كل يرد باله من حوشه ويريح روحه..
خديجه؛عندك حق تو نتفاهم اني وياه...
:وكان ماباش يسمع منك قوليلي اني نتفاهم معاه...
•••••••••••••
"واضح عليك قريب متت وين سمعت"
ضرار؛اسمعي سكري فمك احسنلك راسي مصدع ومش فايقلك نبي نرقم..
دنيا بإنزعاج؛اني العيشه هادي معاش قادره نتحملها ياضرار معاملتك ليا لاتطاق...
ضرار؛عارفه روحك شن دايره..
دنيا:ولدك ولاعمره عام ومعاها هدا كله وماطابش خاطرك!
ضرار؛لين تشعفي..
دنيا:في شن غلطت قولي هادي حاجات مش في يدي ربك قدر..وبعدين اني توا واخده مانع...
ضرار؛معاش عندي فيك ثقه لو شن ديري يادنيا خلاص..
دنيا بحقد:هدا كله ع خاطر الكلبه بنت عمك...
هو طنشها ورقد وتغطى..
وهي بغضب خشت السرير ورقدت وهي تسحن وتحرق عليه..
🍁🍁🍁🍁
في غرفة العمليات..
كان حاط تركيزه كله في عملية العم مبروك اللي استمرت لأكثر من ساعه...
وهو ناسي تماما انه ماعطاش صغاره في الحوش خبر انه بيتأخر..
••زياد وهو يحاول اخفاء قلقه؛سارة مش هكي..خيرك! اهدي..
سارة وهي تبكي وتفرك في ايديها في بعض من الخوف والتوتر؛قتلك مايديرهاش يازياد مايديرهاش..بابا لما يعطل يقول ونعرف حتى وين يكون وامتى يروح اول مرة يديرها يعطل بدون مايقول..وع تليفونه مايردش..كان مايكون دايخ في مكان ومايندري عليه حد..ولاداخ وهو يسوق...!
ضمت ايديها لبعض بقوة وقالت؛ياربي ارجوك لا مانقدرش نتحمل..
زياد وهو يشوف في اخته وحالها تقطع قلبه عليها واضح ان سارة بدت تعاني من فوبيا الفقد..خوفها المبالغ فيه يقول هكي..
جاها وضمها وهو يقول؛بإذن الله مافيه شي خلاص اهدي..
وسارة تبكي في حضن خوها وهي ترعش..
وهو كل ماله قلبه يوجعه عليها...
زياد؛تعالي معاي تعالي..خداها ومشي بيها للكوجينه..
خش بيها داخل وقعمزها ع كرسي..ومشي صبلها طاسة ميه وقعد يقرا عليها في سورة الفاتحه بصوت مسموع..
وسارة تسمع فيه...بدت تهدي بكي....
بعد مارقي الميه جاها بيها وقال:اشربي..سمي بالله واشربي..
وقعد يشرب فيها شوي شوي...ويبوس ع راسها بش تهدا..
وهدت بعض الشيء وقالت؛اتصل بعمو احسان..
زياد؛حاضر..خودي اشربيها كلها..
خدت منه الطاسه..وهو طلع تليفونه بيتصل بإحسان رن تليفونه..سارة شافتله بلهفه...
وهو رد طول..
زياد؛ايوه فاتح..
غمضت عيونها بإحباط..
زياد؛لا مازال..
"خيره صوتك صايرة حاجه"
زياد شبح لاخته شويه بعدين مش طلع من حداها..
"ايوه زياد..الو"
زياد؛معاك معاك..بوي من طلعة لصلاة العشي في الجامع معاش روح..
"كيف! ماكنتش معاه انت"
زياد:ماكنتش في الحوش من الاساس..
"وين بيكون فهالوقت"
زياد؛والله ماني عارف نكلم فيه من بكري مايردش وكلمت المستشفى مارد عليا حد..المشكله اختي صايرة فيها حاله قريب تهبل..
"حداها انت"
زياد؛ايه حداها..
"اسمع خليك معاها اني شويه وجاي تمام"
وسكر عليه..
زياد تنهد وعاود اتصل مرة تانيه بالمستشفى..
ردوا عليه..
زياد:بالله بنسأل ع الدكتور هيثم الكاتب موجود في المستشفى؟
"ايوه دكتور موجود لكن عنده عمليه توا"
غمض عيونه وتنفس براحه بعدين فتحهم وقال؛بارك الله فيك..
"اي خدمه او استفسار"
زياد؛لا مافيش شكرا...وسكر..
وطول خش لسارة بش يطمنها..
مالقهاش في الكوجينه..
جاها للدار دق عليها كذا مرة ماردتش
من خوفه عليها انجبر يفتح الباب..
لقاها تصلي..
تنهد براحه ومشي قعمز ع سريرها..
لين كملت..
بعد كملت..التفتت شبحتله وهي تقول بلهفه:عرفت حاجه؟
زياد بإبتسامه؛في المستشفى عنده عمليه..
سارة؛وعلاش ماقالش!؟
زياد:اكيد مستعجله..
سارة؛يبعت رساله باهي مايخليناش هكي!
زياد؛اهو الحمد لله اطمنا عليه قولي الحمد لله وسادك حرق اعصاب..
تنهدت وقالت:الحمدلله..خطر عليا ايام زمان مع خدمته معاش يتفكر شي..
ابتسم ابتسامه جانبيه وهو يتفكر في ايام زمان...
فجأة رن تليفونه شافه ورد..
زياد:ايوه.
"افتح الباب"
زياد ناض وهو يقول؛باهي..وسكر..
سارة؛شني!؟
زياد؛فاتح جي ديري قهوة.
عقدت حواجبها وقالت:مش وقت قهوة..
زياد بحده؛سارة...
تأففت بعدين قالت؛باهي..
زياد شبحلها شويه بعدين طلع من حداها..
هي ناضت معصبه حولت الملايه وقالت؛وقت جايانه هدا..
مشت علقت ملايتها وطلعت من الدار...
••••••••••
رفع فنجان القهوة وشرب منه عقد حواجبه بإبتسامه وقال:المهم اطمنتوا عليه..
زياد هز راسه بعدين قال؛الحمد لله..لكن اللي شفته ع اختي اليوم خوفني عليها هلبه..اساسا من لما طلعت واني ملاحظ انها متغيره هلبه مش نفسها سارة اللي نعرفها..بالذات الطبع الحاد اللي جد عليها جديد..تصدق انها عمتي اللي كانت هي وياها خوات مش عمه وبنت خوها معاش تتعامل معاها بكل توا..بنت جيرانا كانت هي وياها راسين في شاشيه زي مايقولوا قطعت علاقتها بيها..اسلوبها مع الناس ولى عدواني حتى معانا حني مش غير الناس...بجديات معاش وليت نعرفها زي زمان..
حط فاتح الفنجان بعد ماكمل القهوة وقاله؛طبيعي جدا بعد اللي صار معاها تولي هكي...قصدي..وحده في يوم فرحتها راجلها يموت لاوهي بعيونها تشوفه كيف مات...يعني لو اني مكانها واللي نحبها...غمض عيونه وهويقول... بعيد وبر بعيد وبر..فتح عيونه وقال...قصدي والله نختش بكل..
زياد عقد حواجبه وقال؛فاهم وعارف وحاس بيها بس نبي نطلعها من حالتها هادي خايفها تستمر معاها وتزيد...
فاتح؛لا ان شاء الله لا...انت توا يجي دورك يازعيم اوقف مع وخيتك وخليك معاها تو انت مش قتلي قبل انها قريبه عليك هلبه وتفهموا ع بعض..خلاص خليك معاها هدرز عليها هلبه..اطلع انت وياها دهواري وغيروا جو..خليها تطلع من الجو اللي هي فيه بش تبدا تنسى وتولي زي ماكانت...
ابتسم زياد وقال؛تمام..ومن غدوة ان شاء الله نبدا..
فاتح بإبتسامه؛ان شاء الله..هي اني خل نوض توا وانت خش لأختك اقعد حداها مرات تبي حاجه..
وناض..
زياد ناض معاه وقال:غدوة يوم كبير..
فاتح وهو يحط في يده ع قلبه ويحول فيها بسرعه وقال بضحكه؛قلبي يدق يدق يدق..
زياد قعد يضحك بعدين قال؛ان شاء الله ع خير ويكون كل شي زي ماتبي..
فاتح بإبتسامه؛إن شاء الله..
🍁وسقد زياد صاحبه..وبعدين خش للحوش وقعد ساهر مع سارة يراجوا في بوهم امتى يروح...
🍁🍁🍁🍁
طلع هيثم من غرفة العمليات..
وكان متوقع انه يلقى حد من صغار المبروك يراجي فيه ع نار..
ماهو طلب منهم يبلغوهم....
لما مالقي حد ماباش يسيء الظن..مشي سأل بش يتأكد..
:اتصلت بالرقم اللي عطيتهولي رد عليا ولده بلغته وسكرت وقعد بعدها يتصل كل شويه يسأل شن صار..
هيثم بحده:كان اتصل بيك ماتردش عليه...
؛حاضر دكتور..
وهيثم وهو معصب مشي متوجه لمكتبه...
خدي تليفونه ومفاتيح وسيارته...وتوجه بعدها خارجا من المستشفى..
لما ركب سيارته شاف لتليفونه..
لقي مكالمات من سارة وزياد..
مكالمات سارة قريب 50..
عقد حواجبه وهو مبتسم قال:حي عليك ياهيثم شن بيخلصك..
اتصل بيها..
مالحقش الخط ينادي الا وفتحت طول وهي تقول..
"شكرا بابا شكرا شكرا جزيلا عزيزي."
هيثم قعد يضحك..
"اضحك بابا اضحك..دوم ان شاء الله"
هيثم بضحكه؛والله يابابا جتني عمليه مستعجله لراجل قصته قصه يابابا لما نروح ان شاء الله نحكيلك..
"باهي رد بالك ع روحك"
هيثم؛تمام...السلام عليكم..
"في حفظ الله..وعليكم السلام"
سكر هيثم..بعدين شغل السيارة وتحرك متوجه للحوش..
•••••••••••••
"وهادي قصة عمكم المبروك"
زياد بغضب:خزي ع الضنوه ع هكي..
سارة؛مش عارفه كيف البشر هادوا يعني معقوله لما وحده تتزوج ودير عيله تنسى بوها وامها!؟
زياد؛لومي ع ولاده مش ع البنات هما في حكم الرجاله والله اعلم شن صاير معاهم...
هيثم؛حتى اني فكرت هكي..
سارة؛لامعليشي بابا مش مبرر بكل مافي شي يخلي الوحده تنسى ماليا الراجل اللي مايبيش اهلها حتى هي مابيشي مفروض..
زياد:مفروض لكن الواقع مش هكي بكل ياسارة..اني في الحبس سمعت قصص عقلك مايستوعبهاش...
هيثم؛فعلا الواقع مختلف هلبه يابنتي..والعالم اللي برا مش زي المحيط متاعنا يابنتي...
سارة شدت ع يد بوها وقالت؛بنكمل عمري نخدم فيك بابا مش مخلياتك..
زياد شبحلها بضيق..
وبوها كذلك ابتسم ابتسامه اخفى بيها ضيقه من كلامها...
🍁تعلق سارة مخيف...ومقيد ليها قبل ليكون لبوها وهدا اللي ضايقه🍁
🍁🍁🍁🍁
وفي حوش الجيران
كان الكل غارق في نوم عميق...
ماعدا هي ضي دارها مفتوح..
سهرت ع قرايتها...وبعد كملت...
ناضت وتت عبايه وشاربه..والحاجات اللي بترفعهم للكليه..
من كتب وشيتات وماإلى ذلك...
بعدين طلعت من الدار...ومشت للحمام وتوضت...
وولت لدارها..
فرشت صلايتها..ولبست مصليتها..
واستقبلت القبله..وبدت تصلي...
صلت ركعتين الشفع..ومن بعدهم الوتر...
وبعد ماكملت صلاتها..حولت المصليه وردتهم لمكانهم هي والصلايه..
ومشت خدت تليفونها..وخشت سريرها..
فتحت ع تطبيق القرآن..وحطت ع سورة الملك وقعدت تقرا...
وبعد ماكلمت قرايتها..تأكدت من المنبه...وبعد تأكدت منه حطاته ع الكمادينو...
وتمددت ع سريرها...وجهت نظرها للسقف..
وكالعاده في كل ليله..
وين تحط راسها ع المخده تخطر عليها المواجع كلها..
ولازم تحظر الدمعه وتشهد عليها الوساده..
غمضت عيونها الجميله...وبدت تستغفر لين غشاها الله بالنوم..ورقدت....
🍁وسارة حتى هي غطت في نوم عميق...
استمر لساعات قبل الفجر وفي اخره....
☄جاها مرسال من عالم الاحلام...
ولاول مرة ماتحلمش بحد من احبابها اللي غابوا ومعاش يرجعوا..
هالمرة شافت حد اختارت تفقده بالحياة وهو موجود..
في حديقه الكليه...في واحد من مظلاتها..
شافت تهاني مقعمزة تقرا...
وفي راجل ماشافتش في حياتها بجماله جميل لدرجة يصعب وصفها..طويل وعريض..واقف زي الحارس ع تهاني..
وسارة تشبحله وكأنها تكلم في حد وتقوله...
"مانوليش لوحده خوها قتل راجلي..."
بعد ماقالت هالجمله...الراجل اللي يحرس في تهاني شبحلها بنظره مخيفه وتقى ع تهاني بإيديها وهو يقول...
"ردي بالك تأذيها.."
وسارة قعدت تشوفله بخوف...
شويه ناضت تهاني..وهو قعد واقف قي مكانه ويشوف لسارة بنفس نظرة الغضب والتحذير...
☄فتحت عيونها ع صوت المؤذن يأذن لصلاة الفجر..
قعدت تسمع فيه وهي تفكر في الحلم...وتبي تفسره بأي طريقه...
🍁🍁🍁
الساعه التاسعه صباحا..
وهي مقعمزة في سيارتها قدام الكليه وتتكلم بالتليفون..
سارة؛ايه ونضت ع آذان الفجر معلمتي..
"سارة والله اعلم انتي ظالمه البنت هادي وهي متأذيه من ظلمك ليها"
تعبوا عيون سارة بالدموع..
"والله اعلم البنيه صالحه وقريبه من الله سبحانه وتعالى وهو المطلع ع حال قلبها وشاف شن فيه من اذى ومارضلهاش بيه..والراجل هدا ممكن يكون اعمالها الصالحه العمل الصالح يدفع الأذى عن صاحبه والله اعلم..
ع العموم البنيه هادي محبوبه عند الله سبحانه وتعالى وحتى انتي نفس الشي ياسارة مانقولش هكي تائليا ع الله اعوذ بالله..بس هادي علامات واضحه ومعروفه..ارجعي عن ظلمك للبنيه هادي ياسارة...راك من اهل الله وخاصته توا مايرضالكش بالاخطاء الكبيره اللي زي هادي بالذات الظلم"
سارة وهي تمسح في دموعها هزت راسها وقالت؛ان شاء الله معلمتي...جزاك الله خير...
🍁🍁🍁🍁
في احدى مدرجات كلية الطب..
دانيه؛كاتب عليها البيت والحروف في الاخير هادم..
سارة:RRy شن هدا؟
دانيه؛تعرفي امس مارقدتش واني نفكر زعما مني..
سارة مررت نظرها ع المدرج وقالت؛زعمه واحد يقرا معانا؟!
دانيه:رتاج تاخد وتقول في نفس الشي واحد يقرا معاك..
ع خشة الدكتور الشايبي للمدرج..
عم الهدوء ...طيح اليبرة ينسمع صوتها..
هو قال؛السلام عليكم..
وهما ردوا عليه....
هو حط حاجاته ورمي الجاكيت متاعه وبيلبس البالطو..
وحده من البنات اللي خلف سارة ودانيه علقت وهي تقول..
قلبي يانا يانا يانا قلبي يانا يانا..
سارة حافظت ع جديتها وملامح وجهها المتجهمه..اساسا مش في بالها ضحك..
لكن دانيه كانت حتضحك خلاص بس شدت روحها بقوة..
الشايبي بعد مادار عرض الدتا شو..
بدي يحاضر..
وكلهم مركزين معاه...
وهو طبيعته في الشرح لغة الجسد متاعه عاليه..
يعني يشرح بالحركات..
وفي وحده ومن الحركات رفع ايديه جنبه افقيا وهويشرح
البنت اللي ورا دانيه وسارة غنت بهمس..
خلوني بنطير طيارة..خلوني زي الفرارة..
سارة عندها قدرة ع التحكم بنفسها..
بس دانيه مع الاسف ماقدرتش..
من كثر ماشدت الضحكه..بكتها بالصوت..
ومن الخوف رجعت شدتها..
القاعه كلها توجهت انظارهم لدانيه..وسارة تشوف للشايبي بخوف ع صاحبتها..
وهو ماعنداش ياامي ارحميني..
الشايبي بغضب:اطلعي برا..
هني دانيه اختفت كل الملامح من وجهها قعد جامد وهي تشوفله..
يعني هي توا ريحت سنه كامله!
مستحيل!
الدموع عبوا عيونها وهي تقول؛دكتور..
غمض عيونه بغضب وقال: اطلعي...
دانيه بدت تبكي وهي تقول؛بالله عليك..
خبط الطاوله وقال بصوت زاجر:قتلك اطلعي..
قعدوا يقولولها الطلبه بأصوات هامسه..
"اطلعي"
وسارة تشوفلها بحزن..
هي لمت حاجاتها ودموعها ينزلوا زي السيل..
ناضت وطلعت من الكرسي ونزلت..
الشايبي؛ردي بالك نشوفك في المحاضرة مرة تانيه...
دانيه حطت يدها ع فمها وطلعت من المدرج وهي تبكي..
قعدت تمشي وتمشي لين لقت روحها في الحديقه..
مشت قعمزت تحت المظله حطت حاجاتها وحطت يدها ع الطاوله وحطت عليها وجهها وقعدت تبكي...
"دانيه خيرك!"
هي وقفت بكي فجأة..رفعت راسها وين شافت اللي كلمها ناضت بسرعه خدت حاجاتها ومشت..
هو لحقها وجي قدامها...
وقال: خيرك دانيه علاش تبكي!؟
دانيه؛انت شني قولي شني..امتى تتحشم ع وجهك راك راجل متزوج بصغارك عيب عليك اللي دير فيه...
جمعه بضيق؛دانيه ارجوك اعطيني فرصه نشرحلك نفسي بالله عليك.
دانيه؛شن بتشرحلي شني!؟ اقطع املك مني اقطعه والله لوتقعد اخر راجل في الدنيا مانشوفلك....حول من طريقي..
جمعه؛خيرك تبكي..
دانيه بعصبيه دفاته بشنطتها ومشت طول...
وهو قعد يلحق فيها بعيونه المغرمات...
🍁بعد وفاة راجح جمعه ماقدرش يسيب جيهان خصوصا ان بوها توفى بعد راجح باربعه شهور...هي خشت في حالة نفسيه وفي وضعها هدا حس انه يولي قليل اصل لو خلاها
قعد معاها لين طلعها من حالتها النفسيه..حملت وهني استاقظ انه رجع انربط بيها من جديد..حاول يحبها ماقدرش بشن بيحبها وقلبه مش معاه..!؟
جابت العيل الاول..مافرحش بيه لأنه تمناه من غيرها..
اللي قعد وراها ويدور عليها لين لقاها في الكليه وقعد يلاحق فيها...لين انجبرت تحرش فيه مرته..
ايه حرشت جيهان...وجيهان قلبت عليه الدنيا ومعاها امه وبوه...ولهالسبب معاش جي لدانيه مرة تانيه الا فهاليوم...🍁
دانيه سيبت سيارتها في الكليه لأنها مش قادره تسوق وركبت تاكسي وروحت...
🍁بعد تمت المحاضرة..
طلعت سارة دور عليها..
مالقتهاش...
اتصلت بيها اكثر من مرة ماردتش..
سارة بضيق؛شكلها روحت...
وقعدت تتمشى وهي مضايقه ع صاحبتها وخايفه عليها يصير فيها شي...
فجأة رن تليفونها...
قاماته وشافت المتصل ردت..
سارة:السلام عليكم زيزو
"وعليكم السلام..شن جو؟"
سارة؛ماشيه الحمد لله..
"فاضيه"
سارة؛ايه علاش..
"جايك توا"
سارة؛علاش صارت حاجه؟
"لايامرعوشه...جاي لأختي نشوفها ونهدرز عليها مايجيش يعني"
ضحكت وقالت؛لايجي ياسيدي..خلاص تعالى نلقاني في الساحه اللي ورا الكليه..
"Okسلام"
سارة؛سلام..
وسكرت....ومشت طول للكافتيريا.
خدت منها كم حاجه حلوة...وطلعت بيهم للساحه...
🍁فهالوقت كانت تهاني مقعمزة في نفس الساحه وباديه تقرا..
قطع عليها قبل لتبدا طالب يقرا معاهم عجباته تهاني ويبيها تكون صاحبته..
:ماتمليش من القرايه!
هي قامت حاجاتها وناضت..
هو شدها من يدها وقال؛-تي غير اقعدي مش واكلك..
هي جبدت يدها بقوة وقعدت تقول:حول يدك حول ..
وهو قاعد شاد عليها بقوة يقول؛مش محول لين تقولي باهي..
تهاني نزلوا دموعها وهي تشوفله بحده؛حول خير مانعيط ونلم عليك الكليه..
؛عيطي ترا عيطي..
ع جية سارة شافت الموقف..وشافت تهاني كيف مش قادره تقاومه ودموعها ينزلوا..
لوحت اللي في يدها ومشتلها تجري.
سارة؛حول يدك من عليها حول..
؛بري اقلبي وجهك انتي..
سارة:قتلك حول خيرك خوي جاي توا وربي لو يشوفك شادها هكي يدير فيك زي مادار في جلال...
:بري ملحي انتي وخوك..
وجي بيجبد تهاني وبيمشي بيها..
سارة ضرباته بشنطتها ع يده بقوة طلقها..
:والله نربي....وقال لفظ نابي..
وسارة شدت تهاني وجت بتهرب هي وياه..
هو وقف قدامهم وقال؛وين ماشيه ياحلوة انتي وياها مافيش وحده متحركه من هني لين نوازي من فيكم تطلع معاي توا في السيارة..
ماحسش الا بيد انهبدت ع قفاها وشدتها بقوة..
زياد؛شن رايك انت اللي تطلع معاي توا للسيارة ونهدرزوا شويه..
سارة بخوف؛زياد رد بالك..
زياد؛عارفني اني منو ولا!! لو كنت جاي جديد اسأل عليا تعرفني..ماعنديش مشكله نقتل الشكالات اللي زيك عندي عادي راهو خريج حبوس اني..
تهاني غلبتها الضحكه لكن شدتها...
؛تي غير صل ع النبي ياخونا ماكنتش نعرف انهم شورك يازعيم...
زياد ؛عيني تشوفك خاطم من ياللاهم ماتلوم الا روحك بعدين..
وطلقه..
هو حط يده ع قفاه وقال؛سامحنا ياطيب..
ومشي طول بسرعه..
زياد قعد معاه بعيونه لين بعد بعدين شبحلهم..
وهو مضيق عيونه قال:هي هادي الساحه اللي تقعمزوا فيها خلي مخلي!
سارة بربكه؛تتعبا بعدين ...
شبح لتهاني وقال؛هذا يناشب فيك انتي؟!
تهاني بتوتر؛ليه فتره لكن اني ماعدلتش عليه..اني ديما نجي هني نقرا اول مرة يجيني هني..
زياد؛خلاص معاش لقيتي وين كليه طويله عريضه مالقتيش فيها مكان هادي تقري فيه وسط الناس..
سارة قعدت تشبح لتهاني لقتها تشوف لزياد ببلاهه مش عارفه شن ترد..
شبح لاخته وقال؛وانتي التانيه تجيها التركينه هادي مرة نقص رجليك..
سارة ابتسمت بخوف وقالت؛حاضر..
غير عيونه لتهاني؛معاش تقعمزي بروحك في تركينه خاليه..ماتخلنيش نقول لخوك يقعمزك في الحوش وتتريحي وتريحي..
وتهاني تفنص فيه بصدمه..
زياد؛تعالوا..
مشي..
وسارة جبدت تهاني من يدها وقعدت تمشي بيها..
تهاني؛خيره خوك..
سارة بضحكه؛انشديه..
تهاني شبحت ليدها لقت سارة شادتها بقوة..
وقفت تهاني وسارة وقفت معاها..
شبحت سارة وين ماتشبح تهاني..
بعدين الزوز شبحوا لبعض.
هما لحظات..وسارة ضمت تهاني وقعدت تبكي..
وتهاني وهي تسمع في صوت بكاها..بكت معاها..
والزوز معاش فكوا بعض..
وزياد يشبحلهم بإمتعاض..
وهما طولوا شويه وهو ماعنداش صبر يخليه يراجي لين يكملوا..
زياد:مطوله حلقة المسامح كريم هني..
الزوز في عز بكاهم ضحكوا..بعدوا عن بعض ..
وسارة وهي تمسح في دموعها قالت بضحكه؛باهي برا هانا لاحقينك..
شبح لتهاني لقاها تمسح في دموعها..
شبحتله غير عيونه طول وشبح القدام وقعد يمشي..
وسارة شدت في يد تهاني وقالت؛هيا بسرعه فكينا منه..
ضحكت تهاني ومشوا الزوز مع بعض..
🍁وقعد زياد معاهم مقعمز في وحده من كراسي المظلات بيتفرج عليهم كيف مقعمزات قدامه يهدرزوا وع وجهه ابتسامه....
وكأنهم كانوا داسين الهدرزة لهاليوم..
🍁🍁🍁🍁
في مستشفى الرازي...
مقعمز في مكتبه قدام اللاب توب..
وهو يفرك في جبهته بأصابعه السبابه والوسطى..
شويه فتح الدرج...وطلع منها طرف شكولاته سودا وكلاه..
دق باب مكتبه وانفتح؛دكتور الشايبي فاضي.
هز راسه بإيجاب...
خشله زميله وقعمز قدامه وهو يقول؛سامع بحفل التكريم اللي منظمينه اليوم.
الشايبي؛امم..
:وتعرف انك من ضمن الشخصيات اللي بيكرموهم..
الشايبي؛وتعرف اني مانحبش جو التكريم والاوسمه والكاميرات والتليفزيون..والخ الخ الخ..
ضحك وقال؛عارف...لكن مبعوت من الدكتور هيثم وهو طلب يشوفك..
تنهد ومسح بيده ه وجهه وقال؛تمام..تو نمشيله..
•••••••
الشايبي:الواجب لما يولي بطوله تستاهل التكريم والاحتفاء معاش يديره حد..
هيثم؛معاك ...بس اني نبيك تشوف للموضوع من منظور تاني..انت تعتبر قدوة لهلبه اطباء كيف باديين يمشوا في طريقهم لما يشوفوك تتكرم حيكون ليهم حافز يديروا اللي دير فيه بش يوصلوا للي وصلتله...
تنهد وقال؛معناها هما مش حيخدموا الا لغرض التكريم..
هيثم؛وين المشكله في النهايه الناس هي المستفيد الاكبر..
ابتسم وهو رافع حواجبه وقال؛عندك قدرة غريبه ع الإقناع..
هيثم ضحك بعدين قال؛توفيق من رب العالمين...معناها نشوفك غادي بعد ساعتين..
هز راسه بإيجاب وهو مبتسم..
🍁🍁🍁🍁
"دانيه دنون"
دانيه هي متغطيه وغامه وجهها ع سريرها؛خلوني بروحي خلوني..
رتاج؛باهي قوليلي خيرك ع الاقل امي مشغوله عليك..
دانيه بإنفعال:لزني الدكتور من المحاضرة تريحتي..وهيا بري اطلعي..
رتاج بضحكه؛الله يجعلها اكبر المصايب..عادي يلزك اليوم المحاضرة الجايه تحضري..
دانيه؛معاش في مرة تانيه..هدا ماعنداش مرة تانيه كان طلعت معاش نولي مرة تانيه حتى للأمتحان...
رتاج؛مالا ع كيفه هو! تو نمشيله ونتفاهم معاه بروحي..
دانيه بنبرة باكيه؛باهي بالله عليك اطلعي خلاص..
رتاج تنهدت بضيق وقالت؛ع راحتك..ومشت طلعت من الدار..
واول ماسكرت رتاج الباب دانيه بدت تبكي...
🍁🍁🍁🍁
فتح باب الحوش وخش..
سمع اصوات هدرزة امه ومرته والزوز يضحكوا..
وين وصل فيهم قال؛السلام عليكم..
عيشه وجيهان؛وعليكم السلام..
جيهان،وين مشيت بعد المدرسه؟
قعمز وهو يقول؛لجهنم..
عيشه؛ووك عليا بعيد السو...
جيهان:نكد.ولدك ياعمتي..
عيشه؛لالا ولدي فكنا من النكد اليوم بالذات مفروض تفرح انت..
جمعه؛وعلاش ان شاء الله!
عيشه؛قوليله جهونه..
هي ابتسمت بمكر وقالت؛حاضر عمتي...شبحتله شويه بعدين قالت؛اني حامل..
غمض عيونه بشده...
عيشه وهي مبتسمه بربكه؛فرحان فرحان..
جيهان بإبتسامه مكر؛ايه باين..هلبه...
وهو يتمنى لو يفتح عيونه ويلقاهم كلهم مختفيين....
لكن للأسف لامفر ياجمعه...
🍁🍁🍁🍁
"يامطيور حول يدك"
نادر بضحكه؛ماكلتك يام لاتقاوم من ع طنجرتها تتاكل..
جاته وضربت ايديه بالساقم وقالت؛امشي اطلع تحرك..
نادر؛زعلتيني ياحاجة راهو معناها مش متغدي معاك..
مديحه؛احسن..
غمز بعينه وقال بتهديد؛نمشي نتغدا عن هديكا راهو..
مديحه؛ديرها وشوف شن يصير فيك..
ضحك وقال؛عندي موضوع توا متغدي برا..
مديحه،هدا علاش قتلي وتي العروسه اللي جاببها من ايطاليا..
نادر؛ايوه عليك نور..لمانروح نزيد نحكيلك...ايه قبل مانطلع اسمعي هادي.. قالك مرة واحد قال لصاحبه اني بنخش نخنب المحل وانت كان شفت شرطي جي قولي شمعه كان زوز قولي شمعتين ..خش هداكا يخنب والتاني اللي يعس شاف سيارة شرطه جايه قعد يغنيله....
Happy birthday to you...
مديحه بضحكه؛اطلع ياتافه اطلع..
قعد يضحك وجي بيمشي وقفاته امه وقالت:بتفتح الدكان العشيه..
نادر؛ايه..علاش..
مديحه؛لاغير ننشد وخلاص..برا برا شوف امورك.
ضحك نص ضحكه بعدين مشي..
وهي تنهدت وقال؛ربي يفتحها في وجهك ولدي..
🍁🍁🍁🍁
رن جرس الحوش..
مشت وهي تقول؛هيا هي هاني جايه..
وصلت فيه وفتحت الباب وهي تقول.
:اللهم صل ع نبي..خش وليدي خش.
خش الشايبي وهو مبتسم.
؛حويته ع وليدي حويته...بوي بوي ماخليت من بوي حاجه الزين الطله الهيبه..الطول...العرض هو هو سبحانك ياربي..وقعدت تلف عليه وهي تقول..حويته ع ولدي حويته..
الشايبي:بس بنقولك ياامي كلمه حويته ماتجوزش..قولي الله يبارك..
هي بضحكه؛حاضر ياشيخ عطيه..
هو ابتسم وخدي يدها وباسها بعدين قال:دعواتك ياغاليه..
:ديما ندعيلك وليدي ان شاء الله ديمه مفتوحه قدامك ياعطيه ياولد رافع...
🍁🍁🍁🍁
في احد.الفنادق الشهيرة في العاصمه..
في قاعة الاحتفالات...كان في عدد لاباس بيه من الحضور وهيثم منهم ومعاه مجموعه من الدكاترة اللي يخدموا معاه..وع راسهم الشايبي.
بدي الاحتفال...
وجي وقت التكريم..
الدكتورة المقدمه؛الشخص اللي حنادوا عليه توا دار شي قليل جدا من داره ف العالم... الدكتور هدا يمشي للناس اللي عارف ان حالتهم ماتسمحش انهم يتعالجوا في المستشفيات بسبب كبر مصاريف العلاج بالذات لوكان في عمليه يمشيلهم لحياشهم..يفحص المريض ويتكفل بعلاجه من الالف الي الياء..وغير عن هكي هو عنده عياده مخصص فيها ايام مجانيه...وهلبه ناس بسببه خدت فرصة تانيه للحياة..
بدت القاعه تصفق ماعدا الشخص الي يتكلموا عليه..
؛فليتفضل مشكورا الدكتور عطية رافع الشايبي..
ابتسم هيثم وهو يشوفله..
وهو ناض ومشي وع وجهه ملامح ابتسامه جاده..
ركب ع الستيج..كرموه بدرع مكتوب عليه اسمه ...
والقاعه يصدح فيها اصوات التصفيق..
مشي وقف ورا الطاوله اللي عليها المايك بيتكلم..
الشايبي؛مشكورين جدا....كل من دار هالمبادره مشكور برغم اني صراحة مش محبي التكريم ع الواجبات لإني نشوف اللي ندير فيه واجب مش بطوله ولاحاجه زايده..هو هكي الطبيب وهدا هو الطب مهنه ساميه ديما الطبيب لازم يدير فوق المطلوب منه..لان مهنتنا مهنه عطاء مش اخد..عطاء بسخاء مش عطية بخيل...وقليل من يفهم الشي هدا...
ورجع التصفيق صدح القاعه..
هو هز راسه وقال؛شكرا..
ع جية واحد من الدكاتره وقفه وقال:لحظه دكتور لحظه في لغز يخصك نبي تحله اليوم.
ابتسم يإستغراب وقال؛لغز شنو!؟
:انت عطيه رافع الشايبي..ولانادر..
ضحك وقال؛سر خطير هدا ع فكرة..
ضحكوا شويه بعدين قال؛اني من الناس اللي ربي عطاهم اسمين..في الكتيب عطيه..وفي العيله...نادر..
؛وانت شن تحب ينادوك..
"الشايبي"
ضحكوا اللي في القاعه..
وهو مرر عليهم نظره بإبتسامه وحياهم بحركة الراس بعدين مشي نزل من الستيج..
ومن وراء الشاشات.
مديحه؛ع اساس الشايبي خير من عطيه!
مليحه؛افرحي بولدك يادعوه ياسرك نكد..وخيتي محلاه ياربي دكتورنا..
اسماعيل بضحكه؛ياريت الناس يعرفوا نادر اللي في العيله شن شكله..
مديحه؛-قسما بالله خفت يزلق ويقول نكته..
ضحكوا..
اسماعيل بضحكه؛لا ولدك هدا يعرف كيف يتحكم في روحه مسيطر وبقوه وماشي بالمقوله اللي تقول..لكل مقام مقال..
#الله_يحبك
#البطل_المغمور2
...يتبع...
