البطل المغمور (الجزء الثاني) زهور القمر

تابع

#البطل_المغمور2  "زهور القمر"
#جمان_فريد
#الجزء_الرابع_والثلاثين "مشاعر"
رمضانكم مبارك..
قال رسول الله صلى الله عليه وسلم(ايعجز احدكم ان يكسب في اليوم الف حسنة؟فسألة سائل من جلسائه:
كيف يكسب احدنا الف حسنه؟..قال:يسبح مئة تسبيحه فيكتب له الف حسنة او يحط عنه ألف خطيئة)
صحيح مسلم..
💐💐💐💐💐💐💐💐💐💐💐💐💐💐💐💐
"قوليلها تراجي شويه لين نكمل مراجعه للطالبه"
:حاضر استاذه..
وطلعت المعيده وسكرت الباب ومشت لسارة وقالت..
:عندها طالبه تراجع هي وياها في ورقة الامتحان بعد تكمل خشيلها..
سارة هزت راسها بإيجاب وهي ساكته...
المعيده مشت...
وسارة قعدت واقفه تستنى..
بعد حوالي خمسة دقايق بالضبط..
انفتح باب مكتب نوال..
كانت طالعه هي والطالبه..
نوال بإبتسامه؛موقفه ان شاء الله..
:شكرا استاذه...مشت الطالبه..
ونوال شبحت لسارة بإبتسامه جاده وقالت؛تفضلي..
سارة رفعت حاجبها وجتها وخشت..
ونوال خشت بعدها وسكرت الباب..
لقت سارة مقعمزة ع الكرسي وحاط رجل ع رجل وحده من رجليها تهز فيهم..
هي دارت روحها عاديه ومشت قعمزت ورا مكتبها وقالت؛شن تحبي تشربي..
سارة؛لاشكرا مش جايه نضايف اني عندي كلمتين جايه نقولهم ونتوكل ع حالي..
نوال:امم واضح انك مستعجله..تمام خشي في الموضوع ..
سارة حكت مقدمة انفها ومطت شواربها لداخل بعدين قالت:تعرفي..بابا بعد وفاة ماما ولى عنده فراغ كبير والفراغ هدا حس روحه توا محتاج يعبيه بأي شي..اي شي..المهم المكان اللي خلاته ماما يتعبى بأي طريقه وهو في قرارة نفسه عارف انه مستحيل يتعبى لأن ماما الله يرحمها مالهاش زي...
ضحكت نوال بتعجب وقالت؛مافهمتش يعني اني شن علاقتي بهدا كله..
سارة؛ليك انتي اكبر علاقه..
نوال؛بردو مافهمتش..
سارة؛اممم..يعني انتي تبيها فقش..تمام..بحركة اليد قالت..بطلي تحومي حوالين بابا تمام...حوليه من راسك والحركات اللي ديرله فيها بش طيحيه في شباكك ولت مفهومه وواضحه للكل مش غير ليا اني بس ونحب نبشرك انك مش حتوصلي لشي..وابتسمت بمكر..
نوال وهي مضيقه عيونها ومبتسمه قالت:غريب...
بدت تخفت ابتسامة سارة..
رفعت نوال حواجبها وقالت:اللي يسمعك وانتي تتكلمي عن امك يستغربك..كيف ماجبتها منها شي..
سارة نظرات عيونها الحاده غرقوا بالدموع..
نوال:اللي نعرفه عن امك انها كانت زي البلسم لسانها طيب ومايطلعش منها كان الطيب عمرها لاآذت ولاجرحت حد..ولاعمرها تعاملت مع حد بقلة ادب وذوق..
شدت سارة ع قبضة يدها بقوه...
نوال؛انتي قبل قلتي ان امك رباتك وعلماتك وان هي القدوة متاعك واني مش شايفه انك جبتي منها شي..
سارة وهي تاشر عليها بسبابتها؛ماتجبيش سيرة امي ع لسانك ولاتتكلمي عنها امي اكبر من ان وحده زيك انت تقيم تربيتها لصغارها...
نوال؛وهي اكبر من انك تكوني بنتها..انتي بنت بوك نفس الهجوم والحده والعنجهيه والكبر...شفتي كيف نشوف لبوك واحد بالمواصفات هادي مافيش مراة تنشدله ولاتفكر فيه...ونطمنك زياده اني توا عايشه لصغاري واحفادي والامور اللي في عقلك خليتها للصغيرين مش ليا اني..وبوك نفسه  قاعد يجري ع راحتكم وشاقي بيكم ومايفكر في شي الدنيا الا فيكم انتم والكل عارف هالشي والكل شايفه ماعداك انتي..
تصدقي..حتى هو اكبر من انه يكون بوك..وولدي اكبر من انه يحبك..انتي ماتستاهليشي..ماتستاهليش انسان نظيف من داخل قلبه لربه وطيب بكل مافيه..عكسك انت اللي برغم انك حامله لكتاب الله ومتدينه قلبك من داخل مليان شوائب ومش نظيف ومعبي كبر...
سارة معاش قدرت تتحمل ناضت ووقفت قدامها وهي تشوفلها بنظرة حاقده الدموع مغرقتهم وقالت بغضب؛تعرفي لو بابا يعرف اني جيتك...ولدك حيعرف باللي حاولتي بإستماته درقيه توا..وشبحتلها من فوق لتحت
بعدين مشت طلعت من المكتب وسكرت وراها الباب بقوة
نوال انتفضت من قوة الخبطه ودموعها نزلوا...
🍁اما سارة وهي ماشيه بغضب..
دموعها غلبوها وهي مازال تسمع في كلام نوال يتردد ع مسامعها...
《 نوال؛انتي قبل قلتي ان امك رباتك وعلماتك وان هي القدوة متاعك واني مش شايفه انك جبتي منها شي..
سارة ؛ماتجبيش سيرة امي ع لسانك ولاتتكلمي عنها امي اكبر من ان وحده زيك انت تقيم تربيتها لصغارها...
نوال؛وهي اكبر من انك تكوني بنتها..》
غلبها البكي..حطت يدها ع فمها بش تمنع صوتها انه يطلع..
بعدين نزلتها وهي شاده بكاها وهاربه عن انظار الناس..
لين وصلت في سيارتها ركبتها..
وبدت تبكي..
🍁🍁🍁🍁
"حقه هدا تظلموه لو توقفوا بينه وبين حقه"
تنهد زياد وقال؛عارف..حتى اني لما قعدت مع روحي وفكرت بيني وبين نفسي لقيت ان الحق معاه في الاخير حيقعد بروحه يبي معاه رفيق وونس..
فاتح؛هو هدا....اليوم لما تروح برا كب ع راسه وقوله سامحني يابوي واني معاك في كل شي ديره..
تنهد زياد وقال؛هوهدا...هدا علاش جيت لسارة توا نبي نتفاهم معاها فهالموضوع..رافضاته بشدة..
فاتح بإبتسامه؛طبيعي البنت من حبها لبوها تغير عليه هلبه..
زياد؛هلبه وسكتت..مابعد الراجل اللي بياخدها اختي هادي..
فاتح"قول ياحظه ربي يعلي حظي ويخليها نصيبي"
زياد قعد يدور بعيونه ويقول؛وينها هي بس..
فاتح بضحكه؛من هي!؟
زياد شبحله وقال؛من يعني اختي!
فاتح غمزله وقال؛متأكد..
زياد؛ياسر منه الجو اللي دير فيه..
فاتح وهو يضحك؛تي اني عارف ياقفل درق عليا ع اي اساس..
زياد؛دير روحك ماتعرفش تمام...
فاتح بضحكه؛باهي..وغمض عيونه..
زياد؛تافه..
فاتح فتح عيونه وقعد يضحك...
بعدين هدا ضحك وسكتوا هما الزوز .
وزياد يدور بعيونه ع تهاني..
وفاتح سرحان يفكر بعدين قال؛بنقولك..
زياد؛قول..
فاتح؛في واحد نعرفه اقترح عليا اقتراح بناخد رايك فيه..
زياد؛اللي هو؟
فاتح؛اقترح عليا نقرا فن الطبخ برا...
زياد شبحله وركز معاه..
فاتح:قالي في فرنسا موجود احسن المدارس غادي وفي نهاية المطاف ناخد شهاده...
زياد؛قداش سنه..
فاتح؛من سنتين لأربعه..
زياد؛انت تبي..
فاتح؛لما اقترح عليا الفكره هادي تحمست الحق..
ابتسم زياد وقال؛استخير وتوكل ع الله..
فاتح؛هكي تقول انت؟
زياد؛ايه..انت لو احترفت حتى تولي شيف ع مستوى شيف بمعنى الكلمه عن دراسه  مش مجرد لقب وخلاص..
فاتح بإبتسامه؛عندك حق..
زياد؛حتى اني نفكر بعد نتخرج نطلع لكندا ونكمل قراية غادي زي بوي..
فاتح؛حلو..
زياد؛الحاجات هادي تزيد الثقة بالنفس ياصاحبي..تصدق اني لتوا قاعد نشوف لنظرات الناس ليا فيها شك واستنكار صعب يتقبلوا..في من ناس ماتعرفنيش الا باللي صار معاي وبعدين يقولوا ولد هيثم الكاتب..لين بديت نتجنب الاختلاط بأي حد بش مانسمعش كلمه تجرحني في بوي...راجل عاش عمره صاحب سمعه نظيفه واسم يبرق برق جيت اني وشوهت هدا كله...
فاتح:قتلك قبل وخليل الله يذكره بالخير قالك نفس الكلام ماتخليش الفكرة هادي تسيطر عليك..
ابتسم زياد ابتسامه جانبيه وهز راسه وهو ساكت..
بعدين رجع يشوف حواليه..شاف سارة مع صاحبتها يمشوا بسرعه..
زياد؛الباين عندها محاضرة..
فاتح ابتسم بعدين قال؛مفروض عطيتها علم بجيتك..
زياد شبحله وقال؛نوليلها حتى بعدين وخلاص..
فاتح ناض وقال: مال هيا..
زياد وهو يمرر في نظره حواليه قال:هيا..
ومشوا مع بعض طلعوا من الكليه...
🍁🍁🍁🍁
الساعه الواحده ظهرا..
في المسجد متاع المنطقه اللي يعيش فيها هيثم الكاتب...
كان هيثم موجود فيه بش يصلي الظهر ولغرض تاني بيديره بعض الصلاة..
بعد تحية المسجد...وقراءة ماتسير من كتاب الله..
اذن المؤذن لصلاة الظهر...ناض صلى النافله...
وبعدها بلحظات اقيمت الصلاة....
وهو يصلي كان يجاهد في نفسه بش يخشع في صلاته ومايفكرش في مشاكله وهمومه...
لين فترة حاس روحه معاش يقيم في الصلاة متاعه وهدا اللي زاد تعبه...
تمت الصلاة....وبعدها صلى النافله...وبدي المسجد يفضى حواليه...
هو بشي من التردد مشي للشيخ وقعمز قدامه...
هيثم؛السلام عليكم..
الشيخ؛وعليك السلام ورحمة الله وبركاته...شن حالك يادكتور..
تنهد وقال؛الحمد لله ع كل حال...
الشيخ؛لا واضح انك معبي كلام وجاي بيطلعه..
هيثم بضيق؛هي استشارة نبيها منك ياشيخ...
الشيخ بإنتباه:احكي نسمع فيك وان شاء الله نقدر ننفعك...
🍁🍁🍁🍁
"متوقع يانوال"
نوال ببكي؛عارفه ياثريا ومن البدايه قتلك اني مش متأمله شي اني وياه مقطوع الامل من قصتنا من لما عرفت ان ولدي يحب بنته..واليوم زدت تأكدت لما شفت نظرات الكره في عيون البنت...بس تعرفي ياثريا رغم كل شي فرحانه.
وابتسمت بين دموعها..
ثريا بإبتسامه حزن؛بعد عرفتي ان شعورك مش من طرف واحد..
مسحت دموعها وهي مبتسمه وقالت؛مش مصدقه اني خديت في قلبه مكان قلبه المليان زحمه...صغاره عيلته مرته الاولى...اني خديت مكان بين هدا كلهم..في قلب راجل زي هيثم..راجل مافيش زيه...الراجل اللي تمنيت لو عرفته من زمان ...تمنيت لو بوي ماضحاش بيا وخلاني نعيش سني...نقرا ونطلع الثانوي بمجموع قوي ونخش لكلية الطب حلم حياتي من طفولتي ونعرفه ويعرفني..متأكده ان كنت حنحبه وهو يحبني...متأكده اني حنكون مره وام صغاره...حنكمل عمري واني نحبه كل يوم اكثر من اللي قبله زي ماقاعد يصير معاي توا...بس لله في كل شي حكمه عقولها صعب تفهمها وتوصلها....
ثريا بنظرات اسف وحزن:باهي وتوا شن حديري...
نوال قعدت تشبح لثريا بألم ودموعها ينهمروا ع خديها...
🍁🍁🍁
"لو انت راغبها وفي نفسك ليها شي تقدم طول ياولدي"
هيثم بضيق؛مانبداش ظالم لصغاري..
الشيخ؛بالعكس انت حدير فيهم خير بالذات البنات الصغار محتاجين لأم انت بروحك صعب ديرلهم كل شي..
هيثم قعد ساكت وهو يفكر...
الشيخ؛لو حسيت نفسك ماتقدرش ابعد..ابعد..ابعد...ولاتقع في المحظور ياإبني الشيطان ليه خطوات يستدرج بيها ماحد يعرف من وين تفتح..
هيثم شبحله شويه بعدين هز راسه بإيجاب...
🍁🍁🍁🍁🍁
نهاية الدوام...
طلعوا الزوز مع بعض بإتجاه سياراتهم..
دانيه؛سلام..
سارة؛سلام...
وكل وحده فيهم مشت لسيارتها...
سارة وقفت قدام سيارتها لما شافت ورده من نوع محبب ليها موجوده ع مساحة السيارة..
خدتها وقعدت تشوفلها...زهرة الغاردينيا...
قعدت تتأمل فيها وقلبها بادي يدق بقوة....
🌼اما دانيه..
فتحت باب الخلفي للسيارة بتحط اللاب توب متاعها..
بس تفاجئت...لما شافت باقة اوركيده..فوقها بوكس صغير متاع هدايا..وجنبه ظرف لونه وردي..
قامت عيونها وشاف لسارة لقتها قاعده نادتها:سارة..
سارة استاقظت وشبحتلها..
اشرتلها دانيه تجي..
هي طول مشتلها...
وصل فيها وقالت؛خيرك؟
دانيه:تعالي شوفي!..
قربت سارة وشافت داخل المقعد الخلفي وقالت:طلعيهم ترا..
دانيه طلعتهم وحطتهم فوق السيارة..
بعدين خدت الظرف وفتحاته...وبدت تقرا...
(يازهرة الأوركيد..يامن طيبتي الجروح الغائرة..
ياقويه...ياصبورة اهزمي نفسا كانت بطبعها جائرة...)
R.R.y...
سارة:ترا هاتي نقراه تاني..
مدتلها دانيه الورقه..خدتها وقعدت تقرا فيها..
وهي شافت للبوكس..خداته وفتحاته لقت في وسطه بروش ع هيئة اوركيديا...
سارة:ياقويه ياصبورة اهزمي نفسا كانت بطبعها جائرة...تعرفي هدا واحد يعرفك كويس..معقوله يكون جمعه..
دانيه؛تس..مش هكي هداكا مش ليه بكل...شوفي ش جاب هالمرة...
مدت البوكس لساره..خداته وشافاته..
سارة بإنبهار؛يجنن...
دانيه؛يعني منو اللي يدير هكي ولشن يبي يوصل.؟
سارة شبحتلها وقالت؛شوفي اني شن لقيت مساحة السيارة..
دانيه:غاردينيا...!
سارة؛تعرفي نبي نلوحها لكن مش هاينه عليا..
دانيه؛نفسك...شن ذنبه الورد...بس هادي كيف ندير فيها..
سارة:دسيها وماتستعمليهاش وخلاص..
دانيه خدت منها البوكس والورقه..وقالت..R.R.y....
سارة:هادي الحروف ادل ع اسمه..الاول والثاني واللقب هكي نقول...ومادام كاتبهم بالرموز معناها شخص تعرفيه بإسمه كامل..
دانيه؛طبيعي لو مايبنيش نعرفه مش حيكتب اسمه..
سارة؛وهدا يبيك تعرفيه....بس مش ع طول..
دانيه سكتت وهي تفكر..
وسارة قالت؛عطلت بنروح شن مايصير معاك جديد خبريني..ومشت...
دانيه هزت راسها واشرتلها بيدها تحيي فيها..
بعدين شبحت للحاجات..تنهدت وردتهم لمكانهم..
وركبت السيارة وتحركت..وسارة تحركت بعدها والزوز طلعوا من الكليه...
🍁🍁🍁🍁🍁
وعدا باقي اليوم...
وسارة حابسه روحها في دارها ع اساس تقرا وهي هاربه من بوها وخايفه لو يوصله شي عن لقائها بنوال...
وزياد قعد هداكا اليوم في الحوش يراجي في مرواحه بش يهدرز عليه...
لكن...
هيثم ماروحش للحوش هديكا الليله الا بعد مارقدوا كلهم..
كان وكأنه هارب منهم وخايف يواجههم...
وعقله ياخد ويرفع في الموضوع اللي أرق تفكيره...
🍁نفسه الموضوع..
اللي يفكروا فيه الساكته ومديحه وخلاهم لأول مرة يتفقوا ع شي..
الساكته؛لالا اني مش خاشه في شي بنخليه كله عليك انتي بش بعدين مانقعديش تنوحي وتقولي كله منك..
مديحه:الله لايجيب نواح وفاولي بالخير..المهم توا خليني نشوف وضع البنت ونفتح معاها هي الموضوع ونشوفها كان وافقت نكلمه...
الساكته؛بتحكيلها اللي صار قبل..
مديحه:مال شنو هادي حاجه ماتدرقش كان ماعرفتش مني بتعرف من برا..وبالمرة نبيها تتفهمه...
تنهدت الساكته وقالت؛اني البنيه خشت خاطري وان شاء الله خير..
مديحه وهي تفكر:ان شاء الله..
ع خشته عليهم...
وين شافهم مقعمزات مع بعض..قعد يفتح في عيونه ويسكر فيهم اكثر من مرة...
مديحه؛خيرك اللطف !
نادر ضحك بدهشه وقال:هادي يام...حداك امي ولا اني بديت نهلوس..
الساكته ناضت وهي تتكا ع عكوزها قالت؛وصلني لداري..
هو ضحك تاني وقال؛هي تعالي ياملكه...وشدها من ذراعها..والتفت لأمه وقال:جايك ياسلطانه..
ضحكت امه نص ضحكه...
نادر بإبتسامة تعجب؛ياهادي...
الساكته؛طلعت تدوي هلبه...
نادر بضحكه؛هاه خلاص سكتنا...
ومشوا مع بعض للدار....
🍁🍁🍁🍁🍁
ودانيه فهالوقت..
سهرانه في دارها...تدرب ع شرح البحث وتعاود...
لقبل الفجر بساعتين...رقدت..وناضت ع اذان الفجر..
صلت..وولت تراجع في البحث..
لين جي موعد مشيها للكليه...
🍁اما عند سارة صاحبتها...
لما ناضوا الفجر مالقوش بوهم في الحوش..
وزياد وين مشي للجامع يصلي فيه مالقاشي...
••سارة بقلق:اني متأكده اني سمعته امس وهو خاش للحوش..
ريحان بحزن؛اني شفته وهو طالع من الحمام امس في الليل..
جنان ودموعها في عيونها:بابا معاش يبي يقعد معانا..
شبحولهم زياد وسارة بحزن..
زياد طبس عليهم وضمهم الزوز وقال:لاياعمري..غير هو شكله مشغول في الخدمه...
وسارة مشت وخلتهم ودموعها ع خدها.....
🍁🍁🍁🍁
الساعه الحادية عشر صباحا..
في الكليه..
قدام المدرج...
سارة؛بإذن الله حتفوزي في التحدي وتحضري الامتحان..
دانيه؛خيرك سارة مش عاجبتيني اليوم..
ابتسمت سارة وهي تحاول تخفي حزنها وقالت؛مافيا شي عادي...
ع جية الشايبي...
سارة؛اهو جي..ومشت خشت بسرعه..
وشويه من الطلاب اللي كانوا واقفين برا وراها..
وقعدت دانيه..
هو وقف وشبحلها وقال؛صباح الخير..
دانيه غصب عنها حست بالرهبه نظراته الصارمه كانت ترهب فيها ردت وهي تقول؛صباح الخير دكتور..
الشايبي؛جبتي البحث؟
دانيه؛ايه...
هو خش.وقاللها؛خشي...
هي قالت همسا؛لاحول ولاقوة الا بالله..وخشت وراه....
وسكرت باب المدرج...
🌼قعدت واقفه قدام الباب..
والطلبه يشبحولها وع راسهم تهاني وسارة..
وهو وقف ورا الطاوله وقال؛صباح الخير..
كلهم ردوا باصوات متقطعه؛صباح الخير..صباح النور..
الشايبي؛زميلتكم ليها فتره مطرودة من المحاضرات.. الحت عليا انها تولي  بعد ماتأسفت ع اللي داراته..واني وافقت لكن ع شرط كلكم تعرفوه...دير بحث وتناقشه قدامي هني..
وحده من الطالبات مقعمزة ورا تهاني قالت بهمس؛مسكينه تلقيها حطت جهدها كله في البحث وفي الاخير مش حيخليها تخش الامتحان..
تهاني شبحت لدانيه بضيق ووجعتها البنت واضح خايفه...
وسارة كانت في نفسها تدعي..
"ياملين الحديد ويامسهل الشديد سهل امرها يارب"
الشايبي شبحلها وقال؛تفضلي..
دانيه خدت نفس وقدمت...
وهو مشي قعمز ع واحد من الكراسي في المدرج...
دانيه طلعت لاب توبها وبدت تجهز في العرض...
وطول الوقت همسا كانت تحوقل...
بعدين قالت في نفسها"حتغلبيه لما تكوني اقوى منه يادانيه ماتخليشي يربكك...يامستعان يارب"..
خدت نفس ومررت نظرها ع مدرج بثقه بعدين قالت؛بسم الله..والصلاة والسلام ع رسول الله...
وبدت دانيه تشرح في البحث...
وهو حاول بنظراته اللي تخوف فيها انه يربكها بس تجاهلاته..
واستمرت في الشرح...وزملائها منبهرين بيها..
وتهاني اعجبت بيها..
وسارة اعجبت بيها لحد الغيره..وتأكدت انها مش حتقدر تفوت دانيه لو مهما دارت..حتقعد دانيه هي الاولى وهي بعدها..
اما الشايبي اللي كان صاير في قلبه حاله..
حاول يهزمها..لما يخش عليها بأسئله مفاجئه كانت تجاوب عليها اجابه نموذجيه..كانت وكأنها عارفه انه حيسألها...
هي من داخل صح كانت خايفه..بس خوفها كان دافع ايجابي ليها...
وهي تتحرك وتتكلم..كانت تجي عليها اشعه الشمس اللي خاشة من الروشن...
وتعكس ع عيونها الزرق...وهو يشوف فيهم وقلبه يدق يدق يدق بقوة....
وفي داخله يردد...
يازهرة الاوركيد...
يامن سكنت القلب والشريان منا والوريد
هيا انفثي عطرك فينا وابعثينا من جديد..
يازهرة الاوركيد
ياقيثارة القلب الودود..
هيا ابعثي صوتك مرسول السلام بالهدايا والورود..
يازهرة الاوركيد هيا زيني احلامنا بالزنبق..
ولوني ايامنا بلون خديك النقي...
فوجهك الصبوح من اشراقة الصبح الوليد يستقي..
ولمعة العينين فيها بهجة مع ابتسامة اليقين تلتقي..
يازهرة الاوركيد..
يانبع حب سرمدي سلسبيل ..
بالسحر والآلهام والنشوى يسيل..
حققت فينا المستحيل...
🌼دانيه؛وهدا كان بحث الموضوع اللي طلبته دكتور...
كلهم قعدوا يشبحوله ويراجو في ردة فعله..
وهي اكثر منهم وقلبها يدق بقوة من الخوف...
تنهد...وناض...نزل من المدرج ومشي وهو يقول؛حولي جهازك...
هي بخوف قالت؛حاضر..
وقعدت تحول في حاجاتها وتحط فيهم في الشناطي..
وبعد كملت قعدت واقفه تشوفله وهي تراجي فيه يقول حاجه...
مش هي بس كل من فالمدرج..
هو شبح لساعته وقال؛وقت المحاضرة تم..
خدي شنطته...ومشي بيطلع..
ودانيه قريب يغمى عليها...
وسارة وتهاني قعدوا يشوفوله بخوف...
هو وصل في الباب فتحه....
وقال؛تقدري تخشي الامتحان..
ومشي طلع...
هي حطت يدها ع وجهها وقالت من قلبها؛الحمد لله يارب...
واللي في المدرج كلهم فرحولها..
وسارة نزلت تجري وضمتها وهي تقول؛مش قتلك عارفاتك قدها..
دانيه بإبتسامه فرح؛الحمد لله...
وقعدوا زملائها يباركولها...
وهي تمرر في نظرها عليهم وترد..
جو عيونها في عيون تهاني..
ابتسمت تهاني لدانيه..ودانيه ردت عليها بإبتسامه...
🍁🍁🍁🍁
وفي مكان تاني...
قدام مقر حزب الوطن...
كان نوال طالعه بتتوجه لمبنى رئاسة الحكومه...
فجأه وقفت...لما شافاته واقف قدامها...
انصدمت..وعيونها تعبوا دموع...
هو بإبتسامه من ورا نظاراته وهو يشوفلها قال:جيت في وقت مش مناسب...
هي حست روحها حتنهار...بس تماسكت بقوة..
ابتسمت وقالت بشي من الارتباك؛لا عادي...مش مستعجله...يعني مش شي مهم..
قدم كم خطوة وقال؛كيف الحال؟
نوال؛الحمد لله...كيف حالك انت..
هيثم؛الحمد لله....نقدر نسألك وين كنتي بتمشي..
نوال؛مشوار لمقر رئاسة الحكومه..
هيثم عقد حواجبه وقال؛ان شاء الله خير...
نوال بإبتسامه؛خير بإذن الله..اختاروني بش نكون الملحق الثقافي للسفارة الليبيه في بريطانيا واني بعد تفكير وافقت..
هيثم قعد ساكت وهو يشوفلها..
وهي شاده دموعها بالسيف وهي تشوفلها...
كانت عارفه علاش جاي...واضح جدا...
وهي تجاوب فيه كان قلبها من داخل يتقطع...
هو مط شواربه لداخل ومرر نظره ع المكان...
بلع ريقه بعدين ابتسم وقال:كويس...
هي ابتسمت بالسيف..
هيثم شبحلها وقال:مسافرة يعني..
هزت راسها وهي ساكته .
هيثم تنهد وقال؛باهي..ربي يفتح عليك ويوفقك...اني نستأذن...
نوال؛اذنك معاك وشكرا ع الزياره..
هز راسه.وابتسم ابتسامه فيها مسحة حزن بعدين لف ومشي لسيارته..
وهي معاه بعيونها...لين ركب سيارته وتحرك...
هي لفت وخشت للمقر بسرعه...لين وصلت في مكتبها فتحاته وخشت...وسكرت الباب وحطت يدها ع فمها وقعدت تبكي بحرقه..وقلبها موجوع ع الآخر...
🍁ومااقساه الحب اللي من غير امل🍁
🍁🍁🍁🍁
الساعه الرابعه عصرا...
مقعمزين كلهم في الصالون يهدرزوا...
دانيه بضحكه؛توا شن ماتطلبوا مني ندير..
رتاج بضحكه؛رقدي معاك كنعان اسبوع..
دانيه؛وهو في احلي من الطلب..
سدينه بإبتسامه:واني في عندي طلب.
دانيه:امر ياقلبي..
سدينه؛في موضوع جاك.. اختفت ضحكة دانيه..
سدينه:اسمعيني قبل...هو دكتور...ولد مديحه...
رتاج؛مديحه اخت مليحه..
سدينه:ايه..وسماه نادر....قالت عنده عياده ودكتور معروف..
رتاج؛شن اسمه كامل..
سدينه،والله مانشدتها...بس هاه بنقولك راهو خاش الاربعين وعنده السكر..
دانيه ابتسمت بألم؛مواصفات الراجل اللي يمشي مع وحده زي حالتي..ارمله ومريضة سكر..
رتاج؛بخت الارامل هدا...ياتاخدي ياتخلي...
سدينه،ريحي روحك انتي وياها مافي حد غاصبكم ع شي تبوا باهي ماتبوش قعمزوا...
دانيه:ردي معروف يام..
سدينه:عارفاته غير قلت نسألك الاول..
سكتوا شويه بعدين قالت دانيه؛رشيد وين؟
سدينه؛روح من الخدمه مشي طول لمتاع الانجليزي هدا ومنه للجامع..
رتاج؛كان تشوفوه اليوم كان يفاوض في الشركاء ياه يام...راجل بمعنى الكلمه قوة شخصيته ماريتهاش ع مجاهد الله يرحمه..
دانيه بإبتسامه؛ربي يحفظه وخيي..
سدينه؛يارب ويكفيه كل من فيه شر بما شاء وكيفما شاء..
الزوز قالوا؛آمين...
🍁🍁🍁🍁
"شن تقولي ماما!؟"
نوال؛هكي احسن بنتي..
نرجس ودموعها في عيونها؛علاش احسن..
نوال؛طموحي بنتي وانتي تعرفيه مانقدرش نوقفه..
نرجس؛طموح شني!؟ فاتح تكلم قول شي..
فاتح تنهد وقال؛شن بنقول جي في صالحي اللي بديره..
الزوز شبحولها بإستغراب..
فاتح؛نويت نسافر لفرنسا ونقرا غادي في مجال خدمتي...
نرجس؛حتى انت!؟
نوال بإبتسامه؛حلو..
ابتسم فاتح..
نوال:هكي نقعدوا جيران المشي والجي مش حيكون صعب ..
فاتح:بنقعدي عند اسيد...
نوال:اكيد..
نرجس:واني ماحد فكر فيا بكل..!؟
نوال؛حني مش مهاجرين بنتي ..
فاتح؛وامتى تبي تجي اني نبعت نجيبك..
نرجس بدت تبكي..
ناضت نوال وقعمزت جنبها وضمتها وهي تقول؛معاك راجلك وبناتك عيلتك وخالي الاشهب ومرته ماجده مش بروحك...
شد فاتح يدها وقال؛اربعه سنين ان شاء الله يفوتوا بسرعه...
نرجس ببكي؛ساهله ع الفم يافاتح..
امها زادت ضمتها...هو قعد يطبطب ع يدها..
🍁🍁🍁🍁
وفي حوش الكاتب...
كانوا زياد وسارة مقعمزين في الصالون...
زياد لاهي بتليفونه..وسارة تقرا...
والبنات الصغار في الكوجينه يتغدوا...
فجأه...
انفتح باب الحوش...
وخش هيثم..
سارة وزياد سيبوا اللي في يدهم وقعدوا يراجو فيه يبات عليهم...
بان عليهم وهو يقول ؛السلام عليكم...وحط شنطته ع رخامة البار ومشي للكوجينه..
زياد وسارة وهما يتبعوا فيه بعيونهم؛وعليكم السلام..
خش ع التوأم..
والزوز وقفوا ماكله وهما يشبحوله .
مشي خدي طاسه ووقف ع اللاوندينو يغسل فيها بش بيشرب ميه..
وعيون صغاره عليه..
وهو يغسل سرح بتفكيره....
《 اختاروني بش نكون الملحق الثقافي للسفارة الليبيه في بريطانيا واني بعد تفكير وافقت..》
ضغط بقوة ع الطاسه وهو يغسل...انكسرت في يده...
وفتحتها...
هو طول قام يده وهو يتوجع بدون صوت..
سارة لما شافاته عيطت وهي تقول:بابا 
ومشت تجري وزياد لحقها...
خواتها انفجعوا وهما يشوفوا في يد بوهم تنزف..
سارة جاته وقالت ودموعها ينزلوا؛مادير شي ماتمس شي...
شويه وجايه...ومشت تجري..
جنان وريحان بخوف وعيونهم يدمعوا:بابا..
هيثم وجعه قلبه عليهم وقال:مافي شي بابا مافي شي..تعالوا تعالوا..
جوه هما الزوز ضمهم بيده السليمه..
وزياد يشبحله...
ع جية سارة تجري بالاسعافات..قعدت تسعف في يد بوها ودموعها ينزلوا .
وهو يشوفلها كيف ترعش وتبكي..بعدين شبح لبناته كيف يضموا فيه بقوة ...
سارة كملت وقالت؛زياد ارفعه المستشفى بسرعه..
وزياد حاوط بوه من كتافه وقال؛هي تعال معاي..
هيثم مشي معاه بدون مايتكلم كان مضايق هلبه..
واكثر شي مضايقه هو شعوره بالذنب اتجاه صغاره..
ع تعلقهم الشديد بيه وع تفكيره هو في نفسه وسعادته ضارب بمشاعرهم عرض الحائط....
🍁🍁🍁🍁
في مستشفى الرازي..
مريم بعد ماخيطت الجرح قالت؛لاباس دكتور...
هيثم؛لايوريك باس بنتي...شن حالك انتي..
ابتسمت وهي تقول؛الحمد لله..
هز راسه وقال؛الحمد لله...الحمد لله...
وناض طلع من حداها...لقي زياد يستنى فيه فم الباب...
هيثم؛هيا..ومشي ..وزياد مشي معاه...
طلعت مريم من الحجرة وهي تشوفلهم..
فجأه رن تليفونها طلعاته من جيب البالطو شافت المتصل ابتسمت وردت؛افندي.....بعدين ضحكت ومشت من الجهة التانيه تكمل مكالمتها مع سبب سعادتها الحالي..داوود....
🍁🍁🍁🍁
خش هيثم للحوش مع زياد...
تلقوه بناته وهما يحضنوا فيه..
ضحك وقال؛والله مافيا حاجه يابابا..سارة هدي خواتك ماتزيديش تخويفهم ..
سارة بعدت وهي تمسح في دموعها قالت؛خلاص يابنات خلو بابا يخش يرتاح..
الزوز بعدوا وقالوا؛حاضر..
هو ابتسم وطبس باس رووسهم بعدين مسح دموعهم وقال:بنخش نرقد نوضوني لما يذن المغرب..
سارة؛حاضر...
ومشي هيثم بإتجاه ممر الديار...
سارة؛بروا اقروا قرايتكم انتم بسرعه..
ريحان؛بابا كويس مافيه شي ولا؟
زياد مسح ع شعرها وقال؛ايه كويس حبيبتي بري انتي وجنان لداركم...
الزوز قالوا؛حاضر..
ومشوا مع بعض لدارهم...
تنهدت سارة..
وزياد قال؛في حاجه صايرة مع بوي..
سارة:حسيته زعلان منا ع خاطر قاطعناه..
زياد؛حتى هو قاطعنا..تس..حاس في شي تاني صاير..
سارة:زي شني... زياد تنهد وقال؛مش عارف....
🍁🍁🍁🍁
وعدت هديكا الليله..
وهيثم اغلب وقته في داره...
وماطلعش الا للجامع..ولوقت العشي..
تعشا في صمت..
وهما يراقبوا فيه وصمته مخوفهم عليه....
🌼بس لما طلعت شمس يوم جديد...
تبدل حاله تماما..
رجع هيثم الاول في علاقته مع صغاره...
كان يهدرز ويبصر ويضحك..
وزاد في الحن والحب اكثر من قبل....
البنات كانوا في قمة الفرح..بس زياد كان مضايق لانه حس ان بوه قاعد يضحي من جديد ع خاطرهم...
••••••••••••
في الطريق...
هيثم:خلاص انسوه االموضوع هدا سكرته نهائي..
زياد؛بوي ماديرش هكي هدا حقك وحني....
قاطعه وقال؛اني توا معاش نبي شي من الدنيا هادي غير اني نشوفكم ناجحين في حياتكم ومرتاحين هادي رسالتي اللي بنعيش بش نكملها من اليوم...خلاص انهي النقاش في الموضوع هدا...
تنهد زياد بعدين ابتسم وقال؛حاضر...
🍀🍀🍀🍀🍀
وتمر الأيام....
ومازال اسماعيل عايش في صراع مع امه اللي رافضه ارتباطه برتاج...
عكس خالته اللي برغم رفض دانيه الارتباط بولدها بس مازال مصرة عليها وتحاول تقنعها بيه...
وولدها قاعد يحاول يخلي دانيه تحبه بطريقته الخاصه...
يبي يكسب قلبها من قبل ماتعرفه بس وين يعترفلها ويعرفها بنفسه تكون دانيه متقبلاته تماما....
🍁خشوا ع الامتحانات..
وبدوا يمتحنوا...
وسارة ودانيه وتهاني عايشات عزله تامه عن العالم الخارجي...
ومحبوسين في عالم القرايه والامتحانات...
ماكانتش الامتحانات ساهله..بس في نفس الوقت كانوا قدها....
🌼في اخر يوم من الامتحانات..
بعد الامتحان اللي ابلوا فيه بلاء حسن...
سارة عزمت دانيه ع الفطور ومشت تجيبه من الكافتيريا..
وقعدت دانيه مقعمزة جهة المظلات تراجي فيها...
فتحت تليفونها ع الفيس وقعدت تكسد عليه..
لين قابلها بث مباشر لفاتخ قعدت تتفرج عليه..
ع جية سارة:اهو جاك الفطور...
لقتها بالتليفون..
قعمزت جنبها وقالت؛ع شن تتفرجي..
ورتها دانيه الشاشه وقعدت تشوفلها..
وسارة اختفت ابتسامتها وهي تشوف فيه وتسمع فيه شن يقول..
"فاتح امتى بتروح....قلت يااخت ريانا بإذن الله بعد اربعه سنين...
هادي تسأل قالت حتى التطييب يقروا فيه بالسنين..
طبعا مال شنو...غادي يتعلم الطباخ فنون الطبخ في العالم كله..والموضوع هادي يبي بش الواحد يتعلم الحاجه ع اصولها..
المطعم كيف بيصير فيه...
المطعم بيقعد مفتوح قاعد سري فيه ماتخافوش يعني مش حيتغير عليكم شي"..وقعد يضحك..
فجأة طلع صوت نداء الرحله...
فاتح:اهو زي ماسمعتوا موعد رحلتي اني والوالده قد حان..
ع السريع نقوللكم اني مستمر معاكم من برا بإذن الله مش حنغيب عليكم بكل...واخيرا..
رفع زهرة غاردينيا وقال...انتي...ايه اللي اني متأكد انك تشوفي فيا توا..مروحلك..مش مخليك....
حي بيده الكاميرا وقال...هي في امان الله....
وسكر البث...
دانيه قعدت تشبح لسارة..
شافت في عيونها لمعه الدمعه...برغم ان ملامح وجهها كان باين فيهم الغضب وهي تتفكر في كلام امه...
《 وولدي اكبر من انه يحبك..انتي ماتستاهليشي..ماتستاهليش انسان نظيف من داخل قلبه لربه وطيب بكل مافيه..عكسك انت اللي برغم انك حامله لكتاب الله ومتدينه قلبك من داخل مليان شوائب ومش نظيف ومعبي كبر...》
دفت يد دانيه بالشويه وقالت؛هي خودي فطورك نبي نروح بكري اليوم بش نقلب الحوش رمضان معاش مازال عليه خلاص..
دانيه حطت تليفونها ع الطاوله وقالت؛حني اليوم معزومين ع لمه اخت الاستاذ اسماعيل .
سارة:عنده خوات هو؟
دانيه؛وحده وعايشه برا...بعد ماجابت قريب بشهر روحت بش دير لمه هني..
سارة؛مفضاها..
ضحكت دانيه...
وهما ياكلوا ويهدرزوا...طارت قريب من الكليه الطايرة اللي عليها رحلة فاتح ونوال...
رحله حيغيبوا فيها سنين عن ارض الوطن...
اللي غاب بش بهرب....واللي غاب بش يرجع اقوى....
🍁🍁🍁🍁
الساعه التاسعه ليلا..
في فيلا عبدالرؤوف الشركسي..
كانت زحمه بالنساوين اللي جايين يحضروا اللمه..
ومنهم سدينه وبناتها...
مليحه ومديحه هاللليله..
كل وحده فيهم كانت ناويه ع شي....
اولهم مليحه اللي بدت بالتنفيذ لما خدت رتاج ع نركينه وقعدت تكلم فيها عن...
مليحه؛انتي مراة الله يبارك عليك وتستاهلي اللي خير من ولدي صدقيني مايصلحش بيك بكل..
رتاج؛علاش تكلمي فيا وكأني نبي ولدك ولامهتمه لأمره صدقيني مش بالي ولانفكر فيه..
مليحه:هكي احسنلك حبيبتي ع خاطر مصلحتك...
رتاج ابتسمت مجامله وقالت؛مشكورة...
مليحه بإبتسامه؛لاشكر ع واجب قلبي....
🍁اما مديحه قعدت دور ع دانيه مالقتهاش..
والساكته دور معاها بعيونها....
🌼ودانيه دور ع كنعان اللي ديما رايح منها..
او اللي ديما مصر انه يكشفلها الحقائق..
بس هالمرة بطريقة مؤلمه...
وهي دور عليه كانت حتطلع للجنان..
بس وقفت لما سمعت اسم اختها ع لسان اسماعيل..
بينت وجهها وشافاته واقف ع شخص عاطيها بالظهر..
اسماعيل؛هي اصلا مش حاطتني في بالها تبيني نحارب امي ونخسرها ع الفاضي..!
نادر:قتلك من قبل انت جبان..ومش قد الحب..
اسماعيل؛ايه جبان..مانبيش نعادي امي ونخسر في النهايه..
نادر؛تعاير فيا!
اسماعيل؛نذكر فيك بس بأنك يوم من الايام حبيت بنت امك مش راضيه عنها وعاديتها لأنها رفضتها وخليتها ترضى بيها بالسيف وشفت شن كانت النتيجه .
نادر بضحكه؛خلاص خلاص ياسيدي من اليوم نعطيك وعد معاش ندخل فيك ولاليا علاقه بأي شي يصير معاك..
اسماعيل:ايوه اشقى بروحك وشوف شن يدبرولك ناويين يخطبولك ويحطوك في الأمر الواقع...
نادر بصدمه؛كيف.!؟
اسماعيل؛اللي سمعته..
نادر بغضب؛بش يفهموا هادوا بش يفهموا كم مرة بنقوللهم مانبيش نتزوج اني معاش متاع زواج  نبي نقعد بروحي شن البشر هادم...
ع جية كنعان من وراهم وهو يدب ع رجليه بعد ماكان يدهور في الجنان..
نادر؛شن يدير هني هدا..
التفت اسماعيل وشافله...
بس الولد عيونه كانوا ع غيرهم ..
مشالها يجري وهو يضحك..
وهما تبعوه بعيونهم...لما جت عليها...
نادر جمد في مكانه..
وهي واقفه تشوفله بصدمه ودموعها في عيونها...
هو نفسه...نادر...عطيه الشايبي..
الفرق انه هني لابس كاجوال مش رسمي زي ماتعودت عليه..
وفيسع عقلها ربطلها الاحداث ببعض..
الاوركيد...!
الشكولاته...!
مرض السكر..!
ولد مديحه دكتور......!
R.R.y...!
《 سارة:هادي الحروف ادل ع اسمه..الاول والثاني واللقب هكي نقول...ومادام كاتبهم بالرموز معناها شخص تعرفيه بإسمه كامل..
دانيه؛طبيعي لو مايبنيش نعرفه مش حيكتب اسمه..
سارة؛وهدا يبيك تعرفيه....بس مش ع طول..》
《 بش يفهموا هادوا بش يفهموا كم مرة بنقوللهم مانبيش نتزوج اني معاش متاع زواج  نبي نقعد بروحي شن البشر هادم》
《 وشباب هالوقت فالحين في تعسل الكلام والحركات اللي تذهب الشيرة...مرة يبعت هديه شويه يجيبلك ورد..شويه يبعتلك رساله...يخلي الحديد يلين...
مايجيكش من الباب طول لين يطيحك في شباكه بش تبدي خاتم في صبعه بعدين ياخد منك اللي يبيه ويلوحك ع طول يده.》
هي قامت ولد اختها في حضنها وبسرعه خشت داخل...
وهو مازال يشوف لمكانها بصدمه ولمعوا عيونه بالدموع 
اسماعيل بإستغراب؛نادر..
ونادر التفت وشبحله..بعدين فاته ومشي من حداه....
🍁🍁🍁🍁🍁
الساعه الثانيه عشر ليلا..
درس سيارته قدام الحوش وهو يتكلم بالتليفون..
داوود بضحكه؛تونوريك ياصفرا تو تشوفي....
هي بضحكه.قالت
"خلاص داوود بنرقد غدوة وراي مستشفى شن رايك تجيني غادي بس مدني المرة هادي"
هو بإبتسامه.قال؛نحاول نفضي نفسي ونجيك..
"تمام في الانتظار..تصبح ع خير ياأفندي"
داوود بإبتسامه؛وانتي من اهلي يادكتوره...
ضحكت بعدين سكرت..
وهو نزل تليفونه وقعد يضحك عليها...
فجأه..دق المرش متاع الروشن ...شبحله..
اختفت ضحكته لما شاف واحد مألوف بالنسبه ليه..
نزل المرش وقال؛تفضل..
رد عليه بصوت مترنح :انزل....انزل...انزل عندي ليك...كلام لازم تعرفه...وماتقعدش راقد...ع وذانك...يافندي...

#مشاعر
#البطل_المغمور2

....يتبع....