#البطل_المغمور2 "زهور القمر"
#جمان_فريد
#الجزء_الرابع_والأربعين "تفسير2"
عيدكم مبارك...
( فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُم مِّدْرَارًا * وَيُمْدِدْكُم بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا * مَّا لَكُمْ لَا تَرْجُونَ لِلَّهِ وَقَارًا * وَقَدْ خَلَقَكُمْ أَطْوَارًا * أَلَمْ تَرَوْا كَيْفَ خَلَقَ اللَّهُ سَبْعَ سَمَاوَاتٍ طِبَاقًا ) نوح 10-15
💐💐💐💐💐💐💐💐💐💐💐💐💐💐💐💐💐
مقعمز في مكتبه في الوزاره يوقع في بعض القرارات..
قطع عليه اتصال جاه عن طريق هاتفه النقال..
خداه وشاف المتصل...رد طول..
هيثم؛السلام عليكم..
"وعليكم السلام دكتور اسف جدا لوعطلتك او ازعجتك فهالوقت"
هيثم؛لاابدا مافيش مشكله ان شاء الله خير دكتور!
" بنقولك بخصوص الجرعات لمرضى الاورام اللي تكفل بيهم رشيد المجذوب ماوصلنا منه شي الشهر هدا "
هيثم بإستغراب؛معقوله!
"والله هدا اللي صاير دكتور ومش عارف شن السبب تواصلنا معاه بش نفهموا منه مايردش"
هيثم؛صكر صكر تونشوف الموضوع بروحي ونرد عليك..
"تمام دكتور"
سكر هيثم ودور رقم رشيد لين حصله واتصل بيه..
نادى مرة اتنين ثلاته في الرابعه...
انفتح الخط...
هيثم؛السلام عليكم..
بصوت فيه نبرة كآبة رد رشيد يقول..
"وعليكم السلام الدكتور'
هيثم وهو يسمع بتركيز؛كيف حالك وحال الاسرة..
تنهد رشيد وقال..
"والله ماعارف شن نقول دكتور طايحين في مصيبه ومش عارف كيف بنطلعوا منها"
هيثم؛مصيبة شني ياولدي شن صاير معاك..
"ولد اختي خطفوه يادكتور واختي توا في المستشفى استغفر الله العظيم...الله ربي لااشرك به شيئا"
هيثم بصدمه:إنا لله وإنا إليه راجعون....باهي ماعرفتوش علاش قصدي كلموكم اللي خطفوه...
"كلموا خوته وقالوا شن يبوا"
هيثم:وشني اللي يبوه؟!
🍁🍁🍁🍁🍁
"والله مانوليله لو تطبق السمي ع الوطى"
:خوك يابنادمه خوك بين ايديه..
:تبي ضحي بأختك ع خاطر ولد هديكا!؟؟
:ولد هديكا خوي يام خوي..
همانه؛مش خوي اني ومش معترفه بيه وهداكا الحيوان مش حنوليله ونخليه يدفني بالحيي..
شدها خوها من مرفقها وقال:والحيوان هداكا من جابه ياحيوانه اني!!؟
جاته امه دفاته عنها وقالت:خل اختك برا غادي والله مانسلمها لهداكا المجرم بعد اللي داره فيه..بروا دبروا روسكم انتم وهديكا اللي فضلتوها عليا..
ولدها بنفاذ صبر:لاإله إلا الله..ربي يسامحك يام ربي يهديك...
امه جبدت بنتها وقالت:تعالي بنتي تعالي ..
ومشت هي وهمانه وخلتهم يتخبطوا ومش عارفين شن يديروا وكيف يتصرفوا..
مع زوج همانه اللي سيباته وقعدت في حوش اهلها حرجانه وع قد ماحاول فيها ترجعله هي رافضه..
فلجأ لأسلوب يعرف يتعامل بيه كويس اسلوب اجرامي.
لأنه من الاصل شخص غير سوي...وهي فرضاته ع اهلها فرض..
وتوا كنعان رهينه عنده بش يضغط بيه علي خوتها ويجبروها توليله..
•••هي خود تليفوني كسد عليه..
كنعان:عندك العاب...
الخاطف:عندي الالعاب كلهم العب باللي تعجبك..
كنعان؛في نت هني ؟
الخاطف بضحكه؛في ياسمح في ومفتوح..
كنعان بحماس:شكرا..
وبدي يلعب بالتليفون...
الخاطف وهو يشوفله؛كله في جراريك ياشيطانه اني اللي عمري مادرتها خلتيني نخطف صغويرة..مفروض خطفت امك وجه الشر هادي اللي تعبيلك في راسك...
تنهد بعدين قال...مايشبهمش بكل طالع لامه طرف...عنده حق بوها ياخد ع وجه الشر عنده ميه حق..
كنعان وهو يلعب:ممكن لو سمحت تسكت نبي نركز..
ضحك الخاطف وقال:ركز ياسيدي ركز...
🍀🍀🍀🍀🍀
ومروا يومين وكنعان قاعد مع راجل اخته اللي كان يدلع فيه اخر دلع ومهتم بيه ع اخر...لدرجة انه كنعان حبه..
ومع ذلك كان يستاحش ويقول يبي يروح لحناه وامه...
وراجل اخته يضحك عليه بكلمتين وكم لعبه في التليفون يسكت وينسى مؤقتا...ومادارش اتصال تاني بخوتها نهائي..
وخلاهم كلهم ع نار لاليلهم ليل..ولانهارهم نهار..
وهدا حال امه...اللي اجهضت عيلها من عبدالحميد وخشت في حالة نفسيه من اللي صار في ولدها...
رشيد خبر عبدالحميد بحكاية الإجهاض..وبدل مايسيب اللي عنده ويجيها يجري...عصب وعيط وقال ان رتاج دارت هكي قصدا بش تنفصل عنه...
وختم كلامه يقول..
"كان تبي تطلق تو نطلقها"....
وهذا كله خلا حالة سدينه النفسيه في الحضيض ...
صعب ع البنادم بعد ماياخد ع الراحه اللي جاته بعد سنين شقا طويله يرجع يفقدها...
ومع هدا..كانت ع قد ماتقدر تمثل انها كويسه وين تتصل دانيه تهدرز عليهم...
🍁🍁🍁🍁🍁
في قسم الأورام لمشفى الرازي..
هيثم؛لاحول ولاقوة الا بالله..
رشيد بضيق؛قداش ليا ماحسيتش روحي عاجز هكي ومش عارف شن ندير..حتى الشرطه مش قادر نقوللهم شي وين نتفكر تهديد راجل اخته..خوته يقولوا مايخافش ربي الله اعلم شن داير فيه توا..
هيثم؛استودعه الله تعالى وبمشيئته مايصيرله شي..اني نقول كان تمشي امك لاخته وتكلمها مرات دير حل هي وراجلها ويخلي الولد في حاله..
رشيد؛فكرت فيها الحاجه هادي..مافيش غير هكي في ايدينا توا..
هيثم؛وطول نفدوا بدون تردد...
•••••••••
