البطل المغمور (الجزء الثاني) زهور القمر

الجزء السابع

#البطل_المغمور2  "زهور القمر"
#جمان_فريد
#الجزء_السابع "موعوده بيك1"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
في صالة الحوش..
ملتمين الأقارب...
نساوين عمام وخالات ونساوين خوال وبنات خالات وبنات خوال...
وهي بنت العم الوحيده الموجوده بينهم..
مريم كانت محبوبه هلبه لانها طيوبه ومرحه واجتماعيه..
بس ليهم فترة فاقدينها في تجمعات العيله وتوا رجعت من جديد مش هي نفسها مريم متاع زمان..
:وين مريم وين مالكش حس بعد انخطبتي تغيرتي..
:خلاص كبرت..
ضحكوا..
وهي سايرتهم وضحكت بدون ماترد..
:شن سماه خطيبك مريومه..
مريم حطت شعرها ورا وذنها وقالت بإبتسامه؛جهاد..
فجأة..
وحده من خالات زغردت...
كلهم شبحولها وناضوا معاها امه وباقي خالاته..
وبدوا بالشتاوات...
يامبروك عليه زبونه..هاللي كيف الصقر عيونه...
ويشتوا ويصفقوا ولحقوهم باقي العيله لما فيهم امها...
وهي قعدت مقعمزة في مكانها كانت حاسه روحها مخنوقه..
خطم عليها شريط ذكرياتها معاه كلها...
اللي كانت بدايتها حلوة ونهايتها بشعه...
وهدا حال اغلب علاقات الحب المحرمه...
سمعتهم زغردوا تاني..قامت عيونها..
بان عليها وهما يسلموا عليه ويضبطوا...
وابتسامته شاقه وجهه..
هي استجمعت نفسها..ورسمت ع وجهها ابتسامه..
وناضت وبدت تصفق وتغني..
يامبروك على الحبيب...سجلناها في الكتيب..
اختفت ابتسامته وقعد يشبحلها..
وهما بدوا يصفقوا ويغنوا معاها..
كانت تغني وتمرر في نظرها ع النساوين وماتبيش تشبحله..
وهي غنت تاني..
نور العين قري فاتحته...جاب الريم اللي جارحته..
وهو يشوفلها وخلاص..
وهي ولابت تحرك عيونها ناحيته..
والدنيا مقلوبه حواليهم زغاريد وغني وتصفيق..
مريم..
يامبروك على بن عمي...ان شاء الله قبل الحول يسمي..
مرت عمها خديجه؛ايييه مازال مازال في 11 العرس..
مريم بضحكه؛مرات مايصبرش ويدير عرسه قبلي...
وحده من خالاته:زعمه..
مريم اشرت على روحها وقالت بضحكه؛انشدوني اني عليه..
خديجه؛عاد الزوز راسين في شاشيه..
ضحكت مريم وعيونها لمعوا بالدموع..
وهو عيونه ماتحولوش من عليها...
زغدوا لأخر مره..
بعدين ولوا قعمزوا بالوحده بعد ماباركوله..
وهي ولت لمكانها..
وهو وقعد واقف..حط يد في نصه والتانيه اتكى بيها ع الحيط وحط رجل ورا التانيه..
خالته:مشيت لمرته..
هو بإبتسامه قال:مازال...جايب معاي حاجات بنرفعهم معاي لما سمعت بمريم قاعد هني قلت ناخد رايها فيهم..
مريم شبحتله وهي مبتسمه قالت:والله شن بنقولك المرة مش رادتك لكن في الجديد علاقتنا بتولي رسميه توا مخطوبه اني وخطيبي مايهونش عليه..
عقد حواجبه؛ايه شن قصته عريس الغفله هدا ياخاينه..
رفعت حاجبها وقالت؛نصيبي وربي جابه..
:اسكت تغيرت علينا ياضرار معاش زي قبل راهو..
:شكله حاكم فينا..
امها:لا والله حتى كلام ماتكلمش فيه..
:جديات..
مريم؛ايه هكي احسن..
ضرار؛باهي شن نظامه شهادته خدمته ...
كان عارف الاجابه بس قاصد يحرجها
واللي انحرج امها..لكن هي قالت..
مريم؛زي بابا مع اختلاف المهن..ميكانيكي سيارات عنده شهاده اعداديه..
كلهم انصدموا لأن اللي سمعوه غير هكي..
هو رفع حواجبه وقال:تبصري صح!
مريم حركت راسها بالنفي..
خديجه؛خير دعوتك خيرك معقوله انتي يامريم اللي بتولي دكتورة طيحي هالطيحه..
امها بتموت من الإحراج..
مريم؛ماطحت الا واقفه يامرت عمو مش مهم شهادته..شبحت لضرار وقال...المهم يكون راجل بمعنى الكلمه..
حاول يكفي ملامح الغيظ ورا ابتسامه باردة وماقال شي..
وحده من الحاضرات قالت؛صدقت هدا المهم يكون راجل ويخاف ربي مامنهم اللي عندهم شهايد وهما مايسووا قشرة بصلة..
مريم؛ايه هلبه ياخويله..
هو قال:باهي ياستي مبروك عليك ربي يتمملك ع خير..هيا تعالي معاي نوريك شن جبت للمراة معاش عندي وقت..
هي هزت راسها وناضت حطت وشاحها ع كتافها ومشت معاه..
وهما قعدوا يهدرزوا في موضوعها مع امها اللي كانت ترد عليه بإحراج..
🍂وهي وصلت معاه لقدام داره..
ووقفت..
فتح الباب وقال:خشي..
هي حطت الوشاح ع راسها وقالت؛اللي تبيني نشوفه طلعه داخل مش خاشه..
ابتسم بتهكم وقال؛علاش حطيتي الوشاح قصدك بتتحجبي عليا..ضحك نص ضحكه..
هي قعدت تشبحله بحده وعيونها معبيات دموع...
هو بإبتسامه متهكمه:خشي خشي وفوتيه الجو هدا تي كنتي تقعدي في الدار هادي اكثر مانقعدي في حوشكم..
هي بصوت منخفض:سكر فمك ياحقير ياواطي يامنحط..
ضحك تاني وقال:الا حق قوليلي..غمز بعينه وقال..كيف صار..انخطبتي وبتتزوجي عادي...
هي تشبحله بحقد ودموعها ينزلوا..
ضرار:لابجديات قوليلي الورشة متاعه وين خل نمشي نتعرف عليه..
مريم ولاكلمه...
مد يده بيمسح دموعها ضربتها بقوة..
هو ضحك بصدمه وقال؛اووو...
شبحتله من فوق لتحت ولفت بتمشي..
وهو شدها من ذراعها..
انتفضت ونفضت يده والتفتت عليه ونزلت ع وجهه بكف خدرله خده..
مريم؛رد بالك مرة تانيه تفكر تقيم عينك فيا مش تمسني ياخنزير..
ولفت ومشت بسرعه وهي تمسح في دموعها..
وهو كان يشبحلها بنظرات غضب حاده..هز راسه بوعيد وسكر باب داره بقوة..ومشي طلع من الحوش وفات المشية لمرته...
🍁🍁🍁🍁
"اهااا!!!؟ اما مستشفى.....قول الحق ياإيهاب...باهي باهي"
وسكر..
والتفت انصدم لما شاف مرته واقفه وراه..
عواطف بخوف؛من اللي في المستشفى..
تنهد وقال:صلي ع النبي مافي شي يخوف اصابه عاديه في ذراعه..
غمضت عواطف عيونها وبدت تعيط؛وووه عليا وووه ولدي..
فنص بصدمه وقال؛نقولك اصابه خفيفه عاديه يامراة خيرك هكي..
عواطف ببكي؛ياحليلي ولدي ياحليلي ولدي ارفعوني لولدي..
ع جية جيهان تجري من دارها وهي مفجوعه؛خيرك تعيطي شن في !؟
عواطف:خوك ياحليلي خوك..
جيهان بصدمه:من فيهم!!؟
بوها:مافي شي يابنتي غير امك هولتها راجح منصاب اصابه خفيفه عاديه..
عواطف:ووووك عليا ياحليلي ارفعوني لولدي..
وانقلبوا عيونها وداخت..
جيهان بعيطه؛ماما...!
🍁🍁🍁🍁
"ياوخيتي سلمه وخيي ربي يطول في عميره باهي وينكم انتم توا؟"
دانيه بإبتسامه؛في جردينه السرايا...
"تو نتختخ عادل بالك يجيبني"
دانيه بضحكه:كان صارلك خبريني..
"تمام..سلام"..وسكرت..
دانيه قالت؛بتحاول في عادل يجيبها..
سدينه؛ياريت..
مجاهد؛خل نكلمه نعزمه خير..
سدينه؛ايه سلم ولدي كلمه كلمه..
قام مجاهد تليفونه وناض من حداهم..
دانيه:الجو يهبل..
سدينه؛ايه بروده ع الكيف..
رشيد؛باهي كيف يصير فيا توا نمشي غدوة للجامع..
سدينه؛ايه برا ولدي مانبيش بوك يحس ان معاديينه بلعاني وبعدين هدا شي وهداكا شي..
دانيه بإمتعاض؛ماظني تجي من الحيزبونه حاجه باهيه..
سدينه؛هدا قرآن يابنت..
دانيه بضيق:استغفر الله..
وغيرت عيونها ومررت نظرها ع المكان..شويه تبتوا ع مكان واحد وانفتحوا ع وسعهم لما جو ع طاوله فيها جهاد ومعاه  واحد وفي جنبهم اخته تهاني ومقابلهم عفاف وسجى وصالحه..
غيرت عيونها طول وقالت في نفسها
"ان شاء الله مايصيرلكش يارتاج"
🍁🍁🍁
"هيا دوله بالله عليك"
ضحك وقال؛باهي..خلاص هي بري بسرعه البسي نراجي فيك في السيارة..
رتاج بضحكه؛يييي ياوخيتي سلمه دولتي..
ومشت تجري للدار وهو يضحك عليها..
بعدين تنهد ومشي بيطلع من الحوش..
🍁🍁🍁🍁
مقعمز ورا مكتبه وهما الزوز واقفين قدامه..
هيثم؛كنت نبي نزيد المده اكثر من هكي..لكن قلت اكيد تعلموا من غلطهم..
فاتح؛باهي اني عندي سؤال واحد بس..زياد شن دخله!؟
هيثم:درق عليك..
فاتح:ماكانش عارف من الاول هو..
هيثم؛عرف في الأخير في الاول المهم عرف قبل لدير عملتك..
فاتح حك رقبته من الخلف وقعد ساكت..
هيثم اشر عليه بسبابته وقال؛بنبدا نخاف عليه منك..
زياد شبح لفاتح بعدين شبح لبوه..
فاتح حك لحيته بعدين حط ايديه ورا ظهره وقال:حتى لو ضريت نفسي مانضراش..
هيثم؛ايه ماهو بان في عملتك الأخيره..
نزل فاتح عيونه وقعد يهز في رجله وهو ساكت..
وزياد يشبحله..
هيثم مرر نظره عليهم بعدين تبت نظره ع فاتح وقال؛محاكمتك في نفس يوم محاكمة زياد..يعني بدال مانخمم في واحد نقعد نخمم في زوز..
قام فاتح عيونه وشبحله..
وزياد شبح لبوه..
هيثم بإبتسامه؛احساسي تجاهكم بالمسؤولية كبير كلكم بديت نشوف فيكم زياد..
ابتسم فاتح ابتسامه جانبيه وهو يشوفله بنظرات كلها امتنان..
هيثم:معاش ديروا شي يخليني نفقد الثقة فيكم..
زياد هز راسه بإيجاب وهو مبتسم..
فاتح؛حاضر يادوك...
ضحك هيثم وقال؛اطلعوا اطلعوا...
ضحكوا الزوز ومشوا طلعوا مع بعض..
وبعد ماطلعوا هو ابتسم ورجع يشوف لواحد من الملفات..
🍁🍁🍁🍁
درس السيارة قدام الجردينه وقال.
عادل؛نتم شغلي ونجي..
هي هزت راسها وقالت؛باهي..سلام توا..
عادل بإبتسامه؛سلام..
هي نزلت من السيارة..وهومشي..
خشت للجردينه وقامت تليفونها واتصلت بدانيه..
•••عفاف؛ع عرس الولاد ان شاء الله..
صالحه؛ان شاء الله ربي يطول في عمرك وتجددي..
عفاف؛بوجودك ياصالحه..
"ايوه شفتكم "
عفاف سمعت الصوت وشبحت لمصدره لما شافتها عرفتها طول..
ابتسمت وقعدت تبع فيها بعيونها..
ورتاج وصلت وين ماموجودين ماليها..
عفاف وهي متفاجئه؛سدينه..
صالحه شبحت جيهتهم وقالت:هادي اللي كانت ضرة ماجده..
عفاف:ايه..
ناضت وقالت:خل نمشي نسلم عليها..
صالحه؛نايضه معاك...
وناضت صالحه ومشوا مع بعض لطاولة سدينه..
ومن بعيد جهة الألعاب..
كانت تهاني مع عرفه يلعبوا في الدارجيح وحداهم رفيق ومرته وجهاد...
جهاد لاهي بيهم..لكن رفيق عيونه ع مجاهد اللي واقف بعيد شويه يتكلم بالتليفون ونظراته كلها حقد وسجى تمرر في نظرها عليهم وهي متشمتة في رفيق اللي قاعد يعيش نفس شعورها...
••عفاف:سدينه كيف حالك..
سدينه وهي متفاجئة؛عفاف..وناضت وهي تقول..مرحبتين..مرحبتين..
وقعدوا يسلموا ع بعض ورتاج تشبحلهم وهي مصدومه..
عفاف:كيف حالك وحال الصحه..
سدينه؛الحمد لله كيف حالك انتي وعويلتك..
عفاف؛الحمد لله..
وخرت عنها وسلمت عليها صالحه..
وعفاف شبحت لرتاج بإبتسامه وقالت؛كيف حالك..ومدت يدها..
رتاج ابتسمت مجامله وناضتلها سلمت عليها..
بعد السلام..
سدينه؛تفضلوا قعمزوا..
عفاف:لا مانبوش نضايقوكم غير قلنا نسلموا عليهم ونعرفوا حوالهم..
سدينه:شن تقولي بس..والله لما تقعمزوا هي..
عفاف بضحكه؛ربي يهديك غير ليش تحلفي بس..
وقعمزوا مع بعض وبدوا يهدرزوا..
عفاف؛جابوني ولادي رفيق وجهاد..
رتاج قلبها قعد يدق بقوة بخوف..وفي نفس الوقت عندها فضول تشوف جهاد..
•••تهاني بضحكه؛خلاص عييت..ونزلت...
عرفه:نمشوا للعبة هديكا؟
جهاد بإبتسامه؛هيا انزل ..
نزل عرفه ومشوا مع بعض...
ورفيق يتمشى مع سجى ..
هو في عالم تاني..وهي في عالمه هو مركزه معاه وبس وتقول في نفسها..
"وكان الندم يقتل راهو قتلني...ااه لو يرجع بيا الزمان بس ااه"
فهالوقت..
وصلوا للعبه...
تهاني؛هي برا اركب..
عرفه مش طول بيركب وجهاد يساعد فيه..
وتهاني تتفرج عليهم وع الموجودين..لعند ماعيونها جو ع دانيه تلعب مع خوها رشيد..
تهاني قربتلهم وهي تضحك وقالت؛دانيه..
دانيه قعدت دور بعيونها..
جو في عيون تهاني لما شافتها تفاجئت هلبه ونزلت من اللعبه ومشتلها طول...
دانيه:تاهو..
تهاني بضحكه:دنون..وسلموا ع بعض..
دانيه؛عليك صدفه..شن جو..
تهاني:الحمد لله تمام..انتي شن امورك..
دانيه:الحمدلله ماشيه..مع من جايه..
تهاني؛مع العيله..
دانيه:نفس الشي..وقلنا لرتاج تجي حتى هي..كيف وصلت..
وقعدت دانيه دور بعيونها لين شافت طاولتهم واللي عليها..
دانيه بضحكه؛وصلوا في بعضهم قبلنا..
تهاني بضحكه:ايه..نمشولهم؟
دانيه:خل نعطي علم لخوي..
والتفتت وهي دور فيه وتهاني دور معاها لما شافاته ابتسمت وين خطر عليها خاطر...
كيف جت دانيه بتمشي شدتها تهاني من يدها وقالت:شن رايك نكلموا سارة ونقهروها..
دانيه بضحكه؛ايه صح كلميها انتي تليفوني مش معاي..
تهاني ؛باهي..فيديو راهو..
دانيه بضحكه؛تمام..
واتصلت تهاني بسارة..
🍁فهالوقت..
كانت سارة مقعمزة ورا اللاب توب متاعها تكتب في اول مقالة ليها حتنزل ع وحده من الصحف الإلكترونيه اللي طلبت من سارة تخدم معاهم..
وسارة بعد تفكير وافقت وخلت الامر مكتوم تبيه يكون مفاجأة..
رن تليفونها..
وقفت كتابه وخداته لقت تهاني تتصل فيديو استغربت.
فتحت طول...
حطت يدهاع فمها وهي مندهشة...
وتهاني ودانيه يضحكوا..
سارة؛وينكم ياخاينات العشرة!؟
دانيه بضحكه؛نهيجوا..
سارة؛خزي اتفاقات من وراي.
تهاني:انتي اللي منعزله في الحوش قلنا خليها هي وانعزالها..
سارة؛خزي عليكم والله ماتحشموا باهي بروا حرجت..
وتهاني تضحك..
دانيه بضحكه؛كله ولازعلت والله صدفة تلاقينا..
تهاني:علاش تقوليلها خليتينا قهرناها زياده..
سارة؛ريت المعفنه ريت..
ضحكوا تهاني ودانيه..
سارة؛باهي وينكم انتم؟
تهاني:في جردينه السرايا..
سارة؛امم خل نشوف عميمه كان فاضيه تجيبني..
هما الزوز ضحكوا بحماس وقالوا:تعالي تعالي..
سارة بضحكه؛هي خل بنصكر ونمشي نشوفها..سلام..
وسكرت..
ضحكوا الزوز..
دانيه بضحكه؛الله عليك جو...
سارة بإبتسامه؛هي نمشوا..
دانيه:هي...التفتت وقالت..مجاهد..
التفت وشبحلها..
اشرتله انها ماشيه هو هز راسه واشرلها بيده تمشي وكمل مكالمته...
ودانيه مشت تهاني..
تهاني؛جهاد بنولي لطاولتنا..
دانيه انصدمت وقالت في نفسها"حيي نسيته بكل"..
وغيرت وجهها للجهه التانيه..
وهو رفع ابهامه لأخته..
والزوز مشوا للطاوله...
كانت الأجواء ولاأحلى..وسدينه وعيلتها نسوا اللي عاشوه اليوم من وجع باللمة الحلوة..
شويه وجو سارة ونسيبه..
نسيبه؛وينهم..
سارة؛هاوينهم ...
نسيبه وين ماتشبح سارة لمحت رتاج وقالت:ايه شفتهم..
ومشوا الزوز مع بعض...
وهما ماشيات كانوا رفيق ومرته حتى هما جايين ناحية الطاوله..
سجى شافت سارة جاية مع نسيبه انطمست..
ورفيق بعدين شافها قلبها قريب طلع من مكانه...
وقف وقال؛بري كملي طريقك..
شبحتله من فوق لتحت وعيونها معبيات دموع بعدين مشت للطاوله..وهو مشي ولى لطاولتهم وقعمز...
وصلت سجى في الطاوله وبدت تسلم..
ونسيبه وسارة يسلموا حتى هما..
بعدين وصلت سارة في دانيه وتهاني..
ضربتهم الزوز وقالت؛ياخاينات..
دانيه بضحكه؛ومازال تقولي خاينات..
ضحكت سارة وسلمت عليهم...
عفاف؛مالا وين ماجده والتوامه..
نسيبه؛مازال ريحان ماتقدرش تلعب تجري قعدوا الزوز وهي معاهم..
سدينه؛ربي يزيدها من الشفي..
نسيبه وسارة؛آمين..
🌷🌷🌷🌷
وشويه وتوزعوا..
النساوين الكبار ومعاهم سجى ورتاج برواحهم..
وسارة وتهاني ودانيه ع كرسي مع بعض بعيد عليهم..
ونسيبه مع خليل اللي لحق بعدين...
ورفيق وجهاد مع عرفه ع طاولتهم....
ومجاهد مع رشيد..
كان مقعمز في كرسي طويل عاطي بالظهر ومرة يلتفت ويشوف لسارة..
وهي كانت تسرقله في النظر وتحاول تتحكم في ملامح وجهها وتركز مع دانيه وهي تحكي في اللي صار معاها...
تهاني:واك غمتلي قلبي مرت بوك هادي..
دانيه؛ماسكرتش شهر وتبي دير حكومتها حتى مصير حياتنا تبي تقرره..شبحت لخوها وقالت..لولا ربي وبعدين مجاهد راهو اشبح شن صار فيا..
سارة كانت تشبحله وقلبها يرفرف بين ضلوعها..
وهو لاهي بالهدرزة مع خوه..
وتهاني تشبحلها..
دانيه بضحكه؛حاسده اللي بتاخده خوي هدا..
تهاني بضحكه؛حتى هو ينحسد عليها..
دانيه ابتسمت وشبحت لسارة.. لقوها تشبح لمجاهد وناسيه وجودهم..
تهاني؛احم احم..
دانيه:شكارة فحم..
هي ركزت وشبحتلهم وجهها ولى أحمر وهي تقول؛خيركم!؟
هما قعدوا يشبحولها ويرمشوا في عيونهم..
هي نزلت عيونها خجلا وضحكت وهي تقول؛مبردكم..
ضحكوا..
ومجاهد يشبح جيهتهم وهو مبتسم..
وع طاولة النساوين الكبار امه كانت تشوفلهم وهي مبتسمه..
وسجى تشبحلهم وتشبح لراجلها اللي كانت نظراته ليهم ناريه ومخيفه..
••من جهة تانيه..
خليل؛اليوم صارت بيناتهم اشتباكات راجح انصاب فيها..
نسيبه بقلق:حي عليا حسني خفت ياخليل كان مايحسوا بيك ويستاقظوا..
هو ابتسم بثقه وقال؛تس مايحسوا بشي كل شي محسوب حسابه وبعون الله مايصير شي..تعرفي عاطيني الشيخ كتاب نقراه اسمه الوابل الصيب قريت فيه حاجه اثرت فيا هلبه ومن يومها واني ملتزم بيها..
بدي يحكي بإيديه..
قال ابن القيم تعرفيه العالم الكبير.
نسيبه هزت راسها بإبتسامه..
خليل؛قال سمعت شيخ الإسلام ابن تيميه شيخه..
يحكي اثر من الحديث..لما ربي خلق ملايكه تحمل العرش..
قالوله كيف ياربي تبينا نرفعوا عرشك وعليه عظمتك وجلالك  حيكون ثقيل هلبه مايقدروش عليه..
قاللهم ربي قولوا..
#لاحول_ولا_قوة_إلا_بالله
قالك لما قالوها قاموه...
واستطرد ابن القيم يقول..
وهذه الكلمه لها تأثير عجيب في معالجة الأشغال الصعبه ..وتحمل المشاق...والدخول على الملوك..ومن يخاف...وركوب الأهوال ولها ايضا تأثير في دفع الفقر..
ومن وقتها ياقلبي والكلمه هادي ع لساني ماسيبتهاش بكل من قبل خوك قالي عليها قالي ماتسيبهاش في بداية التوبه بش مانضعفش ونولي..ونصح بيها حتى جهاد شكله سمعته يومها يقول فيها هلبه..
نسيبه بإبتسامه:مولي دير في هلبه حاجات من وراي ..
خليل بضحكه:نسيت نسوة ياهمي..تي انتي تعرفي عليا كل شي حتى امتى طلع النفس وندخله..
رفعت حاجبها وقالت؛قصدك كاتمه ع نفسك!
خليل ضحك وقال؛باهي اللي فهمتيها..
نسيبه:وبنقعد ع قلبك لين تموت..
خليل بضحكه؛نبصر عليك ياودي..
نسيبه؛عارفه حتى كان ماتبصرش مش معدله عليك..
خليل قعد يضحك..
وهي تشبحله ع جنب بإبتسامه عصبيه بعدين قالت:شاد في القرايه..
خليل هز راسه وهو مبتسم وقال؛ماتخمميش راجلك دحيح ياوحش..
قعدت تضحك وقالت:حتى راجلي دحيح..
ضحك خليل...
🍁وع طاولة النساوين الكبار..
عفاف بإبتسامه؛عرس وليداتي ان شاء الله في اخر سبعة اول ثمانيه وراكم معزومين ياسدينه..
سدينه بإبتسامه؛الله يبارك ربي يتمم ع خير نحضروا ان شاء الله..
ورتاج تسمع فيهم..شبحت جهة جهاد..
اللي كانت حاط ايديه ع الطاوله ويشوف في تليفونه..
لا مايشوفش لتليفونه...
كان يسرقلها في النظر غصب عنه..
جو عيونه في عيونها..
هي طول غيرتهم عنه وخدت نفس عميق..
وهو غير عيونه عنها وعقد حواجبه وتنهد من وسط قلبه...
وفي هداكا المكان كانت القلوب مشتعله بأنواع مختلفه من المشاعر...
في منهم عاش احلا ساعات حياته..
ومنهم كانت تمر عليه اقسى اللحظات...
وجي وقت المرواح...
نسيبه روحت هي وسارة وخليل طلع وراهم..
ورفيق وجهاد خدوا العيله وطلعوا وروحوا بيهم..
طلعوا هما ع وصلة عادل...
شاف جهاد وهو راكب سيارته انصدم..
قبل بينزل بس تراجع واتصل برتاج تطلعله..
••فتحت السيارة وركبت وهي تقول بإستغراب؛خيرك مش قبل بنتعشوا مع بعض..
عادل وهو عاقد حواجبه:ماصارليش بنتعشى في حوشي..
رفعت حواجبها بتعجب وقالت؛تمام..
وطول الطريق كان الصمت سيد الموقف...
وسيارتهم فاتت من حدا سيارة هيثم اللي كان مروح بطريقه للحوش..
وقف في الإشارة...
وقعد يشبح للأرقام ويردد...
"سبحان الله وبحمده سبحان الله العظيم"
وكان مسبح بعدد الثواني اللي مرت...وطلعت الاشارة الخضرا تحرك طول...
وهو يسوق عيونه جو ع لافته فيها اعلان لاحد المرشحين للإنتخابات البرلمانيه..
المرشحه نوال فتحي بشير.. قعد يشبح لصورتها بعدين غير لين فاتها رفع حواجبه ونزلهم وحرك راسه يمين ويسار أسفا..
🍁🍁🍁🍁
خشوا للحوش..
هي طول مشت لدار النوم..
خشتلها وحطت تليفونها وشنطتها ع الزيانه..
وبدت تحول في وشاحها..
هو وقف وقال:رتاج اشبحيلي هني..
شبحتله..
عادل؛تحبيني..
هي قعدت تشبحله وخلاص معاش عرف شن تقول..
عادل؛صعب هلبه السؤال شكله!
غمضت عيونها وفتحتهم بسرعه وقالت؛لا مش هكي بس انت فاجئتني يعني مافهمتش قصدك من السؤال..
عادل؛راجل يسأل في مرته كان تحبه شن في من قصد وراها..
هي كيف جت بترد..رن تليفونها..
هو طول خداه..وشاف المتصل وهي انصدمت في حركته..
كان رقم غريب..وراهولها وقال؛منو؟
رتاج وهي خايفه؛مانعرفش..
قعد.يشبحلها لين فصل الأتصال..
رجع شاف للتليفون جت رساله شبحلها بعدين شبح للشاشه وفتح الرساله..
"رتوجه ياقلبي هدا رقمي المدار ردي عليا...حبيبك"
توسعوا عيونه ع الآخر من الصدمه..
رتاج بخوف؛شن في..
اتصل الرقم..
طول عادل فتح الخط..
"هاه رتوجتي بروحك قاعده"
طول سكر في وجهها وقعد يشبحلها بنظرة ارعبتها..
رتاج بخوف؛شن في عادل..
وعادل ع نفس وضعيته ماباش يدير اي ردة فعل...
🍁🍁🍁🍁
متكي في الصاله وهي سرحان ويذكر في اللي صار اليوم وابتسامته ع وجهه..فجأة..
سمع صوت باب الشقه يدق بقوة..
انفجع..وناض طول...ومشاله...
ع طلعة امه تجري من الحمام مفجوعه حتى هي..
وصل في الباب وقال؛مني؟
جاه صوت اخته باكي..
"افتح يامجاهد"
طول فتح الباب...
وهي جاته ارتمت في حضنه وقعدت تبكي..
هو حط يده ع ظهرها وهو مصدوم وعيونه ع شنطة حوايجها...
وسدينه لما شافت الشنطه خبطت بيدها ع صدرها وقالت بصدمه؛حي عليا خيرك!!!؟...
🍁🍁🍁🍁
"تمدد ولدي تمدد"
تمدد راجح ع السرير وقال؛قاعده عند كلامك يام..
عواطف بضحكه:كان نشوفها اللي هبلاتك هكي هادي..
راجح؛تو تشوفيها ان شاء الله اخر الأسبوع شن رايك..
عواطف بإبتسامه؛ياودي باهي باهي غير ارقد بس..
ضحك وحط راسه ع المخده...
وفي دار بعيده عن داره شويه..
جيهان؛خوي هدا يعرف كيف يستغل المواقف لصالحه مشي مشي وخلا امي ترضى تخطبله هديكا..
صمت تام ...
جيهان:الو..جومعه..معاي!؟
"ايه معاك...كان هو مصر هكي...خلاص..ماعندك ماديري يعني"
جيهان:لو تو ندير لين نخليه هو بروحه يسيبها ويفوتها..
"ديري اللي يعجبك المهم اني توا بنرقد خلاص..تصبحي"
وسكر عليها..
هي حولت التليفون من وذنها وقعدت تشبحله بحده...
🍁🍁🍁🍁🍁
تاني يوم...
الساعه الحادية عشر صباحا..
في الورشه يخدم ع وحده من السيارات..
والجو سخون ..كان جبينه يقطر عرق..
شويه وجت سيارة درس صاحبها ونزل..
"يامودير"
رفع راسها والتفت..
بعدين مشاله وقال:تفضل..
؛دير في صوت مش عاجبني مش عارف شن مشكلتها..
جهاد هز راسه وفتح غطا السيارة..
:جهاد *****
شبحله وقال:وصلت..
؛نسيبنا..
عقد جهاد حواجبه وقال؛كيف!؟
ابتسم وقال:معاك ضرار ولد عم مريم..قبل نبي نسلم عليك سلام خير من هكي..بس يعني..ضحك وقال..انت مشغول..
جهاد قعد يمسح ايديه في القامجو...بعدين مدها..
ضرار شبح ليده ابتسم تهكما وصافحه وقال:مبروك عليك بنت العم...
جهاد شد ع يده بقوة..
ضرار؛اهم شي تكون متأكد يعني لو قلبها خالي ولايعني..ماكانتش يعني...وضحك..
ابتسم جهاد وهو يهز في راسه..
وفجأه جبده بقوة ودفه داخل..
ضرار اندفع لداخل وكان حيطيح خلاص بس شد روحه ووقف ع حيله..
شبح لجهاد وعيونه توسعوا ع الآخر..وهو يشوف فيه كيف ينزل في السيرناتي متاع الورشه...

#وحدوا_الله
#موعوده_بيك
#البطل المغمور

....يتبع.....