البطل المغمور (الجزء الثاني) زهور القمر

تابع

#البطل_المغمور2  "زهور القمر"
#جمان_فريد
#الجزء_السابع_عشر "gray cat2"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
طلعت من الكوجينه للجنان..
لقتها مقعمزة برا وواضح انها سرحانه..
مشتلها وهي تقول؛نوسه نوضي خشي داخل عن الريح ريح الخريف مش باهيه راهو..
نسيبه شبحتلها وتنهدت بعدين قالت؛باهي..
ناضت بتمشي شدتها من يدها وقالت:مش واخده اجازة انتي..
نسيبه شبحتلها شويه بعدين قالت؛معاش تريحت فيها سيبتها..
عفاف:سيبتيها ولاهما سيبوك؟
نسيبه غيرت عيونها عنها وقالت بحزن؛ماتفرقش هلبه المهم قعدت من غير خدمه...
عفاف قعدت تشبحلها بألم وهي ساكته..
هزت نسيبه راسها وقالت:لكن تو نشوف غيرها الا مانلقى الرزق ع الله...
عفاف طبطبت ع ظهرها وقالت؛خشي بنتي خشي..
نسيبه مشت خشت وعفاف وراها وهي تقول في نفسها..
"مفروض مقعمزة في حوشك معززة مكرمه يابنتي...الله يسامحك ياخليل ياولدي وخلاص"
وخشت داخل وسكرت الباب وقعدت تنادي:صالحه...حاجه صالحه..
شويه وخشت عليها صالحه..
عفاف:سكري الباب ترا..
سكرت صالحه الباب وقالت؛خيرك شن في؟
عفاف بضيق؛بنمشوا لكونيه..
صالحه:اني شن قلت الموضوع هدا..راني حالفه حلف ياعفاف..
عفاف:نمشي بروحي..
صالحه:نحرش ولادك..
عفاف بنفاذ صبر:ياصالحه ربي يهديك الوضع مايتحملش مش وقت عزة النفس والله ماوقتها..
صالحه هزت راسها وقالت؛ديري اللي يريحك لكن اني مش معاك في شي مراة عندي الضغط مانتحملش حرق الدم..
وفتحت الباب وطلعت من حداها..
وخلتها تبكي بصمت ع حالها وضعفها وقلة حيلتها..
🍁🍁🍁🍁
نهاية الدوام...
حدا الباب واقفات يستنوا...
وكل وحده فيهم في جهة...
اللي يشوف حالتهم مايقولش كانوا صاحبات بكل..
بس كل وحده فيهم يعلم الله باللي في داخلها..
كل وحده فيهم حاسه روحها ناقصة من غير التانيه...
ومافي حد يقدر يعوض المكان اللي خلاته كل وحده فيهم فاضي...
فجأه..
جت سيارة بيضا نوع كيا سيراتو..درست قدام المدرسه...
دانيه لما شافتها شبحت لسارة..
لاحظت عليها الارتباك والحزن اللي بدوا ع وجهها وهي تشوف لصاحب السيارة .
وهو كان يشوفلها بنظرة عتاب فيها كلام كأنها قاعده تسمع فيه..
وجعلها قلبها اكثر ماهو موجوع..
دانيه مشت بسرعه للسيارة وركبت وهي تقول؛مفاجأة..
مجاهد وهو يشوف لسارة؛كلمت سواق الباص قتله مايجيش اني بنروح بيها..
دانيه:باهي امتى بنروحوا؟
مجاهد؛اصبري...
وقعدوا عيونه ع سارة اللي كانت مقعمزة وعيونها لوطا والدموع ينزلوا منهم وهي تمسح فيهم...
ع جية باصها ماانتبهتلاش لين دار كلاكس..
شبحتله بعدين ناضت ومشتله وركبت وهو تحرك طول..
ومجاهد بعدين تنهد تحرك حتى بسيارته وقلب اخته موجوع عليه..
🍁🍁🍁
روحوا للحوش..
ودانيه طول مشت للدار...
خشت عليها رتاج وهي تقول؛تليفونك من بكري يرن..
دانيه وهي تفك في شاربتها قالت؛الله!
ومشت طلعاته من الدرج..وفتحت ع المكالمات لقتهم من راجح ابتسمت بخجل..
رتاج بإبتسامه؛معاش اتصل من يوم المستشفى ولا..
دانيه هزت راسها بإيجاب بعدين قالت؛نتصل بيه؟
رتاج؛ايه اتصلي شوفي شن يبي..
دانيه خدت نفس عميق...
واتصلت بيه...وحطت التليفون ع وذنها وقعدت تراجي وقلبها يدق بقوة..
رن مرة ونص وانفتح الخط..
"باهي اللي عبرتينا "
ضحكت وقالت؛كنت في المدرسه وفالمدرسه ممنوع التليفون..
"راح عن بالي بكل...تمام..شن جو"
دانيه؛تمام الحمد لله..
"شن حال العيله"
دانيه؛كلهم كويسين الحمد لله..شن حال عمي وعمتي..
"والله عمك وعمتك وولدهم يراجو امتى تولي معاهم في حوش واحد"
هي ابتسمت بخجل وحطت يدها ع فمها وقعدت ساكته..
ورتاج اللي كانت تضحك بصمت وطلعت وخلتها..
"مانبيش نتجاوز حدودي بس روحي مكبوت اقسم بالله..لولا ظرف اختك قريت فاتحه"
ودانيه ولاكلمه متحشمه ع الآخر..
"دانيه..الو...وينك..رقدتي!!؟"
ضحكت وقالت؛كلامك مانقدرش نرد عليه..
"عارف عارف..المهم اني متصل بيك نسألك كان عجبوك حاجات"
دانيه بإبتسامه؛ايه حلوات..ذوقك؟
"ايه"
دانيه بضحكه؛غريبه
"شن الغريب..قصدك كان نخدم في الشرطه معناها مانفهمش في الحاجات هادي..واخده فكرة غلط عن ضباط الشرطه راهو"
ضحكت وقالت؛اهو حاجه كويسه اكتشفتها فيك..
"وياما تكتشفى القدام وتعرفي انك محظوظه "
دانيه ضحكت وقعد ساكته..
"ايه بنقولك السلسله زي الدبله مانبيكش تحوليها من رقبتك بكل"
عقدت حواجبها وقالت؛سلسله!؟ سلسلة شني!؟
••وهو في باحة المديريه..
راجح وهو عاقد حواجبه؛كيف سلسلة شني! شن هما الحاجات اللي جوك دانيه..
"الدبل بس وحده عمليه والتانيه سوليتير"
هو سكت شويه بعدين قال؛ترا سكري دانيه..
سكتت شويه بعدين قالت
"سلام"
سكرت من هني..وهو طول اتصل بجيهان..
🍁اللي كانت تبخ في عطرها بش بعدها تنزل تتغدا في حوش العيله..
رن تليفونها قاماته شافت المتصل طول ردت..
جيهان وهي تساوي في شعرها؛هلا رجوحي..
"هلا...جيهان امس انتم شن رفعتوا لدانيه"
جيهان:شن بنرفعولها غير اللي انت بعتته معاها زوز دبل وسلسله..
"متأكده!؟"
جيهان؛مالاشنو...علاش شن في!؟
"شي شي سلام" وسكر...
هي استغربت وحطت تليفونها ع الطاوله..
ع خشة جمعه؛من كنتي تكلمي؟
جيهان؛راجح..
جمعه مش متحمل يسمع اسمه قاللها؛هيا بسرعه انزلي امي تراجي..ومشي..
هي عكرشت وجهها بإنزعاج ومشت طلعت وراه...
🍁نزلت لوطا لقت امه موتيه الغدي..
قعمزوا ع الطاوله وهو يقول..
جمعه؛مفروض انتي اللي ديريه..
جيهان بهمس:والله!.انت تعرفني مانعرفش نطيب..
جمعه:تعلمي..
جيهان بش تقصر الشر سايراته وقالت:ان شاء الله..
ع جية امه..
عيشه:جيتوا مرحبتين مرحبتين..هي ابدوا ابدوا..
جمعه:عطيك الصحه..
عيشه:سلمك ولدي..
هو نخص رجل جيهان من تحت الطاوله..
هي انتفضت بعدين قالت؛تسلم ايديه عميمه..
عيشه؛صحتين بنتي...ايه حقه بنقولك غدوة بتجيني المراة اللي تنظف نخليها تركب شفتك..
جيهان؛اوكي مش مشكله..وقعدت تاكل..
وجمعه يشبحلها ع جنب وقلبه منفوخ منها مش راضيه الوضع بكل..وقاعد يتحمل فيه غصب عنه..
ورطه ورط فيها روحه ومش عارف كيف يخلص منها...
🍁🍁🍁
"متأكده يام!؟"
عواطف:كيف قصدك نكذب عليك..
"حاشاك"
عواطف؛برا حاسبها هي مش اني..شوف وين مشت بيها وقاعده ديرلك في الجو..
"سلام يام...سلام"وسكر..
وعواطف رفعت حاجبها وقالت:الشلافطيه هادي هلبه عليها البلاكيور..مش سلسلة الماس ماتحلمش بيها حتى الحلم..
🍁ودانيه من بعد ماسكر منها راجح وهي حاله..
فهمت ان في شي تاني جي مع الحاجات لكن راح..
سدينه بتوتر:اني والله ماريت حاجه..شفتها وهي تفتح الباكو وطلع منه في الدبل وبعد ماروحوا خدتيه انتي ودستيه..
دانيه بقلق وانفعال:لايام كلنا سقدناهم وين جو مروحين وخلينا الباكو في الصاله..
"شن قصدك"
التفتت دانيه؛اللي فهمتيه..
مقبوله:تخنبي فينا !؟
دانيه:والله ماكان في حد غيركم في الصاله..
سدينه:دانيه شن تقولي تحشمي ع وجهك..
دانيه؛هدا اللي صار يام مافيش غير كان هدا وين بطير السلسله وين بتختفي..
رتاج بضيق؛المشكله المراة مافتحتش الباكو بش شفنا شن فيه وقتها وشن شكلها السلسله..
دانيه؛ماهو حني دراويش ومانركزوش..الباكو كبير واضح مش باكو دبل بس..
مقبوله؛مازال مصرة تخنبينا...
دانيه:عطيني تفسير تاني؟! ع جية بوها ورشيد يدف بيه فالكروسه..
مجيد بغضب:ياقليلة الربايه تخنبي فيها فوق ماخلتاك امس تستقبلي ناسك في شقتها..
مقبوله؛جتني تترجى فيا هي وامها..
رتاج؛اللي يسمع يقول شقتك حق..
مجيد؛ضمي فمك انتي..
رتاج قعد تشبحله بغل وعيونها معبيات دموع..
مقبوله وهي تشوف لدانيه؛كان انتي عمرك ماريتي ذهب في حياتك حني نلبسوا فيه من وحني في القماط..سوا اني ولاخواتي ولابناويتهم الذهب اللي عندهم يشري الشقه اللي انتي فيها توا...المحروم بس هو اللي يمد يده...
وشبحلها من فوق لتحت ومشت..
مجيد بغضب:خزي ع كواسم المعفنه..تفي...
وقعد بروحها يتحرك بكروسته..
ورشيد يشوف لأمه وخواته بضيق..
مسحت دانيه ع شعرها وقالت؛حي عليا ياربي كيف ندير شن نقوله كان كلمني مرة تانيه..
رتاج؛اهدي دانيه بالله عليك معاش تحرقي دمك قوليله لقيتها كانت طايحه في الصاله من باكوها..
سدينه؛ايه ايه..
دانيه:وبعدين..هو قالي مانبيكش تحوليها بكل!
رتاج:من هني لهداكا الوقت يحلها ربي..
دانيه بدت تبكي وهي تقول؛مش عارفه علاش ديما يصير معاي هكي مش عارفه علاش هكي انتي ديما منحوسه وماتكملش معاي..
جتها امها ضمتها وقالت؛ماتقوليش هكي بنتي..هادي عوينه عوينه وطارت..
دانيه ببكي:حاسديني ع شويه الفرح اللي فرحتهم امس يام..
رتاج قعدت تمسح في دموعها وهي محروقه ع اختها وكلام مقبوله زاد حرقها..
وكل ماله قلبها يزيد يتعبى كرة اتجاه الراجل اللي خلاهم يعيشوا هالحاله..بوها...
🍁🍁🍁🍁
الساعه الثالثه بعد الظهر..
مقعمز يتفرج ع التلفزيون بعد الغدي ع برنامج جايب تقرير عن البزار..
جاته خالته قعمزت حداه ومدتله طاسة شاهب اخضر وهي تقول..تفضل..
هو خداها وقال:صحيتي.. ومركز ع التلفزيون..
شويه جابوا لقاء نوال...
هو خدي الريموت وعلى الصوت..
وماجده تشبحله وتشبح للتلفزيون..
ع جية سارة قعمزت حداهم وقعدت تشوف للتلفزيون..
ماجده؛هادي ام فاتح ولا..
هيثم؛امم..
سارة ركزت ع بوها كيف منتبه مع التلفزيون..
حست بشعور ضايقها هلبه...شافت لنوال في التلفزيون..
بعدين قامت عيونها وشافت للوحة زياد..
فجأة رن تليفون هيثم..
هيثم وهو مازال مركز ع التلفزيون خدي التليفون وفتح الخط ورد..
هيثم:ايوه.......
تبدلت ملامح وجهه للخوف بعدين قال...جاي جاي...وسكر..
وناض طول..
سارة بخوف:شن في بابا!؟
هيثم وهو طالع من الصاله؛مدرسه خواتك قالولي نجي لأمر ضروري..
ماجده بخوف؛ان شاء الله مش ريحان بس..
هيثم كان يرعش من خوفه عليهم..
بسرعه لبس في رجليه وطلع يجري..
ووراه ماجده وسارة اللي كادوا يموتوا من القلق...
🍁طلع هيثم بالسيارة وهو كان يلقى يخليها طيارة بس يوصل فيهم بسرعه..
ووصل..وخش يجري للمدرسه...
•••••••••
"اني مصدومه يادكتور من امتى ريحان هكي"
ريحان؛اني ماغلطتش ياأبله دافعت ع ولد جيرانا..
جنان؛ايهاب كان راكب فوقه ياابله قريب خلاه يموت..
المديرة :مشيتوا للأبلات خبرتوهم..
ريحان:باهي لما نمشوا للابلات ونجوا مرة تانيه نلقوه ميت..
المديرة تنهدت وقالت؛شن دكتور ماعندكش تعليق ع تصرف بنتك..
هيثم وهو مصدوم حرك راسه بالنفي وقال:لاتعليق صراحه..
••••••
صوت ضحكها مسموع في الحوش كله..
هيثم؛والله مافي حاجه ضحك ياخالتي زياد وهو صغير ماداره الجو هدا..
سارة وهي تحاول تشد ضحكتها:عيب ريحان حبيبتي انتي بنت مايجيش تضربي الولاد..
هيثم بتهكم:لا والله تعبتي روحك....
سارة وهي شاده ضحكتها؛خيرك بابا!
وماجده تضحك..
هو رفع ريحان في غمره وشد جنان من يدها وقال؛اني اللي نعرف نتفاهم معاكم..ومشي بيهم لدارهم..
ريحان زعلت...
وجنان قالت:شن دخلي..
هيثم؛ادافعي عنها وعاجبك..
وخش بيهم الدار وسكرها..
وسارة وماجده قريب يموتوا من الضحك..
🍁وفي حوش الجيران
كانت اصوات الضحك مسموعه..
عفاف بدموعها:صار هي اللي خلصاتك ياعرفه..
نسيبه بضحكه:سلمها الحمشه طالعه لعمتها..
مريم وهي تضحك:صحة ليها قد روحها..
تهاني وهي تشوف لعرفه بإبتسامه؛وبعدين شن صار عروفه..
عرفه وهو محرج: خدتنا الابله للإدارة..
صالحه بضحكه؛عابيه عليك راجل مايغلبك حد..بنت حامت عليك..
عفاف وهي تضحك؛ماتقوليش هكي..
صالحه؛لاياوخيتي حسها حرقتني ولد يبركوا عليه وتحامي عليه بنت..
هو من الانحراج مشي وخلاهم..
ناضت وراه نسيبه وهي تقول:عرفه..عرفه...
وهما يضحكوا...
🍁خش للدار ونسيبه خشت وراه..
قعمز ع السرير وهو معصب..
هي حطت ايديها في نصها وقالت؛شني بتخلي كلامهم يزعلك ويبكيك..انت راجل..مفروض تتحداهم..
شبحلها وقال؛شن ندير يعني؟
نسيبه نزلت ايديها وقالت؛تتعلم كيف دافع عن روحك..
ودارتله حركه من حركات الكارتيه..
هو ابتسم..
نسيبه ضحكت ونزلت ايديه وقالت؛اني تو نعلمك كم تكتيكه  ماتخلي حد يغلبك..
هو قعد يشبحلها وخلاص..
هي غمزت بعينها وقالت:ديل؟
هوضحك وقال؛ديل...
🍁🍁🍁
"انتي بنت يابابا..والبنت ماديرش هكي..البنت ربي خلقها لطيفه حنينه مش ليها العنف والضرب..."
ريحان؛خي يابابا هكي زي البنات الدلوعات..
هيثم ضحك  وقال:دلوعات شني بس..! شوفي سارة شن رايك فيها..
ريحان:باهي يايابا اني نبي نولي زي عمتو..
هيثم ابتسم بضيق وقال؛تمام زي عمتك..وعمتك بنتي ماديرش في المشاكل ماتضربش الا اللي يضربها ومادخلش روحها في المشاكل..
نزلت ريحان راسها وقعدت ساكته وجنان تشوفلها...
هو باس راسها وقال:حبيبتي.
هي خشت لحضنه..وجنان خشت معاها..
هو ضمهم بقوة وقال:واااك..قداش نحبكم..
ضحكوا الزوز..وهو ضحك معاهم..
بعدين بعدت ريحان وقال:بابتي..
هيثم؛اممم..
ريحان؛نبي نخش نادي كاراتيه..
هيثم غمض عيونه بنفاذ صبر..
ريحان؛ارجوك بابا..بالله عليك..
فتح عيونه وهو يشوفلها..
باساته من خده وقال:حبيبي انت وعمري..
هو شبحلها ع جنب.
ريحان وهي تتصخفله:بابتي..
وجنان تشوفلهم وهي تضحك..
•••••••••••
طلع عليهم في الصاله وهو يقول..
هيثم؛مافيش مافيش...نسخه...
ماجده بضحكه:من نوسه ولا؟
رفع هيثم حواجبه ومشي للكوجينه..
وسارة وماجده يضحكوا..
🍁🍁🍁🍁
الساعه الخامسه والنصف بعد العصر...
في مقهى البيرق..
احسان بضحكه؛انت مفروض تفرح ماتخافش عليها البنت اللي هكي..
هيثم:لا نخاف عليها يااحسان مرات تختلط عليها الامور وقتنا هدا يخوف يابال وقتهم هما بعدين..
احسان هز راسه وقال:متفهمه خوفك..بش شوف لأختك رياضيه ومتعلمه رياضة فنون قتال وعايشه زيها زي اي مراة..انتم بس تابعوها وخلي سارة تكون قريبه عليهم بش توجههم وهما يتأثروا بيها..
هيثم وهو يفكر هز راسه بإيجاب بعدين شبحله وقال؛شن جو المثنى...
احسان؛اهو بين كرة السله وبين القرايه..اسألني اني عن حالي..
هيثم؛وخيره حالك..
احسان؛مليت من الوحده نبي نتزوج..
هيثم؛وشن مانعك..
احسان تنهد وقال:مش عارف كيف نحصل معاها فرصة..نبيها تعطيني فرصه نقعمز نحكي معاها وتعرفني كويس بش تلغي الحكم اللي فراسها عني..
هيثم:حاول..
احسان؛كيف نحاول..تبيني نولي مراهق واني فهالعمر ونقعد نجري في جرتها؟
هيثم؛شن رايك تبعتلها وحده تكلمها قريبتك يعني وتحاول تقنعها..
احسان بتفكير:ينفع!
هيثم هز راسه وقال؛ينفع ينفع ينفع مايضرش..
احسان تنهد وقال:تو نشوف...
سكتوا شويه وهما يشربوا في القهوة بعدين احسان قال:الوضع الاقتصادي للبلاد كل ماله في تحسن..
هيثم:اللي ماسك الوزارة نعرفه شخصيا رجل مناسب في المكان المناسب..
احسان:هو هدا لما يكون الرجل المناسب في المكان المناسب كل شي حيمشي للأحسن...
🍁🍁🍁🍁
في احدى زوايا السجن التي لاتصل لها العيون ولاتسمع عنها اخبار...
كانوا الزوز واقفين واحد يحكي والتاني يسمع..
:مادام قاعد يتبع معاك الاسلوب هدا معناها خلاص حطوك في روسهم..
خليل بقلق؛خايف عليه على اماليا يا ####
:ماتخافش..عندك علم ان الشرطه ورا كل نفر من عيلته وين مايمشوا..امك ..مرتك..اختك..خوتك..نساوين خوتك..حتى حوشكم محطوط تحت المراقبه وكلهم ع أهبة الإستعداد..
خليل بإرتياح؛تمام..يعني اني توا نرخي معاه..
:لا مازال خليه يزيد يشد عليك هو توا مش من مصلحتك يقرب اي حد يخصك بسو هو يبي يخوفك وبس..
هز خليل راسه وقال؛تمام تمام..
حط يده ع كتفه وقال:اطمن...
ومشي....
وقعد خليل واقف للحظات...بعدين مشي حتى هو من طريق تانيه..
🍁🍁🍁🍁
"اني توا نبي نعرف مكان مسعود رايس وين برا البلاد داخل"
راجح؛زي ماتعرف من سنين طويله بعد ماصارت العمليه الكبيره سنه****** معاش ولى ليه مكان معروف وفي من يقول مات..
رضوان بوكراع؛اني مانصدقش موته لسبب واحد..المنظمه متاعه قاعده ماشيه بنفس النظام ومع السنين تكبر وتقوى تخمل لكن ماتموتش تهفت فترة وتنشط فترات وهدا هو نفسه النظام اللي ماشي من 15سنه ماتغيرش...
ضابط تاني معاهم؛زي ماقلت سيادتك العروق لازم يبيسوا بش الراس يموت..اللي تحته حيوصلونا ليه..
راجح؛الكبير..
الضابط؛اهو الكبير هدا ذراعه اليمين راجل خبيث جدا..مذكره يارضوان ايام كان ضابط في الداخليه..
رضوان؛اسعد كان في دفعتي..قعد سنين يخدع في وزارة بحالها الله يرحم محمد الخمسي هو اللي كشفه ودفع الثمن..
كلهم قالوا:الله يرحمه..
الضابط؛المهم هما توا مفهمين الكل ان اسعد هو الراس الكبيرة زي مايقولوا..وفي الحقيقه اسعد نفسه في من يوجه فيه..
راجح؛وهادي مهمة خليل..يعرف من يكون اللي يوجه فيه ووين يكون ومنو من الداخليه قاعد يتعاون معاهم ويمشي في امورهم ويحمي فيهم..
رضوان؛واني من بعد الله معتمد عليه هلبه...ان شاء الله يحقق النتيجه اللي نطمحولها..
راجح؛ان شاء الله...
🍁وهالمهمه كبيرة وخطيره...محتاجه ايمان قوي وقلب قوي...وخليل بس يكسب هالحاجتين..
قعد يردد في الحوقله زي النفس...
"لاحول ولاقوة إلا بالله"
🍁ونسيبه قاعده تردد في الإستغفار في كل لحظه راجه تفريج الكرب وايجاد سبيل للرزق...
وعفاف استخدمت الدعاء...دعاء المضطر المحتاج اللي ربي يستيجبه لامحاله..وهي لأنها عارفه مدى رحمته وكرمه قاعده عند باب دق فيه وتنادي لين ينفتح وتنزل الإجابه...
🍁🍁🍁🍁
تاني يوم..
في المدرسه...
زي كل صبح...
لازم يركبوا البنات اللي عليهم الدور في النظافه بش ينظفوا فصولهم ومايحضروش التمرين الصباحي...
بعد ماتم الطابور وركبوا الطالبات للفصول...
🍁في فصل دانيه...
دانيه؛كاتبك ياربى خودي..
ربى ضحكت وخداته..
انبار؛معاش تتكسلي علي مقعدنا مرة تانيه..
ضحكوا البنات...
"حيي بنات"..
كلهم شبحوا لمصدر الصوت..
كان لزميله في صفة الروشن..
تشبح للمقعد وهي تقرا..
(صباح الخير سنه ثالثه علمي راجو اللي جاي مازال احلى gray cat)
كلهم مشوا شافوا للمقعد...
وحده منهم قالت؛من عليهم النظافه اليوم..
:لالالا اقسم بالله ماحني والله العظيم..
ازهار:ومن غيركم ركب للفصل اليوم..
:قسما بالله مادرنا حاجه ولاريناها الكتيبه ع المقعد اصلا..
:ايه صح والله ماريناها...
دانيه مررت نظرها ع الكل وقالت؛عاد خلاص يابنات بياخت راهو اللي دير فيه الجو هدا تقول..
كلهم قعدوا ينكروا اي علاقه ليهم بي اللي صار امس وتوا..
:اصلا حني قبل لتركبوا مشينا للحمام مع بعض غسلنا ايدينا ووجوهنا..
البنات شبحوا لبعض وهما في قمة الإستغراب..
وحده منهم قالت؛حني الجو هدا ماكانش عندنا خشنا علينا جديد..
كلهم وجهوا انظارهم لتسنيم وربى وانبار..
ربى؛خيركم تشبحولنا هكي! وبعدين شن قصدك حبيبتي انتي..حني في المدرسه اللي كنا فيها كنا منضبطات وماعندناش في المشاكل بكل وبري  أسألي كان مش مصدقه...
ع خشة ابله الماده سلمت وهي مستغربه..
هما رجعوا لأماكنهم..
الأبله؛خيركم شن في؟
دانيه:شي ياأبله...
والباقي احتفظوا بصمتهم..
الابله مررت نظرها عليهم وقالت؛باهي افتحوا كراسات الحصه...
🍁🍁🍁🍁
تغسل في ماعين الفطور في الكوجينه..
وعزوزتها تكنس في الحوش بالمكنسه الكهربائيه..
تليفون عزوزتها رن وكان حداها في الكوجينه...
هي مسحت ايديها خداته شافت الرقم ومشت طلعت بيه من الكوجينه..
نسيبه بصوت عالي؛عمتي...عمتي..
عفاف شبحتلها بعدين طفت المكنسه..
مدتلها نسيبه التليفون وهي تقول؛رقم غريب..
عفاف خداته وفتحت الخط وردت؛ايوه..
جاه صوت انثوي يقول..
"ايوه السلام عليكم هدا رقم عفاف *****"
عفاف؛ايه تفضلي..
"اهلين بيك وخيتي عفاف..معاك منيرة الباروني صاحبة معمل بيت العيله لمأكولات المناسبه.."
بإستغراب شبحت لنسيبه وقالت؛تفضلي
"والله اني ليا فترة ندور مراة خبرة في تطييب المناسبات يعني اطيب الماكله الغليظه وفي من دلني عليك بالآسم"
ابتسمت عفاف بفرح..
"اني نبي المعمل متاعي فيه كل شي ومن كثر ماشكرولي فيك حاسة ان حنديروا مع بعض شغل مليح شن رايك"
عفاف؛الحق يعني فاجئتيني..
"تمام..نبعتلك عنواني بكرا ان شاء الله تجيني للمعمل ونزيدوا نتفاهموا"
عفاف هزت راسها وقالت؛ان شاء الله ان شاء الله..
"اتقفنا..هي بالسلامه"
عفاف:بالسلامه..سكرت..وشبحت لكنتها وضحكت..
نسيبه؛مني!!؟
عفاف بضحكه فرح؛هادي وحده عندها معمل متاع هادم اللي يطيبوا في الحار قالوا يبوا وحده خبرة في تطييب الماكلة الغليظه..
نسيبه بإبتسامه فرح؛حلو
عفاف؛قالت تعالي ع العنوان اللي بنبعتهولك غدوة نتفاهموا..
نسيبه؛خلاص غدوة ان شاء الله نرفعك..
عفاف:كان تريحي روحك راك حامل..
نسيبه؛مشوار سيارة شن بيديرلي..
عفاف:مش عارفه اني نشوف فيك هكي مش راده بالك من روحك..
نسيبه بضحكه؛راده بالي ماتخافيش..
ابتسمت عفاف وقالت:خل نمشي نخبر صالحه..
ومشت طول وعيون نسييه معاها وهي مبتسمه بعدين تنهدت وقالت؛يارب...
🍁🍁🍁🍁
في المدرسه..
الساعه الحادية عشر والربع وقت الإستراحه..
كانت دانيه مع بنات فصلها كيف بينزلوا للساحه..
لولا صوت جيهان اللي وقفها..
دانيه:نعم..
جيهان:تعالي شويه..
دانيه مشتلها والبنات نزلوا..
وصلت في جيهان وقالت؛نعم ياأبله..
جيهان:لا مش مكلماتك بصفتي ابله توا..نبي نسألك ع حاجه..
هزت دانيه راسها وقالت؛اسألي..
جيهان؛العقد اللي جبناه حقه راح منك؟
دانيه وهي تحاول تخفي ارتباكها:لاماراحش مني لقيته..
جيهان؛باهي شن شكله؟
دانيه انطمست مرة وحده..
جيهان:معناها مالقتيشي بكل..
دمعوا عيون دانيه وقالت بتوتر؛والله ماشفته اني نحسابكم جبتولي دبل بس..
جيهان؛لا جبنا الدبل ومعاهم عقد خفيف الماس..
توسعوا عيون دانيه ع الآخر من الصدمه..
جيهان؛ع العموم ماتشغليش بالك خلاص..
دانيه وهي على وشك البكاء؛شن قال راجح؟
جيهان:معصب ومش فاهم شي..تو نكلمه ونوضحله اللي صار..
دانيه مسحت دموعها وقالت؛والله ماشفته الله..
جيهان؛واضح..مش لازم تبكي..بري انزلي بري الامور كلها حتكون تمام..
هزت دانيه راسها وقالت؛شكرا..
جيهان ابتسمت مجامله وقالت:العفو..
مشت دانيه ونزلت..
ع جية جمعه شافها وهي تبكي قعد يلحق فيها بعيونه بعدين مشي لجيهان..
جمعه؛خيرها!
جيهان برفعة حاجب:حاجه بيناتنا..
جمعه بلامبالاة مصطنعه؛تصطفلوا..
جيهان قلبت عيونها وقالت؛تبي حاجه حبيبي..
جمعه؛تعالي اشربي معاي قهوة...
جيهان بإبتسامه:باهي..
ومشوا مع بعض وجمعه ناوي يجبد منها الدوة ويعرف دانيه خيرها..
.🍁فهالوقت..
خشت امه لشقتهم مع الشغاله..
وجتها من صدمه من وضع الشقه وحالها..
كيف مغبرة..وفيها ريحه مش حلوة
والكوجينه ملخبطه...
بس الطامه الحقيقيه كانت دار النوم..
عيشه مش مصدقه عيونها..كيف ولدها عايش فهالجو وولامرة شكي منه..
جمعه اللي يحب كل شي يكون مرتب ونظيف عايش وسط هالفوضى!؟
وقعدت عيشه في الحشمه مع الشغاله اللي جاية ضم في شقة اشبه بشقة عزارى...مش عرسان..!
🍁🍁🍁🍁
ركبوا البنات للفصول من الإستراحه...
ماعدا زوز كانوا في الحمامات..
ميس؛الايلانر مساوي..
روعه؛عسل ياحبها..
ابتسمت ميس وقالت؛لما نهبله اليوم..
ومشوا طلعوا من الحمامات جري وركبوا فوق..
لما وصلوا لقوا جمعه في وسطه..
ميس بإبتسامه؛نخشوا استاذ..
هو شبحلهم من فوق لتحت بعدين شبح للاب توب وقال:خشوا..
هيا بمياعه،شكرا..
وجمعه واغلب الفصل مشمزئين..
بعدين ناض وقف وقال:انتبهوا معاي..
وبدي يشرح..
وميس تحاول تلفت انتباهه بنظراتها وحركاتها وكلامها..
وهو ولامهتم...اكثر تركيزة ع الطالبات المتفوقات ومنهم سارة..
اللي ميس كان تلقى تخفيها...
🍁وفي الفصل الثاني..
كانوا ياخدوا في حصتهم عادي..
بس دانيه كانت سرحانه في حكاية السلسله ومش مع الأبله بكل...
••••••••••
مكالمه هاتفيه...
سدينه:والله ياوخيتي ماريناها ولاعارفين شن شكلها..
"كيف هكي ياسدينه راهو حقها هداكا. الحساب تحسابوا ولدي راقد ع بنك"
سدينه عقدت حواجبها وقالت:مافهمتش قصدك؟
"والله اني مانبي نشرح شي..بس السلسله هادي لازم تطلع راجح متعفلق هلبه راهو..عن اذنك مشغوله..بالسلامه"
وسكرت عليها...
نزلت سدينه التليفون وهي تفكر في كلام عواطف ودمها محروق حرق..
هي من اول ماجوهم قاعده تشوف في تصرفات كلها اهانه وحست انهم يديروا هكي بالقصد بش تجي منهم هما ويسيبوا...
هني سدينه قررت تاخد موقف وتخلي بنتها تاخده معاها...
🍁🍁🍁🍁
وعند بنتها....
تمت الحصه وهي شبه ماركزت منها ع شي..
هي وزميلاتها دسوا كتابات المادة هادي وطلعوا اللي بعدها..
في المقعد اللي وراها..
:ترا كراستك خوله..
؛خوديها..
خدت البنت الكراسه وفتحتها بتشوف الواجب..
انصدمت لما شافت كلام مكتوب فيها..
قامت الكراسه وهي تضحك وقالت:اسمعوا يابنات..
صاحبه الكراسه قالت؛خيرك! شن فيها الكراسه!
طلعت البنت من المقعد وقعدت تقرا..
(انتي ياخوله اللي وليتي كونان ع غفله وتقولي البنات الجدد مالا هو خودي اني نعرف انك السنه اللي فاتت خانبه فلوس ابله العربي من شنطتها وشدوك بالجرم المشهود ودسوا عليك)
كلهم انصدموا..
والبنت وهي ترعش جبدت الكراسه وجبدت زميلتها من وشاحها وطاحت فيها ضرب..
والزوز قعدوا يضاربوا ويترايشو..
وحزوا بيناتهم البنات بالسيف..
ربي؛هبلتوا!
البنت اللي انفضحت؛انتي ياحقيره اللي ديري في الجو هدا بلعان..
؛عينك اقسم بالله ماني ولاكنت نعرف قبل اليوم انك خنابه..
:ماتقوليش خنابه ياحقيرة ..وقعدت تتلاحق فيها بتضربها..
وربى بيناتهم دف فيهم عن بعض..
ع خشة ابله البنت انصدمت وين شاقت حالتهم وقالت؛خيركم خير دعوتكم كنتوا تضاربوا!!
رجعوا لمقاعدهم وقعدت ساكتات..
والبنت اللي تعاركوا يساووا في اوشحتهم..
هي قعدت تشبحلهم وقالت:مانبيش نضيع وقت الحصه ع الفاضي..هيا افتحوا كراسات الواجب بنشوفه...
البنت مزقت الورقه اللي فيها الكلام ولوحتها تحت الدرج وهي تتحلف في اللي جنبها؛تو نوريك عليها..
؛بري طيري ترا..
الابله؛انهوا الصوت..
سكتوا هما الزوز...
انبار بهمس؛باديه نخاف..
دانيه بهمس؛حتى اني....
"الصوت انهوا الصوت"..
سكتوا حتى هما لكن قعدوا يهدرزوا بالكتابه ويعبروا عن قلقهم من اللي قاعد يصير
🍁🍁🍁🍁
وفي مدرسه تانيه..
وقت انتهاء الدوام..
كانت تهاني تراجي في الباص وهي تقرا في كتاب اسمه...
"عن اشياء تؤلمك"
هالكتاب كانت تحس فيه يعبر عن هلبه حاجات قاعده تحس بيها...
وقفت عند جمله قعدت تقرا فيها بعيونها مرارا...
(سلام عليك
بما صبرتي فوق قدرتك..وبما تحملتي فوق طاقتك..وبما خذلتي قدر طيبتك..وبما تألمتي قدر عفويتك وبما بكيتي قدر لياليك الموحشه...وعقارب ساعتك اللي لاتتزحزح..
سلام عليكي لا نكرتي قدر معروفك..وبما طعنتي قدر ايمانك وتسليمك..وبما واجهتي من خيبات وتعثرات وآنين احتل ضلوعك)
مسحت دموعها اللي نزلوا..
سمعت صوت كلاكس الباص..
ناضت ومشت طلعتله...
وهي طالعه اتفاجئت وين شافت سيارة "تويوتا" دبل قابينه لونها اخضر غامق مدرسه قدام المدرسه..
هالسيارة لمعاذ خو مريم اللي كان يشبحلها من ورا النظارات وهو مبتسم..
هي ارتبكت ومشت بسرعه للباص وركبت...
تحرك الباص..
وهو ضحك وعض ع شاربك بعدين تحرك وراهم...
هي في الباص فتحت الكتاب عشوائيا من ارتباكها تبي تقرا وتشغل نفسها...
ويجي قدامها مقطع وكأنه رساله ليها...
(اعتدلي..ولاتفتحي باب قلبك الا لمن يجبد طرق باب بيتك اولا..فالذي يريدك صدقا ان لم يكن ماهرا بطرق ابواب الحلال..فلايؤمن ولايستأمن على قلب..او عرض..او سمعه..او شرف)
هي خدت نفس وهزت راسها بإيجاب وكأنها تقول..وصلت...
🍁🍁🍁🍁
شاد في يده قطعه فخار كان يرسم في اسمها..
وصاحبه يشوفلها بإبتسامه..
وهو بإتقان وعنايه يرسم في الإسم...
فاتح؛منسجم هلبه..
زياد؛فوتني..
فاتح بصوت منخفض:من هي تهاني هادي!؟
زياد فنص فيه ووجهه ولى احمر..
فاتح بضحك حط يده ع مكان الكبد واشر براسه وهو متسائل..
"الكبيده ولا"
زياد اشر ع عين فاتح..
فاتح ضحك وقال؛والله الاهي..
كلهم شبحولهم..
زياد:اخدم اخدم خيرلك ماطلعنيش عن طوري..
فاتح وهو يضحك قال؛هازر هازر..."حاضر"
وزياد قاوم ضحكته وهو رافع حاجبه ورجع لهي باللي يدير فيه..لما شاف اسمها مرر نظره عليه وقال..كله منك..خلتيني مضحكه...
فاتح وهو يغني؛ياعيني الواد تجنن..الواد بيكلم نفسوا..
وبدي يدربك وهو يغني..ياعيني الواد اتجنن..الواد بيكلم نفسوا..
والموجودين يضحكوا..
فجأه فاتح فنص بضحكه ؛لااالاا.. وتقا وجهه بإيديه اللي جي عليهم شبشب زياد...
🍁🍁🍁🍁🍁
نهاية الدوام..
طالبات فصل سنة ثالثه علمي..
كانوا واقفات مع بعض في الساحه..
:اسمعوا يابنات مش شرط تكون من فصلنا اللي دير في الجو هدا مرات من فصل تانيه تاني فيهم بنات كانوا يقروا معانا وعاودوا السنه..
دانيه:صح..روضه وسميرة وسندس وريمه.
:باهي علاش يديروا هكي!؟
:غيرة وحسد حني عدينا لسنه تالته وهما عاودوا..
ازهار؛خلاص غدوة نحصلوا عليهم..
دانيه:ايه ياسر من الجو البايخ اللي يديروا فيه اخر سنه ويبوا يشوشونا...
انبار:لكن والله بديت نخاف..
:حق شي يخوف..
ربى؛تسنيم انبار الباص جي..باي صبايا..
تسنيم وانبار:سلام..
ومشوا معاها...
وشويه وبدوا يروحوا البنات..
دانيه فاتت من قدام سارة وكأنها ماتعرفهاش.
وسارة تبع فيها بعيونها وهي مضايقه ع الأخر..
شويه جي باصها حتى هي وطلعتله...
🍁🍁🍁
روحت دانيه للحوش..
خشت طول لدارها بدون ماتسلم..
مازالت شاغله بالها حكاية السلسله بالذات بعد عرفت انها غاليه هلبه..
بدلت حوايجها..وطلعت توضت بعدين ولت للدار وصلت...
وبعد كملت صلاة مشت للصاله وين ماأمها واختها موجودات...تبي تكلمهم في الموضوع ماتعرفش انهم يراجو فيها بش يفتحوا معاها الموضوع نفسه...
قعمزت حداهم وهي تقول؛هديكا وين؟
سدينه ؛زي العاده في الدار مع بوك..اسمعيني بنتي..
دانيه قعدت تشبحلها بإستغراب..
سدينه؛اليوم اتصلت عواطف ام راجح..
وحكتلها ع اللي صار في المكالمه..ودانيه تسمع فيها..
قلبها وجعها..وحست بالدم يغلي في عروقها..
سدينه؛شن نفهم منه كلامها هدا!؟
رتاج:اني مشيت وفوتت حركاتهم ع خاطرك ونقول ماريت شي مافي شي..بس واضح مايبوش يادانيه وولدهم جابرهم وهما قاعدين يديروا في الجو هدا بش تجينا منا حني..
نزلوا دموع دانيه وهي تقول؛هي تقصد ان بلعاني درنا هكي بش يجيب غيرها!..
سدينه؛شن عندك من تفسير تاني!؟
دانيه ودموعها ينزلوا:وهو فهمها هكي هدا علاش معاش بي يعاودلي ولايرد ع رسالتي..
امها واختها قعدوا يشبحولها بحزن..
هي تنهدت بقهر...بعدين ناضت ومشت من حداهم..
ورتاج ناضت وراها...
🍁🍁🍁🍁🍁
لبس حزام السلاح متاعه وهو يقول؛نمشوا نشوفوا الوضع غادي قبل..
داوود؛ممكن يطلعوا علينا في أي لحظه..
راجح لبس جاكيته وقال:فايقنلهم زين..
وطلعوا الزوز من المكتب..
راجح؛هيا يااسود..
العناصر مشوا وراهم هو وداوود اللي كان يلبس في نظاراته..
وين وصلوا برا..
توزعوا ع السيارات..
وراجخ بيركب مع داوود في نفس السيارة..
وهو بيركب..
وقفه تليفونها لما رن..
وين شاف المتصل ابتسم ابتسامه خفيفه وقال؛عن اذنك شويه..
ابتسم داوود وركب..
وراجح بعد وفتح الخط ورد ع دانيه؛ياأيوه..
جاه صوتها الغاضب بنبرة باكية وهي تقول
"اسمع تعالى توا خود حاجاتك ماعندكش فينا نصيب"
راجح بصدمه؛شن تقولي انتي؟!
"اللي سمعته..مادام هكي اولها كيف يكون عقابها اني معاش نبي خلاص تعالى خود حاجاتك تعالى"..
🍁وسكرت وحدفت التليفون ع طول يدها جي ع المرايه كسرها..
امها واختها انصدموا..
دانيه بغضب ودموعها ينزلوا؛مالي وماله اني مالي وماله..مش ليا اني الحاجات هادي اني..الفرح هدا مش لينا بكل..
وقعدت تخبط ع باب الدولاب وهي تقول..الحاجه الباهيه تبينا ناسها ماتبيناش حني.
فتحاته بقوة وقعدت طلع منه في كل شي جابه..
ومشت لللشنطه...فضتها من كتاباتها وهي تنفض فيها نفض..
بعدين لوحتها ع كتاباتها..
امها واختها مصدومين في تصرفها..
ومش عارفين ان مريض السكر وقت الغضب والعصبيه يكون عصبي بزياده...ومرات بدون سبب تصرفاته تكون عصبيه جدا..
هي قعدت تقول وهي تبكي؛معاش نبي حد يكلمني ع الزواج مرة تانيه مانبيش معاش نبي خلاص..
حطت يدها ع راسها لما حست بدوخه..
رتاج جتها شدتها وهي تقول؛جيبي الجهاز يما..
وسدينه وهي تبكي جت لدولاب تجري وعطت الجهاز لرتاج بش تقيس سكر اختها...
🍁فهالوقت...
راجح بعد ماسكرت.
قعد واقف جامد في مكانه يحاول يستوعب اللي صار..
بعدين لف ومشي للسيارة اللي فيها داوود وقاله وهي في قمة التوتر والغضب والارتباك؛اسمع..بنسلمك قيادة المهمه صارلي ظرف قوي..
داوود بقلق؛تمام..طمني اها..
هو هز راسه ومشي يجري لسيارته الخاصه المدرسه في موقف المركز...
ركبها وشغلها وطلع بيها بسرعه...

#حوقلوا
#gray_cat
#البطل_المغمور2

....يتبع...