البطل المغمور (الجزء الثاني) زهور القمر

السادس والثلاثين

#البطل_المغمور2  "زهور القمر"
#جمان_فريد
#الجزء_السادس_والثلاثين "احلام على ارض الواقع"
رمضانكم مبارك
قال صلى الله عليه وسلم : ( كَلِمَتَانِ خَفِيفَتَانِ عَلَى اللِّسَانِ ، ثَقِيلَتَانِ فِي الْمِيزَانِ ، حَبِيبَتَانِ إِلَى الرَّحْمَنِ : سُبْحَانَ اللَّهِ وَبِحَمْدِهِ ، سُبْحَانَ اللَّهِ الْعَظِيمِ ) رواه البخاري ومسلم
💐💐💐💐💐💐💐💐💐💐💐💐💐💐💐💐💐
خش هيثم لحوش خالد مع جهاد..
جهاد؛شادينه الجماعه داخل..
هيثم بإبتسامه؛من قده اليوم..
ضحك جهاد وقال؛تفضل تفضل دكتور..
وصلوا لباب المربوعه الخارجي..
هيثم حول كندرته وخش وهو يقول:بسم الله..السلام عليكم...
كلهم ردوا عليه:وعليكم السلام..
اما خليل ناض وقفله وهو مبتسم بإمتنان...
وتفكر يوم بعيد هلبه ذكرى لايمكن ينساها خليل...
يوم اللي خشوا ناس من المافيا وكسروا حوشهم وقلبوه...
في ليلة هداكا اليوم هيثم ساعد خليل في تنظيف الحوش وصار بيناتهم حوار طويل...
اهم مادار فيه..
🔺️فلاش باك..
هيثم:استهدي بالله ياخليل واسمعني كويس..
مسح خليل دموعه وقعد ساكت..
هيثم:الكلام اللي قلته خلاني نفكر في شي ممكن يساعدك بس يبي من قوة قلب وعزيمه وهمة عاليه ياخليل..
خليل بإنتباه؛قول دكتور قول اللي عندك صدقني اني فيا توا كل اللي قلته المهم عندي نرتاح والذنب اللي نحس بيه يتكفر..
هيثم تنهد وقال؛تعاون مع الشرطه...
عقد خليل حواجبه وقعد ساكت..
هيثم؛الله اعلم قداش مازال في شباب يدمروا وعائلات تتفكك بسبب الشياطين هادم...صح انت مش حتقدر تنقذ الناس كلها لكن تقدر انقاذ مايمكن انقاذه...
وهكي تكون حميتهم مقابل الناس اللي اجرمت في حقهم..
وتاخد عقوبتك الدنيويه واسأل الله ان يعفيك بهالعمل الصالح من عقوبة الآخره..اهم شي لازم تنوى ان باللي بديره كله لله وقصدك فيك رضاه وماتفكرش في النتايج خليها كلها ع الله..اني هدا رأيي وانت شوف روحك....
🔺️الوقت الحاضر..
قدم هيثم لخليل وهو يقوله؛حمد لله ع سلامتك يابطل..
وحضنه..بادله خليل الحضن وقال عند وذنه..انت البطل...
ضحك هيثم وبعد وهو يقول؛نورت شارعك وحوشك وانست احبابك..
خليل بإبتسامه؛النور نورك دكتور...
هيثم؛عاد توا ولينا زملاء مهنه وحده دكتور خليل..
خليل؛زي مايقولوا العين ماتعلاش ع الحاجب...
هيثم طبطب ع كتفه وقال؛العين اهم الحاجب..انتم توا اللي نعولوا عليكم تكملوا المسيرة وبإذن الله انتم قدها..
زياد؛مازال في عز عطاءك دكتور مازال نبو منك هلبه..
خليل؛صدقت..
ابتسم هيثم وقال؛ربي يحفظكم ربي يحفظكم والحمد لله ع سلامتك مرة تانيه..
خليل؛الله يسلمك..
هيثم؛خل نسلم ع باقي الوجوه الطيبه...
ومشي هيثم يسلم ع الموجودين وخليل قعمز في مكانه..
هيثم وهو يسلم ع الناس وصل في فاتح اتفاجئ:منين طلعت انت!!؟
كلهم قعدوا يضحكوا...
ناض فاتح وهو يضحك؛دكتور...
وضمه..وهيثم ضمه وهو يقول؛الحمد لله ع سلامتك..
فاتح؛الله يسلمك يابروف..
بعد هيثم وقال؛مانيش بروف امتى وليت بروف مش عارف..
زياد بضحكه؛في عيونا بروف يابروف..
ضحكوا الموجودين...
وهيثم وهو يضحك حرك راسه يمين ويسار ومشي قعمز جنب ولد اخته حاوطه من كتفه وقال:شن جو خالو..
خالد؛مليح خالي...
هيثم ضحك وباسه ع راسه وخليل يشوفلهم بإبتسامه....
🍁وشويه ودخلوا عليهم العشي....
وتعشوا رجاله ونساوين وسط اجواء حلوة كلها الفه وحب وفرح..ليهم عليها سنين طويله...
🌼🌼🌼🌼
بعد العشي..
التموا البنات ع الماعين يغسلوا فيهم...
بنات الجيران العيله...
اكثر وحده كانت ملفته للإنتباه بفلاحتها جنان لأنها اصغرهم..
عكسها ريحان اللي قعدت مقعمزة في الصاله تلعب بتليفونها وحداها بدر يتفرج عليها بحماس...
🍁في الكوجينه...
كنست جنان الكوجينه...
بعدين مشت للاوندينو عبت سطل ميه بش تبدا تسيق..
تهاني؛خلاص جنونه بري قعمزي..
جنان؛نسيقوا الكوجينه بعدين نطلعوا مع بعض..
نسيبه؛لاحبي خلاص ساد هكي...بري بخري الحوش...
هزت راسها وقالت؛حاضر...وينها البخاره..
نسيبه:تعالي معاي...
ومشت طلعت نسيبه وجنان وراها..
تهاني؛محلاها هالجنونه مطيعه هلبه..
سارة بإبتسامه؛ايه مش متعبتني عكس التانيه ديما مخوفتني عليها جريئه هلبه ومتهورة...
تهاني؛صح جريئة لكن عاقله ماتخافيش عليها..
سارة:لالا ينخاف عليها هلبه بالذات في السن هادي..
تهاني؛ربي يحفظهم..
سارة:آمين...
🍁🍁🍁🍁
درست سيارة نوع "BMW" قدام العماره اللي عاش فيها اصعب ايام حياته..
واللي بوه رافض يخليها...وهو مش قادر يقطعه نهائيا بعد كل اللي راه منه...
كام كل شهر لازم يجي بنفسه ويعطيهم مصروفهم..
بس مش مباشرة...بل عن الطريق السواق متاعه...
رشيد؛خود..
خدي السواق ظرف الفلوس منه ومشي نزل من السيارة..
خش للعماره..وركب مع دروجها لين وصل في باب الشقه..
رن الجرس مرة وحده...انفتح الباب وطلعت وحده مختمرة..
مدت يدها المغطيه بقوانتيات سود بدون ماتتكلم..
حط السواق ظرف الفلوس في يدها..
هي خداته وسكرت الباب في وجهه..
وهو قال:سلام قولا من رب رحيم..
ومشي نزل بسرعه..
طلع من العمارة ومشي ركب السيارة.. رشيد؛لمن سلمته..
:لنفس المراة استاذ..
تنهد وهز راسه وقال؛تحرك...
🍁وفوق..
حولت مقبوله الخمار والقوانتيات وقعدت تعد في الفلوس..
بعدين خدت منه شويه والباقي دساته في جيب ملايتها..
ومشت لدار النوم..
كان مجيد مقعمز ع كرسيه ويتفرج ع التلفزيون..
هي جاته مدتله الفلوس..
هو شافهم وخداهم وقال؛قداش خديتي انتي؟
مقبوله؛زي العاده حق تعبي...
مجيد هز راسه وهو متقبل اللي دير فيه مقبوله تقبل المغلوب على امر بعدين قاللها؛حطيهم في دولابي..
هي خدت فلوسه ومشت بيهم للدولاب ودستهم..
بعدين دست فلوسها هي..ومجيد من وراها يشوفلها بكره خفي..
🍁🍁🍁🍁🍁
الساعه الحادية عشر ليلا..
في جنان حوش هيثم..
كانوا هيثم وفاتح وزياد واقفين مع بعض..
فاتح؛قعدلي اخر امتحان الاسبوع هدا ونكمل..
هيثم؛نحساب القرايه متاعكم 4سنوات..
فاتح؛اختياريه هي سنتين اساسيات والسنتين التانيات اختياريات..
هيثم هز راسه وقال؛موفق..
زياد؛بتولي تشد المطعم متاعك..
فاتح؛اكيد وفي مشاريع تانيه تنعرف في وقتها..
هيثم؛احسن شي استعينوا ع قضاء حوائجكم بالكتمان..
ابتسم فاتح وقال:دكتور نحصل معاك غدوة ان شاء الله ساعه فاضيه نبيك في موضوع مهم..
زياد:اسرار عليا اني!
فاتح بضحكه؛تو تعرف بعدين...ها شن دكتور..
هيثم وهو يفكر في شن يبيه فاتح قال؛بعد الظهر ان شاء الله...
فاتح؛تمام..اتفقنا...هي توا مالا نخليكم...تصبحوا على خير...
هيثم ؛قدامك كل خير...
طلعوا فاتح وزياد مع بعض..
وهيثم مشي خش للحوش...
لقي جنان تراجي فيه..
سكر الباب وقال؛خيرك بابا مش فدارك..
جنان؛في حاجه نبي نكلمك فيها ماحصلتكش الا توا..
هيثم؛قولي بابا..
جنان وخرت شعرها ورا وذنها وقالت بإبتسامه؛زي ماتعرف بابا اني نخدم في مفارش وشنتروات وشغلي حلو زي مايقولوا فبناحذ اذنك بش نبيعه..
عقد حواجبه وقال؛علاش ؟
هي قعدت تفرك في سباية يدها اليمين بالإبهام وقالت بإبتسامه:كنت نبيه سر بيني وبين ربي لكن لازم نقولك بش تطمن..في عيله محتاجه حالتهم صعبه هلبه...اتفقنا اني ومجموعه بنات نساعدوهم..وحده خلت بوها يدفعلهم اجار سنه كامله ووحده دفعت حق دواء واحد من الصغار مريض بالكانسر اللهم عافينا..واني قررت نخدم ع المفارش ونبيع  واللي يطلعلي نجيبلهم حق بضاعة يعني هكي سبيزة وفطور وهكي..
هيثم؛قبل كل شي انتي من وين تعرفيهم الناس هادم؟
جنان؛شفت فيديو ليهم ع الفيس وكلمت صاحباتي عنهم واقترحت عليهم نساعدوهم اني وجعني ولدهم المريض قاعد صغير ياناري..وهما صاحباتي واقفوا المهم وحده منهم مشت مع بوها لمكانهم وتأكدوا من وضعهم...
هيثم؛اعطيني عنوانهم واني نشوف وضعهم بروحي ونساعدهم..
جنان؛نعطيك بابا ولوكنت تبي تساعد الولد ياريت بس ارجوك في اللي ناويه نديره مانبيش منك تدخل من فضلك بابا نبي اني ندير الحاجه بروحي مني اني...
ابتسم هيثم ابتسامه حلوة وقال؛حاضر..تأمري امر انتي.
ابتسمت من قلبها وقالت؛تو نبعتلك معلوماتهم في مسج ع الماسنجر...
هيثم بإبتسامه:تمام..
جنان،شكرا بابا..
هو قرب منها وباس راسها وقال؛ربي يحفظك بنتي..
جنان؛ويحفظك بابا ...تصبح ع خير..
هيثم؛وانتي من اهله..
مشت جنان وهيثم معاها بعيونه لين خشت ممر الديار..
بعدين شاف للوحة اسيمه ضحك...بعدها تنهد وغير عيونها عنها ومشي لداره....
🍁🍁🍁🍁🍁
ع سرير..
راقد خالد وحواليه بوه وامه يهدرزوا..
خليل وهو يشوفله بإبتسامه:اياه طلع مشاغب هو واني نحسابه عاقل وهويدي..
نسيبه بضحكه؛غير قاعد متحشم منك تو لما ياخد عليك تشوف شن يدير فيك..
خليل رفع حاجبه اليسار وقال؛ ع خاطر ماعنداش من وين يجيبه...
نسيبه بإستعباط؛من وين؟!..
خليل؛مش لازم تعرفي..
قعدت تضحك وهو يتأمل بعدين قال:عندك علم انك كل ماتكبري تصغري...
نسيبه بإبتسامة خجل؛جديات!
خليل؛وجد الجد..وكل يوم وانتي بعيده عني نزيد نحبك اكثر..وقفتك معاي وصبرك واللي درتيه خاطري مش اي مراة نديره..تعرفي نواستي اني نبي نعيش باقي عمري بش نعوضكم انتي وخالد..
نسيبه بإبتسامه ودموعها ينزلوا؛حتي حني نبوا نعوضوك ونسوك سنين الحبس كلها..
مسح دموعها وقال؛سنين الحبس مانبيش ننساها اهم مرحلة في حياتي عشتها فيه...بس نبي مابعده يكون كله حلو ان شاء الله..
نسيبه بإبتسامه حب؛إن شاء الله... نحبك..
خليل بحب؛واني نموت فيك..
🍁🍁🍁🍁🍁
تاني يوم...
في مستشفى الرازي...
كان الشايبي ماشي ومعاه مجموعه من طلاب الامتياز..
منهم دانيه وتهاني وساره..
كان يسأل فيهم وهما يجاوبوا فيه...
فجأه...
وقفوا..
لما شافوا زحمه ممرضات وطبيبات متجمعات ع شخص واحد..
سارة قعدت تشبحله بصدمه..
وتهاني ودانيه يشبحولها..
الشايبي:هدا شني!؟
واحد من الطلبه؛ماتعرفاش دكتور..
اشر عليه الشايبي بالبيرو وقال وهو مضيق عيونه:شايفه...اها...هدا الشيف ولا اسمه فاتح تقريبا.
:تابع فيه دكتور؟!
الشايبي؛احيانا..
ودانيه تسرقله في النظر وهو يتكلم...
اما سارة فكانت تشوف لفاتح وحواليه البنات..
وركزت انه كان يتحاشى يشوفلهم..
••فاتح؛بارك الله فيك...
؛ماشاء الله عليك ياشيف تعلمت منك هلبه حاجات كنت مانعرف ندير شي وع ايديك تعلمنا..
فاتح؛الله يعزك... الله يعزكم جميعا...وتوامعليشي عطوني طريق مستعجل..
هما وخروا عنه...
وهو مشي ويقول؛بارك الله فيكم..
ومشي....
والبنات معاهم بعيونهم...
الشايبي؛وبعدين..
هما انتفضوا من الفجعه...وانتشروا في جميع الجهات..
سارة بغيره؛تافهات..
زملائها شبحولها ومعاهم الشايبي..
هي استاقظت لروحها شن قالت..شبحت للشايبي نزلت عيونها بإحراج وقالت؛اسفه..
وتهاني ودانيه يشبحولها بتركيز...
🍁اما فاتح وصل لمكتب هيثم...
وكان هيثم في انتظاره..بعد مااستقبله استقبال حلو...
قعمزوا مع بعض وبدوا يهدرزوا...
هيثم؛شن تحب نضيفوك ..
فاتح؛لا..بارك الله فيك...شارب قهوة لنجي..
هيثم ؛عاد قهوتك لايعلى عليها استاحشناها..
فاتح؛اللي وصلني انك بديت دير فيها خير مني..
هيثم؛اللي قالك يطبل وخلاص .
ضحك فاتح..
هيثم ابتسم وقال؛الحق من امس لليوم واني نفكر في الموضوع اللي تبي تكلمني عنه ان شاء الله خير بس..
تنهد فاتح وقال؛خير بإذن الله...قبل كل شي دكتور بنسألك سؤال ونبيك تجاوبني بصراحه واني عارفك صريح...
هيثم؛اسأل..
فاتح؛شن رايك فيا؟
رفع هيثم حواجبه وقال؛تبي الاجابه بصراحه..
فاتح؛وبدون ولو شوية مجامله..
هيثم رخي حواجبه وقال بإبتسامه؛راجل نشوفك فيك من زمان راجل وهدا يكفي..
فاتح؛باهي مادام هدا رايك فيا...لو خطبت بنتك ترضى تعطيني...
هيثم اتفاجئ ع الآخر وماقدرش يرد..
وفاتح قعد يشوف في ردة فعله والتوتر بدي يسيطر عليه..
هيثم:فاجئتني هلبه...
ابتسم فاتح بأسف وقال؛رايك فيا تغير..
هيثم؛ابدا قاعد زي ماهو...بس...طلبك بالنسبه ليا صعب لسبب واحد..
فاتح؛اللي هو؟
هيثم بشي من الارتباك:بنتي...شن بنقولك يعني...بنتي عندها نظره لبعض الامور مختلفه عني اني وخوها بمعنى انها تشوف لبعض الأمور بنظره قاسية بعض الشيء..
فاتح:فاهم عليك وعندها الحق..تو انت تعرفني كويس..لكن لو مشيت نخطب بنت اهلها مايعرفونيش لما يسألوا عني ويعرفوا الماضي متاعي يرفضوني طول..وحتى هي ماتعرفنيش زي ماتعرفوني انت وزياد وعندها الحق تشوفلي بالنظره اللي قتلي عليها..
هيثم؛ع هكي هي حترفضك..
فاتح:عارف بس نبيك تساعدني..
هيثم رفع حواجبه وقال؛نساعدك..
فاتح؛ايه نبيك تقنعها وانت تقدر..
هيثم؛حتتعب معاها هلبه ياولدي..
فاتح؛التعب للحاجه الغاليه دكتور..ومفروض نتعب عليها..
ابتسم وقالك؛مرات تجرحك وتحملك فوق طاقتك وتلقى روحك استسلمت في نص الطريق وسيبتها..
فاتح؛انت مش شويه قلت تشوف فيا راجل..
هيثم:في حاجات الراجل مايتحملهاش..
فاتح؛اني نتحمل..لاني عارفها...هي صح تبان واعرة من برا لكن في داخلها صافيه وحنينه متأكد ان اللي مني ليها حيوصلها ...
هيثم تفاجئ في فاتح وجرأته قاعد يقوله نحب بنتك في كل كلمه تطلع منه..بس هالجرأة عجباته لان فاتح صادق في مشاعره وجاه طول كلمه عنها وطلبها منه ...
هيثم؛اللي مرت بيه مش ساهل..
هز راسه وقال؛والله عارف واني حطيت روحي في مكانها اكتشفت انها اقوى مني...
هيثم بإبتسامه؛مصر هلبه..
فاتح؛ولو ردتيني حنعاود نطلبها منك مرة واتنين وثلاثه..
هيثم شبحله شويه بعدين قال؛موافق...
بانت ع وجه فاتح ابتسامة فرح..
هيثم؛وحنحاول نقنعها....بس نبيك تعطيني وعد..
فاتح؛نوعدك من غير مانعرف ع شني..
هيثم ؛تعاهدني انك ماتخونيش وتكلمها من وراي..
ضايقه فاتح كلام هيثم لانه سبق وكلمها من وراه استصغر نفسه هلبه بس رد بإبتسامه تخفي هالضيق؛عهد عليا قدام ربي مانقيم عيوني فيها..
ابتسم هيثم وقال؛انت توا برا دير امتحانك ولما تروح يصير خير..
ابتسم فاتح وقاله:إن شاء الله...
🍁🍁🍁🍁🍁
"الله يبارك الله يبارك"
هدا خليل وهو يتفرج ع ورشه خوه الكبيره اللي ولت ضم 4ورش صغيره جنب بعض ومعاها لوادجو سيارات...
خليل؛لكل نوع ورشه..
جهاد بضحكه؛ماهو درت حاجه هكي فكرة خطرت في عقلي زي الدورة التعليميه علمت فيها شباب صغار الصنعه وقسمتهم كل مجموعه خليتها تتمكن في حاجه في منهم خدمتهم عندي والباقي خدموا في مكانات تانيه..
خليل بإعجاب؛والله صحه ليك...
ابتسم جهاد وقال؛كان نعطيك سيارة توا تصلحها ولانسيت الصنعه يادكتور..
خليل بإبتسامة حسرة؛هي اللي نستني ياجهاد...راهم سبعه سنين في سيارات نشوف فيها هني ومش عارفها..
جهاد؛احسن انت توا دكتور ماعندك مادير بيها الصنعه هادي...
خليل؛هادي صنعة بوي الله يرحمه الاصليه واول صنعه تعلمتها في حياتي تقعد قيمتها عندي من قيمة شهادتي توا ومرات اكبر..
جهاد طبطب ع ظهر خوه وهو مبتسم بحب...
🍁🍁🍁🍁
واقفه في واحد من ممرات المستشفى وواقف عليها زميل يتناقشوا ع شي يخص القرايه..
كانت مبعده عنه واقفه بإحترام والشاب كذلك..
بس هو مايفهمش ومايمشيش عنده الشي هدا..
مشالها مندفع بغيره وهو يقول؛تفضل ياخوي..
:خير دكتور زياد..
زياد؛خيرات..كان تبي خدمه اني موجود نخدمك بعيوني..
:لاشكرا بارك الله فيك...تستأذن تهاني...
تهاني وهي تزيد تغيظ في زياد؛اذنك معاك..
مشي الشاب وهوقال؛ماتقوليليش خيرك انتي!
تهاني:انت اللي خيرك مش اني ..
زياد؛اها اني اللي نوقف في الممرات ونطق في الحنك..
تهاني رفعت سبابتها في وجهه وهي تقول؛اسمع احترم نفسك سكتلك هلبه راهو..
زياد؛نزليها يدك هادي ماترفعيهاش في وجهي..وماتخلنيش نمشي نتفاهم مع خوتك يقعمزوك بكل..
تهاني بصدمه:انت شن دخلك شن علاقك من تكون..
زياد؛ولد جيرانكم وعرض جيراني عرضي ولو خوتك دارو مع سارة اللي اني ندير فيه معاك نمشي نكب ع راسه..
تهاني بعصبيه:اولا خوتك مش زيك يعرفوا يتكلموا وتانيا وهو الاهم انت مادخلكش  وحول من طريقي..
ومشت من حداه وهي معصبه...وهو لحقها...
🍁فهالوقت كانوا دانيه وسارة واقفات يشوفوا في ملف احد المرضى...
"شن رايك انتي؟"
دانيه:امم..كل الفحوصات متاعه تأيد كلامك ع العموم حنرجعوا للدكتور ونشوفوه شن يقول..
سارة:تمام..
ع جية تهاني وهي معصبه قالت:سارة شوفي صرفة مع خوك هدا حرقلي دمي..
سارة بضحكه:خيره؟!
تهاني:حاشر روحه في كل شي من يحساب روحه بش يتحكم فيا!! اسمعي قوليله يلزم حده خير مانكلم عمي هيثم يتفاهم معاه..
دانيه بضحكه:هوينا واقف غادي يشبحلنا..
تهاني:اووووف ياربي اوففف..استغفر الله..
ومشت وخلتهم وهما يضحكوا..
ع جيته هو..
وقف عليهم وهو يشبحلها برفعة حاجب:شن كانت تقوللكم!؟
سارة:انت شن دايرلها!!؟
زياد:مادايرلها شي هي تدلع وتكسر في الرقبه صاحبتك اهيا..
سارة رفعت حاجبها وقالت:راهو قالت بتحرش بابا وانت تعرف لو حرشاته شن بيقوللها..
زياد تلخبط وحك حاجبه وقال:ماتبو شي..
شدت دانيه ضحكتها...
سارة بضحكه:خلي تهاني في حالها بس..
شبحلها بربع عين بعدين مط شواربه ع جنب بتهكم ولف ومشي وخلاهم...
دانيه بضحكه:كل واحد داير روحه مش طايق التاني..
سارة ابتسمت بخبث وقالت:اممم زي هلبه ناس.
تعكرت ضحكه دانيه بعدين قالت:باهي خل نمشوا للدكتور..
سارة بإبتسامه:هي بري قدامي...اهربي..
مشت دانيه وسارة لحقتها...
🍁🍁🍁🍁
مقعمزين هي وبنتها ع سفرة الغدي يتغدوا ويهدرزوا..
نوال؛خوك هدا تفكيره كله مادي عملي اخر همه الزواج والعيله...
نرجس؛باهي يعني بنخلوه هكي ماما عايش بروحه في الغربه..
نوال:اسيد مش صغير يانرجس راجل واصل لنص الثلاتين هدا مايقدر حد يتحكم فيه او يفرض عليه شي...
تنهدت نرجس وقالت؛ربي يهديه زي ماهدي فاتح..
نوال:اللهم امين..
وسكتوا شويه وقعدوا يتغدوا..
وشويه ونوال وقفت ماكله وسرحت..
لاحظتها نرجس وقالت:ماما..
استاقظت نوال وشبحتلها..
نرجس؛خيرك ماما من لما روحتي امس من المشوار اللي مشتيله وانتي متغيرة...صايرة حاجه...
نوال؛في موضوع شاغل بالي شويه..
نرجس؛ نقدر نعرف شن هو؟.
نوال بإبتسامه؛يجي وقته وتعرفيه..
نرجس بإبتسامه؛ع راحتك...
🍁🍁🍁🍁🍁
الساعه السابعه مساءا...
هيثم طالع من المستشفى بطريقه لموقف السيارات متاع المستشفى..
فجأه سمع حد ينادي فيه...
"دكتور هيثم..دكتور"
وقف والتفت...
شاف شاب اسمر اربعيني عنده حضور عالي وهيبة تفرض احترامه...
ابتسم وقال؛تفضل..
:يزيد فضلك..حضرتك مستعجل نأخر فيك عن شي..
هيثم؛لا...
:كويس معناها نقدر ناخد من وقتك بش نحكي معاك في موضوع جدا مهم..
هيثم؛تمام بس في الاول نبي نعرف من تكون..
ابتسم وقال؛عندك حق...مد يده وقال...صنع الله المقرحي..
صافحه هيثم وقال؛تشرفت بيك...من الجنوب صح..
هز راسه بإبتسامه مؤكد ع كلامه..
هيثم؛بالجوده.
صنع الله؛بيك اجود..
هيثم؛هي تفضف معاي للمكتب..
صنع الله؛نفضل كلامنا يكون...غادي شن رايك..
اشرله ع مكان فيه كراسي..
هيثم شبحله شويه وقال؛تمام..تفضل..
صنع الله:تسلم..
ومشوا الزوز للمكان المقصود وقعمزوا مع بعض...
🍁🍁🍁🍁
"ماخلتني خدم لين خليني ونخليك"
خليل بضحكه؛ماتبيكش تلهى عن قرايتك..
عرفه:فاهم عليها..لكن اني نقدر نوفق بين الزوز قراية وخدمه..
خليل؛كويس بكل واني عاجبني فيك اعتمادك ع نفسك لكن كان احتجت شي تعاليلي اني ولاجهاد طول خوتك حني ياعرفه والخوت لبعض..
عرفه بإبتسامه؛بارك الله فيك ربي يحفظك..
خليل؛ويحفظك..شن حالها اختك؟
عرفه:عايشه مرتاحه الحمد لله..
خليل:الحمد لله..الحمد لله..ناض وهو يقول...خل نمشي نشوف خالد شن دار في الواهب..
عرفه بضحكه:خليك محافظه ع هيبه بش يسمع كلامك ديما ماديرش زي نسيبه تمادى عليه لين معاش عرفت تسيطر عليه..
خليل بضحكه:قالولي عليه العفريت هدا تو نشوفه ..
ومشي طلع من حداه من المربوعه وتوجه للصاله..
منهمك في الكتابه وامه مقعمزة حداه وشاده شبشب.
خليل بضحكه؛شن ديري!؟
نسيبه؛جيت لقيته مسيب قرايته و يلعب شوقلبه..
خليل:اهااا لالا خالد بابا حبيبي اكتب واجب واقرا قرايتك بعدين العب..وقعمز حدا نسيبه..
خالد؛حاضر بابا..
خليل:عسل يقطر..تعالى يابابا تعالى..
ناض خالد ومشاله ..
ضمه خليل لحضنه وقعد يبوس فيه ويقول:آااه..
ونسيبه تشوفلهم بإبتسامه وعيونها معبيات دموع..
وعفاف وهي تشوفلهم من فم الصالة بحب قالت بصوت غير مسموع:الحمد لله..
بعدين لفت بتمشي شافت بدر واقف جنبها..
بدر؛حناي..
عفاف؛نعم حبيبي..
بدر؛علاش اني ماعنديش بابا وماما زي خالد..
قلب عفاف تقطع تقطيع..
طبست عليه وقاماته في غمرها وهي تفنص بعيونها بش ماينزلوش دموعها وقالت؛حقه بكري عمتك جابتلك شكلاطه واني دسيتها تعالى نطلعوها هي..
وخشت بيه لدارها..
كلام بدر سمعه عرفه...
وبرغم اختلاف الظروف الا انه شاف نفسه في بدر وحس بنفس الشعور ونفس الألم..
🍁وياكم في طفل عايش حالة بدر...ضحايا لحظه هوى واتباع الشيطان...
لحظه فيها نتبعوا شهواتنا وحني منقادين ليها انقياد تام...
وبعد ماتروح سكرة الذنب وتجي فكرة مابعد الذنب نخشوا في حالة من الندم موجعه للموت...بالذات لو كان في ضحية بريء ماليه ذنب في شي 🍁
🍁🍁🍁🍁
"نقولك الولد يشكي من جنبه اليوم لين داخ من الوجع"
ضرار بتذمر:باهي باهي بري لبسيه هيا..
دنيا ؛حاضر..وطلعت تجري..
وهو تأفف وقال؛بلي احرف وخلاص...
🍁ودنيا وهي في دار ولدها قعدت تلبس فيه بسرعه ودموعها ينزلوا وهي تقول:بنمشوا نعاينوا حبيبي وتو يعطينا الدكتور دوا وتصح بعدين باهي؟
هو هز راسه بتعب بدون مايرد عليها وقلبها يزيد يوجع فيها عليه...
🍁🍁🍁🍁
مقعمزة جنبه في دار النوم تقشر برتقاله..
بعد ماكملت تقشيرها قسمتها بالنص وعطاته هو نص وهي خدت نص..
مجيد؛علاش تم الليم؟
مقبوله:لا ماتمش..
مجيد؛مالا علاش جبتي وحده بس..
مقبوله:علاش ناكلوا ليمه ليمه..كل حد فينا ياخد نص وحده ساده..مش كان نشبحوا في الحاجه عندنا هلبه ننزلوا عليها ان المبذرين كانوا اخوان الشياطين..
سكت وهو ياكل في الحصرم...اوالبرتقال وقعد ساكت..
فجأة رن تليفونها لقاته اختها..فتحت الخط وردت.
مقبوله؛ايوه....خيرك خيرك !!...تكلمي زين...
انا لله وانا اليه راجعون....اسمعي ابعتي واحد من ختك يرفعني...
سكرت وناضت وقعدت توتي في روحها..
مجيد؛شن في ...
مقبوله بآستعجال وصدمه وهي تقول:عمران ضاربينه طريحه قريب قتلوه...
وقعدت تلبس في ملايتها..ومجيد يشوفلها بشماته..
وقعد دور في الحوش وتمشي وتجي لين جي واحد من خوتها نزلت تجري..
اماهو ماصدق انها طلعت..
وحرك كرسي لدولابها وفتحه وقعد ويدور بين دبش في الفلوس ومالقي شي ..
بعدين قعد يدور في الدار في كلها..
فجأة هو يدور ويتحرك بالكرسي...فقد السيطرة عليه...
وماقدرش يشد روحه وطاح منه...
وبدي يعيط...لالا لا يامقبوله يامقبوله...ياناس..
ولامقبوله ولاغيرها يسمعو فيها...

#احلام_على_ارض_الواقع
#البطل_المغمور2

...يتبع...