البطل المغمور (الجزء الثاني) زهور القمر

الثامن والعشرين

#البطل_المغمور2  "زهور القمر"
#جمان_فريد
#الجزء_الثامن_والعشرين "عيد الفطر"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
"تفضلي بنتي تفضلوا تفضلوا"
مشوا مجاهد ورتاج قعمزوا ع الكراسي المقابله للمكتب..
واسماعيل واقف حدا بوه وعيونه ع رتاج مش قادر يحولهم...
جت بين عيونه اول مرة شافها لما فتح الكتاب..
وتاني مرة لما طاحت شنطة ربى...
ولما سأل دانيه عنها وقالتله انها ارمله وفي العده..
حتى في الخيال ماتخيلهاش تكون هي نفسها..
عبدالرؤوف:اول شي بنتي عظم الله في الاستاذ عادل الله يرحمه ويغفرله ويسكنه فسيح جناته..
مجاهد ورتاج:اللهم آمين..
عبدالرؤوف:تاني شي..اني من لما عرفت من ولاد المرحوم ان الورث تقسم خلاص..جهزت كل الملفات اللي تخص المصنع من حسابات وارباح وسجلات العمال والموظفين وكل شي يخص المصنع..حتى ودرتلك قائمه بأسماء موظفين كفاءات عاليه يعني لو تبي تحطي مدير جديد يكون شاب يجدد طاقة المكان..ضحك بعدين كمل يقول..طبعا في النهايه الامر يرجعلك..واي سؤال او استشارة تفضلي..
ابتسمت وقالت؛انت الأستاذ عبداللطيف الشركسي حكولي عنك ولاد المرحوم واني زدت سألت عليك..والصراحه اللي سمعته وعرفته يخليني مانفطرش في وجودك في مكانك هدا..
شبح عبدالرؤوف لولده لقاه يشوف لرتاج وخلاص..
مجاهد:طبعا اذا مافيش عندك مانع..
عبدالرؤوف وهو يشوفلهم قال:طبعا..مافيش مانع..
رتاج؛راجل امين وصادق ويخدم بضمير وقعد عمر يخدم في المكان هدا لين وصله اللي هو عليه مستحيل نلقى حد زيه لأنه داير قلب ع المكان اللي يخدم فيه..
ابتسم اسماعيل...
عبدالرؤوف بإبتسامه؛بارك الله فيك بنتي....
رتاج؛بس نبي منك خدمه يعني اني مانعرف شي ونبي نتعلم نبي نكون مشرفه ع كل شي وخوي حيكون معاي هني ويتولى منصب اداري....
عبدالرؤوف شبحله وقال؛طبعا اللي تبيه يصير وبالنسبه للي تبي تعرفيه حاليا بشكل عام عن المصنع اسماعيل حيعطيك المعلومات اللي تبيها كامله..
رتاج شبحتله..
هو بإبتسامه مرر نظره عليهم وقال:ان شاء الله ومن توا لوتبوا..
مجاهد؛ياريت من البدايه..
اسماعيل؛حاضر..
مشي للاب توب متاعه يجهز لعرض دتا شو وهو يقول:طبعا بعدين حناخدوكم ونديروا بيكم دورة في المصنع كله تشوفوا الكلام اللي بنقوله كله توا ع ارض الواقع..
رتاج:تمام بس عندي طلب..
وقف على حيله وشبحلها وقال بإبتسامه؛تفضلي..
رتاج؛نبي الشرح يكون بسيط نقدر نفهمه حاليا..
اسماعيل بإبتسامه؛حاضر...
وشغل اسماعيل العرض وبدي يشرحلهم عن المصنع بكل شي فيه..
ومجاهد مرة مرة يسأل فيه اسئله خلت اسماعيل وبوه يلاحظوا ان عنده خلفيه ومافي شي يعدي عليه..
اما رتاج فكانت تسأل في اسئله استفهاميه واسماعيل يفهم فيا وحده وحده عليه كان يلقى مايتمش شرحه ليها...
بعدين طلعوا ودارو دوره ع المصنع..
كل شي بالنسبه لرتاج كان عالم تاني..
رتاج اللي كانت ماتعرفش اكثر من الحوش والكليه ويدوب شافت شويه من الدنيا مع عادل...
لقت روحها في وسط عالم المال الاعمال ..
عالم بعيد هلبه عن شخصيتها..
كانت خايفه هلبه..بس هالخوف كان دافع كبير ليها انها تتعلم بش تقوى وتحمي مال ولدها..
وتثبت للكل انها تقدر تكون اقوى ام لولدها اليتيم وتحاول تعوضه عن بوه...
🍁"لتوا قاعده دايخه يادانيه عالم تاني زي اللي في المسلسلات..تو بس تأكدت ان ماكناش عايشين"
دانيه:باهي كيف بديري توا..
رتاج؛بنغير المسار في قرايتي بنحول من تربيه اسلاميه لأدارة اعمال وبناخد كورسات لغه...
دانيه؛لاكملي في التربيه الاسلاميه واقري ادارة اعمال مع الجامعات اللي برا اون لاين..
رتاج وهي تفكر:تقولي هكي!
دانيه؛احسن شي صدقيني..ماتسببيش قراية الدين ع خاطر الدنيا..
رتاج ابتسمت وهزت راسها بإيجاب بعدين شبحت لولدها وقالت؛نجيلي كنعاني ياربي..
دانيه بضحكه؛امي كارهه الاسم وقالت بناديه باسم تاني ع كيفي..
رتاج؛شن هو ترا..
دانيه:عطا الله ع اسم بوها..
رتاج بضحكه:خلها تناديه باللي يعجبها المهم اسمه في الكتيب كنعان..محلاه الاسم عنده هيبه كنعان عادل...
دانيه ابتسمت وقالت؛اني كان جاني وليد بنسميه هشام قداش نحبه الاسم هدا..
رتاج؛كان ماسمتيشي عثمان هدا وجهي..
دانيه بضحكه؛باهي سكري فمك قريب تخليني نفسخ..
رتاج؛شورك ع سبله..
دانيه بإبتسامه:عينك والله مانبدله الضابط متاعي وخيتي سلمه بنلقى حد يحبني زيه..
رتاج بإبتسامه؛ربي يعقد عسلكم ويخليكم لبعض العمر كله..
دانيه تنهدت بإبتسامه وقالت:آمين..
🍁🍁🍁🍁
طلعت من قاعة الامتحان وهي شاده الشيت وتراجع
مريم بإبتسامه؛الحمد لله ياربي ماضاعش التعب اللي تعبته..
ومشت بسرعه للباص..وهي ماشيه..
شافت سيارة مدرسه ورا الباص فيها ابغض خلق الله بالنسبه ليها..ولد عمها اللي الباين انه مصر يقعد وراها لين يدمر حياتها تماما.. بس مريم متاع زمان خلاص معاش موجوده..
اللي يشوف فيها توا قدامه مريم تاني...
قويه بالله ومعاه....عايشه معاه وليه..ومستغنيه بيه عن كل الناس..
مستقويه بيه ع كل من يبي يضرها او ينهيها...
تجاهلت وجوده كالعاده..وركبت الباص...
تحرك وهو تحرك وراها..
🍁🍁🍁🍁🍁
وفي مكان تاني..
طلعوا من قاعة الامتحان وهما يراجعوا..
زياد بإبتسامه؛لا الحمد لله كله تمام التمام..
خليل ابتسم وقال:الحمد لله..
لبسوهم العناصر الكلبشات..
ورفعوهم..
لما طلعوا برا...
سمعوا صوت حد يصفر..
شبحوا لمصدر الصوت..
خليل ابتسم وزياد ضحك واشر لبوه..
هيثم سألهم بحركة الراس "شن درتوا"
خليل هز راسه بإبتسامه.
وزياد رفع ابهام وحده من ايديه.
بوه شبحلها وشاف ايديه كيف مقيدات قلبه وجعه بش مابينش..
ابتسملهم وهز راسه..
العناصر بعدها رفعوهم طول لسيارة السجن..
وقعد هيثم معاهم بعيونه لين مشت السيارة..
تنهد بحزن وقال:الحمد لله على كل حال..
بعدين لف ومشي ركب للسيارة...
🍁🍁🍁🍁
وفي هاليوم..
كانوا نوال ونرجس جايات لحوش هيثم بش يطلبوا ماجده..
في وجود نسيبه ومرت سليم ولد خو ماجده..
سارة كانت موجوده مجامله لخالتها..بس ماكانتش طايقه تشوف لنوال..
ونرجس كل مالها تزيد دقق في تصرفاتها..
••في الكوجينه..
واقفه تغسل في ماعين الضيافه..
خشت عليها نرجس وهي تقول؛شن جو سارة..
سارة شبحتلها وقالت بإبتسامه؛تمام الحمد لله..انتي شن جوك..
قربت نرجس وقالت؛تمام..هاتي نعاونك..
ساره؛لاقعمزي انتي اليوم ضيفه..
نرجس؛مش معتبره نفسي ضيفه ..
وقفت سارة غسل وشبحتلها برفعة حاجب وقالت؛مال شن معتبرة روحك اختي!؟
نرجس شبحتلها شويه بعدين ابتسمت وقالت؛لابس صديقه..
سارة شبحتلها شويه بعدين ولت تغسل في الماعين بعصبيه..
نرجس:في حاجه سارة..درنا شي خلاك تاخدي منا موقف..
سارة؛مش واخده من حد موقف..
نرجس؛مش هدا الباين..
سارة قعدت ساكته..
نرجس؛باهي اني جيت نحكيلك وبناخد رايك في موضوع..
شبحتلها بخوف وقالت؛شن هو؟
نرجس بإستغراب؛موضوع خطوبه!
سارة بحده؛خطوبة مني؟!
نرجس وهي مستغربه اكثر؛خطوبتي اني..قصدي في حد خطبني..
ارتخت ملامح سارة بعدين شبحت للماعين..
نرجس شبحتلها كويس بعدين قالت؛شن في سارة!
نزلوا دموع سارة وشبحت لنرجس وقالت؛اسفه بس اني مضايقه هلبه..من امك مضايقه لين خلاص..
نرجس تأكدت من اللي في عقلها وقالت؛خيرها ماما؟
سارة شدت ايدين نرجس وقال؛بالله عليك فهميها ان حني مانبوش مراة تانيه بعد ماما..
نرجس:علاش تقولي هكي شن شايفه ؟!
سارة مشت قعمزت وهي تقول ببكي وارتباك؛ع امك مش شايفه شي بس..بس يعني قوليلها اللي قتلك عليه وبس..
نرجس جت لسارة ومسحت دموعها وقالت:حاسه بيك وفاهمه عليك..اطمني حبيبتي لايكمن يصير اللي في بالك.لأن بوك يحب امك هلبه هدا اللي شفته من لما عرفتكم ومااظنش اللي زيه ينسى مراة زي امك طول عمره..
سارة مابتش تقول لنرجس كل شي..لأنها فعلا مالاحظت شي ع نوال..كل شي لاحظاته ع بوها..لكن حست ان نوال متأثرة بيه وهدا يكفي بش يخوفها...
نرجس؛اقتنعي بكلامي وحولي من راسك هالوسواس..اساسا ماما توا تبي تعيشلنا وتعوض اللي راح كله..مش فبالها نهائي..
سارة خدت نفس بعدين هزت راسها ومسحت دموعها وقالت:شن هو موضوعك..
قعمزت نرجس وهي مبتسمه وقالت؛ياستي هدا ولد خال ماما كان يبيني من زمان بس اني مش مدوراته..
وحكتها القصه كامله بعدين قالت.. اني نوثق في رايك صغيره صح بس واعيه هلبه..
سارة: امم..نقول ان هدا يحبك حب مافيش زيه رد بالك تفرطي فيه..يعني يقعد السنين هادي كلها من غير زواج عايش ع امل ان ممكن تكوني ليه يوم من الايام..هدا حتعيشي معاه سعيده لأخر يوم في عمرك..نصيحه ماضيعش من عمرك وعمره اكثر من اللي ضاع... اختاريه ..اختاري تعيشي سعيده..
نرجس بضحكه؛يجنن كلامك خلتيني نشوف للحكايه من مكان تاني..يابخته خطيبك بيه..
سارة بإبتسامة خجل؛اني اللي يابختي بيه...
ابتسمت نرجس وقالت:شكلك تحبيه هلبه..
سارة ابتسمت بخجل؛ فوق الهلبه...
ضحكت نرجس...
🍁🍁🍁🍁
خشت للدار وهي تقول..
دانيه؛شن في؟
مجاهد:سكري الباب..
سكراته وهي مستغربه وجاته وقفت قدامه..
دانيه:شن صاير..
مجاهد خدي من ع الطاوله علبة مجوهرات صغيره مفتوحه ووراها لأخته وقال:شن رايك؟
دانيه بإنبهار؛يهبل يهبل الفص متاعه الماس ولا؟
مجاهد وهو مبتسم هز راسه بإيجاب..
دانيه؛يجنن يامجاهد .
مجاهد؛في رمضان نبي ندير بيان لسارة...البنت بتقعدمخطوبه عام كامل لازم نديرلها حاجه..حاجه تناسبها وتليق بيها...
دانيه بإبتسامه؛تعرف سارة انت سادتها الدبله اللي لابستها توا منك تشوف فيها حاجه كبيره هلبه يامجاهد لأنها تربطها بيك..
مجاهد؛ولأني عارفها نبي نديرلها شي نبيها تعرف قيمتها وقدرها وعندي..ونبي بوها يعرف انه عطاها لراجل يعرف قيمتها...
دانيه بإبتسامه وعيونها معبيات دموع:يابختك ياسارة..
مجاهد؛اللي يسمع يقول راجح مادارلك شي..
دانيه ضحكت وقالت؛اني نحكي ع شي تاني..عندي اني مافيش منك بكل..تعرف مرات نقول انك خيال مش حق في كل شي.
مجاهد عقد حواجبه بضحكه وقال؛معاش تبالغي...المهم توا..اني بنقول لأمي تفتح الموضوع مع خالتها ويتفقوا مع بعض..بعدين نطلعكم تاخدوا الحاجات انتم تفهموا فيها نبيه كامل ماناقصه شي ..
دانيه بإبتسامه:ان شاء الله على خير يارب..
تنهد بإبتسامه وقال:يارب..
🍁🍁🍁🍁
في الساحه متاع السجن...
كان يدير زي ماتعود في كل يوم ساعه يمارس فيها الرياضة..
وهو لابس سروال توته اسود مع توب ابيض بدون اكمام..وطاقيه لابسها ع راسه بالعكس...
يجري ويلف ع الساحه لمده نص ساعه...
والنص ساعة التانيه يدير فيها تمارين تبني عضلاته..زي ماتعود في حياته القديمه..
كان يحب يقوي جسمه ويخلي هيئته رياضيه..
مشي قعمز تحت الشجره وخدي من زميله الميه وقعد يشرب..
مراد؛جسمه مولي مليح..
ابتسم ونزل الشيشه وقال؛تصدق زمان خشيت صالات رياضه..وكانوا يدربوا فيا مدربين معروفين ع مستوى ومن برا البلاد..كنت نقوللهم نبي جسمي يولي حاجه ماصارتش..
وفعلا كنت هكي...كنت نحب الاستعراض هلبه ولفت الانتباه..كنت نحب وين نخش المكان نخطف القلوب وهدا اللي كان يصير ..غمض عيونه وقال...افف..قداش كانت حياتي تافهه وحقيره لدرجه...مانحبش نتفكرها نتمنى من قلبي لو نقدر نمسحها مسح هديكا الفترة من عقلي..
تعرف مرات نتخيل لو ربي خدي امانته بعد ماخديت الجرعه الزايده..بعدين وين نوقف قدامه ويسألني جسدك في شن افنيته يافاتح..شن بنرد عليه شن نقوله..في الحرام والوسخ ياربي!
مراد:ياريت كلنا نفكروا في هداكا اليوم قبل ليفوت الفوت...
شويه وانفتح باب الساحه وخشوا خليل وزياد..
مراد؛جو جماعة الطب..
فتح فاتح عيونه وشبحلهم بإبتسامه..
وهما وصلوا فيهم وقعمزوا قدامهم بعد ماطلقوا السلام..
مراد؛هاه شنو قمحه ولاشعيره..
زياد؛تي مية ميه..كل في C..
فاتح بإبتسامه؛جاكم الدكتور حتى اليوم..
زياد بإبتسامه؛ايه لقيناه يراجي..
خليل؛انتم شن جوكم ماصار شي في غيابنا؟
مراد؛زي قبل..
زياد؛توقعت نجي نلقاك عالق في الكوجينه..
فاتح؛شويه تانيه ونوض هو قال نبيهم غدوة نلحق..
مراد بضحكه؛ضحكني لما قال كذب ع مرته وين ذوقها من ماكلة فاتح قال هادي من مطعم جديد فاتح حدا العمل..
فاتح؛لا وتوا بياكلوا منها في عرس...
زياد؛وتقعد فلانه تسال في علانه بالله من وين العشي..مانعرفش انشدي.مولاة العرس..ويجبوها ويسالوها ونقوللهم من مطعم حدا مكان الخدمه متاع راجلي..ويجي يدروروا يلقوها خلي مخلي..
خليل؛ويطلع جاي من مكان الخدمه نفسه..
فاتح بضحكه؛نتخيل فيهم.
قعدوا يضحكوا..
خليل هدا ضحك وقال؛بعيد عن الضحك والبصارة بس سبحان من عطاك هالموهبه حتى الحاجه الجديده تتعلمها فيسع وطلعها احسن من احسن طباخ..
مراد؛فاتح بنة ماكلته فيها شي غريب والله مرة وقفت عليه مالقيتاش يحط في حاجه زايده بش تطلع معاه حاجه تانيه .
فاتح؛امي نوارة اللي بتعملوا بقلبك بيوصل للقلوب قبل المعده..
خليل بإبتسامه؛عندها الحق..علي هكي اللي بتاخدك امك داعيتلها..
ابتسم بحسره وحول طاقيته وقعد يشوفلها..
مراد شبح لزياد؛كان عندي خوات نقولها ومش متحشم فيها راهو عطيته..
فاتح؛بارك الله فيك..
زياد:فاتح يشرف اي حد يناسبه عن نفسي لوكانت اختي مش متسميه لغيره وطلبها مانرداش بكل..
فاتح"متسميه لغيري..لو تعرف قداش شن درت فيا لما قلتها ياصاحبي"
مراد شبحله شويه وقال؛يستاهل..
خليل اكتفي بالإستماع وعقله يفكر نسيبه ويتفكر في قصته معاها..
سكتوا شويه بعدين قال مراد؛غدوة رمضان..
خليل؛اول رمضان هني..
زياد تنهد بحسرة..
فاتح؛بالنسبه ليا اني هدا اول رمضان...
شبحوله...
هو مرر نظره عليهم وقال؛خيركم استغربتوا!؟كنت تصيم خليل..
خليل:اكيد..
فاتح؛خوف من ربي؟
خليل شبحله شويه وغير عيونه عنه وقعد ساكت..
فاتح؛وشن ينفع صيامك لو ماكانش ليه وهو قال الصيام بس من اعمال ابن ادم ليا اني..تعرف لو تشوف للملايين اللي يصيموا في رمضان ممكن والله اعلم ربي مايقبلش في صيام الا ميه ولاميتين ع الاكثر...
التلاته قعدوا سرحانين في كلامه..
هو ربع رجليه ولبس طاقيته وقال بحماس:لكن السنه هادي بإذن الله حتكون غير عن غيرها ..رمضان هدا مش حنخليه يعدي من غير مايقبله مني ربي..
شبحوله وابتسموا...
فاتح؛حتى انتم خودوا ع ارواحكم عهد في المكان هدا وخلوه يشهد علينا عند ربي يوم القيامه..رمضان هدا غير..
مراد؛بإذن الله..
زياد هز راسه وهو مبتسم.
خليل؛مخطط نبدا نحفظ قرآن شن رايكم تحفظوا معاي..هو اكيد مش حنحفظوه كله بس اللي نقدروا عليه..
فاتح؛تم..
زياد؛ماشي..
مراد؛معاكم..
☘☘☘☘☘
ويخش شهر رمضان ببركاته وخيره اللي مايتمش..
اول يوم فيه..
كان وكأنه اول مرة لنوال..تمسكت بالعباده هلبه..
والقرآن كان مش مفارقها حتى في المطبخ تسمع فيه في الراديو..بصوت القارئ ناصر قطامى..
ونرجس حتى هي عاشت اجواء رمضان الحقيقيه لأول مرة هالعام...وهالعام بس حسوا بيه...
🌼وهالعام كان غير عند عيلة سدينه في وجود كنعان اللي اظفى جو جديد ع الحوش...وحلا طعم الحياة فيه..
هو خلا مجيد ومقبوله ملايكه!...
طبعا الفلوس ياما دير.....
🍁واجواء رمضان هالعام ع عفاف كانت حزينه بس حاولت تقوي نفسها وماتنكدش اللي قاعدين معاها بالذات كنتها نسيبه الحامل بحفيدها التاني
لكنها قعدت واخده موقف من جهاد اللي كان مصر ينهيه في اول ليله من رمضان
•••وهي لابسه ملايتها ومقعمزة ع سجاة الصلاة وهو مقعمز حداها كانت تقوله؛ايه اللي صار مش شويه لكن ماتوصلش للطلاق..بنات الناس مش لعبه راهو عندك اخت ياهمي فكر فيها هي ع الأقل..
وجهاد منزل راسه وساكت
عفاف؛الله يسامحني مسكينه ماريت منها كان الباهي والله خشت قلبي وخاطري وطلعت من عندي وخاطرها مكسور مني ومن ولدي..والله نرقد ونفطن وتخطر عليا نقعد تفكر فيها..حرام والله حرام..وبحده كملت تقول..لكن اسمع معاش تفتحلي سيرة الزواج لين تكبر ودير عقل لين يفوت عمرك 35 عام ايوه..
ضحك جهاد وقال؛احسن حاجه..وهي خودي بوسه ع راسك..
عفاف ابتسمت بعصبيه وقالت؛حول غادي..
وهو باس راسها وحضنها وقال:استاحشتك يامسمومه..
قرصاته من ذراعه..طلقها وقعد يتحسس في  مكان الألم
عفاف وهي شاده ضحكتها:تستاهل...
🌼🌼🌼🌼
وفي حوش عم مريم الكبير..
كانت مجتمعه العيله كلها غادي ع الفطور..
كلهم كانت محط انظارهم مريم والتغيير اللي صار معاها..
الحجاب اللي ماحولتاش..اللبس المحتشم...
ومش هكي وبس..
رضوان؛اووو مريم...وقدملها بيسلم عليها وهو يقول..شن جو
هي حطت يدها ع اعلى صدرها وقالت؛تمام..
هو تفاجئ وانحرج..
وواحد من ولاد عمها قال:ولت شيخه مريم خلاص..
مريم؛ان شاء الله..
خديجه؛خلاص خلوا البنت في حالها..
رضوان مشي قعمز وقال؛ياودي كل حد حر في حياته..
ع جية دنيا بسفرة القهوة لقت رضوان مقعمزة حدا وحده من نساوين خوته ويهدرز معاها..
قعدت تفرق عليهم في القهوة..
ع خشة ضرار قال؛السلام عليكم..وهو يشوف لمريم..
اللي طول ناضت ومشت خشت داخل..
وهو مشي قعمز وعيونه معاها..
ومرته عيونها مع خوه لين وصلت فيه؛تفضل رضوان.
هو خدي الفنجان وشبحلها وهي يدوب شبحتله ومشت كملت تفريق...
•••••••••
مكالمه هاتفيه..
ياسر:والله يبوا يومين هكي بالكثير..........ان شاء الله....ان شاء الله..وانت طيب.......صحه سحورك مقدما.....تصبح ع خير...
وسكر...
وهو ماشي بيخش داخل وقف لما سمع..
"انت واخد راحتك معاهم هلبه"
"وانتي شن واجعك قولي ترا قولي"
تبع مصدر الصوت..
لين قرب منه وبدي يبيت..
واستغرب اللي شافه..رضوان مع مرت ضرار!!
رضوان؛لو مراة تقوليها..
دنيا؛خليك انت راجل وقولها...
قرب منها وجي بيتكلم..
"دنيا"
رضوان؛بري خشي داخل فيسع خشي..
وهو هرب..وهي بسرعه خشت داخل..
وياسر دماغه صارله استك من اللي شافه..!!؟
شن معناه!!؟
ولعند ماروح قعد عقله مع اللي شافه وخاف هلبه من تفسيره..حتى مرته اللي تعود يحكيلها في كل شي ماقدرش يحكيلها هالمره...لأنه ماينحكاش...ويخوف هلبه...
🍁🍁🍁🍁
"قالت ع ليلة27"
نسبيه بإبتسامه؛شن قولك سرو؟
سارة وهي مبتسمه بخجل؛مش عارفه..
ماجده؛شن اللي مش عارفتيه تبي بيان ولالا..
نسيبه؛تبي مالا شني غير متحشمه تقول..
جنان:معناها سارة بتولي عروسه!؟
ضحكوا..
ماجده؛مش بالزبط..
ريحان؛كيف..مش بتمشي تقعد مع مجاهد القنين هداكا في حوشهم.؟
كلهم ضحكوا بصدمه..
نسيبه:غبارة سودا..البنت هادي موليه تخوف راهو..
ع جية هيثم قال؛خيركم تضحكوا ضحكونا معاكم ..
ومشي قعمز حدا نسيبه..
جاته جنان وقالت:سارة بتولي عروسه!؟
هيثم شبح لسارة..
سارة قريب تبخرت من الخجل..
ماجده:اشبحلي هني..شبحلها..وهي كملت تقول..هدا كلمتني سدينه ام مجاهد قالت بنديرو بيان لسارة..
هيثم؛مصاريف زايده..قوله يحط ع فلوسه في شي ينفعهم..
نسيبه؛هي بتقعد مخطوبه عام لازم يدير بيان..
هيثم:تو مش جو ماليه يومها ولبسوها دبله ومش عارف شني خلاص ياسر..علاش يرهق في روحه بمصاريف مالهاش داعي..
ماجده؛انت اسأل سارة قبل شوفها بالك البنيه تبي..
شبحلها وقال؛شن رايك انتي بابا؟
سارة بخجل:اللي تشوفه مناسب بابا..
هيثم؛شن دخلي انت خاطبينك انتي هما..
سارة بربكه؛اني يعني عندي..مافيش مشكله..انت شن رايك..
هيثم؛مادام انتي راضيه خلاص..
ابتسمت بخجل وناضت وهي تقول؛بنجيب القهوة..
وهربت من حداهم..
وخالتها وعمتها يضحكوا..
هيثم؛كبرت بسرعه وبتطلع من حوشي بسرعه..
شبح للتوأم اللي واقفات قدامه ضمهم لحضنه وقال..كان نلقى يقعدوا حداي العمر كله..من بيحب بناتي زيي؟!
نسيبه وماجده شبحوا لبعض وابتسموا بتأثر..
وهو مازال ضام بناته بقوة لحضنه..
وهما شادات فيه...
وسارة تشوفله من ورا بار المطبخ وهي مبتسمه ودموعها في عيونها..بعدين شبحت للوحه اللي فوقه..ابتسمت بحزن ونزلوا دموعه فيسع مسحتهم..ومشت تشوف للقهوة...
🍀🍀🍀🍀
وعدت ايام الشهر الفضيل..
والاجواء فيها كانت جدا قمة في الجمال...الطف واحلى ايام تمر عليهم بعد فترة عصيبه عدت بطلوع الروح...
🌼وجي يوم 26رمضان...
بيان سارة ومجاهد..
"الله يبارك عليك سارونتي طلعتي طلعه مش عاديه"
سارة بضحكه؛حتى اني ماعرفتش روحي..
ضحكوا..
ع خشة ماجده؛جو جو....
طلعت نسيبه تجري..
وسارة قعدت بروحها في الدار وهي تردد همسا في ذكر الصلاة ع النبي..
وبرا في وبرا في الصالون...
كانوا موجودات بعض القريبات ومعاهم نوال ونرجس...
شافوا اهل مجاهد وهما خاشين بالسوابيت..
والنساوين يشتوا عليهم...
كانوا يتفرجوا بإستمتاع ع اجواء قليل ماحضروا زيها...
وقعدوا يتفرجوا ع اللي جابوه في البيان كان كله حلو وراقي جدا...
طبعا مقبوله لصقت فيهم فضولا تبي تشوف من هي اللي فضلها مجاهد ع بنت اختها...
•••ماجده:راك تقوليلي هادي هي...
دانيه:ايه!؟حلقومه الحاج مجيد..
ماجده:صار حلقومته والجايه زلابيه زعمه..
دانيه ضحكت...
🌼🌼🌼🌼
وطلت ساره..
وكانت طالعه قمه في اللطافه..وحلوة بالمرة..
وسدينه فرحانه بيها....
ودانيه تشوفلها بفرح وهي تضحك..
جت لسدينه سلمت عليها..
سدينه؛الله يبارك ع بنتي الله يبارك..
سارة؛تسلمي عمتي...
رتاج؛تعالي ياخطيبة خالو خل نشوفك ونقول رايي فيك..
ضحكوا..
سارة سلمت عليها بعدين شافت ولد رتاج وقالت:الله يبارك عليه عسول ربي يحفظه..
رتاج؛حتى انتي طالعه عسوله خطيبة خالو لكن خالو مازال احلى منك..
سدينه؛رتاج!
رتاج؛نبصروا عليها خيرك..
ضحكوا...
دانيه؛خلي صاحبتي في حالها..
وجو لبعض وحضنوا بعض بقوة..
دانيه؛ربي يكملكم ع خير..
سارة؛اجمعين يارب...
وقعمزت سارة ع كرسيها وبدت حفلة البيان.
ومقبوله تفصل فيها وناقمه عليها وعليهم اللي ماعبروهاش...
نوال؛طالعه لطيفه هلبه...جمالها هادي وفيها جاذبيه..
نرجس؛صح..عجبتني طلتها بسيطه وحلوة..
نوال بإبتسامه؛ايه...
🍁🍁🍁🍁
"قتلك والله ماتقدرني"
اسماعيل؛اساسا عقلي مش معاي اليوم..
نادر؛ديما وانت عقلك مش معاك ديما وانت تخمم...
حط اليد متاع البلاستيشن وقال..هات اللي عندك من مصايب...
اسماعيل بإبتسامه؛لاالمرة هادي حاجه غير...
نادر وهو يشوف لإبتسامته؛هدا شنو؟
اسماعيل؛اصلا مش حاكيلك تريح...
نادر؛واني مش حنصر تريح..
اسماعيل؛احسن..هيا كمل لعب كمل..
رجع نادر شد اليد وقعدوا يلعبوا...
وفي نص اللعب نادر قال:اسمع هيييه..
اسماعيل؛شني..
نادر؛احكيلي شن في!؟
اسماعيل؛انسى..
نادر:احسن...المهم اسمع هادي...قالك مرة في دجاجه شربت ميه سخونه جايت دحيه مطبوخه..
اسماعيل ولاكأنه سمع حاجه..
نادر:باهي خود هادي...قالك مرة في واحد رقد ساعه ناض خاتم..
اسماعيل شد ضحكته بكل قوة..
نادر؛باهي بلاش منهم وخود هادي...قالك مرة في واحد حشومي هلبه خطب وحده تتحشم هلبه..يوم عرسهم ماجوش الزوز..
اسماعيل بضحكه؛اسمع ياتافه ياتلعب وانت ساكت يانوض ونسيبهالك..
نادر :هادي اخر وحده خلاص...قالك مرة في ليمه خشت امتحان جابت عصرة من عصرة..وقعد يضحك بتفاهه..
اسماعيل بضحكه؛تافه اقسم بالله...
🍁🍁🍁🍁
تحت اضواء فلاشات كاميرات الهواتف والكاميرا العاديه..
لبست سدينه سارة خاتم السولتير صاحب الفص الماسي..
سارة طار عقلها بيه..
بعدين لبسوها طقم ذهب ابيض وساعه فضة زادو طلتها حلاوة..مع الفستان اللي هما جابوه اختيار رتاج كانت مبهرة ع الآخر..
بس سر جمالها الحقيقي هديكا الليله نظرة الفرح في عيونها..
الحب اللي كان باين فيهم من لمعتهم...
اللي مافيش حد من الحاضرين مالاحظاش...
🌼وفعلا هديكا الليله سارة كانت في قمة سعادتها...
كملت ليلتها وهي تصلي وتشكر في الله سبحانه اللي عيشها هالايام الحلوة اللي جتها بعد شوط طويل من الحزن...
••••••••
"تفضل ياسيدي"
مجاهد؛شن هدا؟!
دانيه؛دبله هي جابتهالك وعطر...وقالت قوليله يلبسها من الليله..
ابتسم وقال؛باهي تصبحي ع خير..
دانيه بمزح؛باهي وانت تلز..
ومشت طلعت من الدار...
وهو حط العطر وفتح علبه الدبله..
وطلع منها دبله فضه رجاليه منظرها جذاب..لكن لقي معاها ورقه...مكتوب فيها..
(ماتحولهاش بكل)
ضحك وخدي الدبله ولبسها...
بعدين خدي العطر..
طلعه..ووقف ع المرايه وقعد يبخ منه ...ويشم في ريحته بعدين شبحله وقال..اعتمدت خلاص...
وحطه الزيانه وحول الاول ودسه في القجر...
بعدين مشي قعمز ع السرير..
وخدي كتاب قعد يشبح لعنوانه هلبه وقال؛تو يجي وقته ونعطيهولها..
🍀🍀🍀🍀
وعدت اواخر ايام رمضان والقلوب اشتاقت ليه قبل رحيله..
بس كانت في غاية الفرح انها واخيرا حتجتمع بأحبابها..
ادارة السجن..
نضمت تالت يوم العيد بش يكون للمساجين مع اهاليهم..
ولقائهم يكون في الساحه الكبيره متاع السجن..
اللي نتجهزت بالطاولات والكراسي..وحتى البوفيه..
:هي امشوا تحركوا..
زياد؛بنطيروا حني..انت اللي خف روحك بس..
ضحكوا..
؛ عيد...بنفوتهالك..
زياد مط شواربه بملل..
واخيرا وصلوا في الباب..
فتحه الحارس اللي واقف قدامه...
وهما طول خشوا للساحه...
اندهشوا بشكلها ومنظرها...
بس وجود احبابهم فيها هو اللي خلاها حلوة هكي...
خليل جو عيونه ع امه واخته تهاني ومرته ومعاهم جهاد..
مشالهم بسرعه..
وامه قدمتله بسرعه لين وصلت فيه وضماته بقوة وقعدت تبكي..
وهو قعد يبوس في راسها ويقول؛خلاص حبي خلاص...
وكلهم يشوفلهم وهما متأثرين..
من جيهة تانيه زياد مشي لعيلته...
واول من تلقاه سارة االي ضماته وقعدت تبكي..
وهو يمسح ع راسها ويهدي فيها...
وباقي السجناء اللي هدا مشي لعيلته..
بس فاتح قعد واقف في مكانه بعد ماغير عيونه عن سارة وزياد..قعد يدور بيهم عن اي حد يعرفه...بس مالقي حد..
باهي مدام مافي حد جايه علاش طلعوه..
:فاتح..
شبح لمصدر الصوت..
نائب المدير؛هيا تعالى شد مهمتك...واشرله ع البوفيه..
فاتح قعد واقف يشوف للبوفيه ووقف وفهم السبب اللي طلعوه ع خاطره..
خليل وزياد ومراد وهما مع عايلاتهم كانوا يشبحوله.
وهيثم بشوفله بأسف..
هو غير عيونه عن البوفيه وشاف لسارة..
لقاها تشبحله بنظره مافيهاش اي تعبير..
غيرت عيونها عنه وشدت يد خوها وقالت:زيزو..اشبحلي..
هو شبحلها..
سارة رفعت يدها اليمين ووراته الدبله..
هو ضحك وباس راسها وقال؛حتى في هادي بتسبقيني ياشفشه..
ضحكت ..
هيثم؛هيا تعالى حتى حني عندنا فيك حصه..
ضحكوا وخداته سارة من يده ومشتلهم..
وفاتح غير عيونه عنهم وهو يكابر بكل قوة ويدس في مجموعه المشاعر المؤلمه اللي كان يحس بيها..
ومشي وقف ورا البوفيه..ورسم ع وجهه ابتسامه..
وقعد يوزع في نظره ع الموجودين وفي داخله الف غصه وغصه...

#عيد_الفطر
#البطل_المغمور2

...يتبع....