البطل المغمور (الجزء الثاني) زهور القمر

تابع

#البطل_المغمور2  "زهور القمر"
#جمان_فريد
#الجزء_الثاني_والأربعين "انتي الفوز2"
رمضانكم مبارك
قال عليه الصلاة والسلام : ( أرأيتم لو أن نهراً بباب أحدكم يغتسل منه كل يوم خمس مرات هل يبقى من درنه شيء ؟ قالوا لا يبقى من درنه شيء . قال فذلك مثل الصلوات الخمس يمحو الله بهن الخطايا ) رواه مسلم
💐💐💐💐💐💐💐💐💐💐💐💐💐💐💐💐
في الملحق متاعه..
مقعمز يتصنت في أغنية من الراديو ويغني معاها..
وفي عز انسجامه..
ينفتح عليه باب الملحق بقوة..
انفجع وشبحلها كيف واقفه تشبحله بغضب..
سدينه:لوين تبي توصلها معاي قولي..كرامة لولدك ساكته عليك ومسكرة فمي ومخلياتك في حوشي وانتي لاتستحي ولاتتحشم ولاعندك ذرة دم ياشايب ياعايب ياقليل العقل..
مجيد وهو مخلوع؛تي خير دعوتك انتي شن جاك هبلتي..
سدينه؛تي والله لتوا قاعده بعقلي معاك..مش سادك اللي درته فيا سنين...لاكان ليا معاك قدر ولاكرامه ياما مسحت بيا وهنتني ووريتني الذل كله استغليت ضعف وقلة عزوتي وخليتني خدامه ليك وللنساوين اللي تجيب فيهم وحده ورا التانيه وفمي ساكت وصابرة ونقول عند ربي خير...وياريته بلاك قعد دابي طال حتى صغارك اللي ماروا منك حاجه يحكوا بيها..حتى بعد ربي فكنا منك لحقتنا زي الهم...وفوق مااني قعدت في حوشي بعد اللي درته هدا كله ماتبيش تتحشم وجهك!..حاط عينك ع الخدامه يامتخلف..
مجيد؛من اللي قالك الدوة هادي هي!؟ وانتي تصدقي فيها طول ولا؟! تي هي اللي تجيني كل يوم وتحاول معاي.
سدينه قاطعاتك بعصبيه؛صكر فمك صكر..كان مانعرفكش نقول الحق....اني اللي نعرفه توا ولدك لما يروح يدبرلك اما قعاد عندي في الحوش والله مانك قاعد خلاص..
ومشت طلعت وهو يلحق فيها بالكرسي ويقول؛غير راجي ياسدينه اسمعي..
وسكرت باب بعد طلعت..ولفت المفتاح اكثر من لفة وخداته ومشت...
ومجيد يطق ع الباب بإيديه بصعوبه وهويقول:افتحي ياسدينه...ياسدينه..كذابه والله كذابه تكذب عليك...
لما سمع باب الفيلا الدخلاني تسكر...تأفف وقال...عليك حظ نحس وخلاص..تو نوريها الخدامه الخامجه هادي كان ماخليت رشيد يلزها...تو تشوف..
🍁🍁🍁🍁🍁
جاية ريحان تجري من الحمام وهي تقول :تم الشوط الأول؟
جنان؛ايه تم واحد شي..الشوط الثاني كله يمشي في ضياع الوقت بش يفوزوا الاتحاد..
ريحان قعمزت وهي معصبه قالت؛طبعا نادي الواسطات هدا..كان نلعبوا برا الدوري الليبي والله مايطلعلهم معانا.
نرجس؛لا ياماما الاتحاد برا البلاد لعبه مليح وياما وصلنا لأدوار نهائيه في دوريات افريقيه وعربيه..
ريحان؛وصلتوا البطاطا..
سارة؛ريحان!
رنيم بضحكه؛خليها شن قالت ماقالت شي محروق دمها معذورة..
قلبت ريحان عيونها وشبحت للتلفزيون..
ونرجس ورنيم يضحكوا عليها..
وجنان كانت طايرتلها منهم..
••في المربوعه
المثنى؛تي مخدومه ياراجل واضحه من الاول مش جديده عليهم..
احسان؛من لما عرفت التشكيله شكيت في الموضوع..
مهاب:ايوه علقوا ع هديكا الشماعه علقوا..
زياد؛عندهم حق من البدايه الوضع واضح...
فاتح؛مش عارف بس احساسي يقولي ان الشوط التاني حينقلب المشهد مرة وحده..
المثنى؛ياريت والله..
مهاب:حلم الشيطان قالوا..
فاتح بضحكه؛تو نشوفوا...
🍁🍁🍁🍁🍁
في احدي الدول العربيه..
في مطعم الفندق اللي هو قاعد فيه مع بعض موظفي الوزارة..
كانوا يتعشوا ويتكلموا في موضوع الحالة اللي جو ع خاطرها من غادي.
هيثم؛شي يقشر الوجه..ليبي ويقعد يشحت في حق العلاج ويترجي في اللي يسوى واللي مايسواش هني..
لجين:للأسف..بس رئيس الوزراء وحضرتك درتوا اللازم..
هيثم؛من اول مانروحوا من هني نبي تتجهزلي قائمه بأسماء المستشفيات اللي جايينها اطباء زائرين ليبين وغير ليبين..
لجين؛ان شاء الله دكتور..
:دكتور شن صار بخصوص المقترح اللي قدمته؟
هيثم ابتسم وقال؛مقترح ممتاز وحنبدوا فيه بإذن الله بعد نتموا الموضوع هدا..
لجين بإبتسامه؛نقدروا نعرفوا شن هو ؟!
ضحك زميلها وهيثم بإبتسامه قال:في وقته تعرفيه إن شاء الله...تعشي..
هزت راسها وهي مبتسمه ورجعت تتعشى..
وهيثم والموظف التاني يتعشوا ويهدرزوا..
وهي تسرق في النظر لهيثم وتقول في نفسها..
"مافي شي تغير فيك زي ماانت كل مالي نتأكد ان قلبي قعد ع ذكراك السنين هادي كلها لأنك تستاهل.."
هيثم؛نستأذن منكم بندير مكالمه..
لجين وزميلها بأصوات متقطعه؛اذنك معاك دكتور...
ناض هيثم وتباعد عليهم..وهي معاه بعيونها..
:بجديات محظوظين بيه الراجل هذا..
لجين بإبتسامه؛هلبه..
🍁🍁🍁🍁🍁
ورجوعا لأرض الوطن...
في المزرعه تحديدا...
نوارة وماجده يديروا في العشي مع بعض..
وحداهم الحاجه سنيه مقعمزة تهدرز عليهم...
وفي الصالون...
رنيم مع سارة لاهيين بتليفون رنيم اللي فيه صور لأثاث حوش عجبوا سارة هلبه..
وحداهم بمسافه نوال مقعمزة مع نرجس يحكوا في موضوع اسيد..
نرجس بإبتسامه فرح؛واخيرا ياربي مش مصدقه اسيد بيتزوج..متلهفه نشوفها البنيه..
نوال؛بنيه حليوه وتخش القلب طول مانستغربش اللي خوك قرر يتزوج ع ايديها..
نرجس؛لكن قوليلي هو علاش ماجاش؟
نوال؛تعرفيه خوك مش غريب عليك مايحبش
نوال؛ مايحبش يختلط بالناس هلبه..
نرجس؛ان شاء الله تغيرله هالطبع...
وفي وسط هالقعده..
رن تليفون ريحان..
قاماته وشافت الشاشه وقالت؛بابا!
سمعتها نوال شبحتلها طول..
سارة؛اكيد اتصل بيا لقاه مقفل..
ريحان فتحت الخط وردت؛السلام عليكم بابتي.
"وعليكم السلام حبيبتي شن جو"
ريحان ؛معكر بابا الاهلي خاسرين واحد شي في الشوط الاول..
"تو يفوزوا في الشوط التاني بإذن الله تو تشوفي "
ريحان؛تقول هكي بابا..
"نقولوا ان شاء الله بابا مادام مازال ماتمتش في امل..ترا عطيني جنو"
ريحان بآبتسامه؛تمام..مدت التليفون لجنان..
خداته جنان وردت طول:السلام عليكم بابا..
"وعليكم السلام حبيبه بابا حتى انتي زعلانه ع خاطر المباراة"
جنان؛مش هلبه حاسه ان حنربحوا..
"ان شاء الله بابا ..ايه كيف حالكم"
جنان؛الحمد لله بابا..انت كيف حالك غادي وشن داير راد بالك من روحك ولا حصلتها فرصه..
"لابابا اني راجل ملتزم مانعرفش نلف وندور ع القوانين ولانطلع عنها"
سارة؛ترا هاتيه جنان..
جنان؛تبيك سارة بابا..
"هاتيها"
مدت جنان التليفون لسارة وهي خداته وناضت من حداهم..
وعيون نوال معاها..
طلعت سارة برا وهي تتكلم..
سارة؛السلام عليكم بابا..
"وعليكم السلام بنتي..هاه شن الجو غادي تمام؟!"
سارة بإبتسامه؛تمام حبيبي اطمن..
"شني انتي وفاتح ردبالك بنتي بالله عليك"
سارة بإبتسامه؛قتلك اطمن بابا وماتشغلش بالك..اهم شي انت تكون راد بالك من صحتك..
"ماتخافيش نفد في التعليمات بالوحده..خلاص بابا توا بنسكر سلمي ع خوك"
سارة؛يوصل بابا...في امان الله..
"مع السلامه"
سكر هيثم وسارة نزلت التليفون وجت بتخش شافت فاتح واقف يتكلم بالتليفون..
قعدت واقفه تشبحله لين هو شافها..
ابتسملها وهي ردتها اشرلها تقعد...بعدين كمل مكالمته...ومشالها..
هي قعدت واقفه تراجي فيه لين وصل فيها...
فاتح؛خيرك مسكرة تليفونك..
سارة؛شحنه تم ونسيت ماجبتش خيط شحن..
فاتح؛مافي حد عطاك خيط شحن؟
سارة؛تحشمت نطلب..
قرصها من انفها وقال:تتحشمي!..
ضحكت بإحراج وقالت؛ايه بايخه تحسها..
حرك راسه يمين ويسار وهو مبتسم وقال؛عليك جو ديري فيه...ماشي نجيبلك خيط شحن وجاي..
سارة بإبتسامه؛تمام..
فاتح؛خشي داخل ماتقعديش برا تو نبعتهولك مع بلال..
سارة بإبتسامه؛حاضر..ومشت خشت داخل..
وهو تنهد بإبتسامه بعدين لف ومشي للمربوعه..
وصل فيها وخشلها وهو يقول؛زياد قاعد تشحن..
زياد؛لالا تعالى خوده..
مشي فاتح خدي خيط شحنه وقال؛ترا تعالى بلال..
ومشي هو وياه وطلعوا برا المربوعه..
وهما فيها يهدرزوا عن...
المثنى؛النادي اللي كنت فيه زمان صايرتله مشكله ماليه ..
زياد؛النادي نفسه اللي فيه اختي..
حك المثنى رقبته من الخلف وقال؛هو نفسه نفكر نكلم صديق عليا يدعمهم يدفع عليهم الديون متاعهم ع الأقل..
احسان؛لو جي نادي تابع للدوله راهو هما دعموه..
المثنى؛صح.. المهم تو نشوف الولد وان شاء الله خير..
احسان:رشيد المجذوب..
المثنى:ايه..
مهاب؛رشيد المجذوب نفسه صاحب شركه (KR) !؟
المثنى بإبتسامه؛ايه هو نفسه..
مهاب؛ياراجل قداش ليا دايخ وراه وطلع صاحبك في الاخير بكل..تعالى هني تعالى..
ضحك المثنى وقال:شن عندك..
وقعد يحكيله مهاب شن يبي بالزبط..
الاشهب؛سامع بيه الشاب هدا رغم صغر سنه دار اسم كبير..
احسان؛نعرفه شخصيا ماتعطيشي عمره..عندك علم انه قاعد طالب جامعي..
الاشهب؛ايه الله يبارك ويكثر من امثاله..اللي في عمره توا وعندهم ماعنده  تلقاهم لاهيين بالدوة الفاضيه وضياع الوقت..
زياد؛نعرفه من قريب شوي..حامل كتاب الله ويعلم في القرآن..
احسان؛مزبوط..
الاشهب؛الله يبارك..
ع خشة فاتح قعمز جنبهم وقال:بدي الشوط التاني..
كلهم ركزوا مع الشاشه ومهاب على الصوت وقال:بعدين نزيدوا نهدرزوا
المثنى وهو يشوف للتلفزيون؛إن شاء الله
🍁وبعيد عنهم..
في مكان تاني...
تحديدا في قاعه لاحدى الفنادق
كان موجود رشيد وقدامه مجموعه من الشباب والشابات اللي ماعندهمش ميول اتجاه كرة القدم ومش مهمه عندهم الديربي...المهم عندهم الكلام اللي يسمعوا فيه من شاب في سنهم يعتبر مصدر الهام وقدوة...
رشيد؛اي امه ع مر التاريخ وفي العالم كله اساسها اللي انبنت عليه الاخلاق..وطبعا نحكي هني ع الاخلاق بشكل عام الموجوده عند المسلم والغير مسلم..وزي مانعرفوا اساسا الاسلام جي بش يتمم مكارم الاخلاق...والاخلاق هادي لو راحت وانتهت الامم هادي حتسقط بكل مافيها اقتصاديا وسياسيا وقضائيا..من جميع النواحي
حني كمسلمين الاخلاق عندنا مدعمه ومضاعفه وكامله تماما لما كنا في قديم تاريخنا محافظين عليها وصلنا لأعلى المواصيل..بس توا مع الاسف قاعدين ننضربوا في الاخلاق هادي ووحده وحده قاعدين نفقدوا فيه
قعد يعد ع صوابعه وهو يقول...الحياء اللي يكاد يكون معدوم..الامانه اللي شبه ضاعت..الاحترام اللي فقدناه تماما...هادي القيم اللي قاعده ضيع حضيعنا حني في جرتها..
تعرفوا شن اكثر شي يشكل خطر ع الاخلاق في عالمنا حني كمسلمين...خدي تليفونه وقامه وقال...هدا...اللي عند كل حد فيكم..عندك وعندها وعند حتى الصغار الصغيرين وهني المصيبه الاكبر..حط التليفون في مكانه وقال..لما دير لعيل صغير عمره مافاتش السته سنين تليفون انت هكي بديت تخرب فيه بعمق..الخراب يوصل لأعمق نقطه في الطفل..لأنه صفحه بيضا وقاعد كله يتسجل في دماغه وصعب يتحول منه..
الصغار وين يشدوا التليفون وينزلوا العاب عن طريق الانترنت تبدا تجيهم اعلانات لفيديوهات لاأخلاقيه..والعيل عنده حب فضول..بيخش ويشوف..وهني تبدا رحلة ضياع..الله اعلم ممكن يجي حد يستاقظ بيه وينقده منها تنهد وكمل يقول..وممكن للأسف يضيع بالمرة..في حاجه ضروري نقولها مهمه جدا..تربية خوتكم الصغار في الحوش مش مسؤولية ابائكم وامهاتكم بس..مسؤوليتكم حتى انتم...
ساعدوهم ربوا خوتكم معاهم...خلوكم قراب عليهم خليكم صحابهم وفي نفس الوقت موجهين ليهم..خليكم قدوة حسنه ليهم بش وين يشوفوكم شن ديروا يديروا زيكم اللي عنده او عندها خوت صغار راهم يتأثروا بيكم زي مايتأثروا بالأب والام حاولوا ع قد ماتقدروا تكونوا خير قدوة ليهم..
توا وهما في مكانهم منفتحين عن العالم توصلهم الافكار الهدامه اللي ضيعهم..بنقولها وبكل تجرد..زي اللواط...ايه اللي مسمينه برا مث.ليه قعدوا يمرروا الفكرة مش بس للصغار حتى للكبار عن طريق افلام كرتون وافلام سينمائيه بش يوصلوا للهدف متاعهم..المشكله ان الطرح يبان عادي ومافيشي مشكله ويقولك حني نجيبوا في واقع تمام جيبلي الواقع لكن عالجه..ماتجيبليش الواقع بش نألفه ونتعود عليه ويبدا عندي وعند الناس عادي....!
تنهد بعدين قال... اساسا لفظي حرام وحلال اللي ولوا غير مستساغات عند الناس لازم يفهموها بطريقه تانيه..
الكون هدا اللي صنعه حطله قوانين..اللي يطبقها ويمشي بيها هدا ينقال عليه يمشي بالقانون ويدير في كل شي قانوني..
بين قوسين...حلال..
واللي ينحرف عن القوانين هادي ويدير عكسها ينقال عليه خارج عن القانون لانه يدير في شي غير قانوني بين قوسين "حرام"
لو دوله ولت فوضى ومافيهاش قانون يحكم الناس شن يصير فيها حتنهار..
هدا نفسه اللي حيصير فهالعالم لو ماتنفذتش قوانين صانعه حيفسد ويبدا ينهار...ردوا بالكم تستصغروا الحرام مهما كان الصغير ديما يجيب الكبير...ولما ينتشر ويبدا عادي بين الناس حيفسد نظام الحياة كله...
بتقولوا علاش رشيد المجذوب اللي يحاضر ديما عن مواضيع تخص التنميه البشريه والاقتصاد والادارة..يتكلم في مواضيع زي هادي..نقوللكم لأن هدا هو الاساس اللي يجي بعده كل شي زي ماقلت في بداية كلامي...
تبي نهضه..تبي تنميه..تبي ازدهار ابدا بالأخلاق اولا..
وزي ماقال امير الشعراء احمد شوقي..
إنما الامم الأخلاق مابقيت..فإن هم ذهبت أخلاقهم ذهبوا...
🍁🍁🍁🍁
"ووووه"
"خشيي"
الصيحات هادي كانت من المثنى وريحان وكل حد فيهم في مكان..
فرحا بأول هدف يحرزه فريق الاهلي قدام الاتحاد..
والمربوعه انقلبت كلها ع مهاب مسكين..
وجنان وريحان تشمتوا في نرجس ورنيم لين انشفي غليلهم...
وهني بدي الاعصاب مشدودة اكثر بعد ماتعادلوا الفريقين..
والكل يتابع في المباراة بكل مافيه...
ماعدا نوال وسارة ومعاهم ماجده ونوارة وسنيه لاهيين في الكوجينه يوتوا للعشي..
نوال؛ماشاء الله سارة تعرفي طيبي..
ماجده؛الله يبارك عليها سويرة من وهي فالإعدادي فالحه في التطييب..
نوارة؛يعني ياحبيبتي مادمتي تعرفي تطبخي خلي جوزك ياكل من ايديك مايقعدش يشتغل برا وجوه..
نوال شبحت لنوارة وهي ترفع في حواجبها وتنزل..
ونوارة دير في روحها ماتشبحش..
وماجده ردت عن سارة وقالت؛اكيد مالا شنو تعرف واجبها هي من غير توصايه..
ابتسمت سارة..
نوارة؛ايوه كده انا اطمنت عليه..
حركت نوال راسها يمين ويسار ..
وماجده تستف في الحاجات وهي رافعه حاجبها..
سنيه حبت تلطف الجو قالت؛ان شاء الله تم هالمباراة ع خير..
نوال بضحكه؛حتى اني من بكري ندعي...
"خشي خشي...اهلاوي اهلاوي...صدارة معليشي"
سارة؛هبلوا هادم!؟؟
ومشت طلعت لخواتها بش تخليهم يوطوا صوتهم..
وفي الكوجينه يضحكوا..
اما المربوعه
صاير فيها زلزال كاد يهدها ع روسهم ...
وماهي الا دقائق وانتهت المباراة بفوز الأهلي...وهو كان صاحب الفوز بالدوري الليبي...
🍁🍁🍁🍁🍁
فهالوقت تمت محاضرة رشيد وختامها كان بتصفيق حار من الحضور..حياهم بحركة يده اليمين وهو يحط فيها ع يسار صدره..
بعدين مشي طلع من القاعه..
وبدت الفلاشات الكاميرات تبرق في المكان..
وهجموا عليه الصفحيين.
"استاذ رشيد سؤال واحد بس"
استاذ رشيد حني مجلة "شبابكم" نبوا نديروا معاك حوار"
وهو كان يمشي طول لأنه مستعجل بدون مايرد ع الاسئله..
وقعدوا وراه لين جي بيطلع لسيارته..
فجأة جاه سؤال وقفه..
"شن حقيقه الاخبار اللي تقول انك مرتبط ببنت رجل الاعمال المعروف عبدالحميد كعبار"
شبح للصحفي وقال؛مافيش منه الكلام هدا..
ومشي لسيارته بيركب والحراسات متاع الفندق بعدوا عنه الصحفيين لين ركب السيارة...
رشيد؛للحوش...
السواق تحرك طول..وهو قعد يفكر في الكلام اللي سمعه من للصحفي معلومه زي هادي من وين بيجيها؟!
وماطولش بس عرف الاجابه ع تساؤله هدا..
اذا حاولت تجيبه بالسحر.. ماتتبعش الاسلوب هدا!؟...
🍁🍁🍁🍁🍁
ومازالوا في عز فرحتهم بالفوز حتى وهما يتعشوا ماتمش الكلام عن المباراة..
بس بعدين عنهم في الكوجينه..
كانوا فاتح وسارة يتعشوا مع بعض بروحهم ويهدرزوا..
سارة بضحكه؛لالا ماعنديش فيها الكورة بكل ومانحبهاش..
فاتح بإبتسامه؛معناها تحبي تكتبي بس..
سارة بإبتسامه؛عشقي..
فاتح؛تمام اني نحاول نقرالك باهي وكان مافهمتش حاجه بنسألك تكتبي بالفصحى والفصحى متاعك قويه ماشاء الله مانقدرش عليها..
سارة؛ايه وبالمرة نهدرزوا في موضوع ظ وض هدا..
فاتح بضحكه؛عقدتي اقسم بالله..العربي هدا مانحباش..
سارة بإبتسامه؛انت املتك كويسه بس عندك المشكله هادي بس صغيرونه تو تعديها..
فاتح بضحكه؛تمام لكن ردي بالك تسألي ع خطي نخاف تسيبيني كان شفتيه..
سارة بضحكه؛لالا نبي نشوفه..
فاتح رفع حاجبه وقال؛شكلك تبي تسيبيني..
سارة؛لا والله ماقصدي اللي انت فهمته..
ضحك وقال؛خيرك نبصر عليك..ندير في الجو نحسابك بتقولي نحبك وهكي ..
سارة مطت شواربها للأسفل وهي تضحك..
هو قال بضحكه:باهي قوليلي انتي درتي هدا كله..
سارة؛ايه البيتزا ولفائف الدجاج والكفته الطرابلسيه..
فاتح؛لا والله مليح بكل..اسمعي راهو بعدين انتي بطيبي..
بدت تضحك..
وهو يشوفلها بإبتسامه استغراب بعدين قال:خيرك تضحكي..
سارة بضحكه؛نفس الكلام سمعته بكري من امك نوارة..وقلدتها وهي تقول... ؛يعني ياحبيبتي مادمتي تعرفي تطبخي خلي جوزك ياكل من ايديك مايقعدش يشتغل برا وجوه..
فاتح بضحكة احراج؛ربي يهديها وخلاص..
سارة؛لاعادي كلامها اصلا توقعت حد يقولي هكي يحسابوني بنخليك تقرب حاجه ولاتمس حاجه..
فاتح؛لاقلبي الحياة الزوجيه مشاركه غلط التفكير هو متاع الراجل مايدير شي ومايساعدش مرته...كان الرسول اللي هو الرسول فوق ماكان ع راسه من هموم ومسؤوليات يعاون في نساوينه...يكنس..يخيط في حوايجه..يعجن في العجينه متخيله انتي!..محلاها الحياة اللي هكي..
سارة بإبتسامة حب ونظرات اعجاب؛اسلوبك حلو هلبه...
فاتح نزل راسه وخدي طرف بيتزا وقال؛معاش بندوي خلاص..وحطت طرف البيتزا في فمه..
وهي تضحك عليه..
واستمرت هدرزتهم لعند ماخشوا عليهم الكوجينه..
نرجس وبناتها بش يغسلوا ايديهم...
خشة ع ضحكاتهم هما الزوز..واستغربت وضعهم هلبه...
شويه وخشوا نوارة وماجده..
انسحب فاتح...وهما بدوا يغسلوا في الماعين...
وماهي الا ربع ساعه والكل روحوا من المزرعه بعد ماقضوا ساعات حلوة وسط اجواء جدا جميله..
وهدا كله كان تأثيره ع سارة ايجابي..
اللي ولت ترقد ع صوت فاتح وهو يقرا في القرآن..ترقد وقلبها مليان طمأنينه..
🍁الزوج الصالح رزق..اللهم رزقا كهذا🍁
🍁🍁🍁🍁🍁
"اني معاش نتحمله معاش نبيه في حوشي دبرله ديرله حل..زوجه وحده تعانيه وتلفه بعيد عني..عشت اول عمري متبغددة منه تبيني نكمله تبغديد"
غمض عيونه وهز راسه وقال؛حاضر..فتح عيونه وهو يقول..حاضر يام بس اصبري عليا يومين بس ندير فيهم حل ونعطيك وعد معاش تشوفيه هني مرة تانيه ..
سدينه؛يومين بس..يومين دقيقه زياده لا...
رشيد؛حاضر يام حاضر..
••••••••
"ربي يهديك ويسامحك يابوي "
مجيد؛تو انت بدال ماتصدق بوك تصدق الخدامه!؟
رشيد؛مش قصة نصدق ولامانصدقش انت من البدايه عارف امي ماتبيش قعادك لين تجيبلها في السبب لعندها بش تلزك..
مجيد؛لزتني هي!؟
رشيد؛مالا شني قعدلك هني يومين بس..
مجيد ضحك سخريه؛عليك وقت ياعليك وقت..سدينه اللي ماكانت تكسب خلاص تخلص بيه شعرها دارت حوش سياح نياح تحكم فيه وتطلق وتلزني منه..
رشيد ماعجباش كلام بوه عن امه لكن كل اللي قاله؛تصبح ع خير بوي.. ورقد وعطاه بالظهر..
مجيد؛اسمع نبيك تاخدلي حوش باهي ووحده تعانيني مش
تجيبهالي مرهبده نبيها في عمر الشغاله وسمحه زيها...
وقعد مجيد يعطي في طلباته ويملي في اوامر..
ورشيد يقول...حاضر حاضر..وعقله في مكان تاني..
في موضوع ربيبة اخته اللي ماتبيش تعقل وهو مش عارف شن يدير معاها..
🍁وفي بلاد بعيده..
كان في نقاش يدور ع نفس الموضوع..
عبدالحميد ؛الدوة منتشرة يارتاج اليوم شريكي جي من ليبيا وقالي نفس الكلام حق عطيت بنتك لرشيد المجذوب..
رتاج؛واني وريتك رابط الخبر ياعبدالحميد بلسانه قال مافيش منها الدوة..اشبح من مطلعها..
عبدالحميد؛من بيطلعها بنتي مثلا!؟
رتاج؛لا بالك خوي؟
عبدالحميد:وارد جدا لو يبي يفتح معاي موضوع في خدمه ومش عارف كيف هلبه داروها قلبه..
رتاج بغضب:الهلبه هادم خوي مش منهم وانت تعرفه كويس لمايبي منك شي يجيك يكلمك طول ونادرا ماصارت حاجة زي هادي..
عبدالحميد:باهي هدي وماتحمقيش ماقلنا شي كلامي عادي راهو ويصير..
رتاج:مش مع خوي ياحميد..
عبدالحميد؛خلاص اسف اني اسف..هدا راسك وبوسناه...
وقبل راسها اعتذارا..
رتاج؛بش ترد بالك من كلامك مرة تانيه ياحميد..
عبدالحميد؛تمام...ومشي للدولاب بش بيطلع حوايجه ويبدل..
ورتاج مازال حامقه وموترها اللي صار..
🍀🍀🍀🍀🍀
بعد مرور يومين..
رشيد طلع مجيد لحوش بروحه وحطله فيه ممرض يخدم فيه وكلم ناس يعرفهم يدوروله ع مراة تكمل معاه وتعانيه في ماقعد من عمره وبعد مافضي من موضوع بوه..
جي دور الموضوع الأهم...
••خش للكليه وهو لابس كاجوال بعيد عن رسميات الخدمه..
وكان يدور بعيونه من تحت النظارات ع بنت عبدالحميد..
لين عتر عليها مقعمزة ومعاها بنات..
قرب منهم وقال؛نبيك شويه..
هي طارت من الفرحه جتها الفرصه اللي تثبت بيها صحة الاشاعات..
ناضت وهي تقول:عن اذنكم يابنات..
ومشت وراه..
وحده من صحباتها قالت:شن رايكم نصورهم.
صاحباتها؛صوري صوري..
وبدت تصور وتاخد في اكثر من لقطه..
••رشيد بدون مايشوفلها؛عيب في حقك اللي ديري فيه والله مارضيتهولك المستوى اللي نزلتي نفسك ليه..
هي قالت؛رشيد..
قاطعها وقال:اسمعيني...اني لايمكن نفكر فيك حتى التفكير افهمي الحاجه هادي واستاقظي لروحك وسادك اهانه لنفسك لهني..اخر مرة ندوي معاك في الجديد دوتي مع بوك...
ومشي وخلاها..
وهي تبع في عيونها اللي نظراتهم كلها غضب..
بعدين لفت ومشت لصاحباتها وهي مبتسمه وقعمزت حداهم..
:شن قريب نفرحوا بيكم..
هي بثقة مصطنعه:لاعاد مازال شويه خل نزيدوا نعرفوا بعض اكثر..
:اممم..
والبنات يشبحوا لبعض ويتلامزوا بالنظرات...
🍁اما هو طلع من الكليه وركب سيارته اللي يسوق فيها بروحه وتوجه لنادي كرة السله اللي كان يلعب فيه المثنى..
وحاليا تلعب فيه ريحان اللي كانت عندها فيه مباراة تحضر فيها هالمرة جنان بس بعد ماحطتهم سارة ومشت لعملها..
وصل غادي..
وتلاقى هو وصاحبه والزوز كانوا يمشوا بإتجاه مكان يخص المدرجات فيه زي الفتحه من غير باب طل ع الملعب وهي اللي تعود منها المثنى يتفرج ع مباريات ريحان..
وقفوا غادي....
والمثنى يحكي؛صارتلهم مشاكل ماديه وعليهم ديون والوضع صعب ممكن يخليهم يسكروا النادي مرة وحده..
رشيد وهو يتفرج ع المباراة:تمام نمشوا وين مافي مدير النادي نفهم منه ونتفاهم معاه..
المثني بإبتسامه؛منور بس شويه خل نكمل المباراة قبل..
رشيد هز راسه وقال؛تمام..وقعد يتفرج معاه ع المباراة..
بس لاحظ فيها وجه مألوف يعرفه..وين دقق فيها وفي تصرفاتها حس بإختلاف كبير..واستغرب..
ضيع عليه تركيزة صوت عيل صغير وهو يبكي..
شبح لمصدر الصوت شاف عيل عمره مايقارب الثلاث سنوات يبكي وامه تحاول تسكته والولد مابطلش بكي...
كانوا مقعمزين جنب جنان اللي كانت تشبحله وواجعتها امه كيف حصلت فيه..
طلعت من جيب فستانها الفضفاض طرف شوكلاته وقالت؛عسول شوف هادي..هيا هيا..وقربتاله..
الولد شاف الشوكلاته بدي يهدى..
جنان بإبتسامه:خودها هي..متاعك هادي..
الوليد كان متردد..
امه بإبتسامه؛خودها ماما..
الولد خدي الشوكلاته وهو فرحان..
ضحكت جنان وقالت:ربي يحفظه..
:ويحفظك حبيبتي..
الوليد طلق امه ونزل ومشي لجنان بيقعمز في حجرها..
امه:تعالى هني..
رفعاته جنان وقعمزاته في حجرها وقالت لأمه بإبتسامه؛-خليه عادي..
الولد مد الشكولاته لجنان وقال؛افتحيهالي..
خدتها جنان وهي تقول:حاضر..
امه؛سامحيني حبيبتي..
جنان:ولايهمك خالتي..وفتحت الشكولاته وعطتها للولد وقعد ياكل وهو في حجرها..
وهدا كله كان تحت عيون رشيد اللي حفظ المشهد حفظ بتفاصيله..ولاحظ الفرق الكبير بين الخوات..
شي خلاه يشوف لجنان بريق ماشافاش عند ريحان..
عكسه صاحبه وزميل دراسته اللي يشوف في ريحان بريق ماشافاش عند جنان...
🍁🍁🍁🍁
"بس اني خايفه النادي يتسكر"
هيثم؛ندخلوك غيره بابا وين المشكله..
ريحان بزعل؛تعودت على هدا وخديت عليه هلبه من واني صغيره فيه بابا..
هيثم:معليشي تتعودي ع غيره..وطبعا زي مااتفقنا نخشوا الثانوي نعتزلوا لعب..
ريحان بضحكه؛مانسيتش اتفاقنا..
هيثم بإبتسامه؛باهي نوضي ديريلي قهوة..
ريحان:حاضر بابا..
ومشت للكوجينه..
وهيثم راجاها لين تخش..طلعت طروف شكولاته من جيب سرواله..وبدي يبدل فيهم باللي قاعده في المترد اللي فوق الطاوله...
ريحان فهاللحظه طلعت من الكوجينه ومشتله بتسأله ع حاجه..
تفاجئت وين شافاته شن يدير..
ريحان بصدمه؛بابا!
هو جمد في مكانه..
ريحان؛من امتى دير هكي!
لف وجهه ليها نص التفاته وقال؛طرف واحد مايضرش..
ريحان؛ولا نص طرف بابا ارجوك جيبها صدمتني فيك هلبه..
هيثم بضحكه؛بالشويه عليك.. كلها شكلاطه..
ريحان؛بابا انت لما تاكل حلو تتعب حرام عليك تخلي فينا نرعشوا بعدين..
بعد عن الشكولاته بعدين تنهد وقال؛اسف..
ريحان لمت الشكولاته وقالت:احمد ربي اللي سارة مش هني..
هيثم؛ومش حتقوليلها ولا؟
ريحان هزت راسها ومشت بالشكولاته..
هيثم تنهد وقال؛وزير وماوزير والدنيا دايرتلك الف حساب مش قادر تفرض ارادتك ع هالفتروشات..
🍁فهالوقت..
سارة وجنان كانوا في شقة عمتهم نسيبه اللي نادتهم يهدرزوا عندها مشوا وخلوا ريحان راقده وماناضتش الا بعد ماجي بوها..
بس غادي جنان شافت ضيف غير مرغوب فيه وضايقها وجوده..
نسيبه بضحكه؛بغبرتك يا لجين..وينك بابنتي وينك.
سارة؛صح انقطعتي علينا فجأة..
لجين بإبتسامه؛مشاغل الحياة والوزارة هادي اللي كل شي فيها تغير الا اني قعدت ثابته..
نسيبه؛مايستغنوش عنك ماشاء الله عليك عارفه خدمتك صح..
لجين بإبتسامه:تسلمي نوسه...ايه شن اخر اخبارك..
نسيبه؛عطاله بطاله نعاني في الصغار واحد يقول للسمي انزلي واني نرقالك والتاني قاعد في بطني ومشردني..وحم مش طبيعي..
لجين بضحكه:تحلي عويناتك ع خير يارب..
نسيبه:اللهم امين..وانتي شن صار فيك..
لجين؛اني زي مااني ماتغير عليا شي..
نسيبه؛قصدك ماتزوجتيش!؟
لجين بإبتسامه؛لا..مالقيتش وقت للزواج يدوب زوجت خوي وفرحت بيه..
نسيبه:خسارتك تهبلي انتي..
لجين ضحكت وقالت:نصيب..
وسارة وجنان يشبحولها وكل وحده فيهم كانت نظراتها تختلف عن الثانيه وكل وحده فيهم تفكر في شي بروحها..

#انتي_الفوز
#البطل_المغمور2

...يتبع....