#البطل_المغمور2 "زهور القمر"
#جمان_فريد
#الجزء_الثلاثون "فقدتك ياأعز الناس"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
••••قبل اسبوع••••
في سجن تاجوراء..
تحديدا في مكان الزيارة...
كان مقعمز هو واحد ويحكي معاه في موضوع يهمه هلبه...
رفيق:تأكدت من الموعد...
:ايه هو نفسه اللي قتلك عليه قبل وعرفت حتى الجامع اللي بيقروا فيه الفاتحه..
رفيق :مليح بكل..تطلع من هني تمشي لواحد ولد شارعي وانت تعرف اني وين نسكن..اسمه موسى العايب تو يعطيك نص من الفلوس توا والباقي تاخده لما تكمل خدمتك..واسمع كويس انت سلفتني الفلوس هادم واني ردتيهملك تمام..
:وكان قال علاش تاخد فيهم ع دفعتين...
رفيق:في المرة الاولى اني عطيته رقم المبلغ غلط وبعدين تفكرت الصح تمام..
:ميه ميه..
رفيق؛اهم شي تكون مالي يدك منه اللي بيتم الموضوع..
:قتلك يقنص صح ويعرف يجيبها في وسط القلب..
رفع رفيق حاجبه وهز راسه وقال:وهدا المطلوب..
🍁رفيق ماكانش يقبل يشوف خوه جهاد لما يمشي يزوره..بس كان ع تواصل مع واحد يسكن في منطقهم وكان يخدم معاهم في الورشه ومرافقه حتى في سهرات السكر
كان يجيه زيارات ومنه رفيق يعرف اخبار اهله وحوش هيثم وطبعا سمع بخطبة سارة ومجاهد وولعت فيه نار مابتش تنطفى قعد يرقى وينزل من الغضب والغيره وعجزه على انه يدير شي يمنع ارتباط سارة بغيره...
لعند ماتعرف ع واحد من المساجين مدة حبسه قريب تم..
حكاله رفيق قصته..وهو عرض عليه يساعده ويجيبله من يخلصه من مجاهد نهائيا...بس كان يراجي في يوم طلعته..
وطلع الراجل ومشي سأل اكثر عن مجاهد واماكن تواجده بطريقته الخاصه...وصدفه عرف بموضوع عقد القران...
ورجع لرفيق في زياره وبلغه...ورفيق من غضبه الشديد ع سارة اختار يقهرها زي ماقهراته ويكون يوم موت مجاهد يوم عقد قرانهم🍁
°°°°°°•°°°°°°°
ومن قلب الهوس الجنوني بحبيبته عماه...
الى قلب لما يحمل ثار حد فقده يتعبى حقد مالاش زي ولاحد..
قلب ام فقدت ضناها..
وقلب هالام هادي من الاصل قاسي وعند قتل النفس هوايه...
وردة..
اللي تقبع في سجن الجديده وتقضي في محكوميتها ولأنهم مااثبتوش عليها غير قضيه الاتجار بالمخدرات انحكم عليها 25سنه مع الاشغال الشاقه..
وردة وهي السجن نار ولدها كانت كل يوم تزيد تكبر وتتوقد...
نار مستحيل تنطفى..
دورت ورا اللي قتل ولدها كانت تبي تعرفه من هو يش تاخد بثارة وبعد وقت عرفت انه الضابط راجح خير الله..
ومع هالمعلومه عرفت ان راجح بيعقد قرانه قريب..
ورده عن طريق تليفون سري موجود في السجن:نبيه في يموت في نفس اليوم نبي ناره تحرق امه حرق كيف مااني محروقه توا بنار ولدي..
"رصاصه قناص تنهي الموضوع"
ورده؛بس لازم قلبها تعرفوا هو وين حيكون موجود وقتها..
"وراه ياورده وين مايمشي"
وردة؛كويس...نستنى في الاخبار اللي تبرد القلب الاسبوع الجاي
"بعون الله"
🍁والعياذ بالله🍁
🍂🍂🍂🍂🍂🍂🍂🍂🍂🍂🍂🍂🍂🍂🍂🍂🍂
وجي يوم التنفيد...
عرفوا راجح وين حيتوجه بعد عقد القران...
وسبقوه غادي...
والقناص خش لوحده من العمارات وتمركز فوق سطوحها...
اما اللي مبعوث بش يقتل مجاهد كان يراجي فيه في شارعهم...
المهمه ع الزوز كانت صعبه..وسط الزحمه والدوشه...
كل واحد فيهم كاد يتراجع ع التنفيد...
بس قعدوا يحاولوا لين جتهم وضعية مناسبه جدا...
لما وقفوا راجح ومجاهد جنب بعض بعيد شويه عن الزحمه في النص وهما يصفقوا...
"يامحلا الدنيا لما تبي تجمع بينهم"
غزيل وغزاله دارو الصح وربي يعينهم"
فهاللحظه...
القناص ركز ع الهدف كويس...وكان راس راجح....
واللي بيضرب مجاهد وقف ورا عرصة نفس العمارة اللي فيها القناص...
وصوب الهدف كويس من الخلف ع مكان لما يصيبه حتوصل الرصاصه للقلب لامحاله...
وفي نفس اللحظه...
اطلقوا عليهم الزوز في نفس الوقت...
في غصت الضحكه...والفرحه وقفت في نصها...
بل ماتت...
مجاهد ماكانش خاطر في بالي انه اخر ايامه في الدنيا هو اكثر يوم مان متلهف يعيشه..
قداش قلبه معبي مشاعر يبي يعبر عنها..
وصدره معبي كلام يبي يبوح بيه...
وسعاده تعب بش وصل فيها ولما وصل انتهي كل شي...
وراجح اللي عاش سنين يدور ع انسانه يحبها وتحبه ومعاها ينسى ضغوط الخدمه وطبيعتها الصعبه...
وبعد اختيارات خاطئه لقاها..وتعب على ماقدر يوصل فيها...
لكن الآجل جي في وقته لايقدم ساعه ولايأخر..
وفي النهايه مش مكتوب...مش مكتوبلهم في هالدنيا يعيشوا السعاده اللي تعبوا بس يوصلوا فيها..
ولعل مقدر الأقدار دسلهم سعاده مضاعفه في الحياة الآخره
سعاده لايوقفها موت ولانصيب...
لكن...
الفقد..ووجع الفقد...شنو طبه!؟
كيف يهدا وكيف يبرا!؟
بالذات لما يكون مفاجئ...لما يكون بفاجعه...
ياصبور...صبر كل من مر بنفس الفاجعه..وعاش نفس الألم..
قاسي هلبه يارب..وانت بعبادكرؤوف رحيم...
"مجاهد"
تصرخ بإسمه لين صوتها راح...ع بالها وهي تجري وتنادي فيه حتلحق عليه...
الناس في الشارع يجروا هاربين...
وهي وين طلعت للشارع...
شافت بوها طايح من الكرسي المتحرك وراقد براسه ع ظهر وينوض فيه وهو يبكي ويقول:ولدي...ياولدي..يامجاهد من دار فيك هكي مني..من اللي كسرلي ظهري من اللي هد حيلي..مجاهد..مجاهد يابوي نوض..كيف بندير اني قولي كان انت رحت اني كيف ندير...
ورشيد مقعمز ع راس خوه ويشوفله بصدمه ومش مصدق...
مش مستوعب..خوه الكبير سنده..بوه وصاحبه راح هكي في لمح البصر...
خلاص مجاهد معاش موجود توا...
مجاهد اللي كان عايش في ظله والامان كله حسه لما تقرب منه...
مجاهد اللي انقذه من الضياع والانحراف..وعرف كيف يوجهه التوجيه الصحيح..اللي عبا فراغ كبير خلاه بوه مجيد..
توا خلاص مش موجوده..!
وهي...رتاج...اللي ترملت بكري ولقت روحها في محنة كبيره وتحدي كبير...كانت محتاجه فيه اللي يقويها ويدعمها ويوقف معاها..
وكعادته كان ليها الداعم الدائم اللي وقف في ظهرها وقواها وخلا عندها ثقه وقدرة ع تخطي هالمحنه..والحفاظ ع ولدها وماله...
بس كانت مازال محتاجه وجوده محتاجاته بقوة...
وفي عز حاجتها ليه اختفي من حياتها..وقعدت في امتحانها بروحها..بلا داعم ولاسند..
بلااخ كان بالنسبه ليها اب احتواها وحماها وعطاها كل الحب والحن...
ماكانش في صبر عند الصدمه الاولى..
ناحت رتاج وعيطت ع خوها...
خبطت وكتحت التراب وندبت...
وهي تنادي بأسمه...
مجاهد....وه عليا خوي..وه عليا شقيقي..وه عليا بوي وسندي..
وه عليا عمود حوشنا طاح....اللي حاطنا تحت جناحه راح...
وه عليا من دار فينا هكي....من دار فينا هكي...
رشيد هني التفت وشافها كيف قاعده تعيط وتخبط من غير حجاب والعيون تتفرج عليها...
ناض ومشالها يجري..شدها من ايديها وقال؛نوضي نوضي معاي...
رتاج وهي تشوفله وتبكي؛مات مجاهد يارشيد مات.
رشيد ودموعه ينزلوا..نوضي معاي نوضي..تحركي..
رتاج ناضت معاه..وهو مشي بيها دخلها داخل...
ع وصول سيارات الاسعاف والشرطه للمكان...
طول الشرطه طوقت مكان الجريمه...
والمسعفين وراجح ومجاهد في مكانهم قعدوا يفحصوا فيهم بش يعرفوا لو هما مازالوا ع قيد الحياة ولافارقوها...
وللأسف اتضح ان الزوز ماتوا في نفس الوقت وعدا ع موتهم لهداكا الوقت عشرة دقايق بالزبط...
كانوا مجبورين يخلوهم في اماكنهم لين يعانوا المكان كويس وياخدولهم صور..
بدل ماتكون صور تذكاريه سعيده..
كان صور جثتهم اللي حيستخدموها في التحقيق عن جريمة قتلهم...
بعد ماكملوا شغلهم مع الجثث رفعوهم ورفعوا معاهم مجيد اللي تعب هلبه من اللي صار....
من بعيد....
حسام وهو مدرق في المحل متاعه؛والله كل يوم نتأكد ان ربي يحبنا اللي بعدنا عن هالعيله المنحسه..البنات اللي ياخدهم يموت والولد وين جي بيتزوج مات...عيلة ملعونه
رسمي...
🍁وامه كانت تقول في نفس الكلام في خاطرها....
وهي في شقة مجيد...
تشوف في النساوين مع رتاج كيف يحاولوا مع سدينه بش يخلوها دير اي ردة فعل..
والمراة خاشه حالة صدمه شديده خلتها في عالم تاني..
رتاج ببكي؛يام بالله عليك تكلمي قولي حاجه يام..عيطي يام عيطي..ابكي خبطي..لكن ماديرش هكي يام بالله عليك..
:سدينه...سدينه...ياسدينه ماديريش في بنتك هكي..
وقعدوا يبخوا عليها في الميه ويغسلوا في وجهها..
والمراة مازالت ع نفس الحاله.
مقبوله ودموعها ينزلوا؛دانيه كيف بيصير فيها!؟
رتاج اللي عقلها قريب يطلع من راسها قالت:حي عليا نسيتها حي يانهاري..!
مقبوله؛تو اني نتصرف..ومشت بسرعه خشت لدارها..
رتاج رفعت راسها فوق وقعدت تقول بألم شديد؛شن اللي قاعد يصير فينا ياربي..ارحمنا ياربي ارحمنا....ونزلت راسها وغمضت عيونها بشده وقالت بصوت عالي:ارحمنا..
🍁البنادم وقت الفاجعه يفقد عقله ومعاش يعرف شن يقول ولاشن يدير...غفر الله لنا مايبدر منا عند نزول المصيبه والوقوع في الشدائد🍁
🍁🍁🍁🍁🍁
"دكتور الشايبي"
وهو ماشي بيطلع من المستشفى لما سمع اسمه وقف...
جاه زميله وهو يقول؛سامحيني بنعطلك شويه نبيك تشوف ملف المريض هدا..
خدي الملف وهو يقول؛مافيش مشكله..وفتحه وقعد يشوف فيه..
فجأة..
صارت دوشه قدام المستشفى ومن بعدها خشت باريلا...
تلقتها دكتورة وهي تقول:عروسه!؟
؛عروسة بيان مسكينه..
شبحوا الشايبي واللي معاه للباريلا..
شافها..نفسها البنيه اللي لفتت انتباهه من قبل بس كانت هيئتها مختلفه..وسمعهم لما قال عروسه..
انوجع عليها لما فكر ان السكر دار فيها عمايله في مناسبه زي هادي..
بس لحظه...وين عيلتها ماجي معاها منهم حد!!؟
:دكتور..
شبحله بعدين شبح للملف ورجع يشرحله عن الحاله مرة تانيه..وعقله مشغول باللي صاير مع دانيه...
:هو هدا..
:مشكور جدا دكتور وسامحني عطلتك..
:ولايهمك...السلام عليكم...ومشي طلع من المستشفى ...
وهو طالع شاف سيارة خاشه بسرعه...
ركز معاها...شافها وقفت وشاف واحد نزل منها يجري وفتح الباب الخلفي ونزل بنت منها في حضنه وخش بيها يجري للمستشفى...
تنهد بعدين كمل طريقه لسيارته..وصل فيها وركب وتحرك....
🍁🍁🍁🍁
ومقبوله طلعت مع رشيد في تاكسي متوجهين للمزين اللي كانت فيه...
وين وصلوا غادي خبروهم انها بعد ماكانت تتكلم فيديو فجأة قعدت تعيط بعدين فقدت الوعي وع قد ماحاولوا فيها مافاقتش..بعدها اتصلوا بالإسعاف جو رفعوها ومعاها مشت صاحبة المركز...
وعرفوا منهم لأي مستشفى رفعوها..ومشوا غادي طول...
🍁🍁🍁🍁
فهالوقت..
كانوا يسعفوا في دانيه اللي خشت غيبوبة سكر..
ومعروفه غيبوبة السكر غالبا تؤدي للوفاة..
بس اسعافهم ليها في الوقت المناسب من بعد لطف الله انقدها...
••هو شن صار بالزبط؟
مقبوله ودموعها ينزلوا؛فاجعه اقسم بالله لتوا مش مصدقه اللي صار..خوها وراجلها بعد ماعقد القران جو للشارع وكانوا جايبين نوبه نسمعوا فيهم كان كل شي عادي بعدين سمعنا صوت رصاص..
:قتلوهم!
مقبوله؛ايه..
:مني!؟
مقبوله حركت راسها بالنفي وقالت؛مش معروف..الرصاص نفسه من وين جي مش معروف..
:لاحول ولاقوة الا بالله...
ورشيد وهو بعيد عنهم شويه كان يسمع في كلامهم وهو يشبح في الفراغ ويذكر شن صار...كأن المشهد قاعد يتكرر قدامه..
شن بيطلعه من عقله...شن بينسيه فيه..يقعد عمره كله وهو يتفكر كيف مات خوه الكبير قدام عيونه...
🍁في جهة تانيه من نفس المستشفى..
:انهيار عصبي دكتور هيثم...
هيثم بألم:عارف عارف كان واضح..
؛شن صاير معاكم؟
هيثم غمض عيونه ورفع حواجبه وقال؛سامحني دكتور مش قادر نتكلم..
؛باهي تعالى معاي خل نشوفلك السكر..
هيثم حرك راسه بالنفي وقال؛مافيا شي دكتور..
؛دكتور لوسمحت تعالى معاي بنتك ماتنساش بنتك في حاجتك دكتور..
تنهد بإستسلام وهز راسه بالموافقه ومشي هو وياه...
🍁🍁🍁🍁🍁
"ووه عليا ولدي عثمان...نبي ولدي ياعثمان جيبولي ولدي..اليوم قري فاتحته ياناس اليوم كيف هكي كيف"
:عمتي وحدي الله ياعمتي..
عواطف وهي تعيط؛ولدي ياعالم ياناس ولدي...وقعد تخبط ع وجهها بقوة وهي تقول بعياط...ولدي...ولدي...جيبولي ولدي جيبولي ولدي ياناس...يااسامه ياخيري جيبولي خوكم...يانعيم يامحمد جيبولي خوكم..ولدي....جيبوه..
والمراة قريب تنجن ع قد ماحاولوا يصبروها ماقدروش..
اما جيهان من هول الصدمه صار معاها وجع قوي..
رفعها راجلها طول للمستشفى....
عيشه وهي تبكي:الفجي فيهم الفجي..عليك مصيبه ياربي عليك مصيبه..
جمعه بوجع؛انا لله وانا اليه راجعون...كله امر الله يام مافيش عليه اعتراض...
تنهدت امه وقالت؛لا إله إلا الله...
ع جية الدكتورة..
الزوز جوها بخوف وامه تسأل..
عيشه؛طمنينا دكتورة؟
الدكتورة وع وجهها ملامح الاسف؛هي توا حالها باهي..لكن الجنين مع الأسف أجهضاته...
عيشه خبطت بيدها ع صدرها من الفجعه..
وجمعه تنهد من قلبه بوجع وقال:لله مااعطى وله ماأخذ..
🍁🍁🍁🍁
وليل الليل...
وليلهم طال...وزاد ظلامه...
ومافي حد لهاللحظه مستوعب ومصدق اللي صار..
كأنه حلم...بل كابوس بشع..كل منهم يراجي يفيق منه في اي لحظه...
••عفاف بأسف؛ غير من دار فيهم هكي مساكين...
جهاد؛نقول الحكايه ليها علاقه بالضابط..
صالحه؛وشن دخل راجل سارة مسكين..
جهاد؛مش عارف والله..الله اعلم كيف صار المهم توا الله يرحمهم وخلاص...
عفاف؛ياناري ع سارة مسكينه نسمع فيها كيف تعيط بكري قريب هبلت مسكينه...
صالحه؛ربي يصبرهم كلهم ساره وسدينه وبناتها...
وجهاد يسمع فيها شن تقول...وبين عيونه رتاج يفكر شن صاير فيها توا....
🍁اما تهاني اللي كانت حابسه روحها في دارها..
تهاني بقلق وخوف؛ياربي مايكونش اللي في بالي صح يارب..مافيش غيره هو من بيدير هكي في مجاهد وسارة غيره...حي لو يطلع هو...حي اللي بيصير بعدين...يارب سترك وعفوك يارب...
🍁🍁🍁🍁
"انا لله وانا اليه راجعون"
مليحه؛وعلاش بيقتلوه خوها بالك خاش في معامع...
اسماعيل؛معامع شني يام ربي يهديك..اقسم بالله في المدة اللي عرفتها مامر عليا في حياتي راجل رزين وعاقل زيه الله يرحمه..
عبدالرؤوف؛واني نشهد...غدوة بإذن الله بتمشي معانا تعزي..
مليحه؛وين نعرفهم بش نمشي نعزي!؟
اسماعيل:اما انتي يام ربي يهديك وخلاص..
ومشي وخلاهم..
مليحه؛خيره هدا!؟
عبدالرؤوف؛من كلامك المعوج..شن مانعرفهمش هادي ماهو ايام المرحوم عادل كنتي تمشي عادي..
مليحه تأففت وقالت؛باهي ياودي باهي..ومشت...
وهو حرك راسه يمين ويسار ولحقها...
في الحوش اللي جنبهم بالزبط...
"شن ديري هني"
؛ووك عليا فجعتني...
نادر بضحكه؛انتي اللي فجعتيني واقفه في عز الليل ع الروشن شن عندك؟
؛ضي حوش خالتك ماانطفاش لتوا اشبح شن صاير عندهم..
نادر:نكلمهالك تنشديها..
؛برا اقلب وجهي من حداي برا ارقد برا..
نادر ؛عيب عيب كبرتي ع الحركات هادي راك..عاد اني بنعلمك العيب يام مابجيش..
؛باهي وانت تنفخ القلب..هاني ماشيه..
نادر؛هاني ولاابراهيم..
؛من غير صماته عقاب الليل..
نادر بضحكه؛ع سيرة الصماته..قالك مرة في اخطبوط تعارك مع اخطبوط قاله حول يدك ويدك ويدك ويدك ويدك ويدك ويدك ويدك...
امه وهي تضحك حركت راسها يمين ويسار وركبت الدروج..
وهو وراها يقول بعصبيه مصطنعه؛نلقاك مرة تبيتي عقاب الليل نوريك.
امه من فوق؛يعطيك ربي عقلياولدي...
نادر بضحكه؛لاالحمد لله عندي غير نعرف امتى نستخدمه ادعيلي بحاجه تانيه ربي يعطيني مليون يورو مثلا..
:برا ارقد ارقد برا اااه ياراسي..وخشت دارها وسكرت الباب..
وهو قعد يضحك وخش لداره كذلك وسكر الباب..
🍁🍁🍁🍁🍁
يشوف لبنته كيف راقده..
بوجهها الشاحب...اللي كان في الصبح في احلى حالاته...
كان حلو بزياده ع غير العاده من الفرحه..
وتوا ولت في اسوأ حالاتها من الحزن..
وسبحانه بين طرفة عين وانتباهتها يبدل الله الحال
من حال إلى حال..
هيثم ودموعه في عيونه؛الله ربي لااشرك به شيئا..الله ربي لااشرك به شيئا...
فجأة..
بدت سارة تفتح في عيونها..
هو ناض من مكانه وجاها وطبس عليها وهو يمسح ع راسها:سارة..بنتي..
وسارة تشوف في صورة بوها مضببه في البدايه بعدين وضحت....:بابا..
هيثم:روح بابا..شن تحسي بنتي..
سارة قعدت ساكته وهي تتسائل شن صار وشن جابها هني..
وبدي عقلها يجاوب فيها بصوت والصورة..
بانت ع وجهه ملامح الفجعه وقالت؛مجاهد شن صارله..
هيثم قعد.يشبحلها بألم..
سارة؛مات!؟
هو غير عيونه عنها وقعمز مقابلها..
سارة ناضت قعمزت وهو يقوللها بالشويه عليك بنتي بالشويه..
سارة شدت في يده ودموعها نزلوا وهي تقول؛بابا تكلم قول..مات!..
بوها قرب منها وخداها في حضنه وهو يقول:انتي مؤمنه بالله بنتي وتعرفيه كويس..تعرفي معنى إنا لله وانا اليه راجعون..تعرفي معنى لله الأمر من قبل ومن بعد..تعرفي معنى كل من عليها فان ويبقى وجه ربك ذوالجلال والاكرام..ربك قدر وماشاء فعل...وماتقوليش علاش اني يصير معاي هكي..ربك ليه الحكمه في كل شي وهو الادرى وقدره كله فيه خيره..واللي يصبر ربي يعطيه اجر مضاعف...فقدنا امك قبل اللي كنا متوقعين ان حياتنا حتوقف بعد موتها..بس ربك قوانا وخلانا نكملوا وهدا مايعنيش انا معاش بيختبرنا بنتي..مادامنا قاعدين في الدنيا لازم من الاختبار في كل شي..لأن هي هكي الدنيا بنتي دار ابتلاء..وفي النهايه كلنا بنخلوها...
سارة ببكي:قلبي يابابا...قلبي يوجع فيا هلبه...
زاد ضمها وقال:الله ربي لااشرك به شيئا...
وهي بدت تبكي بقوة..بقهر...بدون ماتتكلم..
وهو يضم فيها ويمسح ع راسها وظهرها بش يهديها ويردد:لااله الا انت سبحانك اني كنت من الظالمين...
🍁وقعد معاها وهو يحاول يهديها لين غلبها النوم بين ايديه ورقدت...رقدها ع سريرها وغطاها..
وقعد مقعمز حداها وهو يشوفلها بحزن...
🍁🍁🍁🍁🍁
ومن جهة تانيه في نفس المستشفى..
كان رشيد مقعمز بروحه قريب من حجرة اخته ومقبوله قاعده معاها داخل تقرا في القرآن...وهي مازال راقده...
رشيد برا...
كان شاد مصحف صغير حتى هو ويقرا فيه...
ويقرا ويتفكر في مجاهد كيف كان يراجعله في حفظه..
《مجاهد؛كويس بكل وليت متمكن..
رشيد ابتسم وقال؛توانت مجاهد قداش حافظ من القرآن..
مجاهد ابتسم وقال:حفظت نصه ومعاش كملت وان شاء الله ربي يغفرلي قرايتي خدتني..ردبالك دير زيي كمل حفظ وماتبدي شي علي القرآن..
رشيد؛ان شاء الله..
مجاهد بإبتسامه؛مش عارف علاش وين نشوفك نحسك بتولي حاجه كبيره هلبه في المستقبل..
رشيد بضحكه؛كيف يعني زي شني؟!
مجاهد؛بالزبط مش عارف بس كل شي فيك يقول هكي حتى ملامح وجهك..اسمع رد بالك تفرط في نفسك واعرف قيمتها كويس》
قام ايديه بالمصحف وغطا بيهم عيونه وقعد يبكي بألم...
وهو جي وشافه كيف يبكي تأثر هلبه...
ومشاله...
قعمز جنبه وحط يده ع ظهره وقال؛رشيد..
نزل رشيد ايديه وقعد منزل راسه لوطا...
هيثم؛حكالي عليك مجاهد هلبه..قالي مرة خوي هدا نشوف فيه اقوى مني وفيه هلبه حاجات تميزه نتوقعه يكون حاجه كبيره بعدين...
ورشيد يشد في روحه بقوة بش مايبكيش بالصوت..
هيثم طبطب ع ظهره وقاله:خليك راجل زي ماهو كان يشوف فيه..امك وخواتك محتاجينك هلبه توا..وماتقولش لااني قاعد صغير..الصغير يكبر ولدي..يكبر زي ماكبر خوك قبلك وولى راجل الناس تشهدله بأخلاقه وبمواقفه الرجوليه..ادعي لخوك بالمغفره والرحمه..وشد حيلك وقوي روحك بش تكمل عنه...
رشيد شبح لهيثم هلبه وهو شاد روحه بقوة بش مايبكيش..
هيثم خداه في حضنه وقاله:ابكي ولدي ولدي البكي مش حرام ع الراجل..ابكي ابكي....
ورشيد يبكي بقوة...
وهيثم يمسح ع شعره بيد وباليد تانيه يمسح بيهم في دموعه قبل ينزلوا...
شويه وهدي رشيد وبعد عن هيثم وقعد يمسح في دموعه..
هيثم؛شن حالها اختك...
رشيد رشف وقال:الدكتور قال مافيش عليها خوف...
هيثم هز راسه وقال:الحمد لله..
وقعد شويه ع رشيد هدرز عليه وخفف عنه شويه...
بعدين مشي ولى لحجرة بنته....
من خوفه ع سارة ماقدرش يرقد قعد ساهر طول الليل..
ومرة مرة يتصلوا بيه نسيبه وماجده بش يطمنوا...
🍁وفي هديكا الليله..
حتى نوال ماقدرتش ترقد وهي تذكر في اللي صار كله وتفكر كيف حتطلع سارة من هالصدمه اللي عاشتها في سن صغير...
اليوم بالنسبه لنوال كان اشبه بفيلم سنيمائي شافت وعاشت فيه اكثر من حالة ومن شعور..
بس اكثر شي كان شاغل عقل نوال ولدها فاتح....
🍁🍁🍁🍁
تاني يوم...
طلعوا من المطعم بعد الفطور..
وكانوا ماشيين بطريقهم لمهجع بش يرفعوهملمكان الخدمه متاعهم في السجن..
زياد:ماشي بندير مكالمه وتو نلحقكم..
مراد؛تمام..
وفاتح هز راسه وقعد ساكت..
مشي زياد...
وفاتح مشي مع مراد وقال:بيبارك لأخته.
مراد شبح لفاتح..
فاتح تنهد من قلبه ورفع حواجبه بعدين ابتسم ابتسامه يخفي بيها ألمه وقال؛ربي يهنيها ويسعدها هدامانتمنالها..
مراد طبطب ع ظهر فاتح..
وكملوا الزوز طريقهم مع باقي زملائهم لوجهتهم..
🍁🍁🍁🍁
"اااااه ياربي..ياربي اااه"
احسان بضيق؛اذكر الله هيثم اذكر الله.
هيثم بألم وارتباك:مش متحمل يااحسان لو تشوف حالتها اول مافاقت..امس هدرزت عليها نحساب كلامي نفع معاها
"يابابا"
هيثم جي بيخش..
شده احسان وقاله:عطوها المنوم ركز ع صوتها..
هيثم حط ايديه ع وجهه..
احسان؛أزمه وتمر ياهيثم ازمه وتمر..
مسح وجهه بإيديه ومش قعمز ع الكراسي..واحسان مشي قعمز جنبه وحط يده ع ظهره طبطب عليه بعدين حولها وضمها ليده التانيه..
فجأة رن تليفون هيثم...
طلعه من جيبه وشاف المتصل قال؛رقم السجن...هاك رد انت احسان ماعنديش قدرة للكلام...
احسان خدي التليفون وفتح الخط ورد:ايوه..
"الو...من معاي"
احسان؛عمك احسان يازياد..
"عمي احسان!؟ ان شاء الله خير! وين بوي"
احسان تنهد وقال:بوك حداي اهو مافيه شي حاله باهي والحمد لله...
"باهي علاش ماردش هو؟"
احسان شبح لهيثم وهيثم شبحله وهز راسه...
غير احسان عيونه عن هيثم وهو بدي يحكي لزياد اللي صار بإختصار...
ولأن مدة المكالمه محدود فصل الخط ع زياد قبل يكمل المكالمه..
زياد بصدمه؛الو...الو....وبعصبيه خبط الهاتف بعدين سكر السماعه بقوة وانفاسه تسارعت وهو يتفكر في كلام احسان وقلبه وجعه هلبه ع اخته....
طلع من المكان اللي هو فيه ..ومشي مع العنصر جثه من غيى عقل لمكان خدمتهم..
خش ومشي قعمز مع صحابه وهو مازال تحت تأثير الصدمه..
شبحوله الزوز وهما مستغربين في حالته...
بعدين مراد قال:زياد...
فاتح؛زياد..زياد..
زياد وهو مصدوم؛تصوروا راجل اختي قتلوه يوم الفاتحه..
الزوز بصدمه؛كيف..شنو!!؟
واللي في المكان كلهم ركزوا معاهم..
زياد شبحلهم وقال؛جاته رصاصه مش معروف من وين..مات وقتي...
فاتح تلقائيا بدون مايحسب حساب لأي شي:واختك شن صار فيها!؟
مراد شبحلها..
زياد؛في المستشفى من امس...
فاتح حس وكأنه ضلوعه تلاقوا ع قلبه وطبقوا عليه...
مراد؛لا اله الا الله..
زياد؛راجح تعرفه يافاتح..
فاتح عقد حواجبه وقال:ايه خيره؟
زياد؛واخد اخت مجاهد راجل سارة وفاتحته كانت معاه في نفس اليوم مات حتى هو مضروب برصاصه!...
فاتح زاد انصدم..
مراد؛واضحه ناويين راجح راكم تنسوا هو اللي قتل ولد الرايس اللي طلع ولد الورده اللي كانت تخدم معاهم..
زياد،ماهم شدوها الوردة هادي!
مراد؛تتفاهم مع حد من برا مش حاجه صعبه..
فاتح مسح بيده ع وجهه وشد ذقنه وعيونه تعبوا دموع وهو يقول؛باهي راجل اختك في بينه وبين حد حاجه؟!
زياد؛الراجل مستقيم ومش متاع شر ومشاكل هدا اللي نعرفوه عنه...
مراد؛تو يبان كل شي بعدين..عظم الله اجرك وخلاص ياصاحبي.
زياد؛اجرنا واجرك..
فاتح؛عظم الله اجرك ويصبر اختك ان شاء الله.
زياد بألم؛ان شاء الله خايف عليها هلبه..
فاتح؛ربي يحفظها ...
مراد يشوف لفاتح حاسه قريب يبكي..
عرفه انه موجوع ع سارة ويفكر في حالها وبس..
وتأكد وقتها ان فاتح يحب سارة حب حقيقي وكبير....
🍁🍁🍁🍁🍁
الساعه الثانية عشر قبل الظهر..
دخلوا ثابوت مجاهد للمربوعه...
وشويه وخشوا عليه رتاج ومعاها سدينه...
كانوا يرعشوا مع بعضهم...
وين قربوا من ثابوت..
وشافوه في وسطه...سدينه غطت عيونها ..
ورتاج وهي تبكي قالت:لاياربي كذب كذب...مش خوي هدا مش خوي.ووه عليا ياوخيي واني نراجي امتى نشوفك عريس ونفرح بيك..يجيبوك لينا في ثابوت علاش بس علاش.
علاش الباهي مايقعدش علاش..
وسدينه حول ايديها وهي تبكي بحرقه ولسانها معقود عن الكلام..
رتاج ببكي،ياروحي ياوخيي ياروحي قداش كان فرحان ومتشوق يقولي رتاج بعد مانقرا الفاتحه بنمشي لمرتي نشوفها شن ناخدلها معاي..اااه ياقلبي المتقطع عليك ياوخيي عمره ماريته فرحان زي ماشفته امس...شكلها فرحته هادي ماكانتش بملاقاة مرته..فرحته كانت بملاقاة ربي...
طبست ع تابوته وقعمزت باست ع راسه وهي تقول؛في الجنه ياوخيي يارب ماكانك الجنه..يارب فرحتك تعيشها غادي ياوخي يارب..بالسلامه ياغالي..بالسلامه يابوي وخوي وسندي وروحي اللي خدوها مني الله ياخد روحهم..
وسدينه تبكي بقهر وحرقه ومش قادره تتكلم مش قادره تقول شي..
شويه وخشوا الرجاله من اقاربهم وخدوا الثابوت..
وسدينه خشت في حالة هستيربه...قعدت تخبط وتعيط..
ماتبيهمش ياخدوه..
حاولوا النساوين يشدوها لكن فلتت منهم ومشت تجري بتلحق الرجاله وهي تعيط...
لكن شدوها في اخر لحظه ووحده منهم سكرت الباب..
وهي تصرخ بصوت عالي كاد يشق السمي..
بألم..وحسرة..وقهر....
🍁🍁🍁🍁
ورفعوا مجاهد وراجح لأخر مكان ليهم في الدنيا بعد ماصلواعليهم..
كل واحد منهم في مقبرة...
بس وقت الدفن واحد...زي وقت الموت...
راجح عثمان بوه وخوته وهما يحطوا عليه في التراب كانوايبكوا بدموعهم وبكاهم اثر في الحاضرين..
وع راسهم وزير الداخليه.. ومجموعه من الضباط الكبار..
ومعاهم داوود..ومعتز المشيطي"العجيلي"
🍁وعند قبر مجاهد..
كانوا واقفين اقاربه وصحابه والناس اللي تحبه وع راسهم هيثم وراجل خالته وولدخاله سليم اللي كانوا متأثرين هلبه..
ببكاء مجيد حدا قبره...
كان يبان مجيد حتى هو وكأنه ولد مجاهد مش العكس..
مجيد فعلا وقتها كان حاس وكأنه فقد بوه..
🍁ومرته فقدت كل شي حلو فيها حست وكأنه كل شي حلو فيها اندفن مع مجاهد فهاليوم..
كانت راقده ع سريرها وهي تشوف لدبلتها وتبكي بحرقه...
اما اخته..
فهاللحظه بس فاقت...فتحت عيونها شويه شويه...
وقعدت تشبح للسقف لحظات..كانت وكأنها فاقده الذاكره..
بعدين الذاكره بدت ترجع شويه شويه...
لين تفكرت المشهد المفجع...
بانت ع وجهها شيئا فشيئا ملامخ البكاء وقالت بصوت باكي...
"مجاهد"
🍁🍁🍁🍁
"صحتين صحتين ياشباب صحتين"
:شن المناسبه ياريفو..
رفيق ؛جوي مليح اليوم ومزاجي رايق قلت خل نورقكم معاي..
بأصوات متقطعه:منورة...نوارة ياريفو
رفيق بإبتسامه نصر؛بوجودكم ياغوالي...
#فقدتك_ياأعز_الناس
#البطل المغمور2
....يتبع....
