البطل المغمور (الجزء الثاني) زهور القمر

الثاني والاربعون

#البطل_المغمور2  "زهور القمر"
#جمان_فريد
#الجزء_الثاني_والأربعين "انتي الفوز"
رمضانكم مبارك
عَنْ أَبِي ذَرٍّ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: ( لَا تَحْقِرَنَّ مِنَ الْمَعْرُوفِ شَيْئًا، وَلَوْ أَنْ تَلْقَى أَخَاكَ بِوَجْهٍ طَلْقٍ) رواه مسلم
💐💐💐💐💐💐💐💐💐💐💐💐💐💐💐💐
في الطريق..
ايديهم متمسكه ببعض
هي حاطه راسها ع الكرسي بالجنب وتشبحله وخلاص..
وهو يشوفلها مرة مرة وع وجهه ابتسامه حلوة ويشد ع يدها بقوة..وهي تزيد تشد ع يده بقوة..
فاتح؛تصدقي خايف يطلع حلم في الأخير..
ضحكت بدون ماتعلق..
شبحلها بعدين شبح للطريق وقال:ترا عاوديها..
سارة؛شن هي!؟
فاتح؛نحبك عاوديها..
سارة بضحكه؛خليها تطلع بروحها مرة تانيه..
فاتح؛لاحرام عليك قداش بنراجي..هيا قوليها..عندك علم فيها اجر لأنها تجي تحت الكلمه الطيبه وانتي وين تقوليها لراجلك تكسبي اجرين..انك قلتي كلمه طيبه..وانك دخلتي ع قلبي السرور
سارة بإبتسامه؛كلامك حلو هلبه..احلى حد نسمعه يتكلم في حياتي انت..نبرة صوتك..بساطة كلامك..الابتسامه ع وجهك..كل شي فيك يشد اللي يتابعك ويسمعك..
فاتح رفع عيونه فوق بعدين شبح القدام وقال؛راضي عليا ياربي راضي..ومحصل دعوة خير اني اليوم لقت باب العرش مفتوح..
وسارة تضحك..
فاتح ابتسم وقال؛جديات قلبي هدا رايك فيا..
سارة؛وماكانش غير هكي يافاتح من تلاته سنين..
شد ع يدها بقوة وتنهد من وسط قلبه وقال:الله يسامحك ياقلبي الله يسامحك قداش عذبتينا..
شبحت ليده وشدتها بإيديها الزوز وقالت؛مش بيدي والله مابيدي...لما نجرحك نتألم معاك اضعاف مضاعفه..نكره روحي لما نكسر قلبك..بس والله كله ع خاطرك..اهون عليا تعيش سعيد مع غيري ولاتصيرلك حاجه بسببي..
فاتح؛شوفي ياقلبي...دقيقه شويه خل نلف بس..
ابتسمت...
هو لف بالسيارة وقال؛شوفي ياقلبي..انتي حامله.كتاب الله وتعرفي ربي كويس وايمانك بيه قوي...اول حاجه لازم تتعلميها حسن الظن بالله..ربك يبكي ويضحك...ومش من فراغ ومش لأنه يبينا نتكدروا وننهموا..هي كلها اختبارات واقدار ونصيبات..وزي مابكينا مرةنفرحوا مرة..خسرنا حاجه حيعوضنا بغيرها..انكسرنا يجبرنا..انجرحنا يداوينا..
ربك راهو رحيم ياقلبي رحيم ومايبيش العذاب لعباده..
سارة قعدت تسمعله وهي مبتسمه ودموعها ينزلوا..
شبحلها وقال؛ايااح..هالسناسيكه اللي فتحتيها معاش سكرتيها وقعد يمسح في دموعها
وهي تضحك..
رجعت شدت يده وقالت؛كلامك حلو ومؤثر يحرك المشاعر..
فاتح؛لنقانه يحرك في المشاعر اللي أثر عليك انتي..
ضحكت سارة..
وماحستش الا وهو واصل بيها قدام الحوش..
سارة؛انزل تعشى عندنا..
فاتح؛اديريلي عشي..
سارة؛من عيوني...
فاتح؛واني نطول هالعيون يخدموني..
ضحكت وقالت:لكن هاه ماتقيمش اشكر بس بس تمام بالذات قدام زياد ديما يلبس فيا راهو..
فاتح بضحكه؛حاضر...خل نتصلوا ببابا وخوك قبل ونسألوهم..
سارة بإبتسامه؛تمام..
واتصل فاتح بهيثم وخدي اذنه وعطاه الاذن.
ولما اتصل بزياد طلع قاعد في الحوش...
•••••••••••
زياد؛شويه ويبدا شكلك نسيته بكل..
فاتح بضحكه؛مش عارف كيف راح عن بالي..
زياد علا صوت التلفزيون وشبحله بطرف عينه ولاحظ انه فرحان ع غير العاده..
🍁اما سارة كانت في الكوجينه دير في العشي من قلبها..
وفي جنبها فاتحه الراديو ع قناة القرآن وتقرا مع القارئ اللي صدفة كان ناصر القطامى..
والسورة كانت الطلاق...اللي فيها ايات التقوى...
واجمل آيه ع الاطلاق...
¤سيجعل الله بعد عسر يسرا¤
🍁مافيش عسر يدوم...العسر ديما بين يسرين..
ومرات في وسط العسر يكون اليسر..
كم من الشدائد طحنا فيها كانت في الاصل رحمات بس حني ماانتبهناش ليها او مانعرفوش هالشي عنها الا بعد ماتنقضي..
جهلا منا نقولوا مكتوب علينا الشقا..وحني ياما تقلبنا في الخير بس ماحسيناش بيه...
حسن الظن بالله راحه....والرضا بقضائه وقدره سعاده..
وفهمنا ان هالدنيا مصيرها الى زوال والحياة الحقيقيه تبدا بعدها حيخلينا عايشين في طمأنينه لأخر العمر..
يارب ارزقنا🍁
🍁🍁🍁🍁🍁
"تو انت شن عاجبك في العيشه غادي فهمني"
عرفه بانزعاج؛ماتمليش ملاك؟
ملاك؛مش عارفه علاش مصر تحرقلي دمي...اني اختك اولى بيك من الناس كلها مفروض تقعد عندي..
ابتسم بتهكم وقعد ساكت..
ملاك؛عرفه ندوي معاك.
عرفه؛مليت من الكلام في الموضوع هدا ومفروض حتى انتي تملي ياملاك..ولو انتي تبي كل مانجي نفتحي نفس السيرة معاش نجيك بكل..
ملاك:هادي اللي قعدت ماهو..
عرفه؛خلاص ياملاك بالله عليك الموضوع هدا معاش تفتحيه معاي..
ملاك؛ولعند امتى!؟
ناض وقال؛تمام تمام ...هي السلام عليكم..
ومشي وهي ناضت وراه تقول؛عرفه..عرفه وقف نكلم فيك..
وهو تجاهلها لين وصل في الباب فتحه وتلاقى مع نيار مروح بصغاره من حوش جدهم..
نيار من فوق نفسه؛اهلا..
عرفه بدون مايشوفله هز راسه ومشي..
شبحلها وقال؛خيره الافندي حتى سلام علينا زي الناس الناس ماسلمش..
ملاك؛مادوراش واحد راسه مسكر ومايعرفش مصلحته..هيا خشوا خشوا...
ابتسم نيار تهكما وخش بصغاره للحوش وملاك سكرت الباب..
🍁🍁🍁🍁🍁
《 هي اكبر سبب ودافع ربي دارهولي بش نحب الحياة ونحب نرجع نعيشها بشكل تاني..هي كانت اكبر حافز ليا بش شقيت طريقي وبنيت نفسي ودرت فاتح اللي اني عليه اليوم...اكثر انسانه تعطي طاقه ايجابيه في الدنيا هادي واني اكثر عباد الله حظا اللي خلاها من نصيبي..》
التوأم مع بعض: الله!...محلاه كلامه..
سارة وهي مبتسمه بخجل؛حلو هلبه ولا..
خواتها شافوا لبعض بعدين شافولها وهما مبتسمات بتعجب.
ريحان:رضيتي عليه شكلك.
جنان نخصت ريحان..وريحان توجعت بالصوت وشبحت لسارة لقتها تشوفلها برفعة حاجب وقالت:غلط الواحد يعطيكم وجه انتم...
جنان؛اني شن دخلي..
سارة بحده؛خلاص اسكتي انتي وياها..ورجعت شافت للشاشه..
جنان بهمس؛كله منك..
ريحان بنفس نبرة الصوت؛اسكتي احسنلك..
شبحوا لبعض من فوق لتحت بعدين تباعدوا شويه عن بعض وقعدوا يتفرجوا...
🍁🍁🍁🍁🍁
"اني مش قادر نستوعب كيف حالة زي هادي توصل بيها انها تطلع بيها واهلها يتجدوا في المساعده من برا وحني اخر من يعلم"
لجين:الحالة هادي مش الوحيده دكتور مع الاسف هلبه هكي..والسبب هو حق العمليات اللي من النوع هدا زي ماتعرف المتخصصين اللي يجوا من برا بش يديروها ياخدوا في مبلغ كبير مايقدروش عليه الناس راقدة الريح زي مايقولوا..لهدا يضطروا يسافروا لدول مجاورة يديروها غادي لأن حق العمليات غادي ارخص وللاسف يولوا ضحايا اطباء مايفهموا شي في الطب..
هيثم وهو يمرر في نظره ع موظفين الوزارة في قاعة الاجتماعات قال؛على هكي الميزانيه اللي نزلت حنخصصوا منها مبلغ ندفعوا بيه حق تلث ارباع العمليات هادي وتندار هني.. والحالة هادي بإذن الله غدوة حنمشي غادي ونوقف عليها بروحي..
••••••••••••
نوال؛ماشاء الله لاالوزير اللي قبلي مازعل حد من عيلته..شن عيلته قولوا قبيلته..فرق عليهم السفارات والمكاتب في كل مكان..هدا غير المستحقات اللي انصرفت ع الكلام فاضي ومنها مش معروف وين مشي..
؛معاليك حجم الفساد في السفارات كبير جدا وللأسف رئاسة الحكومه السابقه كانت تتغاظي قصدا ..
نوال؛اكيد مشيين مصالحه...
:حضرتك كنتي ملحق لواحد من السفارات برا اكيد كل شي كنتي تشوفي فيه.
نوال؛صدقا لا في سفارة الدوله اللي كنت فيها السفير كان رجل وطني ويخدم بضمير في الرعايه اللي كانوا غادي..اكيد مش كلهم حيكونوا فاسدين...بس للأسف الاغلبيه هكي..
المهم توا عندك قائمة بأسماء السفراء  المعفيين والمشكوك في ذمتهم الماليه...بعد الاعفاء حولوهم ع التحقيق..
:حاضر معاليك..اخر شي غدوة ان شاء الله في عندك اجتماع مع سفير دولة**** ***** بخصوص التصريحات اللي طلعت منهم المده الأخيره..
نوال؛هادم بالذات لازم ينحطلهم حد لازم يعرفوا ان الدوله هادي ولت ليها السياده مش حنسامحوا على  اي تطاول يصدر من اي حد..معاش سايبه زي زمان...
🍁🍁🍁🍁
الساعه الحاديه عشر والنصف ليلا..
خش للحوش...ماسمعش فيه حس وكان كله مظلم..
فاتح؛شكله مافي حد...
قام تليفونه واتصل بأمه وهو متوجه لداره...
فاتح؛ايوه امي...وينك لتوا.
"شويه ومروحه امي اني واسيد"
فاتح بتعجب؛كثرت جاياته السي اسيد..
"وانت شن واجعك ياBro؟!"
فاتح خش للدار وهو يقول بضحكه؛حادف وذانك انت..
"اني فاتحه المايك"
قعمز ع السرير وقال؛راك تقول جاي تتزوج بس..
"تتزوج غير انت يا trifle"
فاتح بضحكه؛ياودي باهي ربي يكمل عليك...وتوا طير...امي اني راقد مانبي حد ينوضني تمام..
"تمام تمام..تصبح ع خير"
فاتح؛وانتي من اهله...
وسكر فاتح وناض بيحط تليفونه ع الكامدينو..
رن...وين شاف المتصل ابتسم من وسط قلبه..
فتح الخط وقال؛قلبي..
"السلام عليكم"
فاتح بإبتسامه؛وعليكم السلام...
"وصلت الحوش"
فاتح؛ايه عيوني ماليش هلبه خاش..
"حمد لله ع سلامتك..تمام نخليك توا بالك بترقد"
فاتح؛لاياعيوني نوم شني هدا قصدك اللي عايش حالتي يقدر يرقد..
ضحكت..
فاتح:خليني نغير حوايجي وندير دورة ع الخدمه بعدين نعاودلك تمام ..
"تمام"
فاتح؛مش ترقدي...
هي بضحكه ردت..
"لالا مش راقده"
فاتح؛تمام سلام عيوني توا..
"سلام"
سكرت وهو بعد سكرت حط تليفونه ع الكامدينو وخدي نفس عميق بعد قال من وسط قلبه..
"الحمد لله"
🍁🍁🍁🍁🍁
"شن مشكلتها هي قعدت هني ولا عندها واحد ويخي تقعد عندنا خيرلك واريحلك"
عرفه؛مش هاين عليها خوها يقعد عند ناس برانيه..
ابتسم خليل تهكما وقال؛تو ولينا برانيه!
وعرفه تنهد وقعد ساكت..
خليل؛نيار شن جوه معاك .
عرفه بكره؛لايطاق ماخشليش خاطر بكل نتعمد نمشي غادي لما يكون مهناش..
خليل؛سبحان الله البنادم كيف يتغير كان اقرب حد ليا مش عارف كيف تبدل هكي.
عرفه؛ملاك اختي ولا..لكن مانبريهاش..
خليل؛الصاحب اللي يغيروه عليك الناس ولاالظروف عمره ماكان صاحب..
عرفه؛صدقت..
خليل؛ايه قولي شن داير في القرايه..
عرفه بإبتسامه؛ميه ميه...الامن مستتب.
خليل بضحكه؛كويس كويس...
🍁🍁🍁🍁🍁
طالعه من دارها متوجهه للكوجينه بش تشرب..
خشتلها...شافت غلالة نادي الاهلى ع كرسي من كراسي طاوله الكوجينه..
مشت خدتها وهي تشوفلها بعيون مليانه دموع..
وتفكرت المواقف اللي جمعت بينهم وشافت منها اهتمامه بأختها زي مابدالها...
غمضت عيونها وقالت همسا؛خلاص ياجنان معاش تفكري فيه معاش تفكري...
فتحت عيونها وردت الغلاله في مكانها...بعدين مشت شربت ميه..وبعدها خدت الغلاله وطلعت بيها..
وهي طالعه فاتت من قدام دار سارة وسمعتها تضحك وتقول..
"لالا فاتح انت فضيع الحق"
ابتسمت بفرح...اول مرة من وقت طويل تفوت من قدام دار اختها وماتسمعش صوت بكاها...
سمعتها تضحك ونبرة الفرح باينه في صوتها..
تنهدت براحه بعدين مشت لدارهم..
شافت ريحان وهي راقده...جت جنب سريرها وحطت الغلاله..
بعدين شبحتلها بإبتسامه الم..ومشت ولت لسريرها..
🌼وفي الدار اللي جنبهم..
سارة؛لالا في فرق وفرق كبير نفهم فيها حتى اني راهو..
"باهي نقولك حاجه مانبيش ناقشك فيها هلبه تو يوم من الايام نديرها وانتي تاكليها بروحك وتشوفي"
سارة بإبتسامه؛باهي...ايه قولي شن رايك في العشي.
"مش قلتي ماتقيمش"
سارة؛كنت نقصد قدام زياد ماتقيمش بس بيني وبينك عادي..
"باهي تبي تقييم فاتح راجلك ولافاتح الشيف"
سارة بضحكه؛علاش شن الفرق!؟
"اهو نقولك راجلك يحبك ويموت فيك ولو ديريله سم ياخده منك ويقول محلاه من عسل..لكن الشيف مايعرفش يجامل بكل"
سارة بضحكه؛لاخلاص خلينا ع تقييم فاتح راجلي..
"الله ياعمري محلاها كيف طلعت من فمك..قسما بالله ياسارة لتوا مش مصدق..تحبيني يابنت انتي"
سارة ابتسمت بخجل وقعدت ساكته..
"طبعا توا بتنشفي ريقي على ماترجعي تقوليها مرة تانيه ماعلينا...المهم اسمعيني شن رايك لو غدوة العشيه جيتونا المزرعه.."
سارة:بابا مسافر فاتح
"عارف وزياد قاعد غدوة ديري الاهلي والاتحاد قلت نلم الحبايب حتى احسان وعيلته نعزموهم"
سارة؛هو اني خاطري..بس يعني شوف زياد قبل..
"تمام تو نقولوله...ونحبك "
ضحكت وقالت:حتى اني..
"جو حتى اني هدا فكيني منه...اكسبي فيا اجر وقوليها"
سارة ابتسمت بخجل بعدين قالت بصوت يدوب طالع من الخجل:حتى اني نحبك..
••فاتح:بين سمعتها بين ماسمعتهاش راهو..
قعدت تضحك سارة..
فاتح بإبتسامه؛ان شاء الله ديما تضحكي ياروح فاتح ..قداش نحبك ياسارة..
وامه كانت خاطمه من قدام داره متوجهه لدارها سمعاته شن يقول...فرحت من وسط قلبها..وكملت طريقها لدارها وهي فرحانه بولادها اللي كل واحد فيهم لقي رفيقة عمره وحيعيش معاها حياة مستقرة عكس ماعاشت هي..
وهدا المهم للأم ان صغارها يعيشوا سعداء ويحققوا الاحلام اللي هي عجزت تحققها...
🍁🍁🍁🍁
وتاني يوم ..
فاتح من الصبح فتح مع امه موضوع اللمه في الحوازة وهي وافقت..
وعزموا اصحابهم والعيله واتفقوا يتلاقوا غادي بعد العصر قبل المباراة بساعه..
🍁🍁🍁🍁
سارة وهي تحط في الحافظات فوق بعض:هيا زياد عطلنا..
زياد خدي منها الحافظات وهي مشت قدامه وقالت:هيا خيرك متمرخي اليوم..
ضحك وقال؛هانا طلعنا..
في السيارة..
جنان بضحكه:منظرك يضحك وانتي لابسه الغلاله ع حوايجك..
ريحان شبحتلها ع جنب بدون ماتعلق..
وهي تضحك عليها..
شويه وركبوا زياد وسارة للسيارة..
التفتت سارة لريحان وقالت؛شن دايرة في عمرك انتي!؟
ريحان:شن دايرة!؟
زياد؛خليها في حالها..
ابتسمت ريحان وقالت:منور زيزو.
فنصت فيها سارة وريحان تجاهلتها وجنان شاده ضحكتها..
وطلع زياد من الحوش
.وهما يتحركوا في الزنقه شافوا جهاد طالع مع عرفه ماشيين للرياضيه..
كلكسوا لبعضهم..
وجنان ركزت ع عرفه كيف يشبح لريحان..قلبت وجهها للروشن..
وعرفه يشوف لريحان وهو مضايق..
قبل يبي الغلاله توصل لجنان..تعود بيها هي تجيبلهم البريوش.
وهداكا اليوم عطي عفاف الغلاله بش تعطيهالها..
وتفاجئت بريحان جايه مكان جنان..وريحان سألت عن الغلاله وعفاف معاش عرفت شن تقول تحشمت وقالت..هادي من عرفه...
وتأتي الرياح بما لاتشتهي السفن..
🌼وفي من يقول..
تأتي الرياح كما تجري سفينتنا
نحن الرياح ونحن البحر والسفن..
زي فاتح اللي قاعد يشوف لسارة وهي خاشه مع خواتها وماشية جهة النساوين..
وهي كانت متحشمه من الرجاله ماقدرتش تشبحله..
لاحظ انها لابسه اسود قلبه زاد ذاب فيها وتأكد انها تحبه من قلبها..
بس وهي ماشيه للنساوين..
عيونها جو في عيون نرجس..
نرجس كانت تشبحلها بحده..وسارة غيرت عيونها عنها ومشت لماجده وسلمت عليها..
ماجده:كيف حالك سرو..
سارة:الحمد لله خويله كيف حالك انتي..
ماجده:الحمد لله...قلوب اللوز تعالوا تعالوا..
رنيم بضحكه:اهلاويه ريحان..
ريحان:للنخاع..
رنيم بإبتسامه؛زي المثنى حتى في هادي .
والمثنى كان يسرق لريحان في النظر.. كل شي فيها يعجب فيه اكثر واكثر..
صح مازال صغيره..بس في كل شي تبان اكبر من عمرها هي وتوأمها..
سارة:كيف حالك عمتي..
وسلمت عليها بحرارة..
ابتسمت نوال بتعجب وقالت:الحمد لله..كيف حالك انتي..
سارة:الحمد لله..
ونرجس ونوارة مش طايقينها..
لما جت تسلم عليهم مدولها روس صباعهم من غير مايقولوا كلمه..
ونوال تشوفلهم..
وسارة مشتها لأنها عاذرتهم..
وبعد السلام.....
خشوا النساوين داخل..
وقعمزوا يهدرزوا مشوار...
بعدين قالت نوارة؛اروح اعمل قهوة..
ناضت سارة و قالت؛خليني اني نديرها..
نوارة؛ماتتعبيش نفسك ياحبيبتي انا اعملها من ايدي اطعم..
نوال ناضت وهي تقول؛صح قهوتك لايعلى عليها بس اليوم بذوقوها من ايدينا اني وكنتي تعالي سارة..
سارة ابتسمت ومشت معاها..
وعيون نوارة ونرجس معاها وهما مستغربات..
ماجده؛سلمها وسلم كنتها..حتى قهيوة سارة تهبل..
ابتسمت نوارة مجامله..
والتوأم يشبحولها بإبتسامة مكر..
••في الكوجينه..
نوال:خوديها من غادي..
سارة؛حاضر..ومشت طلعت القهوة من الدولاب وقالت:فاتح قالي تعلم القهوة من نوارة..
نوال بإبتسامه:ايه اغلب الشي تعلمه منها واولهم النفس الحلو..
ابتسمت سارة وبدت دير في القهوة في البكرج متاعها بعدين عطت عزوزتها دير في بكرجها..
نوال؛بتجيك سلفه قريب..
سارة؛خطبتوا لأسيد..
نوال:اليومين هادم بنيه تعرفيها..
سارة بإستغراب؛تعرفها؟
نوال:ايه..كانت مرت ولد جيرانكم..خو مرت خوك..
سارة؛ايه تفكرتها مريم محلاها طيبه واجتماعيه..وين تعرف عليها؟
نوال؛في بريطانيا تقرا غادي..
سارة:ماشاء الله.
نوال بإبتسامه؛كنايني الزوز طبيبات والزوز تخصصهم باطنه..
سارة:تخصصت باطنه؟
نوال:ايه..
ع خشة فاتح للكوجينه..
تفاجئ لما شافهم مع بعض..
ابتسم وقال:الله يبارك الله يبارك..امي وكنتها مع بعض في الكوجينه 
سارة شبحتله وابتسمت ..
نوال؛شن جابك انت؟
فاتح:جيت بندير قهوة لكن سبقتونا..
نوال؛تعالى كمل متاعي..
فاتح وهو يشوف لسارة؛مانقولش لا..
وهي ابتسمت بخجل..
نوال بإبتسامه؛تمام..خل نمشي نكمل هدرزة..
ومشت طلعت من حداهم..
فاتح وقف جنب سارة وقال:شن جو..
سارة بإبتسامه:حلو..
فاتح؛شني ياعسل بديريها انتي القهوة للرجاله شكلك..
سارة بضحكه:صح نبيك تشربها وتقول رايك فيها..
فاتح بإبتسامه؛وازني زي ماقتلك..الميه والقهوة لازم يحبوا بعض...
سارة بإبتسامه؛حبوا بعض ...
هو قعد يشوفلها بنظرات حلوة..
وهي تحشمت وقالت بضحكه:راهو تفوج منك..
تنهد وشبح للبكرج وقعد يحرك فيك..
وهي تضحك..
بعدين قال:ايه حقة بعدين بندير بث مباشر تفرجي عليه..
سارة؛مايفوت فيا شي ليك
فاتح؛اه منك انتي اه..ربي يسامحك وخلاص.
وهي تضحك..
فاتح؛ايه باهي قوليلي شن رايك في اللي ندير فيه فالبث..
سارة؛من جدك تسأل فيا ع رايي ماتقراش في تعليقات الناس..
فاتح:اكيد نقرا بس رايك بروحه..
سارة ؛هو كله تمام لولا ردودك ع تعليقات البنات بأسمائهم مش ضروري تقول اسم اللي ترد عليها..
فاتح بضحكه؛وين المشكله خل نجبر بخاطرهم..
سارة:جمعية خيريه الخواطر وليت!
فاتح يضحك..
سارة؛اسمع بعدين نقعمزوا نهدرزوا ونتفاهموا ع هلبه حاجات..
فاتح؛بيبدا الخنق..
طفت ع القهوة وقالت:ايه بنخنقك خنق ..
ع خشة نوارة الكلمه جت في وذنها وطول قالت؛هي حصلت!؟
هما انفجعوا التفتوا شبحولها..
نوارة بقوة واندفاع:مالك ياحبيبتي فيه ايه ليه قرشة ملحة الولد كدا ضربك ع ايديك عشان تتجوزيه!؟
سارة شبحت لفاتح  وهي مضايقه وقالت:مش قصدي بصارة بس..
فاتح؛نوارتي فاهمه غلط راهو..
نوارة:داري عليها ياحبيبي داري..عيني عليك ياحبييبي وطلعت وخلتهم..
فاتح؛مابتش تسمعني قالت اللي عندها وطلعت..
سارة؛عادي مش مشكله تحبك زي امك..
فاتح؛مزبوط..ماتواخديهاش قلبي ..
سارة بإبتسامه:قتلك عادي..هي توا وتي صفرة النساوين وخل نوتي صفرتكم..
ابتسم وقال:تمام..
وبدوا الزوز يوتوا في السفر مع بعض..
وهما يهدرزوا وفاتح مرة مرة يناشب فيها..
بعدين تبادلوا السفر وكل حد فيهم مشي في تركينه..
🍁🍁🍁🍁
المثنى:ضيعها ال ...مش عارف شن بيقول فمي.
مهاب:ع الحال هدا بناكلوكم اليوم..
المثنى:يضحك كثيرا من يضحك اخيرا..
احسان؛كلا هو يجري في الملعب من غير هدف مش عارفه كيف مدخلينه ومخليين منعم احتياط..
الاشهب:واسطات..لعبه ماينفعش بكل جماعته خدموه..
مهاب بحماس:اهيا اهيا اهيا...قووول..تي قوول..
وقلبها مهاب الاتحاي الوحيد في وسطهم..
والاهلاويه نازلين في الدفاع والحارس..
••••••••
ريحان وهي معصبه؛ماينفعوا في شي هالركايك..
رنيم بضحكه:معليشي معليشي..
نرجس:التيحا والكورة المليحه..
جنان؛راجو اتم قبل..
نرجس:الربيع من فم الباب يبان..
ريحان:تو نشوفوا..
ونوال وسارة وماجده ومعاهم نوارة وسنيه يسمعولهم ويضحكوا..
🍁🍁🍁🍁
"مدام نبيك في موضوع ضرروي"
سدينه:ان شاء الله خير..
الخدامه؛السي مجيد يامدام...
سدينه؛خيره!
الخدامه؛مش مخليتي في حالي من مكان لمكان ويقولي نبي نتزوجك واني نقولع متزوجه وهو مايبيش يصدقني...
سدينه شبحتلها شويه بعدين ناضت ومشتله...

عارفاته قصير بس والله لعيونكم كتبته وسامحوني مش بيدي ..

#انتي_الفوز
#البطل_المغمور2

....يتبع...