#البطل_المغمور2 "زهور القمر"
#جمان_فريد
#الجزء_السابع_عشر "gray cat"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
خش للمهجع وابتسامة الفرح شاقه وجهه..
العجيلي:هاه دكترة شن صار؟!
خليل بضحكه:ميه...ميه..
زملائه في المهجع كلهم قعدوا يقولوا بأصوات متقطعه..
"ان شاء الله بالنجاح...موفق...كويس كويس"
خليل وقف في نص المهجع وقال:اشبحولي هني هني..
كلهم قعدوا يشبحوله ومنهم جماعة الكبير..
خليل:بما ان فاتح في الانفرادي ربي يفرج عليه...اليوم الغدي عليا..
كلهم تفاجئوا..
خليل:وصيت عليه من برا والجماعه هني عطوني اذن بتتغدوا تغدايه مليحه قداش ليكم عليها..
عجيلي بإبتسامة استغراب:شن المناسبه!؟
خليل وزع نظره عليهم والفرحه تتنطر من عيونه قال:قريب يجوني صغار ان شاء الله...
كلهم بصوت واحد:اووووو....
وناضوله وبدوا يسلموا ويباركوا..
والعجيلي يشوفلهم بإبتسامه ويراجي يكملوا سلامهم بش يسلم..
شويه انفتح باب دار الكبير وطلع منها وهو يساوي في حوايجه ويمسح ع شعره ويشوف للي صاير بإستغراب قال...صبري شن في؟
العجيلي؛خليل جاه خير سمح شوره وهو ماشي يدير في الامتحان..
اسعد؛خبر شني؟
العجيلي:بيجيه عيل..
اسعد رفع حواجبه وقال؛اهااا...
وقدم لخليل وبعد الشباب من قدامه لين وصل فيه..
خداه بالأحضان وقال؛مبارك مبارك مبارك مبارك...يجي ع خير إن شاء الله..
وخليل بدت ع ملامح وجهه الإمتعاض..
اسعد وهو يحضن فيه جي عند وذنه وقال؛عندي علم من قبل...
وبعد عنه..
خليل فنص فيه....
اسعد وهو مبتسم خبط بإيديه ع كتاف خليل وقال:كان جاك عزري سميه اسعد...
وبعد قالها انفجر بالضحك بطريقة مستفزة واللقاقه جماعته يضحكوا معاه....
شويه جي العجيلي لخليل وضمه وقال:مبارك..تشوفه ع خير ان شاء الله..
خليل وهو مازال يشبح للكبير بحده؛الله يبارك فيك...
:قال بيغدينا ع حسابه اليوم ياراس..
اسعد؛اهوووو..كبيرة كبيرة..لاعنده حق عنده حق..فرحان..واهو بالمرة نتغدوا باهي من بعد ماخش الدعوة هداكا للآنفرادي معاش كلينا حاجه باهيه..نزلت النص...سكر عليه الماليه متاعه وقال..هاه شوفوا..ضاعف ولا؟
:هلبه ياراس..
اسعد هز راسه وقال؛تو ندبرله في حل فاتح هدا لازم يطلع..
وخليل يشبحله بحده وكان يقدر...راهو قاتله من وقت ومرتاح منه....
🍁🍁🍁🍁🍁
"شباب شن رايكم"
شبحوله خوته ابتسموا وخوه الكبير قال..
ياسر؛وين على خير؟!
معاذ وهو يساوي في شعره قال بإبتسامه؛ماشي لمريومه بنوصللها بطاقة عرس ولدعمك وبتغدا عندها..
واحد من خوته قال:باهي برا برا..وسلم عليها..
ابتسم وقال؛يوصل...ومشي طلع..
:في شي غير موقفه خوكم هدا..
ياسر بضحكه:حكيت لحنان "مرته" ع وضعه قالتلي خوك شكله طاح في اخته..
:اخت مني..
ياسر:اخت هدا راجل اختك..
ضحكوا وواحد منهم قال؛شكلها طرف اللي طاح فيها معاذ غزال امه..
قعدوا يضحكوا..
بعدين ياسر قال؛كنا في واحد بنصبحوا في زوز...حرك راسه يمين ويسار وقال..عليك حالة وخلاص...
🍁ومعاذ..
بعد طلع من حداهم..مشي خدي لأخته قضيه..
من خضرا ..وعصاير..وبضاعة فطور..وميلكا وحليب السعوديه اللي تعشقهم..وسفرة تشيز كيك..
اكيد ود باللي خداه اخته وفي نفس نوع من انواع لفت الأنتباه...
هو نفسه مستغرب في روحه كيف طب في تهاني بسرعه هكي..
نظره عيونها الحزينه الباكيه هي اللي جذباته..ومن غير شي عيونه تهاني جميله جدا..وفيها حورويه واضحه...سلبوا اللب من راسه...
غير هكي البنت تبان محترمه...في لبسها وحيائها معاه وهي تكلم فيه يومه عكس بنات هالوقت اللي نازعين ثوب الحياء بالمرة..
وتقعد تكلم في الشباب وعيونها في عيونهم بجرأة توصل لدرجه الوقاحه...
والراجل اللي يدور ع مراة تشاركه حياته اكيد حيدور ع بنت بمواصفات تهاني..ومتربيه تربية تهاني..
🍁تهاني اللي نزلت من باصها وهي مضايقه..
وضعها في المدرسه مخليها كارهتها..
منبوذة في المدرسه تماما...وكأن فيها مرض معدي..
وكل يوم وين تمشي للمدرسه ايدها ع قلبها لتلقى روحها بملفها برا المدرسه..
بنت تاجر مخدرات..وخوها تاجر مخدرات والزوز حاكمين عليهم حكم قاسي..هدا كله يعني انهم مجرمين كبار..
يعني موقف المدرسه باللي فيها مبرر نوعا ما...
••وصلت في الزنقه...شافت نفس السيارة اللي شافتها قبل واقفه فم الباب..
مااهتمتش..
وصلت في حوشهم وفتحت الباب بالمفتاح..
خشت لقت مريم واقفه مع خوها وحداهم شكاير..
هو لما شافها قعد مسهم فيها..
وهي نزلت عيونها ومابتش تشوف ناحيته..
مريم:تاهو روحتي...
تهاني شبحتله وابتسمت مجامله..
مريم بإبتسامه؛هدا خوي معاذ ع روس بعض اني وياه..مش بالزبط بس اني جيت بعده بكم سنه زيك انتي وجهاد..
تهاني يدوب شبحتله وابتسمت مجاملع..
وهو عيونه مش قادر يحولهم من عليها..
مريم؛هادي تهانب حماتي الوحيد واخر العنقود حتى هي زيي..
معاذ بإبتسامه؛شن جو تهاني..
تهاني شبحتله بإستغراب وهزت راسها بدون ماترد وجت بتخش مرت خوها وقفتها لما قالت..
مريم؛تاهو فيها كيف دخلي معاي الحاجات ؟
تهاني شبحتلها وقالت:باهي..
وقدمت وعيون معاذ عليها وخدت زوز شكاير ومشت خشت..
ومريم لحقتها..
وقعدوا يطلعوا ويخشوا وهما يدخلوا...
لين كملوا..
تهاني:امي وين؟
مريم؛متكيه في دارها..
معاذ مد شكارة شكلاطه وشيبس لأخته وقال:مش بروحك عطيها حتى هي..
تهاني تحشما هلبه وخشت بسرعه داخل..
مريم عقدت حواجبه وابتسمت بخبث وقال:هييه شن في!؟
ضحك معاذ بإحراج وقال بصوت منخفض؛طرف حماتك هادي..
مريم بضحكه؛حي عليك..كبدت قصدك!؟
معاذ بإبتسامه؛خل نركبوا لشقتك ونهدرزوا..
مريم بضحكه:باهي تعالى..
وخداته من يده ومشت خشت بيه لدار الدروج..
🍁وتهاني داخل..
خشت لدارها وهي متلخبطه هلبه..
يعني هي مش مستغربه في وضع عيلة مريم لانهم يبانوا ناس منفتحه وبعض الأمور عندهم عادي..
بس كلام معاذ ونظراته هما اللي اربكوها...وطبعا بنت في عمرها تربكها حاجات زي هادي...
🍁🍁🍁🍁
وفي اللي من عمرها..
وقلبها مليان حزن ع اللي قاعد يصير معاها...الشخص الوحيد اللي حرك مشاعرها تجاهه وتمنت ترتبط بيه الرباط المقدس..
حالت بينها وبينته جبال من العقبات تخلي ارتباطهم شبه مستحيل..
هدا تهديد بالقتل..يعني ممكن يموت بسببها...والموت مسببلها جرح كبير مخلي عندها فوبيا اتجاهه كان تلقى ماتخليشي يقرب من الناس اللي تحبهم..
بس هدا امر الله ونافد ماتقدرش ترده..
لكن حولت تاخد بالسبب لااكثر بش تحمي اللي تحبه..
لأنها ماتقدرش تحميه الا بالطريقه هادي..
يعني لو فكرت تحكي لحد عن تهديدات رفيق حتخلي غضب رفيق يزيد وينفد تهديده حتما...
لذلك ماينفعش تحكي لبوها...
ودانيه اللي اليوم هي وياها..
كانوا واقفين يستنوا باصاتهم وهما بعاد عن بعض وكل وحده في جهة..
دانيه خدت منها موقف...
وسارة شافت ان هكي احسن للكل...
يعني لو مشت بلغت دانيه دانيه اكيد حتقول لخوها لما تشوفه موجوع من رفض سارة ليه..
ولو قالتله مجاهد مهما كان عاقل هني حيتصرف بتهور لأن الموضوع ليه علاقه بالقلب..لافي حكمة ولاتفكير سليم...
وهما في عز سرحانهم..
قطع عليهم صوت ميس وروعه اللي كانوا يضحكوا في ضحك فاضح...
ويناشبوا في اللي ماشي واللي جاي من السيارات...
سارة بقرف:شن هدا!؟
ودانيه شبحتلهم بإزدراء..
الغفير قال؛نسكر الباب افضل..والي يجيها باصها ناديها..
روعه؛خير امه شيباني النحس هدا!؟
والبنات يشبحولهم بنظرات ازدراء..
ميس؛فوت عليا شوفت جيمي عطيه مايرفعه..
شويه خش الغفير وقال:سارة ودانيه اطلعوا..
سارة مشت طلعت بسرعه ودانيه وراها..
وكل وحده مشت ركبت لباصها وكأنهم مايعرفوش بعض..
وكالعاده جمعه مايروحش الا لما يطمن عليها قبل..
كلكس لجيهان اللي قاعده دق في الحنك مشتله تجري عن مايديرلها العار..
جيهان بعد ركبت:طول لحوش بوي..
جمعه تحرك وهو يقول؛ماقلتيش شن عندك غادي..
جيهان؛بنمشوا لحوش اهل خطيبة خوي..
هو قريب فقد السيطره ع السيارة..
جيهان بفجعه؛هييه خيرك وين عقلك قريب ودرتنا..
وواحد من وراه قاعد يسب ويلعن..
وقف السيارة ع تركينه ونزله..
جيهان بصدمه؛جمعه حيي عليا وين ماشي!!؟..
وجمعه نازل كتله ملتهبه من الغضب يبي يفش غله في حد وخلاص..
الراجل حاول يتفاهم معاه بالكلام لكن هو مايبيهاش تجي للبر..
شد الراجل وعطاه طريحه..
وجيهان تندب في السيارة..
ومافكوه منه كان بالسيف..
"خلاص ياراجل صل ع النبي"
هو نفض اللي شادينه وقال بعصبيه:عليه الصلاة والسلام..وقع يساوي في حوايجه ومشي للسيارة وهو يقول..كواسم مقلبه..
ركب وقال لجيهان؛تفتحي فمك بكلمه ندخلها في الحيط ..
هي سكتت مرة وحده..وهو شغل السيارة وتحرك وهو يحرق في العجل..
🍁🍁🍁🍁
"قالت جايين بيهدرزوا"
رتاج؛والشكالات خوات الحيزبونه جايات اليوم..
دانيه بتردد؛في بالي حاجه..
سدينه؛شن هي؟
دانيه:كان نكلموها تقنع بوي نستقبلوهم في الشقه اللي فوق..
رتاج؛وخيرها الشقه هادي؟
دانيه:شن خيرها الشقه هادي ماتشبحيش فيها!؟
سدينه بضيق:عندها الحق اختك..
رتاج؛قصدكم تبوا طيحوا رواحكم لهديكا!؟
دانيه بإنزعاج؛اييه علينا عاد..
سدينه:تو نكلمها اني..
رتاج؛يام!!
دانيه؛جايه معاك يام..
سدينه؛غير بري بدلي حوايجك قبل..
دانيه؛تو نبدلهم نكلموها قبل..
ومشوا الزوز طلعوا من الكوجينه مع بعض..
وخلوا رتاج تسحن عليهم...
🍁🍁🍁🍁
في احدى قاعات المناسبات..
اللي عندها فناء كبير..
كان فيه زحمه ناس..
وطاولات كبيره عليها حاجات اشكال والوان من كل شي..
ماكله...اكسسوارات..ماعين..تحف..وماإلى ذلك..
بزار...
بزار غير تحت رعاية وزارة الشؤون الإجتماعيه بالتعاون مع احدى مؤسسات المجتمع المدني اللي تمثلها نوال فتحي
كانت موجوده غادي مع بنتها وثريا وواحد من اقاربهم
يكون ولد خالها هدا مساعد ليها وديما معاها في أي فعاليه..
كانت نوال في لقاء صحفي مع وحده من الصحفيات..
ومعاها مصور يصور في كل شي في المكان..
وكذلك في قناة جايه تصور...
هو..
خش فاللحظه...
بسروال لونه رمادي غامق وفوقه جاكيت من نفس اللون..
تحته فانيليا رقبه خفيفه لونها ازرق غامق حول نظاراته السود وقعد يمرر في نظره ع المكان...
لين جو عيونه عليها...ضيق عيونه وابتسم ابتسامه خفيفه وحط ايديه ورا ظهره وهو يشوف لهيئتها كيف متغيره..
لبس محتشم..والوشاح اللي كان يبين جزء من الشعر ولى مغطيه كله..والوجه مافيشي اي شي من الزينه..
صافي وطبيعي جدا...
هي كانت لاهيه بكلامها مع الصحفيه ومش منتبهه الا مع الناس اللي قاعده تحكي ع منتجاتهم..
بس ثريا صديقتها لاحظاته..وماصدقتش لين امعنت النظر..
ثريا بإبتسامه مفاجأة:دكتور هيثم!
نرجس وهي دور بعيونه؛وينه ؟!
ثريا؛هونا غادي..
شافت نرجس وين ماتشبح ثريا ابتسمت وقالت:زي ماتخيلته بالزبط..
ثريا ابتسمت ومشت لنوال...
••:استاذة نوال مشكورة جدا اللي عطتينا جزء من وقتك..
نوال:الشكر ليكم اللي جيتو وغطيتوا الحدث واهتميتوا بيه..
الصحفيه؛واجبنا...نستأذن منك توا بنمشي ندهور ونشوف..ضحكت وهي تقول في كلامها الاخير..
نوال بإبتسامه:اذنك معاك..
مشوا..ع جية ثريا..
ثريا؛نوال شوفي من جي..
نوال ضيقت عيونها وشبحت وين ماتشبح ثريا...
عيونها توسعوا بدهشه..
وقلبها بدي يزيد في قوة دقاته...
ونرجس بنتها من بعيد شويه تشبحلها..
هو لما شبحاته قدم بخطوات واثقه زي عادته..زي ماعرفاته..
وصل فيهم وقال:السلام عليكم..
ثريا:وعليكم السلام دكتور شن هالمفاجأة..
هيثم ضحك وقال؛كيف حالك دكتورة..
ثريا بإبتسامه؛الحمد لله..كيف حالك انت والعيله وكيف حال زياد..
هيثم؛كلنا بخير والحمد لله وزياد اموره تمام..
شبح لنوال وقال؛كيف حالك..
هي استاقظت وردت بارتباك والحمره غطت لون وجهها:اهلا..الحمدلله..كيف حالك انت؟
هيثم بإبتسامه؛الحمد لله...مرر نظره ع المكان وقال..حلو المكان....
نوال ابتسمت..
شبحلها وقال؛البزار لمني بالزبط؟
نوال؛دعم الأسر المنتجه..اللي عندهم مشاريع ومايقدروش يسوقوها بإعلانات كبيره درنالهم البزار هدا وجبنا وسائل اعلام تغطيه..
هيثم وهو يدهور بعيونه في المكان:حلو...
ع جية نرجس قالت؛السلام عليكم..
هيثم شبحلها وقال؛وعليكم السلام..
نوال؛نرجس بنتي..
رفع حواجبه وهو متفاجئ بعدين قال:اهلا بنتي..
نرجس بإبتسامه:اهلا بيك دكتور ع قد ماسمعت عنك تمنيت نشوفك..
هو شبح لنوال لقاها منحرجه ع الآخر رجع شاف لنرجس وقال بإبتسامه؛ان شاء الله خير بس..
نرجس:اكيد خير وقفتك مع خوي كيف رجع ع ايديك فاتح ايام زمان حاب الحياة ونظرتها ليها تغيرت..
هيثم؛تواصلي فيه؟
نرجس:ايه نكلم فيه في السجن..
هيثم هز راسه وقال:كويس...
"نرجس"
التفتت نرجس لولد خال امها"مهاب" اللي ناداها..
نرجس:عن اذنكم...ومشتله..
ثريا بإبتسامه؛خل نمشي نشوف شن في بالك نقدر نساعد..
ومشتلها...
هيثم هز راسه وشبح لنوال بعدين قال؛كملتيه الكتاب..
نوال:مازال...
هيثم هز راسه وقال؛اكيد توا قاعده تسألي نفسك ع سبب جيتي المفاجئة؟
نوال:بصراحه ايه..
هو ابتسم وقال:اكيد في سبب..نقدر من وقتك شويه..
زادت تلخبطت دقات قلبها بس بانت عاديه جدا وقالت؛ايه..بس لحظه شويه..
هيثم؛تفضلي..
هي لفت ومشت توصي اللي معاها ع بعض الأمور..
بعدين جت بتولي لقاته مبعد عن مكان الزحمه شويه...
هي مشتله وقلبها ماباش يدها وقاعده تتسائل ياترى في شن يبي يحكي معاها..!؟
وصلت فيه...
هيثم؛تفضلي قعمزي..
هي قعمزت ع الكرسي..
وبعد الكرسي وقعمز مقابلها..
ضمت ايديها لبعض وقعدت تفرك في ظهر يدها اليمين بسبابة يدها اليسار من التوتر..
بس ملامح وجهها تبين العكس..
هو حط ع رجل ع رجل وحط يده اليسار ع ركبته واليمين فوقها وقال:اني جاي نبي منك خدمه؟
نوال:مني اني؟
هيثم هز راسه بإيجاب وقال:ولو خدمتيني فيها ديري فيا معروف كبير...
نوال ابتسمت وقالت:مادا بيا نردلك شي من قائمة معروفاتك علينا..
هو ضحك..
وهي قعدت تشوفله كيف يضحك..
هدى ضحك وقال:تمام...بس قبلها بنسأل علاش ماتزوروش في فاتح..
نوال بضيق:المحامي يمشيله وهو يرفض يشوفه..
هيثم؛فاتح يبيكم انتم تجوه من المحامي..خوته وين..
نوال قعدت ساكته ماقدرتش ترد..
هيثم:تمام بريله انتي عادي جدا..الا اذا كنتي متحشمه من الخشة غادي..
نوال:لا ابدا..بس نخاف يكسفني ويردني..
هيثم؛مش رادك...ولو عاملك بجفاف تحملي بش تكسبي قلب ولدك صغارنا يستاهلوا نتعبوا بش نكسبوهم وفي نفس الوقت كفري عن ذنبك معاه..
نوال اثر فيها الكلام هلبه...هزت راسها وقالت:عندك حق..
تنهد وقال...تمام...وتوا نجو للخدمه اللي نبيها منك..
نوال ابتسمت وقالت:تفضل...
🍁🍁🍁🍁🍁
"وهادي بطاقة الدعوه خالتي خديجه قالت من يدك ليد مريومه"
مريم بالسيف خدت البطاقه وقالت:بصراحه مش عارفه كان في ظروف هادي نقدر نحضر عراس..متاعيني متغششين سلفي وراجلي بزايد مش في بابه الحق..
معاذ:انتي شوفي راجلك شن يقولك وشن مايقول ديري..
مريم تنهدت وهزت راسها..
معاذ شرب من القهوة بعدين قال:مريومه..
مريم؛نعم؟
معاذ حك رقبته مم الخلف وقال:حماتك شن نظامها..
هي رفعت حاجبها وقالت:معاذ هني روحك..
رفع حواجبه وقال:خيرك شن قلت!..ضحك وقال..سألت عادي..
مريم؛مش عليا اني موعا..اسمع البنت هادي مش زي البنات اللي عرفتهم في حياتك بنت متربيه صح ومش متاع دوة فاضيه بكل...
معاذ:تو انتي خشيتي في نيتي وقعد تفتي من راسك اني البنت ناوي معاها الجديات..
رفعت حواجبها وقالت:صار هدا سبب تغيرك مع جهاد!
هو قلب وضحك..
مريم:انسى الموضوع انسى وحوله من راسك..
معاذ:علاش تسكري فيها انتي!؟
مريم؛لأني نعرفك كويس بتكسد عليها وتفوتها اما بش تقولي ناوي معاها جديات هادي مانصدقهاش..ماحلك عرفتها انت بش طبيت فيها..وبعدين انت زمان وين خوتك يجوا يخطبوت تقوللهم اسألوا ع خوت البنت وبوها..بتفهمني توا انك وين تتزوج تختار وحده لابوها ولاخوتها عاجبينك!..حول الموضوع من راسك وخلي البنت في حالها..
هو رفع حاجبه اليسار وقال:غير وسعي بالك وانتي كلتيني بقشوري..خلاص سكري ع السيرة ولاغيريها...ورجع يشرب في القهوة..
وهي تشرب في القهوة وتشوفله بشك...
🍁🍁🍁🍁🍁
ولوطا..
كانت عفاف طيب في الغدي وحداها نوسه تساعد فيها..
عفاف وهي طيب لاحظت انها تسرح مرة مرة فقررت تسألها..
عفاف:نوسه..
شبحتلها وقالت؛نعم؟
عفاف؛خيرك بنتي نحس فيك مش ع بعضك..
تنهدت نسيبه وقالت؛اليوم شفت خليل..
عفاف بدهشه؛مشتيله زيارة!؟
نسيبه بإبتسامه؛لا..اليوم عنده امتحان في الجامعه مشيت شفته..
عفاف ودموعها في عيونها؛شن حاله؟
نسيبه:الحمد لله كويس..وحتى امتحانه جاوب فيه..
عفاف حطت يدها ع فمها ودموعها نزلوا..
نسيبه؛خاطرك تزوريه؟
عفاف حولت يدها وقالت؛لا مش توا...
نسيبه ابتسمت بحزن وقالت؛خبرته ع الحمل قريب طار من الفرحه..
عفاف ابتسمت من بين دموعها وقالت:ربي يفرج عليه وليدي..
نسيبه؛آمين...
🍁🍁🍁🍁
وافقين في نص الممر وفي يد واحد سفرة..
والزوز يشوفوا لزميلهم في السجن كيف يحاول يقنع واحد من العناصر المسؤولين عن السجن الإنفرادي..
شويه وجاهم زميلهم وهو يضحك؛هي بروا..
زياد بضحكه؛احلى عجيلي والله..
خليل بإبتسامه؛منور..
ومشوا الزوز وهو فات من حداهم وقعد يمشي للخلف ويقول:بوجودكم ياطرابلسيه..
التفتوا شبحوله بأبتسامه..
وهو لف ومشي...
المسؤول ع الإنفرادي:تعالى انت وياه..
ومشوا الزوز معاه..
لين وصلوا لغرفة الانفرادي اللي فيها فاتح..
فتحلهم الباب..
خشوا..
لقوه مقعمز ع السرير وفيده المصحف...
كانت المصحف الاسود اللي جابه قبل هيثم لزياد..
وزياد هداه لفاتح..
سكر المصحف لما شافهم وقال:اوووو...
هما قدموله وقال زياد؛شن جو..
فاتح؛ماشيه...كيف خلوكم تخشوا..
خليل؛مش مهم توا..المهم هيا قعمزوا نتغدوا جعان موت..
فاتح:غدي شني..
عرا زياد القعد...
كان قعد كسكسي بالبصله بالوطني وفوقه عصبان..ومعاه مشروب..
فاتح لما شافهم قعد يضحك بهستيريا..
وهما استغربوا فيه...
زياد؛شن مجوعينك هني!!،
فاتح بضحكه:تقدر تقول هكي بش هدا اللي ضحكني...شوف غادي..
شبحوا للحيط لقوه مليان خطوط صغيره..
فاتح؛من اول يوم واني شادها نستغفر...كنت نذكر في عمايلي السود وكل حاجه نتفكرها نستغفر عليها ..
نصلي ونقرا قرآن ونرجع نستغفر مرة تانيه..اقسم بالله قعدت الساعات تمر زي البرق..ونفسيتي ميه ميه..
واليوم الصبح نضت واني نشم في ريحة الكسكسي والعصبان اقسم بالله..جي خاطري فيهم..ضحكت ع روحي وقلت غير من وين بيجوك...بس بعدين قلت صعب عليا اني مش ع ربي..وكملت استغفار لين تعبت..
بعدين شدت المصحف وقعد نقرا لقيت روحي واصل في نصه تصدقوا..لما خشيتوا عليا كيف كملت الكهف..
وشوفوا شن جاني معاكم..
زياد؛سبحان الله.
خليل؛مش غريب..ربك سبحانه قال انا عند ظن عبدي بي...وانت لقيت اللي ظنيته..
ابتسم فاتح وقال:تعرفوا شن اللي مفرحني..اول مرة نحس ان ليا قيمه عند ربي...
زياد؛كلنا لينا قيمه كبيره عند ربي..بس حني مش مقدرين..
خليل هز راسه وقال:صح..
فاتح رشف وقال؛ايه منين جاكم هالغدي السمح؟
خليل بإبتسامه؛بنولي بابا الفال ليك..
فاتح بضحكه؛اوبا اوبا اوبا..مبارك مبارك...وحضنوا بعض...
وزياد قعمز بالسفرة وقال:معاش نقدر نراجي خلاص ..
الزوز قعمزوا وقال فاتح:العصبان العصبان..وخدي طرف وقعد ياكل...غمض عيونه وهام فيه وهو يقول...مممم...مممم..ياربي...الله يرحم اللي اخترعه...
ضحكوا زياد وخليل وبدوا ياكلوا..
فاتح وهو ياكل:ايه قولي شن درت في الامتحان..
خليل:ميه ميه..
زياد فتح حكه المشروب وحطها قدام فاتح وقال؛تحب البتري..
فاتح:منور ياقلبي..
وقعدوا التلاته ياكلوا مع بعض وهما يهدرزوا..
وهالجمعه الحلوة نستهم المكان الموجودين فيه...
هي هادي العنايه والمعيه الربانيه تنتشل العبد من وسط الهم...💖
🍁🍁🍁🍁
الساعه الحادية عشر ليلا...
في الكوجينه يتعشى وهي مقابلاته..
مريم؛هما هكي متعودين لما يخشوا ع حياش خوتي مايخلوا مايجيبوا..
جهاد تنهد وقعد ياكل..
مريم؛ووصلي عزومة حوش عمي لعرس هداكا..
هو وقف ماكله وقعد يشبح للصونيه..
مريم خافت وقالت؛قتله مانقدرش نحضر الوضع اللي حني ما يسمحش وهو قالي شن مايكون راي راجلك امشي وراه..
رجع جهاد ياكل بعدين قال:امشي..
هي انصدمت..
قام عيونه...بلع بعدين قال:امشي..واطرحي والبسي وديري مافي خاطرك واني حنكون غادي ايام العرس كلها...
مريم وهي مصدومه:تحكي جد!؟.
جهاد:وجد الجد...نبي هداكا الحيوان يفهم ويعرف ان اللي داره ويدير فيه كل ع فاضي..واني حاطك في عيوني ونشوف بيك فالدنيا...
مريم قلبها قريب طلع من مكانه...ضحكت والدمعه عبت عينها وقالت:انت تبي تفهمه هكي ولا؟
جهاد هز راسه وهو مبتسم..
مريم ابتسمت بأمتنان وحب وقالت:تعرف..
جهاد بإبتسامه؛امم..
مريم...
"يابخت اللي قلبك عندها"
هو خفت ابتسامته وين جت بين عيونه رتاج في اخر مرة شافها فيها...
وهي لاحظت كيف سرح وشافت في عيونه الحسرة..
قلبها ولعت في النار..عرفاته يفكر فيها..
استاقض من سرحانه وتنهد من قلبه بعدين رجع ياكل..
ومريم خدت طاسة مية شربت منها...ع بالها بطفي النار الوالعه في جوفها...
🍁🍁🍁🍁🍁
"شن رايك انتي؟"
رتاج؛حلوة الدبله واحلى شي انه جاب عمليه مع السوليتير..
دانيه؛اني مش ع الدبله يارتاج اني ع اهل راجح امه ونساوين خوته..
رتاج:انتي عليك في راجح وطز في الباقي..
دانيه بضيق:تعرفي حاسه روحي تسرعت ياريتني ماوافقت..
رتاج؛ماتخليش شخصيتك ضعيفه هكي...قوي ثقتك بروحك وحوليها عقدة النقص هادي ولدهم اللي جري في جرتك وجابهم خطبوك...وبعدين هما يحمدوا ربي اللي جتهم كنة زيك بش تحسن النسل...شفتيهم كيف انتي..
دانيه بضحكه:استغفر الله...ايه انتي مالي خطيبي مانرضاش فيهم..
ورتاج ضحكت بعدين قالت:لكن لاحظتي مخويات حيزبونه كيف يعسلوا في لسناتهم بالذات بنت اختها هديكا كيف لصقت امي ودارت روحها فالحه وتعول..
دانيه؛ايه لاحظت...زعمه شن يبوا..
رتاج؛واضح ياعبيطه..عينهم ع مجاهد..
دانيه بفجعه:قهرتهم وعازتهم يحلموا.
رتاج؛اكيد عشم ابليس في الجنه بعد العرعوي اللي دايره خوها..
دانيه:ايه ربي يستر علينا..
🍁ومجاهد في داره..
مقعمز يقرا في كتاب للرافعي...لا مايقراش..
فاتحه هكي وخلاص وسارح..يذكر في اليوم اللي كلمها فيه في المستشفى...اللي شافه منها وقتها شي تاني..كان قبول واضح..لو كانت ماتبيشي راهو رفضاته وقتي..
رسمي كان مجاهد حينجن ويعرف علاش رفضاته..
هو بادي يخطط لحياته معاها..كيف هي تجي وتمسح كل شي في لحظه..
طول هديكا الليله وهو يفكر وخلاص..ولما ارهقه التفكير
توضا وصلى استخاره وفي قلبه رجاء ان ربي يطلعه من حيرته هادي..ويطمن قلبه...
🍁🍁🍁🍁
تاني يوم...
في المدرسه...
سارة ودانيه كانت كل وحده فيهم في جهة..
سارة بروحها طول الوقت ياتقرا قرآن..ياتراجع..
ودانيه مشغوله مع صاحباتها الجدد..
والكل في المدرسه يتكلم عنهم وعن اللي صار بينهم وكيف صحبتهم القويه انتهت بسرعه هكي...
من جهة تانيه..
••راكبه دانيه تجري فوق وهي جايه من مكتب الأخصائيه..
ووراها ميس وروعه اللي كانوا عندها حتى هما ياكلوا اللي فيه نصيب من تأديب ع قلة احترامهم للأبلات..
ووراهم جمعه راكب لان عنده حصه....
شاف دانيه وهي راكبه وشاده مساحه بيدها اليمين اللي فيها الدبله تبرق من بعيد..
انحرق ولى رماد من الغيره..كان يلقى يجبدها من يدها..
وروعه وميس يهدرزوا ويضاحكوا..
ع اساس ميس بتلفت انتباهه بتصرفاتها المايعه..وهو ولى يندري عليها موجوده من الاساس..
دانيه وهي راكبه عترت قريب طاحت غير شدت في السياج كويس..
جمعه بخوف:خيرك!..
هي انخلعت لما سمعت صوته وقالت؛شي استاذ..
وسرعت خطواتها وصلت فوق بسرعه ومشت...
وهو وراها...
وميس وروعه يشبحولهم بإستغراب..
جمعه:دانيه دايخه!؟
دانيه وهي متوتره؛لالا...وزادت سرعة خطواتها لين وصلت الفصل وخشت..
وهو تنهد ومشي خش لفصله..
ميس:هدا شنو!!!؟
روعه؛اني نقول عادي يعني ماهو البنت هيا مريضه سكر وقبل داخت في المدرسه..
ميس رفعت حاجبهاوقالت:ان شاء الله يكون هكي..
وخشوا لفصلهم..
الابله؛اخر مرة انتي وياه مرة بتقللوا ادب معاش تخشولي حصه..
روعه؛اوووكين تاتشر..
وقعمزوا هما الزوز وعيونهم تشوف للأبله بنظرات استفزاز..
الابله شبحتلهم بإزدراء وقالت؛كملي سارة..
سارة كملت قراية القطعه في درس الإنجليزي..
الابله؛goodسارة...ياريت والله ياريت في المدرسه هني ياخدوك مثال وقدوة وكلهم يكونوا زيك راهو مدرستنا هادي مافيهاش كان النماذج المشرفه بس..
ميس:ربي يخليك لمامتك ياسارة..
سارة التفتت وشبحتلهم بحده..
الابله؛وحده وقحه وحقيره...نوضي اطلعي برا معاش نبي نشوفك في حصتي..
ميس ناضت وهي تقول:احسن..ومشت طلعت..
الابله:نماذج معفنه...ماتعدليش سارة..
سارة؛مش مهتمه بكل...
روعه رفعت حاجبها وهي ساكته...
🍁🍁🍁🍁
في فصل دانيه..
كان اسماعيل يعطي في حصه..
وملحوظ في الحصه هادي اهتمامه وثنائه المستمره على دانيه..وهالشي دار علامات استفهام وشعل نار الغيره في هلبه قلوب..
غيرة دراسه..والغيرة اللي نعرفوها..
بس من مني!!!!؟
في نهاية الحصه...
اسماعيل؛الحصه الجايه بنحلوا المسائل بس حلوا اللي تقدروا عليه حتى لو كان غلط مش مشكله نصلحوه مع بعض...السلام عليكم..
ومشي طلع...
انبار:ذوق الأستاذ هدا...
دانيه بإبتسامه؛ومحترم هلبه..
التفتت ربى وقالت:عليك دماغ عندك يابنت..
دانيه ضحكت..
تسنيم؛دنو اليوم نبي نكلمك العشيه نحلوا المسائل مع بعض..
دانيه؛ عندي جامع خليها بعد نروح..
تسنيم؛تمام كلميني انتي..
دانيه؛ok
وازهار مطرمه شواربها ومش عاجبها...
🍁🍁🍁🍁🍁
في السجن..
كانوا جماعه جماعه المهجعين ب1 وب2..
يفطروا...
والجو كان هادي نسبيا..
ع خشة اسعد االي كان ديما يحب يحضر اخر واحد..
وخشوا وراه جماعه..
واحد منهم مشي يجيبله في الفطور..
بعد ماخدي الفطور من البوفيه..
لف وجي بيمشي للكبير..
خبطه واحد من غير قصد طيحله السفره..
:شن درت...وقال لفظ نابي...وين عيونك...وقال لفظ نابي تاني..
رد عليه وهو يرعش:مش قصدي اقسم بالله ماقصدي..
الكبير وهو متكي ع الطاوله:قاعد راقد هدا فيقوه فيقوا..
:سامحني ياكبير والله ماقصدي..
وجبده اللي يتبع للكبير وطاح فيه ضرب..
والكل يدير في روحه مايشوف في شي..
بس زياد ماتحملش؛هلبه هكي هلبه..
وناض..
شده سراج وقال:قعمزي..
زياد بعصبيه؛تي حول ياراجل..ومشي طول للعركه..
وحز بيناتنهم وهو ويقول؛لم فروخك لمهم..
اسعد رفع حواجبه وقال؛فروخ!
ناضوا باقي جماعته ومشوا لزياد وواحد منهم يقول:تو نوروك من هما الفروخ..
وقبل يوصلوا فيه تلقاهم خليل..
خليل؛ولي انت ولي...
؛حول خيرلك..
خالد ناض وقف..
دفوا خليل..وهو شدهم وبدي يضرب وهما يضربوا وزياد قعد يضرب معاه..
وخالد ماقدرش يقعد مكتف جاهم وقعد يحز...
لكن واحد منهم ضرب خليل بقوة ع بطنه..
خالد ماتحملش في ولده ضرب اللي بوكس خلاه يوخر لتالي..
واحد منهم رد الضربه لخالد وطيحه..
زياد؛عمي خالد! ومشاله..
وخليل هاج فيهم وقعد يضرب...
والمهجع ولع كله ع بعض..
ع خشة العناصر وفي ايديهم الهراوات..
"حول انت وياه حول"..
وبدوا يضربوا فيهم لين حزوا بيناتهم وقفوا العركه..
العجيلي اللي كانت يتفرج ع العركه وكأنه في صالة سينما..ضحك بتهكم وقال..
"وتوا دور العقاب الثراثي المستمر عبر العصور"
🍁🍁🍁🍁
كانت كل ماتصير مشكله من هالنوع يتعاقبوا عقاب مايكونش صارم..
تقليدي...بس متعب ومرهق...
وهو كالتالي...
في ساحة السجن...
يقعمزوا ع ليانات كبيرة معبيه بصل...تحت الشمس..
ويبدوا يقرضوا ومايتمش البصل الا بعد ماهما خلاص يكونوا ارهقوا تماما..
طبعا العقاب كان للمهجعين...ب1 وب2..
بش مش الكل ماشي عليه العقاب..
زي اسعد اللي ماكانش موجوده هو وجماعته..
والشيخ عقيل االي مخلوشي المساجين يمس شي...
العجيلي بدموع؛حسبي الله ونعم الوكيل...حسبي الله ونعم والوكيل فيك يامهند..درت عيون ياولدي درت عيون في جرة عمي عيونك عيونا انعموا..
قعدوا يضحكوا..
خالد؛توا ريحة البصل بتقعد عالقه اسبوع قدام..
العجيلي:هاااهاااه..حسبي الله ونعم الوكيل...عيوني..
وكلهم كانوا يضحكوا وهما يدمعوا زي حالته.
عقيل بضحكه؛غير كان خليتوني نسايركم واصلني مافيكم عيوني يشروا..
ضحكوا...
عجيلي؛والله ماني مسامحك يامهند ليوم غدوة..
؛من غير حلف ياراجل..
عجيلي؛والله والله والله..ماني مسامحك ليوم غدوة..
عقيل بضحكه؛يقصد غدوة غدوة مش يوم القيامه...
عجيلي؛اها غدوة..هو فهمها يوم القيامه!!؟ مانقدرش اني قلبي طيب..
ضحكوا....
؛والله مامصبرني ع هالمكان غيرك..
ابتسم عجيلي وهو يرشف ودموعه يصبوا..
وخليل وزياد كانوا يقشروا وحالتهم مزريه مش متعودين..
وبعد لحظه سكوت...تكلم العجيلي وهو يغني...
الليلة ياليلة البصل...واللي بايت كله حصل في هديكا اللايده...
ردوا وراه ..دارين ولايده والمربوعه زايده..
وزياد وخليل يضحكوا...
عجيلي..
الحمص منقع في الليان ويزن عليه الذبان..
مع بعض قالوا..في هديكا اللايده..
العجيلي.
الكعك الحلو والكعك المالح والشاهي بايت من البارح..
مع بعض..في هديكا اللايده...
ع خشة الكبير وجماعته..
العجيلي..
اهم جو عرب الزحمه كل عيل في ايده...
مع بعض وهما يضحكوا..في هديكا اللايده..
والكبير قعمز وهو يشبحله يإمتعاض وجماعته معاه..
وعقيل يشبحله ع جنب..
العجيلي..
اهم جو بكراهبهم والحمير ع شواربهم..
في هديكا اللايده...
ع خشة فاتح قال...
"في هديكا اللايده"
كلهم صاحوا لما شافوه ...
وهو يضحك..
زياد ناضله وجاه وضمه وهو يقول:كيف طلعت..
فاتح؛مش عارف..
بعد وشبحله بإستغراب..
فاتح؛والله ماعارف طلعوني وجابوني هني قتلهم بتردوني قالوا...لا..
قطع عليهم العجيلي وهو يغني..
واهم جو عرب عشاقي هاللي بيهم قلبي شاقي..
فاتح..في هديكا اللايده...
ناض العجيلي وهو يغني ويأشر بإيديه..
هكي المفرخ هكي الدر...واشر بالموس ع جماعة الكبير..وهكي النسون متسطر..
في هديكا اللايده..
وعقيل بدي يضحك يالصوت..
واسعد وجماعته يشبحوا للعجيلي بإمتعاض..
والحراس منسجمين وعاجبهم الجو..اصلا حتى هما شبه محبوسين معاهم فهالمكان..
العجيلي..
والليله ياليلة البصل واللي بايت كله حصل....
كلهم بصوت واحد..
"في هديكا اللايده"
🍁🍁🍁🍁🍁
في المدرسه..
بعد ماركبوا الطالبات من الاستراحه..
في فصل دانيه..
خشوا الطالبات للفصل..
واللي هادي قعمزت في مقعدها وبدوا يطلعوا في كتابات وكراسات الماده متاع الحصه..
بنت في المقعد الاخير الصفه الوسطيه..
فتحت كراسه الحصه ع صفحة جديده..
وانصدمت لما شافت المكتوب فيها..
بعد ماقراته مررت نظرها ع البنات وقالت؛من الحقيره اللي قاربه شنطتي ومطلعه منها كراستي وكاتبه الكلام هدا..
كلهم قعدوا يشبحولها بإستغراب..
ربى؛كلام شني..
البنت ناضت وجت لدانيه وعطتها الكراسه وقالت؛بالله اقري بصوت عالي.
دانيه رفعت حواجبها بدهشه لما قرت الكلام في سرها بعدين عاودت قراته بصوت عالي..
(ريمه ياهبله تليفونك اللي تجيبي فيه بالدرقه عن قريب الادارة تسمع بيه ويعرفوا انك تعطي في البنات يكلموا في صحابهم بالفلوس)
دانيه؛حقه!؟
؛من هي الكلبه اللي كاتبه الكلام هدا..
كلهم ساكتات..
؛من هي تطلع توا..
اللي هادي قعدت تقول مش اني واللي تحلف..واللي تقول ماركبتش بكل للفصل...
دانيه؛مالا منو اللي كتبه كلام زي هدا جن!؟
كلهم قعدوا ساكتات..
دانيه رجعت تقرا..بعدين شافت في اخر الكلام..
كلمه مكتوبه بالإنجليزي قرتها..
"gray cat"
ازهار؛القطه الرماديه..
جبدت البنت الكراسه وقالت؛رماديه ولاسودا تسمع فيا توا..بري حرشيها الادارة بري وهونا الطريق قدامك ماني خايفه من حد..
ومشت ولت لمقعدها..
والبنات يشبحوا لبعض بنظرات شك..
من فيهم كتبت تهديد زي هدا..
ع خشة ابلة الحصه..
ورجعوا لأماكنهم والقصه هادي شغتلهم هلبه...
#تاج_الذكر
#gray_cat
#البطل_المغمور2
...يتبع....
