#البطل_المغمور2 "زهور القمر"
#جمان_فريد
#الجزء_الخامس_والثلاثين "راجعين ياهوى3"
رمضانكم مبارك
قال صلى الله عليه وسلم : ( كَلِمَتَانِ خَفِيفَتَانِ عَلَى اللِّسَانِ ، ثَقِيلَتَانِ فِي الْمِيزَانِ ، حَبِيبَتَانِ إِلَى الرَّحْمَنِ : سُبْحَانَ اللَّهِ وَبِحَمْدِهِ ، سُبْحَانَ اللَّهِ الْعَظِيمِ ) رواه البخاري ومسلم
💐💐💐💐💐💐💐💐💐💐💐💐💐💐💐💐💐
فتح باب الحوش وخش...
سمع صوت هدرزة امه ومرت خوه جاي من الكوجينه...ابتسم...
نسيبه:اني نقولك كان زرعناه هني في الجنان ماشاء الله كبير تشوفي شن يطلعلنا..
عفاف:تقولي هكي..
نسيبه:ايه مع مية النهر تشوفي كيف يطلع...
عفاف بإبتسامه؛حطتيها في راسي...
هو قال بصوت عالي:السلام عليكم..
نسيبه تأكدت من ان شاربتها ملبوسه زين..
عزوزتها بعد ماشافتها قالت:تعالى جهاد..
خش عليهم واتكى ع الباب ومسح عينه اليسار وقال:شن غدانا..
عفاف؛رز مبوخ...
هز راسه وهو ساكت..
عفاف:نسقيلك توا ولا بترقد..
تنهد وقال؛والله شن بنقولك..مش عارف كان مازال بنرقد من هني لاغدوة...
نسيبه وعفاف شبحوله بقلق..
وامه قالت؛علاش شن في!؟
هو غمض عيونه ورفع حواجبه بعدين فتحهم وقال:غدوة بعد العصر وتوا رواحكم ..
عفاف ونسيبه شبحوا لبعض بعدين شبحتله امه وقالت:ياولد قول شن في ماتحرقش اعصابي..
تنهد وقعد يشبحلها وهو ساكت..
ونسيبه وهي تشوفله وتراجيه يتكلم حست رجليها ثقلوا من الخوف...
عفاف بعصبيه؛تي تكلم...
جهاد:بنمشوا لحبس بوسليم..
نسيبه حطت يدها ع قلبها حساته بيوقف..
وعفاف ودموعها في عيونها سألاته بخوف؛علاش..
جهاد بملامح وجه عاديه تصنعا:بنروحوا بخليل..
هما الزوز تبتوا ع لقطة من الصدمه...حتى عيونهم معاش رمشت..
جهاد ابتسم ع جنب وقال؛سمعتوا...
نسيبه بصدمه؛شن تقول انت!!؟
جهاد بضحكه بدون مايشوفلها؛اللي سمعتيه يامرت خوي غدوة بنمشوا نروحوا براجلك صدر قرار عفو لمجموعة محبسه هو واحد منهم...قبل نروح كلمني بروحه وبشرني...
عفاف وخرت الكرسي اللي واقفه جنبه وقعمزت وهي تقول؛ياربي حلم ولاعلم هدا..ياربي خليه علم كانهو حلم ياربي...
نسيبه دموعها قعدوا ينزلوا وهي تشبح في الفراغ وقاعده في عقلها تسترجع في الكلام اللي قاله سلفها جهاد..
ارتسمت ع وجهها ضحكة فرح ودموعها ينزلوا وهي تقول؛ياربي....الحمد لله الحمد لله ياربي استجاب لدعائي ...استجاب الحمد لله يارب...
عفاف قعدت تشبحلها وهي تضحك بفرح ودموعها سيل...
شبحتلها نسيبه وقالت؛مش قتلك ياعمتي خليك املك بالله كبير..والله حسني قلبي والله الايام الاخيره في شي هني وحطت يدها ع صدرها وقالت...شي نحس بيه ومش فاهماته الحمد لله يارب طلع فرح الحمد لله يارب خليل بيطلع...
ناضت عفاف ومشتلها وضمتها وهي تقول:طيب فيك يابنتي طيب فيك...
نسيبه وهي تبكي؛طيب في قلبك ياعمتي اهو بيروحله غاليه...
وجهاد واقف فم باب الحوش ويسمع فيهم وهو مبتسم وفرحان..رفع عيونه فوق...كان يحمد في الله فقلبه...
انفتح الباب ..
وخشت سيارة تهاني...
درستها ونزلت وسكرتها ومشت بتخش للحوش شافت خوها قالت:السلام عليكم..
جهاد بإبتسامه؛وعليكم السلام...
فجأة سمعت صوت زغروده...
بفجعه قالت؛شن في..
جهاد بإبتسامه حرك راسه جهة الباب وقال؛خشي تو تعرفي..
هي طول خشتلهم....
وهو قعد في مكانه يسمع...
سمع صوت عيطه تهاني...ضحك...وحرك راسه يمين ويسار..
🍁🍁🍁🍁🍁
"والله ماني عارف شن نقول فرحان ولا واجعني خاطري"
خليل بإبتسامه استغراب؛علاش يوجعك خاطرك.
:كلنا بيوجعنا خاطرنا ياخليل ومش عارفين كيف بيصير فينا بعد تطلع..
خليل بضحكه؛طلعت مهم هلبه واني اخر من يعلم..
:اني نعرفك من اول ماخشيت هني خديت عليك وع كلامك اللي زي البلسم خديت ع صوتك اللي نرقد عليه وهو يتلى في القرآن..يعلم ربي قداش غيرت فيا ياخليل وقداش خديت عليك..
خليل بإبتسامه؛والله حتى اني يعز عليا نفارقكم ونتمنى من قلبي لو نقدر نخليكم كلكم تطلعوا معاي بس هدا حال الدنيا احببت من شئت فإنك مفارق بالحياة والموت...لكن بإذن الله كلنا لينا لقاء في الحياة الاخرة وغادي مافيش فراق بكل...
خليت معاكم ربي وكتابه حيهونوا عليكم حبسكم...وحطوا في بالكم ديما الخيرة في اللي يبيه ربي مرات قعادكم في الحبس خيرلكم الف مرة من الطلعه منه...
هما بأصوات متقطعه قالوا؛مزبوط..صدقت..
وواحك فيهم قال...ربي يهونها علينا...
خليل بإبتسامه؛آمين...
🍁🍁🍁🍁🍁
"مبارك مبارك طيب فيك"
"تعرف انت"
هيثم وهو يتكلم بالتليفون ؛لا والله ماكانش عندي علم منك نسمع توا...امتى بيطلع غدوة بالزبط
"قال جهاد بعد العصر"
هيثم؛ان شاء الله ع خير يارب...طيب فيكم نوسه..
"سلمك ياغالي...خل بنسكر منك ونكلم خالتي"
هيثم بإبتسامه؛تمام..السلام عليكم..
"وعليكم السلام"...
سكر هيثم بعدين قعد ينادي؛سارة...جنان ريحان...
شويه وجوه البنات...
سارة وريحان؛نعم بابا..نعم بابتي..
هيثم بإبتسامه؛راجل عمتكم غدوة ان شاء الله يطلع من الحبس..
جنان بفرحه؛عمو خليل..!
ريحان؛وهو في غيره ياذكيه عليك سؤال..
جنان؛اسكتي انتي..
سارة: هيييه انتي وياها..
هيثم؛شن ماتشبحوش فيا ولاشنو..
ريحان وجنان نزلوا روسهم خجلا..
سارة شبحتلهم ع جنب بعدين شبحت لبوها وقالت؛من قالك بابا؟
هيثم:عمتكم اتصلت بيا وخبرتني..
سارة؛مال خل نتصل بيها..
هيثم؛تكلم في خالتي..
سارة؛نكلم تهاني كان هدا...ولفت ومشت لدارها...
وقعدوا التوأم واقفات في مكانهم وهما يشبحوا لبوهم...
وهو يشبحلهم وحاجبه مرفوع..
نخصت جنان ريحان بعدين مشوله هما زوز وقعمزوا حواليه وضموه وقالوا مع بعض؛اسفه بابا..
غمض عيونه وهو مبتسم...
ريحان؛بابتي..
فتح عيونه وقال؛تجاوزتكم كثرت بالذات انتي ريحان..
بعدت وقالت؛اسفه اسفه نوعدك ندير كنترول ع روحي خلاص من اليوم لساني هدا معاش بنطلعه بكل..
جنان؛بتبدي تتكلمي بالإشارات..
اشرت ريحان ع جنان وهي تشبح لبوها.
هو ضحك وضم ريحان لحضنه مع اختها وهو يقول؛ااه منكم ااه..
▪▪▪▪▪▪
◇لقيت روحي هكي..مولي قلبي رهيف معاهم هلبه وحنين زياده ع اللزوم..مش قادر نقسى عليهم..ممكن هدا علاش خليت مهمة تربيتهم بشده لسارة وزياد..
هما خوتهم يعني حيعرفوا يوازنوا بين شده وعطف ومش حيشوفوهم زي مااني نشوفلهم..اني بوهم مازال نشوف فيهم هدوكا البنات.الصغيرات...في عيوني مازلت نشوف باللبسه العربيه اللي لبسوها لما كانوا في الروضه..قاعده راسخه في عقلي هالصورة ماقدرتش ننساها...
▪▪▪▪▪
🍁🍁🍁🍁🍁
"ايوه"
"زعامه...الو"
زياد؛نسمع فيك ياراجل..
"ايوه شن جو"
زياد؛مليح.الحمد لله...شن جوك انت..
"والله كل شي تمام الحمد لله"
زياد؛الحمد لله...اسمع...
"هاه"
زياد:خليل بيطلع غدوة..
"كيف كيف عاود ماسمعتكش"
زياد؛قتلك خليل بيطلع غدوة.
"قول والله"
زياد بضحكه؛اقسم بالله..دارو عفو لمجموعه من السجناء هو واحد منهم..
"الله اكبر"
زياد بضحكه:راهو يفهموك غلط احفاد لويس...
بضحكه قاله..
"تصدق قعدوا يفنصوا فيا "
وزياد يضحك..
"المهم توا...بالله لما يطلع وتحصل معاه فرصه اتصل بيا بش نكلمه..."
زياد؛ok...شن انت مش ناوي تجي حتى زياره..
"تعرف طارتلي منها النيه ليبيا"
زياد؛تدوي جديات!؟
"وجد الجد....الوضع هني خير من غادي والناس هني حتى هما غير من غادي والفرص اللي عندي هني مانلقاش ربعها غادي..نفكر نستقر هني خلاص"
زياد؛رسمي الكلام!؟
"تي رسمي ياراجل خلاص...مهبول اللي يسيب اوروبا ويولي غادي.."
زياد؛والله شن بنقولك هي حياتك وانت حر فيها ومادام شايف ان هكي خير ليك ربي يوفقك وخلاص
"حتى انت زيد فكر في الموضوع واطلع منها ليبيا حرام تدفن روحك غادي"
زياد:مش شايف الوضع زفت للدرجة هادي بالعكس تحسن هلبه هلبه...والبلاد موليه الله يبارك عليها ومع هذا فكرة السفر في راسي غير نتم اموري هني قبل..
"وصدقني كان طلعت معاش توليلها"
ابتسم زياد وقال:ع العموم قبل بنعزمك ع حفل التخرج اخر الشهر لكن الباين انك مش ناوي الجيهه..
"تو نحضره ع البث المباشر"
زياد بإبتسامه:تمام هي مانعطلش عليك..سلام..
"سلم ع الجميع راك تنسى...سلام"
نهي زياد المكالمه وهو يفكر في كلام صاحبه..
بعدين تنهد وناض مع سريره ومشي طلع من الدار..
وهو ماشي...
شاف سارة طالعه من دار نوم بوها...
شبحتله وقالت؛شن الصوت الدوشه اللي جي من دارك هدا كنت تكلم في حد..
زياد ركز ع عيونها اللي يبانوا حمر قال؛ايه...خيرهم عيونهم..
سارة وهي تحاول تخفي ارتباكها من السؤال؛بكل الفترة الاخيره بدوا يتعبوا فيا شكلي بنديرهم النظارات لامفر..
زياد:نبهت قبل لكن انتي مافيش فايده فيك ماديري كان اللي في راسك..
سارة؛كان انت تقدر تسيب الرسم اني تو نسيب الكتابه..
ومشت من قدامه..
هو ضحك نص ضحكه بعدين مشي..
🍁🍁🍁🍁
في حوش خالد...
تحديدا الصاله اللي كانوا مفرشين ع بساطها نايلو كبير...
فوقه كرسي مقعمزة عليه نسيبه اللي ملبسينها مريول...
وواقفه وحده ع شعرها تصبغ فيه...
نسيبه؛والله ياعمتي خليل مايحبه جو الصبغات ديما يقولي خليك ع طبيعتك..
عفاف؛ماتعدليش عليه..تو هو بروحه لما يشوف الصبغه كيف طالعه عليك يخليك كل ثلاته شهور تصبغي..
المزينه؛خليه يطلع يلقاك عروسه تزهي عينه ..
عفاف:يسلم فمك..
ابتسمت نسيبه بخجل...
🍁وتهاني فهالوقت كانت طالعه تاخد حاجات وصتها عليهم نسيبه...
وهي مروحه...لما خشت بسيارتها للزنقه..
ع طلعة سيارة زياد..
انقلبت ملامح وجهها للإمتعاض..وهو فات من جنبها بالسيارة بدون مايشوفلها لكن..
زياد بغيظ؛ خدت ع التنسريف الابله...كان عندي عليها حكومه مانخليها تسوق سيارة...
🍁وتهاني بعد ماخشت للحوش...
رفعت الحاجات لشقة خوها..
••نسيبه:سلمها ياربي ان شاء الله مانفقدك..
تهاني؛يعني عجبك..
نسيبه بضحكه؛ديما نقول فيها يابخت اللي بياخدك..
ابتسمت تهاني بخجل بعدين قالت؛راجيني ننزل نبدل ونركب نعاونك...
نسيبه؛باهي...
🌼🌼🌼🌼
وبدت نسيبه تقلب في شقتها وتسيق وضم ومعاها تهاني وسارة حتى هي لحقت عليهم...
خلو الشقه زي وكأنها جديد..ودارولها شويه اضافات زادت حلتها...
اما عفاف...فكانت تنسق وتجهز لعشي كبير بديره وتعزم عليه الجيران والأحباب...
ومر باقي هداكا اليوم والكل متلف لليوم اللي بعده...ومافي حد ليلة هداكا اليوم جاه النوم من الفرحه...
••ضامه ولدها لحضنها وهي تهدرز عليه..
خالد؛بابا بيجي ومعاش يمشي مرة تانيه بكل ولا..
نسيبه بإيتسامه؛ايه ياروحي بيقعد معانا ديما ان شاء الله..
خالد؛امتى يجي غدوة..
هي باساته وضماته بقوة وقالت؛نجيلي حبيبي اني..غمض عويناتك الحلوات هادم وارقد بيجي غدوة بسرعه..
خالد؛باهي...وغمض عيونه..
هي باساته وقالت؛نجيهولي ياربي...بعدين تنهدت وهي تفكر في يوم وقلبها مشتاق وملهوف للقاء....
🍁🍁🍁🍁
تاني يوم...
في المستشفى...
سارة؛قالوا بيخلونا نحضروا العمليه...
دانيه بإبتسامه:الله جو..بنشوف عملية نادرة زي هادي لأول مرة...تحمست...
سارة تنهدت وقعدت ساكته..
شبحتلها دانيه بعدين شدت يدها ووقفتها
سارة:خيرك!
دانيه؛انتي اللي خيرك شن صاير معاك من لما جيتي مش عاجبتيني وعيونك منفخات شكلك الليل كله وانتي تبكي..
هربت سارة بعيونها عنها وقالت؛مافي شي...
جبدت يدها من يد دانيه ومشت..ودانيه قعدت معاها بعيونها بعدين مشت لحقتها..
وقعدت دانيه تراقب في تصرفاتها طول الوقت..
واضح انها حزينه هلبه عيونها مايدرقوش...
مابتش تصر عليها بالسؤال عارفتها في الاخير حتحكيلها..
وجي وقت العمليه الجراحيه اللي بيديرها طبيب اردني زائر مشهور ويعتبر من افضل الأطباء في العالم العربي...
الطلبه كانوا يتفرجوا من ورا حائل ع العمليه..
كانوا كلهم مركزين ماعدا سارة اللي كانت تحاول تركز ولما ماقدرتش..قعدت تبكي بصمت..
دانيه وتهاني اللي كانوا منتبهات مع العمليه...الزوز لاحظوا هدوء سارة..
شبحولها الزوز وتفاجئوا لما شافوا الدموع تنهمر من عيونها وهي في حالة صمت تام..
🍁بعد العمليه...
دانيه بقلق؛خودي اشربي..
سارة خدت شيشة الميه وهي تبكي وقعدت تشرب..
تهاني؛خيرك ياسرو شن جاك امس كنتي ماشاء الله عليك شن تغير عليك اليوم؟!
نزلت الشيشه ونزلت عيونها وهي تبكي وعبراتها تتلاحق...
دانيه؛سارة ماديريش فينا هكي تكلمي قولي شن اللي ضايقك لهالدرجه!؟
هي غمضت عيونها وخدت نفس بعدين فتحتهم وقالت؛نبي نروح..
الزوز شبحوا لبعض بعدين شبحولها...
سارة وهي تمسح في دموعها؛تو نمشي نكلم الدكتور الشايبي...
وناضت وخدت حاجاتها ومشت...
وهما معاها بعيونهم..
تهاني؛حالها ليه فتره متغير..
دانيه؛ قولي كل شويه بحال..ديما نحس فيها عايشه صراع في داخلها...
تهاني:صراع شني؟!
دانيه؛مش عارفه بس تقلب حالها هو اللي مخليني نقول هكي...
تهاني تنهدت وقالت؛ان شاء الله خير وخلاص..
🍁🍁🍁🍁
وروحت سارة للحوش...
اول ماخشت دارها...حطت شناطيها ع تركينه..وحولت ساعتها وفتحت الدرج بتحطها فيه...
شافت لعلبة الدبله متاعها كانت مسكرة وفي جنبها صورة مجاهد...تنهدت بألم..وحطت الساعه في الدرج وسكراته..
بعدين شبحت للمرايه وقعدت تحول في شاربتها...
بعد حولتها مشت قعمزت ع السرير....شبحت لصورة امها المحطوطه ع الكامدينو...ابتسمت بألم ودموعها في عيونها بعدين قالت:قداش محتاجاتك ياماما محتاجاتك هلبه..في حاجات مانقدرش نحكيهم لغيرك انتي الوحيده اللي تقدري تفهمي عليا وتفهمي اللي نمر بيه...غمضت عيونها وتنهدت بعدين قالت...قدر الله وماشاء فعل... فتحت عيونها ودموعها نزلوا وهي تقول...الله يرحمك حبيبتي...
شويه ومسحت دموعها..
بعدين ناضت بدلت حوايجها...
وطلعت من الدار...مشت للمنظومه...حطت CD قرآن للقارئ ناصر قطامى فيه سورة يوسف...
وبدت ضم في الحوش وهي تسمع في السورة وتقرا معاه...
وهو في قرائته يخلي اللي يسمعه يتخيل في كل حدث ويحس بكل حرف في كل آيه...
بكت سارة هلبه و هي تسمع فيه...
بس في اخر السورة نفسيتها ارتاحت وهدت شويه...
بعد كملت ضمان الحوش داخل..
لبست ملايتها وطلعت للجنان بش ضمه ...
ع خشة خوها زياد من غير سيارة...
زياد:السلام عليكم..
سارة؛وعليك السلام..شكلك بتخش تجيب حاجه..
زياد؛ايه..انتي.خيرك روحتي بكري..
سارة؛جوي مش تمام..
زياد؛علاش صارت حاجه..
سارة:لالا ماصاير شي بس شكله نفسيتي تعبت من الجو..
زياد شبحلها بشك بعدين.هز راسه ومشي خش داخل..
وهي غمضت عيونها وتنهدت بعدين رجعت فتحتهم وولت تكنس الجنان...
شويه ورن جرس الحوش
حطت المكنسه ع جنب ومشت للباب وهي تقول:مني...
ماجاهاش رد بس الجرس مازال يرن..
سارة؛مني...
ماجاش رد بس الباب اندق..
هي استغربت هلبه..وسمت بالله بعدين فتحت الباب....
وتجمد في مكانها....بس قلبها دقاته تسارعت بشكل رهيب...
هو بإبتسامه جذابه قال؛السلام عليكم..مساء الخير..معليشي وخيتي زياد قاعد..
هي استاقظت من صدمتها..رفعت حاجبها وردت في وجهه الباب..
ولفت ومشت تجري وهي منغاظه بس قلبها مايبيش يهدا..
وصلت في الباب تلاقت هي وخوها..
سارة:في واحد برا يبيك..
زياد استغرب ومشي للباب..
وهي خشت داخل ومشت طول وقفت ورا روشن الصاله تشوف من ورا الستار..
🍁زياد فتح الباب ولما شاف اللي واقف قدامه قال:تافه والسنين ماغيراتكش..
فاتح بضحكه؛غير دخلني قبل بعدين هزب براحتك..
زياد،خش يامعفن خش..
خش فاتح وسكر الباب بعدين فتح ايديه
جاه زياد حضنه وقال :والله قعد ضاربني الشك باهي..
فاتح بضحكه؛لكن صدقت ماتحاولش..
ضربه زياد ع ظهره..وهو يضحك.
وهي.تتفرج عليهم....
بعدين شافت خوها خداه وطلعوا هو وياه برا الحوش...
وخرت عن الروشن وهي مبتسمه ابتسامه خفيفه...
🍁🍁🍁🍁
الساعه الخامسه عصرا..
قدام باب الكوجينه الخارجي...
كانت واقفه عفاف ع ولدها جهاد اللي كان يكلم فيها ويقول..
جهاد:يام يام...هو الصبح كلمني وقالي ماتجيب معاك حد..
عفاف بضيق؛علاش حرام عليه ..
جهاد بضحكه؛يام خيرك! تو يروح وتشوفيه لين تفدي منه..
عفاف؛لا خليل وليدي مانفدش منه..
جهاد ضحك وقرب باس راسها بعدين قال؛خلاص بنمشي توا ماتبي شي..
عفاف؛سلامتك وليدي...
مشي جهاد وامه قعدت معاه بعيونه لين درق...
فهاللحظه خطر عليها رفيق اللي مشي ومش حيرجع..
مشت قعمزت عالكرسي وقعدت تبكي من قلبها..
لين جاها حفيدها..
بدر؛حناي..
وقفت بكي وشبحتله وخطر عليها كلام شيخ الجامع متاع المنطقه لما مشت سألاته عن وضع بدر بعد موت بوه..
"ياأختي الولد هدا ماتقدريش تقولي عليه حفيدك لأنه ماينسبش لبوه ينسب لأمه وبس ومفروض ماانكتبش ع اسمه ولايورثه ولاليه اي حق في اي حاجه تخص ولدك..."
ضمت عفاف بدر لحضنها وقالت؛مافي شي حنينه مافي شي..غمضت عيونها بشده من الالم وقعدت تقول همسا؛لاإله إلا الله...لاإله إلا الله..
🍁🍁🍁🍁🍁
واقف قدام جماعة من رفقائه في المهجع وهو يقول..
خليل؛يشهد عليا الله اني حاسبكم خوتي والكبير فيكم مكان بوي..ويعز عليا فراقكم...موجع للقلب والله موجع عشنا سنين مع بعض كلينا وشربنا مع بعض فرحنا مع بعض زعلنا مع بعض وياما شفنا وعشنا مع بعض ايام تقعد محفورة في ذاكرة قلبي لين نموت..مش حننساكم من الدعاء حتكونوا حاضرين في الدعاء ع لساني في كل وقت...ربي معاكم..ربي يهون عليكم..ويفرج عاجلا غير آجل...رفع يده وقال...استودعكم الله...
كلهم باصوات متقطعه؛في امان الله..ربي يفتح عليك...ربي يحفظك..
هو بعد اخر نظره القاها عليهم وهو مبتسم بأسف لف ومشي طلع مع عنصر من عناصر السجن ...
وهو طالع مرت قدام عيونه كل ذكرى عاشها فهالمكان..
هالمكان اللي برغم الوحشة والظلام اللي كانوا مسيطرين عليه...الا انه تحول لجنة في عيون خليل..
🍁يقولوا اللي يخش للسجن مستقيم يطلع معوج وهذا الواقع..
بس لما يتعامل السجين في السجن معامله البشر..
ويبدا السجن ليه مش بس عقوبه بل اعاده تأهيل واصلاح للنفس وتهذيبها...
اللي يخش معوج يطلع مستقيم..
واللي يخش مستقيم يخلي ناس هلبه تسقيم معاه...🍁
وصل خليل لأخر محطه فهالمكان..
سلم ع الحراس اللي عاشرهم حتى هما سنين وكسبهم...
بعدين طلع من هدا المبنى...متوجه لبوابته الخارجيه...
كان يردد همسا في دعاء..
"اللهم اخرجني مخرج صدق..اللهم اخرجني مخرج صدق"
لين وصل فيها..
البوابه اللي تعتبر فاصل بين عالمين مختلفين...
فتحوا الباب الصغير متاعها..
ابتسم وقال:في أمان الله...
الحارس:ربي يحفظك...
شبح خليل القدام...بعدين خدي نفس..
وخطي اول خطوة في العالم اللي ليه زمان مسيبه...
سبعه سنين...واهو توا رجعله بشخصية مختلفه...
"خليل"
شبح لمصدر الصوت...شاف خوه جهاد..
ابتسم..ومشاله..
وجهاد قعد يقدمله لين قربوا يوصلوا في بعض..
خليل حط الشنطه وضم خوه بقوة..
وهو يضم فيه بقوة..
جهاد وهو يطبطب ع ظهره؛حمد لله ع سلامتك دكتور..
خليل وهو يمسح ع ظهر خوه:الله يسلمك..
وخروا عن بعض وجهاد باغت خوه بقبله ع راسه..
خليل بإبتسامه ودموعه في عيونه:الله يعزك..
جهاد بإبتسامه:هيا معاي الدنيا غادي يراجو فيك ع احر من الجمر بالذات امي حرجت لما قلتلها مايبي حد يجيه غادي..
ضحك خليل وحاوط كتف خوه وقال:مالا هيا ...
ومشوا مع بعض لسيارة جهاد وهما يهدرزوا وركبوها وتحرك جهاد....
🍁🍁🍁🍁🍁
في حوش خالد..
كانت الدنيا زاحمه بالجيران والاقارب..
خوات خالد وخوته كانوا حاضرين وخوات عفاف ماعدا سماح وام سجى...
•••عفاف:تأكدتي من ملح البصله ياآمنه..
اخت خالد:ايه الحمد لله كله تمام ماتوتريش روحك..
وحده من الجارات:معاش عندها صبر تبي تشوف ولدها..
عفاف تنهدت بإبتسامه وهي تقول:ايه والله معاش في صبر..
فجأة..
سمعوا اصوات كلاكس متتابعه..
عفاف بلهفه:جي جي..
ومشت طلعت للجنان جهة الكوجينه...
🍁اول مانزل خليل من السيارة النوبه بدت تضرب..
ضحك وهو يشوف قدامه في صحابه وشباب الشارع كيف بدوا يغنوا ويرقصوا..
جاه زياد...وضمه وهو يقول:حمد لله ع السلامه..
خليل:الله يسلمك ياأسد..
طبطب زياد ع ظهره بعدين وخر عنه...
وجاه فاتح وهو يرقص ويغني:سالم ياسالم طولت الغيبه سيوره الحبيب ياعيني يرجع لحبيبه..
وخليل بضحكه يقول:تعالى ياتافه تعالى..
فاتح:جيتك..
وضموا بعض بقوة...
فاتح؛حمد لله ع سلامتك دكتور..
خليل:الله يسلمك حبيبي..
🍁والبنات يتفرجوا من ورا شباك شقة جهاد.
تهاني:يااااه قداش تغير...
سارة بإبتسامه:حتى هما سنين اللي فاتوا وماريتهمش فيها
تهاني:ايه من هداكا العيد..
وقعدوا الزوز يتفرجوا بصمت..
وعيون سارة تلاحق في شخص واحد من بين كل الموجودين..
🌼وعمتها اللي كانت واقفه في الجنان مع عزوزتها وولدها خالد كانت تستنى ع نار امتى يطل عليهم..
الزوز كانوا يسمعوا في اصوات النوبه والاهازيج متاع الشباب ومش قادرات يصبروا اكثر من هكي..
عفاف:تي هيا عاد..
ونسيبه تنهدت بعمق ..
خالد؛نبي نطلع ماما..
نسيبه:لاحبيبي خليك هني توا...
ع طلعة تهاني جايه تجري..
تهاني:بيخش توا..
وزاد تسارع دقات القلب الملهوفه...
سمعوا صوت النوبه وقف...
قعدوا يشبحوا القدام بترقب...
وكأن الوقت هني بدي يولي بطيء..
الثواني حسوها ايام..والدقايق شهور..
وهما يشوفوا للجهة اللي يراجوا يجي منها..
شويه...وبان عليهم ومعاه جهاد...
امه معاش قدرت تتحمل مشتله بسرعه وهي تقول:وليدي..
وهو قدملها بسرعه..
لين وصلوا في بعض..
ضموا بعض بقوة وهي بدت تبكي وتقول:النهار المبروك اللي ريتك فيه ياولدي..النهار السعيد اللي ريتك فيه ياغاليا..الحمد لله اللي عطاني عمر وريت هالنهار الحمد لله اللي عطاني عمر وريتك مروح ياوليدي..
وخليل يسمع فيها ماقدرش يشد دموعه دفن وجهه في رقبة امه وقعد يبكي بصمت..
وهي تمسح ع راسه وظهره وتقول:الحمد لله...الحمد لله حمدا كثيرا الحمد لله..قعدت تشم في ريحته وتقول...ااه وليدي...الحمد لله ياربي..
وعزوم خليل انهارت مع امه ورجع وكأنه مازال هداكا الطفل الصغير اللي كانت علاقته بأمه فريده من نوعها..
لأنها البكري وكان كل املها..وربي ماخيبش املها...حاشاه...
واستجاب دعائها ولو بعد حين...
قربت منهم تهاني وهي تقول بنبرة باكيه:خليل..
هو سمع صوتها بعد عن امه وقعد شادها .
لما شاف اخته ضمها بيده التانيه لحضنه وهو يقول بصوت مرتعش:كبرتي يافرخه..
ضحكت تهاني من وسط دموعها وهي تحضن في خوها..
🍁خالد؛هذا بابا ماما ولا..
نسيبه ودموعها مابطلوش نزول قالت بنبرة مرتعشه:ايه حبيبي بابا..
خالد ببراءة الاطفال ولهفتهم قدم وهو ضام ايديه لبعض بشويه من التردد ولما وصل فيهم رفع راسه لبوه وقال..
"بابا"
هني خليل كل المشاعر الحاليه اللي عاشها وقفت...
وتحرك شعور تاني كان متشوق يعيشه بقوة..
بعدوا عنه امه واخته وهما يشوفوا لخالد..
وهو قعد يتأمل لأول مرة عن قرب..
كبر هلبه عن اخر مرة شافه فيها...وسمن زياده ..
خدوده كانوا حمر...وعيونه بلون مية البحر زي عيون بوه..
شعره ناعم لونه ذهبي ممشوط للخلف..
كان طفل جميل جدا ذكره بنفسه وهو في عمره..
قعمز ع روس صباعه قدامه وهو يتأمل فيه بعدين قال بنبرة مخنوقه:تعالى بابا..
خالد ماصدق طول جي لبوه وضمه....
وخليل ضمه بقوة وغمض عيونه وقعد يشم في ريحته....
ويبوس فيه..
وامه واخته ومرته يشوفولهم وهما متأثرين ودموعهم مابطلتش نزول...
خليل بعد خالد وشد وجهه وهو يقول:الله يبارك الله يبارك...
خالد؛انت بتقعد معانا ديما ومعاش تمشي ولا..هكي ماما قالتلي...
ابتسم خليل ودموعه غالبينه وقاله؛ايه يابابا معاش مخليكم بكل...وباس راسه..ورجع ضمه من جديد.
رفع عيونه جو في عيون نسيبه...غمزلها بإبتسامه...
ضحكت من بين دموعها وهي تمسح فيهم..
🍁🍁🍁🍁🍁
طالع من المكتب متاعه وهو يتكلم بالتليفون...وهو يمشي يبان مستعجل...
هيثم؛طالع توا................مسافة الطريق بس..........السلام عليكم...وسكر...
وهو مكمل طريقه ناحية باب المستشفى..
وقفه موظف في المستشفى وهو يقول؛دكتور هيثم ..
وقف وقاله؛نعم..
:صارت مشكله في الصيدليه...
هيثم؛مشكله شنو؟
:الادويه اللي جتنا من الوزارة لقيناها ناقصه مش عارفين اذا وصلت ناقصه من غادي ولامن هني..
هيثم هز راسه ومشي والموظف مشي معاه..
وفي شخص كان معاهم بعيونه لين ادرقوا....
بعدين لف ومشي وقعمز في مكان الانتظار متاع المستشفى...
قعد نص ساعه وهو يستنى...
لين شاف هيثم طالع ومعاه زوز من الموظفين..
ناض وطلع وراه ولحقه...
شافهم ركبوا سيارته وطلعوا...
وهو طلع وراهم طول..وقف تاكسي وركبها وقال..
:الحق المرسيدس..
:حاضر...
وقعدت التاكسي تبع في سيارة هيثم لين وقفت قدام مبنى وزارة الصحه..
نزلوا...وخشوا لمبنى الوزارة..
وهو قعد واقف يراجي...
قعد ساعه كامله يستنى...لين رجع طلع هيثم والموظفين الللي معاه..
؛وراهم...
والتاكسي لحقت سيارة هيثم لين ولى للمستشفى..
هو عطي سائق الاجرة اجرته..
ونزل ورجع خش للمستشفى..
وقعمز في مكان الانتظار يستنى...
وكان طول ماهو مقعمز يراقب في الوضع وحاط وذانه هني وغادي...
لعند ماطلع هيثم..
ناض طلع وراه....
جي لهيثم اتصال رد عليه..
هيثم؛اسف جدا جدا والله صارت معاي مشكله في المستشفى ماقدرتش نروح من غير مانحلها........
اهو توا ركبت السيارة..
وركب السيارة وكمل مكالمته فيها...
وهو واقف يشوفله ...لين تحرك وطلع من المستشفى...
بعدين مشي لسيارته ركبها وتحرك...
طلع من المستشفى..
وقطع مسافه لابأس بيها لين وصل لمكان محدد...
خش بسيارته..درس ونزل...
ومشي خش داخل مبنى....
وقعد يمشي لين وصل في مكتب..
دق باب المكتب...
بعدين فتحه وخش وهو يقول:السلام عليكم..
هي ردت؛وعليكم السلام
قعمز مقابلها ع الكرسي وقال:سامحيني عطلت عليك استاذه نوال.
نوال؛مش مشكله .....ياريت نخشوا في صلب في الموضوع..
هو ابتسم وقال؛حاضر...
....يتبع....
