#البطل_المغمور2 "زهور القمر"
#جمان_فريد
#الجزء_الحادي_والثلاثين "وتستمر الحياة"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
•••بعد مرور اسبوع••••
الساعه السابعه والنصف مساءا
في جنان حوش خالد...
الجنان حايس..حصيرة مفرشه وصفره وصواني معبيه لحم شوا ريحته تنشم من اول الشارع..
ايه كان اول ايام عيد الاضحى المبارك..
وفهاليوم تحديدا...قرر ولي عهد خليل يجي ع الدنيا...
فم باب الحوش..
عفاف بقلة صبر:تي هيا ياتهاني وين رحتي..
طلعت تهاني تجري بساكو البيبي وقالت؛اهوا..
خداته عفاف وطلعت بسرعه للسيارة...
اللي كانت فيها نسيبه مقعمزة تتوجع...
وفم باب حوش هيثم كان جهاد واقف ع هيثم يخبر..
هيثم بإستعجال؛تمام شويه ولاحقكم.
جهاد هز راسه وقال؛اوكي..
ومشي يجري للسيارة ركبها وتحرك طول...
🍁اما هيثم لما خش للحوش اتصل بخالته ماجده...
هيثم؛ايوه خالتي..
"هاه ولدي خيره صوتك هكي سارة صارلها حاجه!"
هيثم؛لالا سارة كويسه بس نسيبه ياخالتي شكلها خلاص.
"بتجيب قصدك وين هي في اما مستشفى خل نمشيلها"
هيثم:تمام بري انتي مالا لمستشفى الرازي ..
"خلاص عشرة دقايق ونكون غادي..هي بالسلامه"
هيثم؛مع السلامه...
وسكر وهو يقول؛على خير يارب...
ومشي خش داخل شاف بناويته الزوز ياكلوا في اللحم في الكوجينه..
وقف ع رخامه البار وقال بأبتسامه؛عمتكم نوسه بتجيب بيبي..
الزوز ببراءة اطفال ابتسموا بفرح وصفقوا مع بعض..
هو ضحك..بعدين خفتت ضحك..ومشي من حداهم وخش ممر الديار..
وقف قدام الباب ودق عليه...
"خش بابا"
فتح عليها الباب..
لقاها مقعمزة ع صلايتها وهي لابسه المصليه وشاده المصحف بين ايديها..
بملامح وجه باهته وعيون ارهقهم البكي قالت؛تبي حاجه بابا..
هو كل مايشوفها هكي قلبه يقتطع عليها...
بلع ريقه وابتسم بالغصب وقال:عمتك نسيبه في المستشفى حالة ولاده..
وسط ملامح الوجه الباهيه ارتسمت ابتسامه خفيفه..
هيثم؛ادعيلها بابا..
هزت راسها وقالت بصوت مبحوح؛حاضر..
شبحلها شويه بعدين ابتسم وقال؛ماتبي شي بابا..
حركت راسها بالنفي .
هو هز راسه بإيجاب..وسكر الباب..
ارتسمت ع وجهه ملامح وجع ممزوجه بالحزن وقال بهمس:صبر جميل والله المستعان..
🍁🍁🍁🍁
وفي مستشفى الرازي..
كانت نسيبه في اصعب الأوقات اللي تمر ع مراة في الدنيا..
عايشه اقوى واصعب الم..مايقدر حد يعيشه ويتخطاه غيرها هي...الم المخاض..
صوت صراخها وانينها كان مسموع...
وواصل لآذان عزوزتها اللي تسمع فيها وتدعيلها...
🍁في نفس المستشفى..
من جهة تانيه...
رتاج؛خود رشيد..
خدي رشيد من اخته شنطة حوايج دانيه...
ورتاج شدت اختها وقعدت تمشي فيها..
دانيه كانت شبه منتهيه جثه تمشي وخلاص....
ورتاج حالها مايتخيرش عن حال اختها بس كانت تقوي في روحها ع خاطرهم..
قعدوا يمشوا...
ودانيه في عالم تاني...الدموع حاصلات في محجر العين..
وحاسه روحها وكأنها منفصله عن الدنيا...
وان كل شي صار بالنسبه ليها بين الحلم والواقع...
ورشيد يشوفلهم الزوز وهي يمشي وقلبه موجوع...
وصلوا في باب المستشفى...
ع خشة الدكتور الشايبي...
وقف لما شافها وقعد يتبع فيها بعيونه وهما يمشوا فيها...
وبدون مايحس رجع طلع مرة تانيه وراهم وقعد واقف فم الباب وهو يشوفلهم لين ادرقوا من قدام عيونه..
تنهد بضيق..بعدين ولى خش للمستشفى...
🍁وهما ركبوا التاكسي اللي كانت تراجي فيهم وتحرك بيهم طول...
°°°فهالوقت...
جي ولد خليل واخيرا...
الممرضة بإبتسامه:الله يبارك جاها وليد زي العسل..
عفاف وهي مبتسمه بفرح ودموعها في عيونها:اللهم لك الحمد والشكر..باهي وكنتي شن حالها..
الممرضه:حالها باهي الحمد لله..شويه ونطلعوها للحجرة العاديه ونجيبولكم الوليد وتشوفيهم..
عفاف وهي تضحك بفرح وتمسح في دموعها؛باهي باهي..خل نتصل بالعيله نبشرهم..
ع جية ماجده تجري وصلت فيها وقالت:بشري ياعفاف..
عفاف وهي تضحك وتحرك في ايديها:جابت وليد وليد..وحالهم الزوز باهي الله يبارك..
ماجده من الفرحه حضنت عفاف وقالت وهي مبتسمه بفرح ودموعها في عيونها:الحمد لله اللي غشت وشفت هاليوم...
🌼وشويه وصل الخبر لهيثم...
اللي برغم من هو اللي فيه فرح فرحه كبيرة لأخته...
ولأول مرة يولي خال....
🍁🍁🍁🍁
الشقه كانت هاديه مافيهاش اي صوت..
حتى الناس معاش جت من نهار فرق السو خف المشي والجي...
معارفهم مش هلبه وعلاقتهم بأقاربهم مش قويه..
وحبايب مجاهد كلهم اصدقائه ايام الجامعه والخدمه ماعندهم لمن يجوا ولامع من يقعمزوا...
مجيد كان راقد في داره..ليه ايام مريض ...
ومقبوله تعاني فيه...
اما سدينه ماكانتش تتحرك من دار مجاهد بكل ضامه حوايجه وراقده ع سريره..وتشم في ريحته وحاسه بوجوده..
ودمعتها مانشفت...
شويه وسمعت باب الشقه انفتح...
تعودت تسمع حوش الباب يفتح بمفتاحه هو...
اولمرة تسمع هالصوت من بعد موته..
حالة عقلها تعبانه صورتلها ان اللي فتح الباب وخش للحوش هو..
ناض طول من ع السرير وطلعت تجري من الدار..
ولما وصلت برا..
وقفت..
وين شافت دانيه خاشه ومعاها رتاج ورشيد..
قعدت تشبح لدانيه...
ودانيه تتفحص بعيونها التعبانه في حالة امها موليه وكأنها شبح..الحزن سلبها سلب...
وفي راسها جهة شاب فيها الشعر بوضوح...جهة وحده دون عن باقي الشعر...
اول مرة تشوفها...عرفت ان امها من الرعشه ع خوها صار فيها هكي...
رتاج كانت خايفه من رد فعل دانيه لما تعرف ان امها لسانها انربط ومعاش تكلمت من هداكا اليوم...
اما سدينه فكانت تشوف في تفصيل في بنتها...
ملامح وجهها بالذات...
وتفكرت لما صبح هداكا اليوم كيف كان وجهها منور وكأنها وردة مفتحه في عز جمالها..
اما اليوم فالذبول كان واضح في كل شي فيها...
وجعتها بنتها وجعتها هلبه ع صغر سنها شافت هدا كله وعاشت هالصدمات..
وترملت قبل لتعيش في حوش راجلها...قبل لتعيش فرحتها براجلها من الاساس....
كانت تحاول تتكلم وتناديها..
عقدت دانيه حواجبها وهي مركزة ع فم امها كيف تحاول تتكلم...
التفتت وشبحت لرتاج وهي مفجوعه..
ورتاج قعدت تشوفلها بألم...
التفتت دانيه وقعدت تشبح لأمها..
مشتلها تجري وضمتها وقعدت تبكي..
وسدينه ضمتها بنتها بقوة وقعد تبكي معاها...
ورتاج ورشيد..قلوبهم تتقطع...
ومقبوله تسمع في اصوات بكاهم...شافت لمجيد..
اللي كان راقد وعاطيها بالظهر وباين من حركة جسمه انه يبكي..
تنهدت وقالت بصوت هامس:الله المستعان...
🍁🍁🍁🍁🍁
"ياعمري ياعمري ياعمري الله يبارك"
نسيبه وهي مبتسمه.؛لمن يشبه ترا؟
ماجده؛تي وين يبان توا يادماغ مازال شويه..
عفاف:مش عارفه اني لما ريته خطر عليا بوه لما جبته..
ماجده؛الحمد لله كان هكي..
نسيبه وهي تشوف لخالتها بنص عين؛مش فايقتلك مجدي..
ضحكوا عفاف وماجده..
ماجده بضحكه؛سبحانك ياربي من قال نويسه تولي ام..
نسيبه وهي تشوف لولدها بإبتسامه حب؛اني بروحي مش مصدقه...
عفاف؛ولااني مصدقه اني شفت لخليل صغار...اللهم لك الحمد والشكر..
ابتسموا نسيبه وماجده وهما يشبحولها...
🍁وبوه كان مع صحابه في مطعم في الحبس يتعشوا..
شويه وخش عليهم نائب مدير السجن وهو مبتسم قال..
:خليل..
كلهم التفتوا وشبحوله..
وهو بإبتسامه قال؛مبارك جاك عزري..
زياد ابتسم بفرح بعدين شبح لخليل اللي جي واقف..
خليل؛من قالك!؟
؛توا خبروني..
قدمله طول وهو يقول:خلوني نتكلم تليفون توا بالله عليكم..
؛استثناء ليك انت بس راهو..هي تفضل..
خليل ابتسم بفرح ولهفه ومشي..
ونائب المدير وواحد من العناصر معاهم..
زياد بضحكه؛واخيرا درت ولد عمه..
فاتح؛حصلت وليد تلعب انت وياه..
قعدوا يضحكوا..وزياد ضرب فاتح ع ذراع بوكس..
وبوكس قعد يتحسس في ذراعه وهو يضحك..
🍁في الدار اللي كان فيه خمسة نساوين والدات غير نسيبه..
رن تليفونها..
نسيبه؛بالله جيبيه خالتي..
مدت ماجده التليفون لنسيبه..
خداته وشافت المتصل ضحكت وقالت؛شني حس مالا؟!
عفاف:من الحبس؟
هزت نسيبه راسها وهي مبتسمه وفتحت المايك وردت؛ايوه..
"ياايوات...نحبك نموت فيك"
نسيبه فنصت بصدمه..طول طفت المايك وحطت التليفون ع وذنهاوهي مبتسمه ووجهها ولى احمر قالت؛من وين عرفت؟
وعفاف وماجده يضحكوا عليها...
"مش عارف خش عليا ضابط يخدم في السجن وبشرني مش عارف من خبره..المهم قوليلي شن حالك وشن حال ولي العهد..ومن يشبه بسرعه"
نسيبه بضحكه:حالنا باهي الحمد لله والشبه عمتي قالت زي خليل لما جبته..
بصوت فيه نبرة حماس..
"بالله..قصدك بيجيني اني..طلعت تحبيني هلبه ياشفشه"
نسيبه بذوب من الخجل اكتفت بالابتسامه وخلاص..
"حداك حد؟"
نسيبه:عندي عمتي وخالتي ماجده..
"اها..سلميلي عليهم وقوليلهم خليل يحبني موت"
وهي تشوفلهم بإبتسامه عريضه وتقول من تحت سنونها؛امم ياسر..
وهما فاهمين عليهم ودارو ارواحهم يهدرزوا بش مايحرجوش نسيبه..
وهو يضحك عليها..
هي تنحنحت بعدين قالت؛مافكرتش في الاسم..
تنهد وقال...
"خالد"
ابتسمت...
"نواستي خلاص معاش عندي وقت نحبك ياقلبي..قصدي نحبكم..في امان الله"
وفصل الخط..
تنهدت من وسط قلبها ونزلت التليفون ودموعها نزلوا..
عفاف:نوسه!
ماجده شدت يدها وقالت؛خلاص نوسه خلاص...انتي نافس بنتي..
خدت نفس ومسحت دموعها وقالت بإبتسامه:قال بيسميه خالد..
ابتسمت ماجده..
وعفاف ماابدتش اي ردة فعل حتى بملامح وجهها...
ونسيبه شبحت لوجه ولدها الجميل البريء نظرتها ليه داوت قلبها في لحظه...
وبدت نسيبه تعيش قصة حب جديده...
الأمومه..
🍁🍁🍁🍁
"سيدي وصلنا للولد اللي صوراته الكاميرات في الطريق وهو هارب من مكان الجريمه"
داوود؛بعتوه من يجيبه..
:فورا سيدي..
داوود:وورده شن صار فيها؟
:مستمرة في انكار علاقتها بالجريمه..
داوود؛طبعا..حتنكر...راجعتو سجلات الزوار وشفتوا من جاها الفترة اللي فاتت؟
:وجبناهم واحد واحد واتضح ان كلهم مالهمش علاقه بشي..
داوود قعد ساكت وهو يفكر...بعدين قال...اني متأكد وواثق ان هي ورا قتل الرائد راجح خير الله...لو مادبرتش مع حد من الليجوها في الزيارة..وهدا طبعا ذكاء منها..معناها عندها وسيلة تانيه تواصلت بيها مع اللي دبرت معاه الجريمه..
:ع هكي اكيد يكون في هاتف في المهجع متاعها..
داوود؛واكيد بتكون افتكت منه ليها وقت..اللي زي وردة هادي لازم يتعاملوا معاها بنفس اسلوبها...خلوكم تراقبوا في الناس اللي عندها بيهم صله الا ماتبان حاجه في النهايه...
••••••••••
"مانعرفاش وماليش علاقه"
داوود:مش وقت غباء توا..نقولك الكاميرات صوراتك حتى وانت تحول في اللتام عن وجهك في شارع******..المشكله انك مبتدا واضح جدا كان هدا ماطحتش بسرعه...
هو قعد يشبحله بدون مايتكلم..
داوود؛كان ماتكلمتش بروحك بشكلك الحلو هدا..حنخلوك تتكلم بس بعد مانغيروا شي في معالم وجهك..
:قتلك مانعرفش عن من تحكي ولاعلى شن تحكي...
داوود قعد يشبحله وهو ساكت..
خلا اللي قدامه يتوتر..
هز راسه بعدين قال؛تمام..خل نبيتوك الليله هني تفكر ع راحتك..وغدوة ان شاء الله نزيدوا نهدرزوا...وناض وهو يشوفله بنظرات تزيد في توتره بعدين مشي وطلع من غرفة التحقيق...
🍁🍁🍁🍁
راقده وعيونه ع صورة خوها المعلقه ع الحيط في دارهم..
وبين عيونها يمر شريط ذكرياتها معاه وكل ذكرى كانت احلى من تانيه وكلهم يوجعوا القلب وزي الملح لما ينحط ع الجرح..
دانيه بنبرة باكيه؛مستعده ندفع عمري كله ويرجع وخيي مش مهم اني نعيش المهم هو يعيش اللي زيه يستاهلوا يفرحوا ويعيشوا حياة حلوة...مجاهد تعب في حياته هلبه تحمل مسؤوليتنا كلنا ماعاشش لروحه بكل..
رتاج وولدها راقد جنبها وهي سرحانه تشبح في الفراغ ودموعها ينزلوا؛صح ماعاشش لنفسه..ماعاشش حياته زي ماالشباب اللي في سنه عاشوا كان كل همه حني وبس..حتى لما جاته الخدمه بعيد تذكري كيف كان لما مشي يخمم فينا وخايف علينا..وكان يوميا يتصل ويسأل...اااه ياوخيي الله ياخد اللي خدي شبابك وروحك ياوخيي الله ينتقم منه شر انتقام..
التفتت دانيه لرتاج وقالت؛رتاج تفكري في اللي نفكر فيه..قصدي اللي دارها...
رتاج؛خو مقبوله صح..
دانيه؛ومن غيره اكيد عرف كل شي وانتقم ...
رتاج؛تو نشوفوا الشرطه شن يطلع معاهم ويارب يلقوه اللي دار هكي ويعدموه يارب...
دانيه رجعت شافت لصورة خوها وقالت:آمين...شويه ورفعت يدها اليمين وشافت دبلتها..
《شوفي دانيه اني نبي نرجع نطلبك من اهلك مرة تانيه وامي مادوريهاش هي اصلا راضيه وتبي تعتذر ع اللي صار منها..
عارف صعب عليك..بس اني يادانيه والله من بعد ربي محتاجك انتي هلبه فوق ماتتصوري..دانيه اني عمري ماكنت ضعيف هكي قدام حد..مافي حد سمعني نتكلم هكي في حياتي كلها حتى مع امي...ارجوك ماتكسرنيش اني بروحي مكسور.."
"ورب العزة يادانيه مانسلم فيك مرة تانيه ولانفارقك الا بالموت.."》
شدت ع يدها بقوة وتكمشت في بعضها وقعدت تبكي بألم..
ورتاج تسمع فيها وحتى هي قعدت تبكي بكتمان...
🍁وفي مكان تاني..
في دار سارة..كانت مقعمزة تكتب في مقالها الجديد وهي وتبكي..كل كلمه فيه كان طالعه من وسط قلبها المجروح من روحها المتألمه..
تكتب وتوقف شويه تبكي..بعدين ترجع مرة تانيه تكتب..
وصوت بكاها كان يسمع فيه بوها اللي كان يسهر من خوفه فيها يقعد يراقب كل ليله في دارها وينجبر انه يتصنت عليها
خايف دير في روحها حاجه...
لكن سارة ماكانتش تفكر في الشي هدا ابدا..
عندها من الوازع الديني مايمنعها من ارتكاب من فعل زي هدا..
وكانت تقاوم في اي فكرة سوداء تجيها بقراية القرآن والصلاه...
▪▪▪▪▪▪
◇سارة من لما ماتت امها لعند موت مجاهد وهي تبكي..وفي نظرةعيونها يبان الحزن كبير هلبه..وبعد موت مجاهد..المرات اللي ضحكتت فيهم سارة ينعدوا ع اصابع اليد الوحده..
ومن انشغالي بحالها مافكرتش في الجريمه كيف صارت ومن وراها...
▪▪▪▪▪
🍁🍁🍁🍁
اليوم التالي...
في غرفة التحقيقات..
داوود بإبتسامه مكر؛البيته هني خلاتك تفكر كويس..
الشاب بخوف؛اسمع اني بعتني واحد اسمه علي الطير عطاني الاسم والعنوان وقالي راقبه ومادير شي لين نقولك واني درت اللي قالي عليه واليوم اللي قالي فيه نفد نفدت..اهو قتلك اللي نعرفه كله اقسم بالله مانعرف غير حاجه بالله عليك ماتردني للدار هديكا بالله عليك...
ابتسم ع جنب وهز راسه وقال:يابني..
خش العنصر عليهم..
داوود؛خودوا معلومات تامه عن علي الطير هدا وارفعه لجماعة الرسم بش يعطيهم مواصفاته وبعدين نزلوه للحجز ...
وناض ومشي طلع من حداهم...
وبعد ماخدوا المعلومات تامه عن الشخص اللي بعت القاتل المأجور..وعرفوا مكانه..بعتوا وحده للقبض عليه مالقوشي..
واتضح بعدين انه مسافر...لهدا سلموا المهمه للإنتربول...
🍀🍀🍀🍀
بعد مرور ايام....
"اجعل ليلتها ضاوية..كيف طريق الزاويه"
اجعل ليلتها نور على نور...كيف طريقك جنزور"
الشتاوات هادي كانت ع العرسان..
رنيم واحسان..
اللي طلعوا من صالة الفرح متوجهين لأحد الفنادق...
وروحت امه ومعاها ولده لحوشهم مع احد الاقارب...
طول الطريق والجده تشبح لحفيدها اللي مسيطر عليه الحزن ...
واول ماوصلوا للحوش..
طول مشي لداره وحبس روحه فيها..
وحناه قعدت تخمم فيه لين جفاها النوموماصدقت طلع الصبح...
دارت فطور قنين فيه كل شي يحبه حفيدها المثنى..
وقعد تراجي فيه ينوض..
شويه وخش للكوجينه..
بوجه عبوس قال؛صباح الخير..وقعمز ع طاولة الفطور..
حناه سنيه؛صباح الخيرات والليرات...نصبلك حليبك دفيته راهو..
المثنى:صبي ياحناي صبي..
صبتله حليب وحطاته قدامه وقعمزت قريبه عليه وقالت:اشرب...
خدي طاسة الحليب وقعد يشرب..
وحناه تشوفله..بعدين قالت؛مثنى..
المثنى:مانبيش ندوي ع بوي بكل..
سنيه؛ياولدي اني مانبيكش تكدر روحك نبيك تفهم بوك بش ماتتضايقش..
المثنى بغضب؛وخيره هو مافهمنيش قوليلي..علاش مااستناش شويه ع الاقل لين برد جرح امي..راهو ياحناي اني لليوم نبكي عليها امس الليل كله واني نبكي..مش متخيل ان في مراة خدت مكانها..
سنيه؛مافيش مراة تقدر تاخد مكان امك حتى في الحوش هدا المراة التانيه بتسكن فوق..
المثنى؛حناي بالله عليك كان تبيني نفطر ونكمل يومي برا داري ع بوي ماتحكيش بكل..
تنهدت سنيه وقالت:حاضر...
هو كبت غضبه وحاول يهدي روحه ورجع يشرب في الحليب..
🍁اما عند بوه ومرته الجديده...
اللي كان مقعمز ع السرير يشوفلها بذهول..
رنيم وهي تساوي في وشاحها؛قتلك من قبل يااحسان الشهور الاولى للمثنى بس مش ليك انت..
احسان؛كيف يعني اني واخدك ليا اني للمثنى!؟
رنيم شبحتلها شويه وهي مبتسمه بعدين مشت وقفت قدامه وقالت؛واني هدا كله نبي نديره ع خاطر مني..ماهو ع خاطرك انت..بش اني وياك نرتاحوا بعدين...اني خديتك بولدك احسان لازم نكسبه بش نكسبك حتى انت فاهم عليا..
هو شبحلها شويه بعدين نزل راسه وهو يهز فيه بإيجاب..
رنيم؛مالا هيا نوض وتي روحك..
هو ماباش يتحرك..
رنيم بضحكه؛احسان..خداته من يده ونوضاته..
وهو قرصها من انفها بقوة بعدين مشي للحمام..
وخلاها تتحسس في خشمها وتضحك..
🍁وبعد دقايق..
طلعوا من الفندق وتوجهوا للحوش..
ولما وصلوا غادي كانوا سنيه والمثنى مازال يفطروا..
خشوا عليهم..
سنيه وهي متفاجئه؛نهار ابيض! خيركم ماقلتوا
وناضت تسلم عليهم..
والمثنى يشبح لمرت بوه بحده..
وهي تشوفله بإبتسامه فيها شي من القلق..
كان شكل المثنى يحوي انه اكبر من عمره...يعني التفاهم.معاه مش حيكون ساهل.
احسان؛مثنى تعال سلم بابا..
ناض المثنى ومشي لبوه وسلم عليه بالخد..
المثنى؛مبارك..
احسان؛الله يبارك فيك..سلم ع ابله رنيم..
شبحلها وسلم عليها برووس صوابعه..
رنيم تنحنحت وقالت؛شن جو مثنى..
هز راسه بدون مايرد عليها بعدين قال؛ماشي لداري..
وطلع من حداهم...
سنيه وهي مبتسمه بربكه؛جوه مكهرب شويه يفكر في النتيجه بتطلع اليوم شهاده اعداديه ماهو.
فنصت رنيم في احسان..
يعني كيف نتيجه ولده اليوم وماكانش يبي يقعد معاه...!؟
طنش احسان وقال؛في فطور يام..
سنيه؛في في..لكن ياريتكم قلتوا قبلها عابيه عليكم تقعدوا غادي يومين..
احسان؛ماصارش..
سنيه؛باهي تعالوا قعمزوا تعالوا..
ومشوا قعمزوا هما الزوز...
وسنيه تعول عليهم...رنيم تحشمت في مراة كبيرة تحوس ع فطورها وهي مقعمزة تتفرج..
طول ناضت عاونتها وحلفت قبل ماتحلف هيا وتمنعها من معاونتها...
واحسان برغم انه كان مضايق لأنه ماعاشش جوه كعريس
لكن تصرفاته رنيم كانت عجباته هلبه...
🍁🍁🍁🍁
شاده ولد عمتها في حضنها وهي تقول؛افرحي بولدك عمتي بالله عليك ع خاطري اني ماتحرميش روحك من الفرح..
نسيبه؛كيف تبيني نفرح! حتى الناس يضحكوا عليا بعدين..
سارة؛اني قصدي خلي الناس تمشي عليك وتجي ديريوا العصيده الجغوم فرقوا الحلويات..حرام اول عيل جيبته تعدي هكي من غير ماتحسي بيه..وبعدين العقيقه واجبه عمتي وضروري ديروها ارجوك ديري كل شي واعتبريني حضرت..
نسيبه دموعها نزلوا..
سارة بدموع:لو منعتي ع روحك فرحك بولدك مش حتردي اللي راح ياعمتي..معاش يرده شي خلاص..
نسيبه قربت من بنت خوها وباستها ع راسها...
وسارة قعدت تبكي بصمت...
🍁🍁🍁🍁
كان اول يوم ليها في المصنع من غير خوها الكبير..
بس جابت خوها ولد 14سنه معاها..
كان رشيد يحاول يتقمص دور كبير عليه هدا كله بش يحمي اخته ويحسسها ان مازال في وراها رجاله..
رتاج:شفته قداش كبير يارشيد لو تشوف العمال اللي يخدموا فيه امه..
هو قعد يمرر في نظره عليه بنظرات استكشافيه..
لين وصلوا لحجرة رتاج..
فتحت الباب وقالت؛هادي حجرة رئيس مجلس الادارة..
رشيد خش وهو يشوفلها بذهول وقال؛كبيره!
ابتسمت وقالت؛تعالى قمعز..
مشت قعمزت ورا مكتبها.
وهو قعمز مقابلها..
ولحظات وخش عليها المدير..عزاها مرة تانيه وبدي يحكي معاها عن الخدمه..
ورشيد يسمع فيهم ويشوف لرتاج وهو متفاجئ فيها كيف تتكلم وكيف تتصرف وكأنها مش نفسها اخته رتاج اللي يعرفها..
قعدوا فترة في المصنع..
بعدين مشوا للشركه العقاريه..
وغادي رشيد زاد ذهوله اكثر في المكان وفي اخته عجباته هلبه كيف تبان قويه عكس حالتها اللي تعود يشوفها بيها..
وهني فكر ان هو الراجل ومفروض بكون بقوة اضعاف قوتها بش يكون عليها سند قوي..
وطبعا هالشي مش حيصير بين يوم ليله...
يبي سنين من التمرس والتعلم وخوض تجارب تزيد تصقل وتبني شخصيته وتقويها
🍁🍁🍁🍁
"فوتيرنيم؛اني قتلك ماتدخلش احسان بالله عليك اطلع منها..
احسان فنص فيها..
هي بضحكه؛عصبتني ماتقيدنيش خليني نتصرف بحريتي..
احسان؛تمام ديري مافي راسك وبريله وشن مايدير معاك ولايقولك ردي بالك تجي تبكي وتشكي...غادي الدار اللي ع اليسار...
رنيم بضحكه؛باهي..ومشت من حداه..
لين وصلت في داره..
وقفت قدامها وخدت نفس بعدين قالت؛يارب ساعدني..
ودقت الباب..
"خش"
فتحاته وخشت وهي تقول؛نحصل معاك خمسه دقايق..
شبحلها من فوق لتحت بعدين شبح للآيباده بدون مايرد عليها..
هي سكرت الباب وقفت وقعدت تمرر في نظرها ع داره بعدين شبحتله وقالت:النتيجه اليوم..
هز راسه بإيجاب..
رنيم :بالنجاح ان شاء الله..
المثنى:شكرا..
وقعدوا ساكتين هما الزوز وهو لاهي بآيباده..
هي غيرت عيونها عنه وشبحت لصورة لاصقه ع الحيط ابتسمت وقالت:كريم عبدالجبار...مايكل جوردن.
قام عيونه وشبحلها ..
هي شبحتله وقالت؛نسمع بدوري NBA امريكا احسن مكان يحترفوا فيه لعب كرة السله..
المثنى؛نبي نمشي غادي بعد نطلع من الثانوي ونحترف لكن بوي مايبيش..
رنيم هزت راسها وقالت؛باهي علاش ماتحترفش في دوله عربيه....
المثنى؛شن تحكي انتي العرب يعرفوا يلعبوها كرة السله هما..
رنيم بضحكه؛عندك حق..خلاص نأجلوا كلام في الموضوع هدا لين تطلع من التانوي..
المثنى بانفعال؛علاش انتي شن علاقتك بش تقوليلي اجله تحساب روحك وليتي امي كان خداك بوي..عمرك ماتولي امي حطيها في راسك هادي..
رنيم خافت برغم توقعها لردة فعله هادي بس تبين العكس وقالت:ومن قالك نبي نولي امك..!؟ مستحيل..اني مرت بوك وبس..بس يعني نقدر نولي صاحبتك وماتقولش مانصاحبش في بنات اني مرت بوك عادي...وضحكت..
المثنى؛اسمعي الجو اللي ديري فيه مايمشيش عليا فاهمك وعارفك كويس..حتى اسماء اللاعبين واسم الدوري عرفتيه من قوقل..ومتأكد.انك عمرك ماشفتي مبارة وحده لكرة السله ولاتعرفي شن هو الدوري متاع كرة السله..
رنيم :لا والله حاضرة دوري كرة سله وحتى عندي فريق كنت نشجع فيه ونحبه هلبه..
هو رفع حواجبه وقال؛دوري شني واما فريق..
رنيم؛دوري جماعة سلام دانك كنت نشجع في فريق الصقور بقلب ورب...
هو غمض عيونه وغلباته الضحكه..
رنيم ضحكت وقالت؛والله ماتبعت غيرهم في حياتي والحق حبيت كرة السله هداكا الوقت هلبه..
فتح عيونه وشبحلها..
رنيم؛وايه صح المعلومات اللي قتلك عليهم عرفتهم من قوقل..
المثنى؛وعلاش دير هكي!؟
رنيم بإبتسامه؛بش نكسبك ونولوا صحاب..
المثنى ؛واني مانبيش..نبي كل حد يقعد في حاله وخلاص..
رنيم تنهدت وقالت؛تمام...ع راحتك...نستأذن..
ولفت ومشت طلعت من الدار..
وهو قعد يشبح للباب شويه بعدين غير عيونه عنه وشبح للايباد..
••برا..
احسان:لزك ولا؟
رنيم؛لا والله لا..
احسان؛ماتقنعنيش انه تعامل معاك عادي..
رنيم؛باهي كان غلط فيا شن بدير بتمشي تعاركه!
احسان؛نلزمه حده بس..
رنيم؛احسان مش هكي بالشويه..
احسان؛رنيم هدا ولدي ونحبه اكثر من روحي لكم مانبيش نسايره هو خدي ع ربايته الدلال وان في كل شي لازم نراعو مشاعره...والتربيه هادي حطلع انسان اناني يفكر في نفسه بس لامبالي بمشاعر غيره..
رنيم؛تمام عندك حق..بس ولدك توا مراهق وفاقد امه وبوه خدي مراة تانيه اللي يمر بيه صعبه هلبه ماتشدش عليه..
تنهد وقال؛تمام اني بنطلع منها ونشوفوا شن يطلع معاك..
رنيم بضحكه؛احسن شي..المهم توا تمشي دبرله في هدية نجاح..
احسان؛حرام عليك راني عريس..
رنيم بضحكه؛نقولك شن تاخدله..
احسان هز راسه وحط ايديه ع بعض وقال؛قولي قولي..
ورنيم تضحك عليه...
🍁🍁🍁🍁
"تو اتصلت بالضابط وقالي الحيوان اللي بعت من يغدر بخوي شدوه في مالطا وجابوه هني طول"
دانيه؛توا كله يبان...اااه لو يطيح في يدي هالحقير نقطعه تقطيع...
رتاج ودموعها ينزلوا؛حسبنا الله ونعم الوكيل احرقوا قلوبهم. ياربي..
دانيه بدموع؛ياربي اقهرهم كيف ماقهرونا...
••••••••••••
"انت كنت محبوس في سجن تاجوراء ومعاك سجين اسمه #رفيق خالد جمعه وهدا قبل هدد بقتل المجني عليه"
تنهد وقال؛مزبوط..واتفقت اني وياه ع الموضوع هدا..
داوود،يعني انت متعاون مع #رفيق ع الجريمه تعترف..
؛وكان نكرت شن بنستفيد..اولها واخرها حنعترف...
داوود هز راسه ونادى ع العنصر بش يرفعه للحجز وطلب احضار رفيق من سجنه في تاجوراء...
🍁🍁🍁🍁
"تعال هني يابدو وين ماشي شديه ياتهاني"
صالحه بضحكه؛سلامته معاش ينشد..
عفاف؛واجعني حاله عليك بخت بخته..الام عقلها معاش عليها..والبو محبوس ومايطلع لين يكون فالمدرسه لايعرفه ولايزبط شكله..
صالحه تنهدت وقالت؛وشن نقول اني ع عرفه مسكين اللي لوحاته امه بدم بارد ولاعاد دوراته ولاتندري عليه حي ولاميت..تزوجت وعاشت حياته ونستهم هو واخته..
ولابوه وياغبيني من بوه اللي هو ولدي..تبعلي هديكا المغربيه وقعد يجري في جرتها وخلا صغاره يشحتوا بش ياكلوا...
اييه ياعفاف ايييه الواحد لو بيحكي من هني لين يتم عمره مايسداش..
عفاف بحسرة:حرام فيهم الصغار الشكالات هادم..لكن لربك حكمه من كل شي..اللهم لااعتراض..
ع جية نسيبه؛ووك عليا ياربي شن هدالاليلي ليل ولانهاري نهار..
عفاف وصالحه مع بعض؛مازال ماريتي شي..
نسيبه؛باهي بالشويه عليا ماتندمونيش ع الساعه اللي فت فيها من قدام الورشه..
والزوز قعدوا يضحكوا عليها...
🍁🍁🍁🍁
وطلعت نتيجة المثنى ونجح بتقدير ممتاز..
ماكانش فرحان هلبه ومش عاطي للنتيجه هديكا الأهميه..
بس هما كانوا عاطيينها حجمها الطبيعي..
المثنى:شن هدا حناي!
سنيه؛الحاجه اللي خاطرك فيها ليها وقت..
احسان؛قداش نقيت عليها واهو في الاخير درنهالك العب كورة سلة في الجنان لين تعيا..
المثنى؛علاش توا؟
سنيه؛شن علاش توا هادي!؟
المثني في نفسه"اكيد هي قالتله ديرها باش دارها":شي..بنمشي للنادي...سلام.
ومشي خش داخل..
احسان؛حتى كلمة شكرا ماقالهاش..!
سنيه؛معليشي عادي خليه ع راحته مع الوقت يتقبل صدقني..
تنهد احسان ومشي خش داخل وركب لشقته...
خشلها ولقي رنيم في دار النوم ترتب في حوايجها اللي كانوا في الشناطي وتحط فيهم قي الدولاب..
رنيم؛شن صار..
هو تنهد وقال؛عجباته..
رنيم ابتسمت وقالت،معليشي تو يتعود مع الوقت..
غمض احسان عيونه وضحك..
رنيم؛الله! قداش فيه منك في حركاتك..واني نقول لمني طالع جذاب هكي..
احسان بضحكه،اني جذاب!! كاني جذاب راك طحتي فيا من اول نظره مش لين قعدت زي المراهقين نجري في جرتك بش رضيتي تسمعيني...
رنيم بضحكه؛يقولوا الثقل صنعه..
احسان؛ياريتني متعلمها..
قعدت تضحك رنيم...وكل مالها تزيد نتجذبله اكثر وتعجب بيه زياده ومتأكده انها مع الوقت حتحبه بقوة...زي مامتأكده امها حتكسب صداقة ولده المثنى...
🍁🍁🍁🍁
خش عليه لغرفة التحقيق وقعمز قدامه وهو يشوفله بعدين قال؛خشيت الحبس بعد مااعتديت ع مرتك بالضرب لين تسبيتلها في عاهه عقليه..
رفيق؛وياريتني قتلتها...
داوود؛عجباتك الحكايه وعاودتها مرة تانيه وهالمرة صابت معاك..
رفيق:عن شن تحكي مافهمتش!؟
داوود؛لاانت فاهم كويس من لما خدوك من عادي وجابوك هني..علي الطير عندنا حبيبي...وهو اللي قال ع اللي خططتله ونفدته...
رفيق قعد ساكت وهو يشوفله..
داوود؛كان مش مصدق نخلوك تسمع اعترافات الطير والولد اللي بعته بش يقتل مجاهد...صوت وصورة..
ارتسمت ع وجه رفيق ملامح الحقد وقال؛تمنيت نقتله بروحي...
داوود؛شن في بينك وبينه
رفيق بحقد؛ثار..
داوود؛ثار شني.
رفيق قعد ساكت..
داوود؛تعرف توا انت بشن حيحكموا عليك؟
رفيق مازال يشوفله وهو محتفظ بصمته..
داوود؛اعدام...
ابتسم بتهكم وقال؛خير من هالعيشه..
داوود وهو يشوفله لاحظ انه مش طبيعي وواضح انه مضطرب نفسيا..
بس مش هو المجنون اللي يعفى من العقوبه عن الجرايم اللي يرتكبها..
🍁🍁🍁
السيء في اللي صار هدا كله..
هو ردود الافعال بعد ماتنعرف الحقيقه..
"دانيه"
طلعت تجري دانيه بعد ماسمعت صوت رتاج وهي تنادي فيها بطريقه تخوف..
وصلت في الصاله..
ووراها سدينه ومقبوله ورشيد..
رتاج وهي تبكي وتتكلم وهي تحرك في تليفونها؛تعرفي من قتل مجاهد!؟
حطت سدينه يدها ع قلبها..
دانيه بخوف:مني!؟
رتاج؛الحيوان اللي هدد سارة من قبل...ولد جيرانهم الكلب هداكا...
دانيه بصدمه؛من قالك؟
رتاج ببكي وهي تعيط؛توا الضابط كلمني وقالي توا...مات بسببها هي سارة هادي ياريته ماعرفها ياريته ماشافها ياريتنا لاعرفناهم ولا ولا عرفونا..كله منه كله منه هدا اللي ينقاله بونا..هو اللي جابهم لينا هو اللي خلانا نعرفوهم وخلاه يشوفها وتشوفه...
وانهارت بالبكي..
ودانيه تبكي معاها...
وسدينه حاطه يدها ع قلبها وهي تبكي وبدت تحرك في فمها وملامح الحقد بدت ع وجهها...ولأول مرة بعد اسبوعين تنطق....
"يعدموه"
وقفوا بناتها بكي وشبحولها..
رشيد ودموعه في عيونه؛يام...
سدينه ودموعها ينزلوا وهي تقول بحقد؛نبيهم...يعدموه...وينحرق قلب امه كيف مانحرق ع ولدي...
رتاج جتها وحضنتها وقالت؛بيعدموه ياميمتي بيعدموه ويبردوا قلوبنا يام..
سدينه وهي تبكي:نار ولدي مش حتبرد لين نموت...لين نموت..
وقعدت تبكي هي وبناتها ورشيد يشوفلهم ودموعه ينزلوا..
ومقبوله مشت لدارها لقت فيها مجيد مقعمز ع السرير ويبكي...
تنهدت بضيق وقالت؛الله المستعان...
🍁🍁🍁🍁
"مني!؟"
هيثم بأسف؛اللي سمعتيه يابابا رفيق ولد خالد..
سارة بصدمه شديده،معناها كله مني...
هيثم؛شن تقولي يابابا!..كله قضاء وقدر مادخلك بشي انتي..
سارة حركت راسها بالنفي وقالت؛لالابابا لا..كل مني يابابا كله مني مجاهد.مات بسببي اني..بسببي اني مات مجاهد.علاش يابابا علاش اللي نحبه وقلبي يتعلق بيه يمشي ويخليني علاش..في الاول ماما روحي. اللي راحت مني..وتوا مجاهد اللي مات قلبي وراه..لا ومات بسببي اني!!؟ ياريتني اني اللي متت ياريتني..
بوها حضنها وهو يقول بألم ؛لالا بنتي لا..استغفري ربك ماتقوليش الكلام هدا حرام بنتي حرام.....مافي حد يموت بسبب حد..كلها آجال مكتوبه يابنتي...
وسارة تبكي بقهر في حضنه..وهو يبوس ع راسها ويمسح عليه وهويقول؛خلاص بابا خلاص..خلاص بنتي...
🍁🍁🍁🍁
وفي حوش جيرانهم..
تحديدا في الكوجينه..
اللي كانت ع ارضيتها اجزاء صونية مرش مكسورة..
كانت عفاف مقعمزة ع الكرسي وهي في حالةصدمه....
وصالحه تشوفلها بحزن...
وجهاد مقعمز برا وهو سرحان مش مصدق المعلومه اللي عرفها وبروحه جي قالها...
ونسيبه في دار عزوزتها مع ولدها تبكي..
انحطت مرة تانيه في موقف صعب..ومازال اصعب بهلبه من الأول...
وتهاني المسكينه....هدا وين تأكدت ان علاقتها بأقرب صديقه ليها من المستحيل ترجع نهائي....
🍀🍀🍀🍀🍀
بعد مرور عدة ايام..
من هداكا اليوم...
كانت كل ليله تجي لسدينه كوابيس بولدها كلها فيها مجاهد مقتول بطرق مختلفه..مرة مذبوح...مرة محروق..وماالى ذلك...
وبناتها خافوا عليها تصيرلها حاجه حتى هي..
لهدا قرروا...يسيبوا الشقه ويمشوا يعيشوا في فيلا رتاج..
••سدينه؛حتى اني معاش نبي نقعد هني خلاص كرهته الحوش من بعده كرهته ومعاش نبيه...
رتاج؛كلنا كرهناه يام..اصلا ماكان في حد مخليني نقعد هني بعد موت عادل غيره هو الله يرحمه..
دانيه تنهدت بحرقه...
وفي دار مجيد ومقبوله..
مجيد؛يطلعوا كان بيطلعوا اني حوشي مش مخليه..
مقبوله؛ويقعدوا برواحهم من غير راجل!
مجيد؛ماهو تشبحي فيا قدامك ننفع هلبه..اني من نهار طحت لوحوني من حياتهم تلويح..لولا مجاهد ولدي الله يرحمه راهم من زمان مسيبينه..وبعدين رشيد معاش صغير خلاص...
مقبوله:ان شاء الله ماتندمش بعدين..
تنهد بحسرة وقال؛اكثر من هكي مانظنيش مازال في..
🍁وبدون يلموا في حاجاتهم المهمه بس..
ودار مجاهد سدينه خلتهم ياخدوها كلها معاهم مايخلوا منها شي..وكان لقت راهو رفعت حتى حيوطها...
وطلعوا كلهم من االحوش اللي ماشافوا فيه اكثر من الايام الصعبه..ايام الحرمان والكبت والقله والاهانه...وماكانش في غيره من بعد الله مصبرهم وقتها...وتوا بعد راح خلاص مادام عندهم وين يعيشوا تاني علاش مازال بيقعدوا فيه..!
🍁🍁🍁🍁
خشت للحوش وفيدها بوكس مغلف تغليف عادي زي الطرد..
وحطاته ع رخامه البار متاع الكوجينه وحولت الغلاف...
وطلعت منه كتاب كان الجزء الاخير من كتاب وحي القلم للرافعي اللي قرت منه جزئين بس..
كان ناوي يعطيهولها بعد عقد القران بس الآجل كان سابق..
ضمت الكتاب بقوة لحضنها وقعدت تبكي بقهر..
وقلبها ينزف دموعها دم من الم جرح صعب يبرا مهما يفوت الوقت....
🍁🍁🍁🍁
"هيا مثنى"
المثنى خش الملعب ..
حدفوله الكوره...
كيف جي بيلعب جمد في مكانه لما شاف رنيم مقعمزة في صفة المتفرجين ..
لما شافاته حياته بحركة اليد..
والولاد كلهم قعدوا يشبحولها..
واحد منهم قال:من هي هادي مثنى..
المثنى وهو يشوف لمرت بوه:مرت بوي..
:اوو تحب كورة السله..
المثنى؛دايرة روحها تحبها بش تكسبني..
؛لا شكلها مراة باهيه..انت ناسي حتى امك الله يرحمها ماكانتش تجيك هني..
المثنى؛هدا علاش نقول فيها عمرها ماحتولي امي..
وضرب الكورة ع الارض وبدوا يلعبوا..
ومثنى من الغضب قعد يتحرك بالكورة بروحه تجاوز زملائه كلهم..وين وصل في السله..نقز وحطها فيها...
فجأة سمع صوت تصفيق قوي..
نزل لوطا وهو يشوفلها كيف تصفق بحماس..
وصحابه يشبحوله ويضحكوا..
اما هو غصب عنه ابتسم وحرك راسه يمين ويسار ومشي كمل لعب مع اصحابه...
🍁🍁🍁🍁🍁
ماشي..وع يمينه وع يساره عناصر شادينه...
رافعين للمكان اللي سعي سعي حديث بش يوصله..
غرفة الاعدام..
دخلوه داخل...
كان في شيخ موجود داخل...
حدا منصة المشنقه..
هو لما شافها ركبه الرعب...
خدوه وركبوه فوقها المنصه..
بدي يرعش مع بعض..والشيخ يلقن فيه دعاء التوبه..
كان يقول وهو يرعش ودموعه ينزلوا...
بعد كمله...غطوله وجهه ولبسوه الحبل...
غمض عيونه وهو يقول برعب:لالالالا...
ودفوا من تحته الكرسي...
قعد ينازع في الموت للحظات بسيطه وبعدين مات...
كانت هادي نهاية رفيق..اللي قعد معمي البصيرة لاخر لحظه..وع قد ماجاته من فرص مااستغلهاش واختار هو نهايته بنفسه...
لكن مع الاسف..ماقدروش يثبتوا ع ورده اي شي ...
وقيدت جريمة قتل راجح ضد مجهول...
وتسكر ملفه بعد ثمانيه شهور من البحت والتحقيق....
وهلبه جرائم الى هده اللحظه الجاني فيها مخداش فيها عقابه وراح فيها دم المجني عليه هدر....
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور سنتين ونصف....
#وتستمر_الحياة
#البطل_المغمور2
....يتبع....
