البطل_المغمور2 "زهور القمر"
#جمان_فريد
#الجزء_الثالث_والثلاثين "الله يحبك5"
رمضانكم مبارك..
قال رسول الله صلى الله عليه وسلم(ايعجز احدكم ان يكسب في اليوم الف حسنة؟فسألة سائل من جلسائه:
كيف يكسب احدنا الف حسنه؟..قال:يسبح مئة تسبيحه فيكتب له الف حسنة او يحط عنه ألف خطيئة)
صحيح مسلم..
💐💐💐💐💐💐💐💐💐💐💐💐💐💐💐💐
جت من الكوجينه تجري بعد سمعت تليفونها يرن..
فتحت باب الدار وخشت..خداته من الشحن لما شافت المتصل ابتسمت من قلبها وردت..
مريم بإبتسامه:افندي
"دكتورة..شنجو"
مريم قعمزت ع السرير وهي تقول:تمام شن جوك انت..
"ماشيه..شن ديري"
مريم:نطيب في العشي
"شن طيبي"
مريم بضحكه:طباهج
"اها قصدك اللي ناكل فيه قبل عندكم انتي ديري فيه؟"
مريم بإبتسامه؛يس..
"لا باهي الحمد لله ضمنت مستقبل بطني"
قعدت تضحك..
"اسمعي يامراة"
مريم بضحكه؛نعم
"كلمت خوك وقتله الاربعاءبنخطف اختك وقال باهي"
مريم بإبتسامه؛اعطي علم لبوي حتى هو..
"تي ماهو هو رد الشيرة ع بوك وقال باهي يادماغ"
ضحكت وقالت؛باهي وين بترفعني
"بنخطفك قلنا عمرك سمعتي خاطف قال للي بيخطفه ع المكان اللي بيخطفه فيه"
قعدت تضحك
"المهم وتي روحك بعد غدوة ان شاء الله بناخدك من المستشفى"
مريم؛امم باهي..عندي طلب
"امر"
مريم:مايأمر عليك ظالم..تعالى وانت لابس بدلة الشرطه بالله عليك نحب نشوفك بيها..
قعد ساكت..
مريم؛داوود..
"حاضر ياستي حاضر نجوك ببدلة الشرطه..وتوا تحركي شوفي الطباهج شن صار فيه "
مريم بضحكه؛باهي..رد بالك ع روحك..
"حتى انتي...سلام"
مريم؛سلام..وسكرت وقعدت تشوف للتليفون بإبتسامة حب..
وتنهدت من قلبها...بعدين فنصت وين تفكرت العشي وناضت تجري للكوجينه...
🍁🍁🍁🍁
صوت جرس الحوش يرن كان حينحرق من قوة الرن..
جت الخدامه تجري فتحاته ..
هو خش ملهوف بخوف وهو يقول؛شن صارلها...
:فوق يادكتور راقده..
هو خش يجري وهي وراه..
الشايبي وهو راكب الدروج يجري؛واخده دواها كلت كويس؟!
:ايه يادكتور والله دواها خداته ع الوقت وفطرت كويس وتغدت كويس..
وصل في دار حناه خشلها..
لقاها راقده ع السرير..
طبس عليها وباس راسها بعدين قال:امي..
فتحت عيونها بالشويه وهي تقول؛عطيه ولدي..
الشايبي؛شن صارلك ياأمي خيرك..وقعمز حداها..
الساكته؛خلاص ياولدي اني خلاص حاسه روحي مفارقه..
باس يدها وقال؛ربي يطول في عمرك ويزيد ياامي ماتقوليش هكي..
الساكته؛الوحده ياولدي بتقصر عمري مش قادره نتحملها..خايفه نموت بروحي ياعطيه..
هو شد ع يدها بقوة بعدين شبح للخدامه وقال بصرامه؛وتيلها حوايجها بسرعه...
؛حاضر دكتور..ومشت تجري نزلت شنطه وبدت تلم للساكته في حوايجها..
الساكته؛عطيه..
الشايبي؛نعم حبيبتي.
الساكته؛كيف بدير مع امك..
الشايبي؛ماتفكري في شي ولادوري شي محلول كله ان شاء الله..
تنهدت وغمضت عيونها..وهو طبس ع جبينها وباسه...
بعدين شبح للخدامه وقال؛لمي حوايجك حتى انتي بتمشي معاها..
:حاضر دكتور حاضر...
🍁🍁🍁🍁
ملتمين في صالون الحوش...
هيثم واخته وولدها وخالته وزياد وسارة والتوام..
هيثم؛كول حبيب خالو...
خالد كلي من الشكولاته اللي في يد خاله..
وماجده ونسيبه وسارة لاهيين يهدرزوا..
مرر نظره عليهم..بعدين شبح لزياد لقاه لاهي بتليفونه..
استغل الفرصه وجي بياكل من الشكولاته...
"بابتي"
غمض عيونه بشده..
ريحان؛عيوني عليك يابابتي..
هو فتح عيونه ووكل خالد وعيونه يشبحوا لريحان بطرفهم..
وهي تشوفله بإبتسامه مكر وتهز في راسها..
فجأة زياد ناض وقف .
بوه شبحله..
مشي طول طلع من حداهم وبوه معاه بعيونه...
🍁طلع زياد برا الحوش وهو يتفرج ع الفيديو ويعاود..
بعدين طلع منه واتصل بفاتح...
والخط ينادي ومافيش رد...لين فصل..
عاود اتصل مرة تانيه وكذلك مافيش رد...
زياد؛وينك يافاتح الزفت...
"شن في"..
التفت زياد وشبح لبوه بعدين حطله الفيديو وعطاه التليفون..
خدي هيثم التليفون وقعد يتفرج ع فيديو..
عقد حواجبه بغضب بعدين شبح لزياد وقال؛كلمته ومايردش..
زياد بغضب وقلق؛ايه ينادي لين يفصل مايردش...
هيثم :امشي شوفه في المطعم..ومدله التليفون...
زياد؛ايه هو هدا..خدي تليفونه ومشي ركب سيارته..
وبوه قعد واقف يشوفله لين طلع من الحوش بعدين ولى خش داخل ..
🍁🍁🍁
بعد ماقطع زياد مسافه وصل للمطعم..
لقي الوضع يبان طبيعي..
نزل ومشي خشله شافه الزباين فيه مقعمزين ع طاولاتهم ووضعهم طبيعي جدا..
مرر نظره عليهم لين جو ع زهير كان يبان معصب..
مشاله زياد طول وهو يقول؛وين فاتح؟
زهير:من بكري نتصل مايردش..
زياد؛كان هني هو؟
زهير:لا بس قبل ساعه كلمته وقال 5دقايق ونوصل واهو توا فاتت ساعه ...
زياد؛كان من نعرف من الحقير اللي دارها..
زهير؛كلاب كلي عليهم الجو قعدوا يحاربوا فيه..
زياد:حسبنا الله ونعم الوكيل...وين مشي توا بس..
زهير؛كلمت الحوش ردت عليا خالتي نوارة وقالت ماجاش..
وزياد زادو في قلبه الخوف والقلق ع صاحبه....
🍁وامه كانت حتنجن من خوفها عليه..
لدرجه انها قعدت دور عليه بالسيارة ومعاها نرجس في الشوارع...
نوال كانت خايفه ع ولدها من الانتكاسه وعايشه حالة الخوف هادي من لما طلع فاتح من الحبس...
خافت عليه من العالم الخارجي..من المجتمع متاعنا المعروف عنه انه جلاد للصالح والطالح ومايخلي حد في حاله..
••نوال ببكي؛ياربي الولد وينه وينه..
نرجس؛ماما فاتح راجل مش عيل بش تقعدي دوري عليه في الشوارع هكي..
نوال بعصبيه؛خوك مر بأزمه نفسيه وطلع منها بطلوع الروح..خوك حساس هلبه يانرجس هلبه يتأثر بكل شي..مايغركش شكله يابنتي...
سكتت نرجس والقلق بدي ينتابها حتى هي...
🍁🍁🍁
فتح باب الحوش وهو يقول:هي تفضلي امي..
خشت الساكته وهي تمشي بعكوزها وخش معاها نادر وهو يقول؛بالشويه عليك ..
وخشت وراهم الخدامه وهو خدي الشناطي ودخلهم بعدين سكر الباب..
الساكته وهي تقلب عيونها في الحوش؛ذوق امك الشلافطي يبان من الفم..
نادر؛امي صلي ع النبي شن تفاهمنا في السيارة..
الساكته هزت راسها وقالت؛باهي خلاص خلاص..هي ارفعني لدويرتي بنرتاح فيها..
نادر؛حبيبتي توا بنرفعك ترتاحي في داري وغدوة بإذن الله يجهزولك دارك..
شبحتله شويه بعدين هزت راسها وقالت؛معليشي معليشي..
ابتسم وقال:هي تعالي معاي..
ومشي بحناه للدروج وركب هو وياها ووراهم الخدامه...
وصلها لدارها ودخلها وماطلعش الا بعد مارقدت..
بعدين خدي الخدامه ونزل بيها لوطا..عرفها ع الخدامه اللي عندهم..
نادر؛تفاهموا بينات بعضكم تمام..
الزوز:حاضر دكتور..
نادر؛امي وين؟
؛في دارها...
نادر هز راسه ومشي طلع من حداهم..
ركب فوق ومشي لدار امه..
وقف قدامه وغمض عيونه وقعد يدرب همسا ع الكلام اللي بيقوله..بعدين فتح عيونه ورسم ابتسامه ع وجهه..
ودق الباب دقتين بعدين فتحه...بين راسه ..
لقي امه مقعمزة ع كنبه ومقبله وجهها للروشن..
خش وسكر الباب ومشالها وهو يغني..
ياغاليه ياحبي قلبي كله
ياشمس بانت والسحاب تجلى..
وين وصل فيها قالتله؛في مكانك تقرب خطوة ندفنك...
نادر :يام ربي يهديك المراة مريضه وكبيره وقاعده بروحها وراهي حناي..جدة ولدك ع خاطري اني مشي وتحملي..
مديحه؛ياما مشيت وتحملت ع خاطرك خلاص فاض بيا..
قعمز جنبها وقال؛اشبحيلي..
مابتش تعدل عليه..
نادر:اسألك بالله شوفيلي..
شبحت بطرف عينها..
نادر:يام فكري فيا اني والله تعبت واني مقسم روحي بين هني وغادي وعقلي غادي وقلبي هني ومزق بين 16 والله تعبت..
مديحه؛انت تجيب في التعب لروحك..
نادر؛يام هادي حناي ام بوي..بوي اللي قبل يموت وصاني عليها..
مديحه تنهدت وقعدت ساكته..
هو خدي يدها وباسها بعدين قال؛يام..
مديحه؛فهمها ان هدا حوشي ومالهاش دخل بشي وتخليها في حالها..
نادر بإبتسامه؛هدا اللي تفاهمنا عليه من الاول ياقلبي..وقرب منها وباس راسها بعدين قال..ويلوموني فيك يادوحه ياحب قلبي كله..
ضربانه ع يده وقالت؛فوتني من كلامك المعسل واسمعني هني نبيك في موضوع..
نادر؛اللي هو..
مديحه ابتسمت وخدت نفس بعدين قالت؛في بنيه...
غمض عيونه ورفع يده وقال:يام...يام...فتح عيونه وناض وهو يقول...الموضوع هدا انسيه ومعاش تفكري فيه ومعاش تفتحيهولي...
ومشي طلع من حداها وهي معاه بعيونها اللي نظراتهم كلها حسرة...
🍁وهو بعد ماطلع من عندها نزل من الدروج وفي عقله اصوات تتردد
"تحية للسلطان نادر الشايبي"
"وبيس وبيس وعطيه ولى عريس"..
"بارك الله لهما وبارك عليهما وجمع بينهما في خير"
"ايوه يام..
برا جيب اميرة من المزين تو كلمتني امها وقالت واتيه".
طلع من الحوش وقعد ياخد في نفس عميق وكأنه من بعده مش حيتنفس..
بعدين زفر بصعوبه وهو يرمش في عيونه ويشد في دموعه بقوة...
ثبت نظره في الفراغ....
لما جت بين عيونه البنيه ام العيون الزرق...
في اول مرة شافها فيها...
كانت خاشه مع اختها للمستشفى..
وهو كان لاهي مع واحد من اهل مريض عنده..
سمع صوت رتاج وهي تتوجع..
فضولا شبحلها...ويجوا عيونه ع اختها..
عيونها كانت عاكسه عليها الاضواء بان شكلهم حلو بالمرة..
نسي نفسه وهو يشوفلهم..
بعدين اسمها امها تنادي فيها..
"دانيه بري قولي لمجاهد يجيب الحاجات اللي وصيته عليهم لاختك"
وطلعت من قدامه تجري وهو متاخد بيها بالمرة...
وقعدت في عقله لدرجة انه اجل مشغولياته في المستشفى وقعد يدور فيها..
ولما لقاها..
شافها تتكلم مع صاحبتها بالتليفون...ومن خلال كلامها عرف انها مش خاليه وان في سعيد حظ اتسمت عليه..
ابتسامه الاحباط اللي ارتسمت ع وجهه مامنعتاش يشوف علامه مميزة عن بعض مرضى السكر بانت ع شفاهها...
طول مشي خدالها ميه..وجابهاله..
وهالتصرف كان مجرد..تلقائي..عفوي...طبيعي...
داره وهو مش متأمل بعدها انه يشوفها او يعرفها من جديد...
وخلاها تقعد ذكرى حلوة...
لكن صانع الاقدار ماكانش يبيها تقعد ذكرى...
لما خلاه رجع يشوفها مرة تانيه وين جت للمستشفى وهي بكامل زينتها...عروس...انقتلت فرحتها في مهدها....
قعد موضوعها في عقله..وقعد يدور وراها لين عرف قصتها كامله..
ومن وقتها ولت شغله الشاغل....
-🌼ارتسمت ع وجهه ابتسامه حلوة نساته وجع ذكريات مؤلمه...
وقعد قلبه ينبض من جديد بالحياة...وكان صوت دقاته اشبه بالترنيمه...هو هكي كان يحس ويسمع. فجأة..رن تليفونه...
قامه وفتح الخط ورد
الشايبي:ايوه..
"بعتناها وردوها استاذي"
ابتسم ع جنب وقال؛تمام..مش مشكله...
🍁🍁🍁🍁🍁
"حي عليك عمله مسكين الله لايربحهم اللي دارو فيه هكي"
سارة تسمع في ماجده كيف تتكلم ومن داخلها كانت حاسه بالقرف من الفيديو اللي شافاته..ومن فاتح زادت انقرفت اكثر من قبل..
نسيبه بضيق؛هدا اكيد من الجماعه اللي بدي ينافس فيهم..
هيثم؛بدون شك...
ماجده بقلق:خل نكلم نوال نشوفها.
سارة شبحت لبوها لقاته زاد ركز مع ماجده. بعدين قال:افتحي المايك..
سارة انصدمت..ونسيبه استغربت..
وماجده ماركزتش..
فتحت المايك وهما يسمعوا في الخط ينادي لين انفتح.
ماجده؛ايوه نوال..
جاها صوت باكي وهي اقول..
"ايوه ماجده"
ماجده؛شن حالك..
"شن بيكون حالي ياماجده"
ماجده؛حسبنا الله ونعم الوكيل فيهم اللي دارو فيه هكي..
"الله ينتقم منهم يارب الله ينتقم منهم...اني توا بنهبل ياماجده ولدي معاش حصلته طلعت دورت عليه فالشوارع والله دورت عليه..الولد مالاش اثر ومايردش عليا بكل"
هيثم قلبه وجعها عليها قاللها:نوال..نوال...
هما قعدوا يشبحوله وسارة شدت ع قبضه يدها بقوة..
"ايوه..."
هيثم؛نوال ماتعرفيش كان في مكان او حوش كان ليكم زمان تمشوله...حاجه زي هكي..
"مافيش ياهيثم مافيش ماعندنا شي حني توا غير الحوش اللي ساكنين فيه..."
هيثم؛باهي هدي واذكري الله وصلي ع النبي...
هي خدت نفس بعدين قالت...
"لاإله إلا الله..اللهم صل ع محمد"
هيثم؛مرات يبي يقعد بروحه شويه استني ساعتين تلاته...تو يبان متأكد حيبان
"خايفه عليه خايفه"
هيثم:لالالا ماتخافيش عارفك في شن تفكري اني نضمنلك فاتح اني الضامن بعد الله سبحانه وتعالى انتي توا اهدي واذكري الله وصدقيني ساعه ساعتين بالكثير وتعرفي مايريحك..
رشفت وقالت
"إن شاء الله ان شاء الله..."
ماجده؛ربي يطمنك عليه يانوال..
"آمين يارب العالمين..بارك الله فيكم...وبالله لو سمعتوا شي خبروني بالله عليكم.."
ماجده وهيثم؛ان شاء الله ان شاء الله...
"السلام عليكم"
هما الزوز؛وعليكم السلام...
وسكرت ماجده...
سارة مشت من حداهم لدارها.....
هو قعد معاها بعيونه لين ادرقت...
ونسيبه ناضت بولدها وهي تقول؛هي تصبحوا ع خير..
هيثم؛اقعدي تعشي..
نسيبه بدون ماتشوفله؛مرة تانيه ان شاء الله..
هو استغرب في اسلوبها...
ناضتلها ماجده وسلمت عليها وهي تقول:سلمي ع عفاف وصالحه..
نسيبه؛يوصل..هي تصبحوا على خير..
ومشت طلعت بولدها وماجده معاها تسقد فيها...
وهيثم مستغرب فيها وفي قلبتها عليه فجأة..
لكن سرعان مانسي الشي هدا وقعد يفكر في في فاتح..
🍁🍁🍁🍁
فاتح اللي استمر اختفائه لليوم اللي بعده..
ماقدر حد يوصل فيه ولايعرف عنه حاجه...
امه قريب تنجن..
وخالها وولده وبنتها صايرة فيهم حالة..
زي حالة زهير وزياد اللي قلبوا عليه الدنيا ومالقوشي...
هديكا الليله زياد ماقدرش يرقد..
كان يقرا في تعليقات الناس ع الفيديو وعن فاتح..
انقسموا نصين...
ناس جايه مع فاتح وقاعده تقول ان هدا ماضي وراح والعبره في اليوم...
وناس نازله فيه وتجلد بإعتبارهم هما اكثر صلاح منه يعني!
وزياد وهو يقرا في الكلام السلبي خاف يجيه يوم ويتعرض لنفس الشي...ومش عارف كيف يقدر يواجهه..
خصوصا ان المهنه اللي بيخدم فيها السمعه تتحكم فيها بشكل كبير...
🍁وكبرت المخاوف...
ومخاوف عن مخاوف تفرق...
زي سارة اللي ملاحظه ان بوها معاش قادر يتحكم في مشاعره وبدت تطلع غصب عنه..
وانشغاله بهم فاتح سببه الاول والاخير في نظرها نوال...
••دانيه:باهي سارة لو كان بوك طلع حق زي ماانتي تفكري فيه مش من حقه..
فنصت فيها وهي تقول؛شن هو اللي من حقه!؟ يجيب مراة تانيه للحوش غير امي..تتحكم فينا وتمشينا زي ماهي تبي!؟ وتغير حتى معالم الحوش اللي قاعد ع حطة يد امي مابيناش نغيروا فيه حاجه!!؟ مراة تاخده منا..تاخد بابا....!؟مستحيل ولايفكر ولايحلم حتى الحلم لو نموت مانخليه..
ودموعها قعدوا ينزلوا...
دانيه انوجعت عليها شدت يدها وقالت:اسفه سارة..
وسارة تمسح في دموعها وهما ينزلوا غصب عنها ....
🍁🍁🍁🍁
"وهادي دارك ياغاليه"
الساكته وهي دور بعيونها في الدار قالت:كويسه كويسه...اسمع ماكلتي نبي البنت اللي عندي هي ديرهالي مانأمنلهاش امك طييبلي.
هو ضحك وقال:حاضر..
الساكته؛طالع انت .
الشايبي:لا اليوم بنقعد نحز..
الساكته شبحتله برفعة حواجب.
الشايبي بضحكه؛بنقعد معاك ياغاليه اول يوم نبي نشبع منك..
الساكته قربت منه وقعدت تمسح ع ذقنه وهي تقول؛واني مانشبعش منك وليدي اني..
ضحك وخدي يدها وباسها بعدين قال:نمشي ندير قهوة ونجيبها نشربوها مع بعض..
الساكته بإبتسامه؛باهي برا..
مشي طلع من حداها..
وهي قعدت تقلب عيونها في الدار وتقول:شلافطيه من يوم يومك..
🍁هو اول ماوصل للكوجينه..
وقف في بابها لما شاف امه واقفه ع طنجرة وفيدها سكريه الملح...وفيدها تانيه كاشيك كبير معبي تقدم فيه وتوخر وهي تقول؛ياربي سامحني يارب سامحني..
وين تجي تحطه توخره وهي تقول..استغفر الله العظيم..
وهو متكي ع الباب ويشوفلها...
وهي تأففت وقالت:ياريت ضميري ميت ياريته..
نادر؛بعيد السو عليه..
هي انتفضت من الفجعه بعدين التفتت وقالت؛شن دير هني انت..
جاها وهو يقول:ربي بعثني بش نوقف هالجريمه..وخدي منها سكرية الملح..
مديحه؛اصلا اني وقفتها بروحي ضمير عطيه سحيقه ماخلانيش.
خط سكريه الملح في الدولاب وقال:بري يادوحه بري قعمزي قدام برنامج امنه التواتي قريب يبدا..
مديحه؛ايه صح خير من خليقتك انت وحناك..
ومشت طلعت من حداه..
هو ضحك وحرك راسه يمين ويسار وبعدين بدي يدير في القهوة...
واستمرت حالة الهدوء الحذر هادي لين جي وقت الغدي..
وتلاقوا الساكته ومديحه...
ع اساس كل وحده فيهم مش شايفه التانيه ومش مهتمه لوجودها..
لكن...
مديحه:كول وليدي كول كفتة امك لايعلى عليها..
وهو ياكل ويقول؛عطيك الصحه يام..
الساكته؛مش باهيه ليك وليدي الماكله هادي..كول من عيش حناك كول احسن حاجه فهالصقع كول..
هو هز راسه ورفع شويه من اكمامه وبدي يرفس في العيش..
مديحه شبحت للساكته بغيظ..
والساكته رفعت حواجبها وابتسمت بنصر وهي تقول:كول وليدي صحيحتين...
وهو ياكل ويغير في عيونه بيناتهم....ومحتار ومش عارف يرضي مين ولامين....!
🍁🍁🍁🍁
الساعه الخامسه والنصف عصرا...
واقفه في الكوجينه تصب في القهوة وهي تسمع في بوها وخوها يحكوا عن فاتح وعيلة فاتح..
الموضوع ولى مستفز بالنسبه ليها خصوصا انها ملاحظه ع بوها خوف وانشغاله ع ام فاتح مش فاتح بس...
رفعت السفرة وطلعت من الكوجينه..
وجتهم وحطت السفرة ع الطاوله..
هيثم استغرب فيها كيف مامدتلاش القهوة.
اما زياد طول خدي فنجان بوه ومدهوله وهو يقول:تفضل بوي..
خدي هيثم الفنجان وهو يشوف لسارة كيف وهي مقعمزة رجلها تهز..
زياد خدي فنجانه بعدين قال؛حتى الجماعه اللي كانوا معانا في المركز خصلت ارقامهم وكلمتهم مافي حد شافه ولاتواصل معاه...
هيثم تنهد وقال:اني قلت لأمه ضامنه بش نطمنها بس في داخلي خوف...
سارة؛مش ياسر..
شبحولها الزوز يإستغراب..
سارة:شغلتوا ارواحكم بيه زياده عن اللزوم اللي يسمعكم يقول عيل صغير...
زياد:انتي شن دخلك..
سارة:دخلي ياسيد زياد دخلي ونص...معاش بدينا نحكوا في شي غيرهم هما فاتح هدا وامه وسنسافيلهم خلاص ياسر سكروا ع الموضوع المستفز هدا..
هيثم حط الفنجان وهو يشوفلها..
وزياد قال:سارة نوضي خشي داخل..
سارة رفعت حواجبها وقالت بتحدي:مانيش خاشه..
هيثم؛اني هني كان مش شايفتني يعني.
هي بضيق:اسفه بابا بس الموضوع هدا يوتر فيا...اني من البدايه مش حابه التعمق في العلاقه مع العيله هادي بروحها سمعتهم مش تمام..يابال بعد الفيديو اللي طلع..
زياد؛اسمعها شن تقول اسمع.
هيثم؛بنتي اوزني كلامك واعرفي شن تقولي ..
سارة:وشن قلت غلط ماكذبتش هادي حقيقتهم ...
هيثم:بنتي نوضي لدارك..
سارة زادت ضايقت من بوها وقالت؛علاش تلز فيا شن درت ولاشنهو الغلط اللي قولته..
هيثم؛سارة...بري...لدارك..
سارة ودموعها في عيونها؛مارضتيش فيهم ولا وجعوك..
زياد ؛خيرك انتي شن جاك علاش تسكري في راسك هكي...
هيثم؛تعرفي ياسارة لو مانضتيش من قدامي توا ماتلومي الا نفسك...
سارة قعدت تشبحله بعيون مليانه دموع..
بعدين ناضت ومشت وهي في قمة الغضب..
شويه وسمعوا باب دارها تسكر بقوة...
زياد؛خيرها هادي!؟
هيثم؛مش عارف كيف ندير معاها كل مانقول حالها تعدل وولت احسن من قبل ترجع لنقطة الصفر..
زياد؛ماتبيش من يسايرها ..
هيثم:غلطي الكبير ان سايرتها هلبه....
🍁وسارة في دارها تبكي وهي تدعي وتقول:يارب طلعهم من حياتنا الناس هادم معاش تخليني نشوفهم ولانسمع بيهم...يارب...
🍁🍁🍁🍁🍁
طلعت من الدار وسكرتها بهدوء .
ومشت وهي حزينه..لين وصلت للصالون..
نرجس:رقدت بعد ماخدت المنوم..
ماجده:الفجي فيها مسكينه..وربي ياخد الحق من اللي كان السبب..
نرجس:آمين...
ماجده:ان شاء الله مايفوت اليوم الا وهو خاش عليكم..
نرجس بحزن؛يارب..
🍁🍁
ومرت الساعات ومافيش جديد ولاخبر يطمن..
حتى المطعم اللي حصد شعبيه كبيره خلال فترة قصيره...
اغلق ابوابه فهاليوم بسبب غياب صاحبه...
صاحبه إلى توارى ع العيون...
خجلا...اوخوفا....او.....
○○○○○
■خلوة...ايه خلوه...حاجة تعلمت نعيشها فالحبس لما خلوقي يضيقوا من القعاد مده طويله في نفس المكان...كنت نختلي بنفسي ونقعد بروحي في داري...نصلي ونذكر في الله ونقرا قرآن..نستجمع نفسي..نشحن طاقه ونرجع نكمل..
بس اللي صار معاي برا الحبس وخلاني نعيش الخلوة كان اصعب بهلبه...صدق زياد قبل لما قال حبس نظرة الناس احرف من الحبس اللي كنا فيه...
اني لما شفت المقطع...حسيت اني مانعرفاش..مانعرفش فاتح هداكا..بعيد عني كل البعد ولاكأني كنت فاتح هدا...صراحه ماهمنيش من يشوف المقطع من الناس..غيرها..
ابتسم بعدين قال...تخيلتها وهي تتفرج عليه..قلت لروحي ايييه يافاتح انت ترقع من جهه تنشرك من جهه تانيه..انت تبيها تشوفك...بعد هكي خلاص تشوف العمي ولاتشوفك يافاتح...بس...بعدين لما قعدت نفكر هلبه واني بروحي...وصلت لنتيجه...اني مش محتاج نثبتلها نفسي ولامحتاج نخليها تشوفني...اني لازم نديرلها زلزال...ضحك وقال...ايه شي يهزها من داخل...بس قبلها لازم نعرف نواجه اللي صار معاي ونعرف كيف نوظفه لصالحي..
○○○○○
الساعه السابعه صباحا....
كان في داره راقد...
ومافي حد عنده علم بوجوده في الحوش...
امه في هداكا اليوم ناضت من الصبح ودارت اتصالاتها وقعدت تراجي لين يتاخر الوقت بش تطلع وتقضي مشاويرها...
لما طلعت من الحوش...بنتها روحت لحوشها...
وقعد الحوش فاضي الا منه هو....
حتى نوارة ليها فترة موجوده في مصر تزور في صغارها....
🍁🍁🍁🍁
في المستشفى..
زياد كان مقعمز يشرب في قهوة وقت الاستراحه ويفكر....
فجاة...رن تليفونه بنغمة رساله ماسنجر...
قامه وفتح الرساله..
لقاها جاته من زهير...رابط لمنشور صفحة ع الفيس..
فتحه....
لقي فيه مقطع فيديو..شاف من مكان كله خضرة وطبيعته حلوة..
فتح الفيديو...
واذ به فاتح...مقعمزة ع طاوله خشبيه ويتكلم...
بوجه مبتسم وبهدوء مريح....
(يومكم سعيد جميعا...ان شاء الله كلكم تكونوا بخير..)
🍁الفيديو انتشر بسرعه...
ومافي حد ماشافاش...
واولهم امه...اخته....
وهيثم...وحتى احسان...
الفيديو كانت تتفرج عليه دانيه وهي واخده من استراحه من خدمتها ع البحث..
وعقلها عند سارة..هل ياترى حتى هي تشوف فيه ولاأخر همها!؟
سارة وهي قاعده في الحوش وباديه تقرا في امتحاناتها..
مقعمزة ورا اللاب توب وتبحث..
فجأه جاها اشعار من الفيس لصفحة متابعتها انهم نزلوا فيديو وفي الاشعار قرت اسم فاتح..
فضولا خشت ع الاشعار..وطلع الفيديو اللي انفتح تلقائي وقعدت تتفرج عليه...
(طبعا هلبه منكم كان مش كلكم شاف الفيديو اللي يخصني..او يخص مرحلة زمنيه من عمري راحت..عدت في حال سبيلها..وابدا مش ناكرها ولافي يوم حننكرها..ايه اني كنت بالفلاقي واحد مايصلحش....كنت ماشي في طريق من اولها لأخرها وسخ في وسخ...ادمنت المخدرات وخشيت المصحه تلاته مرات وحاولت ننتحر مرتين...وفي كل مرة كان ربي ينقد فيا...ماكنتش عارف علاش..ولاكنت نقول ان ربي مايبيكش تموت بش يزيد يعذبك..تفكيري اللي كان منضل وقتها هكي قالي...ماكنتش نعرف انه انقدني بش يحيني من جديد..بش يخليني بنادم...راجل صح..ماكنتش عارف انه انقدني بش يقربني منه...اي واحد او وحده عايشين في حالة الظلام هادي وخاطره يطلع منها بس يشبح في ذنوبه كبيره ع ان ربي يسامحه ويتجاوز عنه...يسمعني ويركز معاي...اني راهو لاكنت نصلي ولاكنت نصيم ولاكنت نعرف ربي..واني توا نصلي في الجامع ونصيم في اثنين وخميس وعلاقتي بربي علاقة مانبيش نحكي عنها هلبه بنقول بس حاجه وحده..
ربي حنين هلبه ربي يحبنا هلبه...ربي يفرح بينا هلبه وين نولوله رغم انه مش في حاجتنا تعرفوا علاش يفرح بينا حني لما نلقوا رواحنا ونطلعوها من وسخ وحل الدنيا هادي..
ايه فاتح بشر الشيباني...كان واحد في قمة الضلال...وتوا عايش في عز الهدايه......مانبيش نقول اني نفتخر بالماضي متاعي لا..بس نشوف انه كويس لما نتفكره من وقت للتاني بش نعرف قيمه النعمه اللي اني فيها توا...
اللي نزل الفيديو.....مشكور مشكور هلبه...بسببك انت هلبه ناس حتعرف فاتح كيف كان وكيف ولى..وحيعرفوا ان التوبه مش صعبه وطريقها مافيش اسهل منه.....حيعرفوا ان ليهم رب كل يوم ينادي فيهم ويراجي في توبتهم ويفرح بيها..
ومش هكي وبس اسمعوا هادي في الاثر انقال ان ربي يضحك لما نرجعوله ونطلبوا منه المغفره..يضحك من فرحه ويقول عبدي عرف ان ليه رب غفور جاه واستغفره عن ذنوبه...
اني واللي زيي عايشين في نعمه لاقبلها ولابعدها فنظره الناس ليا وتقييمهم اخر همي..حتى لو تسكر باب الرزق اللي كنت فاتحه...متأكد ان ربي حيفتحلي باب تاني خير منه..
متأكد ان ربي يبيلي الأحسن مازال...)
وهي تسمع فيه كيف يتكلم...
وتشوف في ملامح وجهه...
الثقه اللي يحكي بيها..
النبرة الهاديه...الاحساس....
الاحساس...
خلا مقل عيونها تتعبى بالدموع لااراديا....وصلها...
وصلها بدون ماتقاومه....
وهو مواصل كلامه في الفيديو....
(واخر شي نقوله...اللي معاه ربي مايطيحش ولاينذل...ولو من حاول يسكر في وجهه الف باب ربي يفتحله غيرهم مليون باب.....
وتوا)
...نزل من ع الطاوله ..طلع فيها وراه ...
بكرج "سزوة" قهوة....وكيس بن وسكر....وحاجه يطيب عليها..
وقف وراهم وقعد يقول..
(هلبه منكم ذاق القهوة متاعي يوم الافتتاح وسألني عنها..راهو مانديرش فيها في شي زياده نهائي..واهو بنديرها قدامكم...)
وبدي يطيب فيها ويقوللهم شن يدير ومرة مرة ينكت ويتسهوك...
وهي تتفرج عليه....
تشوف في الراحه..الراحه اللي هو فيها عجيبه..
يضحك من قلبه ضحكته مادرق في شي...كانت صادقه بكل معنى الكلمه...
(لما ديروا القهوة لازم توازنوا بين الميه والقهوة بش يطلع زي ماتبوها...حلوه..مرة..معدله..ع الريحه...لازم ينسجموا الميه والقهوة مع بعض... تخليهم يحبوا بعض...والقهوة تذوب في الميه والميه تنسى نفسها معاها...وبالرفاه والبنين...ضحك وقال....بش تجيك احلى قهوة....رفع حاجبه وقال...عرفتي كيف...ايه نكلم فيك انتي يللي تعرفي ديري كل شي حلو..ماعدا القهوة....)
حست كلامه موجه ليها...بل فعلا..كلامه ليها هي....
بدون مقدمات...
القلب...بدي يدق في دقات غريبه...
دقات مخيفه....
من الخوف...سكرت اللاب توب...
وقعدت تحرك في عيونها في جميع الجهات القدام...وهي تحاول تفهم شن اللي حست بيه فجأة...شن اللي صار لقلبها فجأة..
حطت يدها عليه..وزادت تأكدت انه مش ع طبيعته...
دفت اللاب توب بعيد عنها...
بعدين ناضت ومشت طلعت من الدار ومشت للكوجينه..
وقفت في وسطها وحطت ايديها في نصها..
عقدت حواجبها ومررت نظرها عليها..
بعدين مشت طول وين مافي بكرج القهوة..
خداته وبدت دير فيها...
كانت..متوترة..ومعصبه..وهي دير فيها...
لعند ماطابت..صبت في فنجان وذاقتها....
قهوتها اللي تعودت تشربها بإنسجام..
معاش عجبتها...
سارة:خيرها هكي طعمتها!؟..
مشت للاندينو وبزعتها فيه وبدت دير في وحده تانيه....
وقعدت سارة تحاول مع القهوة...
ومابتش القهوة تزبط معاها...
ومش حتزبط ياسارة...
لين تنسجم القهوة مع الماء وتذوب فيه وتحبه زي ماهو يجبها وينسى في نفسه في وجودها.....
#الله_يحبك
#البطل_المغمور2
.....يتبع....
