تكمله...
#البطل_المغمور2 "زهور القمر"
#جمان_فريد
#الجزء_التاسع_والعشرين "فرحتنا وحده"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
مقعمزة في مكتبها في المصنع..
ومقعمز قدامها شخص ماتوقعتش يجيها ابدا...
رتاج بجديه؛تفضل بشن نقدر نخدمك..
محامي عيلة عادل بإبتسامه قال:جيت نعرض لو تشرفيني ونكون المحامي متاعك حتى انتي استاذة رتاج.
رفعت حواجبها وقال:اها...بعدين نزلتهم وقال...لا شكرا اني لقيت محاميه..
عقد حواجبه وقال؛من تكون؟
رتاج؛محاميه كبيره ومعروفه..ايمان الزروق..
هو اتفاجئ بعدين قال:فعلا غنية عن التعريف...
رتاج؛مشكور جدا ع عرضك..وتوا ياريت تسمحلي كان مافي شي مهم..مشغوله...
هو ابتسم برفعة حواجب وهز راسه بعدين نزلهم وناض وهو يقول:اسف ع الإزعاج..
رتاج؛مش مشكله..
هو مشي طلع..وسكر الباب..
رتاج رفعت حاجبها وقالت:يحسابني مش عارفه لوين يبي يوصل...مشي ورا ماقاله عقله صغيره وغشيمه...
دق الباب..
رتاج؛تفضل..
انفتح وخشوا مجاهد واسماعيل مع بعض...
قعمز مجاهد واسماعيل قعد واقف...
رتاج؛تفضل قعمز استاذ اسماعيل.
اسماعيل هز راسه وقعمز وهو يقول؛قالوا طلبتيني..
رتاج؛ايه...واني نراجع مع مجاهد في الحسابات اللي تخص شهر رمضان لاحظت ان في بعض التجار واخدين من المصنع بسعر تابت من قبل وغيرهم بأسعار اعلى علاش؟.
اسماعيل؛والله يااستاذة الموضوع هدا تكلمت فيه مع الوالد قبل وقال ان التجار اللي يكون ليهم السعر ثابت هادم معرفه وفي بينهم وبين استاذ عادل الله يرحمه جمايل..
شبحت رتاج لمجاهد اللي شبحلها برفعة حواجب..
بعدين شبحت لأسماعيل وقالت؛بينهم وبين عادل الله يرحمه مش بينهم وبيني....من هني وبرا غادي حيكون السعر واحد للكل هادي التجارة مافيهاش حبايب..وفي نفس الوقت مانبيش ندير شي نتحاسب عليه....
ابتسم مجاهد..
اسماعيل وهو مبتسم ع جنب؛حاضر..
رتاج؛وانتي تو نزيد نتفاهم مع الاستاذ عبدالرؤوف بهالخصوص....
اسماعيل؛تمام..وتوا ياريت تسمحيلي عندي خدمه في مكان تاني..
رتاج؛تفضل..
ناض اسماعيل ومشي طلع من حداهم..
رتاج شبحت لمجاهد وقالت؛شن رايك؟
مجاهد بإبتسامه:درتي الصح...
تنفست براحه وقالت؛تعرف مازال نحس بخوف..
مجاهد؛طبيعي مع الوقت تتعودي واحساس الخوف يتحول..وماتنسيش اني معاك...
ابتسمت بحب...
🍁🍁🍁🍁
"كيف يصير هكي ياابله قوليلي..هادي مدرسه ولاشارع مجارم"
المديرة بتوتر؛ارجوك اهدا دكتور حنعالجوا اللي صار فورا..
هيثم؛بعد شني !!؟ يعني لولا لطف الله كانت صارت في بنتي حاجه..
هي سكتت ومعاش عرفت شن تقول..
هيثم وهويأشر بسبابته تهديدا:اقسم بالله لو انضرت بنتي مدرستكم هادي نسكرها بالله العظيم نسكرها...
المديره بخوف:صل ع النبي يادكتور..
هيثم؛عليه الصلاة والسلام..
ع طلعة الممرضة من مستوصف المدرسة:الحمد لله ع سلامتها فاقت وحالها باهي..
وهو بسرعه مشي خشلها..
لقاها مقعمزة ع السرير ووجهها شاحب اللون..
مشالها طول وهو يقول؛بنتي..وقعمز جنبها وضمها بقوة..
سارة وهي شاده فيه؛كويسه بابا اني كويسه..
بعدها وشد وجهها وقال؛متأكده بابا؟
سارة؛والله كويسه..
هيثم حرك راسه يمين ويسار وقال:تس..وجهك لونه مش عاجبني..نوضي..نوضي..
سارة تنهدت وناضت معاه..
هو خداها في حضنه وطلعها معاه برا..
هيثم بحده:جيبولها شنطتها..
مدتها الابله الاخصائيه الشنطه..
خداها منها ومشي ببنته وهو يقول:الواحد يبدا يخاف يبعت بنته للمدرسه...
الاخصائيه؛شخصيته حاده هلبه..
المديرة:مش هكي بالعاده هو..المرة هادي عصب هلبه وعنده الحق..المخلوقه اللي اسمها روعه هادي جيبولي ملفها واتصلوا بولي أمرها...
🍁🍁🍁🍁
في الطريق...
هيثم؛بابا سارة شن تحسي..
سارة؛كويسه والله يابابا كويسه..
فجأة رن تليفون هيثم..كان موصله بالسيارة..
فتح ورد؛السلام عليكم..
"وعليكم السلام..عمي شن صار لسارة"
هيثم؛الحمد لله ولدي كويسه اطمن..
"شن صارلها بالزبط ياعمي اختي مافهمت منهاشي"
وسارة تسمع في نبرة اللهفه والخوف في صوت مجاهد قلبها وجعها عليه..
هيثم قعد يحكي بإختصار اللي صار لمجاهد..
ومجاهد عصب ع الآخر...
هيثم؛اكيد مش حنخليها تعدي ع خير...
"انتم وين توا"
هيثم؛ماشي بيها للمجمع اللي نخدم فيه..
"تمام جاي..السلام عليكم"
وسكر طول بش مايعطيش فرصه لهيثم يرفض..
تنهد هيثم وقال:لاحول ولاقوة الا بالله..
سارة شدت يده وقالت؛بابا مافيا شي والله كويسه ماتقهرش روحك..
هو شد يدها بقوة وقعد ساكت..
وقعد طول الطريق ساكت لين وصل بيها للمجمع...
وغادي دارولها كل الفحوصات اللازمه..وتأكد بوها ان حالها باهي..
في مكتبه...
هيثم؛العام هدا وفات..العام الجاي بإذن الله نحولك لمدرسه تانيه..
سارة قعدت ساكته وماعلقتش مازال الموقف مرعشها ومأثر فيها..
شويه ودق باب الحجره وخش مجاهد والخوف ع سارة باين في وجهه...
شبحلها وهو يقول:السلام عليكم..
هيثم وسارة:وعليكم السلام..
قعمز مجاهد قدامها وقال:شن حالك توا؟
سارة بخجل من بوها اكثر من مجاهد:الحمد لله كويسه..
مجاهد شبح لهيثم وقال؛امورها تمام تأكدت بروحك؟
هيثم هز راسه وهو يقول:ايه..
مجاهد:كلت حاجه شربت حاجه وجهها اصفر..
هيثم؛قالت ماعندهاش رغبه..
ناض وهو عاقد حواجبه قال؛مش برغبتها....
ومشي طلع من حداهم..
وسارة تشوف في ردة فعل بوها من تعابير وجهه...
هيثم:بيخاف ع بنتي اكثر مني!؟
سارة:مش هدا قصده بابا..
شبحلها برفعة حواجب.
هي نزلت عيونها بخجل..
غير عيونه عنها وقعد ساكت..وهي تشوفله..
بعدين تنهد وقال؛لكن راجل كويس..ماغلطش لما اصريت عليه..
ابتسمت سارة..
هو شبحلها..بلعت ابتسامتها...
ع خشة مجاهد وفيده كيسه فيها عصير وشكلاطه..
حطهم ع الطاوله..وطلع العصير وفتحه وقال:خودي..
خداته سارة..
وطلع طرف من طروف الشوكلاته وفتحه وعطاهولها...
خداته..
مجاهد بصرامه؛ماتخلي شي..
سارة؛حاضر.
وهيثم يتفرج وهو متفاجئ في مجاهد نسي وجوده تماما..
هيثم؛مجاهد..
مجاهد شبحله..
هيثم بجديه؛قعمز..
استاقظ مجاهد لروحه...وقعمز وهو محرج بعض الشيء..
وسارة تاكل وتشرب وهي تمرر في نظرها عليهم...
••••••••••
مقعمزة في السيارة تشوفلهم من الروشن..
كيف واقفين قدام المجمع ويهدرزوا..
هيثم:عقد قران عام كامل صعبه شويه ولدي..
مجاهد؛مش صعبه عمي..ع الأقل في الفتره هادي نتعارفوا اكثر..زي ماصار عمتها..
سكت هيثم وشبح لسارة بعدين شبحله وقال:عمتها كبيرة وناضجه..سارة مازال صغيره..
مجاهد؛خايف عليها مني عارفني بنضرها بنتك ياعمي؟
هيثم:مش هدا قصدي..يعني هي السنه الجايه شهاده ثانويه والموضوع هدا ممكن يشتتها..
مجاهد بإصرار:بإذن الله مش حيشتتها وحتجيب معدل قوي..نعطيك وعد من توا...
هيثم تنهد وقال:تمام عطيني وقت نفكر ونرك عليك..
مجاهد مد يده وقال:واني في الإنتظار..
تصافحوا هو وهيثم وسلموا ع بعض..وكل واحد فيهم مشي لسيارته..
هيثم لما ركب ماتكلمش نهائيا..
وسارة كان عندها فضول كبير تعرف شن كانوا يحكوا..
بس طبعا ماتقدرش تسأل بوها...
🍁🍁🍁🍁
"حتى هو!؟"
دانيه بضحكه؛ايه قال يبي يكلمني ع راحته ونتعارفوا اكثر..اصلا ديما يقول..نبي نعبر عن مشاعري نبي نقولك اللي في خاطري لكن مش قادر..
تنهدت سارة وقالت..
"لو تشوفي خوك يادانيه شن دار اليوم خلاني نموت فيه اكثر من قبل..وفي نفس الوقت احرجني مع بابا"
دانيه بإبتسامه؛شوفي مجاهد خوي ع قد ماهو رزين وعاقل لين وين تجي عندك الحكايه مش عارفه كيف يصير يتبدل بالمرة..
"ااه قلبي وخلاص..ديما نحس ان ربي يحبني اللي عطاني خوك....قداش نحبه يادانيه...والله عنده الحق في حكاية قراية الفاتحه خل كل حد يعبر شعوره براحته"
دانيه بضحكه؛حتى اني قلت هكي...
ضحكت سارة بعدين بدت تغني
"عيني غلاها سمح الزول...مهندس يخدم في البترول"
دانيه بضحكه؛اني يامامي نريده...ضابط شرطه سلاحه في ايده..
وقعدوا يضحكوا الزوز وقلوبهم طايرة بالحب والفرح
🍀🍀🍀🍀
ومرت الأيام....
وهيثم فيهم دار مشكله كبيره لأهل روعه وبعد توسلات وواسطات لناس حاولت تقنعه تنازل وسكر ع الموضوع..
وقعد في هالفترة حريص ع بناته بزياده..
هيثم؛هكي حلو بابا.
جنان شافت شعرها في المرايه ابتسمت بفرح وقالت:حيي بابا وليت تعرف ديرها..
زفر براحه وقال:واخيرا..
ريحان؛هيا بابا وقت..
هيثم وهو يرتب في دارهم؛هيا هيا بابا..
وخداهم الزوز وطلع بيهم من الحوش..
ع خشة سارة...
هيثم وهو يركب في البنات؛ماديري شي بابا صلي صلاتك وشدي كتاباتك تو نجيب غدي من برا...
وركب السيارة وتحرك طول..
وهي مشت خشت للحوش وقالت؛احسن خل نلحق نقرا في الفيزياء...
🍁🍁🍁🍁🍁
"والله مش ملحق خدمه في الورشه يامعين كانك مالي منهم يدك ابعتهملي"
هدا جهاد يتكلم بالتليفون قدام الورشه اللي كانت مليانه سيارات..وفيها من يخدم معاه كل واحد شاد سيارة ويخدم عليها..
جهاد؛تمام تمام..بارك الله فيك...وعليكم السلام..
سكر ولف ومشي خش للورشه وهو يقول:همه همه ياولاد مانبيش نسكروا قبل نكملوهم كلهم...
بأصوات متقطعه ردوا عليه:ان شاء الله...
🍁🍁🍁🍁🍁🍁
"وووووه"
طلعت ام مريم من الكوجينه وهي تقول بخوف؛صوت عياط!
طلعت مريم تجري من الدار وهي تقول:صفيتهم كلهم ياماما وبمعدل..انجاز ياماما انجاز تخطيت سنه تالته في الطب وبمعدل..
امها قعدت تزغرد...
ومريم مشتلها تجري وضمتها وهي تقول؛سلمهالي ياربي..
وشدت خدودها وقالت؛نحبك ياسموحه نحبك محلاك..
وامها تقول بوجع:تي خلي شدوقي قطعتيهم...
ع جية خوتها..
واحد كان في الجنان يتكلم بالتليفون..
والتاني طلع من الحمام يجري مفجوع...
الزوز قالوا بفجعه؛شن في!!؟
مريم جتهم تجري وحضنتهم الزوز مع بعض وهي تقول بعياط؛صفيت صفيت..نجحت..
وهما يضحكوا عليها..
وامها تشوفلها بإبتسامة فرح...
🍁🍁🍁🍁
"زغرطن زغرطن"
عفاف بإبتسامه؛شن في!؟
نسيبه بضحكه فرح؛خليل صفاهم كلهم.
تهاني :الله!
نسيبه؛وبمعدل..
صالحه ماعندهاش الروح مع الزغاريد..قعدت تزغرد...
وعفاف قعدت تزغرد معاها...
🍁🍁🍁🍁🍁
"خشي"
فاتح:صفيتوا...
زياد؛بإكتساح...
المساجين اللي معاهم قعدوا يباركولهم...
وخليل في عز فرحته خطر عليه بوه..غصت ابتسامته....
بس حاول يحافظ عليها على قد مايقدر...
فاتح؛الزردة المرة هادي ع حسابي ياعيله..
كلهم صاحوا وصفقوا وقعدوا يقولوا..
"نوارة يافاتح...منور"
وفاتح يحط في يده ع راسه..بمعنى ع راسي...
🍁🍁🍁🍁
"وتقبل الموضوع عادي؟"
احسان؛لا..لكن ماناقشنيش بكل..
هيثم؛خاف منها ردة الفعل هادي الكبت مش باهي لولد في سنه..
احسان؛شرحت لرنيم الوضع وقالت خليه عليا اني تونعرف نتصرف معاه..
هيثم؛تتكلم بثقه!
احسان؛عندها ولد اختها قريب من عمره هي قريبه منه ونفهم عليه قالت نحس في روحي نقدر نتفاهم معاه..
هيثم هز راسه وقال؛ان شاء الله ويصير كل شي زي ماانت تبي..
احسان؛ان شاء الله...ايه وانت قول مافيش جديد..
هيثم؛سارة بإذن الله عقد قرانها بعد اسبوعين..
احسان؛بالله عليك! مش قايلي ع الموضوع هدا من قبل مايصير وخديت رايي فيه!
هيثم؛قصدت نقولك هدا جديدي بس..
احسان؛شوف لف ودور واهرب من الاجابه سيورك تجي وتحكي..
هيثم؛خيرك فيك حاجه اليوم..ضارباتك الشمس!؟
احسان ضحكه ودار حركه بيده ع فمه..وكأنه سرته..
هيثم؛احسن شي..ورفع فنجان القهوة ورشف منه...
🍁🍁🍁🍁
دق باب المكتب...
نوال:تفضل..
انفتح وخشت السكرتيرة وهي تقول.
:استاذه نوال هادي قائمه بإسماء الطلبه الأوائل من ضمنهم البنت اللي طلبتي معلومات عنها مريم..
نوال قعدت تشوف للأسماء بعدين هزت راسهاوقالت؛شكرا تقدري تمشي..
السكرتيره مشت طلعت..
ونوال مازالت تشوف لإسم مريم في الورقه وتذكر في قصتها اللي اثرت فيها هلبه وخلتها تفكر فيها ديما...
تفكر كيف تقدر تساعدها بس تتخطى الي صار معاها وترجع ثقتها في نفسها بعد كل اللي صار معاها واللي مرت بيه...
🍁🍁🍁🍁
في الطريق..
يسوق وملامح وجهه متجهمه وهو يسمع في حديث امه ومرته..ويتمنى لو يقدر يحدف روحه من السيارة...
جيهان؛خدينالها كل شي بإذن الله حنديروه بيان كبير..
عيشه:الله يبارك الله يبارك..بس يعني العرس قريب علاش دوشة هالبيان..
جيهان؛ماهو العرس في الشتي ان شاء الله وحني وين والشتي وين..
عيشه هزت راسها وقالت:صح مازال بعيد..بعدين شبحت لولدها وقالت..بش تحلق هاللحيه ماتحضرش فاتحه نسيبك بهالمنظر..
جمعه؛مانبيش نحلقها بنريبها لين يعشش في الحمام..
جيهان تقززت...
عيشه؛شن مالا التزمت؟
جمعه؛لالا بننضم للدوا.عش...
جيهان وامه فنصوا فيه بفجعه...
جمعه؛خاطري نفجر روحي بحزام ناسف في مجمع..
عيشه؛كان تقولي خيرك شن جاك بس..
جمعه؛مسحور...مادورنيش ..
جيهان في نفسها"قد مايعطي باللطف"
عيشه تنهدت وقالت؛مانستغربش اللي مايخافوش ربي مافيش اكثر منهم فهالبلاد..الله يكفيكم شرها..
جيهان؛من هي عمتي؟
عيشه وهي تحاول تخفي ارتباكها:العين اللي لاحقتكم بشرها.
رفعت جيهان حاجبها وقالت؛اهااا..
🍀🍀🍀🍀🍀
بعد مرور يومين...
تلوحت الفراش متاعها وقالت؛واخيرا كملت...
رتاج وهي ترقد في ولدها؛امتياز ان شاء الله..
دانيه؛ بإذن الله..
رتاج؛اليوم ارقدي وتريحي..ومن غدوة ان شاء الله بنطلعوا ناخدوا قفطان..وباقي حاجات البيان..
دانيه؛تذكري رتوجه..كنا نحلموا نديروا في عراسنا في صاله..ونضحكوا ع ارواحنا وين نذكروا من يكون بونا..ونقولوا كثر خيرها كان نصبلنا خيمه فوق السطح..
رتاج؛واهو توا بديري بيانك في الصاله..
دانيه تنهدت وهي تمرر في نظرها ع السقف وتقول؛مرات نحس في روحي نحلم مش مصدقه اللي قاعد يصير معاي...
رتاج؛قولي ماشاء الله ومعاش تحسدي روحك..واحمدي ربك ليل نهار..
دانيه ابتسمت وقالت:الحمد لله...لكن تعرفي شن اكثر شي حلو في القصه ان فاتحتي وفاتحه خوي في نفس اليوم..
رتاج بإبتسامه:الله يبارك الله يبارك ربي يكملنا ع خير...
دانيه؛آمين..
🍀🍀🍀🍀🍀
وتمر الايام..
وموعد عقد القران قرب...
ودانيه طلعت مع رتاج بش ياخدوا اللي لازمهم...
شرت قفطان كبير...وكندره..وطقم فضه..وطبعا كل شي من رتاج ...وحجزوا في كل شي حار وحلو وغيره...
🍁ومن جهة تانيه...كانوا اهل راجح يجهزوا في انفسهم ويتتموا ع امور البيان وعقد القران اللي حيندار في الصاله حتى هو...
وراجح كان بين خدمته وبين هالتجهيزات..وفي داخله فرحه وحماس رهبين..
••داوود؛وضعك يخلي الواحد يديرها ويخطب اليوم..
راجح وهو يفتح في باب سيارته؛كان ناوي ديرها طول..اضرب الحديد وهو حامي..وركب السيارة
ضحك داوود وركب معاه...
وتحركوا برا المديريه....
☘☘☘☘☘☘☘☘☘☘☘☘☘☘☘☘
يوم عقد القران ...
الساعه العاشرة صباحا...
في سجن بوسليم...
في مكان خدمة اواني الفخار..
وفاتح مع مراد ومجموعه من المساجين يخدموا..
خش عليهم زياد وهو مبتسم وقعمز..
مراد؛شكله في اخبار حلوة..
زياد بإبتسامه؛حلوة وضايق في نفس الوقت..
فاتح؛لغز شكله..!
زياد بضحكه؛اليوم عقد قران اختي...
وجه فاتح تغير..وقلبه وكأنه وقف عن النبض..
انطفي مرة وحده..
مراد يدوب شبحله بعدين شبح لزياد وقال بإبتسامه مجامله؛مبارك ان شاء الله..ربي يتمم ع خير. زياد؛ان شاء الله..
مراد؛اكيد اللي مضايقك انك ماتقدرش تحضر..
زياد هز راسه وقال؛يللا مش مشكله..ان شاء الله في الفرح يسمحولي..
مراد؛ان شاء الله..بعدين شبح لفاتح لقاه يخدم بعنف..فاتح تفسد هكي..طلق فاتح اللي في يده وناض وهويقول..كملها عني..
ومشي طلع من حداهم..
وزياد معاه بعيونه وهو مستغرب:-خيره شن جاه توا كان جوه عادي..
مراد؛تصير التقلبات في المزاج عادي..حتى الجو ليه دور.
زباد؛صح الصيف يتعب النفسيه...ورجع يخدم..
ومراد حتى هو قعد يخدم ويفكر في فاتح شن صار فيه وشن دار...
🍁ايه..كالعاده..
طلع يجري في الساحه...
يجري ويجري..وهي بين عيونها...
كل مايشوفها ترسخ تفاصيلها في عقله اكثر.
يزيد يحبها اكثر..يتعلق قلبه بيها اكثر..
كم مرة شافها فاتح من اول ماعرفها..
اربعه مرات بس....وفي خياله كان يشوف فيها كل يوم...
ولأنها كانت مميزة ماتشبهش قريناتها في كل شي...
قدرت تسلب عقله وتاخد قلبه...
بس مادامها لغيره شن بيدير..!؟
ماعنده مايدير غير انه يصبر يصبر..وبس...لين ينسى..
هدا اذا كان يبي ينسى...
🍁🍁🍁🍁🍁
الساعه الثانيه عشر ظهرا...
في مركز تجميل مشهور..
كانت دانيه بين ايدين الميكب ارتست..
وهي باديه تتفنن فيها..وتوصف في جمالها وتتغزل بيه..
ومعنويات دانيه تزيد ترتفع اكثر وفرحتها تزيد..
وفي الحوش...
سدينه وهي دير فالسواك:والله ياوخيتي مانعرف امتى تكمل..
مقبوله؛ماعلينا..المهم ماتنسوناش من العشي..
سدينه:بيجيبولكم هني قبل الكل تريحي..
تنهدت مقبوله وهي تشوفلها شن دير وقالت؛غير من مازال فيه يدير في السواك بس صدق مجيد وين قال تقول قاعد مع حناي...
ولفت ومشت وخلتها وهي مصدومه في اللي سمعاته...
كانت حتبكي...بس بعدين شدت روحها وقالت؛والله مافي واحد مخرب عليا بوليدي وبنيتي...طز فيك انتي وياه...ياحيزبونه ع قولتهم...
🍁🍁🍁🍁
الساعه الخامسه تماما قبل العصر...
وصل هيثم ومعاه ولد خاله سليم...ووراهم الاشهب راجل ماجده للجامع اللي بيصير فيه عقد القران..
وكان موجود في نفس الجامع....
راجح وبوه وخوته وبعض من رجالة العيله..
ومجاهد وبوه ورشيد ومجموعه من الأقارب..
الجامع كان معبي...
بعد السلام...وشويه هدرزة...
جي وقت آذان صلاة العصر...
بعده مباشرة اقيمت الصلاة...
وبعد صلاة العصر...بدت مراسم عقد القران...
الاول كان مجاهد...
وكيله كان بوه...
حط يده في يده هيثم وبدي الشيخ يتكلم ومجيد يرد وراه...
بعدين...بدي هيثم هو اللي يردوا وراه..
وبعدها قعد الشيخ يدعي...
بارك الله لهما وبارك عليهما وجمع بينهما في خير..
••••••••
واقفين كلهم يشبحوله كيف يقص في اللحم بعصبيه..
وبدون ماينتبه قص صبعه..
التموا عليه وجابوله الاسعافات..
فاتح وع وجهه ملامح الوجع؛مافي شي مافي شي حاجه بسيطه...
فعلا الجرح هدا حاجه بسيطه جدا وماتسواش قدام اللي صاير فيك من داخل يافاتح...
••••••••
فهالوقت...
بدي الشيخ بمراسم عقد قران دانيه وراجح..
وجمعه تمنى لو ماعاشش هاللحظه وعذابها..
كانت قاسيه جدا عليه...
بالذات وين حط مجيد يده في يد عثمان اب راجح..
ولما انذكر اسم دانيه..قلبه انقسم نصين...
ويااه مااصعب اللي حس بيه لما سمع الشيخ يدعي...
"بارك الله لهما وبارك عليهما وجمع بينهما في خير.."
خلاص توا..تمت..
ودانيه ولت في ذمة راجح...
🍁بعد ماانتهي عقد القران..
وبعد تهاني والمباركات...
راجح ومجاهد مع جماعتهم توكلوا للشارع اللي ساكنين فيه عيت مجيد..بس يحتفلوا غادي مع بعض بالنوبه..
اما هيثم..
طلع هو واقاربه وتوجهوا لحوشه....
🌼🌼🌼🌼🌼
رتاج وهي تمشي في الشقه اللي كانت مزحومه بالجيران..
كانت تكلم في دانيه بالتليفون..
رتاج؛شويه ونمشوا للصاله..
"باهي اني من بيرفعني للصاله"
رتاج؛مجاهد غير راجي لين يروحوا قبل..
فجأة سمعت صوت كلاكسات..
رتاج؛شكلهم جو سكري سكري خل نكلمكم انتي و مرت خوك فيديو
"تمام..هي"
🌼🌼🌼🌼🌼
"مبارك عليك وربي يسعدك ويهنيك"
سارة؛تسلمي نرجوسه والفال ليك..
نرجس بضحكه؛قريب خلاص..
نسيبه:ع خير يارب..
نرجس ونوال؛آمين...
فجأة رن تليفون سارة..
كانت مكالمه فيديو من رتاج ومعاها فيها دانيه ع قروبهم..
ضحكت وفتحت ...
سارة بذهول:الله يبارك عليك دنو..
رتاج
"تجلطي يابنت ماشاء الله"
نسيبه:تبارك الرحمن مبارك عليك دنو..
"الله يبارك فيك ابله نوسه"
ماجده؛مصلي ع النبي عليك يادنو طالعة زي الغزال..
"عيونك الحلوة ابله ماجده"
رتاج
"شن حالكم ياعيله."
ماجده ونسيبه؛الحمدلله...شن حالكم انتم..
رتاج؛الحمدلله..اهو حسها بدت النوبه..
سارة:هي حطي عليهم حطي..
رتاج مشت وقفت في الروشن وبدت تصور...
كانت النوبه تضرب..
والشباب بدوا يغنوا معاها..
وراجح ومجاهد اللي كانوا لابسين عربي..
مجاهد الكاط الطويل لونه عسلي...
وراجح حتى هو كاط طويل لونه رمادي..طلتهم مهيبه وجذابه..
الزوز واقفين يقصفقوا ويتفرجوا ع الفرقه مع الشباب اللي يهيجوا عليها
ورتاج تقرب عليهم في التصوير..
وزوجاتهم يتأملوا فيهم بحب وكل وحده فيهم فرحتها اكبر من التانيه
شويه ودخلوا العرسان في الوسط رتاج؛بيرقصوهم..
دانيه وسارة:اممم..ايه...
وبدوا راجح ومجاهد يرقصوا مع بعض..
والكل يتفرجوا بإبستمتاع ع الأجواء الحلوة...
رتاج:ريتي دنون مجاهد طلع يعرف يرقص..
دانيه بضحكه..
"مايطلع منه"
وسارة تتأمل فيه وهي مبتسمه بحب..
ونوال مركزة عليها وخاطر عليها ولدها وقلبها واجعها عليه..
ماجده؛الله يبارك عليهم ربي يحفظهم..
وشويه ووقفوا رقيص..
وقفوا حدا بعض وهما يصفقوا..
رتاج؛الله يبارك الله يبارك...
والشباب يغنوا...
"يامحلا الدنيا لما تبي تجمع بينهم"
غزيل وغزاله دارو الصح وربي يعينهم"
وسكتوا كلهم فجأه...
اسكتهم صوت الرصاص...
....اللي عقبه....
سقوط العرسان الزوز في لحظه وحده ع الأرض...
رتاج صرخت بأعلى صوتها...وطلقت تليفونها اللي طاح من فوق..
وطلعت تجري وهي تعيط بأعلى صوتها...
الناس كلهم انفجعوا..
امها...مقبوله اللي جو يجروا..
سدينه بفجعه؛خيرك!..
ورتاج ماتسمع في شي قاعده تعيط وتجري ولين فتحت باب الشقه وطلعت....
🍁هالمشهد اللي صار...
شافوه اللي كانوا يتفرجوا معاهم وانفجعوا..
سارة وهي ترعش؛شن صار...شن هدا اللي شفته..
ونسيبه وماجده جامدات في مكانهم مش قادرات يديروا اي ردة فعل..
سارة وهي ترعش بكل مافيها عاودت اتصلت برتاج...
عطاه مقفل..
سارة دموعها نزلوا وهي تقول بصوت يرجف؛خل نكلم دانيه..تقولي شن هدا!؟
نوال ونرجس ماكانوا فاهمين شي..
مفجوعين من ردود افعالهم وبس ومش قادرين يسألوا..
سارة بإنفعال؛ردي ردي ردي ...عيطت وهي تقول..ردي...
نسيبه ودموعها ينزلوا؛سارة...!.
سارة بجنون:عمتي انتي قوليلي شن صار شن هدا اللي شفته شن شفت اني شن صار..صوت رصاص وهما طاحوا....خالتي ماجده..هكي صار ولا قولي...تكلمي..
وماجده في عالم تاني...
سارة بعياط؛تكلموا قولوا فهموني ياناس شن صارله مجاهد شن صارله..
ومشت تجري للباب وهي تنادي؛بابا...
ونسيبه ناضت وراها..
وخواتها طلعوا من دارهم وهما مفجعوعات..
🍁وسارة طالعه تجري وتنادي...
"بابا"
هيثم في هاللحظه درس بالسيارة قدام الباب..
سمع صوت سارة تعيط..
نزل يجري..
فتح الباب وخش..
سارة لما شافته قعدت تقول بعياط وهي تبكي:بابا..
هيثم وهو مفجوع؛شن في؟!
وهي جاته تجري خشت في حضنه وهي وشدت في صدره وهي ترعش مع بعضها وتقول..
بابا بابا..موت...مات..بابا...
وهيثم يضم فيها وهو مش فاهم شي..
يشبح لنسيبه لقاها واقفه تبكي..
وبنته في حضنه ترعش مع بعضها وهي تبكي..
وتقول..موت..موت...مرة تانيه...موت.....
وبألم شديد قالت:بابا...
وهيثم من كثر ماوجعاته بنته..عينه دمعت وهو مازال مش عارف شي من اللي صار...
▪▪▪▪▪
◇ سارة بنتي ودانيه صاحبتها في هداكا اليوم انسرقت احلامهم...ودمروا...
فهداكا اليوم اللي ماتوا مش مجاهد وراجح بس..مات كل من يحبهم ...مات كل من يشوف فيهم بيهم في الدنيا..طفوا نور عيونهم...ابشع يوم هداكا اليوم مانحبش نتفكره..
~~~~~~~
♡اللي قتل مجاهد فهداكا اليوم قتل فيا كل حاجه حلوة..خلاني من بعد هداكا اليوم جثه عايشه بين الاحياء...
وانسانه خاليه من المشاعر....
~~~~~
#فرحتنا_وحده
#البطل_المغمور2
.....يتبع....
