#البطل_المغمور2 "زهور القمر"
#جمان_فريد
#الجزء_التاسع_عشر "آلام الآثام4"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐
اهل الشارع كلهم..
كالعاده يشهدوا ع فضايح حوش خالد ومصايبهم..
اللي واقف في الروشن واللي فم الباب..
واللي واقف في بالكونه..
زي سارة وخالتها ماجده..
كانوا يشوفوا في الشرطه كيف مطلعه رفيق وهو مكلبش..
كان يمشي معاهم مستسلم...
وهو ماشي رفع عيونه وشاف لحوش هيثم..
عيونه جو في عيون سارة..نظرتها ليه كانت هي هي نفس النظره..نظره كره وإزدراء...
واحد من عناصر الشرطه نزله راسه بالغصب ودخله في السيارة..
وركبوا معاهم وتحركوا طول..
ماجده:زعمه شن داير من خارقه هو التاني..
سارة بإزدراء؛عنده الحق بابا لما قطع علاقته بيهم..غير عمتي ربي يهديها وخلاص مش عارفه مصلحتها..
ومشت خشت داخل...
ماجده شبحت حوش خالد بضيق..
كانت متمنيه لو تقدر بنت اختها من غادي....
تنهدت بضيق..ولفت وخشت داخل وسكرت البالكونه...
🍁وفي حوش خالد..
كانت الصدمه مخيمه ع كل اهله...
اولهم تهاني اللي حبست روحها في دارها...
ماكانتش تبكي...كانت مصدومه...تتفكر في كلام خوها عن بوها ومازال مش مستوعبه..
هي كانت حاسه ان سماح حاطه عينها ع بوها وتحاول تتقربله وتشوف في بوها ع طول يصد فيها..
بس اللي عرفاته توا خلاها مش بس تكره بوها...لا
تكره حظها اللي خلاها بنت لراجل زي هدا وعيلة زي هادي ع حسب ماهي فاهمه وقتها..
انما الحكاية اقدار من عند الله وليه حكمه في كل امر مرات ندركوها ومرات تكون اكبر من ادراك عقولنا المحدود..
وحال امها...
ماكانش يشبه حالها...عفاف ماكانتش مصدومه..
عفاف اللي مقعمزة في الجنان بروحها ومش حاسه ببروده الجو..
كانت متحسرة ع نفسها حسرة كبيره...متحسرة ومقهورة...
فوقها بالزبط...
كانت مريم مقعمز ع سريرها في دار النوم وهي تبكي..
تذكر في كلام رفيق وتبكي...واكثر شي وجعها جهاد اللي صدمته كانت كبيره في بوه كبيره هلبه...
جهاد اللي كان مقعمز تحت المظله اللي فوق السطوح..
حاط راسه بين ايديه وهو غارق في صدمته..
وكلام خوه قاعد يتردد في وذنه..ويقول في نفسه..
معقوله لهالدرجه حني ناس "مسخه"...!
وهني كان يقصد نفسه وخوته وبوه....
بوه..الأصل اللي هما كان فروعه...
وفي وسط هالحاله اللي كانوا عايشينها اهل هالحوش..
كانت نسيبه في الكوجينه تتكلم بالتليفون
نسيبه:الحمد لله كلنا كويسين ماتخمم في شي..
"الحمد لله..ترا بالله نواستي عطيني امي فيسع يتم الوقت"
نسيبه مشت بسرعه طلعت من باب الكوجينه وهي تقول؛هيا هي..
جت لعفاف وقالت؛هاك خليل..
عفاف شبحت لنسيبه..
نسيبه بتوسل قالت هامسه:كلميه..
عفاف بدت انفاسها تتسارع خدت التليفون وردت بصوت مخنوق:آلو..
"امي..يام...استاحشتك ياقلبي"
نزلوا دموع عفاف وهي تقول:واني اكثر ولدي.مستاحشاتك وفاقداتك هلبه هلبه..علاش درت فيا هكي ياولدي قولي..
جاها صوته وهو يتكلم بسرعه بنبرة مرتجفه
"امي خليني في بالك كيف ماخليتك يام خليل هداكا يام اللي فرحتي بيه وين جي للطريق...يام خليتي في عقلك خليل هداكا يام ارجوك..وادعيلي ادعي ربي يقوي ظهري ادعي هالدعوة بس يام...
وانقطعت المكالمه..
عفاف ودموعها سيل؛ايوه خليل..خليل الو..
نسيبه بحزن:شكله الوقت تم..
عفاف شبحتلها بعدين مدتلها التليفون وقالت:قالي كلام مافهمتاش..
خدت نسيبه التليفون وقعمزت قدامها وهي تقول؛كلام شني!؟
شبحتلها شويه بعدين قالت؛في حاجه مدرقينها انتي وياه..مالا علاش انتي متريحه هكي..وعلاش هو يقولي خليني في عقلك خليل اللي فرحتي بيه وين جي للطريق شن قصده..
نسيبه شدت يد عفاف وقالت؛اسمعي كلامه وصدقيه..ولدك مادار شي ينزل راسك...
عفاف شدت ع يد نسيبه وقالت؛قوليلي يانسيبه شن في وبردي قلبي المحروق...
نسيبه خدت نفس وقربتلها وقالت؛ولدك يدير في خير مش اي حد يقدر يديره...انتي بس ادعيله ياعمتي..
عفاف قعدت تشبحلها شويه وبدت ترتسم ع وجهها ابتسامه وقالت:قصدك خليل..
قاطعتها وهي تشد ع يدها وتقول:ايه ايه...بس لازم الشي هدا مايطلعش لحد حتى بينك وبين نفسك ماتدويش بيه..ومهما سمعتي وريتي ياعمتي تقعدي ساكته..روح خليل مربوطه بالسر هدا لو طلع اول مايضيع هو..
حطت عفاف يدها ع فمها بعدين قالت؛نموت ولاتطلع مني كلمه...بعدين قعدت تضحك...وحضنت نسيبه وهي مازال تضحك بدون ماتقول كلمه..
ونسيبه ضمتها وهي مبتسمه..وفرحانه انه دخلت شي من السرور ع قلب ام ياما تلقى من ضربات خيبه في ولادها..
🍁🍁🍁🍁
"وليلي بعد اسبوع"
خدي الوصفه وقال؛الدواء موجود هني دكتور
هيثم بإبتسامه؛واحد منهم موجود هني..
هز راسه وقال:تمام..السلام عليكم..
هيثم؛وعليكم السلام..
بعد طلع..مشي الممرض ينادي الحاله اللي بعدها..
شويه خش واحد قال:السلام عليكم...
قعمز قدام هيثم ع الكرسي..
هيثم؛وعليكم السلام...كيف الحال...
شبح للممرض وقال؛معليشي دكتور نبي نشرحلك حالتي بيني وبينك..
هيثم هز راسه وقال:حاضر..وشبح للممرض وقال..لوسمحت..وابتسم..
الممرض:حاضر دكتور..ومشي طلع من الحجره..
بعد ماسكر الباب...
طلع ورقه وحطها قدام هيثم وقال؛ يبي يشوفك في المكان هدا اليوم..
هيثم عقد حواجبه وخدي الورقه وشافلها وهو يقول:صاير شي..
:ماعنديش معلومه طلب منك تجي للمكان هدا وضروري..
هيثم شبحله وقال؛تمام تمام..
جي بيطلع قاله:خليك مايجيش تطلع بسرعه هكي..
ضحك بإحراج وقعد ساكت..
ناض هيثم وهو مبتسم قال:تعالى نديرلك فحص روتيني بش مايريحش حق الكشف ع الفاضي..
ضحك وقال:باهي..
••وكشف عليه هيثم بعدين قاله؛مدخن انت؟
:ايه..
هيثم؛شره..
ابتسم بإحراج وقال:نفشوا في غلنا من ورا هالخدمه..
هيثم؛عارف خدمتكم صعبه لكن ماتخلوهاش تولي ع الصحه..بش وين تجوا تتقاعدوا تعيشوا حياتكم براحه ماتكملوهاش مشي جي ع المستشفيات..
:ان شاء الله خير..
هيثم ابتسم وقال؛إن شاء الله ان شاء الله..حاول تبعد ع الدخان وتبدله بحاجه تانيه...زي المستكه "العلكه"في نوع يخصكم المدخنين تلقاه متوفر في الصيدليات..
:تو نشوفه ان شاء الله..
هيثم؛باين عليك مستعجل مانبيش نعطلك اكثر من هكي..
تفضل..
ابتسم وقال؛كلامك في عقلي مش ناسيه..
ضحك هيثم..
:بارك الله فيك الدكتور..السلام عليكم..ومشي طلع..
هيثم بعد مارد عليه السلام ولى للمكتب خدي الورقه قعد يشوفلها..
ع خشة الممرض..
هيثم حط الورقه في الشنطه وقال:قداش مازال في حاله؟
:زوز دكتور..
هز هيثم راسه وقعمز..
🍁🍁🍁🍁🍁
"معترف يعني"
رفيق ببرود؛وعلاش بننكر بالعكس فرحان باللي درته..
الضابط؛كان ماتت اعدام راهو..
رفيق؛ولا فارقه معاي..
عقد الضابط حواجبه وقال:طبيعي انت..
رفيق ضحك وقال؛لا صوبات..
الضابط هز راسه بعدين نادى ع العنصر ..
خشله..
الضابط؛شكله مخمور..نزلوه لوطا وخلوه بروحه..
:حاضر سيدي..
قدم العنصر لرفيق وخداه..
رفيق ابتسم بتهكم ومشي مع العنصر للحجز اللي يخص المركز...
🍁بينما سجى مازال في المستشفى تحت العمليات بعد صارلها نزيف داخلي...
واهلها كلهم غادي..وخوتها اللي قالولهم الناس ع اللي شافوه فهموا ان اختهم دايرة مصيبه بالذات ماعرفوا انها طالعه لمكان تاني غير اللي قالتلهم عليه..بس قعدوا ملتزمين الصمت لين يشوفوا شن بيصير فيها...
🍁🍁🍁🍁
درس سيارته قدام احد الفنادق الكبيرة في العاصمه..
نزل منها وخش للفندق....
وتوجه لوحده من الغرف..
لما وصل فيها دق الباب...
لحظات وانفتح..
بإبتسامه قال؛تفضل دكتور..
هيثم:السلام عليكم..وخش..
رد عليه وقال؛وعليكم السلام..وسكر الباب..كيف الحال دكتور..
هيثم ؛الحمد لله..
هو قاله؛تفضل خش تفضل..
ومشوا الزوز خشوا داخل...قعمزه ع كرسي كنبه وهو قعمز ع الكنبه حداه ..
هيثم؛شن صاير ان شاء الله خير!.
تنهد وقال؛الجمعه اللي فاتت نوال فتحي زارت فاتح ولدها في الحبس..
عقد هيثم حواجبه وهو يسمع..
وهو تابع يقول:وقت الزيارة كان في واحد اسعد الكبير واحد من اكبر تجار المخدرات مقبوض عليه من حوالي 3سنوات تقريبا ومحكوم مؤبد..الشخص هدا وقت شافاته نوال عرفاته ..
هيثم؛تعرفه؟!
هو رد يقول؛ع حسب ماقال ولدها فاتح لخليل قال هي قالت كان يجي لزوجها السابق ايام كان ضابط شرطه..
هيثم:لحظه لحظه..تقصد تاجر المخدرات هدا كان ضابط شرطه؟
قاله؛ايه الكلام هدا من عشرين سنه فاتت تقدر تقول كان خاين ومتعاون مع مافيا مخدرات كبيرة هي نفسها اللي خدموا معاهم خالد وولده خليل..وطبعا لما انكشف واللي كشفه واحد من الضباط قتله وهرب فتره برا البلاد وبعدين رجع يمارس في نشاطه هني وولى الذراع اليمين لكبير المافيا هادي...
هيثم وهو يفكر قال متسائل يبيه يكمل:تمام ؟
هو قاله؛زي ماتعرف طليق نوال رجل اعمال معروف وسابقا كان رجل دوله في الفترة اللي كان فيها اسعد في سلك الشرطه..
هيثم؛تبي تقول ان ليه يد..
ابتسم وقال؛بنسبه 90%..لما دورنا وراه لقيناه بعد ماطلق مرته قسم الورث بين صغاره وهو حي..وهاجر برا البلاد والحاجه هادي حطينا تحتها الف خط...
هيثم قعد ساكت وهو يفكر...
هو شبحله شويه وقال؛ع حسب مانعرفوا ان في معرفه بينك وبين نوال فتحي..
هيثم شبحله..
ضحك وقاله؛يعني من المركز اللي كان ولدها احد نزلائه للبزار اللي هي داراته وانت مشيت زرته لأختك اللي تخدم مدرسه في مدرسة هي صاحبتها..
ضيق هيثم عيونه وقال؛راجح قول اللي عندك طول..
ابتسم راجح وقال؛نبوك تجس النبض..تحاول تفتح معاها الموضوع بدون تعمق في التفاصيل تفهم منها لو هي عندها علم بشي اولا..
هيثم؛علم بشني يعني زي شني؟!
راجح:لو راجلها عنده انشطة مشبوهه شي زي هدا حتى لو ماصرحتش بيه يبان عليها وانت ابو الفراسه دكتور.
هيثم؛هدا شغلكم مش شغلي..
ابتسم راجح وقال؛عارف حني بس نبوا سهلوا الموضوع البدايه منك والباقي علينا..
هيثم غير عيونه عنه وقعد يفكر..
راجح؛طبعا هو طلب مش امر اجباري تعاونك معانا لتوا كله كان بتطوع منك وحني مقدرين الشي هدا ومقدرين تضحيتك..لو ماتبيش ع راحتك حني نلقوا طريقة تانيه بإذن الله..
شبحله شويه بعدين قال؛خلاص تو نتصرف
