البطل المغمور (الجزء الثاني) زهور القمر

تكمله

#تكملة_الجزء_الحادي_والأربعين
ويعدي رمضان..ويجي العيد...
وفي يومه الأول....
كانت سارة كيف طالعه من دارها بعد ماجهزت نفسها بش بتمشي لحوش خالد..غداهم كلهم غادي...
وهي طالعه تلقاها بوها فم الباب..
هيثم بإبتسامه؛بنتي عيدتي ع راجلك؟
سارة تغير لون وجهها وقالت؛لا..
هيثم قعد يشبحلها بعدين قال:وهكي صح في نظرك؟
سارة بتبرير:مش هكي بس مالقيتش فضوة واكيد هو مشغول يعني مش حيلحق يرد..بس حاضر حنتصل بيه توا..
وجت بنخش..شدها من يدها..وهي تشبحله...
هيثم؛فاتح توا زوجك وليه حق عليك الحق هدا عليك حتى من الله سبحانه وتعالى طاعتك ليه واحترامك ليه لله قبل مايكون ليه هو فاهمه بنتي
سارة بضيق ممزوج بالإحراج قالت؛فاهمه...
طلق يدها..
وهي مشت خشت للدار وسكرت الباب..
وهو تنهد بعدين قال؛ربي يهديك ويصلح حالك...
🍁🍁🍁🍁
في مربوعه حوش الاشهب اللي كانت معبيه بالاقارب والاصحاب هو كان موجود..
لاهي بالهدرزة مع الموجودين..يضحك..ويبتسم وجوه يبان حلو..
بس ماحد يعرف باللي فيه من داخل غير المطلع ع القلوب..
وفي عز الهدرزة.
فاتح؛لاماعندكش مشكله امتى تبي تفضل..اهلا وسهلا بيك..
ورن تليفونه..
:خلاص الاسبوعين الجايات ان شاء الله...
فاتح وهو يطلع في التليفون من جيب البدله العربيه قال:ان شاء الله...بعدين شاف للمتصل..
قلبه فر...وقال؛نستأذن..
وناض من مكانه ومشي طلع من حداهم...
وتباعد لمكان فاضي ومستخطي ورد بعد تنهيده عميقه..
فاتح :السلام عليكم..
"وعليكم السلام..كل عام وانت بخير"
هو بإبتسامه؛كل سنة وانتي طيبه...
قعدت ساكته..
فاتح؛عارفك متصله بالسيف عليك وبوك قالك كلميه ولا خوك مش عارف..المهم انه مش من كيفك..وصدقيني اني راضي المهم كلمتيني وسمعت صوتك..
"تمام..السلام عليكم"
ابتسم بأسف وقال؛وعليكم السلام..
وسكرت عليه...
تنهد من قلبه وقال؛تعذبي فيا وتعذبي في روحك الله يسامحك وخلاص...
ورد تليفونه لمكانه ومشي ولى للمربوعه..
🍀🍀🍀🍀
ومن بعد ماعدت ايام العيد..
رجعت الحياة لطبيعتها ...
ورجع كل حد ينشغل بحياته وبمسؤولياته فيها...
سارة فهالايام كانت مفتقده لدانيه هلبه...
دانيه بعد الزواج سافرت شهر العسل ومنه مشت لكندا بش ترتب امورها غادي هي وراجلها..
خلاص كملوا سنة الامتياز..وانتهت سنوات الدراسه..
ودانيه كانت الاولى ع دفعتها وطلعتلها بعثه لكندا...
وراجلها قرر يرجع للبلاد اللي قري فيها التخصص والدكتوراة بش يساند مرته لتحقيق حلمها..
وبهكي دانيه شبه طلعت من حياة سارة برغم ان التواصل قاعد موجود...بس مش زي زمان كانوا الزوز اكثر من خوات ومايتفارقوش لكن حال الدنيا فرقهم...
لكن وجود تهاني مخفف عليها هلبه بالذات بعد مابدوا التخصص..
وكل وحده تخصصت تخصص شكل...
سارة باطنه...
وتهاني جراحه...
في باحة المستشفى...
••سارة:قالتلي بنبدا نحافظ ونرد بالي ونادر بروحه واقف عليا زي الحارس..
تهاني:تتوقعي يجيهم عيل سليم ومايورثش المرض..
سارة؛في احتمال..ونقولوا يارب...ان شاء الله يجيهم سليم معافى .
تهاني:آمين..
فجأة رن تليفون سارة..
شافت المتصل..تأففت بضيق...وتهاني زبطت طول ان المتصل فاتح...
فتحت الخط وردت..
سارة؛السلام عليكم..
"وعليكم السلام..مشغوله"
سارة؛حاليا لا بش شويه تانيه..
"تمام مش معطل عليك...غدوة ان شاء الله عندي لقاء ع قناة المتوسط..البرنامج فيه جمهور في الاستديو واني نبيك تكوني موجوده معاهم...نبيك معاي.."
سارة؛وشن بدير بيا!!؟ لااني شيف ولاطباخه بش ترفعني معاك..
تهاني قعدت تفنص فيها..
"نبيك تكوني لأنك زوجتي وبس"
سارة بملل مصطنع؛باهي باهي تونشوف وتوا بنسكر مشغوله..
وسكرت عليه..
تهاني؛سارة علاش تعاملي فيه هكي عيب عليك..
ناضت ومشت خشت داخل وهي ساكته..
تهاني هزت راسها وقالت؛اهربي اهربي..زيدي اهربي..
🍁وموضوع اللقاء التلفزيوني وصل لزياد..
وزياد وصله لهيثم...وهو ماصدق حصل سارة في وقت فراغها بش كلمها عنه..
••فم باب دارها...
هيثم؛بتمشي بنتي مع راجلك..
سارة بضيق؛بابا غدوة جايه دكتورة اجنبيه للمستشفى مهم جدا نكون في المستشفى...
هيثم بحزم؛عارف..وهي بتقعد اسبوع بحاله تلحقي عليها ان شاء الله..المهم غدوة تكوني مع راجلك..نقطه اخر السطر..
ومشي وخلاها..
وهي زادت ضايقت وخشت لدارها وسكرت الباب...
🍁🍁🍁🍁
وفي بلاد بعيده...
في العاصمه البريطانيه لندن...
مريم بضحكه وتعجب؛انتي مستحيله سيلينا ايعقل هذا...!
:احب المغامرة دائما تكسبك قوة وشجاعه..
مريم؛ولربما تخرجين منها بضرر كبير..
؛يجب تغامري في ماتضمنين يامريم حتى لاتخسري كثيرا..
مريم تنهدت وقعدت ساكته..
؛اوه مريم..مغامرتك قادمه...
مريم شبحتلها بعدين وين تشبح وتفاجئت ع الأخر لما شافت اسيد واقف يشوفلها..فات فوق الشهر على لقائهم الأخير وتوقعت انه صرف النظر بالمرة ونساها....
بلعت ريقها وقعت ساكته...
خدت منها زميلتها القهوة وقالت؛هيا اذهبي..
مريم بخوف؛لاأريد..
:مريم...
شبحتلها..
؛تشجعي هيا...
تنهدت مريم ورجعت شافتله...بعدين ناضت.
:حظا طيبا عزيزتي...
مشت مريم بإتجاه اسيد...
وصلت فيه وقالت؛نعم..
اسيد؛وعليكم السلام..
مريم؛شن في علاش جيت؟!
اسيد بضحكه؛خيرك منفعله هكي..
تنهدت وقالت؛مش منفعله بس حني اتفقنا ولا لاعاد تشوفني ولانشوفك..
اسيد ضيق عيونه وقال؛مانذكرش اني درت deal زي هدا!...
مريم بضيق:من الاخير علاش جيت...
اسيد؛ جيت نسألك سؤال واحد ونبي الرد عليه فوري...
?Would you marry me
مريم اتفاجئت ع الآخر....وماقدرتش ترد بحرف..
اسيد بإبتسامه:you will marry me...
مريم وهي متفاجئه:انت متفكر شن قتلك فهمت عليا شن قلت ولالا؟!
اسيد؛متفكر كويس كويس..وعارف شن قصدتي..ومش مهم عندي..
رفعت حواجبها بتعجب...
اسيد؛ايه ايه..مش مهم...تو اني عندي خوي الكبير متزوج اجنبيه وهي في بلاد مافيهاش قيود وقوانين اخلاقيه بما يكفي...الله اعلم قداش عرفت غيره قبله...وغيره هلبه من اللي تلقيهم مايقبلوش ياخدوا بنت بلادهم لو غلطت في يوم وتابت بعدين وربي تاب عليها ماعندهمش مانع يتزوجوا اجنبيه عارفه قبلهم اشكال والوان...
بالنسبه ليا اني مش حنوقف نهائي عند الشي هدا..لاني عرفتك كويس بما فيه الكفايه...غلطتي وربي سامحك..من نكون اني بش مانسامحش ونعفو يامريم...ولابالك تحسابيني اني ماغلطش في حياتي!؟ مرات انتي ماترضيش بيا مش اني...
مريم قعدت ساكته وهي تشوفله بعيون مليانات دموع...
اسيد؛مريم...ارجوك خلاص حولي الخوف ع تركينه...اني ماينخافش مني راهو..ينخاف عليا بس..وغمز بعينه وهو مبتسم..
هي غمضت عيونها وهي تضحك بعدين نزلت راسها...وفتحت عيونها وقعدت تشوف لايديها اللي كانت تفرك فيهم ببعض..
اسيد؛مريم...
شبحتله وقالت؛مش حتندم...
اسيد بنفاد صبر؛اييياااح علينا عاد..
مريم بضحكه:طلعت ليبي اصل ومفصل..
اسيد بضحكه؛تي هيا عاد...قولي ايه وريحيني..راهو مشغول ومازال في عندي اجتماع وبعده سفر سقديني..
مريم؛ع هكي بتقعد ديما مشغول انت واني نقعد بروحي..
اسيد؛انتي واقفي واني نقعد         لين تملي من وجهي..
مريم بضحكه؛امم...هزت راسها وقالت...موافقه...
اسيد بفرح؛ oh,thank God  واخيرا...تمام معناها توا نرجع نخطبك مرة تانيه..المرة هادي مفروض نبعت امي الاول..ولا نمشي معاها..ولا نمشي اني بعدين هي!؟ لا نمشوا مع بعض...شن رايك انتي!؟..
ومريم تضحك من قلبها..
وهو يتأمل في ضحكتها بإبتسامه طالعه من القلب اللي كانوا مكتوب بعد تصحر مشاعر عاشه وسط سنين عجاف طويله..انه يرتوى بفيض حب من قلب نظيف وطيب...اواب وتائب..محبوب عند ربه...
🍁🍁🍁🍁🍁
تاني يوم...
في كلية الطب..
كانوا سارة وتهاني مع بعض يتموا بعض الإجراءات الخاصه بالإفاده...
بعد ماكملوا طلعوا من الكليه متوجهين للمستشفى...
•••"قصدك مش ماشيه تحضري البرنامج!؟"
سارة:فاضيه غير بيه ..
تهاني؛قصدي سارة مايجيش هو قالك نبيك تكوني معاي..
سارة:وهو عارفني مش حنكون معاه عارفني عندي ماأهم منه ومن اللي يدير فيه..
تهاني:سارة يقعد راجلك حتى لو ماتحبيشي لازم تحترميه..
سارة؛انتي حبيبتي وفري نصايحك هادي لنفسك ولراجلك خليني نصطفل مني ليه هداكا..
تهاني حركت راسها يمين ويسار وسكتت..
سارة؛المهم توا متلهفه تشوفي الدكتورة كاترينا..
تهاني بحماس؛هلبه..نبي نعصرها عصر اليوم بنهبلها بالأسئله..
ساره بضحكه؛زيك..
وقفت فجأة لما جتها رساله..
طلعت تليفونها ولقتها جايه من بوها..
فتحتها..
(ماتنسيش تمشي للقناه البرنامج بعد ربع ساعه)
سارة:اففف..استغفر الله استغفر الله واتوب اليه..
تهاني:خيرك!
سارة؛هدا بابا يبيني نمشي للقناه ع خاطر برنامج التوب شيف فاتح بشر...قالتها تهكما..وبعناد كملت تقول..مانيش ماشيه.. حطت تليفونها صامت ودساته في الشنطه..
وشبحت لتهاني وقالتلها..تسكتي ولاكلمه..
تهاني مطت شواربها القدام بضيق
وساره قالت؛هيا تعالي..
ومشوا الزوز مع بعض لين طلعوا من الكليه...
فجأة ضحكت تهاني وقالت؛لامفر ياسويرة..
سارة شبحت وين ماتشبح انصدمت...بعدين تبدلت ملامح وجهها للغضب وقالت:جابها لروحه...
تهاني:سارة!
وسارة فاتتها ومشتله بغضب..
ولما قربت توصل فيه..
شافت وحده جاته تكلم فيه...
:شيف فاتح كيف حالك..
فاتح بإبتسامه مجامله؛الحمد لله..
:بالله صورة ماما تعزك هلبه هلبه وحتفرح هلبه لما تعرف اني شفتك اليوم..
فاتح هز راسه وقال:تمام..
البنت بدت تصور فيه بتليفونها ..
سارة معاش تحملت مشت ناحيتهم وقالت؛السلام عليكم..
هيا فاتح..
هو شبحلها طول..
صوراته البنت وقالت؛ماجتش مزبوطه..
سارة؛معليشي عزيزتي هو توا مرتبط بموعد شغل مايقدرش يعطل عليه...اسفه جدا..
البنت ابتسمت باسف وقالت؛مش مشكله...
سارة شبحتله وقالت؛هيا..
فاتح ابتسم وقال؛اركبي..
هي مشت طول ركبت...وهو ركب بعدها..
شغل فاتح السيارة وهو يشوفلها وهي تشوف القدام والغيرة باينه في عيونها ووجهها مكتسي باللون الأحمر..
ضحك ضحكة خفيفه بعدين تحرك طول..
وتهاني تتفرج ع السيارة وهي ماشيه وتضحك..
🍁🍁🍁🍁🍁
في دار المعيشة مقعمزين يهدرزوا الام وولدها..
رشيد؛اللهم اجعله خير...
سدينه؛ يارب...حلمت باختك رتاج وكأنها زي زمان هكي لما كانت في الجامعه وتلبس في خمار..وكانها نازله من سيارة كبيره وقعدت تمشي بروحها وزي المهمومه...
بعدين زي اللي جاها واحد وقفلها بسيارته..وقفت تكلم فيه...بعدين مشت السيارة..وهي حولت خمارها وكملت تمشي في الطريق..ولتلها هديكا السيارة مرة تانيه ركبت فيها ومشت...
رشيد قعد يسمع في الحلم وفي قلبه خوف وفي عقله اللي داراته ربيبة اخته..هل ياترى ليه علاقه بالحلم!؟
وهما يهدرزوا في دار المعيشه..
ومجيد واقف بكروسته فم الكوجينه وهو يقول..
مجيد؛عارفك مش متزوجه كانك متزوجه راجلك كيف يخليك24 ساعه هني..
الخدامه؛سيدي مجيد بالله ولي من وين ماجيت مانبيش مشاكل مع المدام..
مجيد؛من هي المدام هادي سدينه اليابسه الشارفه!؟ ااخ بس كاني بصحتي راهو خليتها هي اللي تخدمك.. الخدامه طلعت تجري من الكوجينه...
وهو ينادي ويقول؛غير يالويزة وين ماشيه تعالي هني...ااخ..والله لما نقعد وراك وراك لين نجيبك...
🍁🍁🍁🍁🍁
"هي الناس هكي يافاتح كانت حبت حد مشهور تحسه يعنيها ويخصها وتبي تعرف عنه كل شي"
فاتح؛وهدا الجانب السيء للشهرة يعني اني كامشهور حياتي الشخصيه نفضل انها تكون بعيده كل البعد الناس..مايعرفوش منها الا للي ينفعهم يعرفوه وبس..
الاعلاميه؛حلو....بس اليوم حني بنقصقصوا شويه ع حياتك الشخصيه انت متزوج؟
فاتح بإبتسامه؛ايه..
الاعلاميه؛ماكانتش عندك مشكله في الارتباط بسبب اللي صار معاك في الماضي..
سارة تشوفله ومنسجمه معاه ومع كل كلمه يقول فيها وتراجي في اجابته..
فاتح بإبتسامه؛هي اكبر سبب ودافع ربي دارهولي بش نحب الحياة ونحب نرجع نعيشها بشكل تاني..هي كانت اكبر حافز ليا بش شقيت طريقي وبنيت نفسي ودرت فاتح اللي اني عليه اليوم...اكثر انسانه تعطي طاقه ايجابيه في الدنيا هادي واني اكثر عباد الله حظا اللي خلاها من نصيبي..
صفق الجمهور الموجود في الاستديو..
والاعلاميه قالت وهي مبتسمه؛معانا هني ع فكره هيا..
حطوا اللقطه ع سارة وفاتح.شافها من الشاشه..
كانت منزله راسها وتبان وكأنها تبكي..ولما سمعت الاعلاميه تتكلم عنها رفعت راسها وشبحتلهم وابتسمت من بين دموعها...
ورجعوا صفقوا مرة تانيه..
وهو يشوفلها من الشاشه بنظرات كلها حب...
••••••••••••••
في الطريق..
فاتح؛الحلقه تنعرض يوم الخميس..
سارة وهي تشوف القدام؛انت هدا علاش جبتني ع بالك الحركات هادي ممكن تخليني نتقبلك..
ضحك وقال:ابدا والله..جبتك معاي لأنك مرتي حبيبتي واني نبي مرتي حبيبتي معاي في كل شي..
قعدت ساكته وقلبها يدق بقوة..
بدت تحس في مشاعره موليه اقوى منها وخايفه تنهار قدامه في اي لحظه..
فاتح:شن كان عندك حقه قبل مانجيك..
سارة؛كنت نكمل في اجراءات ليها علاقه بالايفاد..
فاتح؛معناها توا نرفعك للمستشفى..
سارة؛مستشفى شني خلاص فات الوقت بفضلك وراحت عليا شوفة اخصائيه قلب امريكيه كبيره...
بضحكه قال؛عمي قالي مازال بتقعد اسبوع القدام..
سارة؛عمك مايدرق عليك في شي..
فاتح:حتى اني نسيبه وراجل بنيته..
هي قلبت عيونها وقعد ساكته..
ضحك بعدين قال؛نمشوا للفاتح..
سارة؛لا..
فاتح؛تمام...
وقعدوا ساكتين ...لين وصل للمطعم..
سارة:اني شن قلت..
فاتح شبحلها وقال؛قلتي ايه وهيا انزلي..
ونزل من السياره..
وهي غمضت عيونها بعصبيه..بعدين فتحهم ونزلت من السيارة..وخبطت بابا بقوة..
فاتح حط يده ع قلبه وقال وهو يفنص؛قلبي!
هي شدت ضحكتها ومشت قدامه بسرعه..
هو تبعها بعيونه بنظرات دهشه بعدين قال؛والله ضحكت..
ابتسم بحماس ومشي وراها..
🍁🍁🍁🍁
واقفه في الجنان تراجي في اختها.
شويه خشت وفي يدها غلالة احد النوادي..
ريحان بضحكه؛احسن حاجه في عرفه انه اهلاوي زيي..
جنان وعيونها تعبوا دموع:هو عطهالك؟
ريحان؛بعتها مع خالتي عفاف..ايه سألت عليك واستغربت كيف مش انتي رفعتي حصتهم من البريوش..
جنان وهي شاده دموعها:مش ديما اني مرة اني ومرة انتي..
ولفت ومشت خشت داخل..
وريحان ماانتبهتش عليها منشغله بغلالة الاهلي النادي اللي تحب تشجعه هي وجنان...
🍁مش هما وبس..
حتى لاعب كرة السله المشهور...المثنى احسان..
مقعمز وهو يشرب في العصير:تو تشوفي كان ماطلعناكم بدموعكم نبطل لعب كورة سله..
رنيم؛اها خليك عندك كلمتك..اشهد يابلال ماما اشهدي خالتي سنيه..
سنيه بضحكه؛عطيها سحيقه هالكورة..
بلال؛اني اهلاوي ماما...
المثنى؛ووووه...ياناري قعدت بروحها....
رنيم؛تو نوريك يابلال باهي..
ناض من حداها ومشي قعمز جنب المثنى...
المثنى؛زعيم....
فجاة رن تليفونه..
قامه شاف المتصل فتح الخط وناض يرد..
المثنى؛ايوه رشيد.......تمام جايك في الطريق...سلام..
سكر وقال بصوت؛طالع ياعيله مع رشيد وبنعطل ماتحسبونيش في العشي..
رنيم من الصالون..
"باهي باهي"...
ومشي طلع من الحوش...
🍁🍁🍁🍁
"هدا مكسيكي حار شويه بس طعمته مانحكيلكش.."
سارة؛ماناكلش في حار..
فاتح؛احسن مش ناقصه انتي..
رفعت حاجبها..
هو ابتسم وقال؛السلاطه اللي قدامك فيها فوائد الدنيا كلها كولي وعطيني رايك..
سارة؛كليت منها..ماشي حالها..
هو قعد ياكل بإبتسامه ويشوفلها وهي هاربه بعيونها عنه..
فاتح:اللون الاسود احلى عليك..
هي شبحتله..
فاتح؛اول مرة شفتك فيها كانت بيه هو قداش كنت جميله بالأسود..ومازلتي جميله كيف ماتكوني..
نزلت عيونها وقعدت تشبح للسلاطه وهي ساكته..
فاتح؛نحبك هلبه..
عيونها تعبوا دموع..
فاتح:اقسم بالله نحبك حب مش عارف حتى كيف نوصفه..متحمل منك كل شي من لأني ضعيف ولاماعنديش كرامه...متحمل لإني نعرفك ونعرف داخلك كويس مهما حاولتي درقيه...شوفي الناس كلها تشوف فيك من برا بس اني نشوف فيك من داخل..مهما درتي حنقعد نشوفلك من داخل.. بريئة..طيبه ..حنينه...حساسه..ومش حنشوفك غير هكي..
غيرت عيونها عنه وهي شاده دموعها بقوة وقالت:نوض روح بيا..
ابتسم وقال:حاضر...
وناض هو وياها وطلعوا من المطعم وركبوا السيارة وهما في حالة صمت..
لين وصلها كان يبي الكلام اللي قاله يقعد في بالها اخر كلام تسمع منه ومايقول شي تاني يشوش عليه..
وفعلا..
باقي يومها كانت سارة تفكر فيه وفكلامه...
للحظه اللي جت بترقد فيها...
🍁رقدت...وشافت في منامها...
وكأن اليوم نفسه يوم عقد قرانها ع مجاهد...
والشارع متاع عمارة اهل مجاهد زمان..
والنوبه موجوده فيه وتضرب بس اللي واقف يصفق ماكانش مجاهد..
كان فاتح...
فجأه...
شافاته طاح ع الارض...والدم داير بركه تحته..
☄فاقت مفزوعه....
وقعدت وقت علي ما وعت لنفسها انها كانت تحلم..
قعمزت وقعدت تتعوذ من الشيطان وتقرا في القرآن وهي تمسح ع شعرها وتوخر فيه للخلف...
وهي تقرا...ماقدرتش تتمالك نفسها وقعدت تبكي..
وقلبها مقبوض بقوة من خوفها الشديد...
قعدت بعدها فايقه للفجر...
طلت ع خوتها...بعدين بوها...وبعدها...
مشت قعمزت في الصاله وقعدت سرحانه ودموعها تنزل وهي تتفكر في كلامه ليها...
اللي ع قد ماكان حلو كان مخيف بالنسبه ليها..
🍁🍁🍁🍁
هداكا اليوم قعدت سارة في الحوش مابتش تطلع...
وقضت يومها كله وهي ضم وترتب وقرت خواتها....المهم تشغل نفسها بشي...
بعد العصر...
خاش زياد للحوش وهويدور بعيونه وكان يبان متوتر..
لقاه بوه جاي من داره..
زياد؛سارة وين؟
هيثم:في دارها..علاش شن في..
زياد:فاتح وهو مروح من الزاويه دار حادث..
سارة طلعت من دارها وجت في وذنها كلمة دار حادث تسائلت بخوف؛من اللي دار حادث..
بوها وخوها قعدوا يشبحولها ولا واحد فيهم عرف يقول حاجه..
قدمتلهم وقالت؛مني اللي دار حادث..
هيثم؛بنتي خشي حددلي بدله توا طلعتها..
سارة بدت ترعش وهي تقول؛بابا من اللي دار حادث؟
زياد وهو عاقد حواجبه بضيق قال؛فاتح..
شهقت بصوت عالي..وحطت ايديها ع خدودها..بعدين بدت تقول؛مات..
هيثم قدملها وشدها وقال؛لابابا لا..
سارة بدت بهيستريا تبكي وتقول؛ماتكذبش عليا مات..عرفته بيموت عرفته عرفته..
زياد جاها وهو يقول؛سارة اهدي واسمعيني..
وهي ببكي تقول؛حتى هو مات فاتح مات ..
خواتها طلعوا يجروا من دارهم وهما مفجوعات...
وريحان قالت؛فاتح مات!!؟
وسارة بدت تعيط وتبكي..
هيثم بوجع:لايابابا لا غير اسمعي يابنتي..
زياد؛سارة سارة...ماصارله شي ياسارة رضوض بس..والله ماصارتله حاجه...هاه اسمعي هاه..
واتصل بفاتح المايك..وهي هدت بكي شويه بس عبراتها كانت تطلع ورا بعدها..
وبوها يشوفلها وهو متألم علي حالها..
زياد؛ايوه فاتح..
"هاه زياد..".
زياد:شن امورك توا..
"الحمدلله مافيا شي..سارة يازياد سارة مانبيهاش تعرف"
هي قعدت تسمع فيه ودموعها ينزلوا ورا بعض..
زياد؛تمام مادورش..سلام...
وسكر زياد وهو يشوف لسارة:صدقتي توا!؟؟
سارة خشت في حضن بوها وقعدت تبكي..
وهو يطبطب عليها ويمسح ع ظهرها ويقول بألم:خلاص بنتي خلاص ماصار شي...
وخوتها يشبحولها بنظرات اسف وحزن...
🍀🍀🍀🍀
واللي صار زاد اثبت لسارة ع حسب مايقوللها عقلها ان بعد فاتح عنها احسن شي ليه وليها...
ومن هداكا اليوم تجنبت اللقاء بيه..او الرد ع مكالماته مهما كان سببها..
وتفكر كيف اطلعه من حياته نهائي...
فاتح متمسك بيها مهما دير معاه...
بس في النهايه يقعد راجل..في امور لايمكن يقبلها.
وهي اختارت وحده منهم...
🍁يوم الخميس..
كانت الدكتورة كاترينا موجوده في مستشفى القلب في تاجوراء...
وتاجوراء...ضاحيه من ضواحي طرابلس يعني برا منها..
وفاتح قبل نبه سارة لما تكون عندها مشاوير بعيده هو يرفعها..
بس سارة هالمرة اختارت تمشي بدون ماتعطيه علم..
لكن عطت العلم لخوها وبوها..واضطرت كاذبه تقوللهم انها خبراته..
وفعلا مشت سارة لتاجوراء بدون علمه...
وهي معتمده ع خوها زياد يوصل المعلومه بطريقه او بأخرى..
••في واحد من المقاهي المشهورة..
كانوا مجتمعين مراد..وفاتح...وزياد..
مراد؛فكرة انه يدير صندوق دعم لمشاريع الشباب هي احسن حاجه صارت ع مر تاريخ هالبلاد..
فاتح؛صح يبيهم يتعمدوا ع انفسهم وفي نفس الوقت عجلة التنميه دور بسرعه في البلاد..
زياد؛هدا الصح...حتى المطلقات والارامل اللي بدون عائل مايبيش يخليهم عالة ع حد...وبيدعم مشاريعهم حتى هما  جنب اللي ياخدوا فيه من الدوله..
مراد؛ربي يفتح عليه وعلينا معاه لو استمر هكي البلاد بتشوف خير ع ايديه ماشافتاش من قبل..
فاتح؛ان شاء الله..
رن تليفون زياد شبحله بعدين فتح الخط وقال:ايوه...............وين!!؟..........تمام...تمام...سكري خلاص..
وسكر..
فاتح بقلق؛شن في..
زياد؛الدكتورة وهي مروحه من تاجوراء سيارتها وقفت..
وناض..ناض معاه فاتح وخداه ع تركينه وقال...
فاتح؛سارة!؟
زياد بإستغراب؛ايه سارة..
فاتح سكت شويه وقال؛خليك انت اني ماشيلها..
هز راسه وقال:تمام..غير سقد تلقاها واقفه في *******
فاتح هز راسه ومشي بسرعه وهو معصب..
وزياد معاه بعيونه لين طلع..بعدين حرك راسه يمين ويسار والتفت لمراد ومشي ولى قعمز معاه...
🍁وفاتح يسوق وهو معصب برغم انه مازال تاعب شويه من الحادث..
بس غضبه من سارة نساه اللي هو فيه..
وصل للمكان اللي واقفه فيه شافها..
وهي لما شافت سيارته جايه ابتسمت بألم وين حست انها نجحت في اللي خططتله...
درس السيارة ونزللها وهو يقول بغضب:اركبي السيارة تحركي..
هي بدون ولا كلمه مشت ركبت سيارته..
وهو ركب بعدها...
سارة:كيف بيصير في سيارتي !؟
شبحلها بحده بعدين لبس نظاراته..
وتحرك طول...
وطول الطريق كانت ساكت.. وهي مرة مرة تشبحله..وتشوف للطريق..
لين وصل للباب الخلفي متاع المطعم..
فاتح؛انزلي..
هي نزلت.. وهو نزل بعدها...
ومشالها شدها من يدها..وخش بيها داخل..
وهي تشوف ليدها وقلبها يوجع فيها...
وصل بيها للمطبخ اللي يخصه هو ومايخشله حد غيره..
كان منظره وديكوره حلو  بالمرة..
بعد مادخلها سكر الباب...
هي قعدت واقفه تشوفله..
وهو قعد يشبحلها وهو ساكت..
بعدين قعد يمسح في حواجبه بإيديه...وبعدهم لحيته.. ورجع شافلها قدملها وبكل هدوء قال..
فاتح:التصرف اللي درتيه راضيه عليه؟.
شن الهدوء والثبات هادم!؟
هي ماتبيش هكي...
هي تبكي انفعال ومشكله كبيره ونتيجه تكون انفصال لا رجعة بعده..
بدال ماتستفزه..استفزها وخلاها تقول..
سارة؛ايه راضيه عليه..انت شن اللي مضايقك فيه!؟
استفزاز مقصود..
وهو رد عليه بنفس الاسلوب اللي سأل بيه..
بإبتسامه ونبرة هاديه قال:ماهو يادكتورة يامتعلمه يامثقفه المعروف انه مايجيش تمشي لمكان بدون ماتاخدي اذني..
انتي حتى ماكلفتيش نفسك تعطيني علم وانتي عارفه اني مش حنقولك لا..
زاد استفزها وأثار اعصابها...
سارة بحده:ومش حتقدر تقول لا..ولايطلعلك تقول لا..اني ماشيه نتعلم ونخدم مش ماشيه ندهور ولانلعب..من البدايه عارف روحك واخد دكتورة..دكتورة..مستوعبها انت الحاجه هادي!؟
هو بنفس الهدوء قال:اني قاري فيك فاتحه..يادكتورة..قالها بنفس اسلوبها بعدين ابتسم وقال..يعني راجلك وليا حق عليك حتى لو كنتي قاعده في حوش بوك..
استفزني...واني نزيد نستفزك...وخلاها وصلت لأقصى مراحل الاستفزاز...
ابتسمت بتهكم وقالت:وانت عاد صدقت روحك لما اني رضيت بيك وخديتك..ضيقت عيونها وقالت..نعطيك معلومه غلطت لما درقتها عليك..اني رضيت بيك تحدي في بابا بس...
وللاسف تحديته وندمت..كان هدا انت شن جابك ليا!!؟ شن تفهم في الدنيا والحياة هادي..ولاشن هي المسؤوليه اللي تقدر تتحملها..نص حياتك الاول راح في الصياعه والاستهتار وبعدين في الحبس...ولما طلعت ماقدرت دير شي في حياتك غير انك تولي طباخ...قارن نفسك بيا قارن...حتلقاني واحد صحيح وراه هلبه اصفار...لكن انت...صفر ع الشمال...
بعد هالكلام خلاص..مفروض كل شي ينتهي..
حرقت سارة كرت اخر محاولاتها ابعاد فاتح عنها..
كلام بعد هالكلام لايمكن يتحمله ولايقبله ع نفسه..
بس هو رسم ع وجهه ابتسامه حب صادقه..وبنظره عيون تغزل في الحب غزل قال...وبرضو نحبك ونموت فيك..
هي كادت تنجن خلاص...
بصدمه قالت؛انت شني ..ماعندكش دم ماعندكش احساس..مانبيكش اني مانبيكش...معاش تشبحلي هكي معاش تكلمني هكي..وقعدت تضرب فيه ع صدرها وهي تقول..حس يابني آدم حس حرام عليك..خليني في حالي خليني...عييت وتعبت من الخوف عليك معاش قادره نتحمل..مانبيكش تموت اني..برا عيش بعيد عني بالله عليك..برا برا..وخليني بروحي...برا..
وهي تضرب فيه وتبكي وقلبه يتقطع عليها..
كانت في اضعف حالاتها والالم واضح في كل شي فيها نبرة صوتها ملامح وجهها..حتى ضربات ايديها كانت ضعيفه..
ولانها ضعيفه وهو كان القوي فهديكا اللحظه..
احتواها...ضم ضعفها وانكسارها وخوفها وحزنها...
بكل مافيها احتواها وقعد يهدي فيها وهي كانت تقاوم بس بعدين شدت فيه وقعدت تبكي وهي تقول..
"نحبك ومانبيكش تموت"...
وهو ماقدرش يحبس دمعه نزلت حزن وفرح في نفس الوقت..دمعه بين المالح والحلو...هو هكي الحب مالح وحلو بكل شي فيه...
ولازم نعيشوه بكل تفاصيله كيف ماكانت...
واللي يحب حق..يقبل حبيبه بعيوبه وحالاته السيئه..
وهكي كان فاتح بالنسبه لسارة...
🍁🍁🍁🍁🍁
مقعمزة ع الكرسي وهي حاطه شاربتها ع كتافها بعد ماحولتها وهي تشوفله كيف واقف يقرا في القرآن ع طاسة ميه..بعد ماكمل جاها..مسح ع شعرها وقال:خودي اشربي..
خدت منه الطاسه وبدت تشرب..
وهو قعد حاط يده ع راسها وهو يقرا عليها..
كملت شراب الميه وهو بعدها بشويه كمل قرايه..
وقال؛هاه شني توا..
نزلوا دموعها وهي تشوفله قالت؛اسفه..والله كله كان غصب عني..
طبس عليها وهو شاد وجهها قال بإبتسامه؛عارف ياسموحه وفاهمك كويس..اصلا مرة مرة كنتي تفضحي في روحك..
وغمزلها ..
نزلوا دموعها وهي تقول:مانستاهلكش..
فاتح؛واللي خلقك ورزقني بيك ماتستاهلني وحده غيرك..
سارة؛صدقني كان تخليني احسن ليك..
فاتح؛بنعطيك كف عارف روحي..
ضحكت من بين دموعها..
هو مسحهم وقال:والله مانخليك لو شن ديري اني من قبل شابط فيك...يابال توا بعد قلتي نحبك...
هي شدت يده وقالت؛خايفه..خايفه عليك هلبه..
فاتح؛قصة الخوف هادي تو نلقولها حل مع بعضنا باهي..المهم انتي توا اهدي وروقي واذكري الله..وبعدين البسي شاربتك وتنوضي معاي نروح بيك تمام..وبعدين ساهل..
مسح دموعها وقال...متفاهمين..
هي ابتسمت وهزت راسها بإيجاب..
وهو ابتسم وباس جبينها بعدين قال:ايه حقه درت كب كيك امس تو نجيبلك منه..ومشي من حداها..
وهي تنهدت بإبتسامه بعدين قالت؛لاإله الاالله..
ووقفت ومشت لمرايه مقابلتها قعدت تلبس في شاربتها..
وهو طلع ببوكس فيه الكب كيك وقال؛هاه شني عيوني..
سارة بإبتسامه؛شويه بس..
كملت لبس شاربتها..بعدين مشت لشنطتها فتحتها..
وطلعت منه البروش وقعدت تشوف للمرايه..
وهو يتأمل فيها بحب..وقلبه يرقص من الفرح...
لبست البروش بعدين شبحتله وقالت؛شن رايك..
فاتح؛شن بيكون رايي ربي يحفظك ومايحرمني من الوجه..
ضحكت ومشت خدت شنطتها..
وهو جاها ومد يده..
هي شبحتلها بعدين ابتسمت وشدت يده ..
وتشابكت اصابعهم في بعضها..ومشوا طلعوا الزوز مع بعض...

#منح_الثقه
#البطل_المغمور2

...يتبع.....