#البطل_المغمور2 "زهور القمر"
#جمان_فريد
#الجزء_الثاني_والثلاثين "فاتح وسارة"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
▪▪▪▪▪▪
◇سنتين وواش زي مايقولوا فاتوا..في الفم ساهله..لكنهم كانوا من اصعب السنوات اللي مروا عليا لهداكا الوقت...
سارة..نسيبه..اللي صار هديكا الفتره...
اني يعني بعد ماطلعت حقيقة ان قاتل مجاهد رفيق ولد خالد اللي يكون سلف اختي وعم ولدها ماقدرتش ناخد موقف من اختي لما اختارت تستمر في العيشه معاهم..هي شن ذنبها!!؟..هما نفسهم شن ذنبهم!؟ مافي حد ليه ذنب في اللي صار غير المذنب نفسه...
لكن سارة ماتقبلتش هالشي بسهوله..سارة قعدت عام ماتكلمش في عمتها مقاطعتها مقاطعه تامه...برغم ان نسيبه حاولت معاها بس سارة ماقبلتهاش ماقبلتش قعاد عمتها مع ناس فرد من افراد تسببلها في وجع كبير وعيشها اسوأ مرحله في حياتها...
بتقولوا انت وين من هدا كله..نقوللكم اني نفسي كنت من خوفي ع سارة نساير فيها في كل شي وهادي غلطه كبيره ارتكبتها في حق سارة قبل الكل...
▪▪▪▪▪▪
🍁🍁🍁🍁🍁
في دارها..
ع الزيانه...
كريم مرطب ..عطور... الى جانبهم صندوق مجوهرات صغير مفتوح فيه دبله ذهب بفص الماسي جاي عليها الضي مخليها تبرق...
جنبها هاتف محمول...
بعيد عنهم بمسافه بسيطه كمادينو سريرها عليها زوز صور صغار ليها مع امها..وصورة تانيه كانت لزوجها...
ومن سريرها لدولابها اللي كانت واقفه قدامه طلع منه في عباية وشاربه بتلبسهم بش تمشي للجامع...
اليوم اخر يوم ليها في حلقة التحفيظ..
اليوم تختم القرآن حفظ وتجويد....
رن تليفونها بنغمة رساله..
التفتت ومشتله بسرعه..خداته..ابتسمت وفتحت ع الرساله قرتها بعدين بدت تكتب وبعتتها..
حطت التليفون وولت للدولاب طلعت عبايتها وشاربتها...
وبدت تلبس فيهم...
وقفت ع المرايه ساوت شاربتها ودارتها بطريقه انيقه..
رتبت دارها كلها...
بعدين خدت الدوسيه متاعها من فوق طاولة المكتب متاعها وطلعت ومن الدار...
وقفت قدامها وهي تفكر...بعدين مشت لدار خواتها وقفت قدامها لقتها فاضيه رفعت حاجبها..
بعدين لفت ومشت طلعت من الحوش للجنان..
لقتهم الزوز مقعمزات يرسموا...
سارة:جنان ريحان..
شبحولها الزوز..
سارة:الساعه السته..
ريحان:وييه خيرها الساعه تجري هكي!
سارة؛من غير كثرة الدوة وقدامي داخل...
هما ناضوا مع بعض وكان باين ع وجوههم الزعل...
خشوا داخل وهي وراهم...
سارة:اني توا ماشيه وبابا يخش بعدي بشويه ياويلكم يخش ويلقى الحوش فوضى ولا في حاجه مش مكانها وردوا تقربوا الكوجينه..
حاجتكم عصيركم البريوش الكيكه في داركم الكوجينه مايخشلها حد..
الزوز:حاضر...
هزت راسها بعدين خدت مفاتيحها من ع المدخل وطلعت سكرت الباب بالمفتاح..
ومشت لسيارتها..
لما ركبت اتصلت ببوها
سارة:السلام عليكم بابا اني طلعت توا..
"واني شويه وطالع بابا"
سارة:تمام رد بالك ع روحك..
"حتى انتي..بابا سارة"
سارة؛نعم بابا؟
"ربي ينفعك بما حفظتي ويفتح عليك بيه "
ابتسمت وقالت:آمين...
"في امان الله بابا"
سارة؛في حفظ الله حبيبي...وسكرت..
حطت التليفون قدامها وشغلت السيارة وتحركت...
🍁🍁🍁🍁
"شني كله واتي"
:ايه مدام..
هزت راسها وقالت:خلاص شويه تانيه ويجي رشيد طلعوهم للجنان واللي بيجوا معاه يطلعوهم برا بعدين..
"حاضر مدام"..
ومشت طلعت من حداهم ومشت للصاله اللي كنت بكبر شقتهم زمان..
كانت كلها طاولات وكراسي وتنسيقها كله من قبل شركة التنسيق..
قعدت دور وتشوف فيها وتتفحص بنظرها...
"شن رايك مدام"
هزت راسها وقالت؛كويس..خديتوا فلوسكم كاملات ولا..
:ايه مدام..مبارك ع بنتكم وربي يفتح عليها..
ابتسمت وقالت:امين..صحيتي..هي تفضلوا...
وطلعوا وهي معاهم سقدتهم...
وبعد ماطلعوا...رن تليفونها..
خشت وشافت المتصل تأففت بتذمر وداراته صامت...
شويه وانفتح باب الحوش..
التفتت وقالت:طيب فيك!
رتاج:من الزحمه يام يدوب في خوت كنعان خديته منهم وجيت هني طول...
كنعان جي يجري لحناه..هي قعدت تغني وتقول:عطيوه جي الحوش ضوي..وقامته في حضنها وهي تقول..استاحشت حنينه حتى حني استاحشاتك..
ابتسمت رتاج وقالت؛هاه يام كل شي واتي..
سدينه؛لايراجي فيك .
ضحكت وهي تقول؛يما لسانك مولي بكل..
سدينه؛تحركي قدامي من تفتفيت زايد وشوفي شن درنا وكان في حاجه غلط صلحيها..
رتاج بضحكه؛حاضر...دانيه قداش ليها طالعه..
سدينه:ليها وقت..
ومشوا هما الزوز ومعاهم كنعان للصاله ..
🍁🍁🍁🍁
مستشفى الرازي..
في قسم من اقسامه..
كانت مريم اللي بدت في مرحلة التطبيق في المستشفى برفقة الدكتور المسؤول عنها...
مريم؛يعني دكتور الامتحان الاسبوع الجاي..
الشايبي؛ايه بش تكملوا فيسع وتتخرجوا..
مريم بإبتسامه:والله ياريت..بس بجد خايفه من بعد التخرج يعني الواحد بش يوصل للدرجات اللي يبيها في المستشفى لازم يخوض حرب..
الشايبي:نكذب عليك لو نقولك مافيش منها الدوة هادي لافي ومش بالساهل تثبتي نفسك هني حيحاربوك لو لقوك ناجحه لكن انتي تقدري تغلبيهم لما تقاومي وماتستسلميش..
مريم تنهدت وقالت:ان شاء الله..
وقفوا الزوز وهو قال:موفقه..
مريم؛شكرا...
وهي مشت من جهه..وهو مشي من جهة تانيه..
مريم وهي ماشيه شافت شخص خلاها تبتسم بإمتنان تلقائيا؛كيف حالك دكتور..
هيثم:بنتي مريم كيف حالك انتي وشن صار فيك..
مريم؛لا الحمد لله غيرلي الموعد..
هيثم؛نعرفه الشايبي يقدر الطلبه اللي زيك انتي شديد وصارم مع المستهترين بس..
مريم بإبتسامه خجل:شكرا دكتور..
هيثم هز راسه وقال:موفقه دائما بإذن الله..
مريم؛تسلم دكتور..ومشت مريم كملت طريقها..
وهيثم مشي بطريقه لخارج المستشفى...
واللي يشوفه يسلم عليه وهو يرد في السلام..
مش لانه محبب ومقرب من الجميع بس..بل لانه عنده صفه في المستشفى هدا...
~~~~~~
♡بابا في الفترة اللي كان يخدم فيها في مجمع العيادات خدم في مستشفى الرازي كان يدير في العمليات غادي..وبعدوقت من الخدمه غادي وتزكيه من كادر المستشفى استلم ادارته وقعد مشرف ع المجمع كل اسبوع لازم يديرلهم طبه يجيهم في وقت غير معلوم ويشوف شن صاير غادي..ضحكت وقالت..حبيبي يابابا...
~~~~~
🍁🍁🍁🍁
وصل هيثم للحوش..
وخش طول...
وقعد ينادي؛جنان...ريحان...
سمع صوت خطوات جري قعد يضحك..
سكر الباب وهما جوه طول..
جنان بإبتسامه:مرحبتين بابا..
هيثم وهو يشوف لابتسامتها اللطيفه قال بضحكه؛اهلين يامهجة بوها..
ريحان؛واخيرا جيت بش نتنفسوا شويه غمتنا سارة..
هيثم حط حاجاته ع طاولة المدخل وقعمز بش يحول كندرته..
هما جوه يجروا وكل وحده قعدت تحول في فرده..
ابتسم وقال؛طول اللسان شن قايل عليه ياريحان..
جنان عضت ع فمها وهي تشوف لريحان..
ريحان حولت كندرته وقال بإنزعاج:هي بكل يابابا ماتخليش فينا ع راحتنا..باهي شن فيها كان خلتنا نلعبوا في الجنان لين انت روحت..
هيثم قربهم منه وقعد حاط ايديه ع كتافهم وهو يقول:اول شي هادي اختك الكبيره تكلمي عليها باحترام..تاني شي هي تحبكم وخايفه عليكم هدا علاش هي حريصه عليكم بزياده..واخر شي اني ديما نطلع فيكم تلعبوا وانتم تقولوا انغمينا!
جنان :اني ماقلت شي بابا..اشرت ع اختها وقالت..هي اللي قالت..
ريحان شبحتلها بإزدراء وقالت؛ديما هكي انتي جبانه وبيوع..
ضيق هيثم عيونه وقال؛منين تجيبي فيها الالفاظ قوليلي..كل يوم جايتني بكلمه شكل..
ريحان؛بيوع كلمه عاديه بابا مافيها شي راهو..معناها هي باعتني فهمتها كيف..
هيثم غمض عيونه بإستسلام بعدين فتحهم وقال:تمام..لكن ردي بالك تتمادي لأكثر من هكي..
ريحان؛لا بابا ماتخافش نعرف الكلام من بعضه..وبعدين بابا هي بابا معاش في وقت قريب يجي الليل..
هيثم؛تمام لكن ع شرط..معاش نسمع مرة تانيه تقولي كلام مش حلو عن اختك الكبيره.
ريحان:باهي بابا حاضر واسفه..
ابتسم وباس كل وحده فيهم ع راسها..
وناض وقف وقال:وتوا ارواحكم هي..
الزوز ضحكوا بفرح ومشوا يجروا للدار..
هو ضحك عليهم..بعدين شبح للكوجينه...
خفت ضحكته..شبح من وين مامشوا بناويته..
ورجع شاف للكوجينه ومشي خشلها..
وفتح الثلاجه...
وعيونها بدوا يلمعوا بشغف..
وهو يشوف للكيكه دايرتها سارة بالكريمه والشوكلاته حاطتها في حافظه ومغطيتها..
وهو قلبه يدق بقوة من رغبته الشديده بيها..
مد يده وجي بيطلعها...
ويجي في مسامعه صوت سارة وهي تقول..
《ربي يسامحك يابابا تبي تقتلني انت تبي تقتلني علاش دير فيا هكي بس حرام عليك..خلاص بنحرمه الحلو ع الحوش معاش نخليه يخشله بكل》
غمض عيونه بإستسلام..وسكر الثلاجه وهو يقول..
ياربي ثبتني يارب...
فتح عيونه والتفت وانتفض من الفجعه...
لما شاف جنان وريحان وافقات يشبحوله مكر بتساؤل..
هيثم بشي من الارتباك:أا..كنت نشوف شن في ناقص في الثلاجه بس..قصدي..استغفر الله..تفرجت عليها وخلاص حتى الفرجه حرام..
ريحان هزت راسها وقالت:لامش حرام بابتي مش حرام..هيا بابتي هيا..وقت..
شاف في عيونها نظرة تهديد شبحلها بنص عين وقال:هيا قدامي..
ضحكوا الزوز ومشوا...
وهو وراهم...
طلعوا من الحوش..
وركبوا السيارة وطلعوا...
لقوا عرفه طالع من الحوش وفي يده شبكه فيها كورة..
طلعت ريحان من الروشن؛عندك مباراه..
عرفه بإبتسامه؛ايه..
ريحان:مليح بكل اركب معانا..
قدم عرفه وجي لهيثم قاله؛كيف حالك عمي هيثم..
هيثم بإبتسامه؛تمام الحمد لله...شبح لريحان وقال..انزلي اركبي لتالي..
ريحان؛حاضر..ونزلت من السيارة وهو قال لعرفه:اركب..
عرفه ابتسم ومشي ركب مكان ريحان..
وريحان ركبت جنب اختها..
وهيثم تحرك بيهم للجردينه....
🍁🍁🍁🍁
"ربنا لاتؤاخذنا ان نسينا او اخطئنا ربناولاتحمل علينا إصرا كما حملته على الذين من قبلنا ربنا ولاتحملنا مالا طاقة لنا به واعف عنا واغفر لنا وارحمنا أنت مولانا وانصرنا على القوم الكافرين"
فاطمه؛الحمدلله رب العالمين..
دانيه بدموع فرح؛الحمد لله الذي بنعمته تتم الصالحات..
وشبحت جنبها وقالت:تعالي..
سارة بضحكه ودموعها ينزلوا؛جيتك..
وحضنوا بعض بقوة وهما يباركوا لبعض...
والمعلمه اللي كانت حامل في الشهر السابع وهدا اول حمل ليها بعد صبر وثقة وايمان بالله قوي واخد بالاسباب..
كانت تشوفلهم بفرح وفخر نظرتها لكل من يطلع حافظ قرآن من تحتها هي..
🌼ويابخت فاطمه واللي زيها يابختهم🌼
ووحده من الطالبات كانت تصور فيهم فيديو بتليفون سارة...
فاطمه؛ربي ينفعكم بالقرآن ويجعل نهج لحياتكم..ونعاود ونوصيكم القرآن يتفلت فيسع كان ماحرصتوش ع المراجعه ماتخلوا شي ينسيكم القرآن...تذكروا..كل شي مهما قعد معاكم سيوره مفارقكم..الا القرآن..
الزوز ابتسموا..ودانيه هزت راسها...
اما سارة قالت؛إن شاء الله معلمتي كل شي تعلمناه يقعد هني..واشرت بيدها ع قلبها وقالت..ماينتساش...
🍁🍁🍁🍁
في الكوجينه..
بحداها ولدها مقعمز ع طاوله خاصه بالاطفال وياكل..
وهي كانت تجهز في العشي وتتفرج ع بث مباشر في تليفونها ع مباراة لكرة السله...
"وتمرير التفافيه من اللاعب مؤيد الشيخ للاعب المثنى احساان"
رنيم بحماس؛هيا..هيا..هيا..
"ويصوب رمية ثلاثيه"
خشت الكورة في السله والمعلق قلب الاستديو ع راسه من الفرحه..
ورنيم قلبت الكوجينه وهي تصيح وتصفق..
وولدها يشوف فيها وهو مش فاهم شي يضحك..
ع جية سنيه تجري برجليها اللي بالهون..
سنيه:فازوا..
رنيم بضحكه؛فازوا ياعمتي والمثنى جابها...
سنيه بفرح:والله من الصبح واني ندعي الحمد لله..
رنيم بإبتسامه:الحمد لله...بعدين شبحت لولدها وقالت..حبيبي بللو خوك بيروح بالكاس ..
سنيه؛ان شاء الله بعد يكبر حتى هو يجيبلنا الكاس في الكورة متاع الرجلين..
ضحكت رنيم وقالت؛ان شاء الله..
ع خشة احسان للحوش..
وين جاهم قال؛السلام عليكم..وغمز بعينه وهو يسأل..شنوفيه..
رنيم بإبتسامه:المثنى جاب الكاس..
احسان؛طالع لبوه مايرضاش الا بالقمه..
سنيه ورنيم؛إيوااه...بيبدا توا..
احسان ضحك وقال؛هيا وتوا رواحكم هيثم بري كلمني وقالي مع تمانيه ونص نكونوا غادي..
رنيم؛تمام...ايه خود بللو وجيبه للدار..
حط شنطته ع تركينه وجي لولده رفعه وقال لأمه:وتي روحك يام..
سنيه:اني واتيه نلبس جلبابي ونحط شاربتي ع راسي..
احسان هز راسه ومشي ركب بولده للشقه..
وامه مشت لدارها..
🌼خش للدار ع مرته وقال:قال مش مطولين غدوة وراه يوم كبير..
رنيم؛على شن في غدوة؟
احسان ابتسم وقال؛غدوة ان شاء الله يطلع زياد..
سرحت رنيم وابتسمت بعدين تنهدت وفتحت دولابها..
واحسان بعد ماكان يشبحلها شبح لولده وقعد يلعب معاه.
🍁🍁🍁🍁
في فيلا رتاج..
كانت الصاله معبيه بصاحبات دانيه وزميلاتها في حلقة التحفيظ والكليه معزومات ع حفلة الختمه متاعها..
هلبه منهم كانوا حاسداتها ع الحياة اللي عايشتها ويتمنوا لو يكونوا في مكانها..
مساكين..مش عارفين ان ورا مظاهر البهرجه عادي قاعد يدرق حزن والم كبار مالهمش نهايه..
كنوز الدنيا كلها ماتقدرش تعوضهم عن اللي راح...
🍁🍁
دانيه كانت مع رتاج وامهم يتفرجوا ع البث المباشر اللي دايره رشيد في الجامع لحفلة الختمه اللي دايرها في الجامع..
حتى رشيد ختم القرآن وخدي بنصيحة خوه..
النصيحه اللي يرقد وينوض وهو يسمع فيها وماحولهاش من عقله نهائي...
سدينه بدموع فرح؛الفال للشهادة الثانويه العام هدا ان شاء الله...
رتاج ودانيه ودموعهم في عيونهم:آمين...
🍁🍁🍁🍁
في سيارة خاصة بسواق...
كان راكب رشيد من الخلف ومعاه بوه..
رشيد:انت ربي يهديك مسكر راسك وماتبيش تجي تقعد معانا..
مجيد؛مانقعدش في مكان مايبيني فيه حد..
رشيد:بوي حول الدوة هادي من راسك انتي اللي تفكر هكي بس..
مجيد؛بالله سلم ولدي خليني فرحان بيك ماتبيش نتنكد..
تنهد رشيد وهز راسه وقال؛حاضر..
وصلوا للعماره..
ورشيد وصل بوه ليد مقبوله..
بعدين توجه للفيلا وهو مضايق ومش راضيه يكونوا هما في جهة وبوه في جهة..
مش مرتاح لأمه ماقدرش يدير زي خوه ويخلي والديه في مكان واحد ويخدمهم مع بعض..كيف ماكان يدير مجاهد بالزبط...
🍁واحيانا يغيبوا ع الدنيا ناس لاعوض لهم ولاتكرار🍁
🍁🍁🍁🍁🍁
وفي مكان تاني..
في احد مطاعم العاصمه..
ع طاوله طويله كانوا مجتمعين عيلة هيثم..
واحسان..والاشهب مع مرته وبنت اخته وبنتها وصغارها..
النساوين كانوا ع اليسار مقابلات بعض..
والرجاله اليمين مقابلين بعض..
هيثم؛ماعنديش صبر مش مصدق امتى يطلع..
الاشهب؛لو كنت مكانك عشت نفس الحاله...
احسان؛طلعة زياد في وقت زي هدا مناسبه جدا.
هيثم شبح لسارة اللي كانت مقعمزة في طرف الطاوله تسمع في اللي حواليها يهدرزوا..وملامح وجهها مهما كانت تبان عاديه مسحة الحزن باينه فيه...
شبحلهم وقال:اني اكثر شي ع خاطر سارة هو قريب عليها هلبه ومتأكد انه يقدر يطلعها من حالتها..
الاشهب هز راسه وهو ساكت..
احسان؛صح..خوها مش زي بوها يقدر يدير حاجات مايقدرش يديرها الاب..
هيثم؛صح..محتاجه حتى لخواته الصغار بالذات هديكا هديكا..
احسان بضحكه؛ياهديكا..المثنى يموت فيها بنتك هادي يقولي قول لعمي هيثم يجي ويجيب معاه ريحان..
هيثم :بفضله هو شغلتلي دسكه جديده بابا نبي نخش نادي كورة سله..نست التيكواندو ومايجي منه..
الاشهب بضحكه؛جيل عجيب الجيل هدا..
هيثم؛هني المشكله..الجيل هدا..بجديات اني حاس روحي ملخبط ومش عارف كيف نتصرف..
اختلاف الاجيال هدا مشكله..يعني جيل سارة وزياد مش زي جيل جنان وريحان..كل جيل يكون سابق عمره بسنتين تلاته..مرات يقولولي في كلام يصدمني نقول خوتهم في سنهم مايعرفوش يقولوا كلمتين ع بعض ومايعرفوا شي..
احسان:المشكله هادي يعانوا منها هلبه اولياء امور يكون في فارق زمني كبير بين صغارهم..يربوا الاولين بطريقه تنجح معاهم..ولما يجوا يطبقوا الطريقه ع الاخرين يفشلوا...
الاشهب؛الطريقه لازم تتغير..لازم يربوهم بما يتماشى مع وقتهم..
هيثم؛ايوه..تعرفوا اني توا قعدت نتواصل مع اختصاصيه تربويه ونستشير فيها..ونقرا حتى في كتب...
احسان؛ماترهقش نفسك ياصديقي..البيئه اللي فيها بناتك حتربيهم معاك اختار البيئه الصح ليهم في كل شي..والباقي ساهل..
تنهد وقال؛عندك حق..عندك حق..استغفر الله..فرحت اللي عدت مرحلة مراهقه زياد وسارة..مانحسابش اللي جاي اصعب..
احسان بضحكه؛محملها فوق حدها..
الاشهب بإيتسامه؛عنده الحق.. انت اب ناجح ياهيثم زي ماربيت الاولين صح هما ان شاء الله يطلعوا خير منهم..
تنهد وقال؛آمين...
••نوال:مش مصدقه امتى يجي غدوة نحس في روحي مش راقده الليله بكل..
رنيم بإبتسامه؛والله ماتنلامي..تعرفي رغم ان المثنى مش ولدي صح بس والله قعدت الليله كله واني نتقلب ونفكر في المباراة وصليت ودعيتله وقعدت ع اعصابي لليوم وماارتحتش الا لما فاز فريقه..نحس فيه زيه زي بلال بالزبط..وكأنه مني اني..
ماجده تنهدت وين خطر عليها مجاهد..
وسارة شبحلتها..حست بيها وعرفت شن خطر ع بالها...
حست بقلبها انغم فجأه..خدت نفس بعدين قالت:معليشي ماشيه الحمام..
وناضت ومشت طول..
ونوال قعدت معاها بعيونها لين ادرقت من قدامهم..
نرجس:سبحان الله فاتت السنين بسرعه..
ماجده:الحمد لله انها فاتت بسرعه تعبنا وحني نستاحشوا..
نوال ابتسمت بحزن وقالت:صدقتي..تعبنا هلبه...
شويه وجتهم سارة وباين عليها انها كانت تغسل في وجهها..
بوها تبعها بعيونه لين قعمزت وقعد يشبحلها..
ماجده؛دانيه دايرة حفله قتيلي..
سارة:حيي نسيت هي دايره بث...فتحت تليفونها وخشن ع الفيس وحطت علي حساب دانيه وخشت ع البث وبدت تتفرج...
🍁🍁🍁🍁
في مطعم السجن مقعمزين يتعشوا..
الليله هادي كانت اخر ليله ليه هو في السجن وكان خوفه غالب على فرحته...
وصاحبه قدامه لاهي بعشاه...
رفع راسه وشاف قدامه لقاه سرحان وباين ع وجهه ملامح اليأس..فيقه من سرحانه لما قال..
خليل:بس..هييه.
شبحله..
خليل بإستغراب:خيرك!؟
تنهد وقال:مش عارف خايف مانبيش نطلع..
ضحك عليه وقال:عبيط اقسم بالله..اللي قاعدين هني كلهم يتمنوا يكونوا مكانك..
زياد بضيق:وعلاش؟الدنيا برا تخوف اكثر من هني..الناس اللي هني خير من اللي برا..ناس تشبهلي وتفهم عليا ماتشوفش فيا اقل منها ولااني نشوف في روحي خير منهم..لكن العالم اللي برا مش هكي بكل..
خليل:مية مرة نقولك انت مادخلك في حد..فكر في نفسك ..في الحلم اللي قاعد تسعى بش تخليه واقع وبس..خلي الناس ونظرة الناس وكلام الناس ورا ظهرك يدفك القدام..ولاتحت رجليك يرفعك فوق....
زياد :لكن صعب..والله صعب تعيش بين الناس مكروه منبوذ..
خليا:ماتبالغش مش لهالدرجه..وبعدين مش مهم حبهم من كرههم قتلك قبل...حب اللي فوق هو يجيبلك حب اللي تحت...
زي ماانقال مرة...
لاتجعل همك حب الناس لك فالناس قلوبهم متقلبه تحبك اليوم وتكرهك غدا...وليكن همك كيف يحبك رب الناس فإنه إن أحبك جعل أفئدة الناس تهوي اليك....
ابتسم زياد بشي من الراحه..
خليل:في كتاب بعتتهولي عمتك ع قد مانوصفلك فيه مش حنوصلك عنه شي من اللي حسيته واني نقرا فيه..
اسمه #معجزات_الذكر تو نعيطهولك غدوة ان شاء الله وانت طالع...
زياد هز راسه بإيجاب وهو مبتسم...
خليل؛خليها ع الله...وتعشى.عشاك..
تنهد زياد وبدي ياكل...
🍁تعلمت ان حسن الظن سفينه حربيه توصلك لأحلامك مهما كانت المعوقات وذاك المصباح السحري المدهش "ذكر الله" والذي هو ليس خياليا مثل مصباح علاء الدين في تحقيق الامنيات وإنما حقيقي ومعاصر وبتجارب حقيقيه🍁
مقتبس من كتاب #معجزات_الذكر
🍁🍁🍁🍁
نفسه الكتاب اللي خداته تهاني مؤخرا...وقاعده تقرا فيه..
تهاني اللي عاشت في حياة مليانه مصايب وهموم حملها يهد جبالها تحملتها من صغرها..
قاعده مكمله وتقاوم في هالحياه بش تقعد نظيفه وانسانه مستقيمه..وماتخلي شي يحرضها ويخليها تطلع عن المسار الصح..
وهي مؤمنه ان الانسان اقوى من ظروفه يقدر يطوعها ومايخليهاش تتحكم في مساراته..
تهاني الى الآن وحيده من غير صديقات خوف من الخذلان والتخلي...بعد خسارتها لسارة ودانيه...اختارت تكون وحيده من غير صديقات اسلم لنفسها من الكسر مرة تانيه..
لكن في قلب...قعد طول هالسنتين متيم بيها..
وع قد ماحاول معاها رفضاته..عرض عليها الزواج الف مرة ورداته...ومازال صاباش لايأس ولاملل وعنده فيها امل كبير...
معاذ
••جهاد؛البنت ماتبيش يامعاذ مش جبر هو هدا زواج راهو..
معاذ بضيق؛باهي نبي نعرف شن هو السبب اللي مخليها تردني..شايفتني اقل منها صح؟
جهاد؛شن الدوة اللي تقول فيها هادي..تهاني توا تعرف قداش جوني ع خاطرها..
معاذ ولعت في قلبه النار..
جهاد؛اقسم بالله كل واحد خير من التاني وهي ترد فيهم البنت تفكر في قرايتها بس..والحق اني مانبيش نعطيها ولاخليل يبي يعطيها الا بعد ماتكمل قرايتها..
معاذ؛معناها منكم انتم!؟
جهاد؛حني وياها...
تنهد.معاذ وقال؛باهي..باهي..نراجوها لين تكمل قرايتها..
جهاد ؛براحتك..وشرب من الشاهي..
ناض معاذ وقال؛صحيت جهاد ..
جهاد؛اسمعني جاي الدنيا نصيبات والواحد ماياخد غير نصيبه...
معاذ هز راسه وقال؛تصبح ع خير..ومشي..
جهاد؛قدامك كل خير..لما بعد عنه قال..لو يجنح اختي مانعطيهاله...
🍁جهاد...كبر شغلهم وفتح ورشه كبيره باللوادجو...مشهوره في وحده مناطق طرابلس الكبيره وسماها ورشه ...
"ولاد خالد"...
وحالتهم الماديه نحسنت هلبه..ومعاش خلا حد يخدم في الحوش غيره هو حتى نسيبه خلاها تبطل...
ونسيبه نفسها تفرغت تفرغ تام لولدها خالد اللي كانت حريصه ع تربيته احسن تربيه من وهو فهالعمر....
مقعمزة في الدار وولدها في حضنها وهي تتفرج ع صوره خدتها لخليل لما جاته اخر مره مع خالد قبل سته شهور..
كام اخر امتحان لخليل برا الحبس...باقي قرايته بالعملي كان ياخد فيها في مستشفى السجن..
🔺️قبل سته اشهر
نسيبه:اشرب حبيبي عصير هيا ماما.
خالد:با..با..
ضحكت وقالت:شويه ويطلع بابا يامدعبل..
وقعدت تشرب فيه العصير..
بعد ماكمل عصيره عطاته الباكو وقالت:هيا يامدعبل نمشوا نلوحوه غادي..
ومشي ولدها وهي مشت معاه..
وصلوا في حاوية القمامه..
مد يده بيلوحه ماوصلش..
هي ضحكت وطبست قاماته لوحه بروحه قالت:ايييه برافو دعبولي الحلو...
فجأة سمعت صوت باب انفتح..
التفتت وهي قايمه ولدها وقالت:بابا طلع..
مشت تجري ووقفت بيه ورا السياج..
لحظات وشافت راجلها طالع ومعاه الزوز شادينه ويبان يدور بعيونه..
حطت صوابعها في فمها وصفرت..
هو طول شبح لمصدر الصوت قعد يضحك..ويمسح ع شعره من الخلف للأمام..
هي سألاته بالإشارة "شن درت"..
هو رد عليها بالإشاره لما حط راس السبابه ع الأبهام وخلا باقي اصابعه في الهوا وغمز بعينه بمعنى"ميه ميه"
ردت عليه بالإشارة لما رفعت يدها اليسار وكأنها توري في العضلات بمعنى"بطل"
هو ضحك...بعدين شاف لولده لقاه ياشره بيده يحي فيه..
هو عيونه امتلوا بالدموع وقعد يبعتله في البوسات.
وولده قلده...هو وياها ضحكوا..
شويه كلمه الضابط وقال:خلاص تم الوقت..
خليل برجاء:باهي ارجوك خليني نضم ولدي شويه مانبي شي تاني..
:اسف سامحنا والله مافيها كيف ساد المرة اللي فاتت والله لو يندروا علينا نريحوا فيها..
:حتى حني عندنا صغار وعيله ياخوي..
هو تنهد بالم وهز راسه برضا..بعدين رجع شبحلهم لقاهم يشوفوله..
شويه رفع ايديه الزوز واشر بصوابعه برقم"8"
هي ابتسمت من بين دموعها وهزت راسها بعدين شبحت لولدها وقالت؛هي دعبولي دير زيي..
وكورت قبضت يدها ورفعتها ووجتها ناحية راجلها وولدها قلدها..
هو ضحك ودار زيهم غير بإيديه الزوز..
بعدين خدوه الضباط ورفعوه لسيارة السجناء..
وهي بسرعه خدتله صوره في هاتفها وهو يشبح جيهتهم بإبتسامه ألم...
🔺️في الوقت الحاضر..
نزلوا دموعها وقعدت تمسح فيهم...شافت لولدها لقاته غارق في النوم..
ساواته وغطاته..وبعدين مشت طلعت من حداه...
توجهت للصاله..
لقت عفاف تعشي في بدر...وحداها صالحه متكيه..
عفاف؛رقد خلوده؟
نسيبه؛ايه..وقعمزت..
عفاف؛بترفعيه معاك غدوة..
نسيبه؛فكرت نخليه لكن هلبه عليك هو وبدر..
عفاف؛خليه معاي تهاني..
نسيبه؛تهاني تقرا ياعمتي عندها كورس..
عفاف:انتي خليه ومادخلكش..
تنهدت نسيبه:كان انتي تبي هكي باهي..
صالحه؛امتى يطلع هو...
نسيبه؛الساعه 12الظهر ان شاء الله..
صالحه؛طيب والله فيه..
نسيبه بإبتسامه:ايه الحمدلله..
صالحه؛الفال لخليل يارب هالسنين فيسع ماتجري دوره وتوتوا لطلعته حتى هو..
عفاف بنبرة ألم؛يارب نعيش لهداكا النهار..
نسيبه؛ربي يطول في عمرك وتشوفي بدر وخالد عرسان..
صالحه؛وتفرحي بيهم..
عفاف وهي تمسح دموعها حضنت بدر بقوة وقالت:آمين...
وصالحه ونسيبه يشوفولها بحزن....
🍁🍁🍁🍁🍁
في دارها...
مقعمزة تتراسل هي وصاحبتها..
فجأه انفتح الباب انفجعت..
سدينه وهي عاقده حواجبها قالت؛خيرك تقول ريتي غوله..
دانيه ابتسمت بارتباك وقالت؛غولة شني ياسدو انتي اللي اقتحمتي عليا الدار..
شبحتلها شويه وقالت؛ارقدي ارقدي خيرلك..
حطت دانيه تليفونها تحت المخده وقالت:حاضر..تصبحي ع خير..
سدينه عقدت حواجبها وتنهدت وهي تقول؛قدامك كل خير..
وسكرت الباب..
ودانيه تنفست براحه..
~~~~~~~
♡بجد المواقف والحوادت والصدمات تغير البنادم او بمعنى اصح طلع فيه جانب مخفي في شخصيته..خالتي سدينه تغيرت تغيير جذري حرفيا..ولت واعره بكل معنى الكلمه..وقاسيه..وشدت ع بناتها هلبه...موت مجاهد الله يرحمه دار فيها شي خلاها انسانه تانيه بعد ماكانت تسامح وتفوت حتى في حق نفسها..ولت معاش تفوت..
ابغض خلق الله لخالتي سدينه هداكا الوقت عيلة عمي خالد الله يرحمه وعيله هيثم الكاتب وماتبعضش حد في هادم كلهم اكثر مني...والله وقتها مالومتها..اذا اني بروحي كرهت نفسي وحملتها كل الذنب...!
~~~~~
🍁🍁🍁🍁
تاني يوم
الساعه العاشرة صباحا..
مقعمزة في الصالون تسمع فيها شن تقول وهي تشوفلها بإمتعاض بعدين قالت..
سدينه؛تو من اسبوع جيتي وطلبتي وتوا جايه من صبح ربي تطلبي..غير شن هو اللي تاخدي فيه لراجلك يش يكملوا عليك الفلوس في اسبوع..
مقبوله؛علاجه ياسدينه ياخد هلبه..
سدينه،باهي خلاص كانك ع علاجه اني تو نقول لرشيد يتصرف وانتي ارتاحي..
مقبوله:مش ملاحظه ياسدينه انك تخنبي فيا وذلي كل مانجي نطلب فلوس لراجلك..
سدينه؛لاذليتك ولاهنتك..انت اللي تحسابينا مقعمزين ع بنك روما..يكون في علمك فلوس ولد رتاج مانقربوش فيهم..نصرفوا من اللي دخل فيه المزرعه ومشروع رتاج اللي داراته بعد ماخدمت الفلوس اللي جوها في الورث..حطيها في راسك هادي راك تنسيها بش ماتقعديش كل اسبوع طقي عليا في البيبان من صباحات ربي..
ناضت مقبوله وهي معصبه قالت؛اللي يسمع يقول نطلب فيه لروحي الله المستعان..ومشت طول بتطلع..
وسدينه تبع فيها بعيونها وهي تقول :خزي حزيبونه طماعه...
🍁🍁🍁🍁
الساعه الحاديه عشرة الا ربع..
"هو هدا الكتاب قتلك عليه"
خداه زياد وهو يشوف لخليل بإبتسامه بعدين ضمه..
وخليل قعد يطبطب ع ظهره وهو مبتسم..
ومن جهة تانيه...
فاتح:كلمني ايوه..
مراد؛ان شاء الله..اهو مازال تلاته سنين ونلحقكم..
فاتح؛يعدوا زي ماعدت التلاته سنين متاعتنا.
مراد؛باهي قولي انت ع شن ناوي توا..
فاتح؛هلبه حاجات..واولهم انت تعرفه..ملهوف بش نطلع ع خاطره هو اكثر شي..
مراد بإبتسامه؛ربي ينولك اللي في بالك..
فاتح بإبتسامه؛آمين..وحضنوا بعض...
سراج:اني طلعتي في العشيه...
بعدوا فاتح ومراد عن بعض وقال فاتح؛معاش صبر..
سراج؛والله كان نلقى تحطني في الساكو متاعك..
ضحكوا...
الحارس؛فاتح زياد هيا..
فاتح؛شويه بس..ومشي لخليل وهو يقول؛زعيم..
وحضنوا بعض...
فاتح؛ربي يفرج عليك عاجلا غير آجل..
خليل:آمين..اسمع خليك مع زياد قاعد خايف ..
فاتح؛مادورش...وطبطب ع كتفه..بعدين بعد ورفع يده وقال...نسمعوا عنكم كل طيب ان شاء الله..سامحونا..
هما باصوات متقطعه:مسامحين..
زياد؛نحن السابقون وانتم اللاحقون ان شاء الله..
ضحكوا وقالوا باصوات متقطعه:امين.
فاتح وزياد:في امان الله...
ولفوا الزوز مع بعض ومشوا مع الحارس وطلعوا من الساحه..
وخليل اللي كان معاهم بعيونه المليان دموع قال بصوت هامس..
إن الله مع الصابرين..
🍁🍁🍁🍁🍁
برا قدام بوابة السجن..
ع اليمين من بعيد...
نوال وبنتها ونوارة..واقفين يستنوا...
وع اليسار بعيد كذلك..
هيثم ونسيبه وسارة...
كلهم عيونهم ع الباب ويستنوا ع نار..
نوال بقلة صبر؛هيا وينه عاد..
نرجس؛شويه صبر ماما..
تنهدت نوال ووزعت نظرها حواليها لين جي هيثم..
شافاته شاد اختها ومقوي عليها حست ان حاله من حاله..
هو تنهد وحرك عيونه جيهتهم جو في عيونها..
هي يدوب ابتسمت وشبحت للباب..
وهوابتسم..ورجع شاف للباب..
فجأه..
سمعوا صوت الباب ينفتح..
كلهم تأهبوا بلهفه..
والقلوب كادت تفر من مكانها...
انفتح الباب..
سارة خدت نفس عميق..
ونوال ضمت ايديها لبعض بقوة وهي تراجي بفارغ الصبر طلة ولدها..
شويه..
وطلعوا الزوز مع بعض..
كلهم ارتسمت ع وجوههم ابتسامه لهفة وشوق..
سارة تلقائيا بدون ماتفكر:زيزو...
هما الزوز شبحولها..
زياد ضحك ومشالها طول ..وهي جاته تجري..
هو طلق الساكو متاعه وضمها وبقوة..
وفاتح يشوف فيها كيف ضم في خوها وهي تبكي..
وقلبه ذايب....
"فاتح"
استاقظ وشبح جيهتهم ضحك بدهشه..
ومشالهم..
جاته امه بسرعه..وضماته..
وهو ضمها بيدها وحده وقعد يضحك من الفرحه..
نوال:ياعمري واخيرا...
••سارة وهي تشوف لخوها؛واخيرا زيزو بتروح معانا الحوش..اااه ياربي تقول نحلم..
خشت حضنه وقالت ..الحمد لله..
هو ابتسم ومسح ع راسها وقال:الحمد لله..وشبح لعمته..
لقاها تشوفله من بعيد وهي مبتسمه ودموعها ينزلوا..
فتح ذراعه وقال:تعالي..
جاته تجري وضماته..
وهو قعد يحضن فيهم الزوز ويبوس ع روسهم..
وهيثم واقف وحاط ايديه ورا ظهره ويشوفلهم بإبتسامه..
بعدين غير عيونه لعيلة فاتح..
لقاه حاضن امه واخته ويهدرز ع نوارة ع كانت واقفه قدامه وتمسح ع شعره ودموعها ينزلوا..
غير عيونه وشبح لزياد في نفس اللحظه اللي شبحلها فيها زياد..
بعد عن اخته وعمته وجي لبوه...
خدي يده وطبس عليها وباسها..وهيثم باس راسه وقال:الحمدلله ع سلامتك..
رفع راسه وباس جبين بوه بعدين ضمه وقال؛الله يسلمك بوي..
وهيثم يمسح ع ظهرها ويقول؛الحمد لله الذي بنعمته تتم الصالحات...
••فاتح وهو يشبح جيهتهم؛بنمشي نسلم ع الدكتور...
نرجس:خل كلنا نمشوا نتحمدولهم ع سلامة ولدهم....
نوال هزت راسها الموافقه..
وكلهم مشوا ناحيتهم..
فاتح وعيونه ع سارة قعد.يمشي ع شعره بإيديه..
حركه تلقائيه يديرها المحب تلقائيا لأن يهمه محبوبه يشوفله ديما بأحسن صورة..
بس سارة توا..لو شن مايدير فاتح ماتشوفلاش...
وصلوا فيهم وقال فاتح بإبتسامه؛السلام عليكم..
عقدت سارة حواجبها ومشت بعدت..
ونوال معاها بعيونها..
هيثم:اهلا حمد لله ع سلامه يازعيم..
ضحك فاتح وحضنه وقعد يشوف لسارة كيف مبعده ولاهيه بتليفونها..
نرجس؛حمد لله ع السلامه..
زياد بدون مايشوفلها؛الله يسلمك..
ابتسمت نوال لما شافت تصرفه.
بعدين سلمت ع نسيبه وقالت؛حمدلله ع سلامته..
نسيبه؛الله يسلمك..ومبارك عليك طلعه ولدك ..
نوال:الله يبارك فيك..
هيثم؛الحمدلله..اللي جي هاليوم وعشناه...
كلهم قالوا باصوات متقطعه:الحمدلله..
نوال:اكيد كلمك خالي ع عزومة المزرعه..
هيثم:ايه بلغني..
نوال:معناها نستنوكم غدوة ان شاء الله..
هيثم؛بإذن الله...
وفاتح يشوف لسارة اللي قعدت بعيده عنهم..
وزياد بدون مايشوف لفاتح التفت وشبح لأخته واستغرب تصرفها اللي كان غير لائق وماعجباش..
🍁🍁🍁
في الطريق..
سارة بتذمر:علاش حني مانلتموش في مزرعتنا برواحنا ضروري من التقييد حتى في مناسبه زي هادي..
هيثم؛-صوتك..
سارة بضيق:اسفه..
هيثم؛الراجل عزمني ماقدرنش نرده وبعدين حني عيلة وحده بنتي راك تنسي..
سارة بتذمر: عيله وحده عيله وحده..درهت كبدي منها الكلمه هادي..
زياد التفت وشبحلها بصدمه..
ونسيبه تشوفلها بضيق مش قادره تكلمها خايفه تعلق هي وياها..
هيثم بحده؛اسلوبك وصوتك في وجودي اضبطيهم فاهمه..
سارة غمضت عيونها وفتحتهم وقالت بضيق؛اسفه بابا سامحني..
وزياد يشوفلها وهو مستغرب فيها هلبه بعدين شبح القدام..
وصلوا للحوش..
وهيثم دخل السيارة داخل..
ونزلوا منها..
وسارة جت لخوها شداته من ذراعه وقالت:نورت حوشك ياغالي..
ضحك ومشوا للباب..
فتحت سارة الباب وخشت...
زياد؛وينهم؟
سارة :اكيد في دارهم مع خالتي..
زياد؛خليك هني..ومشي بروحه..
كان يمرر في عيونه ع الحوش بشوق...لعند ماوصل في دار خواتها وقعد يسمع في هدرزة خواته..
ريحان؛اني مافي حد في الحوش هدا فاهمني..
ماجده؛اشيه اشيه اشيه..حتى انتي تبي من يفهمك!
ريحان؛ايه..الحمد لله بيروح زيزو خلاص هو بس اللي يفهمني..
جنان؛والله اني بس اللي نفهم فيك باهي..
ريحان؛انتي اسكتي يامرخية التكه..
زياد ماقدرش يشد روحه قعد يضحك يصوت عالي..
هما فجعهم الصوت بعدين لما التفتوا وشافوه قالوا بصوت واحده من الفرحه..
"زيزو"
وجوه يجري وهو طبسلهم وضمهم ليه وهو يقول؛حب زيزو ياقلبه..كبرتوا ياشفشات..
ريحان بعدت وحطت يدها ع لحيته وقالت؛حتى انت ولى عندك لحيه زي متاع بابا..
جنان:متاعه هو اكبر..شوفي..وشوفي بابا..
ريحان؛المهم الى عنده لحيه.زي بابا..
قعدوا يضحكوا وزياد ضمهم مرة تانيه وهو يضحك...
🍁والاجواء عند فاتح تشبه للاجواء عند زياد..
اكثر شي فرحه انه مارجعش لهداكا القصر اللي ماعاشش فيه يوم حلو..
وفي كل شي بدي من اول جديد..
والزوز..
بعدوا ماقضوا شويه وقت مع اهاليهم..
خدوا دوش سخون ومريح...وكل فيهم رتب هندام وجهه...
كل واحد فيهم قعد واقف هلبه قدام المرايه ويتفكر في كل شي عاشه..
وهما اليوم بالمظهر الجديد..حيبدوا بدايه جديده كل شي فيها صح...
بس قبلها كانوا محتاجين لنوم مريح..
واللي هدا خش سريره الناعم والمريح ونسمات التكييف تبرد عليه...وراحو في نوم عميق...
🍁🍁🍁🍁🍁
الساعه الرابعه عصرا..
في المعهد اللي ياخدوا فيه سارة ودانيه كورس في احدى المواد..
دانيه؛ليك ثلاثه سنين وانتي تقولي في نفس الكلام وماصار شي..صدقيني لو في حاجه راهو قداش ليها عند بوك..
سارة حركت راسها بالرفض وهي تقول:لالا انتي مش فاهمه..بابا نفسه خايف من ردة فعلنا بس لما تتمكن مشاعره من غير مايشاور حد يديرها و....سكتت بعدين قالت بوجع...مش قادره نقولها ياربي...وحطت يدها ع صدرها..
دانيه:صدقيني كله وسواس ومافي منه حاجه صح وغدوة تقولي صاحبتي قالت..
غمضت سارة عيونه وتأففت بعدبن فتحت وقالت؛لا وفوق غدوة لازم نكونوا في مزرعتهم من الصبح عليك جمعه مباركه..
دانيه؛تو تفوت..
سارة؛ياربي شن بيفوتها..لاومعاها ولدها الهايف هداكا موجود اني وين نشوفه نتقزز..
دانيه؛هدا اللي مرة هرب من المصحه وجاكم للحوش وكتب رقمه..
سارة بقرف:امم..
دانيه؛ردي بالك منهم الاشكال هادم بقولي حتى حبس مايريبهمش..
سارة؛ماضيه اسود من لون شعري واحد صايع ضايع...اني محيرني بابا بس اللي فوق من اللي صار واللي ريناه مازال يعطي في وجه لهالنماذج ويخليه يصاحب زياد...اهو مش قتلك في ان ..مش من فراغ طبعا..ع خاطرها..
دانيه؛اخرطي..
سارة:مبردك دانيه اسخن ماعندي ابرد ماعندك..
ضحكت دانيه ..وشويه وخش عليهم استاذ الماده..
وهما وجههوا تركيزهم كله ليه...
🍁🍁🍁🍁🍁
"شن عندك تفضل"
اسماعيل خدي نفس وقال؛مش عارف شن نقولك...ليا تلاته سنين واني داس وكامد في قلبي كل مانجي بنفتح معاك الموضوع نتردد هلبه ونتراجع..
"موضوع شنو"
اسماعيل تنهد وقال؛رتاج...اني نحبك ونبيك ع سنة الله ورسوله... ولو قلتي باهي صدقيني مش حتندمي...
"امشي اطلع برا اقلب وجهك ياتافه يابارد والله ماني موافقه عليك لو ترقص بالهندي"
اسماعيل بإمتعاض؛كملت ياتافه! نادر؛والله مافي اتفه من كلامك..والله لو اني مكانها معاش نخليك تخطم من قدام المصنع..
اسماعيل:وين الغلط في اسلوبي ياابو الحروف!
نادر:كله ع بعضه غلط....نظام الجيل المشاكس...
اسماعيل بتهكم؛باهي نورنا ياجماعة الجيل الخطير انت!؟
نادر:والله مافيها تفصيل وشرح..امشي للمراة وقوللها اني نبيك وبنخطبك وتمت من غير لف ودوران ومقدمات..
اسماعيل تنهد وقال؛صعب هلبه..انت ماتعرفهاش شخصيتها قويه لدرجه لما نوقف قدامها مانقدرش ندوي في غير الخدمه..
نادر:باهي شن رايك تمشي بالاصول وتكلم خالتي تفتح الموضوع بروحها ولوا صحابها توا وماتصدق تعرف انك راغب رتاج..
اسماعيل؛لايانادر لا...امي صح مصاحبتهم لكن ماتوصلش لدرجة انها تخليني ناخد مراة ارمله وعندها ولد..
نادر بإستغراب؛ايه والمعنى!؟!
اسماعيل:اني نبي نضمن رتاج قبل وبعدين نخش مع امي في مواجهه...
نادر:ننصحك ماتفتحش الموضوع مع المراة الا وانت ضامن امك..خير ما تتعب هلبه بعدين...
سكت اسماعيل وهو يخمم..
نادر؛ربي يكون في عونك..
شبحله اسماعيل رفع حواجبه ونزلهم وتنهد بضيق....
🍁🍁🍁🍁
الساعه التاسعه ليلا...
طل من باب الكوجينه شافها كيف توتي في الخضرة للعصبان بإبتسامه قال؛نوارتي..
نوارة؛توحه حبيبي..
ضحك وخشلها وهو يقول؛مغسوله وواتيه؟
نوارة؛ايوه..
ضيق عيونه وقال:شن ناويين ديروا غدوة؟!
نوارة؛رشده كسكاس..وعصبان..وكبه..ومبطن..
فاتح؛حلو..وجاها شدها في ايديها وقال؛تعالي تعالي..
نوارة بضحكه؛ايه في ايه..
جابها للكرسي وقال:قعمزي عزيزتي..
نوارة بضحكه؛عايز تعملوا انت !؟
فاتح:يس..
وخش مكانها وقعد يشوف هي شن حاطه ويفكر في الناقص وقعد.يدور عليه..
يسأل فيها وهي تقوله وين..لين طلع كل شي يبيه..
نوارة؛حبيبي انت مفروض ترتاح اليوم كله وماتعملش حاجه..
فاتح وهو شاد الموس وبادي يقرض:مش باهيه ليا الراحه..والحق كرهتها..
نوارة ابتسمت وقالت؛فكرتني بأيام زمان..لما كنت تقعد معايا في المطبخ وتساعدني وتقولي اعمل دي ازاي واحط دي ازاي..
فاتح؛اول حاجه تعلمتها القهوة..
نوارة:لسا بتعلمها حلو ؟
فاتح؛اللي يشم ريحتها يدوخ..واللي يشربها يقول ماشربناش زيها..
نوارة:يااه وحشتني قوي..
فاتح؛نكمل اللي في يدي ونديرلك..
نوارة؛خليها بكرت الصبح..
فاتح؛ان شاء الله..قوليلي نوارتي شن درتوا في الحلو..
نوارة:الهانم حجزت في كم نوع وصلوا من شويه..
فاتح:مالا دسوه وخلوه عليا اني...
نوارة شبحتله شويه وقالت؛كل ده عشانها..
قلبه دق بقوة..وقف شويه بعدين رجع كمل شغله وهو يقول بضحكه؛عشان مين ياوليه انتي..
نوارة؛توحه ده انت ابني ماتوهش عنك..قفشاك..
قعد يضحك من قلبه لين وخر راسه شويه للخلف..بعدين شبحلها وقال بضحكه؛قفشتيني صار!
نوارة؛اه في تلات مرات اللي شفتهم فيها...اول مرة لما رحتلك المصحه..وتاني مرة في العيد قبل سنتين..واخر مرة النهاردة ده نسيت الدنيا كلها وفضلت تبصلها وبس..
عقد حواجبه وقال استعباطا؛من هي؟
نوارة؛فاتح.....اطلع من دول..اخت زياد صاحبك بنت الدكتور هيثم...سارة..
لما سمع اسمها تنهد من قلبه..وابتسم بحسرة ورجع يكمل في شغله وهو يقول:ديما نقول الماكله لما ندير فيها من قلبي توصل لقلب كل ماياكلها..
نوارة؛وانت فاكر انك كده حتوصل قلبها...
حرك راسه بالنفي وقال:لا..بس اهو نحاول بالك نخليها تشوفني..
نوارة؛وليه ماتشوفكش..ده بسم الله ماشاء الله زي القمر..وقلبك طيب وقدع وابن حلال..
فاتح؛وكنت صايع وعرفت قبلها الف بنت وماخليت مادرت ومدمن وثلاته مرات خشيت لمصحات الادمان وانحبست..حق بسم الله ماشاء الله!
نوارة بضيق؛المهم من جواك انت حد نظيف قوي..ومافيش فينا حد مابيغلطش كلنا بنغلط اهم حاجه انك تبت وبقيت قريب من ربنا..
تنهد وقال؛الحمد لله..
نوارة؛بص ياحبيبي..هي البنت نفسها اللي حصل معاها غيرها قوي..يعني حتتعب معاها...
فاتح بإبتسامه؛واني نبي نتعب عليها..تستاهل التعب ولاماتستاهلش..
نوارة؛هي من ناحيه تستاهل..تستاهل..بس خايفه تجرحك..
فاتح بإبتسامه؛للي يبي الورد يانوارتي يتحمل شوكه..
نوارة؛ده انت بتعشقها مش بس بتحبها..
ضحك وقال؛خلاص معاش تلهيني...
ورجع يقرض بسرعه..ونواره تشوفله بإبتسامه عطف...
وفتح معاها فاتح مواضيع تانيه وقعدوا يهدرزوا وصوت ضحكهم وصل لنوال وهي في غرفة مكتبها...
سيبت اللي كانت تقرا فيه..
ومشتلهم..
خشت عليهم شافاته واقف ع صونيه برم كبيره معبيه خضرا..
نوال بضحكه؛شن دير!؟
نوارة؛قال هو حيعمل العصبان..
جاته نوال وقفت جنبه وهي تشوف للصونيه قالت:تعرف ديره..
فاتح؛مالا شن تحسابيني زيك بايرة..
ضرباته ع كتفه وقالت؛تحشم..
فاتح؛قولي نوارتي تعلمت تخش الكوجينه!؟
نوارة؛اه تعلمت تعلمت تدخل تعمل قهوة لنفسها وانا اللي ارجع الفناجين..
نوال غطت وجهها خجلا..
وفاتح يشبحلها ع جنب ويقول؛باهي الناس اللي بيجوا غدوة كان قالوا عطيك الصحه ع الغدي المبدع شن تقولليهم..
حولت ايديها من ع وجهها وقالت؛نقوللهم من الاول مش اني اللي درته..
فاتح؛بالله مش عيب توصلي للعمر هدا دحية ماتعرفيش تقليها..
نوارة؛هي نرجس تعلمت ماشاء الله وبقت ست بيت شاطره..
فاتح؛وامها بايره..
شداته من وذنه وقالت؛تحشم ياقليل الادب هدا واحد..اتنين عقاب ليك انت بتعلمني ندير العصبان وتوا..
فاتح؛ياعيني..استعنا بالشقا ع الله..
🌼وبدي فاتح يعلمها فيها شن ندير..
وهي كانت زي الاطفال مش عارفه حاجه..
فاتح:اغسلي الرز كويس وصفيه زين.
نوال :باهي باهي...
•••••••
فاتح؛قرضيها صغيره الكبده مش كبيره هكي..
نوال بقرف؛باهي..هاه..هاه..
•••••••
نوارة:احلى حاجه في العصبان بنة لية الخروف الله تحفه..
فاتح؛سهفتيني..
ونوال تقص في الشحم وهي قريب تبكي وتقول؛غير كيف ناكلوا فيه بس!.
••••••••
فاتح؛كلها كلها حكة الطماطم كلها..
نوال؛يافيه من امراض العصبان هدا الحمد لله ماناكلش فيه..
فاتح؛اخدمي وانتي ساكته يامخمليه..
قعدت نوارة تضحك...
وامه تشبحله ع جنب..
•••••••
فاتح؛زيدي شمري كمامك فوق وخلطيها كلها مع بعضه..
نوال:لالا ولدي كمل انت..
فاتح؛وربي مامكمله واحد.غيرك..
نوال غمضت عيونها بشده وعيطت بكتمان..
وبدت تحرك في الخلطه بيده وحده برووس صوابعها ونواره تضحك عليها وفاتح يعطي فيها ع راسها..
لين خلاها تخلطه بايديها الزوز...
••••••••
فاتح،وتوا نجوا لاحلى مرحله..
طلعلها صونيه معبيه كرش مخيطه ومصارين..
نوال حطت يدها ع فمها وهي منقرفه قالت:لا مستحيل..حرام عليك ولدي..
فاتح؛اني حلفت..
نوارة بضحكه؛ساعدها شويه..
فاتح؛امري لله..
وقعد يحشي هو وياها..
في الاول كانت مش متقبله بعدين كملت عادي..
ومشوها بالهدرزة لين كملوا..
🌼نوال وهي تتأمل في الصونيه المعبيه عصبان ني قدامها وهي مندهشه قالت؛درت عصبان مش مصدقه عيوني..
نوارة ضحكت..
وفاتح ضحك وضمها بذراعه وباسها ع راسها..
وهي مازال مندهشه في نفسها...
•••••••
نوال وهي تغسل مع ولدها في الماعين؛يعني عادي ينحط في الفريز لغدوة مايصيرله شي..
فاتح؛ايه مايصيرله شي..
وكملوا غسل ماعين ..وضموا الكوجينه مع بعض..وكملوها..
نوال؛خلاص كبس عليا النوم...
فاتح:حتى نوارة مشت رقدت...بري ارقدي بري..
نوال؛انت مازال؟!
فاتح؛مازال عندي كم حاجه نديرها بعدين نركب نرقد..
نوال؛تمام تصبح ع خير ماما..
فاتح؛وانتي من اهله..
مشت نوال طلعت...
وهو شاف للساعه لقاها خشت ع الساعه واحد..
طلع من الكوجينه..
ومشي توضا وصلى الوتر العاده اللي قعدت معاه من السجن...بعدين ولى مرة تانيه للكوجينه..
وخش في عالم الحب اللي يتمنى مايطلعش منه..
وهو يتخيل فيها..كان يدير في الكب كيك والكوكيز..
اكثر نوعين حلو تعشقهم سارة..
يدير فيهم وهو يذكر فيها كيف تاكل فيهم بشغف..
قلبه يفرح وين يذكر كيف تاكل من يده بشهيه..
ولامرة ردت حاجه هو دايرها وتكون عارفه انها من يده هو وتاكل فيها عادي..
هدا علاش كان متأمل انه يعكس المثل اللي يقول..
اقرب طريق لقلب الرجل معدته...
وهو عارف ان الماكله اللي تندار بنفس حلو ترجع بالايجاب ع نفسية اللي ياكل فيها..
وهو ديما يقول سري اللي يخلي بنة الماكله متاعي غير اني نديرها من قلبي ..
لهدا اختار يدير الحاجات اللي تحبه هي ويحط فيها مشاعره كلها...
لعل اللي يديره من قلبه ليها...يوصل لقلبها يوم من الايام....
#فاتح_سارة
#البطل_المغمور2
....يتبع....
