#البطل_المغمور2 "زهور القمر"
#جمان_فريد
#الجزء_التاسع "قضاء وقدر"
العمل الصالح هو الرفيق الوحيد في القبر..
واحب الاعمال إلى الله الصلاة في وقتها
صلوا قبل...
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
💐💐💐💐💐💐💐💐💐💐💐💐💐💐💐💐💐
مقعمزة في سريرها وشاده في يدها تليفونها تشبحله...
كانوا عيونها متورمات من البكي..وانفها من محمر من كثر ماتسمح فيه...
وقلبها خايف وموجوع...
رجف قلبها لما رن تليفونها..
فتحت الخط بلهفه وردت:شن صار قول بسرعه.
"حكموا عليه 3سنوات استاذه"
هي تنهدت وقالت:الحمد لله..من قال بيه..
"حاولت جهدي يااستاذة"
نوال:درت واجبك وزياده استاذ عبد الرؤوف بارك الله فيك"
"فيك بارك الله..تبي شي"
نوال:مشكور جدا..السلام عليكم..
"وعليكم السلام"..
وسكرت..غمضت عيونها وخدت نفس عميق..
دق باب دارها..
فتحت عيونها وقالت:ادخل..
انفتح الباب وخشت بنتها نرجس..
نرجس؛نونو خيرك قاعده في سريرك مريضه؟
نوال؛شكلك نسيتي محاكمة فاتح اليوم..
نرجس بصدمه؛حي عليا مش عارفه كيف نسيت..
نوال تنهدت ورمت روحها ع المخده..
قدمتلها نرجس وهي تقول:توا هي؟
نوال وهي تشبح للسقف:بكري شويه حكموا عليه 3سنوات..
نزلوا دموع نرجس وهي تقول:كله مني اني..
نوال شبحتلها وقالت:خوك هدا متهور ودفع ثمن تهوره..
ابتسمت نرجس تهكما وقالت؛كنت حنستغرب لو قلتي غير هكي..
ومشت طلعت من حداها وسكرت الباب..
نوال اذكرت كلام هيثم ليها بعد سمعت كلام بنتها..
غمت وجهها بالورغان وقعدت تبكي...
🍁🍁🍁🍁
ومن حوش هيثم زغاريد خالته كان صوتها مسموع...
صح زياد حياخد عقوبه في السجن...
لكنها هينه قدام اللي كانوا خايفين منها...
والأهم من هدا كله انه تبرأ من تهمه تمس شرفه واخلاقه...
نسيبه بدموع؛يارب يخلوه يجي لعرسي يارب نبيه هو يدخلني الصاله...
ماجده:يارب يارب..
نسيبه بضحكه؛غير امتى تروح سارة بس..
ريحان:خيره زياد نجح؟
شبحولهم شويه بعدين قالت ماجده:ايه نجح نجح...
التوأم الزوز ابتسموا بفرح وريحان قعدت تصفق من الفرحه...
••وفي حوش جيرانهم
في الجنان..
عفاف:حس زغاريط ماجده نعرفها..
صالحه:اكيد حكموله براءة..
عفاف:لابراءة لا..قالي امس خليل بيحاسبوه ع ضربته لهدا المعفن..
صالحه؛تي مش حامى ع البنيه!؟
عفاف:ايه لكن خليل قالي هو حاما عليها وضربه لو ماضرباش هديكا الضربة اللي قريب قتله فيها راهو ماصارش فيه هكي اصلا..
صالحه:باهي علاش الزغاريط..
عفاف بضحكه:ماهو ياحاجه قبل حكموا عليه مؤبد لكن توا بعد عرفوا السبب وهداكا الشيطان ناض منها تخفف الحكم..
صالحه:اها كان هكي عندهم يزغرطوا..
ضحكت عفاف...
🍁🍁🍁🍁
في المدرسه..
كملوا البنات امتحاناتهم وطلعوا مع بعض...
سارة:من الخوف والتوتر نحس في روحي عكيت..
دانيه؛ان شاء الله توا تروحي وتسمعي اخبار حلوة تريحك..
سارة:يارب..
هبه بضحكه:دنون خطيبك جي..
دانيه قلبها طار من مكانه...شبحت وين ماتشبح هبه لقاته بنفس الهيئة اللي تعود يجيها بيها..
ع الموطو ووجهه مغطي بالخوذة..
ابتسمتله وهو ردهالها بانت في عيونه...
غيرت عيونها عنه وهي متحشمه..
سارة بضحكة قالت..
عز اللقاء فإنني ملهوف..
والشوق ماعادت تفيه حروف...
دانيه ضحكت بخجل وعيونها لوطا..
وهبه قعدت تغنيلها بصوت هامس..
دانيه بخجل شديد؛خلاص عاد مبردكم ..
وهما يضحكوا..
ومن بعيد شويه جمعه واقف ع سيارته يشبحلهم وكان يلقى يمشي لراجح يبرد ناره فيه بطريحه...
فجأة..
"جومعه"
شبحلها وقال:خوك يدير في جو مش ليه حركات مراهقين..
جيهان:جاي يشوف شن خطيبته شن دار من غلط هاك انت يوميا تشوف فيا..
عقد حواجبه وقال:كان نعرف شن غير رايك هكي بس!
جيهان:مافي شي تغير قاعده مانحبهاش لكن خوي يحبها لازم نقبلها..
هو مصمص شواربه وقال:باهي بري اركبي سيارتك بري..
هي تنهدت بإبتسامه ومشت ركبت سيارته وعيونها عليه؛تنخطب لخوي واني ضامنه انه مستحيل يخليها ولا خليها هكي بش تسيبني وتاخدها هي..توا بعد تتزوج اطلعها من راسك غصب عنك..
وشغلت سيارتها وتحركت وهو تحرك وراها..
وفاتت من جنبهم سيارة مجاهد..
هبه:حي دانيه خوك جي مش مروحه في الباص!؟
دانيه بإستغراب؛ماقاليش بيجي..
وسارة تسرقله في النظر..
هو كلكس بقوة..
دانيه:لالا في حاجه يارب سترك..
ومشت طول بدون ماتودع صاحباتها وهما تبعوها بعيونهم ونظراتهم كلها قلق..
وصلت دانيه في السيارة وركبت..
دانيه:شن في..
تحرك مجاهد بدون مايتكلم..
دانيه :مجاهد بديت نرعش.
مجاهد بصوت خشن حزين:بوي دار حادث هو عادل راجل اختك..
توسعوا عيون دانيه بصدمه..
مجاهد:الزوز حالتهم خطيرة..
دانيه حطت يدها ع قلبها وبدت تحس في روحها ترعش..
هو شبحلها بعدين شبح القدام وقال؛شن تحسي..
دانيه وهي تنفس بصعوبه:كان في عندك حاجه حلوة عطيني..
هو طول طلع من درج السيارة طرف حلوة وعطاهلوها..
هي فتحاته وكلاته طول..ودموعها نزلوا..
🍁الخبر يفجع..وجعتها اختها...ووجعها بوها..يقعد بوها مهما دار🍁
•••قدام المدرسة..
سارة:شغلتني الحق
هبه:حتى اني وجه خوها مايتفسرش ان شاء الله خير..
سارة:ان شاء الله..
فجأة درست قدامها سيارة سوداء اندهشت وهي تقول بضحكه:بابا..
هبه ابتسمت وقعدت تشبحله..
وهيثم يشوف لسارة من ورا نظاراته وهو مبتسم..
سارة:هي سلام هبوشه..ومشت .
هبه بإبتسامه:سلام..
ركبت سارة السيارة وقالت:الله ع المفاجأة..
تحرك هيثم وقال؛قلت نجي نبشرها بروحي.
سارة بلهفه؛بشر هيا..
هيثم:3سنوات بس..
تنهدت وقالت:الحمد لله الذي بنعمته تتم الصالحات..الحمد لله..باهي وهو شني فرح بالحكم..
هيثم:هلبه..اول ماسمعه سجد سجود شكر..
ابتسمت سارة وقالت:والله مابطلت تخميم فيه لين عكيت شويه في الامتحان..
هيثم؛مااتفقناش على هكي..
سارة:مش بيدي بابا غصب عني..لكن باهي توا الحمد لله هم وانزاح ندير امتحاناتي واني مرتاحه..
هيثم ابتسم وقعد ساكت..
سارة:بلغت العيله..
هيثم؛خالتك قلبتها زغاريط سكرت عليها..
ضحكت سارة وقالت:ياريتني معاهم لما كلمتهم..
هيثم؛غير تباني عليهم.تشوفي شن يديروا مافاتك شي..
ضحكت وقعدت ساكته..بعدين قالت:بابا نبي تليفونك شويه نكلم صاحبتي دانيه خوها جي روح بيها بكري بدون مايخبرها وباين في حاجه صايرة واني انشغلت هلبه...
هيثم مدلها تليفونه..
خداته سارة وقالت؛تعرفها بابا انت بنت الراجل اللي كان واخد خالتي ماجده..
رفع حواجبه وقال:اها..
وسارة بدت تسجل في رقم دانيه وهي تقول:حوشهم قريب ع المدرسه اكيد وصلت من بكري..
وحطت التليفون ع ودنها وقعد الخط ينادي مرة تنين تلاته فالرابعه انفتح الخط..
سمعت صوت بكي ودوشه..
سارة بخوف:دانيه..
"ايوه سارة"
سارة:شن صاير عندكم..
بنبرة باكيه..
"بوي وراجل اختي دارو حادث والزوز حالتهم خطيره..
سارة؛لاإله إلا الله..
عقد هيثم حواجبه وشبحلها بعدين شبح للطريق..
"بنسكر سارة معليشي"
سارة؛ربي يطمنكم ان شاء الله..
"إن شاء الله"
سكرت سارة وقالت:بوها وراجل اختها دارو حادث وحالتهم خطيرة..
هيثم بأسف:لاحول ولاقوة إلا بالله...
سارة مدتله التليفون وهو خداه...
وكملوا طريقهم للحوش..
بوها حطها ومشي طول...
اتصل في الطريق بمجاهد وفهم منه شن صار وفي أي مستشفى هما وتوجهلهم طول..
🍁🍁🍁🍁
"تلاته سنين حتى انت ان شاء الله في عنبر واحد ياربي بش بوك يهتم بيا معاك"
زياد قعد يضحك..
خميس:شكله مصيرك بيولي مربوط بيهم ياتوحه..
فاتح ابتسم وقال؛الحق مانبيش نخسرهم لزياد لابوه..
زياد:حني نبوا نخسروك..
فاتح؛بردوا حنتمسك بيكم..
زياد؛دير كرامه الهم..
فاتح:في الحب مافيش كرامه..
خميس ضحك..
زياد بضحكه:تافه...
زياد؛تعالى جاي تعالى..حط يده ع كتفه وقاله..اعترف الفيديو متاع الحلوف هداكا انت وراه؟
فاتح بإستعباط؛فيديو شني!
خبط زياد كتفه وقال:معناها انت..مذكر قبل لما تكلمنا وقتلي ومن اعمالهم سلط عليهم..اني سألت شن في راسك قعدت تلف ودور وبعدها معاش حكينا في الموضوع ولاسألتني عنه..راني بديت حافظك كويس..
فاتح بضحكه وتوسل؛بالله عليك ماتقولش لبوك..
زياد؛اكيد مش حنقوله كان عرف هدا وين بيقصك...
خميس:كلا انت كان خشيت للحبس بدير فلايط..
زياد:مانخليشي .
فاتح:من اكبر جحي ولا ولده..
زياد:معاك انت ولده طبعا..
ضحكوا فاتح وخميس...
🍁ومن ضحكات صنعتها لحظه سعاده..لخوف صنعه لحظة كارثه...
كان مجاهد مع ولاد عادل وخوته في المستشفى يستنوا ع نار امتى يطلعوا الدكاترة ويقولوا شي يطمن..
ع جية هيثم شاف مجاهد واقارب عادل..
هيثم؛مجاهد..
مجاهد شبحله واتفاجئ قال:دكتور هيثم..
جاه هيثم وقال:هاه شن صار؟
مجاهد:مازال ماطلع حد..
هيثم هز راسه وقال:خير إن شاء الله..
مجاهد تنفس بقوة و مسح ع شعره وقال:إن شاء الله..
ع طلعة الدكتور..
كلهم مشوله..
ولد عادل:شن يادكتور بشر!
الدكتور وع وجهها باديه ملامح الأسف:مجيد حيقعد تحت الملاحظه وضعه قاعد حرج..
:وبوي..
الدكتور:عظم الله اجركم..
انصدموا ولاده وخوته بقوة ومجاهد قال بصدمه:إنا لله وإنا إليه راجعون..
وهيثم كذلك استرجع..
الدكتور:للأسف هو وصلنا شبه ميت حاولنا معاه بس قضاء الله ونفذ..
ولاده من صدمتهم ماداروش اي ردة فعل..
بس خوته ماقدروش يشدوا دموعهم...
هيثم بأسف؛عظم الله اجركم الله يرحمه ويغفرله..
واحد منهم رد؛آمين..
ومجاهد يشبحلهم بأسى ويفكر في حال بوه واخته..
الدكتور:دكتور هيثم حضرتك تقرب لواحد.فيهم؟
هيثم:ايه في معرفع بيني وبين واحد فيهم..ممكن دكتور لحظه..
الدكتور هز راسه ومشي هو وهيثم..
ومجاهد اللي رجليه معاش حملوه قعمز ع الكرسي وعيونه معاهم...
🍁🍁🍁🍁
تخبط ع رجليها وهي تقول:ياحي عليا ياحي..وينهم لتوا وين..
:صلي ع النبي ياسدينه..
سدينه ببكي؛عليه الصلاة والسلام..ياوخيتي نار نار حي عليا مولى بيتي وحي عليا راجل بنتي..
مقبوله:حرام عليك ياسدينه لايجوز اللي ديري فيه هدا اتقي الله وادعيلهم بس..
سدينه رفعت عيونها فوق وقالت؛ياربي الطف بينا ياربي..
ورتاج حداهم هي ودانيه..والزوز كانوا يبكوا بصمت..
والجيران يواسوا فيهم...
شويه طق واحد من الجيران الباب ونادى:رشيد..رشيد..
رشيد طلع يجري...
وهما قعدوا يترقبوا...
شويه ورشيد نادى وحدة من الجارات تطلع لراجلها....
وناضت وطلعتله...
لحظات وولت ووجهها في لون تاني..
:سدينه الحاج مجيد قاعد في العنايه قالوا...لكن راجل بنتك توفى..
رتاج قعدت تشبح للمراة وهي مصدومه..
وامها بدت تعيط وتنوح ومقبوله تعارك فيها..
ودانيه ضمت اختها وهي تقول:رتاج..رتاج..تسمعي فيا
رتاج بصدمه:عادل مات!
دانيه بدموع:الله يرحمه ويغفرله..الله يرحمه...
ودموع رتاج مازال ينزلوا وهي في حالة عدم استيعاب للي صار..
🍁ولا في من مستوعب الخبر من عيلته.....
الصدمه الأولى ماكانش معاها صبر بالذات همانه اللي كاد يجننها خبر فقدان بوه النهائي...
🍁🍁🍁🍁
"صح في عيوب الدنيا كلها لكن وجعني مش عارفه كيف"
نسيبه:طبيعي يوجعك كانت في بيناتكم عشرة..
سارة بحزن:سخفتني رتاج مسكينه ..
ماجده:ايه والله هي اللي توجع بختها راقد رقاد..
نسيبه:قضاء الله وقدره كله فيه خيره ياخالتي ربي يديرلها طريق..
ماجده؛ان شاء الله مسكينه..
🍁ومرت ساعات هاليوم ع عيلة مجيد وهما مش عارفين كيف مرت..
فاجعه موت عادل...على حالة مجيد اللي بين الحياة والموت..
ومقبوله اللي قاعده تفكر في وضعها وشن بيصير فيها هي ماصدقت تزوجت ماتبيش تولي مرة تانيه لحوش بوها..
وقعدت طول الوقت تدعي في السر والعلن ربي يسلم مجيد وماينتهيش زواجها بسرعه هكي..كيف سكرت شهرين بس!
🍁تاني يوم..
مجاهد؛مكانك غادي يارتاج مات وانتي مرته راهو لازم تكون عند اهله توا في حوش العزي..
سدينه:خوك عنده بنتي لازم تمشي غادي..
رتاج وهي مضايقه قالت؛باهي..خل نوض نلم حوايجي..
سدينه:اصبري..
رتاج؛خيرك يام!؟
سدينه:لازم تخبريهم انك حامل..
مجاهد بصدمه:كيف !؟
رتاج زادت اضايقت وقالت:يام..سامحيني.
قاطعتها وهي تقول:كان ماقلتيش انتي يقول خوك..
مجاهد؛معناها كنتي مدرقه عليه حتى هو!؟
رتاج بإنفعال؛ياودي اسمعوني..مش حامل اني مش حامل.
سدينه:شن تقطفي انتي شن تقولي!؟
رتاج نزلت راسها وهي منحرجه:كذبت يام بش بوي مايضربنيش يومها..
سدينه بصدمه؛كيف !..
مجاهد بعصبيه؛ماطيريهاليش يارتاج وقولي الحق...حامل ولا لا!؟
هي كانت حتموت من الأحراج؛لا والله لا مش حامل..
سدينه بعصبيه:باهي نوضي نوضي..نوضي تحركي وتي روحك..
هي طول ناضت ومشت..
مجاهد:وانتي يام هدا وين تقوليلي!؟
سدينه:هي قالت ماتبيشي يعرف وتبي تشعفه واهو طلع كذب مرة وحده...
مجاهد حرك راسه يمين ويسار بأسف وقال:ربي يهديك يام وخلاص...
وسدينه هربت بعيونها عنه وهي محرجه..
🍁وجهزت رتاج نفسها وطلعت مع خوها متوجهين للمنطقه اللي يعيشوا فيها اهل عادل وكلها خوف من ردود الأفعال...
•••في الوقت اللي كانت فيه عفاف تحكي عن اللي صار فيها لصالحه بعد ماحكتلها تهاني اللي عرفت القصة من سارة..
عفاف؛ خسارتها بنية زي الوردة.
صالحه:ايه والله زي الغزاله لكن بختها بالهون خداته كبير عليها هلبه وماسكرتش معاه سنه وتوفى..صغيره مسكينه وترملت بكري بكري..
ع خشة جهاد؛ صباح الخير...من هي هادي اللي ترملت بكري بكري..
صالحه:صباح النور...هادي البنيه بنت سدينه اللي كانت ضرة ماجده..
جهاد كان حط ايديه في جيوبه حولهم وهو مصدوم قال:راجلها توفى!؟
عفاف شبحتله بتضييقة عيون..
صالحه؛ايه امس..
هو غير عيونه عن صالحه وقعد يشبح في الفراغ..
عفاف:جهاد..
ماردش.
عفاف:هييه جهاد وين رحت!؟
جهاد شبحلها وقال؛لا قاعد..غمض عيونه وفتحهم فيسع وقال بشي من الربكه..بنقولك..تليفون تهاني عندك بنبعتلك صور صالون نبيها تبعتهم لمريم تاخد رايها فيهم..
عفاف:ايه..اهوا...وطلعات من جيب قفطانها..هاك..
خداه وطلع تليفونه من جيب سرواله وبدي يبعت ومرة مرة يسرح..
وامه مركزة معاه...
🍁🍁🍁🍁
"شن جابك انتي شن جابك علاش جايه"
هادي همانه اول ماشافت رتاج خاشه اندفعت ناحيتها وجت بتضربها لولا تدخل عماتها..
همانه بعياط؛طلعوها من هني هادي اللي خدت بابا هادي اللي خدت عمره..
ورتاج تشوفلها ودموعها ينزلوا..
عمة همانه؛عيب اسكتي وبري قعمزي حدا امك..
همانه؛طبعا مالا شنو بدافعوا عليها..كله مكر في ماما..
ضربتها عمتها كف وقالت؛سكري فمك ياقليلة الربايه تي كان في من قتل بوك انتي وامك هادي وخيي في اخر ايامه كان متكدر ومش مرتاح من جرايركم انتي وامك نكدتوا عليها..النكد كله شافه لما خداها امك هادي وهو مغصوب عليها وماعاش ولاأرتاح كان لما خدي رتاج..
ام همانه:الله يسامحك ياصالحه هكي تقولي ع بنت عمك!
:ماقلت كان الحق عملة بنتك السودا خلت خوي يموت وهو متكدر الله ياخد فيكم الحق..
وهدا كله كان قدام الناس واللي مايشتري يتفرج ع خاطر المصاروة واصل الصوت للتريس..
وهما يتعايطوا ويترادحوا...
ورتاج مقعمزة تتفرج عليهم زي المصدومه..
وبسبب اللي صار فضل مجاهد يروح بأخته مايقدرش يخليها في وسط مشحون زي هدا هي فيه مستهدفه...
🍀🍀🍀🍀
ومرت تلاته ايام...
حال مجيد تحسن وطلع من العناية المشدده لغرفه عاديه..
لكن...!
مجاهد؛قال رجليه مش قادر يحركهم يادكتور ومش حاس بيهم..
الدكتور بأسف؛صحيح..للأسف الاصابه اللي تعرضلها استهدفت الحبل الشوكي وسببتله شلل جزئي..
مجاهد بصدمه:شلل!
الدكتور:مع الأسف...اني عطيت فكرة عن وضعه للدكتور هيثم ماقالك شي..
مجاهد ودموعه في عيونه وهو مصدوم حرك راسه يمين ويسار نفيا...
🍁🍁🍁🍁
مقعمزة ع كرسي في ممر المستشفى وهي تشوف للروشن وسرحانه..
في كل الأحداث اللي صارت معاها اخر مرة..
لما استعانت بخطيبها في حل مشكلتها طول فسخ خطبته منها..وخبر اهلها بكل شي...
وصارت مشكله كبيرة خلت خوتها يمنعوها من الطلوع..
وبوها تعب وربي نجاه للمرة تانيه..
بش يدير شي صعب جدا ع أي اب في مجتمعنا يديره لبنته لو كانت في وضعها..
وقف ومعاها وشجعها تشهد بالحق..
ويسبب هالشي صارت مشكله بينه وبين ولاده خلاته يطرهم من الحوش والعزري فيهم معاش روحله بكل..
تعبت هلبه بس بوها كان مقويها وامها واقفه معاها ومش متحشمة في شي..
وتواصلوا مع احسان وقالوله ان رنيم حتشهد لصالح زياد..
ووجمعهم بهيثم ودار بينهم حديث طويل..
خلا رنيم زادت تقوت اكثر وتشجعت...وجي اليوم اللي زالت فيهم هم كبير كان جاثم ع صدرها...
بس هي توا مش عارفه كيف بيصير بينها وبين خوتها اللي رافضين يجوا للحوش ورافضين يسمعوا عنها شي..
برغم ان اسمها ماطلعش نهائيا وبرغم انشغال وسائل الاعلام بأخر مستجدات القضيه مافي برنامج او خبر ذكر اسمها حتى بالرموز..
لكن يكفي ان واحد تافه زي خطيبها يعرف اللي صار معاها ويقعد يحكي بيها...
وفي عز سراحانها...
"السلام عليكم"..
استاقظت والتفتت..ناضت وقفت وهي تقول:شن مازال في تاني!؟
احسان بإبتسامه؛تعطيني من وقتك نص ساعه..
رنيم؛لا...ومشت عنه وخلاته وهي مش طايقه تشوف لوجهه..
هو قعد معاها بعيونه وابتسامه جانبيه حلوة ع وجهه هز راسه بعدين مشي ...
🍁🍁🍁🍁
في مقهى البيرق..
رشف من القهوة وقال:امم..والمعنى؟
احسان؛مش في بطن الشاعر واضح وضوح الشمس..
هيثم بضحكه:على هكي بتتعب هلبه..
احسان حك رقبته من الخلف بعدين قال:عارف..من جهة هي ومن جهة ولدي..الموضوع معقد شويه..
هيثم؛وانت علاش تجيب لروحك في وجع الراس..
احسان:وجع راس شني..اعتقد من حقي نتزوج ونشوف نفسي.
هيثم:ماقلت شي بس مازال شويه راعي مشاعر ولدك امه ماسكرتش عام ..
احسان؛كل ماطول المده كل ماتزيد تتعقد اكثر حياخد عليا ليه هو بروحه ومش حيتقبل اي حد يشاركني فيه..زي ماصاير معاك..
هيثم بإستغراب اشر ع نفسه..
احسان هز راسه وقال؛ايه معاك..صغارك تعلقوا بيك لدرجة يرفضوا فيها رفض تام دخول مراة غريبه عنهم في حياتك..
هيثم؛وكيف شفته الشي هدا!؟
احسان:لاحظته لما جيت نزور بنتك ريحان وكانت معاي لجين شفت كيف مش متقبلينها ورافضين وجودها..
هيثم مسح حاجه وابتسم بعدم اقتناع وقال:يتهئلك شن في بيني وبينها بنت الناس ولاشن شافوا منها!؟
احسان:انت مش شايفاه؛البنت معجبه بيك..
هيثم رفع حواجبه..
احسان:ونحس فيك زابط غير تستعبط.
نزل حواجبه وقال:موضوع هدا معاش نبي ندوي فيه مرة تانيه لجين عندي زي نسيبه وبس..وفكرة وجود مراة تانيه في حياتي غير اسيمه مستحيله بالنسبة ليا...
اني حالي عبر عنه الرافعي لما قال..
إنه ليس معي الا ظلالها..ولكنها ظلال حية تروح وتجيء في ذاكرتي وكل ماكان ومضى هو في هذه الظلال الحية كائن لايفنى..
ابتسم احسان وهز راسه وقعد ساكت..
وهيثم تنهد وشبح لفنجان القهوة وعيونه يلمعوا بالدموع..
فجأة رن تليفونه..
قامه من ع الطاوله شاف المتصل رد طول..
هيثم:السلام عليكم مجاهد..
•••••••••
في باحة المستشفى..
هيثم:لازم يعرف مافيش مفر..
مجاهد بألم؛خايف عليه من الصدمه عارفه بوي مش حيتقبل بكل..
هيثم؛ومافي حد يتقبل حاجه زي هادي وان اظهر الرضا..بوك لازم يعرف فورا..هكي ولاهكي بروحه حيفهم ولو كان مافي معاه حد وقتها ردة فعله حتكون صعبه جدا...اعرف كيف تجيبهاله بس..
مجاهد خدي نفس وزفر بقوة..
هيثم:لاحول ولاقوة الا بالله..رددها وانت ماشيله...
مجاهد تنهد بتوتر وهز راسه بإيجاب..
🍁وقعد يردد فيها همسا من قلبه..لين وصل في الحجرة اللي فيها بوه..
فتح الباب وخش...
مجيد والكدمات والجروح معبيه وجهه وايديه وراسه ملفوف بفاشة بيضا لما شاف ولده قال؛وينك ياولدي خيرك عطلت..
ابتسم مجاهد وقعمز حداه وهو يقول:اهو جيت..شن اخبارك اليوم..
مجيد؛مش باهي ياولدي رجليا مش حاس بيهم بكل ومش قادر نحركهم نبيك تنشد الدكاترة نبي نعرف شن صاير فيا..
مجاهد.خدي يد بوه وشدها وقال:بوي انت راجل ملتزم وقريب من ربي..مؤمن بقضاء الله وقدره خيره وشره ولا؟
مجيد ودموعه عبوا عيونه:انشليت قصدك!؟
مجاهد قعد يشبحله وهو ساكت...
مجيد نزلوا دموعه وهو يقول:اني مشلول توا..عاجز ولا..يقعدوا يعانوا فيا..ويتأففوا مني..ويعافوني ولا...بنقعد ملطشة واللي هدا يلوح فيا للتاني..وامك وخواتك بيحصلوها فيا فرصه..
مجاهد؛بوي استهدي بالله ماتقولش هكي نحطوك في عيوننا وفوق راسنا يابوي..باس يده اكتر من مرة وشبحله وقال..اني مانخليك لحد..
مجيد ودموعه ينزلوا:مقبوله تو تسيبني وامك حتى هي ماتصدق طحت تو تخليني نعاني بروحي امك تكرهني ماتحبلي وجه..
مجاهد قاعد يساير فيه لأن متفهم حالته:مش مخليك بروحك مش مخليك في عيوني نحطك يابوي..
مجيد انهار بالبكي وقال:ياريتني اني اللي متت ياريت..
مجاهد قرب منه وباس راسه وقعد شادله يده وهو يقول..اذكر الله قول لاإله إلا الله..
مجيد بنبرة باكيه وكأنه طفل صغير:ماتخلنيش بروحي ماتخلنيش..
مجاهد ماقدرش يشد دموعه حط راس بوه ع صدره وقعد يمسح عليه ويقول:والله مانخليك..مش مخليك..
🍁🍁🍁🍁
تاني يوم..
بعد العصر...
في حوش اهل مقبوله..
مقبوله:لا طبعا مش قليلة اصل بش نخليه بالعكس نقعد معاه بش نكسب فيه الأجر..
بوها؛هدا الصح يابنتي هدا اللي متوقعه منك..
ابتسمت مقبوله وهي دلك لبوها في يده..
برا من دار بوها...
تحديدا فوق في شقة كنتهم..
كانت مقعمزة ع تليفونها وبدت تهكر في حساب تاني لزوجها..
حسابه الأول مالقت فيه شي..ولما عرفت ان عنده حساب تاني قررت تهكره حتى هو..
:اها...مامنزل فيه شي واضح..خل نخش ع الخاص طول..
وخشت ع الخاص...وفي بالها بتلقى اللي تفكر فيه..
ولكن هو صدمها صدمة عمرها..
المراة تقرا في المحادثات وهي مش مصدقه عيونها مصدومه بقوة...
هدا شيخ..يقري في قرآن..حافظ كتاب الله مدعي انه يتبع للسلف والسلفيه..
مستحيل..!
المراة تحاول تكذب عيونها...
تقول ياريته اللي في بالي كان صح..كنت اني خديتله وحده تانيه ارحم من اللي شفته توا...
طلقت التليفون وخبطت ع وجهها وهي تقول..
حي عليك ياإيمان غبارتك السودا ياإيمان.....
🍁🍁🍁🍁
"تعانيه هديكا الشنفاكه"
سدينه؛رتاج فكيني من طولة لسانك..
رتاج؛هاه سكتت..سكتت..وبنقعد نتفرج ونشوف شن يصير..
سدينه:هي نوضي البسي حاجه باهيه واطلعي للناس ..
رتاج من فوق نفسها؛باهي..
ومشت امها طلعت من حداها..
وهي بدلت ع السريع..ومشت بتطلع..
لما جيت فايته من جنب الكوجينه شمت ريحة القهوة..
كبدها زهقت..وحست روحها تبي ترجع..
حاولت تشد نفسها وتكلم طريقها بس وين قربت توصل للصاله.. معاش قدرت تتحمل و لفت تجري بطريقها للحمام...
...يتبع....
