#البطل_المغمور2 "زهور القمر"
#جمان_فريد
#الجزء_التاسع_والعشرين "فرحتنا وحده"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
يمرر في نظره ع زملائه وصحابه..
اللي في حضن بوه..واللي بوه شاد ذراعه..
واللي تضحك معاه اخته..واللي يتبادل في نظرات الحب هو وزوجته..
واللي يحضن ويبوس في صغاره..
وهو وسط هدا كله حاله من حال اليتيم في العيد..
وشعور اليتم اللي حسه فاتح في حياته كلها..
اقسى من شعور اليتيم حقيقة اللي فقد بوه وامه بالموت
ومع هذا قال لروحه...
مش جديد عليك ..مش اول مرة تعيش هالحاله...
عشتها مرات ومرات..ولسنين طويله...ماحلك تتعود يافاتح...
وعيونه اللي يدوروا في شقاه...تمادوا بنظرهم لأول انسانه دقلها قلبه في حياته كلها...
يشوف فيها كيف تهدرز وتضحك..
هام في تفاصليها الحلوة...
حجابها..احتشامها...خجلها وهي تحكي وتضحك...
نظرات الحب اللي في عيونها لبوها وخوها...
والدبله اللي فصها يلمع ويبرق...
حس بشي خنقه لما شافها..وين تفكر انها لغيره..
مرضي ومحظوظ اللي نالك يابنت العز...
بنت عز بمعنى الكلمه في كل شي...بنت العز تبي ولد عز زيها..
العز اللي عرفه فاتح مؤخرا...
لابالمال ولابالجاه..
بل بالأخلاق الحسنه..والتربيه العاليه...
بس يعني..ياريت الواحد يقدر يتحكم في قلبه..ويبرمجه ع الاختيارات الصح اللي ماتكونش مؤذيه لصاحبه...
واعوذ بالله من كلمة ياريت..
هو اللي اراد وقدر...ولكل ماقدر حكمه...منها ماندركه ومنها اللي يكون فوق سعة ادراكنا...
"فاتح"
غير عيونه عن سارة طول لمصدر الصوت..
وانفتحوا عيونه ع وسعهم بذهول...
وهيثم لما سمع الصوت تلقائيا شبح من وين جاي..
شافها تمشي بسرعه ومعاها بنتها والبنات الزوز...وخالها وولد خالها..ومراة كبيره في العمر...نواره
نوال وصلت في فاتح وضماته؛اسفه ياماما حبيبي عطلتنا الزحمه..
وفاتح مازال مصدوم..
نوارة؛ياحبيبي يابني وحشتني قوي..
نرجس وهي تضحك وعيونها معبيات دموع:توحه...
بعدت نوال وهي شادته وقالت؛كل عام وانت بخير حبيبي..
استاقظ فاتح وقال؛كل سنه وانتي طيبه..
باساته امه..
هو فنص وقال؛هييه شن هكي قدام الناس!!
قعدوا يضحكوا...
وبعدين قعدوا يعيدوا عليه بالواحد..
••ماجده؛طيب فيه والله وجعني في الاول..
زياد قعد يشوفلهم بإبتسامه..
وسارة تشوف لبوها اللي مركز بنظره ع فرد واحد من عيلة فاتح..وفرحتها بجيتها لخوها وقفت في نصها..
••نسيبه؛اللي لابسه بلوزة طويله لونها موف غامق هادي امه..
عفاف؛ماشاء الله! هادي امه!!؟
تهاني:نشوف فيها في التلفزيون ع الطبيعه مازال احلى وتبان اصغر..
وخليل بعد ماكان يشوف لفاتح شبح لمراد لقاه يشبحله..
ابتسموا الزوز بعدين رجعوا يشوفله..
••مهاب؛الامور تمام هني؟
فاتح؛الحمد لله...
نوال حطت شنطتها ع تركينه وقالت:مش وقت هدرزة توا كل حد ياخد مكانه..
ومشت وقفت حدا ولدها..
وفاتح يشوفلها بعدم فهم!..
نرجس خلت البنات مع نوارة اللي خدتهم وقعمزت بيهم ع طاوله..
ومشت وقفت حدا امها..
فاتح؛شن في !؟
نوال شبحتله وقالت؛قصدك ماتعرفش!لبوفيه هدا اللي اني درته وقلت اليوم كلنا بنتعاونوا عليه مع بعض..شافت للساحه وقالت..شوف ماشاء الله الناس هلبه تقدر عليهم بروحك!؟
فاتح راحت عن باله عن الحاجه هادي..
ساوت نوال شاربتها وقالت لنرجس؛خلي هادي عندك..
نرجس؛حاضر..وخدت مشبك امها عطتهولها...
مهاب بعد ماحط جاكيته مشي وقف حدا نرجس وقال:شن ندير اني..
نوال؛خليك ع العصير مهاب..
فاتح؛واني نمشي نقعمز ولاكيف؟!
ضحكوا ونوال قالت بإبتسامه؛اللي يريحك ديره ماما..
فاتح رفع حواجبه ونزلهم وتنهد مازال مش مصدق اللي صار معاه..
شبح لزياد..زياد غمزله..ضحك..
غير عيونه عنه لخليل ومراد..
الزوز اشرولها بإلابهام...
هو ابتسم وهز راسه...
بعدين شبح لسارة...
واستغرب فتغير ملامح وجهها...تبان زعلانه ومضايقه الدموع معبيات عيونها وهي تشوف للأشهب كيف يهدرز مع بوها..
الاشهب؛طلعنا بكري من الحوش لكن الزحمه لاتوصف طرابلس كلها طالعه..
هيثم؛ايه اليوم تالت يوم الناس تطلع..يللا المهم وصلتوا ع الوقت...
الاشهب؛ايه..شبح لماجده وقال..كل سنه وانتي طيبه..
ماجده بإبتسامه خجل؛كل عام وانت بخير..
ابتسم بعدين شبح لهيثم انقلبت ملامحه للجديه وقال؛نستأذن..
هيثم؛تفضل..
ومشي الأشهب..
زياد؛لاالمرة هادي خالتي بإذن الله صايبه..
ضحكت ماجده..
وهيثم ابتسم بعدين قال؛سارة..
شبحتله..
هيثم؛خيرك هبيتي فجأة؟
هي يدوب ابتسمت وقالت؛لاشي غير خطروا عليا جنان وريحان ياريتنا جبناهم..
هيثم انحرج من ولده وماعرفش شن يقول..
ماجده؛ماخطرش علينا الحق..
زياد؛احسن شي درتوه..مانبيهمش يشوفوني هني..مانبيش حاجه زي هادي تعلق في الذاكرة متاعهم..
هيثم بشي من الارتباك؛اني بصراحه ماكنتش عارف ان الموضوع عادي.. زياد قاطعه بإبتسامه؛فاهم عليك..واني نقول احسن اللي درتوا هكي..نبيهم ديما يشوفوا خوهم الكبير في مواقف حلوة...
سارة؛وين هني بسبب موقف حلو..
ضمها لحضنه وباس راسها...
••من بعيد شويه..
عند طاولة عيلة خالد .
خليل واقف ع مرته بروحهم يهدرزوا..
خليل؛امتى موعدك؟
نسيبه؛في العيد الكبير..
ابتسم خليل وهو عاقد حواجبه بعدين قال؛مازال ماعرفتيش شنو؟
نسيبه بضحكه؛شبل ياسبع...
خليل بضحكه؛خسارة قبل نبيها لبوة لأمها..
نسيبه؛بعدين تحمل كان تقدر تتحمل اني ونسختي والتانيه وحي عليك وحي..
خليل بإبتسامه؛بنحتار من نحب اكثر فيهم بس..
ابتسمت بخجل وقالت:بتحب المصدر اكثر اكيد..
خليل؛حي ع ام الثقه..
فنصت فيه وقالت؛قصدك ناوي تحبها اكثر مني!
خليل بخوف مصطنع؛حبي..راك حامل بولد نذكرك يعني..
هي ابتسمت ابتسامه عريضه وطلعت لسانها وقالت؛نسيت...
وهو يضحك عليها..
شويه والموجودين بدوا يتوافدوا ع البوفيه..
وفاتح وعيلته يعرفوا بالموجود ع الطاوله ويحطولهم من اي شي يحبوه..
تهاني؛معليشي..نبي من الكب كيك تلاته طروف..
نرجس؛لحظه بس..
ع جية سارة قالت:شن جو تاهو...
تهاني؛تمام..انتي شن جوك؟
سارة بإبتسامه؛كويس..
مدت نرجس الطلب لتهاني..
تهاني خداته وقالت؛شكرا..وفاتت من حدا سارة..
سارة تنهدت وشبحت للحاجات..
جو عيونها الكوكيز اللي كان جنب نوال..
ونرجس مشغوله بااللي جوها..
وامها كذلك..
تخطت سارة الناس ومشت للكوكيز..
وفاتح شافها جايه قلبه فر..وعرفها شن تبي..
هي وصلت ومدت يدها في اللحظه اللي مد فيها هو يده..
هي وكأنها تكهربت طول وخرت يدها..
وهو تنحنح ووخر يده وقال؛تفضلي..ووخر شويه..
قامت عيونها وشافتله..
لقاته يشبحلها..
هني نوال انتبهت وشبحتلهم..
وشافت نظرات ولدها لسارة وهي تاخد في اللي تبيه..
وعيونه كانوا مركزات ع الدبله....
مشت ساره..وهو قعد بعيونه معاها..
وامه تشوفلها وتشوفله..
ونوارة اللي كانت مقعمزة مقابلتهم ركزت حتى هي لانها تفكرت سارة لما شافتها..
•••••
تهاني وهي ماشيه بالحاجات اللي خدتهم طاح منها تليفونها كانت يدوب شاداته..
تهاني؛يييه راح فيها..!
"تريحي ماصارله شي"
طبس وخداه ومسحهولها وكيف جي بيمده قال:وين ماشيه بيه هدا كله!!؟ انتي بروحك مش ناقصه!؟
تهاني بصدمه شبحت لروحها بعدين شبحتله وقالت بإنفعال؛مش ليا بروحي يكون في علمك..وبعدين هات تليفوني..ولما تشوفني مرة تانيه دير روحك ماتشبحش فيا..سكتلك هلبه راهو..
زياد:رفع حواجبه وابتسم تعجبا..
بعدين مدلها التليفون..
هي خداته بقوة ومشت وهي معصبه..
زياد بضحكه؛والله وطلعلها صوت الفكرونه هادي..
ولف وولى وين ماكان...
الموجودين شبه كلهم خدوا من البوفيه وقعمزوا ياكلوا..
نوال تنهدت بتعب وبإبتسامه قالت؛حسيت درت انجاز..
فاتح:الانجاز الصح هو لما تخشي الكوجينه طيبي..
وحطلها في فمها طرف كب كيك..
خداته وهي تضحك كلت منه وقالت وهي تاكل؛ممم...عارفني ماناكلش فيه...
فاتح:استثناء اليوم..
ابتسمت وقالت؛لعيونك ماما..
فاتح؛معاش تقوليلي ماما ع الملأ عمري 25سنه راهو..
ضحكت وقالت؛تقعد في عيني توحه..
فاتح؛ايه وتوحه هادي..حدت نرجس بشوكة نايلو وقايل...تلعلعي بيها بكري ماخليتي من سمعتي..
نرجس وهي تضحك؛تحتوح احلى ولا..
فاتح،اسمع انت كان جيتها ريشتها ماتتكلمش..
مهاب:خود راحتك توا لكن بغد تخش ذمتي تمد يدك عليها نعلقهالك..
نرجس التفتت وقالت؛هييه خويا!
مهاب؛اشي!؟
نوال بضحكه؛ياخاش بين البصله وقشرتها..
ضحكوا..
"السلام عليكم"
نوال من الارتباك حطت طرف البان كيك ع الطاوله وخدت كلينكس وقعدت تمسح في فمها..
وهما ردوا عليه؛وعليكم السلام..
هيثم وهو يأشر لفاتح؛تعالى هني تعال..
ضحك فاتح ومشاله..
وحضنوا بعض.
ونوال تشوفلهم بإبتسامه..
فاتح؛كل سنه وانت طيب دكتور..
هيثم؛كل عام وانت بخير..
بعدوا عن بعض وهيثم قال وهو يتفحص فيه؛لاالله يبارك متغير للأحسن خير من ايام المصحه بهلبه..
فاتح بإبتسامه؛الحمد لله..
شبح هيثم للطاوله وقال؛حلوة الفكره..وشبح لنوال..
هي حياءا قعدت تتكلم وعيونها مش عليه:بصراحه الفكره لنرجس..
فاتح شبح لنرجس ودارلها حركه بأنفه .
هي ردتهاله مع ابتسامه..
هيثم شبح لنرجس وقال:مافيش زي دعم الخوت لبعض..اللي عنده اخت تحبه وتخاف عليه نال حظ من حظوظ الدنيا..
فاتح بإبتسامه؛صح..
طبطب هيثم ع ظهر فاتح وقال:طمنت لما شفتك هكي اليوم وان شاء الله نشوفك مرة تانيه احسن...
نوال همسا:إن شاء الله..
مرر نظره عليهم وقال؛ربي يديمكم لبعض...
كلهم قالوا؛آمين..
ابتسم وقال؛السلام عليكم...
هما ردوا عليه السلام وهو مشي..
مهاب؛راجل راقي جدا ومحترم بجديات فرحان اللي بنولوا نسابه..
فاتح وهو متفاجئ:نسابه!؟
نوال بإبتسامه؛خالي الاشهب بياخد خالة الدكتور هيثم..
فاتح شبح جيهتهم وهو مصدوم..عيونه قعدوا ع ساره بس..
يعني كيف!
انحط في امتحان تاني صعب..البنت اللي يحبها حتزيد تقرب منه هلبه حتكون في عيلته..وحيضطر يشوفها بعد ماتتزوج ولما يولوا عندها صغار...!
هو بالسيف تحمل هالعذاب وهو ابعد مايكون عنها..
كيف بيتحمله !!؟
نرجس؛فاتح..كأنك مافرحتش!؟
نوال قعدت تشبح لسارة بحزن..
مهاب؛فاتح..
استاقظ وشبحله بعدين ابتسم بالسيف وقال؛حقه حقه...مبارك عليه..ان شاء الله يتهنى..
كلهم قالوا؛آمين..
نرجس:هي نمشوا نقعمزوا...
التفت فاتح وقال:مالقيتش وقت للجرينات..ومشالهم طول..
ونوال ونرجس ومهاب لحقوه...
🌼ومازالت هديكا الساحه بمظهرها الزاهي المختلف عن ماكانت عليه من قبل..
والسجناء مع عايلاتهم عايشين فيها احلى الاجواء...
ع طاوله عيلة هيثم انضموا خليل ونسيبه وكانت هدرزتهم اغلبها مناشبه لنسيبه وهي تعاركت معاهم كلهم...
اما ع طاوله عفاف كانوا مقعمزين يهدرزوا عن...
عفاف:داير اضراب علينا مايبيش من يجيه الافندي فوق البلي اللي دايره مازال ليه عين يحرج هو..
جهاد؛هدا رفيق من يومه...
تهاني"مال كان تعرفوا شن داير تاني"
ع جية خليل بروحه..قعمز حدا امه وقال؛ع من تهدرزوا..
عفاف؛ع منجوه رفيق..
تنهد خليل بضيق....
وع طاولة فاتح وعيلته..
كانت مشغوله بأخته وبناتها..
ومهاب وبوه يهدرزوا معاهم...
اما نوال ونوارة..
نوارة:سارة هي نفسها البنت اللي شفتها لما رحت ازوروا في المصحه كانت جايه لأخوها...ماشالش عينه من عليها..واني كنت مستغرباه ودلوقتي بس فهمت ياحبيبي طلع بيحبها..
نوال وهي تشوف لسارة بحزن؛هي تنحب..بس مش نصيبه..
نوارة:بختوا قليل في الدنيا دي ياعيني يابني عليك...
نوال؛ربي يعوضه بخير منها يارب يحبها وتحبه ويكون معاها سعيد عمره كله..
نوارة؛مش عارفه اقولك ايه ياهانم بس انا اللي اعرف فاتح..دا بيحب البنت دي قوي انتي شفتيه بيبصلها ازاي..عمري ماشفتوا بيبص لحد كده ..بعد جواز اشهب بيه وماجده هانم..بدل ماينساها حيحبها اكثر من الاول..
نوال شبحت لفاتح وقلبها موجوع...
ولدها هدا تعذب هلبه وهي تبي تعوضه عن اللي راح من عمره وهو يتعذب..ماخطرش في بالها عذاب الحب بكل..كيف بتريحه منه!؟
رجعت شافت لسارة..بعدين غيرت عيونها لهيثم لقاته يشبحلها تفاجئت..
هو ارتبك ويدوب ابتسملها وهو يحك في رقبته من الخلف وطول غير عيونه عنها..
وهي تحشمت ع الآخر وقلبها قعد يدق بقوة...وشبحت للي معاه وابتسمت بأرتباك وهي تسمع لحديثهم...
🍁🍁🍁
ولكل شي نهايه..
وكان لهاليوم الجميل نهايه...
وكل شي رجع زي ماكان..
صح مافي حد كان يتمنى يكون ختام هاليوم فراق..
بس اللقاء عطاهم طاقه ايجابيه كبيره يكملوا بيها باقي ايامهم فهالقلعه الكبيره الموحشه...
🍀🍀🍀🍀🍀
ومازالت تمر هالايام من العمر...
وماجده طلعت من حوش ولد اختها بش تشوف نصيبها من الدنيا اللي قسمه ليها الله فهالفتره الصعبه..
تزوجت هالمرة بدون حفله ولافرح...
عقد عليها الاشهب وخداها من حوش ولد اختها..
وهما سقدوها بالدعاء وبالدموع...
بعد مامشت ماجده...روحت نسيبه لحوش شيابينها..
ورجع فضي الحوش ع سارة وخواتها...
سارة هالمرة حست انهم قعدوا بروحهم فعلا...
ومكان امهم الفاضي هدا وين بان اكثر..
ضمت خواتها اللي كانوا يبكوا ع فراق ماجده وقعدت تبكي معاهم..
وهيثم وين خش عليهم وسمع اصوات بكاهم قلبه تقطع...
وتفكر اليوم اللي فقدوا فيه اسيمه...
ركن قوي من الحوش طاح في غيابها...حولوا هلبه يكونوا مكانها...خففوا عنهم وجع غيابها شويه..
بس حتى هما جاهم وقت وفارقوا...
وقعد هيثم بصغاره برواحهم..
خش عليهم وقعمز بعدين قال:تعالوا بابا تعالوا..ابكو هني..
وحط يده ع صدره..
شبحوله التلاته بعدين ناضوله...
سارة جت ع يمينه وخشت حضنه والتوام جو مع بعض ع يساره وهو ضمهم لحضنه...
خلاهم يطلعوا اللي في قلوبهم..
وهو يطبطب عليهم لين هدوا..
وماحسش بيهم الا وهما راقدين في حضنه...
ماباش يضايقهم ويفسد نومهم...
سند راسه ع الكنبه ..وقبل يغمض عيونه جو ع اللوحه شبحلها بألم..بعدين غمض عيونه ورقد...
🍀🍀🍀🍀🍀
في مدرسة المجد الثانويه..
كان اخر اسبوع دراسه لمراحل النقل قبل الامتحان..
دانيه وسارة توا راكبات مع الدروج وسارة تقول..
سارة؛كل مرة يفاجئ فيا بحاجه مجاهد..
دانيه؛يبي يكملك ياسارة براحته يقرب منك من غير محظورات..
سارة بقلق؛ فاهمه بس اني خايفه بابا يرفض..
وصلوا فوق ودانيه جايه بترد سارة لولا جيهان اللي نادتها...
جيهان؛تعالي نبيك شويه..
دانيه ابتسمت وقالت:لحظه...شبحت لسارة وقالت..نهدرزوا بعدين سارة..
سارة بإبتسامه؛باهي...
ومشت دانيه لجيهان..
وسارة كملت للفصل وين وصلت فيه..
انصدمت باللي شافاته قدامها...
لقت روعه تفتح في شنطتها وبتحط فيها سيديهات..
سارة:شن ديري!؟
روعه انفجعت لما شافتها..
قدمتلها سارة ودفتها وهي تقول؛شن ديري بشنطتي انتي!؟
روعه لما شافت مخططها فشل..فقدت اعصابها وجت لسارة وشحتها من وشاحها وضربتها كف..
سارة فجعها اللي داراته روعه..وخافت منها هلبه..
ومازال روعه ماانشفاش غليلها جتها شدتها مع رقبتها وقالت بنبرة مخيفه؛نكرهك ياحيوانه نكرهك..وانتي ديما دايرتلي روحك المؤدبه المثاليه اللي مافيش منها اللي ماتغلطش بكل...
وحطتها ع الحيط وهي تشنق فيها وسارة تضرب في يدها
وروعه مكمله تقول؛والابلات ماعندهم كان انتي شوفوا سارة كيف متفوقه..شوفوا اخلاق سارة..تعلموا من سارة..واخر شي بسببك انتي لزوني من المدرسه ياكلبه..
وسارة حست روحها خلاص بتطلع..
والغيره والحقد والحسد كانوا عاميين عيون روعه تماما..
وسبحان من بعت ابلة الاشراف صدفه تشوف الفصول..
شافت المنظر قدامها قالت بعياط؛شن ديري ياكلبه..
وجتها بسرعه ضربتها بالعصا..
وخرت روعه طول...
وسارة طاحت مغمى عليها....
#فرحتنا_وحده
#البطل_المغمور2
