#البطل_المغمور2 "زهور القمر"
#جمان_فريد
#الجزء_الثاني_والعشرين ".gray cat"
العمل الصالح هو الرفيق الوحيد في القبر
واحب الاعمال إلى الله الصلاة في وقتها
صلوا قبل
بعدين تعالوا للروايه..
قبل تقروها...اذكروا الله...وصلوا ع نبينا محمد..🌸
(الاحداث تدور في ليبيا لكن في زمن وظروف مختلفة عن الواقع الحالي..كلها من وحي الخيال )
💐💐💐💐💐💐💐💐💐💐💐💐💐💐💐💐
"نبيك تعطي هادم لفريال غدوة تلقاها تراجي فيك قدام الكليه"
خدي معاذ الكتاب والشيتات وقال:تمام..ماتبي شي تاني..
مريم:لالا صحيت..
تنهد وحط يده ع راسها وقال؛روقي شويه..
مريم ابتسمت مجامله وهزت راسها بإيجاب...
هو ابتسم ونزل يده ولف ومشي للباب وهو يقول:تو نولي بعدين..
مريم وهي ماشيه معاه:ان شاء الله..
وصلوا في الباب..
فتحه معاذ...في نفس الوقت اللي فتحت فيه تهاني باب شقى خليل..
وتلاقوا مع بعض..وعيونه جو في عيونها..
وقلبها بدي يدق بقوة...وجهه اشرق بإبتسامه ماقدرش يمنعها من الظهور..
وقال تلقائيا؛كيف حالك تهاني..
هي قعدت تشبحله كيف مبتسم وكأنه جاي لفرح..
غيرت عيونها عنه وقالت :الحمد لله..ومشت بتنزل..
هو بلهفه؛عظم الله اجرك..
تهاني وهي نازله:شكر الله سعيك..
مريم نخصاته وقالت بصوت منخفض:مش وقته بكل..
معاذ تنهد ونزل وراها ومريم وراه تبي تلحقه قبل ليدير تصرف يحرجها..
🍁فهالوقت..
قدام باب الحوش والخيمه وراها..
كانت واقفه تشوف للحوش بعيونها المتورمات من كثر البكي..
ووجهها الشاحب...جايه وكأنه عقلها مش عليها...
فعلا مجنونه..بعد اللي صار وبعد ماانفضحت خيانتها لأختها مازال عندها جرأة تجي وفي وقت زي هذا..
قدمت ودفت الباب وخشت وفمها بدي يرجف...بتبكي..
ع خشتها هي..
طلعت سارة من دار الدروج...
وامها طلعت من الحوش بتلاقي ولدها بش توصيه حاجات...
الزوز شافوها وهي خاشه..
وهي بعيونها الباكيه تشوف لأختها..
وعفاف كانت تشوفلها..بنظرة صدمه...على حقد..
اما تهاني كانت تشوفلها بنظرة غل وغضب...
اندفعت ناحيتها تلقائيا لين وصلت فيها ونزلت ع وجهها بصفعه..
صدمت مريم ومعاذ اللي كيف طلعوا من دار الدورج...
بعد ماضربتها شدتها من ذراعاتها بقوة وهي تقول بغضب وهي تهز فيها:انتي شنو قوليلي شنو..شن الحقارة والوقاحه اللي عندك هادي..شن الوساخه اللي انت فيها...وقعدت تخبط فيها بإيديها وهي تقول..ياحقيرة ياحيوانه..ياواطيه يامنحطه..
وسماح تتلقى في الضرب وهي تبكي..
شدتها من ذراعها بقوة وجبدتها للباب وقالت بصوت منخفض؛تجي هني مرة تانيه نفضحك نمسح بيك الارض يافاجره..
ودفتها بقوة وطلعتها وسكرت الباب..
هي قعدت تبكي وتحضن في نفسها وتتحسس في اماكن ضرب بنت اختها..
"شن ديري ياكلبه انتي"
التفتت مفجوعه..
شافت قدامها جهاد يشوفلها بنظرة تخوف..
هي بخوف هربت تجري...
وهو قعد يتبع فيها بعيونه الحاقده..ودفل ع الأرض..
بعدين لف ومشي خش داخل..
🍁داخل..
تهاني بعد ماسكرت الباب ولت من جديد لدار الدروج بش تركب لشقة نسيبه..
وعيون معاذ كانوا معاه وهو مصدوم في اللي شافه منها..
مريم بشي من الارتباك:معاذ..
التفت وشبحلها..
هي اشرتله بعيونها بمعنى اطلع..
هو هز راسه وقال:هي السلام عليكم..
ومشي طول بيطلع..وعيون عفاف معاه..
تلاقى مع جهاد فم الباب..
معاذ:عندي مشوار خدمه بنديره ونولي بعدين ان شاء الله..
جهاد هز راسه بدون مايعلق.
معاذ؛السلام عليكم..
جهاد؛وعليكم السلام...وهو خش ومعاذ طلع ورد الباب وراه..
قدم جهاد لأمه..ومريم قربت منهم..
جهاد:شن جابها الكلبه هديكا!
عفاف؛صحيحة وجه مسخه وتهاني دارت معاها اللازم..
جهاد شبح لمريم بعدين شبحلها وقال:ايه شن قلتي تبي..
🍁برا..
درسوا سيارتين مقابلات ..
سيارة مجاهد...
اللي نزلوا منها سدينه ودانيه ورتاج..
والسيارة التانيه كانت سيارة جمعه...
نزلوا منها مرته وامها..
هو بنظرة عابرة شبح القدام جو عيونه ع دانيه تفاجئ هلبه..
زي ماتفاجئوا عواطف وجيهان لما شافوهم..
لكن سدينه وبناتها ماركزوا ع شي مشوا طول للباب...
سدينه دفاته وخشت..
وعفاف وهي تكلم في جهاد شافتهم خاشين.
مريم:نساوين عمتي..
عفاف اللي شافت دانيه لأنها الوحيده المش مختمرة عرفتهم؛سدينه وبناتها..
جهاد تلقائيا التفت..ومريم شبحتله...
دانيه لما شافاته شبحت لرتاج...
ورتاج من ورا الخمار شافاته...وعيونها مجرد ماجو عليه غرقوا بالدموع..
عفاف شبحتله وقالت؛خلاص برا انت توا..
هو شبح لأمه بعدين هز راسه وقال؛ربع ساعه وجاي..
ولف ومشي وعيونه لوطا...
قامت سدينه خمارها وقالت:عفاف..
وصلت فيها وحضنتها وهي تقول:عظم الله اجركم..
عفاف:اجرنا واجركم..
ومريم تشبح لرتاج ودموعها في عيونها..وقلبها والعه فيه النار..
ع خشة جيهان وامها...
عواطف:تقولي فرصة وحصلتها..
جيهان؛خليني اني نتصرف ماما...
وصلوا فيهم والزوز قالوا:السلام عليكم..
التفتت دانيه لما سمعت اصواتهم وانصدمت..
عفاف بعد ماسلمت عليهم ردت السلام ع جيهان وعواطف:
جيهان:اني مرت جمعه وهادي امي..
عفاف هزت راسها..
جيهان صافحتها وهي تقول:عظم الله اجركم..
عفاف :اجرنا واجرك ع الله..
بعدين سلمت عليها عواطف وهي تقول؛عظم الله اجركم..
عفاف:اجرنا واجرك ع الله..
وسدينه وبناتها يشبحولهم بضيق..
عفاف شبحت لمريم وقالت؛هادي كنتي مريم مرت ولدي جهاد..
دانيه شبحت لرتاج..
ورتاج مركزة مع مريم وتفاصيلها...
مريم؛تفضلوا...
وسعت عفاف..وهما خشوا ورا بعض...
وين وصلوا في الصاله سلموا ع الناس سلام عام من بعيد..
اما عواطف وجيهان مشوا يسلموا عمات جمعه وامه وبناتها اللي كانوا موجودات...
وسدينه وبناتها قعمزوا...
قامت رتاج خمارها..
وعيون مريم عليها لما شافت انسمطت..
ماتوقعتهاش تكون جميله لهالدرجه..بالذات عيونها الكبار الزرق..
شدت دموعها بالسيف والنار تصهد في جوفها صهد..
شويه وخشت سارة وفي يدها سفرة طواسي لبن..
شافت دانيه سلمت عليها بعيونها ودانيه ردت السلام...
وبدت سارة تفرق ع الموجودات لين وصلت فيهم..
سارة؛كيف حالك عمتي..
سدينه:الحمد لله بنتي شن حالك انتي..
سارة:الحمد لله...جت لرتاج...شن حالك رتاج..
رتاج خدت طاسه وعقلها شبه مش معاها..قالت:الحمد لله..
وجت سارة لدانيه وقالت؛شن جو..
دانيه خدت طاسه وقالت:تمام الحمد لله...وانتي..
سارة:الحمد لله..
دانيه:وين تهاني..
سارة:في شقة عمتي شويه ونركبولها..
دانيه هزت راسها وقعدت ساكته..
سارة وهي ماشيه شبحت لجيهان وعواطف لقتهم يشوفوا لدانيه..شبحت لدانيه شويه بعدين مشت...
والصاله المزدحمه بالناس كأنه مافيها حد غير عواطف وجيهان وسدينه وبناتها من التوتر اللي كان بينهم...
ع جية مريم بالتمر..فرقت ع كل ولما وصلت في رتاج قالت:تفضلي..
رتاج وهي مش طايقه تشبحلها؛شكرا ماناكلش فيه...
مريم شبحتلها من فوق لتحت بعدين قعدت تفرق ع امها واختها...
بعدها بعدت وهي تشوفلها وشعور الغيرة يكبر اكثر واكثر..
🍁🍁🍁🍁
"تفضلي"
هي قالت:دكتور نبيك في استشارة خاصه..
هو ميز الصوت وعرف صاحبته هز راسه وقال للممرض:اطلع شويه..
الممرض وهو مستغرب:حاضر دكتور..
ومشي طلع برا الحجرة وسكر الباب..
قدمت وقعمزت وحولت نظاراتها:اسف لو سببتلك ربكه..
هيثم بقلق:شن في وعلاش لابسه هكي!؟
نوال:الله يعلم كيف جيتك هني..الوضع زي ماكنت متوقع بالزبط..
هيثم:اهدي وفهميتي بالشويه عليك ...
نوال خدت نفس وقالت؛فعلا بشر طلع متورط في اعمال مشبوهه تجارة مخدرات وسلاح ومن سنين طويله..
هيثم؛كيف عرفتي.
نوال؛زمان خالي كان يتمنى يشاركه وسعي لهالشي هدا سعي لين وافق بشر..بس بعد فترة فجأة خالي تراجع وفض الشراكه حسيت ان في شي لما سألته وقتها قالي اسباب غير مقنعه بس من كم يوم رجعت سألته تاني واصريت نسمع الاجابه صح..وقالي انه عرف تورط بشر في تجارة المخدرات والسلاح وقال لما واجهه هدده..
هيثم؛هدد خالك لو قال شي شن يديرله..
نوال:اللي فهمته انه هدده بيا وبعيلته...
هيثم غير عيونه عنها وهو يفكر بقلق..
نوال بحسرة:سنين واني راقده ع وداني مش حاسه بشي ياخسارة ماراح من عمري معاه..
شبحلها شويه بعدين قال:باهي وعلاش جايه هكي؟
نوال:لأنه في من يراقب فيا..
هيثم عقد حواجبه وهو يشوفلها..
نوال:اني متعوده ع الحاجه هادي زمان لأني سياسيه و بعد ماتباعدت عن السياسه حولوني من تحت المنظار..وتوا رجع الشي هدامن جديد..هالشي اكدلي تعاون اسعد مع بشر من زمان لعند اليوم..
هيثم؛كلامك هدا كله ماعندكش عليه دليل ثاتبه او معلومه ماديه كدليل..
نوال رفعت حاجبها وقالت؛حيكون عندي وحنطلعه من تحت الارض..
هيثم ابتسم متعجبا:اهدي اهدي..الموضوع مش ساهل راهو..خطير هلبه فيه حياة وموت..
نوال:اني اللي عارفه الشي هدا دكتور...اطمن نعرف شن ندير..
هيثم رفع حواجبه وقال؛نقدر نعرف شن بديري؟
هي قعدت تشبحله...
وهو يراجي في اجابتها....
🍁🍁🍁🍁
"مانبيش نقابل حد..ولانشوف هادم اللي ينقاللهم عماتي وهما يديروا في ارواحهم واجعهم خوهم.."
دانيه وسارة يسمعولها بأسف ع حالهم..
تهاني:وفي نفس الوقت متحشمه من الناس ومانبيهمش يحكوا عليا لما يشوفوا دموعي ناشفه ومانبكيش ولا باين عليا حال اللي فاقده بوها..انتي ياسارة تعرفي وانتي يادانيه مانبيش نكذب عليك..ماحسيتش اني عندي اب ولا نقول نادرا ماكنت نحس بيه مافيش في قلبي ليه هديكا المشاعر مانعرفش شن بتقولي عليا حتى انتي بس هدا الحق...
دانيه ابتسمت تهكما وقالت:مش حنكون احسن منك لوا انحطيت في مكانك..لوانتي نادرا حسيتي ان عندك أب..اني ولامرة حسيت بهالشعور...حتى بعد اللي صارله ماوجعنيش لكن خفت لو تصيرله حاجه نتشتتوا مش عارفه علاش حسيت هكي وقتها رغم انه عمره مالم شملنا حواليه..الشي هدا كان ديما يدير فيه مجاهد..الله لايغيبه..
ابتسمت سارة..
شبحتله تهاني ابتسمت وقالت:ايه حقه مبارك..
دانيه شبحت لسارة بإبتسامه..
سارة بإبتسامه خجوله:الله يبارك فيك..والفال ليكم..
تنهدت تهاني بحسرة..
والابتسامه تلاشت من ع وجه دانيه...وسارة تمرر في نظرها عليهم...
🍁ومانزلتش دانيه من عند تهاني الا لما جي مجاهد يروح بيهم...وهكي لاجيهان ولاعواطف حصلوا معاها فرصه..
وبعد روحوا عقل مريم مشي معاهم..وهي تفكر في رتاج وقلبها ماريحهاش..وهدا وين بس عرفت ان حبها لجهاد كبير لدرجة التعلق..وخدت قرار انها تحاول تكسب قلبه وتقربله..
ولو انها مش واثقه في النتيجه لكن في نظرها جهاد يستحق المحاوله...
وجهاد اللي كان مأثر فيه بقوة موت بوه...حضور رتاج فهاليوم قلب عليه المواجع وحس بصدره زاد ضاق اكثر واكثر...
ورتاج اول ماروحت...صلت المغرب وخشت فراشها وهربت بدموعها لوسادتها وهو ومرته بين عيونها..
🍁🍁🍁🍁
الساعه العاشرة ليلا..
سارة؛صخفوني وفي نفس الوقت نقمت ع ابهاتهم..وع بو رهف الله يرحمها...ومش عارفه لو ربي يعاقب دانيه وتهاني ع اللي يحسوا بيه..
هيثم حاط يده تحت خده قعد يفكر شويه بعدين نزل يده وابتسم وشبحلها؛يعني انتي لو قبل اكثر من عام اني صارت فيا حاجه شن حيكون شعورك؟
سارة قعدت تشبحله وهي ساكته السؤال صدمها واربكها..
هيثم بإبتسامه؛اني نقولك..مشاعرك اتجاه حد تكون نتيجه لشي هو زرعه فيك..حب..كره..خوف..امان وماإلى ذلك واعتقد ان شي زي هدا اتجاه الوالدين مانتحسابوش عليه اللي نتحاسبوا عليه هو المعامله بس..ربي قال وبالوالدين احسانا..ماقالش حبا..والاحسان بابه واسع ومش مربوط بالمشاعر..الاحسان هدا ليه علاقه مباشره بالله سبحانه وتعالى وبس...
سارة وهي تفكر في كلامه هزت راسها بإيجاب..
هيثم؛نعترفلك بشي..اني بعد اللي صار معانا اكتشفت انكم ظالمكم وظالم نفسي..لما كنت بعيد عليكم حرمتكم وانحرمت من هلبه حاجات حلوة عشتها معاكم ونحمد في ربي ديما اللي عطاني فرصه تانيه معاكم..
هي ابتسمت وشدت يد بوها وقالت؛حني اللي نحمدوه ديما عطانا فرصه معاك وعرفنا شن مدسوس ورا هديكا القسوة والجفي..قلب مافيش احن منه..وحب مايتعوضش..
ضحك وقال:احرجتيني يابنت..
سارة بضحكه؛يسلملي المتحشم..
هو قعد يضحك..
وسارة تتأمل في ضحكته بحب..
هدا ضحك وشبحلها وقال:هي خلاص توا بري ارقدي وراك قرايه..
سارة بإبتسامه:حاضر...ناضت وهي تقول..تصبح ع خير..
هيثم؛وانتي من اهله...
ومشت لسارة لدارها وهو معاها بعيونه لين درقت من قدامه..
خدي نفس ورفع ايديه وشبكهم وحطهم ورا راسه...
《 سنين واني راقده ع وداني مش حاسه بشي ياخسارة ماراح من عمري معاه..》
هيثم بقلق؛ان شاء الله ماضرش روحها بس...
🍁🍁🍁🍁🍁
تاني يوم...
الساعه الحادية عشر صباحا..
في احدى الأماكن....
في وحده من السيارات...
راجح:اللي عرفته انها حاجزه تذاكر هي وبنتها لسويسرا واضح انهم ماشيين يشوفوا بشر بعد مادار عمليه ع المعده..
هيثم:معناها انتم اللي تراقبوا فيها..
راجح بدهشه؛قصدك زبطتنا!؟
هيثم بضحكه؛هي عرفت ان في حد يراقب وتحسابه طليقها او حد من جماعته..
راجح وهو يحك في جبهته وقال:شكلها مش ساهله بكل وثقتها بنفسها مش من فراغ..
هيثم تنهد وقال؛اني كل نبيه ان الموضوع هدا يتم فيسع بش نرتاح ويرتاح خليل من الضغط النفسي اللي عايش فيه..
راجح؛والله حتى اني بالذات موت بوه قالوا منعزل عن الجميع ورافض يتواصل مع اي حد..
هيثم؛ماينلامش..
راجح؛هو المعلومه اللي عطهالنا عن مدير السجن شكلها حتنفعنا هلبه.وممكن الصغير يوصلنا للرووس الكبار..
هيثم؛ياريت..وفي اسرع وقت...
🍀🍀🍀🍀🍀
...بعد مرور اسبوع...
في مدرسة المجد الثانويه...
تحديدا في فصل السنه الثالثه ثانوي علمي..
حصة الأحياء...
الأبله:وتوا انتبهوا معاي بنعلن نتيجة مسابقة البحوث..
دانيه كانت تشبحلها ودموعها في عيونها..
وانبار تشوفلها..
الابله؛كلكم درتوا شي حلو واستمتعنا بيه جدا..بس لابد من وجود فائز...حنسمي من المركز الثالث للأول لأفضل تلاته بحوث... الترتيب الثالث لمجموعه هدى وابرار ولميس...
بنات هالمجموعه بانت ع وجههم ملامح ابتسامة الاسف..
دانيه لما شافتهم صفقت...والفصل كله دار زيها..
الأبله بإبتسامه:يستاهلوا...
هما ابتسموا لدانيه وهي ردتلهم الابتسامه بعدين شبحت للأبله..
وقفوا تصفيق والابله قالت:الترتيب لمجموعة اماني وربى وانبار...
ربى اضايقت هلبه...
وتسنيم شبحتلها وابتسمت بمكر...
صفقولهم حتى هما...
وبعد ماوقفوا تصفيق الابله قالت:احسن بحث واللي نال اعجابنا حني واساتذة كلية العلوم وحيقوموا بنشره وحتتعلق اسماء المجموعه متاعهم ع اللوحه الشرفيه وكل وحده فيهم تاخد عشرة درجات...مجموعة تسنيم وازهار وداليا..
تسنيم وازهار صاحوا من الفرحه وشدوا في ايدين بعض وهما يضحكوا..
وزميلتهم فرحانه زيهم...
والفصل قعد يصفقلهم ودانيه شاده دموعها بقوة...
الأبله؛ طبعا الباقي خدوا 5 درجات ماعدا الناس اللي ماسلمتش بحوثها...مررت نظرها عليهم وقالت...موفقات بناتي دائما...شبحت لدانيه وقالتلها..تعالي طلعي وراي الكراسات..
دانيه بصوت مبحوح؛حاضر..
وناضت لطاولة الابله خدت الكراسات ومشت طلعت وراها..
وازهار وتسنيم يشبحولها بشماته...
🍁طلعت برا ورا الأبله...
الأبله:اني مش محتاجه لبحوث بش تقوي درجاتك يادانيه انتي ممتازة ودرجاتك ديما كامله..
دانيه بحزن:مش قصة درجات ياأبله...
الابله؛فاهماتك تبي اسمك يتعلق ع اللوحه الشرفيه تبي البحث متاعك ينشر في موقع الكليه عندك الحق..لكن الامور هادي مرات يخش فيها النصيب وانتي ماعندكش فيها نصيب..
دانيه هزت راسها وقعدت ساكته...
وصلوا لحجرة المدرسات..
حطت الكراسات ع الطاوله ومشت طلعت..
وهي ماشيه اضطرت للحمام ...مشت نزلت بسرعه بس ماتفوتهاش الحصه اللي بعدها...
وبعد ماخشت للحمام وطلعت..
ومشت بتركب...شافت ابله الاحياء وهي تعلق في ورقه ع اللوحه الشرفيه..
ضايقت هلبه...
ومشت ركبت الدروج وهي شاده البيرو متاعها في يدها...
من قهرتها تبي تفش غلها في اي شي..
حطت ابهامها ع راس البيرو وهي تضغط عليه بقوة ودموعها نزلوا...
🍁في الدور التاني..
كانوا اسماعيل وجمعه ماشيين في الممر يهدرزوا..
اسماعيل:واني وبوي نخدموا فيه اداريين ومش معروف بعدين شن يصير..
وقفوا في بداية الممر وجمعه يقول..
جمعه؛علاش قلت هكي؟
اسماعيل؛زي ماقتلك صاحب المصنع متوفي من فتره ولتوا صغاره ماقسموش الورث بينهم يراجو في مرته تانيه تجيب قبل...الله اعلم من اللي يطلع من نصيبه المصنع وياخده والله اعلم يخلينا ولايقوللنا شكر الله سعيكم وتوكلوا...
جمعه:المصنع اكيد حيكون فيه اكثر من وريث..
اسماعيل بتهكم:المصنع في غيره مصانع وخير ماتاكله النار زي مايقولوا الراجل هدا من ملياردير ياصاحبي..
جمعه تنهد وقال:ان شاء الله يصير اللي فيه مصلحتكم وخلاص..
اسماعيل:ان شاء الله..الحق اني مش فارق معاي هلبه همي كله في بوي سنين من عمره وهو يخدم في هالمصنع صعبه عليه توا يطلعوه منه ويقولوله قعمز قي الحوش...
جمعه؛صح صعبه هلبه...
شويه شاف دانيه وهي راكبه من الدروج قعد يشبحلها واسماعيل يمرر في نظره بيناتهم...
وهي بدون ماتحس ضغطت ع البيرو بقوة لين جرحها..
تألمت ووقفت تشوف في صبعها انصدمت لما شافت الدم..
ولأنها عارفه طبيعة مرضها وخطورة الجروح لمريض السكر..
انفجعت وهي تقول:حي عليا ياربي..وبدت تبكي بخوف..
جمعه حول شنطته حطها ع الحيط ومشالها طول..
جمعه؛خيرك خيرك..
دانيه ببكي؛دم دم...
هو شد يدها وقعد يشوف في الجرح قال:ماتخافيش حاجه بسيطه..
جبدت يدها وقالت:للي زيي مش بسيطه..
جمعه مش متحمل يشوفها هكي قاللها :تعالي وراي..
دانيه:وين ؟
جمعه؛لأبله جازيه هيا..
مشي وهي مشت وراه وتبكي..
جمعه؛مش لهالدرجه تو يداووهولك ويغطوه ماتخوفيش روحك..
وصلوا لحجرة الاخصائيه..
جمعه:خشي..
هي قعدت شاده يدها وخشت داخل.
وهو شاد ضحكته..
واسماعيل واقف يتفرج من بعيد وهو مبتسم..شويه سمع صوت جيهان جاي من وراه...
ع طول مشي بسرعه وجي لجمعه خداه من قدام مكتب الأخصائيه..
جمعه؛خيرك!؟
اسماعيل:اوقف هني مرتك جايه من غادي..
وقف جمعه ع حيط..
وبان وكأنه واقف هو واسماعيل يهدرزوا..
وجيهان شافت شنطته قالت؛شويه ترا..وخدت شنطته رفعتها وكملت طريقها مع الأبله يهدرزوا..
لين وصلت فيه..
جيهان؛شنطتك ناسيها..
هو قدملها خداها منها وولى لمكانه...
وهي كملت طريقها مع الابله..
اسماعيل:والله ماني عارف مع من نتعاطف معاك ولامعاها..
جمعه شبحلها ع جنب بعدين.حرك راسه يسار وشبح لمكتب الأخصائية..
طلعت منه دانيه وهي تشوف لصبعها المغلف بالشاش الابيض ولصقة الجرح..
جمعه:مشت الامور.
هي يدوب شبحتله وهزت راسها..
اسماعيل؛لاباس دانيه..
دانيه بإبتسامه؛لايوريك باس استاذ حاجه بسيطه..
وكملت طريقها...
اسماعيل شبح لجمعه..
شاف ملامح الغضب ع وجهها وهو يشبح للطريق اللي مشت منها دانيه..
بعدين مشي...
ضحك اسماعيل ولحقه...
🍁🍁🍁🍁
وفي مكان بعيد هلبه...
في قارة تانيه....اوروبا....تحديدا مدينة زيورخ في سويسرا...
حوش في مكان جميل كله خضرة وطبيعة حلوة...
في وحده من دياره..
كان مقعمز ع سريرها بشر...
وقدامه بنته وصغاره وولده وطليقته...
بشر:مازال ماشبعتش منكم..
نرجس؛ولاحني بابا بس مجبورين..
نوال؛بنتك توا ولت مربوطه بخدمه معاش فاضيه زي زمان..
هو هز راسه وقعد ساكت...
اسيد؛نوفل قال بيجيك بعد مانروحوا..
بشر هز راسه وقال:امتى رحلتكم..
نوال:غدوة الصبح..
بشر:تمام...نوال تحتاجوا اي حاجه قولي...
نوال؛ماتشغلش بالك امورنا كلها تمام...
اسيد؛اني طالع الليله نتمم امور عندي بنعطل راهو..
نوال شبحتلها شويه بعدين هزت راسها وهي ساكته..
بشر:شني جدو ماجبتونيش اليوم.
نرجس؛بروا لجدو...
ومشوله بناتها وقعدوا يلعبوا معاه...
ونوال تشوفلهم وهي مبتسمه بس عقلها في مكان تاني.
🍁🍁🍁🍁
الساعة الواحده الاربع ظهرا...
نازلات من الدروج وقت الأنصراف..
وين وصلوا لوطا شافوا البنات كيف ملتمات ع اللوحه الشرفيه ومنهم تسنيم وازهار وهما طايرات من الفرح..
سارة؛تعوضيها حبيبتي في الأحسن..
دانيه رشفت وهي شاده دموعها ومشت وسارة لحقتها...
🍁وعند البنات المحتفلات...
كانت عيون ربى تشوفلهم بكره..
وانبار بضيق...
شويه شافت خالة تسنيم اللي تخدم مدرسه في المدرسه جت لبنت اختها وهي تقول:عارف سيما..
تسنيم؛تسلمي خويله..
خالتها:ديما الاولى بنت اختي وين ماتمشي..
وربى تشوف لخالة تسنيم بإزدراء..
:هي اني طالعه بس دقيقه وين انبار..
تسنيم؛نوبا
انبار؛نعم!
خالة تسنيم؛قولي لامك اليوم تسبقني للبوتيك بنعطلوا اني واختي عندنا مشوار..
انبار وهي منحرجه؛حاضر..
:تمام..اوينا سيما...
تسنيم؛تشاوات...
ومشت خالتها....
وهي قالت:هيا ربى ونوبا..
ازهار:طالعه معاكم..
تسنيم؛يللا..
ومشوا مع بعضهم طلعوا وربى مش طايقتهم..
🍁🍁🍁🍁🍁
الساعه الحاديه عشر ليلا...
بعد مااطمنت ان كل من في الحوش راقد..وبالذات بشر..
بهدوء وخفه
مشت للحجرة متاع كاميرات المراقبه وقفت وحده منهم.....
بعدين طلعت منها...
ومشت لمكتب بشر...
حطت المفتاح بإيديها اللي مغطيتهم بقلافز...وفتحت الباب بهدوء..
بعدين خشت وسكرت عليها...
مررت نظرها ع المكتب الكبير...وهي تفكر وين ممكن تلقى مبتغاها..
هي متأكده مليون في الميه ان بشر محتفظ بأي شي يشده ع الجماعة اللي يخدم معاهم لأنه هادي عادته من زمان.بش يضمن نفسه..
ولان ماعندهاش وقت..
قعدت دور في المكتب كله...
الأدراج...والدواليب...وماكان في اثر لأي شي..
وقفت في وسط المكتب وحطت ايديها في نصها وهي دور بعيونها وتفكر...
جو عيونها ه مرايه طويله معلقه ع الحيط...
من طولها كانت وكأنها باب...
شبحتله شويه بعدين قدمتلها.
حطت يدها عليها وقعدت تحرك فيها بس بدون فايده.ماحصلت شي..
تأففت وقالت؛في هني شي متأكده..
وخرت خطوه حست بشي تحرك تخت رجليها نزلت عيونها لوطا كان في قطعة فرشه صغيره...
قعمزت ع ركابها وحولتها...
قعدت تتفحص فيها بيدها...ماكان في شي غريب بلاط زيه زي الموجود في ارضيه الدار..
وخرت شعرها ورا وذنها وتأففت بتذمر..
نوال بهمس؛معقوله حتى في هادي نطلع غالطه..!
خبطت البلاط بيدها بعصبيه...
بعدين قامت عيونها...جو ع شي لفت نظرها...
المرايا من تحت في فراغ بسيط..
قعدت تشبحله شويه..بعدين قربت وحطت يدها من تحت..
ارتسمت ع وجهها ابتسامه فرح....
كانت في زر للمرايه من تحت...ضغطت عليه...
فجاه..
بدت المرايه ترقى فوق..
هي بعدت وقعدت تشوفلها كيف ترقى لين وقفت..شافت داخلها..
لقت خزنه الكترونيه لونها اسود..
عضت ع شاربها وقالت؛زعمه شنو؟..
وقربت منها...وبدت تحط في ارقام..
مرة تاريخ ميلاد نرجس...
ومرة تاريخ ميلاد امه...
ومرة تاريخ ميلاد بنات نرجس..
ومابتش تفتح..
هي حطت يدها ع فمها وقالت:شن بيكون يعني!؟؟
وقعدت تفكر هلبه وتعصر في دماغها....
فجأه..
《نوال:كان ع كل حاجه بتربحها دير حفله مايقعد عندك شي..
ضحك وقال:الحفلات هادم مربحهم اكثر بهلبه العلاقات اللي نكسبهم من الحفلات هادي يدخلوا عليا ذهب...
نوال بتهكم؛باهي عيد زواجنا قرب دير حفله تانيه زياده الخير خيرين...
بشر:تس..زواجي منك انجاز نحتفلوا بيه بينات بعضنا اني وياك بس...اصلا ياعسل انتي اعظم انجاز في حياتي من لماخديتك واني ديما رابح...》
عضت ع شاربها شويه..بعدين كتبت سنة زواجهم...
وماانفتحتش..
نوال بتذمر:اووف اووف اوووف...
بعدين وخرت وقعدت تشوف للخزنه بغضب..
شويه غمضت عيونها..خدت نفس وقالت...يارب...ساعدني يارب دلني...انت اللي تعرف..الهمني يارب...
لحظات...
وفتحت عيونها...وقربت من الخزنه وقالت:اخر مرة خلاص..
وكتبت السنه اللي انولدت فيها...
وانفتحت الخزنه...
مطت شواربها للأسفل وحركت راسها يمين ويسار بأسف ع نفسها...اللي كانت بالنسبه لبشر ملك من ممتلكاته اللي يتباهى بيها..مراة صغيره في السن وجميله...
بعد انفتحت الخزنه مالقتش فيها غير شي واحد بس..
فلاش...
ضحكت وقالت؛زي ماتوقعت...حبه للأسود يطلع عليه..
وحطت يدها في جيب بنطلونها...
🍁في هالوقت ..
بشر فاق...وشرب ميه...بعدين قعد مقعمز يفكر شويه...
شبح للباب وناض..
ومشي للباب...فتحه وطلع من الدار...
قعد يمشي وهو يفكر..
لين وصل للمكتب شبحله شويه..
بعدين مشي للباب...حط يده ع المقبض وفتحه..ماباش ينفتح..غمض عيونه وقال...اييه نسيت بكل مسكر بالمفتاح..
ولف بيجيب المفتاح من المكان الموجود فيه..
كان ع رف لمكتبه موجوده في الصالون..
خداه ومشي بيفتحه...لمح الدار اللي فيها نوال..
ضيق عيونه..بعدين غير طريقه ومشي لدارها..
وقف قدامها..وفتح الباب طول..
شافها مقعمزة ع سريرها تقرا..
هي غطت شعرها بالبرنوس متاع الماليه وقالت؛كيف تخش عليا هكي..
ابتسم تهكما وقال؛تغيرتي هلبه..
قعدت تشبحله ودقات قلبها سريعه جدا من الخوف..
بشر؛مانبيش تولي..
عقدت حواجبها بإستغراب..
بشر:اني نبي..
هي بغضب قالت:بشر اطلع برا ..
ضحك وقال؛هدي هدي..نبصر معاك..
نوال:اطلع لوسمحت..
هو تنهد وقال:حاضر..
ولف ومشي وطلع من الدار وسكر الباب..
هي غمضت عيونها وزفرت براحه...
🍁لكن هو بعد ماطلع من عندها..
مشي لغرفة المكتب..
فتحها بالمفتاح..
وخش...
سكر وراه الباب...مرر نظره ع المكتب...بعدين شبح للمرايه..
ومشالها...قعمز لوطا بشي من الصعوبه..
وحط يده تحت المرايه...وضغط ع الزر..انفتحت...
قرب للخزنه وكتب الرمز...
انفتحت...شاف في وسطها..
لقي الفلاش موجود في مكانه.
تنهد وسكرها.. وناض وقف..رد المرايه زي ماكانت..
ومشي طلع من المكتب وسكر الباب بالمفتاح..
🍁🍁🍁🍁
وتاني يوم..
من ساعات الصباح الأولى...
جهزوا نفسهم وودعوه...وتوجهوا للمطار..
ونوال على اعصابها...
ماأرتاحتش...لين ركبت الطيارة وطارت بيه بعيد عن بشر..
🍁🍁🍁🍁🍁
الساعه الحادية عشر إلا ثلث..
خشوا بنات سنة ثالثه ثانوي للفصل..
لقوا استاذ الفيزياء الحراريه يراجي فيهم كالعاده..
اسماعيل:كراسات الواجب ...واشر بيده ع طاولته..
وكل وحده طلعت كراستها من شنطتها بسرعه وحطتها ع طاولته...
وكانوا اخر من حطوا كراساتهم تسنيم وازهار..
قعمزوا البنات في مقاعدهم..
وهو قال؛اليوم بنحلوا مع بعض المسائل اللي عطيتهم واجب..
واللي حيشاركوا الطالبات اللي درجاتهم ضعيفه في الاختبار..
شبح للاب توب وسمى اول وحده...
وناضت بش تحل اول مسأله..
وهو بدي يشوف في الواجب..
خدي كراسة ازهار وقعد يشوف فيها..
والطالبه تحل في المسأله بروحها ع السبورة وهو مرة يشوف كان في وحده تتجرأ وتغششها...
خدي البيرو ووقع ع كراسه ازهار وحطها ع تركينه..
وشاف لحل الطالبه:تمام بس في عندك غلطه..
وقعد يشرحلها في غلطها وصلحاته..بعدين خشت..
ونادى ع طالبه تانيه..طلعت...
وهو خدي كراسة تسنيم..وفتح ع الواجب...
ضيق عيونه وهو يقرا في شي مكتوب في الكراسه..
بعدين توسعوا ....غيرهم عن الكراسه وشبح لدانيه...
اللي كانت مركزة مع الطالبه اللي تحل ع السبورة...
عقد حواجبه وغير عيونه عنها وشبح لتسنيم اللي كانت تتناقش مع ازهار...
شبحلها شويه بعدين قال بصوت مخيف:تسنيم..
كلهم شبحوله..
والبنت اللي كانت تحل وقفت وقعدت تشوفله..
تسنيم وهي مفجوعه:نعم؟
ناض وفي يده الكراسه..ومشالها وقف قدامها ومدلها الكراسه وقال:اقري بصوت عالي..
هي بلعت ريقها وقالت بخوف:علاش..في غلط في..الواجب!؟
اسماعيل؛خودي...
هي خدت الكراسه..ومازال تبلع في ريقها..
بعدين شبحت للكراسه...وشافت شن فيها..
انصمتت...وقعدت ترعش...
اسماعيل: اقري...
وهي ترعش وتشبح للكراسه وعيونها مفتوحات ع وسعهم..
والبنات يشبحولها...
وازهار بدت تخاف حتى هي...
اسماعيل وصل حده بصوت قال؛اقري..
هي انتفضت من الفجعه..
ودموعها عبوا عيونها وبدوا ينزلوا...
والعيون عليها وكلهم خايفين وعندهم فضول يعرفوا شن اللي شافه في الكراسه..
ماعدا وحده بس...عارفه شن موجود فيها..لأنها هي اللي كتباته...
#gray_cat
#البطل_المغمور2
.....يتبع....
