#البطل_المغمور2 "زهور القمر"
#جمان_فريد
#الجزء_الخامس_والثلاثين "راجعين ياهوى"
رمضانكم مبارك..
قال رسول الله صلى الله عليه وسلم(ايعجز احدكم ان يكسب في اليوم الف حسنة؟فسألة سائل من جلسائه:
كيف يكسب احدنا الف حسنه؟..قال:يسبح مئة تسبيحه فيكتب له الف حسنة او يحط عنه ألف خطيئة)
صحيح مسلم..
💐💐💐💐💐💐💐💐💐💐💐💐💐💐💐💐
الساعه الثامنه صباحا...
واقفه في الكوجينه تفطر ع الواقف مستعجله بتمشي للمستشفى...
سمعت حس دوشه برا وهدرزة بين بوها وخوتها...
استغربت ولما جت بتطلع تشوف شن في...
وقفها تليفونها لما رن بنغمة رسابه...
طلعاته من جيب كبوطها وفتحتها...
(تعالي الساعه تسعه للجردينه اللي نتلاقوا فيها ضروري)
عقدت حواجبها بإستغراب وقلبها انقبض..
ع خشة امها وهي تقول بأسف؛لاحول ولاقوة الابالله..
شبحتلها وقالت:شن في!؟
امها:ضرار ولد عمك لقوه الصبح في شارعهم ملوح وواكل طريحه نباش القبور...
مريم وهي تسمع في امها شن تقول...
وربطت اللي قالاته برسالة داوود...
عقلها قاللها انها اليوم ع موعد مع خيبة جديده ووجع جديد...
مريم في كل يوم ليها مع داوود بالرغم السعاده اللي عايشتها الا انها كانت ديما عايشه في خوف واحساسها كان ديما يقوللها ان في شي حيصير...
استاقظت من تفكيرها لما قالتلها امها؛فطرني..
مطت شواربها لداخل وقالت؛اممم..هي بالسلامه يام توا عطلت...ومشت طلعت..
وامها تقول؛في أمان الله بنتي ربي يفتحها عليك...
🍁طلعت مريم من الحوش وهي تسمع في كلام بوها وخوتها ع اللي صار مع ضرار..
وقلبها يدق بقوة من الخوف..
قعدت تمشي ع رجليها لين وصلت في اخر الشارع..
لقت الباص التابع للمستشفى مشت ركبت فيه..
ومن خوفها لين بدت تذوق في طعم ريقها مرار...
وصلها للباص للمستشفى..
هي منها مشت ع رجليها مسافه لين وصلت في الجردينه...
كانت شبه فاضيه..
مشت قعمزت تحت الشجره اللي ديما يقعمزوا تحتها...
غمضت عيونها وبدت تردد..
"حسبي الله ونعم الوكيل"
مرات ومرات...لين سمعت حس سيارة..
فتحت عيونها وقالت؛يارب قوة...يارب صبر...يارب اجر...يارب تكفير ذنب...
وهو نازل من السيارة مشالها..
هي ناضت وقفت ومازال تدعي..
يارب قوة..يارب صبر...يارب اجر...يارب تكفير ذنب...
وصل فيها وقال:السلام عليكم..
وهي تشوفله وعيونها معبيات؛وعليكم السلام..
داوود بملامح وجه متجهمه؛سمعتي باللي صار لولد عمك ولا...
هزت راسها بإيجاب ودموعها نزلوا..
هو بإنفعال؛تعرفي شن جي قالي امس...اللي قاله امس طيرلي عقلي من راسي ماخليتاش يكمل كلامه طحت فيه ضرب واني مش واعي لروحي قريب قتلته...
هي تشبحله ومش قادره تنطق...
داوود بإنفعال؛قولي تكلمي اللي قاله كذب ولا...يكذب الوسخ هدا ولا...تكلمي...اقسم بالله يامريم لو قلتي كذب نصدقك...والله نصدقك...انتي قولي كذب بس...
مريم ودموعها ينزلوا قلبها وجعها عليه.....
ذنبها وقت كان مستور كان ضميرها مرتاح لأن الشرع يقول ان الانسان وقت يدير ذنب ويسيبه والله يستره عليه مايفضحش نفسه..
لكن توا المستور انكشف...وماينفعش معاه سكات...
لوكذبت توا حتخدعه....وهي تفضل انها تنفضح قدامه ولاتخدعه....
داوود بإنفعال شديد ودموعه في عيونه؛قولي كذب...
"مش كذب"
تبدلت ملامح وجهه للإحباط..وغمض عيونه بألم..
وهي تشوفله ورجعت لحالة الصمت..
فتح عيونه وقاللها؛هدا علاش طلقك جهاد...
مريم بصوت مخنوق؛كان يعرف من قبل..هدا علاش تزوجني..
هو ضحك بصدمه بعدين قال؛معناها زوز اللي كانوا يضحكوا عليا مش واحد...زوز اللي هزوا عليا مش واحد..
كلامه كان اشبه بالسكاكين اللي تمزق في قلبها تمزيق...
داوود؛علاش يامريم ديري فيا هكي علاش!!؟ ع خاطر جيتك بنية صافيه وقلب نظيف وحطيك فعيوني...ديريتي مضحكه يامريم ومسخره...
هي مش قادرة تقول كلمه مش قادره دافع عن روحها..
قاعده تنكسر من داخل وخلاص..
حرك راسه يمين ويسار وهو يقول...علاش هكي يابنت الناس حرام عليك...ولف وقعد يمشي القدام..
وهي تبع فيه بعيونها وخلاص...
شويه والتفت وجاها وهو يقول؛تعرفي اني معاش نقدر نكمل معاك ولا خلاص....
مريم بصوت مخنوق؛عارفه...
داوود؛بنطلقك بس مش فاضحك قدام حد...بنخليها تجي منك انتي...قعد يفكر وهو يقول...قولي سكر راسه ومعاش يبيني نخدم يبيني ناخد الشهاده ونقعمز واني لأني عطيتك ماليك كلمه في حكاية الخدمه...راضي نطلع مش راجل في الحاجه هادي..ونخسر صاحبي..نخسره خير مانقعد معاه واني.......وسكت وشبحلها...شاف دموعها سيل ع خدودها ووجهها مولي شاحب...
وجعه قلبه اللي يحبها عليها قاللها بألم؛علاش هكي يامريم علاش..علاش درتي في روحك وفيا هكي..
ومازال تشوفله بنفس النظرات ودموعها مابوش يوفقوا...
غمض عيونه بشده...وقربها ليه واحتواها لأخر مرة ...
قعد يبكي...قعد يبكي بقوة....
مابكاش هكي في حياته كلها....
بكاء حسرة..والم وصدمه..وقهر...
وهي كانت شاده فيه وتبكي بالصوت...
بكاء ندم...ندم....ندم...شديد ع اللي داراته في روحها...
وحتقعد لأخر يوم في عمرها عايشه حالة الندم ع ذنب خسرها اعز ماتملك وكل ماله يزيد يخليها تخسر اكثر واكثر...
بعدوا عن بعض...
هو قعد يمسح في دموعه....
وهي منزله عيونها لوطا ومازال تبكي بألم...
شبحلها وقال:ربي يسامحك...ربي يسامحك...
ولف ومشي وخلاها..
هي رفعت راسها وقعدت تشبحله وهي تبكي بحسرة...
لين ركب سيارته وتحرك....وابتعد...واختفي..
طلعت من قلبها آاه..بصوت يحس منه اللي يسمعه مدى الألم اللي تحس بيه...
قعمزت تحت الشجره وضمت ركابها وغمت وجهها وقعدت تبكي وتبكي وتبكي....
وهادي المرة الاولى اللي ماتعترض فيها مريم ع اقدار الله...
وقعدت تردد بصوتها الباكي...
يارب قوة...يارب صبر..يارب اجر..يارب تكفير ذنب...
🍁🍁🍁🍁
"شن تقولي انتي"
دانيه بدموع وملامح الغضب باديه ع وجهها؛اني لتوا مش مستوعبه ياسارة صدمة عمري...خسارة ماكنت نخاف منه ونشوف فيه حاجه كبيرة...طلع تافه وحقير ياسارة...
"والله ماعارفه شن نقولك مش مستوعبه بكل"
دانيه؛ومش هكي وبس اسماعيل التافه التاني يوم يجي ويقول لرتاج نحبك ويوم يقول مش مستعد نخسر ع خاطرها امي ضرباتك ع ايدك يانذل وقالتلك حبني..لكن احسن مادارت معاه وين لازاته اني كنت عاتبه عليها لكن طلعت تعرف تتصرف...
فجأه..
انفتح باب الدار وخشت رتاج..
دانيه من الخوف سكرت ع سارة..
سكرت رتاج الباب وقدمتلها وهي تقول؛شن صاير قولي...
دانيه قعدت تشوفلها...
رتاج بغضب؛تكلمي يادانيه..
دانيه بلعت ريقها بخوف وهي تشوفلها....
•••••••••
نزلت من الدروج بسرعه..
ومشت للصالون وين مامقعمزة امها وقفت قدامها وقالت؛يام..
امها وهي توكل في كنعان؛نعم...
رتاج؛بعدين كلمي لطيفه كعبار وقولليها موافقه..
ومشت من حدا امها وخلتها مصدومه ومش فاهمه شي..
🍁طلعت برا الحوش وركبت السيارة..
والسواق تحرك بيها للمصنع....
•••••••••
في المصنع..
وهي واقفه تكلم في مدير شؤون الموظفين..
رتاج؛الزوز يلموا قشيشهم ومعاش نبي نشوفهم في المصنع...ايه وعطيهم مكافأة اخر الخدمه..
:حاضر استاذه...
هي لفت ومشت طلعت من المصنع بطريقها للسيارة..
ركبت فيها..وتحرك بيها السواق لواحد من الاماكن اللي يتنفد فيها مشروع ليها....
🍁تعلمت رتاج تكسر وماتنكسرش تعودت تكون شديده مع اي حد يوصل فيها وفي عيلتها تعلمت تعاقب طول ومعاش تفوت...تعلمت تقدم مصلحتها حتى ع عواطفها...تعلمت تتعامل مع الناس بعقلها وبس🍁
🍁🍁🍁🍁🍁
ومن رتاج لمريم..
اللي عاشت كسر جديد في حياتها...
وهالكسر مايكونش لمريم بروحها حتى اهلها معاها...
•••ام مريم وهي تبكي:ياحي عليا ياحي العار البنت تطلق مرتين مرتين ياحاج..
بومريم:هو اللي طلع مش قد كلامه عطانا كلمه وولى فيها..
ام مريم:وشن فيها كان قعمزت شن بدير بيها الخدمه هي..
بومريم:ماتعتبش ع بنتي وقريتها السنين هادي كلها بش في الاخير تقعمز في الحوش..وبعدين بنتك هي اللي شاده في الصحيح..
خبطت ع رجليها وقالت؛وانت تسايرها عادي في كل شي! راهي مطلقه قبل بتولي تطلق مرة تانيه طلاق هدا طلاق فاهم شن معني طلاق ولمراة...
بغضب قال؛سكري عليا فمك ونوضي من حداي نوضي...
ناضت مرته وهي تقول؛اقعد فيها...يساعد في بنته ع الخراب مايحسابش روحه يدمر فيها هكي...
وطلعت من حداه..
وخلاته مقهور ومحروق قلبه ع بنته وحظها...
••••••
داوود؛طولت لسانها قالت انت مش راجل وماعندكش كلمه...
معاذ؛حتى انت ربي يهديك علاش تولي في كلامك مش كنا متفقين هدا الشرط اللي شرطناه عليك في العقد ياراجل...
داوود؛بعد ماشفت الوضع مايساعدنيش يامعاذ وين جيت بنتفاهم اني وياها علت صوتها وطولت لسانها وطيحت القدر بيني وبينها سامحني يامعاذ معاش نقدر نستمر..
معاذ:تلعب انت داوود..
داوود؛ايييه علينا....نقولك حاجه سميها كيف ماتسميها اني قراري وخديته مراة دير معاي هكي وتطلب الطلاق ماتلزمنيش وماتصلحش بيا .
معاذ شبحلها بإحتقار بعدين قال؛سامحني اللي عرفتك في يوم ودرتك صاحبي....ومشي عنه وخلاه..
خلاه يعاني في ألم جرح عميق وصعب...وجعه اشبه بطلوع الروح...
🍁وماوقفتش الحكايه عند هني باقي خوتها دارو مشكله كبيره مع داوود وكانت حتوصل للضرب...
لأنهم مااقتنعوش بالاسباب اللي دفعاته لهالشي...
والمشكله نفسها صارت لمريم اللي قدامهم اصرت ع طلب الطلاق والاسباب في نظرهم كذلك مش مقنع...
ومع الاخد والرد وكثرة المشاكل...
طلق داوود مريم...وانكسرت مريم من جديد...
بس هالمرة...حملت بين ايديها قلبها المكسور ومشت بيه لرب العالمين بش يجبره...
ومن اول رمضان وهي انعزلت عن الجميع وقعدت حبيسه دارها... متمسكه بالدعاء اللي قعد بالنسبه ليها زي النفس..
واملها كبير في الله انه كل شي قدره عليها فيه كل خير ليها وادنى هالخير...تفكير الذنب....
🍀🍀🍀🍀🍀
وتمر الشهور....
والجروح تبدا تلتئم ....
والحياة ترجع لطبيعتها....
وهيثم اللي قاعد يخدم جميع الاصعده...
ويزيد يكبر اسمه...وينتقل من نجاح لنجاح.....
بس اهم نجاح ليه اللي يكون مع صغاره اللي قاعدين يزيدوا تعلق بيه اكثر من قبل...
زياد اللي كان مركز ع مستقبله تركيز كبير...ولى محط اهتمام بنت الجيران اللي بدت تشوف فيه مواصفات فارس الاحلام بأخلاقه ورجولته وطموحه...وقوة شخصيته...
وقعدت داسه هالمشاعر في قلبها وتتمنى لو يحس بيها اويلاحظها..
وهو يتمنى لو تحس بيه او تلاحظه...
وبرغم ان مشاعرهم ولت واضحه قدام الكل بس هما الزوز مايشوفوش فيها...
🌼وماتبيش تشوفه...
مهما يدير ماتبيش تشوفه...
هادي دانيه...اللي بعد ماولوا للكليه بعد عطلة نص السنه..
كانت متجاهله الشايبي تجاهل تام..تحضر في محاضراته وتعامل فيه معاملة اي دكتور يقري فيها..
وهو كذلك مازال محافظ ع صورته وشخصيته قدام الطلبه...
بس على عيونه ماعنداش سلطان العيون اللي ديما يحاصروا فيهم...وبرغم انها تتوتر منهم بس قعدت تتجاهل فيهم....
🍁اما اختها رتاج انخطبت لرجل الاعمال المعروف عبدالحميد كعبار...واخبار ارتباطها انتشرت بشكل كبير..
خلا شغلها يكبر اكثر والمشاريع والشراكات تتهافت عليها..
ورشيد خوها اللي كان يستعد لأمتحانات الشهاده الثانويه ماأهمل الخدمه مع اخته..وولى مع الوقت متمرس فيها ومثار لإعجاب كل من يعرفه...
واخته بانيه عليه امال كبيره...
علاقتهم ببوهم.مازال سطحيه...ومع هذا قاعدين يبعتوله في الفلوس من وقت للتاني..ومقبوله قاعده تحاول تقوي علاقتها بيهم لكن محاولتها كلها عبث..عارفينها وعارفين طينتها ومستحيل يدخلوها فيهم مهما دير...
اما عن علاقتهم بعيلة اسماعيل انقطعت تماما...
واسماعيل غيظا من اللي داراته فيهم خطب وتزوج بعد رمضان مباشرة....
وزادت تأكدت رتاج انها تصرفت معاهم صح....
🍁🍁🍁🍁
نهاية السنه....
طالعه تمشي بسرعه من قاعة الامتحان وهي فرحانه ومش شايفه شي قدامها اخر امتحان وابلت فيه بلاء حسن...
فجأه...
حست روحها خبطت حد وسمعت صوت حاجه تتبزع...
دانيه بصدمه؛اسفه ماشفتكش..
هو وفي يده شيشة الميه ويشبح لسوريته شبحلها وقال:ماشفتنيش!؟
قعدت تشبحله وهي ساكته...
هو ابتسم ع جنب ووسعلها وقالت؛تفضلي..
هي نزلت عيونها وهربت منه طول...
وهو قعد معاها بعيونه وبإبتسامه قال؛اهربي اهربي...
لف ومشي وهو يقول بإبتسامه...بعدين تحصلي...
🌼وهي وصلت في صاحباتها...
سارة؛وينك لتوا..
دانيه؛تلاقيت اني والحصله هداكا..
تهاني بالضحكه؛الدكتور الشايبي..
دانيه؛ايه مسيلمه الكذاب..
سارة بضحكه؛شن دارلك..
دانيه؛اني درتله خبطه وبزعت عليه شيشة ميه خلينه منقع...
قعدوا يضحكوا الزوز...
سارة بضحكه؛شن كانت ردة فعله..
دانيه؛وسع وخلاني نفوت...
تهاني؛طبعا يخليك تفوتي يااوركيديا..
سارة بضحكه؛يازهرة الاوركيد انا في حبك جبار ومتغطرس وعنيد...
دانيه؛على روحه....خلونا منه وقولولي شن درتوا في الامتحان..
تهاني؛عكيت شوي..
سارة؛الحمد لله كله تمام..
دانيه؛حتى اني الحمد لله كله تمام...
تهاني؛ان شاء الله نصفيها..
سارة؛تصفيها بإذن الله ماتخمميش فيها هلبه..
دانيه؛ان شاء الله كلنا لسنه رابعه..
سارة وتهاني؛يارب...
دانيه تنهدت وقالت؛وتوا بنخشوا في موال عرس رتاج..
تهاني بإبتسامه؛ربي يكمل ع خير..
دانيه ابتسمت وقالت؛آمين...
🍁🍁🍁🍁🍁
ودارت رتاج عرس كبير....اسطوري بدون مبالغه...
اللي انحرمت منه في زواجها الاول داراته كله توا اضعاف ماكانت تتمنى..
كل من حضر العرس قعد يحكي بيه شهر لقدام...وياما منهم اللي حسدوا رتاج ع حظها الحلو في نظرهم....
طبعا انتقلت في العيشه مع راجلها للنمسا وولدها قعد مع اهلها....
🍀🍀🍀🍀
وطلعت النتيجه....
نجحوا الثلاته دانيه وتهاني وسارة وكانت فرحتهم بنجاحهم في هالسنه الحاسمه كبيره..
وكل وحده فيهم اهلها احتفلوا بيها...
🍁في حوش هيثم..
في الصاله...
ملتمين يهدرزوا..
زياد؛اني نشوف في سنه رابعه مرحلة ممتعه في القرايه في كسر لروتين المحاضرات...اللي ماحضرتش منهم شي..وضحك....
هيثم؛صح المرحله اللي تكون في المستشفى امتع...
ماجده؛باهي قولولي خليل كيف دار وهو في الحبس..
زياد:خليل قري في مستشفيات السجون ياخالتي وتحت حراسه مشدده...
نسيبه بإبتسامه قالت:اخر مرة كلمته فيها قالي كنت في مستشفى الجديده..
زياد؛ايه مرحلة القايني غادي...
هيثم؛نساء وولاده..
ماجده:كلا خليل هدا الله يبارك عليه راجل وقد الحمل يقيمه..
ابتسمت نسيبه..
زياد؛اسأليني عنه ياخالتي...من كان يدعم فينا معنويا غيره هو...
هيثم؛عنده قوة ايمان عجيبه يحسد عليها..
ماجده ؛ربي يفرج عليه عاجلا غير آجل ويروح لعويلته..
ابتسمت نسيبه وعيونها مليانات دموع وهي تقول؛آمين...
وهما يهدرزوا...
والتوأم الزوز يتهامسوا..
جنان؛هيا قوليله توا..
ريحان ؛باهي..خدت نفس وشبحت لبوها وقالت؛بابا..
شبحولها..
هيثم؛نعم بابا..
ريحان؛بما إن ذكرى ميلادنا كانت اول امس معناها قداش ولى عمري..
هما ابتسموا بإستغراب..
هيثم وهو رافع حواجبه؛11سنه..
ريحان؛كويس معناها بنخش صف سادس معناها بنخش ل...نادي كرة السله..
ضحكوا...
هيثم؛قصدك انتي قاعده شاده في الموضوع؟
ريحان؛كيف يادوك مش وعد هو؟!
ضحكوا عليها وماجده قالت بضحكه؛هالبنت ماتنقدر..
نسيبه؛حب عمتو..وبعتتلها بوسه طايره..
ريحان ردتها..
وهيثم يمرر في نظراته بيناتهم قال:ربي يعيني...
ضحكوا..
وزياد قال؛لامفر يادوك.. شبح هيثم لريحان شويه وهي تشبحلها بتوسل...
هز راسه بآيجاب وقال؛حاضر..
هي طول ناضت تجري وتلوحت عليه وحضناته وهي تقول؛نحبك نحبك بابتي..
هيثم وهو مخنوق؛ومن الحب ماقتل..
وكلهم يشوفولهم ويضحكوا....
🍁🍁🍁🍁🍁
اليوم التالي...
في كلية الطب..
مكتب نائب العميد..
مريم؛خير دكتوره لقيتكم طالبين حضوري في اعلان..
الدكتورة؛خير يامريم...طبعا مريم كنتي من ضمن العشرة الأوائل ع الدفعه متاعه...الثالثه...وزي ماتعرفي ان البعثه للخارج ياخدها صاحب الترتيب الاول في العاده..بس السنه هادي استاذة نوال فتحي وحده من الناشطات المعروفات في مجال الدفاع عن حقوق المرأة...تكفلت ببعثه لطالبتين ضمن العشرة الأوائل وانتي وحده منهم البعثه حتكون لبريطانيا..
مريم قعدت تشبح للدكتورة بدهشه ومش عارفه شن ترد..
الدكتورة؛شن قلتي يامريم...
مريم تنحنحت وقالت؛والله شن بنقولك فاجئتيني هلبه الحق..ويعني الموضوع مش ساهل يبي اجراءات وهلبه حاجات..ويعني من بيمشي معاي..
الدكتورة؛مازال قدامك وقت تمي فيهم امورك والمواضيع التانيه بخصوص وجودك غادي كلها متكفله بيها السفاره الليبيه في بريطانيا...
مريم ابتسمت وهي متفاجئه قالت؛بجديات يعني...مازال مش مستوعبه الحق...
الدكتورة بأبتسامه؛ع العموم لما تحسمي امرك اتصلي بيا خلال هالأسبوع...
مريم بإبتسامه؛إن شاء الله...
•••••••••••••
"سفر شني هدا"
بوها قال؛غير اسكتي يامراة خلينا نفهموا..كم تقعدي عادي كان مشيتي..
مريم:تقريبا عامين..
بوها قعد يفكر...
واحد من خوتها؛امشي واني معاك..
شبحوله وهما متفاجئين...
بوه قاله؛تقدر ع العيشه غادي انت..
رد عليه يقول؛نقدروا ياحاج علاش مانقدروش مامنهم اللي عاشوا غادي وتأقلموا ومشوا امورهم...وبعدين اني خاطري نكمل قرايه غادي اني.طالع من هندسه كهربائيه باحاج والاول ع دفعت غير نظام البعتات هدا وقف ع وقتنا...
امه قالت؛خليه يمشي مع وخيته ويأمن مستقبله اهو واحد فيهم يطلعلي حاجه كبيره بعيد عن هالورشه..
مريم فنصت في امها..
بوها قال؛اهو بدت تلبز..
امها قالت:سامحني ياحاج والله ماقصدي المهم توا شن قولك..
رجع شبح لبنته اللي قلبه واجعه عليها وحس ان البعثه هادي فرصه وجتها لعندها بش تبعد وتنسى اللي صار معاها..
ابتسملها وقالوا؛بروا مربوحه ان شاء الله..
ابتسمت مريم بفرح وشبحت لخوها اللي كان يشبحلها بإبتسامه...
وبوها يتأمل في فرحتها ويدعيلها في قلبه ربي مايوريها هم اكثر من اللي راته....
🍁🍁🍁🍁🍁
في احد نوادي تدريب كرة السله للبنات..
خشت سارة ومعاها ريحان وجنان وين مافي الملعب..
وهما يتفرجوا ع بنات في عمر التوأم يدربوا ع لعب كرة السله..
كانت ريحان تتفرج بإنبهار وشوق وحماس...
تشوف فيهم كيف يلعبوا وخاطرها تخش معاهم...
فجأة..
الكرة بالغلط جت لعندها..
هي طول شدتها..
شبحولها البنات ومعاهم المدربه..اللي شافت لسارة وحيتها بحركة اليد وسارة ردت عليها..
شبحت المدربه لريحان وقالت؛ردي الكورة..
جنان شدت بإيديها الزوز بروس صباعها وحدفتها..
شدتها وحده من اللاعبات..وكلهم يشبحولها بإعجاب..
رميتها رمية لاعبة لكرة السله مش رمية وحده جايه تتعلم فيها..
ابتسمت المدربه بعدين صفرت بالصفاره..
كملوا البنات لعب وريحان تتفرج عليهم وهي متسهفه ع اللعب..
سارة؛من توا خلينا نتفقوا ماتخلي شي يأثر ع قرايتك...القرايه قبل كل شي..
ريحان وهي تبع بعيونها في حركة اللعب قعدت تهز في راسها مسايرة وهي تقول؛حاضر..وهي مش عارفه اختها شن تقول...
وجنان تشبحلها وهي شادة ضحكتها....
☘☘☘☘☘☘☘☘☘☘☘☘☘☘☘☘
بعد مرور سنتين وتسعة اشهر...
"ريحان"
خدت ريحان الكرة من زميلتها وقعدت تجري بيها وهي تضرب فيها ع الأرض...
وتخطت زميلاتها لين وصلت في السله ونطت وحطت الكورة فيها ونزلت...
صاحوا زميلاتها اعجابا..
هي بإبتسامه مشتلهم ووقعدوا بإيديهم يطقوا في ايديها تحيه.منهم ليها ع ابداعها في اللعب..
المدربه؛برافو ريحان برافو..
ابتسمت وشبحت لمدربتها ورفعت ابهامها ليها....
وفي المدرج...
واقف من بعيد المثنى لاعب كرة السله المحترف حاليا وهو يتفرج عليها بإعجاب شديد....
#راجعين_ياهوى
#البطل_المغمور2
....يتبع.....
